໓໗. ວງ຺ຄີສຕ຺ເຖຣວຕ຺ຖຸ

ຈຸຕິໍ ໂຍ ເວທີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ວງ຺ຄີສຕ຺ເຖຣໍ ອາຣພ຺ຠ ກເຖສິ.

ຣາຊຄເຫ ກິເຣໂກ ພ຺ຣາຫ຺ມໂຓ ວງ຺ຄີໂສ ນາມ ມຕມນຸສ຺ສານໍ ສີສໍ ອາໂກເຏຕ຺ວາ ‘‘ອິທໍ ນິຣເຍ ນິພ຺ພຕ຺ຕສ຺ສ ສີສໍ, ອິທໍ ຕິຣຈ຺ຉານໂຍນິຍໍ, ອິທໍ ເປຕ຺ຕິວິສເຍ, ອິທໍ ມນຸສ຺ສໂລເກ, ອິທໍ ເທວໂລເກ ນິພ຺ພຕ຺ຕສ຺ສ ສີສ’’ນ຺ຕິ ຊານາຕິ. ພ຺ຣາຫ຺ມຓາ ‘‘ສກ຺ກາ ອິມໍ ນິສ຺ສາຍ ໂລກໍ ຂາທິຕຸ’’ນ຺ຕິ ຈິນ຺ເຕຕ຺ວາ ຕໍ ທ຺ເວ ຣຕ຺ຕວຕ຺ຖານິ ປຣິທຫາເປຕ຺ວາ ອາທາຍ ຊນປທໍ ຈຣນ຺ຕາ ມນຸສ຺ເສ ວທນ຺ຕິ ‘‘ເອໂສ ວງ຺ຄີໂສ ນາມ ພ຺ຣາຫ຺ມໂຓ ມຕມນຸສ຺ສານໍ ສີສໍ ອາໂກເຏຕ຺ວາ ນິພ຺ພຕ຺ຕຏ຺ຐານໍ ຊານາຕິ, ອຕ຺ຕໂນ ຎາຕການໍ ນິພ຺ພຕ຺ຕຏ຺ຐານໍ ປຸຈ຺ຉຖາ’’ຕິ. ມນຸສ຺ສາ ຍຖາພລໍ ທສປິ ກຫາປເຓ ວີສຕິປິ ສຕມ຺ປິ ທຕ຺ວາ ຎາຕການໍ ນິພ຺ພຕ຺ຕຏ຺ຐານໍ ປຸຈ຺ຉນ຺ຕິ. ເຕ ອນຸປຸພ຺ເພນ ສາວຕ຺ຖິໍ ປຕ຺ວາ ເຊຕວນສ຺ສ ອວິທູເຣ ນິວາສໍ ຄຓ຺ຫິໍສຸ. ເຕ ຠຸຕ຺ຕປາຕຣາສາ ມຫາຊນໍ ຄນ຺ຘມາລາທິຫຕ຺ຖໍ ຘມ຺ມສ຺ສວນາຍ ຄຈ຺ຉນ຺ຕໍ ທິສ຺ວາ ‘‘ກຫໍ ຄຈ຺ຉຖາ’’ຕິ ປຸຈ຺ຉິຕ຺ວາ ‘‘ວິຫາຣໍ ຘມ຺ມສ຺ສວນາຍາ’’ຕິ ວຸຕ຺ເຕ ‘‘ຕຕ຺ຖ ຄນ຺ຕ຺ວາ ກິໍ ກຣິສ຺ສຖ, ອມ຺ຫາກໍ ວງ຺ຄີສພ຺ຣາຫ຺ມເຓນ ສທິໂສ ນາມ ນຕ຺ຖິ, ມຕມນຸສ຺ສານໍ ສີສໍ ອາໂກເຏຕ຺ວາ ນິພ຺ພຕ຺ຕຏ຺ຐານໍ ຊານາຕິ, ຎາຕການໍ ນິພ຺ພຕ຺ຕຏ຺ຐານໍ ປຸຈ຺ຉຖາ’’ຕິ ອາຫໍສຸ. ເຕ ‘‘ວງ຺ຄີໂສ ກິໍ ຊານາຕິ, ອມ຺ຫາກໍ ສຕ຺ຖາຣາ ສທິໂສ ນາມ ນຕ຺ຖີ’’ຕິ ວຕ຺ວາ ອິຕເຣຫິປິ ‘‘ວງ຺ຄີສສທິໂສ ນຕ຺ຖີ’’ຕິ ວຸຕ຺ເຕ ກຖໍ ວຑ຺ເຒຕ຺ວາ ‘‘ເອຖ, ທານິ ໂວ ວງ຺ຄີສສ຺ສ ວາ ອມ຺ຫາກໍ ວາ ສຕ຺ຖຸ ຊານນຠາວໍ ຊານິສ຺ສາມາ’’ຕິ ເຕ ອາທາຍ ວິຫາຣໍ ອຄມໍສຸ. ສຕ຺ຖາ ເຕສໍ ອາຄມນຠາວໍ ຎຕ຺ວາ ນິຣເຍ ຕິຣຈ຺ຉານໂຍນິຍໍ ມນຸສ຺ສໂລເກ ເທວໂລເກຕິ ຈຕູສຸ ຐາເນສຸ ນິພ຺ພຕ຺ຕານໍ ຈຕ຺ຕາຣິ ສີສານິ, ຂີຓາສວສີສຎ຺ຈາຕິ ປຎ຺ຈ ສີສານິ ອາຫຣາເປຕ຺ວາ ປຏິປາຏິຍາ ຐເປຕ຺ວາ ອາຄຕກາເລ ວງ຺ຄີສໍ ປຸຈ຺ຉິ – ‘‘ຕ຺ວໍ ກິຣ ສີສໍ ອາໂກເຏຕ຺ວາ ມຕການໍ ນິພ຺ພຕ຺ຕຏ຺ຐານໍ ຊານາສີ’’ຕິ? ‘‘ອາມ, ຊານາມີ’’ຕິ. ‘‘ອິທໍ ກສ຺ສ ສີສ’’ນ຺ຕິ? ໂສ ຕໍ ອາໂກເຏຕ຺ວາ ‘‘ນິຣເຍ ນິພ຺ພຕ຺ຕສ຺ສາ’’ຕິ ອາຫ. ອຖສ຺ສ ສຕ຺ຖາ ‘‘ສາຘຸ ສາຘູ’’ຕິ ສາຘຸກາຣໍ ທຕ຺ວາ ອິຕຣານິປິ ຕີຓິ ສີສານິ ປຸຈ຺ຉິຕ຺ວາ ເຕນ ອວິຣຊ຺ຌິຕ຺ວາ ວຸຕ຺ຕວຸຕ຺ຕກ຺ຂເຓ ຕເຖວ ຕສ຺ສ ສາຘຸກາຣໍ ທຕ຺ວາ ປຎ຺ຈມໍ ສີສໍ ທສ຺ເສຕ຺ວາ ‘‘ອິທໍ ກສ຺ສ ສີສ’’ນ຺ຕິ ປຸຈ຺ຉິ, ໂສ ຕມ຺ປິ ອາໂກເຏຕ຺ວາ ນິພ຺ພຕ຺ຕຏ຺ຐານໍ ນ ຊານາຕິ.

