໓. ປຸຓ຺ຓກມາຓວສຸຕ຺ຕນິທ຺ເທສວຓ຺ຓນາ

໑໒. ຕຕິເຍ ປຸຓ຺ຓກສຸຕ຺ຕນິທ຺ເທເສ – ອເນຊນ຺ຕິ ອິທມ຺ປິ ປຸຣິມນເຍເນວ ໂມຆຣາຊານໍ ປຏິກ຺ຂິປິຕ຺ວາ ວຸຕ຺ຕໍ. ຕຕ຺ຖ ມູລທສ຺ສາວິນ຺ຕິ ອກຸສລມູລາທິທສ຺ສາວິໍ. ອິສໂຍຕິ ອິສິນາມກາ ຊຏິລາ. ຍຎ຺ຎນ຺ຕິ ເທຍ຺ຍຘມ຺ມໍ. ອກປ຺ປຍິໍສູຕິ ປຣິເຍສິໍສຸ.

ເຫຕຸທສ຺ສາວີຕິອາທີນິ ສພ຺ພານິ ກາຣຓເວວຈນາເນວ. ກາຣຓຎ຺ຫິ ຍສ຺ມາ ອຕ຺ຕໂນ ຜລຕ຺ຖາຍ ຫິໂນຕິ ປວຕ຺ຕຕິ, ຕສ຺ມາ ເຫຕູຕິ ວຸຈ຺ຈຕິ. ຍສ຺ມາ ຕໍ ຜລໍ ນິເທຕິ ‘ຫນ຺ທ, ຄຓ຺ຫຖ ນ’ນ຺ຕິ ອປ຺ເປຕິ ວິຍ, ຕສ຺ມາ ນິທານນ຺ຕິ ວຸຈ຺ຈຕິ. ສມ຺ຠວທສ຺ສາວີຕິອາທີນິ ປຎ຺ຈ ປທານິ ເຫຏ຺ຐາ ທສ຺ສິຕນຍານິ ເອວ. ຍສ຺ມາ ຕໍ ປຏິຈ຺ຈ ເອຕິ ປວຕ຺ຕຕິ, ຕຎ຺ຈ ຜລໍ ຕໂຕ ສມຸເທຕິ ອຸປ຺ປຊ຺ຊຕິ, ຕສ຺ມາ ປຈ຺ຈໂຍຕິ ຈ ສມຸທໂຍຕິ ຈ ວຸຈ຺ຈຕິ.

ຍາ ວາ ປນຎ຺ຎາປິ ກາຈິ ສຸຄຕິໂຍຕິ ຈຕຸອປາຍວິນິມຸຕ຺ຕກາ ອຸຕ຺ຕຣມາຕາທໂຍ ອປ຺ເປສກ຺ຂາ ກປຓມນຸສ຺ສາ ຈ ທຸລ຺ລຠຆາສຈ຺ຉາທນາ ທຸກ຺ຂປີຬິຕາ ເວທິຕພ຺ພາ. ຍາ ວາ ປນຎ຺ຎາປິ ກາຈິ ທຸຄ຺ຄຕິໂຍຕິ ຍມຣາຊນາຄສຸປຓ຺ຓເປຕມຫິທ຺ຘິກາທໂຍ ປຈ຺ເຈຕພ຺ພາ. ອຕ຺ຕຠາວາຠິນິພ຺ພຕ຺ຕິຍາຕິ ຕີສຸ ຐາເນສຸ ປຏິສນ຺ຘິວເສນ ອຕ຺ຕຠາວປຏິລາຠຕ຺ຖາຍ. ຊານາຕີຕິ ສພ຺ພຎ຺ຎຸຕຎ຺ຎາເຓນ ຊານາຕິ. ປສ຺ສຕີຕິ ສມນ຺ຕຈກ຺ຂຸນາ ປສ຺ສຕິ.

ອກຸສລາຕິ ອໂກສລ຺ລສມ຺ຠູຕາ. ອກຸສລໍ ຠຊນ຺ຕີຕິ ອກຸສລຠາຄິຍາ. ອກຸສລປກ຺ເຂ ຠວາຕິ ອກຸສລປກ຺ຂິກາ. ສພ຺ເພ ເຕ ອວິຊ຺ຊາ ມູລໍ ກາຣຓໍ ເອເຕສນ຺ຕິ ອວິຊ຺ຊາມູລກາ. ອວິຊ຺ຊາຍ ສໂມສຣນ຺ຕິ ສມ຺ມາ ໂອສຣນ຺ຕິ ຄຈ຺ຉນ຺ຕີຕິ ອວິຊ຺ຊາສໂມສຣຓາ. ອວິຊ຺ຊາສມຸຄ຺ຆາຕາຕິ ອຣຫຕ຺ຕມຄ຺ເຄນ ອວິຊ຺ຊາຍ ຫຕາຍ. ສພ຺ເພ ເຕ ສມຸຄ຺ຆາຕໍ ຄຈ຺ຉນ຺ຕີຕິ ວຸຕ຺ຕປ຺ປກາຣາ ອກຸສລຘມ຺ມາ, ເຕ ສພ຺ເພ ຫຕຠາວໍ ປາປຸຓນ຺ຕິ.

