໑໖. ປິງ຺ຄິຍມາຓວສຸຕ຺ຕນິທ຺ເທສວຓ຺ຓນາ

໘໙. ໂສຬສເມ ປິງ຺ຄິຍສຸຕ຺ຕນິທ຺ເທເສ – ຊິຓ຺ໂຓຫມສ຺ມິ ອພໂລ ວີຕວຓ຺ໂຓຕິ ໂສ ກິຣ ພ຺ຣາຫ຺ມໂຓ ຊຣາຠິຠູໂຕ ວີສວສ຺ສສຕິໂກ ຊາຕິຍາ, ທຸພ຺ພໂລ ຈ ‘‘ອິຘ ປາທໍ ກຣິສ຺ສາມີ’’ຕິ ອຎ຺ຎຕ຺ເຣວ ກໂຣຕິ, ວິນຏ຺ຐປຸຣິມຉວິວຓ຺ໂຓ ຈ. ເຕນາຫ – ‘‘ຊິຓ຺ໂຓຫມສ຺ມິ ອພໂລ ວີຕວຓ຺ໂຓ’’ຕິ. ມາຫໍ ນສ຺ສໍ ໂມມຸໂຫ ອນ຺ຕຣາວາຕິ ມາຫໍ ຕຸຍ຺ຫໍ ຘມ຺ມໍ ອສຈ຺ຉິກຕ຺ວາ ອນ຺ຕຣາ ເອວ ອວິທ຺ວາ ຫຸຕ຺ວາ ອນສ຺ສິໍ. ຊາຕິຊຣາຍ ອິຘ ວິປ຺ປຫານນ຺ຕິ ອິເຘວ ຕວ ປາທມູເລ ປາສາຓເກ ເຈຕິເຍ ວາ ຊາຕິຊຣາຍ ວິປ຺ປຫານໍ ນິພ຺ພານໍ ຘມ຺ມຣສໍ ອຫໍ ວິຊຎ຺ຎໍ, ຕໍ ເມ ອາຈິກ຺ຂ.

ອພໂລຕິ ພລວິຣຫິໂຕ. ທຸພ຺ພໂລຕິ ທຸພ຺ພລພໂລ. ອປ຺ປພໂລຕິ ປຣິຕ຺ຕພໂລ. ອປ຺ປຖາໂມຕິ ປຣິຕ຺ຕວີຣິໂຍ. ວີຕວຓ຺ໂຓຕິ ປຣິວຕ຺ຕິຕຉວິວຓ຺ໂຓ. ວິຄຕວຓ຺ໂຓຕິ ອປຄຕຉວິວຓ຺ໂຓ. ວິຄຈ຺ຉິຕວຓ຺ໂຓຕິ ທູຣີຠູຕຉວິວຓ຺ໂຓ. ຍາ ສາ ປຸຣິມາ ສຸຠາ ວຓ຺ຓນິຠາຕິ ຍາ ສາ ສຸຠາ ສຸນ຺ທຣາ ປຸຣິມກາເລ ສຕິ, ສາ ວຓ຺ຓນິຠາ ເອຕຣຫິ ອນ຺ຕຣຫິຕາ ວິຄຕາ. ອາທີນໂວ ປາຕຸຠູໂຕຕິ ອຸປທ຺ທໂວ ປາຕຸຣໂຫສິ. ‘‘ຍາ ສາ ປຸຣິມາ ສຸຠາ ວຓ຺ຓນິຠາ’’ຕິ ປາຐໍ ຐເປຕ຺ວາ ‘‘ຍາ ສຸຠາ ອສ຺ສາ’’ຕິ ເອເກ ວຓ຺ຓຍນ຺ຕິ.

ອສຸທ຺ຘາຕິ ປຏລາທີຫິ ອສຸທ຺ຘາ. ອວິສຸທ຺ຘາຕິ ຕິມິຣາທີຫິ ອວິສຸທ຺ຘາ. ອປຣິສຸທ຺ຘາຕິ ສມນ຺ຕໂຕ ໂຜຏປຏລາທີຫິ ປຣິໂຍນທ຺ຘຕ຺ຕາ ອປຣິສຸທ຺ຘາ. ອໂວທາຕາຕິ ນປ຺ປສນ຺ນາ ປສນ຺ນສທິສາ. ໂນ ຕຖາ ຈກ຺ຂຸນາ ຣູເປ ປສ຺ສາມີຕິ ຍຖາ ໂປຣາຓຈກ຺ຂຸນາ ຣູປາຣມ຺ມຓໍ ປສ຺ສາມິ ໂອໂລເກມິ, ຕຖາ ເຕນ ປກາເຣນ ອິທານິ ນ ປສ຺ສາມິ. ໂສຕໍ ອສຸທ຺ຘນ຺ຕິອາທີສຸປິ ເອເສວ ນໂຍ. ມາຫໍ ນສ຺ສນ຺ຕິ ອຫໍ ມາ ວິນສ຺ສໍ.

