໒. ອຸທ຺ເທສວາຣວຓ຺ຓນາ

໑. ເອວໍ ສງ຺ຄຫວາເຣນ ສງ຺ເຂປໂຕ ທສ຺ສິເຕ ຫາຣາທໂຍ ອິທານິ ວິຠາເຄນ ທສ຺ເສຕຸໍ ‘‘ຕຕ຺ຖ ກຕເມ ໂສຬສ ຫາຣາ’’ຕິອາທິເທສນາ ອາຣທ຺ຘາ. ຕຕ຺ຖ ຕຕ຺ຖາຕິ ຍໍ ວຸຕ຺ຕໍ – ‘‘ໂສຬສຫາຣາ ເນຕ຺ຕີ’’ຕິ, ຕສ຺ມິໍ ວຈເນ, ຕິສ຺ສໍ ວາ ຄາຖາຍໍ, ຍານິ ຫາຣນຍມູລປທານິ ອຸທ຺ຘຏານິ, ເຕສູຕິ ອຕ຺ໂຖ. ກຕເມຕິ ປຸຈ຺ຉາວຈນໍ. ປຸຈ຺ຉາ ຈ ນາເມສາ ປຎ຺ຈວິຘາ ອທິຏ຺ຐໂຊຕນາປຸຈ຺ຉາ ທິຏ຺ຐສໍສນ຺ທນາປຸຈ຺ຉາ ວິມຕິຈ຺ເຉທນາປຸຈ຺ຉາ ອນຸມຕິປຸຈ຺ຉາ ກເຖຕຸກມ຺ຍຕາປຸຈ຺ຉາຕິ. ຕາສຸ ອຍໍ ກເຖຕຸກມ຺ຍຕາປຸຈ຺ຉາ. ໂສຬສາຕິ ຄຓນວເສນ ປຣິຈ຺ເຉໂທ. ເຕນ ເນສໍ ນ ຕໂຕ ອຸທ຺ຘໍ ອໂຘ ຈາຕິ ເອຕປຣມຕໍ ທສ຺ເສຕິ. ສາ ເຈຕປຣມຕາ ປຣໂຕ ອາວິ ຠວິສ຺ສຕິ. ຫາຣາຕິ ຄຓນວເສນ ປຣິຈ຺ຉິນ຺ນານໍ ສາມຎ຺ຎໂຕ ທສ຺ສນໍ. ເທສນາ ວິຈໂຍຕິອາທິ ສຣູປທສ຺ສນໍ.

