໕. ໂຘຕກມາຓວສຸຕ຺ຕນິທ຺ເທສວຓ຺ຓນາ

໓໐. ປຎ຺ຈເມ ໂຘຕກສຸຕ຺ເຕ – ວາຈາຠິກງ຺ຂາມີຕິ ວາຈໍ ອຠິກງ຺ຂາມິ. ສິກ຺ເຂ ນິພ຺ພານມຕ຺ຕໂນຕິ ອຕ຺ຕໂນ ຣາຄາທີນໍ ນິພ຺ພານຕ຺ຖາຍ ອຘິສີລາທີນິ ສິກ຺ເຂຍ຺ຍ. ນິທ຺ເທເສ ອປຸພ຺ພໍ ນຕ຺ຖິ.

໓໑. ອິໂຕຕິ ມມ ມຸຂໂຕ.

ນິທ຺ເທເສ ອາຕປ຺ປນ຺ຕິ ກິເລສຕາປນໍ. ອຸສ຺ສາຫນ຺ຕິ ອສງ຺ໂກຈໍ. ອຸສ຺ໂສຬ຺ຫີນ຺ຕິ ພລວວີຣິຍໍ. ຖາມນ຺ຕິ ອສິຖິລໍ. ຘິຕິນ຺ຕິ ຘາຣຓໍ. ວີຣິຍໍ ກໂຣຫີຕິ ປຣກ຺ກມໍ ກໂຣຫິ. ຉນ຺ທໍ ຊເນຫີຕິ ຣຸຈິໍ ອຸປ຺ປາເທຫິ.

໓໒. ເອວໍ ວຸຕ຺ເຕ ອຕ຺ຕມໂນ ໂຘຕໂກ ຠຄວນ຺ຕໍ ອຠິຕ຺ຖວມາໂນ ກຖໍກຖາປໂມກ຺ຂໍ ຍາຈນ຺ໂຕ ‘‘ປສ຺ສາມຫ’’ນ຺ຕິ ຄາຖມາຫ. ຕຕ຺ຖ ປສ຺ສາມຫໍ ເທວມນຸສ຺ສໂລເກຕິ ປສ຺ສາມິ ອຫໍ ເທວມນຸສ຺ສໂລເກ. ຕໍ ຕໍ ນມສ຺ສາມີຕິ ຕໍ ເອວຣູປໍ ຕໍ ນມສ຺ສາມິ. ປມຸຎ຺ຈາຕິ ປໂມເຈຫິ.

ນິທ຺ເທເສ ປຈ຺ເຈກພຸທ຺ຘາຕິ ຕໍ ຕໍ ອາຣມ຺ມຓໍ ປາຏິເຍກ຺ກໍ ຈຕຸສຈ຺ຈໍ ສຍເມວ ພຸທ຺ຘາ ປຏິເວຘປ຺ປຕ຺ຕາຕິ ປຈ຺ເຈກພຸທ຺ຘາ. ສີຫສີໂຫຕິ ອຉມ຺ຠິຕຏ຺ເຐນ ສີຫານໍ ອຕິສີໂຫ. ນາຄນາໂຄຕິ ນິກ຺ກິເລສຏ຺ເຐນ, ມຫນ຺ຕຏ຺ເຐນ ວາ ນາຄານໍ ອຕິນາໂຄ. ຄຓິຄຓີຕິ ຄຓວນ຺ຕານໍ ອຕີວ ຄຓວາ. ມຸນິມຸນີຕິ ຎາຓວນ຺ຕານໍ ອຕີວ ຎາຓວາ. ຣາຊຣາຊາຕິ ອຸຕ຺ຕມຣາຊາ. ມຸຎ຺ຈ ມນ຺ຕິ ໂມເຈຫິ ມໍ. ປມຸຎ຺ຈ ມນ຺ຕິ ນານາວິເຘນ ມຸຎ຺ເຈຫິ ມໍ. ໂມເຈຫິ ມນ຺ຕິ ສິຖິລໍ ກໂຣຫິ ມໍ. ປໂມເຈຫິ ມນ຺ຕິ ອຕີວ ສິຖິລໍ ກໂຣຫິ ມໍ. ອຸທ຺ຘຣ ມນ຺ຕິ ມໍ ສໍສາຣປງ຺ກາ ອຸທ຺ຘຣິຕ຺ວາ ຖເລ ປຕິຏ຺ຐາເປຫິ. ສມຸທ຺ຘຣ ມນ຺ຕິ ສມ຺ມາ ອຸທ຺ຘຣິຕ຺ວາ ຖເລ ປຕິຏ຺ຐາເປຫິ ມໍ. ວຸຏ຺ຐາເປຫີຕິ ວິຈິກິຈ຺ຉາສລ຺ລໂຕ ອປເນຕ຺ວາ ວິສຸໍ ກຣຓວເສນ ອຸຏ຺ຐາເປຫິ.

