໕. ປຐມສີລສຸຕ຺ຕວຓ຺ຓນາ

໓໒. ປຎ຺ຈເມ ປາປເກນ ຈ ສີເລນາຕິ ປາປກໍ ນາມ ສີລໍ ສີລເຠທກໂຣ ອສໍວໂຣຕິ ວທນ຺ຕິ. ຕຕ຺ຖ ຍທິ ອສໍວໂຣ ອສີລເມວ ຕໍທຸສ຺ສີລ຺ຍຠາວໂຕ, ກຖໍ ສີລນ຺ຕິ ວຸຈ຺ຈຕິ? ຕຕ຺ຖາຍໍ ອຘິປ຺ປາໂຍ ສິຍາ – ຍຖາ ນາມ ໂລເກ ອທິຏ຺ຐໍ ‘‘ທິຏ຺ຐ’’ນ຺ຕິ ວຸຈ຺ຈຕິ, ອສີລວາ ‘‘ສີລວາ’’ຕິ, ເອວມິຘາປິ ອສີລມ຺ປິ ອສໍວໂຣປິ ‘‘ສີລ’’ນ຺ຕິ ໂວຫຣີຍຕິ. ອຖ ວາ ‘‘ກຕເມ ຈ, ຖປຕິ, ອກຸສລາ ສີລາ? ອກຸສລໍ ກາຍກມ຺ມໍ, ອກຸສລໍ ວຈີກມ຺ມໍ, ປາປໂກ ອາຊີໂວ’’ຕິ (ມ. ນິ. ໒.໒໖໔) ວຈນໂຕ ອກຸສລຘມ຺ເມສຸປິ ອຕ຺ເຖວ ສີລສມຎ຺ຎາ, ຕສ຺ມາ ປຣິຈຍວເສນ ສຠາວສິທ຺ຘິ ວິຍ ປກຕິຠູໂຕ ສພ຺ໂພ ສມາຈາໂຣ ‘‘ສີລ’’ນ຺ຕິ ວຸຈ຺ຈຕິ. ຕຕ຺ຖ ຍໍ ອໂກສລ຺ລສມ຺ຠູຕຏ຺ເຐນ ອກຸສລໍ ລາມກໍ, ຕໍ ສນ຺ຘາຍາຫ ‘‘ປາປເກນ ຈ ສີເລນາ’’ຕິ. ປາປິກາຍ ຈ ທິຏ຺ຐິຍາຕິ ສພ຺ພາປິ ມິຈ຺ຉາທິຏ຺ຐິໂຍ ປາປິກາວ. ວິເສສໂຕ ປນ ອເຫຕຸກທິຏ຺ຐິ, ອກິຣິຍທິຏ຺ຐິ, ນຕ຺ຖິກທິຏ຺ຐີຕິ ອິມາ ຕິວິຘາ ທິຏ຺ຐິໂຍ ປາປິກຕຣາ. ຕຕ຺ຖ ປາປເກນ ສີເລນ ສມນ຺ນາຄໂຕ ປຸຄ຺ຄໂລ ປໂຍຄວິປນ຺ໂນ ໂຫຕິ, ປາປິກາຍ ທິຏ຺ຐິຍາ ສມນ຺ນາຄໂຕ ອາສຍວິປນ຺ໂນ ໂຫຕິ, ເອວໍ ປໂຍຄາສຍວິປນ຺ໂນ ປຸຄ຺ຄໂລ ນິຣຍູປໂຄ ໂຫຕິເຍວ. ເຕນ ວຸຕ຺ຕໍ ‘‘ອິເມຫິ ໂຂ, ຠິກ຺ຂເວ, ທ຺ວີຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ຍຖາຠຕໍ ນິກ຺ຂິຕ຺ໂຕ, ເອວໍ ນິຣເຍ’’ຕິ. ເອຕ຺ຖ ຈ ‘‘ທ຺ວີຫິ ຘມ຺ເມຫິ ສມນ຺ນາຄໂຕ’’ຕິ ອິທໍ ລກ຺ຂຓວຈນໍ ທຏ຺ຐພ຺ພໍ, ນ ຕນ຺ຕິນິທ຺ເທໂສ. ຍຖາ ຕໍ ໂລເກ ‘‘ຍທິເມ ພ຺ຍາຘິຕາ ສິຍຸໍ, ອິເມສໍ ອິທໍ ເຠສຊ຺ຊໍ ທາຕພ຺ພ’’ນ຺ຕິ. ອຎ຺ເຎສຸປິ ອີທິເສສຸ ຐາເນສຸ ເອເສວ ນໂຍ. ທຸປ຺ປຎ຺ໂຎຕິ ນິປ຺ປຎ຺ໂຎ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.