ຕຕ຺ຖ ເກນຏ຺ເຐນ ຫາຣາ? ຫຣີຍນ຺ຕິ ເອເຕຫິ, ເອຕ຺ຖ ວາ ສຸຕ຺ຕເຄຍ຺ຍາທິວິສຍາ ອຎ຺ຎາຓສໍສຍວິປລ຺ລາສາຕິ ຫາຣາ, ຫຣນ຺ຕິ ວາ ສຍໍ ຕານິ, ຫຣຓມຕ຺ຕເມວ ວາຕິ ຫາຣາ ຜລູປຈາເຣນ. ອຖ ວາ ຫຣີຍນ຺ຕິ ໂວຫຣີຍນ຺ຕິ ຘມ຺ມສໍວຓ຺ຓກຘມ຺ມປຏິຄ຺ຄາຫເກຫິ ຘມ຺ມສ຺ສ ທານຄ຺ຄຫຓວເສນາຕິ ຫາຣາ. ອຖ ວາ ຫາຣາ ວິຍາຕິ ຫາຣາ. ຍຖາ ຫິ ອເນກຣຕນາວລິສມູໂຫ ຫາຣສງ຺ຂາໂຕ ອຕ຺ຕໂນ ອວຍວຠູຕຣຕນສມ຺ຜສ຺ເສຫິ ສມຸປ຺ປຊ຺ຊນີຍມານຫິລາທສຸໂຂ ຫຸຕ຺ວາ ຕທຸປໂຠຄີຊນສຣີຣສນ຺ຕາປໍ ນິທາຆປຣິຬາຫຸປຊນິຕໍ ວູປສເມຕິ, ເອວເມເຕປິ ນານາວິຘປຣມຕ຺ຖຣຕນປ຺ປພນ຺ຘາ ສໍວຓ຺ຓນາວິເສສາ ອຕ຺ຕໂນ ອວຍວຠູຕປຣມຕ຺ຖຣຕນາຘິຄເມນ ສມຸປ຺ປາທິຍມານນິພ຺ພຸຕິສຸຂາ ຘມ຺ມປຏິຄ຺ຄາຫກຊນຫທຍປຣິຕາປໍ ກາມຣາຄາທິກິເລສເຫຕຸກໍ ວູປສເມນ຺ຕີຕິ. ອຖ ວາ ຫາຣຍນ຺ຕິ ອຎ຺ຎາຓາທີນໍ ຫາຣໍ ອປຄມໍ ກໂຣນ຺ຕິ ອາຈິກ຺ຂນ຺ຕີຕິ ວາ ຫາຣາ. ອຖ ວາ ໂສຕຸຊນຈິຕ຺ຕສ຺ສ ຫຣຓໂຕ ຣມຓໂຕ ຈ ຫາຣາ ນິຣຸຕ຺ຕິນເຍນ, ຍຖາ – ‘‘ຠເວສຸ ວນ຺ຕຄມໂນ ຠຄວາ’’ຕິ (ວິສຸທ຺ຘິ. ໑.໑໔໔; ປາຣາ. ອຏ຺ຐ. ໑.໑ ເວຣຎ຺ຊກຓ຺ຑວຓ຺ຓນາ). ອຍໍ ຕາວ ຫາຣານໍ ສາຘາຣຓໂຕ ອຕ຺ໂຖ.

ອສາຘາຣຓໂຕ ປນ ເທສີຍຕິ ສໍວຓ຺ຓີຍຕິ ເອຕາຍ ສຸຕ຺ຕຕ຺ໂຖຕິ ເທສນາ, ເທສນາສຫຈຣຓໂຕ ວາ ເທສນາ. ນນຸ ຈ ອຎ຺ເຎປິ ຫາຣາ ເທສນາສງ຺ຂາຕສ຺ສ ສຸຕ຺ຕສ຺ສ ອຕ຺ຖສໍວຓ຺ຓນໂຕ ເທສນາສຫຈາຣິໂນວາຕິ? ສຈ຺ຈເມຕໍ, ອຍໍ ປນ ຫາໂຣ ເຍຠຸຍ຺ເຍນ ຍຖາຣຸຕວເສເນວ ວິຎ຺ຎາຍມາໂນ ເທສນາຍ ສຫ ຈຣຕີຕິ ວຕ຺ຕພ຺ພຕໍ ອຣຫຕິ, ນ ຕຖາ ປເຣ. ນ ຫິ ອສ຺ສາທາທີນວນິສ຺ສຣຓາທິສນ຺ທສ຺ສນຣຫິຕາ ສຸຕ຺ຕເທສນາ ອຕ຺ຖິ. ອສ຺ສາທາທິສນ຺ທສ຺ສນວິຠາວນລກ຺ຂໂຓ ຈາຍໍ ຫາໂຣຕິ.

ວິຈິຍນ຺ຕິ ເອເຕນ, ເອຕ຺ຖ ວາ ປທປຎ຺ຫາທໂຍ, ວິຈິຕິ ເອວ ວາ ເຕສນ຺ຕິ ວິຈໂຍ. ປາຬິຍໍ ປນ ວິຈິນຕີຕິ ວິຈໂຍຕິ ອຍມຕ຺ໂຖ ທສ຺ສິໂຕ.

ຍຸຕ຺ຕີຕິ ອຸປປຕ຺ຕິສາຘນຍຸຕ຺ຕິ, ອິຘ ປນ ຍຸຕ຺ຕິວິຈາຣຓາ ຍຸຕ຺ຕິ ອຸຕ຺ຕຣປທໂລເປນ ‘‘ຣູປຠໂວ ຣູປ’’ນ຺ຕິ ຍຖາ, ຍຸຕ຺ຕິສຫຈຣຓໂຕ ວາ. ອິຘາປິ ເທສນາຫາເຣ ວຸຕ຺ຕນເຍນ ອຕ຺ໂຖ ວິຕ຺ຖາເຣຕພ຺ໂພ.

