໑໗. ສາຣິປຸຕ຺ຕຕ຺ເຖຣວຕ຺ຖຸ

ອກ຺ໂກຘນນ຺ຕິ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ສາຣິປຸຕ຺ຕຕ຺ເຖຣໍ ອາຣພ຺ຠ ກເຖສິ.

ຕທາ ກິຣ ເຖໂຣ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ປິຓ຺ຑາຍ ຈຣນ຺ໂຕ ນາລກຄາເມ ມາຕຸ ຆຣທ຺ວາຣໍ ອຄມາສິ. ອຖ ນໍ ສາ ນິສີທາເປຕ຺ວາ ປຣິວິສມານາ ອກ຺ໂກສິ – ‘‘ອມ຺ໂຠ, ອຸຈ຺ຉິຏ຺ຐຂາທກ ອຸຈ຺ຉິຏ຺ຐກຎ຺ຊິຍໍ ອລຠິຕ຺ວາ ປຣຆເຣສຸ ອຸຬຸງ຺ກປິຏ຺ເຐນ ຆຏ຺ຏິຕກຎ຺ຊິຍໍ ປຣິຠຸຎ຺ຊິຕຸໍ ອສີຕິໂກຏິຘນໍ ປຫາຍ ປພ຺ພຊິໂຕສິ, ນາສິຕມ຺ຫາ ຕຍາ, ຠຸຎ຺ຊາຫິ ທານີ’’ຕິ. ຠິກ຺ຂູນມ຺ປິ ຠຕ຺ຕໍ ທທມານາ ‘‘ຕຸມ຺ເຫຫິ ມມ ປຸຕ຺ໂຕ ອຕ຺ຕໂນ ຈູຬຸປຏ຺ຐາໂກ ກໂຕ, ອິທານິ ຠຸຎ຺ຊຖາ’’ຕິ ວເທຕິ. ເຖໂຣ ຠິກ຺ຂໍ ຄເຫຕ຺ວາ ວິຫາຣເມວ ອຄມາສິ. ອຖາຍສ຺ມາ ຣາຫຸໂລ ສຕ຺ຖາຣໍ ປິຓ຺ຑປາເຕນ ອາປຸຈ຺ຉິ. ອຖ ນໍ ສຕ຺ຖາ ອາຫ – ‘‘ຣາຫຸລ, ກຫໍ ຄມິຕ຺ຖາ’’ຕິ? ‘‘ອຍ຺ຍິກາຍ ຄາມໍ, ຠນ຺ເຕ’’ຕິ. ‘‘ກິໍ ປນ ເຕ ອຍ຺ຍິກາຍ ອຸປຊ຺ຌາໂຍ ວຸຕ຺ໂຕ’’ຕິ? ‘‘ອຍ຺ຍິກາຍ ເມ, ຠນ຺ເຕ, ອຸປຊ຺ຌາໂຍ ອກ຺ກຸຏ຺ໂຐ’’ຕິ. ‘‘ກິນ຺ຕິ ວຕ຺ວາ’’ຕິ? ‘‘ອິທໍ ນາມ, ຠນ຺ເຕ’’ຕິ. ‘‘ອຸປຊ຺ຌາເຍນ ປນ ເຕ ກິໍ ວຸຕ຺ຕ’’ນ຺ຕິ? ‘‘ນ ກິຎ຺ຈິ, ຠນ຺ເຕ’’ຕິ. ຕໍ ສຸຕ຺ວາ ຠິກ຺ຂູ ຘມ຺ມສຠາຍໍ ກຖໍ ສມຸຏ຺ຐາເປສຸໍ, ‘‘ອາວຸໂສ, ອຈ຺ຉຣິຍາ ວຕ ສາຣິປຸຕ຺ຕຕ຺ເຖຣສ຺ສ ຄຸຓາ, ເອວໍນາມສ຺ສ ມາຕຣິ ອກ຺ໂກສນ຺ຕິຍາ ໂກຘມຕ຺ຕມ຺ປິ ນາໂຫສີ’’ຕິ. ສຕ຺ຖາ ອາຄນ຺ຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ ‘‘ອິມາຍ ນາມາ’’ຕິ ວຸຕ຺ເຕ, ‘‘ຠິກ຺ຂເວ, ຂີຓາສວາ ນາມ ອກ຺ໂກຘນາວ ໂຫນ຺ຕີ’’ຕິ ວຕ຺ວາ ອິມໍ ຄາຖມາຫ –

໔໐໐. ‘‘ອກ຺ໂກຘນໍ ວຕວນ຺ຕໍ, ສີລວນ຺ຕໍ ອນຸສ຺ສທໍ;

ທນ຺ຕໍ ອນ຺ຕິມສາຣີຣໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ວຕວນ຺ຕນ຺ຕິ ຘຸຕວເຕນ, ສມນ຺ນາຄຕໍ ຈຕຸປາຣິສຸທ຺ຘິສີເລນ ສີລວນ຺ຕໍ, ຕຓ຺ຫາອຸສ຺ສທາຠາເວນ ອນຸສ຺ສທໍ , ຉຬິນ຺ທ຺ຣິຍທມເນນ ທນ຺ຕໍ, ໂກຏິຍໍ ຐິເຕນ ອຕ຺ຕຠາເວນ ອນ຺ຕິມສຣີຣໍ ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສາຣິປຸຕ຺ຕຕ຺ເຖຣວຕ຺ຖຸ ສຕ຺ຕຣສມໍ.