໘. ມາຣວຕ຺ຖຸ

ນິຏ຺ຐງ຺ຄໂຕຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ມາຣໍ ອາຣພ຺ຠ ກເຖສິ.

ເອກທິວສຎ຺ຫິ ວິກາເລ ສມ຺ພຫຸລາ ເຖຣາ ເຊຕວນວິຫາຣໍ ປວິສິຕ຺ວາ ຣາຫຸລຕ຺ເຖຣສ຺ສ ວສນຏ຺ຐານໍ ຄນ຺ຕ຺ວາ ຕໍ ອຸຏ຺ຐາເປສຸໍ. ໂສ ອຎ຺ຎຕ຺ຖ ວສນຏ຺ຐານໍ ອປສ຺ສນ຺ໂຕ ຕຖາຄຕສ຺ສ ຄນ຺ຘກຸຏິຍາ ປມຸເຂ ນິປຊ຺ຊິ. ຕທາ ໂສ ອາຍສ຺ມາ ອຣຫຕ຺ຕໍ ປຕ຺ໂຕ ອວສ຺ສິໂກວ ໂຫຕິ. ມາໂຣ ວສວຕ຺ຕິຠວເນ ຐິໂຕເຍວ ຕໍ ອາຍສ຺ມນ຺ຕໍ ຄນ຺ຘກຸຏິປມຸເຂ ນິປນ຺ນໍ ທິສ຺ວາ ຈິນ຺ເຕສິ – ‘‘ສມຓສ຺ສ ໂຄຕມສ຺ສ ຣຸຊນກອງ຺ຄຸລີ ພຫິ ນິປນ຺ໂນ, ສຍໍ ອນ຺ໂຕຄນ຺ຘກຸຏິຍໍ ນິປນ຺ໂນ, ອງ຺ຄຸລິຍາ ປີຬິຍມານາຍ ສຍມ຺ປິ ປີຬິໂຕ ຠວິສ຺ສຕີ’’ຕິ. ໂສ ມຫນ຺ຕໍ ຫຕ຺ຖິຣາຊວຓ຺ຓໍ ອຠິນິມ຺ມິນິຕ຺ວາ ອາຄມ຺ມ ໂສຓ຺ຑາຍ ເຖຣສ຺ສ ມຕ຺ຖກໍ ປຣິກ຺ຂິປິຕ຺ວາ ມຫນ຺ເຕນ ສທ຺ເທນ ໂກຎ຺ຈນາທໍ ຣວິ. ສຕ຺ຖາ ຄນ຺ຘກຸຏິຍໍ ນິສິນ຺ໂນວ ຕສ຺ສ ມາຣຠາວໍ ຎຕ຺ວາ, ‘‘ມາຣ, ຕາທິສານໍ ສຕສຫສ຺ເສນາປິ ມມ ປຸຕ຺ຕສ຺ສ ຠຍໍ ອຸປ຺ປາເທຕຸໍ ນ ສກ຺ກາ. ປຸຕ຺ໂຕ ຫິ ເມ ອສນ຺ຕາສີ ວີຕຕຓ຺ໂຫ ມຫາວີຣິໂຍ ມຫາປຎ຺ໂຎ’’ຕິ ວຕ຺ວາ ອິມາ ຄາຖາ ອຠາສິ –

໓໕໑. ‘‘ນິຏ຺ຐງ຺ຄໂຕ ອສນ຺ຕາສີ, ວີຕຕຓ຺ໂຫ ອນງ຺ຄໂຓ;

ອຈ຺ຉິນ຺ທິ ຠວສລ຺ລານິ, ອນ຺ຕິໂມຍໍ ສມຸສ຺ສໂຍ.

໓໕໒. ‘‘ວີຕຕຓ຺ໂຫ ອນາທາໂນ, ນິຣຸຕ຺ຕິປທໂກວິໂທ;

ອກ຺ຂຣານໍ ສນ຺ນິປາຕໍ, ຊຎ຺ຎາ ປຸພ຺ພາປຣານິ ຈ;

ສ ເວ ອນ຺ຕິມສາຣີໂຣ,

ມຫາປຎ຺ໂຎ ມຫາປຸຣິໂສຕິ ວຸຈ຺ຈຕີ’’ຕິ.