ປທຏ຺ຐານນ຺ຕິ ອາສນ຺ນກາຣຓໍ, ອິຘາປິ ປທຏ຺ຐານວິຈາຣຓາຕິອາທິ ວຸຕ຺ຕນເຍເນວ ເວທິຕພ຺ພໍ.

ລກ຺ຂີຍນ຺ຕິ ເອເຕນ, ເອຕ຺ຖ ວາ ເອກລກ຺ຂຓາ ຘມ຺ມາ ອວຸຕ຺ຕາປິ ເອກວຈເນນາຕິ ລກ຺ຂຓໍ.

ວິຍູຫີຍນ຺ຕິ ວິຠາເຄນ ປິຓ຺ຑີຍນ຺ຕິ ເອເຕນ, ເອຕ຺ຖ ວາຕິ ພ຺ຍູໂຫ. ນິພ຺ພຈນາທີນໍ ສຸຕ຺ເຕ ທສ຺ສິຍມານານໍ ຈຕຸນ຺ນໍ ພ຺ຍູໂຫຕິ ຈຕຸພ຺ຍູໂຫ, ຈຕຸນ຺ນໍ ວາ ພ຺ຍູໂຫ ເອຕ຺ຖາຕິ ຈຕຸພ຺ຍູໂຫ.

ອາວຏ຺ຏີຍນ຺ຕິ ເອເຕນ, ເອຕ຺ຖ ວາ ສຠາຄາ ວິສຠາຄາ ຈ ຘມ຺ມາ, ເຕສໍ ວາ ອາວຏ຺ຏນນ຺ຕິ ອາວຏ຺ໂຏ.

ວິຠຊີຍນ຺ຕິ ເອເຕນ, ເອຕ຺ຖ ວາ ສາຘາຣຓາສາຘາຣຓານໍ ສໍກິເລສໂວທານຘມ຺ມານໍ ຠູມິໂຍຕິ ວິຠຕ຺ຕິ, ວິຠຊນໍ ວາ ເອເຕສໍ ຠູມິຍາຕິ ວິຠຕ຺ຕິ.

ປຏິປກ຺ຂວເສນ ປຣິວຕ຺ຕີຍນ຺ຕິ ອິມິນາ, ເອຕ຺ຖ ວາ ສຸຕ຺ເຕ ວຸຕ຺ຕຘມ຺ມາ, ປຣິວຕ຺ຕນໍ ວາ ເຕສນ຺ຕິ ປຣິວຕ຺ຕໂນ.

ວິວິຘໍ ວຈນໍ ເອກສ຺ເສວຕ຺ຖສ຺ສ ວາຈກເມຕ຺ຖາຕິ ວິວຈນໍ, ວິວຈນເມວ ເວວຈນໍ, ວິວິຘໍ ວຸຈ຺ຈຕິ ເອເຕນ ອຕ຺ໂຖຕິ ວາ ວິວຈນໍ. ເສສໍ ວຸຕ຺ຕນຍເມວ.

ປກາເຣຫິ ປເຠທໂຕ ວາ ຎາປີຍນ຺ຕິ ອິມິນາ, ເອຕ຺ຖ ວາ ອຕ຺ຖາຕິ ປຎ຺ຎຕ຺ຕິ.

ໂອຕາຣີຍນ຺ຕິ ອນຸປ຺ປເວສີຍນ຺ຕິ ເອເຕນ, ເອຕ຺ຖ ວາ ສຸຕ຺ຕາຄຕາ ຘມ຺ມາ ປຏິຈ຺ຈສມຸປ຺ປາທາທີສູຕິ ໂອຕຣໂຓ.

ໂສຘີຍນ຺ຕິ ສມາຘີຍນ຺ຕິ ເອເຕນ, ເອຕ຺ຖ ວາ ສຸຕ຺ເຕ ປທປທຕ຺ຖປຎ຺ຫາຣມ຺ຠາຕິ ໂສຘໂນ.

