ຂີຓນ຺ຕິຄາຖາວຓ຺ຓນາ

໑໕. ເອວໍ ຠຄວາ ປຣິຍຕ຺ຕິຘມ຺ມຎ຺ຈ ນວໂລກຸຕ຺ຕຣຘມ຺ມຎ຺ຈ ນິສ຺ສາຍ ທ຺ວີຫິ ຄາຖາຫິ ພຸທ຺ຘາຘິຏ຺ຐານໍ ສຈ຺ຈໍ ວຕ຺ວາ ອິທານິ ເຍ ຕໍ ປຣິຍຕ຺ຕິຘມ຺ມໍ ອສ຺ໂສສຸໍ, ສຸຕານຸສາເຣນ ຈ ປຏິປຊ຺ຊິຕ຺ວາ ນວປ຺ປກາຣມ຺ປິ ໂລກຸຕ຺ຕຣຘມ຺ມໍ ອຘິຄມິໍສຸ, ເຕສໍ ອນຸປາທິເສສນິພ຺ພານປຕ຺ຕິຄຸຓໍ ນິສ຺ສາຍ ປຸນ ສງ຺ຆາຘິຏ຺ຐານໍ ສຈ຺ຈໍ ວຕ຺ຕຸມາຣທ຺ໂຘ ‘‘ຂີຓໍ ປຸຣາຓ’’ນ຺ຕິ. ຕຕ຺ຖ ຂີຓນ຺ຕິ ສມຸຈ຺ຉິນ຺ນໍ. ປຸຣາຓນ຺ຕິ ປຸຣາຕນໍ. ນວນ຺ຕິ ສມ຺ປຕິ ວຕ຺ຕມານໍ. ນຕ຺ຖິ ສມ຺ຠວນ຺ຕິ ອວິຊ຺ຊມານປາຕຸຠາວໍ. ວິຣຕ຺ຕຈິຕ຺ຕາຕິ ວີຕຣາຄຈິຕ຺ຕາ. ອາຍຕິເກ ຠວສ຺ມິນ຺ຕິ ອນາຄຕມທ຺ຘານໍ ປຸນພ຺ຠເວ. ເຕຕິ ເຍສໍ ຂີຓໍ ປຸຣາຓໍ ນວໍ ນຕ຺ຖິ ສມ຺ຠວໍ, ເຍ ຈ ອາຍຕິເກ ຠວສ຺ມິໍ ວິຣຕ຺ຕຈິຕ຺ຕາ, ເຕ ຂີຓາສວາ ຠິກ຺ຂູ. ຂີຓພີຊາຕິ ອຸຈ຺ຉິນ຺ນພີຊາ. ອວິຣູຬ຺ຫິຉນ຺ທາຕິ ວິຣູຬ຺ຫິຉນ຺ທວິຣຫິຕາ. ນິພ຺ພນ຺ຕີຕິ ວິຊ຺ຌາຍນ຺ຕິ. ຘີຣາຕິ ຘິຕິສມ຺ປນ຺ນາ. ຍຖາຍໍ ປທີໂປຕິ ອຍໍ ປທີໂປ ວິຍ.

