໓໗. ສລ຺ເລຂຏ຺ຐຎາຓນິທ຺ເທສວຓ຺ຓນາ

໘໘. ສລ຺ເລຂຏ຺ຐຎາຓນິທ຺ເທເສ ຣາໂຄ ປຸຖູຕິ ຣາໂຄ ວິສຸໍ, ໂລກຸຕ຺ຕເຣຫິ ອສມ຺ມິສ຺ໂສຕິ ອຕ຺ໂຖ. ເອສ ນໂຍ ເສເສສຸ. ຣາໂຄຕິ ຣຎ຺ຊນຏ຺ເຐນ. ໂທໂສຕິ ທຸສ຺ສນຏ຺ເຐນ. ໂມໂຫຕິ ມຸຍ຺ຫນຏ຺ເຐນ. ຣຎ຺ຊນລກ຺ຂໂຓ ຣາໂຄ, ທຸສ຺ສນລກ຺ຂໂຓ ໂທໂສ, ມຸຍ຺ຫນລກ຺ຂໂຓ ໂມໂຫຕິ ອິເມ ຕໂຍ ສີສກິເລເສ ວຕ຺ວາ ອິທານິ ປເຠທໂຕ ທສ຺ເສນ຺ໂຕ ໂກໂຘຕິອາທິມາຫ. ຕຕ຺ຖ ກຸຊ຺ຌນລກ຺ຂໂຓ ໂກໂຘຕິ ອິຘ ສຕ຺ຕວຕ຺ຖຸໂກ ອຘິປ຺ເປໂຕ. ອຸປນນ຺ຘນລກ຺ຂໂຓ ອຸປນາໂຫ, ທຬ຺ຫຠາວປ຺ປຕ຺ໂຕ ໂກໂຘເຍວ. ປຣຄຸຓມກ຺ຂນລກ຺ຂໂຓ ມກ຺ໂຂ, ປຣຄຸຓປຸຎ຺ຉນນ຺ຕິ ອຕ຺ໂຖ. ຍຸຄຄ຺ຄາຫລກ຺ຂໂຓ ປຬາໂສ, ຍຸຄຄ຺ຄາຫວເສນ ປຣຄຸຓທສ຺ສນນ຺ຕິ ອຕ຺ໂຖ. ປຣສມ຺ປຕ຺ຕິຂີຍນລກ຺ຂຓາ ອິສ຺ສາ, ອຸສູຍນາຕິ ອຕ຺ໂຖ. ອຕ຺ຕສມ຺ປຕ຺ຕິນິຄູຫນລກ຺ຂຓໍ ມຈ຺ຉຣິຍໍ, ‘‘ມຍ຺ຫໍ ອຈ຺ຉຣິຍໍ ມາ ປຣສ຺ສ ໂຫຕູ’’ຕິ ອຕ຺ໂຖ. ອຕ຺ຕນາ ກຕປາປປຏິຈ຺ຉາທນລກ຺ຂຓາ ມາຍາ, ປຏິຈ຺ຉາທນຏ຺ເຐນ ມາຍາ ວິຍາຕິ ອຕ຺ໂຖ. ອຕ຺ຕໂນ ອວິຊ຺ຊມານຄຸຓປ຺ປກາສນລກ຺ຂຓໍ ສາເຐຍ຺ຍໍ, ສຐຠາໂວຕິ ອຕ຺ໂຖ. ຈິຕ຺ຕສ຺ສ ອຸທ຺ຘຸມາຕຠາວລກ຺ຂໂຓ ຖມ຺ໂຠ, ຖທ຺ຘຠາໂວຕິ ອຕ຺ໂຖ. ກຣຓຸຕ຺ຕຣິຍລກ຺ຂໂຓ ສາຣມ຺ໂຠ. ອຸນ຺ນຕິລກ຺ຂໂຓ ມາໂນ. ອພ຺ຠຸນ຺ນຕິລກ຺ຂໂຓ ອຕິມາໂນ. ມຕ຺ຕຠາວລກ຺ຂໂຓ ມໂທ. ປຎ຺ຈສຸ ກາມຄຸເຓສຸ ຈິຕ຺ຕໂວສຄ຺ຄລກ຺ຂໂຓ ປມາໂທ.