ອຘິຏ຺ຐີຍນ຺ຕິ ອນຸປວຕ຺ຕີຍນ຺ຕິ ເອເຕນ, ເອຕ຺ຖ ວາ ສາມຎ຺ຎວິເສສຠູຕາ ຘມ຺ມາ ວິນາ ວິກປ຺ເປນາຕິ ອຘິຏ຺ຐາໂນ.

ປຣິກໂຣຕິ ອຠິສງ຺ຂໂຣຕິ ຜລນ຺ຕິ ປຣິກ຺ຂາໂຣ, ເຫຕຸ ປຈ຺ຈໂຍ ຈ, ປຣິກ຺ຂາຣໍ ອາຈິກ຺ຂຕີຕິ ປຣິກ຺ຂາໂຣ, ຫາໂຣ, ປຣິກ຺ຂາຣວິສຍຕ຺ຕາ ປຣິກ຺ຂາຣສຫຈຣຓໂຕ ວາ ປຣິກ຺ຂາໂຣ.

ສມາໂຣປີຍນ຺ຕິ ເອເຕນ, ເອຕ຺ຖ ວາ ປທຏ຺ຐານາທິມຸເຂນ ຘມ຺ມາຕິ ສມາໂຣປໂນ. ສພ຺ພຕ຺ຖ ຈ ຠາວສາຘນວເສນາປິ ອຕ຺ໂຖ ສມ຺ຠວຕີຕິ ຕສ຺ສາປິ ວເສນ ໂຍເຊຕພ຺ພໍ.

ຕສ຺ສາຕິ ຍຖາວຸຕ຺ຕສ຺ສ ຫາຣຸທ຺ເທສສ຺ສ. ອນຸຄີຕີຕິ ວຸຕ຺ຕສ຺ເສວຕ຺ຖສ຺ສ ສຸຂຄ຺ຄຫຓຕ຺ຖໍ ອນຸປຈ຺ຉາ ຄາຍນຄາຖາ, ຕາສຸ ໂອສານຄາຖາຍ ອຕ຺ຖໂຕ ອສໍກິຓ຺ຓາຕິ ປທຕ຺ເຖນ ສງ຺ກຣຣຫິຕາ, ເຕນ ຍທິປິ ເກຈິ ຫາຣາ ອຎ຺ຎມຎ຺ຎໍ ອວິສິຏ຺ຐາ ວິຍ ທິສ຺ສນ຺ຕິ, ຕຖາປິ ເຕສໍ ອຕ຺ຖໂຕ ສງ຺ກໂຣ ນຕ຺ຖີຕິ ທສ຺ເສຕິ. ໂສ ຈ ເນສໍ ອສງ຺ກໂຣ ລກ຺ຂຓນິທ຺ເທເສ ສຸປາກໂຏ ໂຫຕິ. ເອເຕສຎ຺ເຈວາຕິ ເອເຕສໍ ໂສຬສນ຺ນໍ ຫາຣານໍ. ຍຖາ ອສງ຺ກໂຣ, ຕຖາ ເຈວ ຠວຕິ. ກິໍ ຠວຕິ? ວິຕ຺ຖາຣຕຍາ ວິຕ຺ຖາເຣນ. ນຍວິຠຕ຺ຕິ ນເຍນ ອຸປາເຍນ ຎາເຍນ ວິຠາໂຄ. ເອເຕນ ຕໍ ເອວ ອສງ຺ກິຓ຺ຓຕໍ ວິຠາເວຕິ. ເກຈິ ‘‘ວິຕ຺ຖາຣນຍາ’’ຕິ ປຐນ຺ຕິ, ຕໍ ນ ສຸນ຺ທຣໍ, ອຍຎ຺ຈ ຄາຖາ ເກສຸຈິ ໂປຕ຺ຖເກສຸ ນຕ຺ຖິ.