ອຖ ນໍ ສຕ຺ຖາ ‘‘ກິໍ, ວງ຺ຄີສ, ນ ຊານາສີ’’ຕິ ວຕ຺ວາ, ‘‘ອາມ, ນ ຊານາມີ’’ຕິ ວຸຕ຺ເຕ ‘‘ອຫໍ ຊານາມີ’’ຕິ ອາຫ. ອຖ ນໍ ວງ຺ຄີໂສ ຍາຈິ ‘‘ເທຖ ເມ ອິມໍ ມນ຺ຕ’’ນ຺ຕິ. ນ ສກ຺ກາ ອປພ຺ພຊິຕສ຺ສ ທາຕຸນ຺ຕິ. ໂສ ‘‘ອິມສ຺ມິໍ ມນ຺ເຕ ຄຫິເຕ ສກລຊມ຺ພຸທີເປ ອຫໍ ເຊຏ຺ຐໂກ ຠວິສ຺ສາມີ’’ຕິ ຈິນ຺ເຕຕ຺ວາ ເຕ ພ຺ຣາຫ຺ມເຓ ‘‘ຕຸມ຺ເຫ ຕຕ຺ເຖວ ກຕິປາຫໍ ວສຖ, ອຫໍ ປພ຺ພຊິສ຺ສາມີ’’ຕິ ອຸຍ຺ໂຍເຊຕ຺ວາ ສຕ຺ຖຸ ສນ຺ຕິເກ ປພ຺ພຊິຕ຺ວາ ລທ຺ຘູປສມ຺ປໂທ ວງ຺ຄີສຕ຺ເຖໂຣ ນາມ ອໂຫສິ. ອຖສ຺ສ ສຕ຺ຖາ ທ຺ວຕ຺ຕິໍສາກາຣກມ຺ມຏ຺ຐານໍ ທຕ຺ວາ ‘‘ມນ຺ຕສ຺ສ ປຣິກມ຺ມໍ ສຊ຺ຌາຍາຫີ’’ຕິ ອາຫ. ໂສ ຕໍ ສຊ຺ຌາຍນ຺ໂຕ ອນ຺ຕຣນ຺ຕຣາ ພ຺ຣາຫ຺ມເຓຫິ ‘‘ຄຫິໂຕ ເຕ ມນ຺ໂຕ’’ຕິ ປຸຈ຺ຉິຍມາໂນ ‘‘ອາຄເມຖ ຕາວ, ຄຓ຺ຫາມີ’’ຕິ ວຕ຺ວາ ກຕິປາເຫເນວ ອຣຫຕ຺ຕໍ ປຕ຺ວາ ປຸນ ພ຺ຣາຫ຺ມເຓຫິ ປຸຏ຺ໂຐ ‘‘ອຠພ຺ໂພ ທານາຫໍ, ອາວຸໂສ, ຄນ຺ຕຸ’’ນ຺ຕິ ອາຫ. ຕໍ ສຸຕ຺ວາ ຠິກ຺ຂູ ‘‘ອຍໍ, ຠນ຺ເຕ, ອຠູເຕນ ອຎ຺ຎໍ ພ຺ຍາກໂຣຕີ’’ຕິ ສຕ຺ຖຸ ອາໂຣເຈສຸໍ. ສຕ຺ຖາ ‘‘ມາ, ຠິກ຺ຂເວ, ເອວໍ ອວຈຸຕ຺ຖ, ອິທານິ, ຠິກ຺ຂເວ, ມມ ປຸຕ຺ໂຕ ຈຸຕິປຏິສນ຺ຘິກຸສໂລ ຊາໂຕ’’ຕິ ວຕ຺ວາ ອິມາ ຄາຖາ ອຠາສິ –

