໓. ຕປນີຍສຸຕ຺ຕວຓ຺ຓນາ

໓໐. ຕຕິເຍ ຕປນີຍາຕິ ອິຘ ເຈວ ສມ຺ປຣາເຍ ຈ ຕປນ຺ຕິ ວິພາເຘນ຺ຕິ ວິເຫເຐນ຺ຕີຕິ ຕປນີຍາ. ຕປນໍ ວາ ທຸກ຺ຂໍ ທິຏ຺ເຐ ເຈວ ຘມ຺ເມ ອຠິສມ຺ປຣາເຍ ຈ ຕສ຺ສ ອຸປ຺ປາທເນນ ເຈວ ອນຸພລປ຺ປທາເນນ ຈ ຫິຕາຕິ ຕປນີຍາ. ອຖ ວາ ຕປນ຺ຕິ ເຕນາຕິ ຕປນໍ, ປຈ຺ຉານຸຕາໂປ, ວິປ຺ປຏິສາໂຣຕິ ອຕ຺ໂຖ, ຕສ຺ສ ເຫຕຸຠາວໂຕ ຫິຕາຕິ ຕປນີຍາ. ອກຕກລ຺ຍາໂຓຕິ ອກຕໍ ກລ຺ຍາຓໍ ຠທ຺ທກໍ ປຸຎ຺ຎໍ ເອເຕນາຕິ ອກຕກລ຺ຍາໂຓ. ເສສປທທ຺ວຍໍ ຕສ຺ເສວ ເວວຈນໍ. ປຸຎ຺ຎຎ຺ຫິ ປວຕ຺ຕິຫິຕຕາຍ ອາຍຕິໍສຸຂຕາຍ ຈ ຠທ຺ທກຏ຺ເຐນ ກລ຺ຍາຓນ຺ຕິ ຈ ກຸຈ຺ຉິຕສລນາທິອຕ຺ເຖນ ກຸສລນ຺ຕິ ຈ ທຸກ຺ຂຠີຣູນໍ ສໍສາຣຠີຣູນຎ຺ຈ ຣກ຺ຂນຏ຺ເຐນ ຠີຣຸຕ຺ຕາຓນ຺ຕິ ຈ ວຸຈ຺ຈຕິ. ກຕປາໂປຕິ ກຕໍ ອຸປຈິຕໍ ປາປໍ ເອເຕນາຕິ ກຕປາໂປ. ເສສປທທ຺ວຍໍ ຕສ຺ເສວ ເວວຈນໍ. ອກຸສລກມ຺ມຎ຺ຫິ ລາມກຏ຺ເຐນ ປາປນ຺ຕິ ຈ ອຕ຺ຕໂນ ປວຕ຺ຕິກ຺ຂເຓ ວິປາກກ຺ຂເຓ ຈ ໂຆຣສຠາວຕາຍ ລຸທ຺ທນ຺ຕິ ຈ ກິເລເສຫິ ທູສິຕຠາເວນ ກິພ຺ພິສນ຺ຕິ ຈ ວຸຈ຺ຈຕິ. ອິຕິ ຠຄວາ ‘‘ທ຺ເວ ຘມ຺ມາ ຕປນີຍາ’’ຕິ ຘມ຺ມາຘິຏ຺ຐາເນນ ອຸທ຺ທິສິຕ຺ວາ ອກຕໍ ກຸສລໍ ຘມ຺ມໍ ກຕຎ຺ຈ ອກຸສລໍ ຘມ຺ມໍ ປຸຄ຺ຄລາຘິຏ຺ຐາເນນ ນິທ຺ທິສິ. ອິທານິ ເຕສໍ ຕປນີຍຠາວໍ ທສ຺ເສນ຺ໂຕ ‘‘ໂສ ອກຕໍ ເມ ກລ຺ຍາຓນ຺ຕິປິ ຕປ຺ປຕິ, ກຕໍ ເມ ປາປນ຺ຕິປິ ຕປ຺ປຕີ’’ຕິ ອາຫ. ຈິຕ຺ຕສນ຺ຕາເສນ ຕປ຺ປຕິ ອນຸຕປ຺ປຕິ ອນຸໂສຈຕີຕິ ອຕ຺ໂຖ.

ຄາຖາສຸ ທຸຏ຺ຐຸ ຈຣິຕໍ, ກິເລສປູຕິກຕ຺ຕາ ວາ ທຸຏ຺ຐໍ ຈຣິຕນ຺ຕິ ທຸຈ຺ຈຣິຕໍ. ກາເຍນ ທຸຈ຺ຈຣິຕໍ, ກາຍໂຕ ວາ ປວຕ຺ຕໍ ທຸຈ຺ຈຣິຕໍ ກາຍທຸຈ຺ຈຣິຕໍ. ເອວໍ ວຈີມໂນທຸຈ຺ຈຣິຕານິປິ ທຏ຺ຐພ຺ພານິ. ອິມານິ ຈ ກາຍທຸຈ຺ຈຣິຕາທີນິ ກມ຺ມປຖປ຺ປຕ຺ຕານິ ອຘິປ຺ເປຕານີຕິ ຍໍ ນ ກມ຺ມປຖປ຺ປຕ຺ຕໍ ອກຸສລຊາຕໍ, ຕໍ ສນ຺ຘາຍາຫ ‘‘ຍຎ຺ຈຎ຺ຎໍ ໂທສສຎ຺ຫິຕ’’ນ຺ຕິ. ຕສ຺ສຕ຺ໂຖ – ຍມ຺ປິ ຈ ອຎ຺ຎໍ ກມ຺ມປຖຠາວໍ ອປ຺ປຕ຺ຕຕ຺ຕາ ນິປ຺ປຣິຍາເຍນ ກາຍກມ຺ມາທິສງ຺ຂໍ ນ ລຠຕິ, ຣາຄາທິກິເລສສໍສຏ຺ຐຕ຺ຕາ ໂທສສຫິຕໍ ອກຸສລໍ ຕມ຺ປິ ກຕ຺ວາຕິ ອຕ຺ໂຖ. ນິຣຍນ຺ຕິ ນິຣຕິອຕ຺ເຖນ ນິຣສ຺ສາທຏ຺ເຐນ ວາ ນິຣຍນ຺ຕິ ລທ຺ຘນາມໍ ສພ຺ພມ຺ປິ ທຸຄ຺ຄຕິໍ, ອຍສງ຺ຂາຕສຸຂປ຺ປຏິກ຺ເຂເປນ ວາ ສພ຺ພຕ຺ຖ ສຸຄຕິທຸຄ຺ຄຕີສຸ ນິຣຍທຸກ຺ຂໍ. ໂສ ຕາທິໂສ ປຸຄ຺ຄໂລ ອຸປຄຈ຺ຉຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ.