ເອວໍ ວິສຸໍ ວິສຸໍ ກິເລສວເສນ ປຸຖູ ທສ຺ເສຕ຺ວາ ວຸຕ຺ຕກິເລເສ ຈ ອວຸຕ຺ເຕ ຈ ອຎ຺ເຎ ສພ຺ພສງ຺ຄາຫິກວເສນ ທສ຺ເສຕຸໍ ສພ຺ເພ ກິເລສາຕິອາທິມາຫ. ຕຕ຺ຖ ທິຏ຺ຐຘມ຺ມສມ຺ປຣາເຍສຸ ສຕ຺ເຕ ກິເລເສນ຺ຕິ ອຸປຕາເປນ຺ຕິ ວິພາເຘນ຺ຕີຕິ ກິເລສາ. ອກຸສລກມ຺ມປຖສງ຺ຄຫິຕາ ຈ ອສງ຺ຄຫິຕາ ຈ. ທຸຏ຺ຐຸ ຈຣິຕາ, ທຸຏ຺ຐາ ວາ ຈຣິຕາຕິ ທຸຈ຺ຈຣິຕາ. ເຕ ປນ ກາຍທຸຈ຺ຈຣິຕໍ ວຈີທຸຈ຺ຈຣິຕໍ ມໂນທຸຈ຺ຈຣິຕນ຺ຕິ ຕິປ຺ປກາຣາ. ວິປາກໍ ອຠິສງ຺ຂໂຣນ຺ຕີຕິ ອຠິສງ຺ຂາຣາ. ເຕປິ ປຸຎ຺ຎາຠິສງ຺ຂາໂຣ ອປຸຎ຺ຎາຠິສງ຺ຂາໂຣ ອາເນຎ຺ຊາຠິສງ຺ຂາໂຣຕິ ຕິປ຺ປກາຣາ. ວິປາກວເສນ ຠວໍ ຄຈ຺ຉນ຺ຕີຕິຠວຄາມິໂນ, ຠວຄາມິໂນ ກມ຺ມາ ຠວຄາມິກມ຺ມາ. ອິມິນາ ອຠິສງ຺ຂາຣຠາເວປິ ສຕິ ອເວທນີຍານິ ກມ຺ມານິ ປຏິກ຺ຂິຕ຺ຕານິ ໂຫນ຺ຕີຕິ ອຍໍ ວິເສໂສ. ‘‘ທຸຈ຺ຈຣິຕາ’’ຕິ ຈ ‘‘ກມ຺ມາ’’ຕິ ຈ ລິງ຺ຄວິປລ຺ລາໂສ ກໂຕ. ນານຕ຺ເຕກຕ຺ຕນ຺ຕິ ເອຕ຺ຖ ອຸທ຺ເທເສ ເອກຕ຺ຕສທ຺ທສ຺ສ ອຠາເວປິ ນານຕ຺ເຕກຕ຺ຕານໍ ອຎ຺ຎມຎ຺ຎາເປກ຺ຂຕ຺ຕາ ເອກຕ຺ຕມ຺ປິ ນິທ຺ທິສິຕຸກາເມນ ‘‘ນານຕ຺ເຕກຕ຺ຕ’’ນ຺ຕິ ອຸທ຺ເທໂສ ກໂຕ. ນານຕ຺ຕສລ຺ເລຂເກ ເອກຕ຺ເຕ ທສ຺ສິເຕ ສລ຺ເລຂຎາຓໍ ສຸເຂນ ທສ຺ສີຍຕີຕິ. ນານຕ຺ຕນ຺ຕິ ອນວຏ຺ຐິຕຕ຺ຕາ ສປຣິປ຺ຜນ຺ທຕ຺ຕາ ຈ ນານາສຠາໂວ. ເອກຕ຺ຕນ຺ຕິ ອວຏ຺ຐິຕຕ຺ຕາ ອປຣິປ຺ຜນ຺ທຕ຺ຕາ ຈ ເອກສຠາໂວ.