໒. ເອວໍ ຫາເຣ ອຸທ຺ທິສິຕ຺ວາ ອິທານິ ນເຍ ອຸທ຺ທິສິຕຸໍ ‘‘ຕຕ຺ຖ ກຕເມ’’ຕິອາທິ ວຸຕ຺ຕໍ. ຕຕ຺ຖ ນຍນ຺ຕິ ສໍກິເລເສ ໂວທານານິ ຈ ວິຠາຄໂຕ ຎາເປນ຺ຕີຕິ ນຍາ, ນີຍນ຺ຕິ ວາ ຕານິ ເອເຕຫິ, ເອຕ຺ຖ ວາຕິ ນຍາ, ນຍນມຕ຺ຕເມວ ວາຕິ ນຍາ, ນີຍນ຺ຕິ ວາ ສຍໍ ຘມ຺ມກຖິເກຫິ ອຸປນີຍນ຺ຕິ ສຸຕ຺ຕສ຺ສ ອຕ຺ຖປວິຈຍຕ຺ຖນ຺ຕິ ນຍາ. ອຖ ວາ ນຍາ ວິຍາຕິ ນຍາ. ຍຖາ ຫິ ເອກຕ຺ຕາທໂຍ ນຍາ ສມ຺ມາ ປຏິວິຊ຺ຌິຍມານາ ປຈ຺ຈຍປຈ຺ຈຍຸປ຺ປນ຺ນຘມ຺ມານໍ ຍຖາກ຺ກມໍ ສມ຺ພນ຺ຘວິຠາຄພ຺ຍາປາຣວິຣຫານຸຣູປຜລຠາວທສ຺ສເນນ ອສງ຺ກຣໂຕ ສມ຺ມຸຕິສຈ຺ຈປຣມຕ຺ຖສຈ຺ຈານໍ ສຠາວໍ ປເວທຍນ຺ຕາ ປຣມຕ຺ຖສຈ຺ຈປ຺ປຏິເວຘາຍ ສໍວຕ຺ຕນ຺ຕິ, ເອວເມເຕປິ ກຓ຺ຫສຸກ຺ກສປ຺ປຏິຠາຄຘມ຺ມວິຠາຄທສ຺ສເນນ ອວິປຣີຕສຸຕ຺ຕຕ຺ຖາວໂພຘາຍ ອຠິສມ຺ຠຸຓນ຺ຕາ ເວເນຍ຺ຍານໍ ຈຕຸສຈ຺ຈປ຺ປຏິເວຘາຍ ສໍວຕ຺ຕນ຺ຕິ. ອຖ ວາ ປຣິຍຕ຺ຕິອຕ຺ຖສ຺ສ ນຍນໂຕ ສໍກິເລສໂຕ ຍມນໂຕ ຈ ນຍາ ນິຣຸຕ຺ຕິນເຍນ.