ອປ຺ປມາທມູລກາຕິ ສຕິອວິປ຺ປວາໂສ ອປ຺ປມາໂທ ມູລໍ ກາຣຓໍ ເອເຕສນ຺ຕິ ອປ຺ປມາທມູລກາ. ອປ຺ປມາເທສຸ ສມ຺ມາ ໂອສຣນ຺ຕິ ຄຈ຺ຉນ຺ຕີຕິ ອປ຺ປມາທສໂມສຣຓາ. ອປ຺ປມາໂທ ເຕສໍ ຘມ຺ມານໍ ອຄ຺ຄມກ຺ຂາຍຕີຕິ ສຍໍ ກາມາວຈໂຣປິ ສມາໂນ ຈຕຸຠູມກຘມ຺ມານໍ ປຕິຏ຺ຐາຠາເວນ ອຄ຺ໂຄ ນາມ ຊາໂຕ.

ອລມຕ຺ໂຕຕິ ສມຕ຺ຖຈິຕ຺ໂຕ. ມຍາ ປຸຈ຺ຉິຕນ຺ຕິ ມຍາ ປຸຏ຺ຐໍ. ວຫສ຺ເສຕໍ ຠາຣນ຺ຕິ ເອຕໍ ອາຠຕຠາຣໍ ວຫສ຺ສຸ. ເຍ ເກຈິ ອິສິປພ຺ພຊ຺ຊໍ ປພ຺ພຊິຕາ. ‘‘ອິສິປພ຺ພຊ຺ຊາ ປພ຺ພຊິຕາ’’ຕິປິ ປາໂຐ.

ອາຊີວກສາວການໍ ອາຊີວກາ ເທວຕາຕິ ເຍ ອາຊີວກວຈນໍ ສຸຓນ຺ຕິ ສຸສ຺ສຸສນ຺ຕິ, ເຕ ອາຊີວກສາວກາ, ເຕສໍ ອາຊີວກສາວການໍ. ອາຊີວກາ ຈ ເຕສໍ ເທຍ຺ຍຘມ຺ມໍ ປຏິຄ຺ຄຓ຺ຫນ຺ຕິ, ເຕ ເອວ ອາຊີວກາ ເທວຕາ. ເອວໍ ສພ຺ພຕ຺ຖ. ເຍ ເຍສໍ ທກ຺ຂິເຓຍ຺ຍາຕິ ເຍ ອາຊີວກາທໂຍ ທິສາປຣິໂຍສານາ ເຍສໍ ຂຕ຺ຕິຍາທີນໍ ເທຍ຺ຍຘມ຺ມານຸຈ຺ຉວິກາ. ເຕ ເຕສໍ ເທວຕາຕິ ເຕ ອາຊີວກາທໂຍ ເຕສໍ ຂຕ຺ຕິຍາທີນໍ ເທວຕາ.

ເຍປິ ຍຎ຺ຎໍ ເອສນ຺ຕີຕິ ເທຍ຺ຍຘມ຺ມໍ ອິຈ຺ຉນ຺ຕິ. ຄເວສນ຺ຕີຕິ ໂອໂລເກນ຺ຕິ. ປຣິເຍສນ຺ຕີຕິ ອຸປ຺ປາເທນ຺ຕິ. ຍຎ຺ຎາ ວາ ເອເຕ ປຸຖູຕິ ຍຎ຺ຎາ ເອວ ວາ ເອເຕ ປຸຖຸກາ. ຍຎ຺ຎຍາຊກາ ວາ ເອເຕ ປຸຖູຕິ ເທຍ຺ຍຘມ຺ມສ຺ສ ຍາຊນກາ ເອວ ວາ ເອເຕ ປຸຖຸກາ. ທກ຺ຂິເຓຍ຺ຍາ ວາ ເອເຕ ປຸຖູຕິ ເທຍ຺ຍຘມ຺ມານຸຈ຺ຉວິກາ ເອວ ວາ ເອເຕ ປຸຖຸກາ. ເຕ ວິຕ຺ຖາຣໂຕ ທສ຺ເສຕຸໍ ‘‘ກຖໍ ຍຎ຺ຎາ ວາ ເອເຕ ປຸຖູ’’ຕິອາທິນາ ນເຍນ ວິຕ຺ຖາເຣນ ທສ຺ເສຕິ.

໑໓. ອາສີສມານາຕິ ຣູປາທີນິ ປຕ຺ຖຍມານາ. ອິຕ຺ຖຕ຺ຕນ຺ຕິ ອິຕ຺ຖຠາວຎ຺ຈ ປຕ຺ຖຍມານາ, ມນຸສ຺ສາທິຠາວໍ ອິຈ຺ຉນ຺ຕາຕິ ວຸຕ຺ຕໍ ໂຫຕິ. ຊຣໍ ສິຕາຕິ ຊຣໍ ນິສ຺ສິຕາ. ຊຣາມຸເຂນ ເຈຕ຺ຖ ສພ຺ພໍ ວຏ຺ຏທຸກ຺ຂໍ ວຸຕ຺ຕໍ. ເຕນ ວຏ຺ຏທຸກ຺ຂນິສ຺ສິຕາ ຕໂຕ ອປຣິມຸຈ຺ຈມານາເຍວ ກປ຺ປຍິໍສູຕິ ທີເປຕິ.

ຣູປປຏິລາຠໍ ອາສີສມານາຕິ ວຓ຺ຓາຍຕນສມ຺ປຕ຺ຕິລາຠໍ ປຕ຺ຖຍມານາ. ສທ຺ທາທີສຸປິ ເອເສວ ນໂຍ. ຂຕ຺ຕິຍມຫາສາລກຸເລ ອຕ຺ຕຠາວປຏິລາຠນ຺ຕິ ສາຣປ຺ປຕ຺ເຕ ຂຕ຺ຕິຍານໍ ມຫາສາລກຸເລ ອຕ຺ຕຠາວລາຠໍ ປຏິສນ຺ຘິໍ ປຕ຺ຖຍມານາ. ພ຺ຣາຫ຺ມຓມຫາສາລກຸລາທີສຸປິ ເອເສວ ນໂຍ. ພ຺ຣຫ຺ມກາຍິເກສຸ ເທເວສູຕິ ເອຕ຺ຖ ປຸພ຺ພຠວໍ ສນ຺ຘາຍ ວຸຕ຺ຕໍ. ເອຕ຺ຖາຕິ ຂຕ຺ຕິຍກຸລາທີສຸ.

