໕. ອສຎ຺ຎຕປຣິກ຺ຂາຣຠິກ຺ຂຸວຕ຺ຖຸ

ມາວມຎ຺ເຎຖ ປາປສ຺ສາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກໍ ອສຎ຺ຎຕປຣິກ຺ຂາຣໍ ຠິກ຺ຂຸໍ ອາຣພ຺ຠ ກເຖສິ.

ໂສ ກິຣ ຍໍ ກິຎ຺ຈິ ມຎ຺ຈປີຐາທິເຠທໍ ປຣິກ຺ຂາຣໍ ພຫິ ປຣິຠຸຎ຺ຊິຕ຺ວາ ຕຕ຺ເຖວ ຉຑ຺ເຑຕິ. ປຣິກ຺ຂາໂຣ ວສ຺ເສນປິ ອາຕເປນປິ ອຸປຈິກາທີຫິປິ ວິນສ຺ສຕິ. ໂສ ຠິກ຺ຂູຫິ ‘‘ນນຸ, ອາວຸໂສ, ປຣິກ຺ຂາໂຣ ນາມ ປຏິສາມິຕພ຺ໂພ’’ຕິ ວຸຕ຺ເຕ ‘‘ອປ຺ປກໍ ມຍາ ກຕໍ, ອາວຸໂສ, ເອຕໍ, ນ ເອຕສ຺ສ ຈິຕ຺ຕໍ ອຕ຺ຖິ, ນ ປິຕ຺ຕ’’ນ຺ຕິ ວຕ຺ວາ ຕເຖວ ກໂຣຕິ. ຠິກ຺ຂູ ຕສ຺ສ ກິຣິຍໍ ສຕ຺ຖຸ ອາໂຣເຈສຸໍ. ສຕ຺ຖາ ຕໍ ປກ຺ໂກສາເປຕ຺ວາ ‘‘ສຈ຺ຈໍ ກິຣ ຕ຺ວໍ ຠິກ຺ຂຸ ເອວໍ ກໂຣສີ’’ຕິ ປຸຈ຺ຉິ. ໂສ ສຕ຺ຖາຣາ ປຸຈ຺ຉິໂຕປິ ‘‘ກິໍ ເອຕໍ ຠຄວາ ອປ຺ປກໍ ມຍາ ກຕໍ, ນ ຕສ຺ສ ຈິຕ຺ຕໍ ອຕ຺ຖິ, ນາສ຺ສ ປິຕ຺ຕ’’ນ຺ຕິ ຕເຖວ ອວມຎ຺ຎນ຺ໂຕ ອາຫ. ອຖ ນໍ ສຕ຺ຖາ ‘‘ຠິກ຺ຂູຫິ ເອວໍ ກາຕຸໍ ນ ວຏ຺ຏຕິ, ປາປກມ຺ມໍ ນາມ ‘ອປ຺ປກ’ນ຺ຕິ ນ ອວມຎ຺ຎິຕພ຺ພໍ. ອຊ຺ໂຌກາເສ ຐປິຕຎ຺ຫິ ວິວຏມຸຂໍ ຠາຊນໍ ເທເວ ວສ຺ສນ຺ເຕ ກິຎ຺ຈາປິ ເອກພິນ຺ທຸນາ ນ ປູຣຕິ, ປຸນປ຺ປຸນໍ ວສ຺ສນ຺ເຕ ປນ ປູຣເຕວ, ເອວເມວໍ ປາປໍ ກໂຣນ຺ໂຕ ປຸຄ຺ຄໂລ ອນຸປຸພ຺ເພນ ມຫນ຺ຕໍ ປາປຣາສິໍ ກໂຣຕີ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໑. ‘‘ມາວມຎ຺ເຎຖ ປາປສ຺ສ, ນ ມນ຺ທໍ ອາຄມິສ຺ສຕິ;

ອຸທພິນ຺ທຸນິປາເຕນ, ອຸທກຸມ຺ໂຠປິ ປູຣຕິ;

ພາໂລ ປູຣຕິ ປາປສ຺ສ, ໂຖກໍ ໂຖກມ຺ປິ ອາຈິນ’’ນ຺ຕິ.

ຕຕ຺ຖ ມາວມຎ຺ເຎຖາຕິ ນ ອວຊາເນຍ຺ຍ. ປາປສ຺ສາຕິ ປາປໍ. ນ ມນ຺ທໍ ອາຄມິສ຺ສຕີຕິ ‘‘ອປ຺ປມຕ຺ຕກໍ ເມ ປາປກໍ ກຕໍ, ກທາ ເອຕໍ ວິປຈ຺ຈິສ຺ສຕີ’’ຕິ ເອວໍ ປາປໍ ນາວຊາເນຍ຺ຍາຕິ ອຕ຺ໂຖ. ອຸທກຸມ຺ໂຠປີຕິ ເທເວ ວສ຺ສນ຺ເຕ ມຸຂໍ ວິວຣິຕ຺ວາ ຐປິຕໍ ຍໍ ກິຎ຺ຈິ ກຸລາລຠາຊນໍ ຍຖາ ຕໍ ເອເກກສ຺ສາປິ ອຸທກພິນ຺ທຸໂນ ນິປາເຕນ ອນຸປຸພ຺ເພນ ປູຣຕິ, ເອວໍ ພາລປຸຄ຺ຄໂລ ໂຖກໍ ໂຖກມ຺ປິ ປາປໍ ອາຈິນນ຺ໂຕ ກໂຣນ຺ໂຕ ວຑ຺ເຒນ຺ໂຕ ປາປສ຺ສ ປູຣຕິເຍວາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສຸ. ສຕ຺ຖາປິ ‘‘ອຊ຺ໂຌກາເສ ເສຍ຺ຍໍ ສນ຺ຖຣິຕ຺ວາ ປຏິປາກຕິກໍ ອກໂຣນ຺ໂຕ ອິມໍ ນາມ ອາປຕ຺ຕິມາປຊ຺ຊຕີ’’ຕິ (ປາຈິ. ໑໐໘-໑໑໐) ສິກ຺ຂາປທໍ ປຎ຺ຎາເປສີຕິ.

ອສຎ຺ຎຕປຣິກ຺ຂາຣຠິກ຺ຂຸວຕ຺ຖຸ ປຎ຺ຈມໍ.