໒໐. ເຂມາຠິກ຺ຂຸນີວຕ຺ຖຸ

ຄມ຺ຠີຣປຎ຺ຎນ຺ຕິ ອິມໍ ຘມ຺ມເທສນໍ ສຕ຺ຖາ ຄິຊ຺ຌກູເຏ ວິຫຣນ຺ໂຕ ເຂມໍ ນາມ ຠິກ຺ຂຸນິໍ ອາຣພ຺ຠ ກເຖສິ.

ເອກທິວສຎ຺ຫິ ປຐມຍາມສມນນ຺ຕເຣ ສກ຺ໂກ ເທວຣາຊາ ປຣິສາຍ ສທ຺ຘິໍ ອາຄນ຺ຕ຺ວາ ສຕ຺ຖຸ ສນ຺ຕິເກ ສາຣຓີຍຘມ຺ມກຖໍ ສຸຓນ຺ໂຕ ນິສີທິ. ຕສ຺ມິໍ ຂເຓ ເຂມາ ຠິກ຺ຂຸນີ ‘‘ສຕ຺ຖາຣໍ ປສ຺ສິສ຺ສາມີ’’ຕິ ອາຄນ຺ຕ຺ວາ ສກ຺ກໍ ທິສ຺ວາ ອາກາເສ ຐິຕາວ ສຕ຺ຖາຣໍ ວນ຺ທິຕ຺ວາ ນິວຕ຺ຕິ. ສກ຺ໂກ ຕໍ ທິສ຺ວາ ‘‘ໂກ ເອສາ, ຠນ຺ເຕ, ອາຄຈ຺ຉມານາ ອາກາເສ ຐິຕາວ ສຕ຺ຖາຣໍ ວນ຺ທິຕ຺ວາ ນິວຕ຺ຕີ’’ຕິ ປຸຈ຺ຉິ. ສຕ຺ຖາ ‘‘ເອສາ, ມຫາຣາຊ, ມມ ຘີຕາ ເຂມາ ນາມ ມຫາປຎ຺ຎາ ມຄ຺ຄາມຄ຺ຄໂກວິທາ’’ຕິ ວຕ຺ວາ ອິມໍ ຄາຖມາຫ –

໔໐໓. ‘‘ຄມ຺ຠີຣປຎ຺ຎໍ ເມຘາວິໍ, ມຄ຺ຄາມຄ຺ຄສ຺ສ ໂກວິທໍ;

ອຸຕ຺ຕມຕ຺ຖມນຸປ຺ປຕ຺ຕໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ຄພ຺ຠີຣປຎ຺ຎນ຺ຕິ ຄມ຺ຠີເຣສຸ ຂນ຺ຘາທີສຸ ປວຕ຺ຕາຍ ປຎ຺ຎາຍ ສມນ຺ນາຄຕໍ ຘມ຺ໂມຊປຎ຺ຎາຍ ສມນ຺ນາຄຕໍ ເມຘາວິໍ ‘‘ອຍໍ ທຸຄ຺ຄຕິຍາ ມຄ຺ໂຄ, ອຍໍ ສຸຄຕິຍາ ມຄ຺ໂຄ, ອຍໍ ນິພ຺ພານສ຺ສ ມຄ຺ໂຄ, ອຍໍ ອມຄ຺ໂຄ’’ຕິ ເອວໍ ມຄ຺ເຄ ຈ ອມຄ຺ເຄ ຈ ເຉກຕາຍ ມຄ຺ຄາມຄ຺ຄສ຺ສ ໂກວິທໍ ອຣຫຕ຺ຕສງ຺ຂາຕໍ ອຸຕ຺ຕມຕ຺ຖໍ ອນຸປ຺ປຕ຺ຕໍ ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ເຂມາຠິກ຺ຂຸນິວຕ຺ຖຸ ວີສຕິມໍ.