໘. ມານປຣິຎ຺ຎາສຸຕ຺ຕວຓ຺ຓນາ

໘. ອຏ຺ຐເມ ອປຸພ຺ພໍ ນຕ຺ຖິ, ເກວລໍ ມານວເສນ ເທສນາ ປວຕ຺ຕາ. ຄາຖາສຸ ປນ ມານຸເປຕາ ອຍໍ ປຊາຕິ ກມ຺ມກິເລເສຫິ ປຊາຍຕີຕິ ປຊາຕິ ລທ຺ຘນາມາ ອິເມ ສຕ຺ຕາ ມຎ຺ຎນລກ຺ຂເຓນ ມາເນນ ອຸເປຕາ ອຸປຄຕາ. ມານຄນ຺ຖາ ຠເວ ຣຕາຕິ ກິມິກີຏປຏງ຺ຄາທິອຕ຺ຕຠາເວປິ ມາເນນ ຄນ຺ຖິຕາ ມານສໍໂຍຊເນນ ສໍຍຸຕ຺ຕາ. ຕໂຕ ເອວ ທີຆຣຕ຺ຕໍ ປຣິຠາວິຕາຫໍກາຣວເສນ ‘‘ເອຕໍ ມມາ’’ຕິ ສງ຺ຂາເຣສຸ ອຊ຺ໂຌສານພຫຸລຕ຺ຕາ ຕຕ຺ຖ ນິຈ຺ຈສຸຂອຕ຺ຕາທິວິປລ຺ລາສວເສນ ຈ ກາມາທິຠເວ ຣຕາ. ມານໍ ອປຣິຊານນ຺ຕາຕິ ມານໍ ຕີຫິ ປຣິຎ຺ຎາຫິ ນ ປຣິຊານນ຺ຕາ. ອຣຫຕ຺ຕມຄ຺ຄຎາເຓນ ວາ ອນຕິກ຺ກມນ຺ຕາ, ‘‘ມານໍ ອປຣິຎ຺ຎາຍາ’’ຕິ ເກຈິ ປຐນ຺ຕິ. ອາຄນ຺ຕາໂຣ ປຸນພ຺ຠວນ຺ຕິ ປຸນ ອາຍາຕິໍ ອຸປປຕ຺ຕິຠວໍ. ປຸນປ຺ປຸນໍ ຠວນໂຕ ວາ ປຸນພ຺ຠວສງ຺ຂາຕໍ ສໍສາຣໍ ອປຣາປຣໍ ປຣິວຕ຺ຕນວເສນ ຄນ຺ຕາໂຣ ອຸປຄນ຺ຕາໂຣ ໂຫນ຺ຕິ, ຠວໂຕ ນ ປຣິມຸຈ຺ຈນ຺ຕີຕິ ອຕ຺ໂຖ. ເຍ ຈ ມານໍ ປຫນ຺ຕ຺ວານ, ວິມຸຕ຺ຕາ ມານສງ຺ຂເຍຕິ ເຍ ປນ ອຣຫຕ຺ຕມຄ຺ເຄນ ສພ຺ພໂສ ມານໍ ປຊຫິຕ຺ວາ ມານສ຺ສ ອຈ຺ຈນ຺ຕສງ຺ຂຍຠູເຕ ອຣຫຕ຺ຕຜເລ ນິພ຺ພາເນ ວາ ຕເທກຏ຺ຐສພ຺ພກິເລສວິມຸຕ຺ຕິຍາ ວິມຸຕ຺ຕາ ສຸຏ຺ຐຸ ມຸຕ຺ຕາ. ເຕ ມານຄນ຺ຖາຠິຠຸໂນ, ສພ຺ພທຸກ຺ຂມຸປຈ຺ຈຄຸນ຺ຕິ ເຕ ປຣິກ຺ຂີຓຠວສໍໂຍຊນາ ອຣຫນ຺ໂຕ ສພ຺ພໂສ ມານຄນ຺ຖໍ ມານສໍໂຍຊນໍ ສມຸຈ຺ເຉທປ຺ປຫາເນນ ອຠິຠວິຕ຺ວາ ຐິຕາ, ອນວເສສໍ ວຏ຺ຏທຸກ຺ຂໍ ອຕິກ຺ກມິໍສູຕິ ອຕ຺ໂຖ. ເອວເມຕສ຺ມິໍ ສຕ຺ຕມສຸຕ຺ເຕ ຈ ອຣຫຕ຺ຕໍ ກຖິຕນ຺ຕິ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.