໑. ວິນິຈ຺ຉຍມຫາມຕ຺ຕວຕ຺ຖຸ

ນ ເຕນ ໂຫຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ວິນິຈ຺ຉຍມຫາມຕ຺ເຕ ອາຣພ຺ຠ ກເຖສິ.

ເອກທິວສຎ຺ຫິ ຠິກ຺ຂູ ສາວຕ຺ຖິຍໍ ອຸຕ຺ຕຣທ຺ວາຣຄາເມ ປິຓ຺ຑາຍ ຈຣິຕ຺ວາ ປິຓ຺ຑປາຕປຏິກ຺ກນ຺ຕາ ນຄຣມຊ຺ເຌນ ວິຫາຣໍ ອາຄຈ຺ຉນ຺ຕິ. ຕສ຺ມິໍ ຂເຓ ເມໂຆ ອຸຏ຺ຐາຍ ປາວສ຺ສິ. ເຕ ສມ຺ມຸຂາຄຕໍ ວິນິຈ຺ຉຍສາລໍ ປວິສິຕ຺ວາ ວິນິຈ຺ຉຍມຫາມຕ຺ເຕ ລຎ຺ຊໍ ຄເຫຕ຺ວາ ສາມິເກ ອສາມິເກ ກໂຣນ຺ເຕ ທິສ຺ວາ ‘‘ອໂຫ ອິເມ ອຘມ຺ມິກາ, ມຍໍ ປນ ‘ອິເມ ຘມ຺ເມນ ວິນິຈ຺ຉຍໍ ກໂຣນ຺ຕີ’ຕິ ສຎ຺ຎິໂນ ອຫຸມ຺ຫາ’’ຕິ ຈິນ຺ເຕຕ຺ວາ ວສ຺ເສ ວິຄເຕ ວິຫາຣໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ເອກມນ຺ຕໍ ນິສິນ຺ນາ ຕມຕ຺ຖໍ ອາໂຣເຈສຸໍ. ສຕ຺ຖາ ‘‘ນ, ຠິກ຺ຂເວ, ຉນ຺ທາທິວສິກາ ຫຸຕ຺ວາ ສາຫເສນ ອຕ຺ຖໍ ວິນິຈ຺ຉິນນ຺ຕາ ຘມ຺ມຏ຺ຐາ ນາມ ໂຫນ຺ຕິ, ອປຣາຘໍ ປນ ອນຸວິຊ຺ຊິຕ຺ວາ ອປຣາຘານຸຣູປໍ ອສາຫເສນ ວິນິຈ຺ຉຍໍ ກໂຣນ຺ຕາ ເອວ ຘມ຺ມຏ຺ຐາ ນາມ ໂຫນ຺ຕີ’’ຕິ ວຕ຺ວາ ອິມາ ຄາຖາ ອຠາສິ –

໒໕໖. ‘‘ນ ເຕນ ໂຫຕິ ຘມ຺ມຏ຺ໂຐ, ເຍນຕ຺ຖໍ ສາຫສາ ນເຍ;

ໂຍ ຈ ອຕ຺ຖໍ ອນຕ຺ຖຎ຺ຈ, ອຸໂຠ ນິຈ຺ເຉຍ຺ຍ ປຓ຺ຑິໂຕ.

໒໕໗. ‘‘ອສາຫເສນ ຘມ຺ເມນ, ສເມນ ນຍຕີ ປເຣ;

ຘມ຺ມສ຺ສ ຄຸຕ຺ໂຕ ເມຘາວີ, ຘມ຺ມຏ຺ໂຐຕິ ປວຸຈ຺ຈຕີ’’ຕິ.

