໓. ຍຸຕ຺ຕິຫາຣສມ຺ປາຕວຓ຺ຓນາ

໖໕. ເອວໍ ນານານເຍຫິ ວິຈຍຫາຣສມ຺ປາຕໍ ວິຕ຺ຖາເຣຕ຺ວາ ອິທານິ ຍຸຕ຺ຕິຫາຣສມ຺ປາຕາທີນິ ທສ຺ເສຕຸໍ ‘‘ຕຕ຺ຖ ກຕໂມ ຍຸຕ຺ຕິຫາຣສມ຺ປາໂຕ’’ຕິອາທິ ອາຣທ຺ຘໍ. ຕຕ຺ຖ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິ ຄາຖາຍ ປທຕ຺ໂຖ ວິຕ຺ຖາຣິໂຕເຍວ. ຣກ຺ຂິຕຈິຕ຺ຕສ຺ສ ສມ຺ມາສງ຺ກປ຺ປໂຄຈໂຣ ຠວິສ຺ສຕີຕິ ຍຸຊ຺ຊຕີຕິ ມນຈ຺ຉຏ຺ຐານິ ທ຺ວາຣານິ ສຕິກວາເຏນ ປິທຫິຕ຺ວາ ວິຫຣນ຺ຕສ຺ສ ກາມວິຕກ຺ກາທີນໍ ມິຈ຺ຉາສງ຺ກປ຺ປານໍ ອວສໂຣ ເອວ ນຕ຺ຖີຕິ ເນກ຺ຂມ຺ມວິຕກ຺ກາທິໂກ ສມ຺ມາສງ຺ກປ຺ໂປ ເອວ ຕສ຺ສ ໂຄຈໂຣ ປວຕ຺ຕິຏ຺ຐານໍ ຠວິສ຺ສຕີຕິ ອຍມຕ຺ໂຖ ຍຸຊ຺ຊຕິ. ຍຸຕ຺ຕິຍາ ຆເຏຕິ ສໍສນ຺ທຕິ ສເມຕີຕິ ອຕ຺ໂຖ. ສມ຺ມາສງ຺ກປ຺ປໂຄຈໂຣ ສມ຺ມາທິຏ຺ຐິ ຠວິສ຺ສຕີຕິ ວຸຕ຺ຕນເຍນ ສມ຺ມາສງ຺ກປ຺ປໂຄຈໂຣ ປຸຄ຺ຄໂລ ອວິປຣີຕເມວ ວິຕກ຺ກໂຕ ສມ຺ມາທິຏ຺ຐິ ຠວິສ຺ສຕິ. ສມ຺ມາທິຏ຺ຐິສງ຺ຂາຕໍ ວິປສ຺ສນາຎາຓໍ ປຸຣກ຺ຂຕ຺ວາ ວິຫຣນ຺ໂຕ ມຄ຺ຄຎາເຓນ ປຎ຺ຈນ຺ນໍ ຂນ຺ຘານໍ ອຸທຍພ຺ພຍໍ ອສມ຺ໂມຫໂຕ ປຏິວິຊ຺ຌິສ຺ສຕິ. ຕຖາ ປຏິວິຊ຺ຌນ຺ໂຕ ຈ ທຸກ຺ຂສຠາວຕ຺ຕາ ທຸຄ຺ຄຕິສງ຺ຂາຕາ ສພ຺ພາ ຠວຄຕິໂຍ ຊຫິສ຺ສຕິ, ຕໂຕ ເອວ ສພ຺ພໍ ວິນິປາຕຠຍໍ ສໍສາຣຠຍຎ຺ຈ ສມຕິກ຺ກມິສ຺ສຕີຕິ ສພ຺ໂພປິ ຈາຍມຕ຺ໂຖ ຍຸຕ຺ໂຕ ເອວາຕິ.

ຍຸຕ຺ຕິຫາຣສມ຺ປາຕວຓ຺ຓນາ ນິຏ຺ຐິຕາ.