ຊຣານິສ຺ສິຕາຕິ ຊຣໍ ອສ຺ສິຕາ. ພ຺ຍາຘິນິສ຺ສິຕາຕິອາທີສຸປິ ເອເສວ ນໂຍ. ເອເຕຫິ ສພ຺ພໍ ວຏ຺ຏທຸກ຺ຂໍ ປຣິຍາທິຍິຕ຺ວາ ທສ຺ສິຕໍ ໂຫຕິ.

໑໔. ກຈ຺ຈິສຸ ເຕ ຠຄວາ ຍຎ຺ຎປເຖ ອປ຺ປມຕ຺ຕາ, ອຕາຣຸ ຊາຕິຎ຺ຈ ຊຣຎ຺ຈ ມາຣິສາຕິ ເອຕ຺ຖ ຍຎ຺ໂຎ ເອວ ຍຎ຺ຎປໂຖ. ອິທໍ ວຸຕ຺ຕໍ ໂຫຕິ – ກຈ຺ຈິ ເຕ ຍຎ຺ເຎ ອປ຺ປມຕ຺ຕາ ຫຸຕ຺ວາ ຍຎ຺ຎໍ ກປ຺ປຍນ຺ຕາ ວຏ຺ຏທຸກ຺ຂມຸຕ຺ຕຣິໍສູຕິ.

ເຍປິ ຍຎ຺ຎໍ ເທນ຺ຕິ ຍຊນ຺ຕີຕິ ເທຍ຺ຍຘມ຺ມທານວເສນ ຍຊນ຺ຕິ. ປຣິຈ຺ຈຊນ຺ຕີຕິ ວິສ຺ສຊ຺ເຊນ຺ຕິ.

໑໕. ອາສີສນ຺ຕີຕິ ຣູປປຏິລາຠາທໂຍ ປຕ຺ເຖນ຺ຕິ. ໂຖມຍນ຺ຕີຕິ ‘‘ສຸຈິໍ ທິນ຺ນ’’ນ຺ຕິອາທິນາ ນເຍນ ຍຎ຺ຎາທີນິ ປສໍສນ຺ຕິ. ອຠິຊປ຺ປນ຺ຕີຕິ ຣູປາທິປຏິລາຠາຍ ວາຈໍ ຄີຣນ຺ຕິ. ຊຸຫນ຺ຕີຕິ ເທນ຺ຕິ. ກາມາຠິຊປ຺ປນ຺ຕິ ປຏິຈ຺ຈ ລາຠນ຺ຕິ ຣູປາທິລາຠໍ ປຏິຈ຺ຈ ປຸນປ຺ປຸນໍ ກາເມ ເອວ ອຠິຊປ຺ປນ຺ຕິ, ‘‘ອໂຫ ວຕ ອມ຺ຫາກມ຺ປິ ສິຍ຺ຍຸ’’ນ຺ຕິ ວທນ຺ຕິ, ຕຓ຺ຫຎ຺ຈ ຕຕ຺ຖ ວຑ຺ເຒນ຺ຕີຕິ ວຸຕ຺ຕໍ ໂຫຕິ. ຍາຊໂຍຄາຕິ ຍາຄາຘິມຸຕ຺ຕາ. ຠວຣາຄຣຕ຺ຕາຕິ ເອວມິເມຫິ ອາສີສນາທີຫິ ຠວຣາເຄເນວ ຣຕ຺ຕາ, ຠວຣາຄຣຕ຺ຕາ ວາ ຫຸຕ຺ວາ ເອຕານິ ອາສີສນາທີນິ ກໂຣນ຺ຕາ ນາຕຣິໍສຸ ຊາຕິອາທິວຏ຺ຏທຸກ຺ຂໍ ນ ອຸຕ຺ຕຣິໍສຸ.

ຍຎ຺ຎໍ ວາ ໂຖເມນ຺ຕີຕິ ທານໍ ວາ ວຓ຺ເຓນ຺ຕິ. ຜລໍ ວາຕິ ຣູປາທິປຏິລາຠໍ. ທກ຺ຂິເຓຍ຺ເຍ ວາຕິ ຊາຕິສມ຺ປນ຺ນາທີສຸ. ສຸຈິໍ ທິນ຺ນນ຺ຕິ ສຸຈິໍ ກຕ຺ວາ ທິນ຺ນໍ. ມນາປນ຺ຕິ ມນວຑ຺ຒນກໍ. ປຓີຕນ຺ຕິ ໂອຊວນ຺ຕໍ. ກາເລນາຕິ ຕຕ຺ຖ ຕຕ຺ຖ ສມ຺ປຕ຺ຕກາເລ. ກປ຺ປິຍນ຺ຕິ ອກປ຺ປິຍໍ ວຊ຺ເຊຕ຺ວາ ທິນ຺ນໍ. ອນວຊ຺ຊນ຺ຕິ ນິທ຺ໂທສໍ. ອຠິຓ຺ຫນ຺ຕິ ປຸນປ຺ປຸນໍ. ທທໍ ຈິຕ຺ຕໍ ປສາທິຕນ຺ຕິ ທທໂຕ ມຸຎ຺ຈນຈິຕ຺ຕໍ ປສາທິຕນ຺ຕິ. ໂຖເມນ຺ຕິ ກິຕ຺ເຕນ຺ຕີຕິ ຄຸຓໍ ປາກຏໍ ກໂຣນ຺ຕິ. ວຓ຺ເຓນ຺ຕີຕິ ວຓ຺ຓໍ ຠຓນ຺ຕິ. ປສໍສນ຺ຕີຕິ ປສາທໍ ປາເປນ຺ຕິ.