໓໓. ອຖສ຺ສ ຠຄວາ ອຕ຺ຕາຘີນເມວ ກຖໍກຖາປໂມກ຺ຂໍ ໂອຆຕຣຓມຸເຂນ ທສ຺ເສນ຺ໂຕ ‘‘ນາຫ’’ນ຺ຕິ ຄາຖມາຫ. ຕຕ຺ຖ ນາຫໍ ສຫິສ຺ສາມີຕິ ອຫໍ ນ ສຫິສ຺ສາມິ ນ ສກ຺ໂກມິ. ນ ວາຍມິສ຺ສາມີຕິ ວຸຕ຺ຕໍ ໂຫຕິ. ປໂມຈນາຍາຕິ ປໂມເຈຕຸໍ. ກຖໍກຖິນ຺ຕິ ສກງ຺ຂໍ. ຕເຣສີຕິ ຕເຣຍ຺ຍາສິ.

ນິທ຺ເທເສ ນ ອີຫາມີຕິ ປໂຍຄໍ ນ ກໂຣມິ. ນ ສມີຫາມີຕິ ອຕີວ ປໂຍຄໍ ນ ກໂຣມິ. ອສ຺ສທ຺ເຘ ປຸຄ຺ຄເລຕິ ຣຕນຕ຺ຕເຍ ສທ຺ຘາວິຣຫິເຕ ປຸຄ຺ຄເລ. ອຈ຺ຉນ຺ທິເກຕິ ມຄ຺ຄຜລຕ຺ຖໍ ຣຸຈິວິຣຫິເຕ. ກຸສີເຕຕິ ສມາຘິວິຣຫິເຕ. ຫີນວີຣິເຍຕິ ນິພ຺ພີຣິເຍ. ອປ຺ປຏິປຊ຺ຊມາເນຕິ ປຏິປຕ຺ຕິຍາ ນ ປຏິປຊ຺ຊມາເນ.

໓໔. ເອວໍ ວຸຕ຺ເຕ ອຕ຺ຕມນຕໂຣ ໂຘຕໂກ ຠຄວນ຺ຕໍ ອຠິຕ຺ຖວມາໂນ ອນຸສາສນິໍ ຍາຈນ຺ໂຕ ‘‘ອນຸສາສ ພ຺ຣຫ຺ເມ’’ຕິ ຄາຖມາຫ. ຕຕ຺ຖ ພ຺ຣຫ຺ເມຕິ ເສຏ຺ຐວຈນເມຕໍ. ເຕນ ຠຄວນ຺ຕໍ ອາມນ຺ຕຍມາໂນ ອາຫ ‘‘ອນຸສາສ ພ຺ຣຫ຺ເມ’’ຕິ. ວິເວກຘມ຺ມນ຺ຕິ ສພ຺ພສງ຺ຂາຣວິເວກໍ ນິພ຺ພານຘມ຺ມໍ. ອພ຺ຍາປຊ຺ຊມາໂນຕິ ນານປ຺ປກາຣກໍ ອນາປຊ຺ຊມາໂນ. ອິເຘວ ສນ຺ໂຕຕິ ອິເຘວ ສມາໂນ. ອສິໂຕຕິ ອນິສ຺ສິໂຕ.

໓໕-໗. ອິໂຕ ປຣາ ທ຺ເວ ຄາຖາ ເມຕ຺ຕຄູສຸຕ຺ເຕ ວຸຕ຺ຕນຍາ ເອວ. ເກວລຎ຺ຫິ ຕຕ຺ຖ ຘມ຺ມໍ, ອິຘ ສນ຺ຕິນ຺ຕິ ອຍໍ ວິເສໂສ. ຕຕິຍຄາຖາຍປິ ປຸພ຺ພຑ຺ຒໍ ຕຕ຺ຖ ວຸຕ຺ຕນຍເມວ. ອປຣຑ຺ເຒ ສງ຺ໂຄຕິ ສຊ຺ຊນຏ຺ຐານໍ, ລຄ຺ຄນນ຺ຕິ ວຸຕ຺ຕໍ ໂຫຕິ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິທມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ, ເທສນາປຣິໂຍສາເນ ຈ ວຸຕ຺ຕສທິໂສ ເອວ ຘມ຺ມາຠິສມໂຍ ອໂຫສີຕິ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ໂຘຕກມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.