ນນ຺ທິຍາວຏ຺ໂຏຕິອາທີສຸ ນນ຺ທິຍາວຏ຺ຏສ຺ສ ວິຍ ອາວຏ຺ໂຏ ເອຕສ຺ສາຕິ ນນ຺ທິຍາວຏ຺ໂຏ, ຍຖາ ຫິ ນນ຺ທິຍາວຏ຺ໂຏ ອນ຺ໂຕຐິເຕນ ປຘານາວຍເວນ ພຫິທ຺ຘາ ອາວຏ຺ຏຕິ, ເອວມຍມ຺ປິ ນໂຍຕິ ອຕ຺ໂຖ. ອຖ ວາ ນນ຺ທິຍາ ຕຓ຺ຫາຍ ປໂມທສ຺ສ ວາ ອາວຏ຺ໂຏ ເອຕ຺ຖາຕິ ນນ຺ທິຍາວຏ຺ໂຏ. ຕີຫິ ອວຍເວຫິ ໂລຠາທີຫິ ສໍກິເລສປກ຺ເຂ ອໂລຠາທີຫິ ຈ ໂວທານປກ຺ເຂ ປຸກ຺ຂໂລ ໂສຠໂນຕິ ຕິປຸກ຺ຂໂລ. ອສນ຺ຕາສນຊວປຣກ຺ກມາທິວິເສສໂຍເຄນ ສີໂຫ ຠຄວາ, ຕສ຺ສ ວິກ຺ກີຬິຕໍ ເທສນາວຈີກມ຺ມຠູໂຕ ວິຫາໂຣຕິ ກຕ຺ວາ ວິປລ຺ລາສຕປ຺ປຏິປກ຺ຂປຣິທີປນໂຕ ສີຫສ຺ສ ວິກ຺ກີຬິຕໍ ເອຕ຺ຖາຕິ ສີຫວິກ຺ກີຬິໂຕ, ນໂຍ. ພລວິເສສໂຍຄທີປນໂຕ ວາ ສີຫວິກ຺ກີຬິຕສທິສຕ຺ຕາ ນໂຍ ສີຫວິກ຺ກີຬິໂຕ. ພລວິເສໂສ ເຈຕ຺ຖ ສທ຺ຘາທິພລໍ, ທສພລານິ ເອວ ວາ. ອຕ຺ຖນຍຕ຺ຕຍທິສາຠາເວນ ກຸສລາທິຘມ຺ມານໍ ອາໂລຈນໍ ທິສາໂລຈນໍ. ຕຖາ ອາໂລຈິຕານໍ ເຕສໍ ຘມ຺ມານໍ ອຕ຺ຖນຍຕ຺ຕຍໂຍຊເນ ສມານຍນໂຕ ອງ຺ກຸໂສ ວິຍ ອງ຺ກຸໂສ. ຄາຖາສຸ ລຎ຺ເຊຕິ ປກາເສຕິ ສຸຕ຺ຕຕ຺ຖນ຺ຕິ ລຎ຺ຊໂກ, ນໂຍ ຈ ໂສ ລຎ຺ຊໂກ ຈາຕິ ນຍລຎ຺ຊໂກ. ຄຕາຕິ ຎາຕາ, ມຕາຕິ ອຕ຺ໂຖ. ໂສ ເອວ ວາ ປາໂຐ. ເສສໍ ວຸຕ຺ຕນເຍນ ເວທິຕພ຺ພໍ.

໓. ເອວໍ ນເຍປິ ອຸທ຺ທິສິຕ຺ວາ ອິທານິ ມູລປທານິ ອຸທ຺ທິສິຕຸໍ ‘‘ຕຕ຺ຖ ກຕມານີ’’ຕິອາທິ ອາຣທ຺ຘໍ. ຕຕ຺ຖ ມູລານິ ຈ ຕານິ ນຍານໍ ປຏ຺ຐານຠາຄານຎ຺ຈ ປຕິຏ຺ຐາຠາວໂຕ ປທານິ ຈ ອຘິຄມູປາຍຠາວໂຕ ໂກຏ຺ຐາສຠາວໂຕ ຈາຕິ ມູລປທານິ. ໂກສລ຺ລສມ຺ຠູຕຏ຺ເຐນ, ກຸຈ຺ຉິຕານໍ ວາ ປາປຘມ຺ມານໍ ສລນໂຕ ວິທ຺ຘໍສນໂຕ, ກຸສານໍ ວາ ຣາຄາທີນໍ ລວນໂຕ, ກຸສາ ວິຍ ວາ ລວນໂຕ, ກຸເສນ ວາ ຎາເຓນ ລາຕພ຺ພໂຕ ປວຕ຺ເຕຕພ຺ພໂຕ ກຸສລານິ, ຕປ຺ປຏິປກ຺ຂໂຕ ອກຸສລານີຕິ ປທຕ຺ໂຖ ເວທິຕພ຺ໂພ.