ເອຕ຺ຖ ຈ ກາຍທຸຈ຺ຈຣິຕສ຺ສ ຕປນີຍຠາເວ ນນ຺ໂທ ຍກ຺ໂຂ ນນ຺ໂທ ມາຓວໂກ ນນ຺ໂທ ໂຄຆາຕໂກ ທ຺ເວ ຠາຕິກາຕິ ເອເຕສໍ ວຕ຺ຖູນິ ກເຖຕພ຺ພານິ. ເຕ ກິຣ ຄາວິໍ ວຘິຕ຺ວາ ມໍສໍ ທ຺ເວ ໂກຏ຺ຐາເສ ອກໍສຸ. ຕໂຕ ກນິຏ຺ໂຐ ເຊຏ຺ຐໍ ອາຫ – ‘‘ມຍ຺ຫໍ ທາຣກາ ພຫູ, ອິມານິ ເມ ອນ຺ຕານິ ເທຫີ’’ຕິ. ອຖ ນໍ ເຊຏ຺ໂຐ – ‘‘ສພ຺ພໍ ມໍສໍ ທ຺ເວຘາ ວິຠຕ຺ຕໍ, ປຸນ ກິມຄ຺ຄເຫສີ’’ຕິ ປຫຣິຕ຺ວາ ຊີວິຕກ຺ຂຍໍ ປາເປສິ. ນິວຕ຺ຕິຕ຺ວາ ຈ ນໍ ໂອໂລເກນ຺ໂຕ ມຕໍ ທິສ຺ວາ ‘‘ຠາຣິຍໍ ວຕ ມຍາ ກຕໍ, ສ຺ວາຫໍ ອກາຣເຓເນວ ນໍ ມາເຣສິ’’ນ຺ຕິ ຈິຕ຺ຕໍ ອຸປ຺ປາເທສິ. ອຖສ຺ສ ພລວວິປ຺ປຏິສາໂຣ ອຸປ຺ປຊ຺ຊິ. ໂສ ຐິຕຏ຺ຐາເນປິ ນິສິນ຺ນຏ຺ຐາເນປິ ຕເທວ ກມ຺ມໍ ອາວຊ຺ເຊຕິ, ຈິຕ຺ຕສ຺ສາທໍ ນ ລຠຕິ, ອສິຕປີຕຂາຍິຕມ຺ປິສ຺ສ ສຣີເຣ ໂອຊໍ ນ ຜຣຕິ, ອຏ຺ຐິຈມ຺ມມຕ຺ຕເມວ ອໂຫສິ. ອຖ ນໍ ເອໂກ ເຖໂຣ ປຸຈ຺ຉິ ‘‘ອຸປາສກ, ຕ຺ວໍ ອຕິວິຍ ກິໂສ ອຏ຺ຐິຈມ຺ມມຕ຺ໂຕ ຊາໂຕ, ກີທິໂສ ເຕ ໂຣໂຄ, ອຸທາຫຸ ອຕ຺ຖິ ກິຎ຺ຈິ ຕປນີຍໍ ກມ຺ມໍ ກຕ’’ນ຺ຕິ? ໂສ ‘‘ອາມ, ຠນ຺ເຕ’’ຕິ ສພ຺ພໍ ອາໂຣເຈສິ. ອຖສ຺ສ ໂສ ‘‘ຠາຣິຍໍ ເຕ, ອຸປາສກ, ກມ຺ມໍ ກຕໍ, ອນປຣາຘຏ຺ຐາເນ ອປຣທ຺ຘ’’ນ຺ຕິ ອາຫ. ໂສ ເຕເນວ ກມ຺ມຸນາ ກາລໍ ກຕ຺ວາ ນິຣເຍ ນິພ຺ພຕ຺ຕິ. ວຈີທຸຈ຺ຈຣິຕສ຺ສ ປນ ສຸປ຺ປພຸທ຺ຘສກ຺ກໂກກາລິກຈິຎ຺ຈມາຓວິກາທີນໍ ວຕ຺ຖູນິ ກເຖຕພ຺ພານິ, ມໂນທຸຈ຺ຈຣິຕສ຺ສ ອຸກ຺ກລຊຍຠຎ຺ຎາທີນໍ.

ຕຕິຍສຸຕ຺ຕວຓ຺ຓນາ ນິຏ຺ຐິຕາ.