ອິໂຕ ນິທານນ຺ຕິ ອິໂຕ ມນຸສ຺ສໂລກໂຕ ທິນ຺ນກາຣຓາ. ອຊ຺ຌາຍກາຕິ ມນ຺ເຕ ປຣິວຕ຺ເຕນ຺ຕາ. ມນ຺ຕຘຣາຕິ ມນ຺ເຕ ຘາເຣນ຺ຕາ. ຕິຓ຺ຓໍ ເວທານນ຺ຕິ ອິຣຸເວທຍຊຸເວທສາມເວທານໍ. ໂອຏ຺ຐປຫຏກຣຓວເສນ ປາຣໍ ຄຕາຕິ ປາຣຄູ. ສຫ ນິຆຓ຺ຑຸນາ ຈ ເກຏຸເຠນ ຈ ສນິຆຓ຺ຑຸເກຏຸຠານໍ. ນິຆຓ຺ຑູຕິ ນິຆຓ຺ຑຸຣຸກ຺ຂາທີນໍ ເວວຈນປ຺ປກາສກໍ ສຕ຺ຖໍ. ເກຏຸຠນ຺ຕິ ກິຣິຍາກປ຺ປວິກປ຺ໂປ ກວີນໍ ອຸປກາຣາວຫໍ ສຕ຺ຖໍ. ສຫ ອກ຺ຂຣປ຺ປເຠເທນ ສາກ຺ຂຣປ຺ປເຠທານໍ. ອກ຺ຂຣປ຺ປເຠໂທຕິ ສິກ຺ຂາ ຈ ນິຣຸຕ຺ຕິ ຈ. ອິຕິຫາສປຎ຺ຈມານນ຺ຕິ ອາຖພ຺ພຓເວທໍ ຈຕຸຕ຺ຖໍ ກຕ຺ວາ ‘‘ອິຕິຫ ອາສ, ອິຕິຫ ອາສາ’’ຕິ ອີທິສວຈນປຏິສໍຍຸຕ຺ຕປຸຣາຓກຖາສງ຺ຂາໂຕ ອິຕິຫາໂສ ປຎ຺ຈໂມ ເອເຕສນ຺ຕິ ອິຕິຫາສປຎ຺ຈມາ, ເຕສໍ ອິຕິຫາສປຎ຺ຈມານໍ ເວທານໍ.

ປທໍ ຕທວເສສຎ຺ຈ ພ຺ຍາກຣຓໍ ອຘິຍນ຺ຕິ, ເວເທນ຺ຕິ ວາຕິ ປທກາ ເວຍ຺ຍາກຣຓາ. ໂລກາຍຕໍ ວຸຈ຺ຈຕິ ວິຕຓ຺ຑວາທສຕ຺ຖໍ. ມຫາປຸຣິສລກ຺ຂຓນ຺ຕິ ມຫາປຸຣິສານໍ ພຸທ຺ຘາທີນໍ ລກ຺ຂຓທີປກໍ ທ຺ວາທສສຫສ຺ສຄນ຺ຖປ຺ປມາຓໍ ສຕ຺ຖໍ. ຍຕ຺ຖ ໂສຬສສຫສ຺ສຄາຖາປທປຣິມາຓາ ພຸທ຺ຘມນ຺ຕາ ນາມ ອເຫສຸໍ. ເຍສໍ ວເສນ ‘‘ອິມິນາ ລກ຺ຂເຓນ ສມນ຺ນາຄຕາ ພຸທ຺ຘາ ນາມ ໂຫນ຺ຕິ, ອິມິນາ ປຈ຺ເຈກພຸທ຺ຘາ, ອຄ຺ຄສາວກາ, ອສີຕິມຫາສາວກາ (ເຖຣຄາ. ອຏ຺ຐ. ໒.໑໒໘໘), ພຸທ຺ຘມາຕາ, ພຸທ຺ຘປິຕາ, ອຄ຺ຄຸປຏ຺ຐາໂກ, ອຄ຺ຄຸປຏ຺ຐາຍິກາ, ຣາຊາ ຈກ຺ກວຕ຺ຕີ’’ຕິ ອຍໍ ວິເສໂສ ຎາຍຕິ. ອນວຍາຕິ ອິເມສຸ ໂລກາຍຕມຫາປຸຣິສລກ຺ຂເຓສຸ ອນູນາ ປຣິປູຣກາຣິໂນ, ອວຍາ ນ ໂຫນ຺ຕີຕິ ວຸຕ຺ຕໍ ໂຫຕິ. ອວຍາ ນາມ ເຍ ຕານິ ອຕ຺ຖໂຕ ຈ ຄນ຺ຖໂຕ ຈ ສນ຺ຘາເຣຕຸໍ ນ ສກ຺ໂກນ຺ຕິ. ວີຕຣາຄາຕິ ປຫີນຣາຄາ. ເອເຕນ ອຣຫຕ຺ຕຜລຏ຺ຐາ ວຸຕ຺ຕາ. ຣາຄວິນຍາຍ ວາ ປຏິປນ຺ນາຕິ ເອເຕນ ອຣຫຕ຺ຕມຄ຺ຄຏ຺ຐາ. ວີຕໂທສາຕິ ອນາຄາມິຜລຏ຺ຐາ. ໂທສວິນຍາຍ ວາ ປຏິປນ຺ນາຕິ ເອເຕນ ອນາຄາມິມຄ຺ຄຏ຺ຐາ. ວີຕໂມຫາຕິ ອຣຫຕ຺ຕຜລຏ຺ຐາ. ໂມຫວິນຍາຍ ວາ ປຏິປນ຺ນາຕິ ອຣຫຕ຺ຕມຄ຺ຄຏ຺ຐາ. ສີລສມາຘິປຎ຺ຎາວິມຸຕ຺ຕິສມ຺ປນ຺ນາຕິ ເອເຕຫິ ຈຕູຫິ ໂລກິຍໂລກຸຕ຺ຕຣມິສ຺ສເກຫິ ສີລາທີຫິ ສມ຺ປນ຺ນາ. ວິມຸຕ຺ຕິຎາຓທສ຺ສນສມ຺ປນ຺ນາຕິ ເອເຕນ ປຈ຺ຈເວກ຺ຂຓຎາຓສມ຺ປນ຺ນາ ວຸຕ຺ຕາຕິ ຎາຕພ຺ພໍ, ຕຎ຺ຈ ໂຂ ໂລກິຍເມວ. ອຠິຊປ຺ປນ຺ຕີຕິ ປຕ຺ເຖນ຺ຕິ. ຊປ຺ປນ຺ຕີຕິ ປຈ຺ຈາສີສນ຺ຕິ. ປຊປ຺ປນ຺ຕີຕິ ອຕີວ ປຈ຺ຈາສີສນ຺ຕິ. ຍາຊໂຍເຄສຸ ຍຸຕ຺ຕາຕິ ອນຸໂຍເຄ ເທຍ຺ຍຘມ຺ເມ ທິຍ຺ຍມາເນ ອຠິໂຍຄວເສນ ຍຸຕ຺ຕາ.