ຕຕ຺ຖ ນິຏ຺ຐງ຺ຄໂຕຕິ ອິມສ຺ມິໍ ສາສເນ ປພ຺ພຊິຕານໍ ອຣຫຕ຺ຕໍ ນິຏ຺ຐໍ ນາມ, ຕໍ ຄໂຕ ປຕ຺ໂຕຕິ ອຕ຺ໂຖ. ອສນ຺ຕາສີຕິ ອພ຺ຠນ຺ຕເຣ ຣາຄສນ຺ຕາສາທີນໍ ອຠາເວນ ອສນ຺ຕສນໂກ. ອຈ຺ຉິນ຺ທິ ຠວສລ຺ລານີຕິ ສພ຺ພານິປິ ຠວຄາມີນິ ສລ຺ລານິ ອຈ຺ຉິນ຺ທິ. ສມຸສ຺ສໂຍຕິ ອຍໍ ເອຕສ຺ສ ອນ຺ຕິໂມ ເທໂຫ.

ອນາທາໂນຕິ ຂນ຺ຘາທີສຸ ນິຄ຺ຄຫໂຓ. ນິຣຸຕ຺ຕິປທໂກວິໂທຕິ ນິຣຸຕ຺ຕິຍຎ຺ຈ ເສສປເທສຸ ຈາຕິ ຈຕູສຸປິ ປຏິສມ຺ຠິທາສຸ ເຉໂກຕິ ອຕ຺ໂຖ. ອກ຺ຂຣານໍ ສນ຺ນິປາຕໍ, ຊຎ຺ຎາ ປຸພ຺ພາປຣານິ ຈາຕິ ອກ຺ຂຣານໍ ສນ຺ນິປາຕສງ຺ຂາຕໍ ອກ຺ຂຣປິຓ຺ຑຎ຺ຈ ຊານາຕິ, ປຸພ຺ພກ຺ຂເຣນ ອປຣກ຺ຂຣໍ, ອປຣກ຺ຂເຣນ ປຸພ຺ພກ຺ຂຣຎ຺ຈ ຊານາຕິ. ປຸພ຺ພກ຺ຂເຣນ ອປຣກ຺ຂຣໍ ຊານາຕິ ນາມ – ອາທິມ຺ຫິ ປຎ຺ຎາຍມາເນ ມຊ຺ຌປຣິໂຍສາເນສຸ ອປຎ຺ຎາຍມາເນສຸປິ ‘‘ອິເມສໍ ອກ຺ຂຣານໍ ອິທໍ ມຊ຺ຌໍ, ອິທໍ ປຣິໂຍສານ’’ນ຺ຕິ ຊານາຕິ. ອປຣກ຺ຂເຣນ ປຸພ຺ພກ຺ຂຣໍ ຊານາຕິ ນາມ – ອນ຺ເຕ ປຎ຺ຎາຍມາເນ ອາທິມຊ຺ເຌສຸ ອປຎ຺ຎາຍມາເນສຸ ‘‘ອິເມສໍ ອກ຺ຂຣານໍ ອິທໍ ມຊ຺ຌໍ, ອຍໍ ອາທີ’’ຕິ ຊານາຕິ. ມຊ຺ເຌ ປຎ຺ຎາຍມາເນປິ ‘‘ອິເມສໍ ອກ຺ຂຣານໍ ອຍໍ ອາທິ, ອຍໍ ອນ຺ໂຕ’’ຕິ ຊານາຕິ. ເອວໍ ມຫາປຎ຺ໂຎ. ສ ເວ ອນ຺ຕິມສາຣີໂຣຕິ ເອສ ໂກຏິຍໍ ຐິຕສຣີໂຣ, ມຫນ຺ຕານໍ ອຕ຺ຖຘມ຺ມນິຣຸຕ຺ຕິປຏິຠານານໍ ສີລກ຺ຂນ຺ຘາທີນຎ຺ຈ ປຣິຄ຺ຄາຫິກາຍ ປຎ຺ຎາຍ ສມນ຺ນາຄຕຕ຺ຕາ ມຫາປຎ຺ໂຎ, ‘‘ວິມຸຕ຺ຕຈິຕ຺ຕຕ຺ຕາ ຂ຺ວາຫໍ, ສາຣິປຸຕ຺ຕ, ມຫາປຸຣິໂສຕິ ວທາມີ’’ຕິ (ສໍ. ນິ. ໕.໓໗໗) ວຈນໂຕ ວິມຸຕ຺ຕຈິຕ຺ຕຕາຍ ຈ ມຫາປຸຣິໂສຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສຸ. ມາໂຣປິ ປາປິມາ ‘‘ຊານາຕິ ມໍ ສມໂຓ ໂຄຕໂມ’’ຕິ ຕຕ຺ເຖວນ຺ຕຣຘາຍີຕິ.

ມາຣວຕ຺ຖຸ ອຏ຺ຐມໍ.