໒. ຕິສ຺ສເມຕ຺ເຕຍ຺ຍມາຓວສຸຕ຺ຕນິທ຺ເທສວຓ຺ຓນາ

໙. ທຸຕິເຍ ຕິສ຺ສເມຕ຺ເຕຍ຺ຍສຸຕ຺ຕນິທ຺ເທເສ – ໂກຘ ສນ຺ຕຸສິໂຕຕິ ນິຏ຺ຐິເຕ ປນ ອຊິຕສຸຕ຺ເຕ ‘‘ກຖໍ ໂລກໍ ອເວກ຺ຂນ຺ຕໍ, ມຈ຺ຈຸຣາຊາ ນ ປສ຺ສຕີ’’ຕິ (ສຸ. ນິ. ໑໑໒໔; ຈູຬນິ. ໂມຆຣາຊມາຓວປຸຈ຺ຉາ ໑໔໓) ເອວໍ ໂມຆຣາຊາ ປຸຈ຺ຉິຕຸໍ ອາຣຠິ. ‘‘ນ ຕາວສ຺ສ ອິນ຺ທ຺ຣິຍານິ ປຣິປາກໍ ຄຕານີ’’ຕິ ຎຕ຺ວາ ຠຄວາ ‘‘ຕິຏ຺ຐ ຕ຺ວໍ, ໂມຆຣາຊ, ອຎ຺ໂຎ ປຸຈ຺ຉຕູ’’ຕິ ປຏິກ຺ຂິປິ. ຕໂຕ ຕິສ຺ສເມຕ຺ເຕຍ຺ໂຍ ອຕ຺ຕໂນ ສໍສຍໍ ປຸຈ຺ຉນ຺ໂຕ ‘‘ໂກຘາຕິ ຄາຖມາຫ. ຕຕ຺ຖ ໂກຘ ສນ຺ຕຸສິໂຕຕິ ໂກ ອິຘ ສຕ຺ໂຕ ຕຸຏ຺ໂຐ. ອິຎ຺ຊິຕາຕິ ຕຓ຺ຫາທິຏ຺ຐິວິປ຺ຜນ຺ທິຕານິ. ອຸຠນ຺ຕມຠິຎ຺ຎາຍາຕິ ອຸໂຠ ອນ຺ເຕ ອຠິຊານິຕ຺ວາ. ມນ຺ຕາ ນ ລິປ຺ປຕີຕິ ປຎ຺ຎາຍ ນ ລິປ຺ປຕິ.

ປຣິປຸຓ຺ຓສງ຺ກປ຺ໂປຕິ ເນກ຺ຂມ຺ມາທິວິຕກ຺ເກຫິ ປຣິປຸຓ຺ຓສງ຺ກປ຺ປຕ຺ຕາ ປຣິປຸຓ຺ຓມໂນຣໂຖ.

ຕຓ຺ຫິຎ຺ຊິຕນ຺ຕິ ຕຓ຺ຫາຍ ຈລິຕໍ. ທິຏ຺ຐິຎ຺ຊິຕາທີສຸປິ ເອເສວ ນໂຍ. ກາມິຎ຺ຊິຕນ຺ຕິ ກິເລສກາເມຫິ ອິຎ຺ຊິຕໍ ຜນ຺ທິຕໍ. ‘‘ກມ຺ມິຎ຺ຊິຕ’’ນ຺ຕິປິ ປາໂຐ, ຕໍ ນ ສຸນ຺ທຣໍ.

ມຫນ຺ໂຕ ປຸຣິໂສຕິ ມຫາປຸຣິໂສ. ອຸຕ຺ຕໂມ ປຸຣິໂສຕິ ອຄ຺ຄປຸຣິໂສ. ປຘາໂນ ປຸຣິໂສຕິ ເສຏ຺ຐປຸຣິໂສ. ອລາມໂກ ປຸຣິໂສຕິ ວິສິຏ຺ຐປຸຣິໂສ. ເຊຏ຺ຐໂກ ປຸຣິໂສຕິ ປາໂມກ຺ຂປຸຣິໂສ. ນ ເຫຏ຺ຐິມໂກ ປຸຣິໂສຕິ ອຸຕ຺ຕມປຸຣິໂສ. ປຸຣິສານໍ ໂກຏິປ຺ປຕ຺ໂຕ ປຸຣິໂສຕິ ປຘານປຸຣິໂສ. ສພ຺ເພສໍ ອິຈ຺ຉິໂຕ ປຸຣິໂສຕິ ປວຣປຸຣິໂສ.