໔໑໙. ‘‘ຈຸຕິໍ ໂຍ ເວທິ ສຕ຺ຕານໍ, ອຸປປຕ຺ຕິຎ຺ຈ ສພ຺ພໂສ;

ອສຕ຺ຕໍ ສຸຄຕໍ ພຸທ຺ຘໍ, ຕມຫໍ ພ຺ຣູມິ ພ຺ຣາຫ຺ມຓໍ.

໔໒໐. ‘‘ຍສ຺ສ ຄຕິໍ ນ ຊານນ຺ຕິ, ເທວາ ຄນ຺ຘພ຺ພມານຸສາ;

ຂີຓາສວໍ ອຣຫນ຺ຕໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ໂຍ ເວທີຕິ ໂຍ ສຕ຺ຕານໍ ສພ຺ພາກາເຣນ ຈຸຕິຎ຺ຈ ປຏິສນ຺ຘິຎ຺ຈ ປາກຏໍ ກຕ຺ວາ ຊານາຕິ, ຕມຫໍ ອລຄ຺ຄຕາຍ ອສຕ຺ຕໍ, ປຏິປຕ຺ຕິຍາ ສຸຏ຺ຐຸ ຄຕຕ຺ຕາ ສຸຄຕໍ, ຈຕຸນ຺ນໍ ສຈ຺ຈານໍ ພຸທ຺ຘຕາຍ ພຸທ຺ຘໍ ພ຺ຣາຫ຺ມຓໍ ວທາມີຕິ ອຕ຺ໂຖ. ຍສ຺ສາຕິ ຍສ຺ເສເຕ ເທວາທໂຍ ຄຕິໍ ນ ຊານນ຺ຕິ, ຕມຫໍ ອາສວານໍ ຂີຓຕາຍ ຂີຓາສວໍ, ກິເລເສຫິ ອາຣກຕ຺ຕາ ອຣຫນ຺ຕໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ວງ຺ຄີສຕ຺ເຖຣວຕ຺ຖຸ ສຕ຺ຕຕິໍສຕິມໍ.