໑໖. ອຖ ໂກ ຈຣຫີຕິ ອຖ ອິທານິ ໂກ ອຎ຺ໂຎ ອຕາຣິ.

໑໗. ສງ຺ຂາຍາຕິ ຎາເຓນ ວີມໍສິຕ຺ວາ. ປໂຣປຣານີຕິ ປຣານິ ຈ ໂອປຣານິ ຈ, ປຣຕ຺ຕຠາວສກຕ຺ຕຠາວາທີນິ ປຣານິ ຈ ໂອປຣານິ ຈາຕິ ວຸຕ຺ຕໍ ໂຫຕິ. ວິຘູໂມຕິ ກາຍທຸຈ຺ຈຣິຕາທິຘູມວິຣຫິໂຕ. ອນີໂຆຕິ ຣາຄາທິອີຆວິຣຫິໂຕ. ອຕາຣິ ໂສຕິ ໂສ ເອວຣູໂປ ອຣຫາ ຊາຕິຊຣໍ ອຕາຣິ.

ສກຣູປາຕິ ອຕ຺ຕໂນ ຣູປາ. ປຣຣູປາຕິ ປເຣສໍ ຣູປາ. ກາຍທຸຈ຺ຈຣິຕໍ ວິຘູມິຕນ຺ຕິ ຕິວິຘກາຍທຸຈ຺ຈຣິຕໍ ວິຘູມໍ ກຕໍ. ວິຘມິຕນ຺ຕິ ນາສິຕໍ.

ມາໂນ ຫິ ເຕ, ພ຺ຣາຫ຺ມຓ, ຂາຣິຠາໂຣຕິ ຍຖາ ຂາຣິຠາໂຣ ຂນ຺ເຘນ ວຍ຺ຫມາໂນ ອຸປຣິຏ຺ຐິໂຕປິ ອກ຺ກນ຺ຕກ຺ກນ຺ຕຏ຺ຐານໍ ປຖວິຍາ ສທ຺ຘິໍ ຜສ຺ເສຕິ ວິຍ, ເອວໍ ຊາຕິໂຄຕ຺ຕກຸລາທີນິ ມານວຕ຺ຖູນິ ນິສ຺ສາຍ ອຸສ຺ສາປິໂຕ ມາໂນ, ຕຕ຺ຖ ຕຕ຺ຖ ອິສ຺ສໍ ອຸປ຺ປາເທນ຺ໂຕ ຈຕູສຸ ອປາເຍສຸ ສໍສີທາເປຕິ. ເຕນາຫ – ‘‘ມາໂນ ຫິ ເຕ, ພ຺ຣາຫ຺ມຓ, ຂາຣິຠາໂຣ’’ຕິ. ໂກໂຘ ຘູໂມຕິ ຕວ ຎາຓຄ຺ຄິສ຺ສ ອຸປກ຺ກິເລສຏ຺ເຐນ ໂກໂຘ ຘູໂມ. ເຕນ ຫິ ເຕ ອຸປກ຺ກິລິຏ຺ໂຐ ຎາຓຄ຺ຄິ ນ ວິໂຣຈຕິ. ຠສ຺ມນິ ໂມສວຊ຺ຊນ຺ຕິ ນິໂຣຊຏ຺ເຐນ ມຸສາວາໂທ ຉາຣິກາ ນາມ. ຍຖາ ຫິ ຉາຣິກາຍ ປຏິຈ຺ຉນ຺ໂນ ອຄ຺ຄິ ນ ໂຊຕຕິ, ເອວໍ ເຕ ມຸສາວາເທນ ປຏິຈ຺ຉນ຺ນໍ ຎາຓນ຺ຕິ ທສ຺ເສຕິ. ຊິວ຺ຫາ ສຸຊາຕິ ຍຖາ ຕຸຍ຺ຫໍ ສຸວຓ຺ຓຣຊຕໂລຫກຏ຺ຐມຕ຺ຕິກາສຸ ອຎ຺ຎຕຣມຍາ ຍາຄຍຊນຕ຺ຖາຍ ສຸຊາ ໂຫຕິ, ເອວໍ ມຍ຺ຫໍ ຘມ຺ມຍາຄຍຊນຕ຺ຖາຍ ປຫຸຕຊິວ຺ຫາ ສຸຊາຕິ ວທຕິ. ຍຖາ ຕຸຍ຺ຫໍ ນທີຕີເຣ ຍຊນຏ຺ຐານໍ, ເອວໍ ຘມ຺ມຍາຄຍຊນຏ຺ຐານຏ຺ເຐນ ຫທຍໍ ໂຊຕິຏ຺ຐານໍ. ອຕ຺ຕາຕິ ຈິຕ຺ຕໍ.