ສິພ຺ພິນິມຈ຺ຈຄາຕິ ຕຓ຺ຫໍ ອຕິອຄາ, ອຕິກ຺ກມິຕ຺ວາ ຐິໂຕ. ອຸປຈ຺ຈຄາຕິ ຠຸສໍ ອຕິອຄາ.

໑໐. ຕສ຺ເສຕມຕ຺ຖໍ ຠຄວາ ພ຺ຍາກໂຣນ຺ໂຕ ‘‘ກາເມສູ’’ຕິ ຄາຖາທ຺ວຍມາຫ. ຕຕ຺ຖ ກາເມສຸ ພ຺ຣຫ຺ມຈຣິຍວາຕິ ກາມນິມິຕ຺ຕໍ ພ຺ຣຫ຺ມຈຣິຍວາ, ກາເມສຸ ອາທີນວໍ ທິສ຺ວາ ມຄ຺ຄພ຺ຣຫ຺ມຈຣິເຍນ ສມນ຺ນາຄໂຕຕິ ວຸຕ຺ຕໍ ໂຫຕິ. ເອຕ຺ຕາວຕາ ສນ຺ຕຸສິຕຕໍ ທສ຺ເສຕິ. ‘‘ວີຕຕຓ຺ໂຫ’’ຕິອາທີຫິ ອນິຎ຺ຊິຕຕໍ. ຕຕ຺ຖ ສງ຺ຂາຍ ນິພ຺ພຸໂຕຕິ ອນິຈ຺ຈາທິວເສນ ຘມ຺ເມ ວີມໍສິຕ຺ວາ ຣາຄາທິນິພ຺ພາເນນ ນິພ຺ພຸໂຕ.

ອສທ຺ຘມ຺ມສມາປຕ຺ຕິຍາຕິ ນີຈຘມ຺ມສມາໂຍຄໂຕ. ອາຣຕີຕິ ອາຣກາ ຣມນໍ. ວິຣຕີຕິ ຕາຍ ວິນາ ຣມນໍ. ປຏິວິຣຕີຕິ ປຏິນິວຕ຺ຕິຕ຺ວາ ຕາຍ ວິນາ ຣມນໍ. ເວຣມຓີຕິ ເວຣວິນາສນໍ. ອກິຣິຍາຕິ ກິຣິຍາປຈ຺ຉິນ຺ທນໍ. ອກຣຓນ຺ຕິ ກຣຓປຣິຈ຺ຉິນ຺ທນໍ. ອນຊ຺ຌາປຕ຺ຕີຕິ ອນາປຊ຺ຊນຕາ. ເວລາອນຕິກ຺ກໂມຕິ ສີມາອນຕິກ຺ກໂມ. ເສສໍ ຕຕ຺ຖ ຕຕ຺ຖ ວຸຕ຺ຕນຍຕ຺ຕາ ປາກຏເມວ.

ເອວໍ ຠຄວາ ອິທມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ. ເທສນາປຣິໂຍສາເນ ອຍມ຺ປິ ພ຺ຣາຫ຺ມໂຓ ອຣຫຕ຺ເຕ ປຕິຏ຺ຐາສິ ສທ຺ຘິໍ ອນ຺ເຕວາສິກສຫສ຺ເສນ, ອຎ຺ເຎສຎ຺ຈ ອເນກສຫສ຺ສານໍ ຘມ຺ມຈກ຺ຂຸໍ ອຸທປາທິ. ເສສໍ ປຸພ຺ພສທິສເມວ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ຕິສ຺ສເມຕ຺ເຕຍ຺ຍມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.