ຕຕ຺ຖ ເຕນາຕິ ເອຕ຺ຕເກເນວ ກາຣເຓນ. ຘມ຺ມຏ຺ໂຐຕິ ຣາຊາ ຫິ ອຕ຺ຕໂນ ກາຕພ຺ເພ ວິນິຈ຺ຉຍຘມ຺ເມ ຐິໂຕປິ ຘມ຺ມຏ຺ໂຐ ນາມ ນ ໂຫຕິ. ເຍນາຕິ ເຍນ ກາຣເຓນ. ອຕ຺ຖນ຺ຕິ ໂອຕິຓ຺ຓໍ ວິນິຈ຺ຉິຕພ຺ພໍ ອຕ຺ຖໍ. ສາຫສາ ນເຍຕິ ຉນ຺ທາທີສຸ ປຕິຏ຺ຐິໂຕ ສາຫເສນ ມຸສາວາເທນ ວິນິຈ຺ເຉຍ຺ຍ. ໂຍ ຫິ ຉນ຺ເທ ປຕິຏ຺ຐາຍ ຎາຕີຕິ ວາ ມິຕ຺ໂຕຕິ ວາ ມຸສາ ວຕ຺ວາ ອສາມິກເມວ ສາມິກໍ ກໂຣຕິ, ໂທເສ ປຕິຏ຺ຐາຍ ອຕ຺ຕໂນ ເວຣີນໍ ມຸສາ ວຕ຺ວາ ສາມິກເມວ ອສາມິກໍ ກໂຣຕິ, ໂມເຫ ປຕິຏ຺ຐາຍ ລຎ຺ຊໍ ຄເຫຕ຺ວາ ວິນິຈ຺ຉຍກາເລ ອຎ຺ຎວິຫິໂຕ ວິຍ ອິໂຕ ຈິໂຕ ຈ ໂອໂລເກນ຺ໂຕ ມຸສາ ວຕ຺ວາ ‘‘ອິມິນາ ຊິຕໍ, ອຍໍ ປຣາຊິໂຕ’’ຕິ ປຣໍ ນີຫຣຕິ, ຠເຍ ປຕິຏ຺ຐາຍ ກສ຺ສຈິເທວ ອິສ຺ສຣຊາຕິກສ຺ສ ປຣາຊຍໍ ປາປຸຓນ຺ຕສ຺ສາປິ ຊຍໍ ອາໂຣເປຕິ, ອຍໍ ສາຫເສນ ອຕ຺ຖໍ ເນຕິ ນາມ. ເອໂສ ຘມ຺ມຏ຺ໂຐ ນາມ ນ ໂຫຕີຕິ ອຕ຺ໂຖ. ອຕ຺ຖໍ ອນຕ຺ຖຎ຺ຈາຕິ ຠູຕຎ຺ຈ ອຠູຕຎ຺ຈ ກາຣຓໍ. ອຸໂຠ ນິຈ຺ເຉຍ຺ຍາຕິ ໂຍ ປນ ປຓ຺ຑິໂຕ ອຸໂຠ ອຕ຺ຖານຕ຺ເຖ ວິນິຈ຺ຉິນິຕ຺ວາ ວທຕິ. ອສາຫເສນາຕິ ອມຸສາວາເທນ. ຘມ຺ເມນາຕິ ວິນິຈ຺ຉຍຘມ຺ເມນ, ນ ຉນ຺ທາທິວເສນ. ສເມນາຕິ ອປຣາຘານຸຣູເປເນວ ປເຣ ນຍຕິ, ຊຍໍ ວາ ປຣາຊຍໍ ວາ ປາເປຕິ. ຘມ຺ມສ຺ສ ຄຸຕ຺ໂຕຕິ ໂສ ຘມ຺ມຄຸຕ຺ໂຕ ຘມ຺ມຣກ຺ຂິໂຕ ຘມ຺ໂມຊປຎ຺ຎາຍ ສມນ຺ນາຄໂຕ ເມຘາວີ ວິນິຈ຺ຉຍຘມ຺ເມ ຐິຕຕ຺ຕາ ຘມ຺ມຏ຺ໂຐຕິ ປວຸຈ຺ຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ວິນິຈ຺ຉຍມຫາມຕ຺ຕວຕ຺ຖຸ ປຐມໍ.