ກິໍ ວຸຕ຺ຕໍ ໂຫຕິ? ຍໍ ຕໍ ສຕ຺ຕານໍ ອຸປ຺ປຊ຺ຊິຕ຺ວາ ນິຣຸທ຺ຘມ຺ປິ ປຸຣາຓໍ ອຕີຕກາລິກໍ ກມ຺ມໍ ຕຓ຺ຫາສິເນຫສ຺ສ ອປ຺ປຫີນຕ຺ຕາ ປຏິສນ຺ຘິອາຫຣຓສມຕ຺ຖຕາຍ ອຂີຓໍເຍວ ໂຫຕິ, ຕໍ ປຸຣາຓໍ ກມ຺ມໍ ເຍສໍ ອຣຫຕ຺ຕມຄ຺ເຄນ ຕຓ຺ຫາສິເນຫສ຺ສ ໂສສິຕຕ຺ຕາ ອຄ຺ຄິນາ ທຑ຺ຒພີຊມິວ ອາຍຕິໍ ວິປາກທານາສມຕ຺ຖຕາຍ ຂີຓໍ. ຍຎ຺ຈ ເນສໍ ພຸທ຺ຘປູຊາທິວເສນ ອິທານິ ປວຕ຺ຕມານໍ ກມ຺ມໍ ນວນ຺ຕິ ວຸຈ຺ຈຕິ, ຕຎ຺ຈ ຕຓ຺ຫາປຫາເນເນວ ຉິນ຺ນມູລປາທປປຸປ຺ຜມິວ ອາຍຕິໍ ຜລທານາສມຕ຺ຖຕາຍ ເຍສໍ ນຕ຺ຖິ ສມ຺ຠວໍ, ເຍ ຈ ຕຓ຺ຫາປຫາເນເນວ ອາຍຕິເກ ຠວສ຺ມິໍ ວິຣຕ຺ຕຈິຕ຺ຕາ, ເຕ ຂີຓາສວາ ຠິກ຺ຂູ ‘‘ກມ຺ມໍ ເຂຕ຺ຕໍ ວິຎ຺ຎາຓໍ ພີຊ’’ນ຺ຕິ (ອ. ນິ. ໓.໗໗) ເອຕ຺ຖ ວຸຕ຺ຕສ຺ສ ປຏິສນ຺ຘິວິຎ຺ຎາຓສ຺ສ ກມ຺ມກ຺ຂເຍເນວ ຂີຓຕ຺ຕາ ຂີຓພີຊາ. ໂຍປິ ປຸພ຺ເພ ປຸນພ຺ຠວສງ຺ຂາຕາຍ ວິຣູຬ຺ຫິຍາ ຉນ຺ໂທ ອໂຫສິ. ຕສ຺ສປິ ສມຸທຍປ຺ປຫາເນເນວ ປຫີນຕ຺ຕາ ປຸພ຺ເພ ວິຍ ຈຸຕິກາເລ ອສມ຺ຠເວນ ອວິຣູຬ຺ຫິຉນ຺ທາ ຘິຕິສມ຺ປນ຺ນຕ຺ຕາ ຘີຣາ ຈຣິມວິຎ຺ຎາຓນິໂຣເຘນ ຍຖາຍໍ ປທີໂປ ນິພ຺ພຸໂຕ, ເອວໍ ນິພ຺ພນ຺ຕິ, ປຸນ ‘‘ຣູປິໂນ ວາ ອຣູປິໂນ ວາ’’ຕິ ເອວມາທິໍ ປຎ຺ຎຕ຺ຕິປຖໍ ອຈ຺ເຈນ຺ຕີຕິ. ຕສ຺ມິໍ ກິຣ ສມເຍ ນຄຣເທວຕານໍ ປູຊນຕ຺ຖາຍ ຊາລິເຕສຸ ປທີເປສຸ ເອໂກ ປທີໂປ ວິຊ຺ຌາຍິ, ຕໍ ທສ຺ເສນ຺ໂຕ ອາຫ ‘‘ຍຖາຍໍ ປທີໂປ’’ຕິ.

ເອວໍ ຠຄວາ ເຍ ຕໍ ປຸຣິມາຫິ ທ຺ວີຫິ ຄາຖາຫິ ວຸຕ຺ຕໍ ປຣິຍຕ຺ຕິຘມ຺ມໍ ອສ຺ໂສສຸໍ, ສຸຕານຸສາເຣນ ຈ ປຏິປຊ຺ຊິຕ຺ວາ ນວປ຺ປກາຣມ຺ປິ ໂລກຸຕ຺ຕຣຘມ຺ມໍ ອຘິຄມິໍສຸ, ເຕສໍ ອນຸປາທິເສສນິພ຺ພານປຕ຺ຕິຄຸຓໍ ວຕ຺ວາ ອິທານິ ຕເມວ ຄຸຓໍ ນິສ຺ສາຍ ສງ຺ຆາຘິຏ຺ຐານໍ ສຈ຺ຈວຈນໍ ປຍຸຎ຺ຊນ຺ໂຕ ເທສນໍ ສມາເປສິ ‘‘ອິທມ຺ປິ ສງ຺ເຆ’’ຕິ. ຕສ຺ສຕ຺ໂຖ ປຸພ຺ເພ ວຸຕ຺ຕນເຍເນວ ເວທິຕພ຺ໂພ. ເກວລໍ ປນ ອິທມ຺ປິ ຍຖາວຸຕ຺ເຕນ ປກາເຣນ ຂີຓາສວຠິກ຺ຂູນໍ ນິພ຺ພານສງ຺ຂາຕໍ ສງ຺ເຆ ຣຕນໍ ປຓີຕນ຺ຕິ ເອວໍ ໂຍເຊຕພ຺ພໍ. ອິມິສ຺ສາປິ ຄາຖາຍ ອາຓາ ໂກຏິສຕສຫສ຺ສຈກ຺ກວາເຬສຸ ອມນຸສ຺ເສຫິ ປຏິຄ຺ຄຫິຕາຕິ.

ເທສນາປຣິໂຍສາເນ ຣາຊກຸລສ຺ສ ໂສຕ຺ຖິ ອໂຫສິ, ສພ຺ພູປທ຺ທວາ ວູປສມິໍສຸ, ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ອໂຫສິ.