໙. ພາລິສິກວຕ຺ຖຸ

ນ ເຕນ ອຣິໂຍ ໂຫຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກໍ ອຣິຍໍ ນາມ ພາລິສິກໍ ອາຣພ຺ຠ ກເຖສິ.

ເອກທິວສຎ຺ຫິ ສຕ຺ຖາ ຕສ຺ສ ໂສຕາປຕ຺ຕິມຄ຺ຄສ຺ສູປນິສ຺ສຍໍ ທິສ຺ວາ ສາວຕ຺ຖິຍາ ອຸຕ຺ຕຣທ຺ວາຣຄາເມ ປິຓ຺ຑາຍ ຈຣິຕ຺ວາ ຠິກ຺ຂຸສງ຺ຆປຣິວຸໂຕ ຕໂຕ ອາຄຈ຺ຉຕິ. ຕສ຺ມິໍ ຂເຓ ໂສ ພາລິສິໂກ ພລິເສນ ມຈ຺ເຉ ຄຓ຺ຫນ຺ໂຕ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ທິສ຺ວາ ພລິສຍຏ຺ຐິໍ ຉຑ຺ເຑຕ຺ວາ ອຏ຺ຐາສິ. ສຕ຺ຖາ ຕສ຺ສ ອວິທູເຣ ຐາເນ ນິວຕ຺ຕິຕ຺ວາ ຐິໂຕ ‘‘ຕ຺ວໍ ກິໍ ນາໂມສີ’’ຕິ ສາຣິປຸຕ຺ຕຕ຺ເຖຣາທີນໍ ນາມານິ ປຸຈ຺ຉິ. ເຕປິ ‘‘ອຫໍ ສາຣິປຸຕ຺ໂຕ ອຫໍ ໂມຄ຺ຄລ຺ລາໂນ’’ຕິ ອຕ຺ຕໂນ ອຕ຺ຕໂນ ນາມານິ ກຖຍິໍສຸ. ພາລິສິໂກ ຈິນ຺ເຕສິ – ‘‘ສຕ຺ຖາ ສພ຺ເພສໍ ນາມານິ ປຸຈ຺ຉຕິ, ມມມ຺ປິ ນາມໍ ປຸຈ຺ຉິສ຺ສຕິ ມຎ຺ເຎ’’ຕິ. ສຕ຺ຖາ ຕສ຺ສ ອິຈ຺ຉໍ ຎຕ຺ວາ, ‘‘ອຸປາສກ, ຕ຺ວໍ ໂກ ນາໂມສີ’’ຕິ ປຸຈ຺ຉິຕ຺ວາ ‘‘ອຫໍ, ຠນ຺ເຕ, ອຣິໂຍ ນາມາ’’ຕິ ວຸຕ຺ເຕ ‘‘ນ, ອຸປາສກ, ຕາທິສາ ປາຓາຕິປາຕິໂນ ອຣິຍາ ນາມ ໂຫນ຺ຕິ, ອຣິຍາ ປນ ມຫາຊນສ຺ສ ອຫິໍສນຠາເວ ຐິຕາ’’ຕິ ວຕ຺ວາ ອິມໍ ຄາຖມາຫ –

໒໗໐. ‘‘ນ ເຕນ ອຣິໂຍ ໂຫຕິ, ເຍນ ປາຓານິ ຫິໍສຕິ;

ອຫິໍສາ ສພ຺ພປາຓານໍ, ອຣິໂຍຕິ ປວຸຈ຺ຈຕີ’’ຕິ.

ຕຕ຺ຖ ອຫິໍສາຕິ ອຫິໍສເນນ. ອິທໍ ວຸຕ຺ຕໍ ໂຫຕິ – ເຍນ ຫິ ປາຓານິ ຫິໍສຕິ, ນ ເຕນ ກາຣເຓນ ອຣິໂຍ ໂຫຕິ. ໂຍ ປນ ສພ຺ພປາຓານໍ ປາຓິອາທີຫິ ອຫິໍສເນນ ເມຕ຺ຕາທິຠາວນາຍ ປຕິຏ຺ຐິຕຕ຺ຕາ ຫິໍສໂຕ ອາຣາວ ຐິໂຕ, ອຍໍ ອຣິໂຍຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ພາລິສິໂກ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ພາລິສິກວຕ຺ຖຸ ນວມໍ.