ຊາຕີຕິ ຊາຍນກວເສນ ຊາຕິ. ອິທເມຕ຺ຖ ສຠາວປຈ຺ຈຕ຺ຕໍ. ສຎ຺ຊາຍນວເສນ ສຎ຺ຊາຕິ, ອຸປສຄ຺ເຄນ ປທໍ ວຑ຺ຒິຕໍ. ໂອກ຺ກມນວເສນ ໂອກ຺ກນ຺ຕິ. ຊາຍນຏ຺ເຐນ ວາ ຊາຕິ. ສາ ອປຣິປຸຓ຺ຓາຍຕນວເສນ ຍຸຕ຺ຕາ. ສຎ຺ຊາຍນຏ຺ເຐນ ສຎ຺ຊາຕິ. ສາ ປຣິປຸຓ຺ຓາຍຕນວເສນ ຍຸຕ຺ຕາ. ໂອກ຺ກມນຏ຺ເຐນ ໂອກ຺ກນ຺ຕິ. ສາ ອຓ຺ຑຊຊລາພຸຊວເສນ ຍຸຕ຺ຕາ. ເຕ ຫິ ອຓ຺ຑໂກສຎ຺ຈ ວຕ຺ຖິໂກສຎ຺ຈ ໂອກ຺ກມນ຺ຕິ ປວິສນ຺ຕິ ໂອກ຺ກມນ຺ຕາ ປວິສນ຺ຕາ ວິຍ ປຏິສນ຺ຘິໍ ຄຓ຺ຫນ຺ຕິ. ອຠິນິພ຺ພຕ຺ຕນຏ຺ເຐນ ອຠິນິພ຺ພຕ຺ຕິ. ສາ ສໍເສທຊໂອປປາຕິກວເສນ ຍຸຕ຺ຕາ. ເຕ ຫິ ປາກຏາ ເອວ ຫຸຕ຺ວາ ນິພ຺ພຕ຺ຕນ຺ຕິ. ອຍໍ ຕາວ ສມ຺ມຸຕິກຖາ.

ອິທານິ ປຣມຕ຺ຖກຖາ ໂຫຕິ. ຂນ຺ຘາ ເອວ ຫິ ປຣມຕ຺ຖໂຕ ປາຕຸຠວນ຺ຕິ, ນ ສຕ຺ຕາ. ຕຕ຺ຖ ຈ ຂນ຺ຘານນ຺ຕິ ເອກໂວກາຣຠເວ ເອກສ຺ສ, ຈຕຸໂວກາຣຠເວ ຈຕຸນ຺ນໍ, ປຎ຺ຈໂວກາຣຠເວ ປຎ຺ຈນ຺ນມ຺ປິ ຄຫຓໍ ເວທິຕພ຺ພໍ. ປາຕຸຠາໂວຕິ ອຸປ຺ປຕ຺ຕິ. ອາຍຕນານນ຺ຕິ ເອຕ຺ຖ ຕຕ຺ຣ ຕຕ຺ຣ ອຸປປຊ຺ຊມານາຍຕນານໍ ສງ຺ຄໂຫ ເວທິຕພ຺ໂພ. ປຏິລາໂຠຕິ ສນ຺ຕຕິຍາ ປາຕຸຠາໂວເຍວ. ປາຕຸຠວນ຺ຕາເນວ ຫິ ຕານິ ປຏິລທ຺ຘານິ ນາມ ໂຫນ຺ຕິ. ສາ ປເນສາ ຕຕ຺ຖ ຕຕ຺ຖ ຠເວ ປຐມາຠິນິພ຺ພຕ຺ຕິລກ຺ຂຓາ ຊາຕິ, ນິຍ຺ຍາຕນຣສາ, ອຕີຕຠວໂຕ ອິຘ ອຸມ຺ມຸຊ຺ຊນປຈ຺ຈຸປຏ຺ຐານາ, ຜລວເສນ ທຸກ຺ຂວິຈິຕ຺ຕຕາປຈ຺ຈຸປຏ຺ຐານາ ວາ.