໙໐. ອິທານິ ຍສ຺ມາ ປິງ຺ຄິໂຍ ກາເຍ ສາເປກ຺ຂຕາຍ ‘‘ຊິຓ຺ໂຓຫມສ຺ມີ’’ຕິອາທິມາຫ. ເຕນສ຺ສ ຠຄວາ ກາເຍ ສິເນຫປ຺ປຫານຕ຺ຖໍ ‘‘ທິສ຺ວານ ຣູເປສຸ ວິຫຎ຺ຎມາເນ’’ຕິ ຄາຖມາຫ. ຕຕ຺ຖ ຣູເປສູຕິ ຣູປເຫຕຸ ຣູປປຈ຺ຈຍາ. ວິຫຎ຺ຎມາເນຕິ ກມ຺ມກາຣຓາທີຫິ ອຸປຫຎ຺ຎມາເນ. ຣຸປ຺ປນ຺ຕິ ຣູເປສູຕິ ຈກ຺ຂຸໂຣຄາທີຫິ ຈ ຣູປເຫຕຸເຍວ ຊນາ ຣຸປ຺ປນ຺ຕິ ພາຘິຍນ຺ຕິ.

ຫຎ຺ຎນ຺ຕີຕິ ຆຏີຍນ຺ຕິ. ວິຫຎ຺ຎນ຺ຕີຕິ ວິເຫສິຍນ຺ຕິ. ອຸປວິຫຎ຺ຎນ຺ຕີຕິ ຫຕ຺ຖປາທຈ຺ເຉທາທິໍ ລຠນ຺ຕິ. ອຸປຆາຕິຍນ຺ຕີຕິ ມຣຓໍ ລຠນ຺ຕິ. ກຸປ຺ປນ຺ຕີຕິ ປຣິວຕ຺ຕນ຺ຕິ. ປີຬຍນ຺ຕີຕິ ວິຆາຕໍ ອາປຊ຺ຊນ຺ຕິ. ຆຏ຺ຏຍນ຺ຕີຕິ ຆຏ຺ຏນໍ ປາປຸຓນ຺ຕິ. ພ຺ຍາຘິຕາຕິ ຠີຕາ. ໂທມນສ຺ສິຕາຕິ ຈິຕ຺ຕວິຆາຕໍ ປຕ຺ຕາ. ເວມາເນຕິ ນສ຺ສມາເນ.

໙໑. ເອວໍ ຠຄວຕາ ຍາວ ອຣຫຕ຺ຕໍ, ຕາວ ກຖິຕໍ ປຏິປຕ຺ຕິໍ ສຸຕ຺ວາ ປິງ຺ຄິໂຍ ຊຣາທຸພ຺ພລຕາຍ ວິເສສໍ ອນຘິຄນ຺ຕ຺ວາ ຈ ປຸນ ‘‘ທິສາ ຈຕສ຺ໂສ’’ຕິ ອິມາຍ ຄາຖາຍ ຠຄວນ຺ຕໍ ໂຖເມນ຺ໂຕ ເທສນໍ ຍາຈຕິ.

໙໒. ອຖສ຺ສ ຠຄວາ ປຸນປິ ຍາວ ອຣຫຕ຺ຕໍ, ຕາວ ປຏິປທໍ ທສ຺ເສນ຺ໂຕ ‘‘ຕຓ຺ຫາຘິປນ຺ເນ’’ຕິ ຄາຖມາຫ.