ຈຣຓເຕໂຊຕິ ຈຣນ຺ຕິ ເຕນ ອຄຕໍ ທິສໍ ນິພ຺ພານໍ ຄຈ຺ຉນ຺ຕີຕິ ຈຣຓໍ. ກິໍ ຕໍ? ສີລໍ. ຕເທວ ປຏິປກ຺ຂຕາປນຏ຺ເຐນ ເຕໂຊ. ຄຸຓເຕໂຊຕິ ສີເລນ ລທ຺ຘປຕິຏ຺ໂຐ ສມາຘິເຕໂຊ. ປຎ຺ຎາເຕໂຊຕິ ສມາຘິນາ ລທ຺ຘປຕິຏ຺ໂຐ ວິປສ຺ສນາເຕໂຊ. ປຸຎ຺ຎເຕໂຊຕິ ວິປສ຺ສນາຫິ ລທ຺ຘປຕິຏ຺ໂຐ ອຣິຍມຄ຺ຄກຸສລເຕໂຊ. ຘມ຺ມເຕໂຊຕິ ຈຕຸນ຺ນໍ ເຕຊານໍ ປຕິຏ຺ຐາຠູໂຕ ພຸທ຺ຘວຈນເຕໂຊ. ຈຣຓເຕເຊນ ເຕຊິຕຕ຺ຕາຕິ ສີລເຕເຊນ ຕິຂິຓີກຕຕ຺ຕາ. ທຸສ຺ສີລ຺ຍເຕຊນ຺ຕິ ທຸສ຺ສີລຠາວສງ຺ຂາຕໍ ເຕຊໍ. ຕມ຺ປິ ຫິ ສນ຺ຕານໍ ຕາປນໂຕ ເຕໂຊ ນາມ. ປຣິຍາທິຍຕີຕິ ເຂເປຕິ. ອຄຸຓເຕຊນ຺ຕິ ສມາຘິສ຺ສ ປຏິປກ຺ຂໍ ວິກ຺ເຂປເຕຊໍ. ທຸປ຺ປຎ຺ຎເຕຊນ຺ຕິ ວິປສ຺ສນາຎາຓປຏິປກ຺ຂໍ ໂມຫເຕຊໍ. ອປຸຎ຺ຎເຕຊນ຺ຕິ ຕໍຕໍມຄ຺ຄວຊ຺ຌກິເລສປ຺ປຫາເນນ ກິເລສສຫາຍໍ ອກຸສລກມ຺ມເຕຊໍ. ນ ເກວລຎ຺ເຫຕໍ ອປຸຎ຺ຎເມວ ເຂເປຕິ, ‘‘ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫໍ ອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມໍ ກມ຺ມກ຺ຂຍາຍ ສໍວຕ຺ຕຕີ’’ຕິ (ອ. ນິ. ໔.໒໓໓; ທີ. ນິ. ໓.໓໑໒; ມ. ນິ. ໒.໑໘) ວຈນໂຕ ກຸສລກມ຺ມມ຺ປິ ເຂເປຕິເຍວ. ປຸຎ຺ຎເຕຊປຏິປກ຺ຂວເສນ ອປຸຎ຺ຎເຕຊເມວ ວຸຕ຺ຕໍ. ອຘມ຺ມເຕຊນ຺ຕິ ນານາຕິຕ຺ຖິຍານໍ ສມຍວຈນເຕຊໍ. ອິມສ຺ສ ຎາຓສ຺ສ ອຸທ຺ເທສວຓ຺ຓນາຍໍ ວຸຕ຺ເຕ ທຸຕິເຍ ອຕ຺ຖວິກປ຺ເປ ຣາຄາທໂຍ ເອກູນວີສຕິ ປຸຖຸ ທຸສ຺ສີລ຺ຍເຕຊາ ໂຫນ຺ຕິ. ‘‘ອຠິສງ຺ຂາຣາ, ຠວຄາມິກມ຺ມາ’’ຕິ ເອຕ຺ຖ ອປຸຎ຺ຎາຠິສງ຺ຂາຣາ ອກຸສລກມ຺ມຎ຺ຈ ອປຸຎ຺ຎເຕຊາ ໂຫນ຺ຕິ, ອາເນຎ຺ຊາຠິສງ຺ຂາຣານິ ໂລກິຍກຸສລກມ຺ມານິ ປຸຎ຺ຎເຕເຊເນວ ເຂປນີຍໂຕ ອປຸຎ຺ຎເຕຊປກ຺ຂິກາວ ໂຫນ຺ຕິ. ກາມຈ຺ຉນ຺ທາທໂຍ ປຎ຺ຈທສ ນານຕ຺ຕາ ອຄຸຓເຕຊາ ໂຫນ຺ຕິ, ນິຈ຺ຈສຎ຺ຎາທໂຍ ອຏ຺ຐາຣສ ນານຕ຺ຕາ ທຸປ຺ປຎ຺ຎເຕຊາ ໂຫນ຺ຕິ, ຈຕຸມຄ຺ຄວຊ຺ຌາ ຈຕ຺ຕາໂຣ ນານຕ຺ຕາ ອປຸຎ຺ຎເຕຊາ ໂຫນ຺ຕິ. ໂສຕາປຕ຺ຕິມຄ຺ຄວຊ຺ຌນານຕ຺ເຕນ ອຘມ຺ມເຕໂຊ ສງ຺ຄເຫຕພ຺ໂພ.

ນິທ຺ເທເສ ສລ຺ເລຂປຏິປກ຺ເຂນ ອສລ຺ເລເຂນ ສລ຺ເລຂໍ ທສ຺ເສຕຸກາເມນ ອສລ຺ເລຂປຸພ຺ພໂກ ສລ຺ເລໂຂ ນິທ຺ທິຏ຺ໂຐ. ເນກ຺ຂມ຺ມາທໂຍ ສຕ຺ຕຕິໍສ ເອກຕ຺ຕຘມ຺ມາວ ປຈ຺ຈນີການໍ ສລ຺ລິຂນໂຕ ‘‘ສລ຺ເລໂຂ’’ຕິ ວຸຕ຺ຕາ. ຕສ຺ມິໍ ເນກ຺ຂມ຺ມາທິເກ ສຕ຺ຕຕິໍສປເຠເທ ສລ຺ເລເຂ ຎາຓໍ ສລ຺ເລຂຏ຺ເຐ ຎາຓນ຺ຕິ.

ສລ຺ເລຂຏ຺ຐຎາຓນິທ຺ເທສວຓ຺ຓນາ ນິຏ຺ຐິຕາ.