ເອວໍ ຄຓນປຣິຈ຺ເຉທໂຕ ຊາຕິເຠທໂຕ ຈ ມູລປທານິ ທສ຺ເສຕ຺ວາ ອິທານິ ສຣູປໂຕ ທສ຺ເສນ຺ໂຕ ສໍກິເລສປກ຺ຂໍເຍວ ປຐມໍ ອຸທ຺ທິສຕິ ‘‘ຕຓ຺ຫາ’’ຕິອາທິນາ. ຕຕ຺ຖ ຕສຕິ ປຣິຕສຕີຕິ ຕຓ຺ຫາ. ອວິນ຺ທິຍໍ ວິນ຺ທຕິ, ວິນ຺ທິຍໍ ນ ວິນ຺ທຕີຕິ ອວິຊ຺ຊາ, ວິຊ຺ຊາປຏິປກ຺ຂາຕິ ວາ ອວິຊ຺ຊາ. ລຸພ຺ຠນ຺ຕິ ເຕນ, ສຍໍ ວາ ລຸພ຺ຠຕິ, ລຸພ຺ຠນມຕ຺ຕເມວ ວາ ໂສຕິ ໂລໂຠ. ໂທສໂມເຫສຸປິ ເອເສວ ນໂຍ. ອສຸເຠ ‘‘ສຸຠ’’ນ຺ຕິ ປວຕ຺ຕາ ສຎ຺ຎາ ສຸຠສຎ຺ຎາ. ສຸຂສຎ຺ຎາທີສຸປິ ອິມິນາວ ນເຍນ ອຕ຺ໂຖ ເວທິຕພ຺ໂພ. ສງ຺ຄຫນ຺ຕິ ຄຓນໍ. ສໂມສຣຓນ຺ຕິ ສໂມໂຣປນໍ.

ປຈ຺ຈນີກຘມ຺ເມ ສເມຕີຕິ ສມໂຖ. ອນິຈ຺ຈາທີຫິ ວິວິເຘຫິ ອາກາເຣຫິ ປສ຺ສຕີຕິ ວິປສ຺ສນາ. ອໂລຠາທໂຍ ໂລຠາທິປຏິປກ຺ຂໂຕ ເວທິຕພ຺ພາ. ອສຸເຠ ‘‘ອສຸຠ’’ນ຺ຕິ ປວຕ຺ຕາ ສຎ຺ຎາ ອສຸຠສຎ຺ຎາ, ກາຍານຸປສ຺ສນາສຕິປຏ຺ຐານໍ. ສຎ຺ຎາສີເສນ ຫິ ເທສນາ. ທຸກ຺ຂສຎ຺ຎາທີສຸປິ ເອເສວ ນໂຍ.

ອິທໍ ອຸທ຺ທານນ຺ຕິ ອິທໍ ວຸຕ຺ຕສ຺ເສວ ອຕ຺ຖສ຺ສ ວິປ຺ປກິຓ຺ຓຠາເວນ ນສ຺ສິຕຸໍ ອທຕ຺ວາ ອຸທ຺ຘໍ ທານໍ ຣກ຺ຂຓໍ ອຸທ຺ທານໍ, ສງ຺ຄຫວຈນນ຺ຕິ ອຕ຺ໂຖ. ‘‘ຈຕ຺ຕາໂຣ ວິປລ຺ລາສາ’’ຕິປິ ປາໂຐ. ກິເລສຠູມີຕິ ສໍກິເລສຠູມິ ສພ຺ເພສໍ ອກຸສລຘມ຺ມານໍ ສໂມສຣຓຏ຺ຐານຕ຺ຕາ. ກຸສລານໍ ຍານິ ຕີຓິ ມູລານິ. ‘‘ກຸສລານີ’’ຕິປິ ປຐນ຺ຕິ. ສຕິປຏ຺ຐານາຕິ ອສຸຠສຎ຺ຎາທໂຍ ສນ຺ຘາຍາຫ. ອິນ຺ທ຺ຣິຍຠູມີຕິ ສທ຺ຘາທີນໍ ວິມຸຕ຺ຕິປຣິປາຈນິນ຺ທ຺ຣິຍານໍ ສໂມສຣຓຏ຺ຐານຕ຺ຕາ ວຸຕ຺ຕໍ. ຍຸຊ຺ຊນ຺ຕີຕິ ໂຍຊີຍນ຺ຕິ. ໂຂຕິ ປທປູຣເຓ, ອວຘາຣຓຕ຺ເຖ ວາ ນິປາໂຕ. ເຕນ ເອເຕ ເອວາຕິ ທສ຺ເສຕິ. ອຏ຺ຐາຣເສວາຕິ ວາ. ມູລປທາຕິ ມູລປທານິ, ລິງ຺ຄວິປລ຺ລາໂສ ວາ.

ອຸທ຺ເທສວາຣວຓ຺ຓນາ ນິຏ຺ຐິຕາ.