ຊຣາຕິ ສຠາວປຈ຺ຈຕ຺ຕໍ. ຊີຣຓຕາຕິ ອາກາຣຠາວນິທ຺ເທໂສ. ຂຓ຺ຑິຈ຺ຈນ຺ຕິອາທໂຍ ຕໂຍ ກາລາຕິກ຺ກເມ ກິຈ຺ຈນິທ຺ເທສາ, ປຈ຺ຉິມາ ທ຺ເວ ປກຕິນິທ຺ເທສາ. ອຍຎ຺ຫິ ຊຣາຕິ ອິມິນາ ປເທນ ສຠາວໂຕ ທີປິຕາ. ເຕນສ຺ສາ ອິທໍ ສຠາວປຈ຺ຈຕ຺ຕໍ. ຊີຣຓຕາຕິ ອິມິນາ ອາກາຣໂຕ, ເຕນສ຺ສາຍໍ ອາກາຣນິທ຺ເທໂສ. ຂຓ຺ຑິຈ຺ຈນ຺ຕິ ອິມິນາ ກາລາຕິກ຺ກເມ ທນ຺ຕນຂານໍ ຂຓ຺ຑິຕຠາວກຣຓກິຈ຺ຈໂຕ. ປາລິຈ຺ຈນ຺ຕິ ອິມິນາ ເກສໂລມານໍ ປລິຕຠາວກຣຓກິຈ຺ຈໂຕ. ວລິຕ຺ຕຈຕາຕິ ອິມິນາ ມໍສໍ ມິລາເປຕ຺ວາ ຕເຈ ວລິຠາວກຣຓກິຈ຺ຈໂຕ. ເຕນສ຺ສາ ອິເມ ຂຓ຺ຑິຈ຺ຈນ຺ຕິອາທໂຍ ຕໂຍ ກາລາຕິກ຺ກເມ ກິຈ຺ຈນິທ຺ເທສາ. ເຕຫິ ອິເມສໍ ວິກາຣານໍ ທສ຺ສນວເສນ ປາກຏີຠູຕາ ປາກຏຊຣາ ທສ຺ສິຕາ. ຍເຖວ ຫິ ອຸທກສ຺ສ ວາ ວາຕສ຺ສ ວາ ອຄ຺ຄິໂນ ວາ ຕິຓຣຸກ຺ຂາທີນໍ ສໍຠຄ຺ຄປລິຠຄ຺ຄຕາຍ ວາ ຌາມຕາຍ ວາ ຄຕມຄ຺ໂຄ ປາກໂຏ ໂຫຕິ, ນ ຈ ໂສ ຄຕມຄ຺ໂຄ ຕາເນວ ອຸທກາທີນິ, ເອວເມວ ຊຣາຍ ທນ຺ຕາທີນໍ ຂຓ຺ຑິຈ຺ຈາທິວເສນ ຄຕມຄ຺ໂຄ ປາກໂຏ, ຈກ຺ຂຸໍ ອຸມ຺ມີເລຕ຺ວາປິ ຄຍ຺ຫຕິ, ນ ຈ ຂຓ຺ຑິຈ຺ຈາທີເນວ ຊຣາ. ນ ຫິ ຊຣາ ຈກ຺ຂຸວິຎ຺ເຎຍ຺ຍາ ໂຫຕິ.

ອາຍຸໂນ ສໍຫານິ ອິນ຺ທ຺ຣິຍານໍ ປຣິປາໂກຕິ ອິເມຫິ ປນ ປເທຫິ ກາລາຕິກ຺ກເມເຍວ ອຠິພ຺ຍຕ຺ຕາຍ ອາຍຸກ຺ຂຍຈກ຺ຂາທິອິນ຺ທ຺ຣິຍປຣິປາກສງ຺ຂາຕາຍ ປກຕິຍາ ທີປິຕາ, ເຕນສ຺ສິເມ ປຈ຺ຉິມາ ທ຺ເວ ປກຕິນິທ຺ເທສາຕິ ເວທິຕພ຺ພາ. ຕຕ຺ຖ ຍສ຺ມາ ຊຣໍ ປຕ຺ຕສ຺ສ ອາຍຸ ຫາຍຕິ, ຕສ຺ມາ ຊຣາ ‘‘ອາຍຸໂນ ສໍຫານີ’’ຕິ ຜລູປຈາເຣນ ວຸຕ຺ຕາ. ຍສ຺ມາ ຈ ທຫຣກາເລ ສຸປ຺ປສນ຺ນານິ ສຸຂຸມມ຺ປິ ອຕ຺ຕໂນ ວິສຍໍ ສຸເຂເນວ ຄຓ຺ຫນສມຕ຺ຖານິ ຈກ຺ຂາທີນິ ອິນ຺ທ຺ຣິຍານິ ຊຣໍ ປຕ຺ຕສ຺ສ ປຣິປກ຺ການິ ອາລຸຬິຕານິ ອວິສທານິ, ໂອຬາຣິກມ຺ປິ ອຕ຺ຕໂນ ວິສຍໍ ຄເຫຕຸໍ ອສມຕ຺ຖານິ ໂຫນ຺ຕິ. ຕສ຺ມາ ‘‘ອິນ຺ທ຺ຣິຍານໍ ປຣິປາໂກ’’ຕິ ຜລູປຈາເຣເນວ ວຸຕ຺ຕາ.