ຕຓ຺ຫາຘິປນ຺ເນຕິ ຕຓ຺ຫາຍ ວິມຸຈ຺ຈິຕ຺ວາ ຐິເຕ. ຕຓ຺ຫານຸເຄຕິ ຕຓ຺ຫາຍ ສຫ ຄຈ຺ຉນ຺ເຕ. ຕຓ຺ຫານຸຄເຕຕິ ຕຓ຺ຫາຍ ອນຸພນ຺ຘນ຺ເຕ. ຕຓ຺ຫານຸສເຏຕິ ຕຓ຺ຫາຍ ສຫ ຘາວນ຺ເຕ. ຕຓ຺ຫາຍ ປນ຺ເນຕິ ຕຓ຺ຫາຍ ນິມຸຄ຺ເຄ. ປຏິປນ຺ເນຕິ ຕຓ຺ຫາຍ ອວຕ຺ຖເຏ. ອຠິຠູເຕຕິ ມທ຺ທິເຕ. ປຣິຍາທິນ຺ນຈິຕ຺ເຕຕິ ປຣິຍາທິຍິຕ຺ວາ ຄຫິຕກຸສລຈິຕ຺ເຕ.

ສນ຺ຕາປຊາເຕຕິ ສຎ຺ຊາຕຈິຕ຺ຕສນ຺ຕາເປ. ອີຕິຊາເຕຕິ ໂຣຄຸປ຺ປນ຺ເນ. ອຸປທ຺ທວຊາເຕຕິ ອາທີນວຊາເຕ. ອຸປສຄ຺ຄຊາເຕຕິ ອຸປ຺ປນ຺ນທຸກ຺ຂຊາເຕ.

ວິຣຊໍ ວີຕມລນ຺ຕິ ເອຕ຺ຖ ວິຣຊນ຺ຕິ ວິຄຕຣາຄາທິຣຊໍ. ວີຕມລນ຺ຕິ ວີຕຣາຄາທິມລໍ. ຣາຄາທໂຍ ຫິ ອຊ຺ໂຌຕ຺ຖຣຓຏ຺ເຐນ ຣໂຊ ນາມ, ທູສຏ຺ເຐນ ມລໍ ນາມ. ຘມ຺ມຈກ຺ຂຸນ຺ຕິ ກຕ຺ຖຈິ ປຐມມຄ຺ຄຎາຓໍ, ກຕ຺ຖຈິ ອາທີນິ ຕີຓິ ມຄ຺ຄຎາຓານິ, ກຕ຺ຖຈິ ຈຕຸຕ຺ຖມຄ຺ຄຎາຓມ຺ປິ. ອິຘ ປນ ຊຏິລສຫສ຺ສສ຺ສ ຈຕຸຕ຺ຖມຄ຺ຄຎາຓໍ. ປິງ຺ຄິຍສ຺ສ ຕຕິຍມຄ຺ຄຎາຓເມວ. ຍໍ ກິຎ຺ຈິ ສມຸທຍຘມ຺ມໍ, ສພ຺ພໍ ຕໍ ນິໂຣຘຘມ຺ມນ຺ຕິ ວິປສ຺ສນາວເສນ ເອວໍ ປວຕ຺ຕສ຺ສ ຘມ຺ມຈກ຺ຂຸໍ ອຸທປາທີຕິ ອຕ຺ໂຖ. ເສສໍ ສພ຺ພຕ຺ຖ ປາກຏເມວ.

ເອວໍ ອິທມ຺ປິ ສຸຕ຺ຕໍ ຠຄວາ ອຣຫຕ຺ຕນິກູເຏເນວ ເທເສສິ, ເທສນາປຣິໂຍສາເນ ຈ ປິງ຺ຄິໂຍ ອນາຄາມິຜເລ ປຕິຏ຺ຐາສິ. ໂສ ກິຣ ອນ຺ຕຣນ຺ຕຣາ ຈິນ຺ເຕສິ – ‘‘ເອວໍ ວິຈິຕ຺ຣປຏິຠານໍ ນາມ ເທສນໍ ນ ລຠຕິ ມຍ຺ຫໍ ມາຕຸໂລ ພາວຣີ ສວນາຍາ’’ຕິ. ເຕນ ສິເນຫວິກ຺ເຂເປນ ອຣຫຕ຺ຕໍ ປາປຸຓິຕຸໍ ນາສກ຺ຂິ. ອນ຺ເຕວາສິກາ ປນສ຺ສ ສຫສ຺ສຊຏິລາ ອຣຫຕ຺ຕໍ ປາປຸຓິໍສຸ. ສພ຺ເພວ ອິທ຺ຘິມຍປຕ຺ຕຈີວຣຘຣາ ເອຫິຠິກ຺ຂຸໂນ ອເຫສຸນ຺ຕິ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ປິງ຺ຄິຍມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.