໑໗. ປາຣາຍນຕ຺ຖຸຕິຄາຖານິທ຺ເທສວຓ຺ຓນາ

໙໓. ອິໂຕ ປຣໍ ສງ຺ຄີຕິກາຣາ ເທສນໍ ໂຖເມນ຺ຕາ ‘‘ອິທມໂວຈ ຠຄວາ’’ຕິອາທິມາຫໍສຸ. ຕຕ຺ຖ ອິທມໂວຈາຕິ ອິທໍ ປາຣາຍນໍ ອໂວຈ. ປຣິຈາຣກໂສຬສານນ຺ຕິ ພາວຣິສ຺ສ ປຣິຈາຣເກນ ປິງ຺ຄິເຍນ ສຫ ໂສຬສານໍ, ພຸທ຺ຘສ຺ສ ວາ ຠຄວໂຕ ປຣິຈາຣການໍ ໂສຬສານນ຺ຕິ ປຣິຈາຣກໂສຬສານໍ. ເຕ ເອວ ຈ ພ຺ຣາຫ຺ມຓາ ຕຕ຺ຖ ໂສຬສສຸ ທິສາສຸ ປຸຣໂຕ ຈ ປຈ຺ຉໂຕ ຈ ວາມປສ຺ສໂຕ ຈ ທກ຺ຂິຓປສ຺ສໂຕ ຈ ຉ ຉ ໂຍຊນາ ນິສິນ຺ນາ ອຸຊຸເກນ ທ຺ວາທສໂຍຊນິກາ ອໂຫສິ. ອຊ຺ຌິຏ຺ໂຐຕິ ຍາຈິໂຕ.

໙໔-໙໗. ອຕ຺ຖມຎ຺ຎາຍາຕິ ປາຬິອຕ຺ຖມຎ຺ຎາຍ. ຘມ຺ມມຎ຺ຎາຍາຕິ ປາຬິມຎ຺ຎາຍ. ປາຣາຍນນ຺ຕິ ເອວໍ ອິມສ຺ສ ຘມ຺ມປຣິຍາຍສ຺ສ ອຘິວຈນໍ ອາໂຣເປຕ຺ວາ ເຕສໍ ພ຺ຣາຫ຺ມຓານໍ ນາມານິ ກິຕ຺ຕຍນ຺ໂຕ ‘‘ອຊິໂຕ…ເປ… ພຸທ຺ຘເສຏ຺ຐມຸປາຄມຸ’’ນ຺ຕິ ອາຫໍສຸ. ຕຕ຺ຖ ສມ຺ປນ຺ນຈຣຓນ຺ຕິ ນິພ຺ພານປທຏ຺ຐານຠູເຕນ ປາຕິໂມກ຺ຂສີລາທິນາ ສມ຺ປນ຺ນໍ. ອິສິນ຺ຕິ ມເຫສິໍ.

ນິທ຺ເທເສ ອຸປາຄມິໍສູຕິ ສມີປໍ ຄມິໍສຸ. ອຸປສງ຺ກມິໍສູຕິ ອວິທູຣຏ຺ຐານໍ ຄມິໍສຸ. ປຍິຣຸປາສິໍສູຕິ ສມີເປ ນິສີທິໍສຸ. ປຣິປຸຈ຺ຉິໍສູຕິ ປຣິປຸຈ຺ຉໍ ອາຫຣິໍສຸ. ປຣິຄຓ຺ຫິໍສູຕິ ຕຸລຍິໍສຸ. ‘‘ໂຈທຍິໍສູ’’ຕິ ເກຈິ.

ສີລາຈາຣນິພ຺ພຕ຺ຕີຕິ ອຸຕ຺ຕມສີລາຈາຣນິພ຺ພຕ຺ຕິ, ມຄ຺ເຄນ ນິປ຺ຜນ຺ນສີລນ຺ຕິ ອຕ຺ໂຖ.

ຄມ຺ຠີເຣຕິ ອຸຕ຺ຕານຠາວປຏິກ຺ເຂປວຈນໍ. ທຸທ຺ທເສຕິ ຄມ຺ຠີຣຕ຺ຕາ ທຸທ຺ທເສ, ທຸກ຺ເຂນ ທຏ຺ຐພ຺ເພ, ນ ສກ຺ກາ ສຸເຂນ ທຏ຺ຐຸໍ. ທຸທ຺ທສຕ຺ຕາວ ທຸຣນຸໂພເຘ, ທຸກ຺ເຂນ ອວພຸຊ຺ຌິຕພ຺ເພ, ນ ສກ຺ກາ ສຸເຂນ ອວພຸຊ຺ຌິຕຸໍ. ສນ຺ເຕຕິ ນິພ຺ພຸເຕ. ປຓີເຕຕິ ອຕປ຺ປເກ. ອິທໍ ທ຺ວຍໍ ໂລກຸຕ຺ຕຣເມວ ສນ຺ຘາຍ ວຸຕ຺ຕໍ. ອຕກ຺ກາວຈເຣຕິ ຕກ຺ເກນ ນ ອວຈຣິຕພ຺ເພ ນ ໂອຄາຫິຕພ຺ເພ ຎາເຓເນວ ອວຈຣິຕພ຺ເພ. ນິປຸເຓຕິ ສຓ຺ເຫ. ປຓ຺ຑິຕເວທນີເຍຕິ ສມ຺ມາ ປຏິປນ຺ເນຫິ ປຓ຺ຑິເຕຫິ ເວທິຕພ຺ເພ.

໙໘. ໂຕເສສີຕິ ຕຸຏ຺ຐິໍ ອາປາເທສິ. ວິໂຕເສສີຕິ ວິວິຘາ ເຕສໍ ໂສມນສ຺ສໍ ອຸປ຺ປາເທສິ. ປສາເທສີຕິ ເຕສໍ ຈິຕ຺ຕປ຺ປສາທໍ ອກາສິ. ອາຣາເຘສີຕິ ອາຣາຘຍິ ສິທ຺ຘິໍ ປາເປສິ. ອຕ຺ຕມເນ ອກາສີຕິ ໂສມນສ຺ສວເສນ ສກມເນ ອກາສິ.

໙໙. ຕໂຕ ປຣໍ ພ຺ຣຫ຺ມຈຣິຍມຈຣິໍສູຕິ ມຄ຺ຄພ຺ຣຫ຺ມຈຣິຍໍ ອຈຣິໍສຸ.

໑໐໑. ຕສ຺ມາ ປາຣາຍນນ຺ຕິ ຕສ຺ສ ປາຣຠູຕສ຺ສ ນິພ຺ພານສ຺ສ ອາຍຕນນ຺ຕິ ວຸຕ຺ຕໍ ໂຫຕິ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ປາຣາຍນຕ຺ຖຸຕິຄາຖານິທ຺ເທສວຓ຺ຓນາ ນິຏ຺ຐິຕາ.