ສາ ປເນສາ ເອວໍ ນິທ຺ທິຏ຺ຐາ ສພ຺ພາປິ ຊຣາ ປາກຏາ ປຏິຈ຺ຉນ຺ນາຕິ ທຸວິຘາ ໂຫຕິ. ຕຕ຺ຖ ທນ຺ຕາທີສຸ ຂຓ຺ຑາທິຠາວທສ຺ສນໂຕ ຣູປຘມ຺ເມສຸ ຊຣາ ປາກຏຊຣາ ນາມ. ອຣູປຘມ຺ເມສຸ ປນ ຊຣາ ຕາທິສສ຺ສ ວິກາຣສ຺ສ ອທສ຺ສນໂຕ ປຏິຈ຺ຉນ຺ນຊຣາ ນາມ. ຕຕ຺ຖ ຍ຺ວາຍໍ ຂຓ຺ຑາທິຠາໂວ ທິສ຺ສຕິ, ໂສ ຕາທິສານໍ ທນ຺ຕາທີນໍ ສຸວິຎ຺ເຎຍ຺ຍຕ຺ຕາ ວຓ຺ໂຓເຍວ. ຕຎ຺ຈ ຈກ຺ຂຸນາ ທິສ຺ວາ ມໂນທ຺ວາເຣນ ຈິນ຺ເຕຕ຺ວາ ‘‘ອິເມ ທນ຺ຕາ ຊຣາຍ ປຫຏາ’’ຕິ ຊຣໍ ຊານາຕິ. ອຸທກຏ຺ຐາເນ ພທ຺ຘານິ ໂຄສິງ຺ຄາທີນິ ໂອໂລເກຕ຺ວາ ເຫຏ຺ຐາ ອຸທກສ຺ສ ອຕ຺ຖິຠາວຊານນໍ ວິຍ.

ປຸນ ອວີຈິ ສວີຈີຕິ ເອວມ຺ປິ ອຍໍ ຊຣາ ທຸວິຘາ ໂຫຕິ. ຕຕ຺ຖ ມຓິກນກຣຊຕປວາຬຈນ຺ທສູຣິຍາທີນໍ ມນ຺ທທສກາທີສຸ ປາຓີນໍ ວິຍ ຈ ປຸປ຺ຜຜລປລ຺ລວາທີສຸ ອປາຓີນໍ ວິຍ ຈ ອນ຺ຕຣນ຺ຕຣາ ວຓ຺ຓວິເສສາທີນໍ ທຸພ຺ພິຎ຺ເຎຍ຺ຍຕ຺ຕາ ຊຣາ ອວີຈິຊຣາ ນາມ, ນິຣນ຺ຕຣຊຣາຕິ ອຕ຺ໂຖ. ຕໂຕ ອຎ຺ເຎສຸ ປນ ຍຖາວຸຕ຺ເຕສຸ ອນ຺ຕຣນ຺ຕຣາ ວຓ຺ຓວິເສສາທີນໍ ສຸວິຎ຺ເຎຍ຺ຍຕ຺ຕາ ຊຣາ ສວີຈິຊຣາ ນາມ.

ຕຕ຺ຖ ສວີຈິຊຣາ ອຸປາທິນ຺ນກອນຸປາທິນ຺ນກວເສນ ເອວໍ ທີເປຕພ຺ພາ – ທຫຣກຸມາຣການຎ຺ຫິ ປຐມເມວ ຂີຣທນ຺ຕາ ນາມ ອຸຏ຺ຐຫນ຺ຕິ, ນ ເຕ ຖິຣາ. ເຕສຸ ປນ ປຕິເຕສຸ ປຸນ ທນ຺ຕາ ອຸຏ຺ຐຫນ຺ຕິ, ເຕ ປຐມເມວ ເສຕາ ໂຫນ຺ຕິ, ຊຣາວາເຕນ ປນ ປຫຏກາເລ ກາຬກາ ໂຫນ຺ຕິ. ເກສາ ປນ ປຐມເມວ ຕມ຺ພາປິ ໂຫນ຺ຕິ ກາຬກາປິ ເສຕກາປິ. ຉວິ ປນ ສໂລຫິຕກາ ໂຫຕິ. ວຑ຺ຒນ຺ຕານໍ ວຑ຺ຒນ຺ຕານໍ ໂອທາຕານໍ ໂອທາຕຠາໂວ, ກາຬການໍ ກາຬກຠາໂວ ປຎ຺ຎາຍຕິ. ຊຣາວາເຕນ ປຫຏກາເລ ຈ ວລິໍ ຄຓ຺ຫາຕິ. ສພ຺ພມ຺ປິ ສສ຺ສໍ ວປິຕກາເລ ເສຕໍ ໂຫຕິ, ປຈ຺ຉາ ນີລໍ. ຊຣາວາເຕນ ປນ ປຫຏກາເລ ປຓ຺ຑຣໍ ໂຫຕິ. ອມ຺ພງ຺ກຸເຣນາປິ ທີເປຕຸໍ ວຏ຺ຏຕິ ເອວ. ສາ ປເນສາ ຂນ຺ຘປຣິປາກລກ຺ຂຓາ ຊຣາ, ມຣຓູປນຍນຣສາ, ໂຍພ຺ພນວິນາສປຈ຺ຈຸປຏ຺ຐານາ. ເສສໍ ສພ຺ພຕ຺ຖ ປາກຏເມວ. ເອວໍ ຠຄວາ ອິທມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ, ເທສນາປຣິໂຍສາເນ ອຍມ຺ປິ ພ຺ຣາຫ຺ມໂຓ ອຣຫຕ຺ເຕ ປຕິຏ຺ຐາສິ ສທ຺ຘິໍ ອນ຺ເຕວາສິກສຫສ຺ເສນ. ອຎ຺ເຎສຎ຺ຈ ອເນກສຫສ຺ສານໍ ຘມ຺ມຈກ຺ຂຸໍ ອຸທປາທິ. ເສສໍ ວຸຕ຺ຕສທິສເມວ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ປຸຓ຺ຓກມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.