໒໒. ອຎ຺ຎຕຣຠິກ຺ຂຸວຕ຺ຖຸ

ນິຘາຍ ທຓ຺ຑນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ກເຖສິ.

ໂສ ກິຣ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ອຣຎ຺ເຎ ວາຍມນ຺ໂຕ ອຣຫຕ຺ຕໍ ປຕ຺ວາ ‘‘ປຏິລທ຺ຘຄຸຓໍ ສຕ຺ຖຸ ອາໂຣເຈສ຺ສາມີ’’ຕິ ຕໂຕ ນິກ຺ຂມິ. ອຖ ນໍ ເອກສ຺ມິໍ ຄາເມ ເອກາ ອິຕ຺ຖີ ສາມິເກນ ສທ຺ຘິໍ ກລຫໍ ກຕ຺ວາ ຕສ຺ມິໍ ພຫິ ນິກ຺ຂນ຺ເຕ ‘‘ກຸລຆຣໍ ຄມິສ຺ສາມີ’’ຕິ ມຄ຺ຄໍ ປຏິປນ຺ນາ ອນ຺ຕຣາມຄ຺ເຄ ທິສ຺ວາ ‘‘ອິມໍ ເຖຣໍ ນິສ຺ສາຍ ຄມິສ຺ສາມີ’’ຕິ ປິຏ຺ຐິໂຕ ປິຏ຺ຐິໂຕ ອນຸພນ຺ຘິ. ເຖໂຣ ປນ ຕໍ ນ ປສ຺ສຕິ. ອຖສ຺ສາ ສາມິໂກ ເຄຫໍ ອາຄໂຕ ຕໍ ອທິສ຺ວາ ‘‘ກຸລຄາມໍ ຄຕາ ຠວິສ຺ສຕີ’’ຕິ ອນຸພນ຺ຘນ຺ໂຕ ຕໍ ທິສ຺ວາ ‘‘ນ ສກ຺ກາ ອິມາຍ ເອກິກາຍ ອິມໍ ອຏວິໍ ປຏິປຊ຺ຊິຕຸໍ, ກໍ ນຸ ໂຂ ນິສ຺ສາຍ ຄຈ຺ຉຕີ’’ຕິ ໂອໂລເກນ຺ໂຕ ເຖຣໍ ທິສ຺ວາ ‘‘ອຍໍ ອິມໍ ຄຓ຺ຫິຕ຺ວາ ນິກ຺ຂນ຺ໂຕ ຠວິສ຺ສຕີ’’ຕິ ຈິນ຺ເຕຕ຺ວາ ເຖຣໍ ສນ຺ຕຊ຺ເຊສິ. ອຖ ນໍ ສາ ອິຕ຺ຖີ ‘‘ເນວ ມໍ ເອສ ຠທນ຺ໂຕ ປສ຺ສຕິ, ນ ອາລປຕິ, ມາ ນໍ ກິຎ຺ຈິ ອວຈາ’’ຕິ ອາຫ. ໂສ ‘‘ກິໍ ປນ ຕ຺ວໍ ອຕ຺ຕານໍ ຄເຫຕ຺ວາ ຄຈ຺ຉນ຺ຕໍ ມມ ອາຈິກ຺ຂິສ຺ສສິ, ຕຸຍ຺ຫເມວ ອນຸຈ຺ຉວິກໍ ອິມສ຺ສ ກຣິສ຺ສາມີ’’ຕິ ອຸປ຺ປນ຺ນໂກໂຘ ອິຕ຺ຖິຍາ ອາຆາເຕນ ເຖຣໍ ໂປເຖຕ຺ວາ ຕໍ ອາທາຍ ນິວຕ຺ຕິ. ເຖຣສ຺ສ ສກລສຣີຣໍ ສຎ຺ຊາຕຄຓ຺ຑໍ ອໂຫສິ. ອຖສ຺ສ ວິຫາຣໍ ຄຕກາເລ ຠິກ຺ຂູ ສຣີຣໍ ສມ຺ພາຫນ຺ຕາ ຄຓ຺ເຑ ທິສ຺ວາ ‘‘ກິໍ ອິທ’’ນ຺ຕິ ປຸຈ຺ຉິໍສຸ. ໂສ ເຕສໍ ຕມຕ຺ຖໍ ອາໂຣເຈສິ. ອຖ ນໍ ຠິກ຺ຂູ, ‘‘ອາວຸໂສ, ຕສ຺ມິໍ ປຸຣິເສ ເອວໍ ປຫຣນ຺ເຕ ຕ຺ວໍ ກິໍ ອວຈ, ກິໍ ວາ ເຕ ໂກໂຘ ອຸປ຺ປນ຺ໂນ’’ຕິ. ‘‘ນ ເມ, ອາວຸໂສ, ໂກໂຘ ອຸປ຺ປຊ຺ຊີ’’ຕິ ວຸຕ຺ເຕ ສຕ຺ຖຸ ສນ຺ຕິກໍ ຄນ຺ຕ຺ວາ ຕມຕ຺ຖໍ ອາໂຣເຈຕ຺ວາ, ‘‘ຠນ຺ເຕ, ເອສ ຠິກ຺ຂຸ ‘ໂກໂຘ ເຕ ອຸປ຺ປຊ຺ຊຕີ’ຕິ ວຸຈ຺ຈມາໂນ ‘ນ ເມ, ອາວຸໂສ, ໂກໂຘ ອຸປ຺ປຊ຺ຊຕີ’ຕິ ອຠູຕໍ ວຕ຺ວາ ອຎ຺ຎໍ ພ຺ຍາກໂຣຕີ’’ຕິ ອາໂຣເຈສຸໍ. ສຕ຺ຖາ ເຕສໍ ກຖໍ ສຸຕ຺ວາ, ‘‘ຠິກ຺ຂເວ, ຂີຓາສວາ ນາມ ນິຫິຕທຓ຺ຑາ, ເຕ ປຫຣນ຺ເຕສຸປິ ໂກຘໍ ນ ກໂຣນ຺ຕິເຍວາ’’ຕິ ວຕ຺ວາ ອິມໍ ຄາຖມາຫ –

໔໐໕. ‘‘ນິຘາຍ ທຓ຺ຑໍ ຠູເຕສຸ, ຕເສສຸ ຖາວເຣສຸ ຈ;

ໂຍ ນ ຫນ຺ຕິ ນ ຆາເຕຕິ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ນິຘາຍາຕິ ນິກ຺ຂິປິຕ຺ວາ ໂອໂຣເປຕ຺ວາ. ຕເສສຸ ຖາວເຣສຸ ຈາຕິ ຕຓ຺ຫາຕາເສນ ຕເສສຸ, ຕຓ຺ຫາອຠາເວນ ຖິຣຕາຍ ຖາວເຣສຸ ຈ. ໂຍ ນ ຫນ຺ຕີຕິ ໂຍ ເອວໍ ສພ຺ພສຕ຺ເຕສຸ ວິຄຕປຏິຆຕາຍ ນິກ຺ຂິຕ຺ຕທຓ຺ໂຑ ເນວ ກຎ຺ຈິ ສຍໍ ຫນຕິ, ນ ອຎ຺ເຎ ຆາເຕຕິ, ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອຎ຺ຎຕຣຠິກ຺ຂຸວຕ຺ຖຸ ພາວີສຕິມໍ.