໕. ມກ຺ຂສຸຕ຺ຕວຓ຺ຓນາ

໕. ປຎ຺ຈເມ ມກ຺ຂນ຺ຕິ ປຣຄຸຓມກ຺ຂນໍ. ຍທິປິ ຫິ ໂສ ຄູຖໍ ຄເຫຕ຺ວາ ປຣໍ ປຫຣນ຺ໂຕ ວິຍ ອຕ຺ຕໂນ ກຣໍ ປຐມຕຣໍ ມກ຺ຂຕິເຍວ, ຕຖາປິ ປເຣສໍ ຄຸຓມກ຺ຂນາຘິປ຺ປາເຍນ ປວຕ຺ເຕຕພ຺ພຕ຺ຕາ ‘‘ປຣຄຸຓມກ຺ຂໂນ’’ຕິ ວຸຈ຺ຈຕິ. ຕຖາ ຫິ ໂສ ອຸທກປຸຎ຺ຉນມິວ ນ຺ຫາຕສ຺ສ ສຣີຣຄຕໍ ອຸທກໍ ປເຣສໍ ຄຸເຓ ມກ຺ເຂຕິ ປຸຎ຺ຉຕິ ວິນາເສຕິ, ປເຣຫິ ວາ ກຕານໍ ມຫນ຺ຕານມ຺ປິ ກາຣານໍ ເຂປນໂຕ ຘໍສນໂຕ ມກ຺ໂຂຕິ ວຸຈ຺ຈຕິ. ໂສ ປຣຄຸຓມກ຺ຂນລກ຺ຂໂຓ, ເຕສໍ ວິນາສນຣໂສ, ຕທວຈ຺ຉາທນປຈ຺ຈຸປຏ຺ຐາໂນ. ອຕ຺ຖໂຕ ປນ ປເຣສໍ ຄຸຓມກ຺ຂນາກາເຣນ ປວຕ຺ໂຕ ໂທມນສ຺ສສຫຄຕຈິຕ຺ຕຸປ຺ປາໂທຕິ ທຏ຺ຐພ຺ພໍ. ປຊຫຖາຕິ ຕຕ຺ຖ ວຸຕ຺ຕປ຺ປເຠທໍ ໂທສໍ, ໂທເສ ຈ ວຸຕ຺ຕນຍໍ ອາທີນວໍ, ປຫາເນ ຈສ຺ສ ອານິສໍສໍ ປຈ຺ຈເວກ຺ຂິຕ຺ວາ ປຸພ຺ພຠາເຄ ຕທງ຺ຄາທິວເສນ ປຊຫນ຺ຕາ ວິປສ຺ສນໍ ອຸສ຺ສຸກ຺ກາເປຕ຺ວາ ຕຕິຍມຄ຺ເຄນ ອນວເສສໍ ສມຸຈ຺ຉິນ຺ທຖາຕິ ອຕ຺ໂຖ. ມກ຺ຂາເສຕິ ມກ຺ຂິຕາ ມກ຺ຂິຕປຣຄຸຓາ, ປເຣສໍ ຄຸຓານໍ ມກ຺ຂິຕາໂຣ, ຕໂຕ ເອວ ອຕ຺ຕໂນປິ ຘໍສິຕຄຸຓາຕິ ອຕ຺ໂຖ. ເສສໍ ວຸຕ຺ຕນຍເມວ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.