໗. ອຕຸລອຸປາສກວຕ຺ຖຸ

ໂປຣາຓເມຕນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຕຸລໍ ນາມ ອຸປາສກໍ ອາຣພ຺ຠ ກເຖສິ.

ໂສ ຫິ ສາວຕ຺ຖິວາສີ ອຸປາສໂກ ປຎ຺ຈສຕອຸປາສກປຣິວາໂຣ ເອກທິວສໍ ເຕ ອຸປາສເກ ອາທາຍ ຘມ຺ມສ຺ສວນຕ຺ຖາຍ ວິຫາຣໍ ຄນ຺ຕ຺ວາ ເຣວຕຕ຺ເຖຣສ຺ສ ສນ຺ຕິເກ ຘມ຺ມໍ ໂສຕຸກາໂມ ຫຸຕ຺ວາ ເຣວຕຕ຺ເຖຣໍ ວນ຺ທິຕ຺ວາ ນິສີທິ. ໂສ ປນາຍສ຺ມາ ປຏິສລ຺ລານາຣາໂມ ສີໂຫ ວິຍ ເອກຈາໂຣ, ຕສ຺ມາ ເຕນ ສທ຺ຘິໍ ນ ກິຎ຺ຈິ ກເຖສິ. ໂສ ‘‘ອຍໍ ເຖໂຣ ນ ກິຎ຺ຈິ ກເຖສີ’’ຕິ ກຸທ຺ໂຘ ອຸຏ຺ຐາຍ ສາຣິປຸຕ຺ຕຕ຺ເຖຣສ຺ສ ສນ຺ຕິກໍ ຄນ຺ຕ຺ວາ ເອກມນ຺ຕໍ ຐິໂຕ ເຖເຣນ ‘‘ເກນຕ຺ເຖນ ອາຄຕຕ຺ຖາ’’ຕິ ວຸຕ຺ເຕ ‘‘ອຫໍ, ຠນ຺ເຕ, ອິເມ ອຸປາສເກ ອາທາຍ ຘມ຺ມສ຺ສວນຕ຺ຖາຍ ເຣວຕຕ຺ເຖຣໍ ອຸປສງ຺ກມິໍ, ຕສ຺ສ ເມ ເຖໂຣ ນ ກິຎ຺ຈິ ກເຖສິ, ສ຺ວາຫໍ ຕສ຺ສ ກຸຊ຺ຌິຕ຺ວາ ອິຘາຄໂຕ, ຘມ຺ມໍ ເມ ກເຖຖາ’’ຕິ ອາຫ. ອຖ ເຖໂຣ ‘‘ເຕນ ຫິ ອຸປາສກາ ນິສີທຖາ’’ຕິ ວຕ຺ວາ ພຫຸກໍ ກຕ຺ວາ ອຠິຘມ຺ມກຖໍ ກເຖສິ. ອຸປາສໂກປິ ‘‘ອຠິຘມ຺ມກຖາ ນາມ ອຕິສຓ຺ຫາ, ເຖໂຣ ພຫຸໍ ອຠິຘມ຺ມເມວ ກເຖສິ, ອມ຺ຫາກໍ ອິມິນາ ໂກ ອຕ຺ໂຖ’’ຕິ ກຸຊ຺ຌິຕ຺ວາ ປຣິສໍ ອາທາຍ ອານນ຺ທຕ຺ເຖຣສ຺ສ ສນ຺ຕິກໍ ອຄມາສິ.

ເຖເຣນາປິ ‘‘ກິໍ ອຸປາສກາ’’ຕິ ວຸຕ຺ເຕ, ‘‘ຠນ຺ເຕ, ມຍໍ ຘມ຺ມສ຺ສວນຕ຺ຖາຍ ເຣວຕຕ຺ເຖຣໍ ອຸປສງ຺ກມິມ຺ຫາ, ຕສ຺ສ ສນ຺ຕິເກ ອາລາປສລ຺ລາປມຕ຺ຕມ຺ປິ ອລຠິຕ຺ວາ ກຸທ຺ຘາ ສາຣິປຸຕ຺ຕຕ຺ເຖຣສ຺ສ ສນ຺ຕິກໍ ອຄມິມ຺ຫາ, ໂສປິ ໂນ ອຕິສຓ຺ຫໍ ພຫຸໍ ອຠິຘມ຺ມເມວ ກເຖສິ, ‘ອິມິນາ ອມ຺ຫາກໍ ໂກ ອຕ຺ໂຖ’ຕິ ເອຕສ຺ສາປິ ກຸຊ຺ຌິຕ຺ວາ ອິຘາຄມິມ຺ຫາ, ກເຖຫິ ໂນ, ຠນ຺ເຕ, ຘມ຺ມກຖ’’ນ຺ຕິ. ເຕນ ຫິ ນິສີທິຕ຺ວາ ສຸຓາຖາຕິ ເຖໂຣ ເຕສໍ ສຸວິຎ຺ເຎຍ຺ຍໍ ກຕ຺ວາ ອປ຺ປກເມວ ຘມ຺ມໍ ກເຖສິ. ເຕ ເຖຣສ຺ສປິ ກຸຊ຺ຌິຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ເອກມນ຺ຕໍ ນິສີທິໍສຸ, ອຖ ເນ ສຕ຺ຖາ ອາຫ – ‘‘ກສ຺ມາ ອຸປາສກາ ອາຄຕຕ຺ຖາ’’ຕິ? ‘‘ຘມ຺ມສ຺ສວນາຍ, ຠນ຺ເຕ’’ຕິ. ‘‘ສຸໂຕ ປນ ໂວ ຘມ຺ໂມ’’ຕິ? ‘‘ຠນ຺ເຕ, ມຍໍ ອາທິໂຕ ເຣວຕຕ຺ເຖຣໍ ອຸປສງ຺ກມິມ຺ຫາ, ໂສ ອມ຺ເຫຫິ ສທ຺ຘິໍ ນ ກິຎ຺ຈິ ກເຖສິ, ຕສ຺ສ ກຸຊ຺ຌິຕ຺ວາ ສາຣິປຸຕ຺ຕຕ຺ເຖຣໍ ອຸປສງ຺ກມິມ຺ຫາ, ເຕນ ໂນ ພຫຸ ອຠິຘມ຺ໂມ ກຖິໂຕ, ຕໍ ອສລ຺ລກ຺ເຂຕ຺ວາ ກຸຊ຺ຌິຕ຺ວາ ອານນ຺ທຕ຺ເຖຣໍ ອຸປສງ຺ກມິມ຺ຫາ, ເຕນ ໂນ ອປ຺ປມຕ຺ຕໂກວ ຘມ຺ໂມ ກຖິໂຕ, ຕສ຺ສປິ ກຸຊ຺ຌິຕ຺ວາ ອິຘາຄຕມ຺ຫາ’’ຕິ.

ສຕ຺ຖາ ຕສ຺ສ ກຖໍ ສຸຕ຺ວາ, ‘‘ອຕຸລ, ໂປຣາຓໂຕ ປຏ຺ຐາຍ ອາຈິຓ຺ຓເມເວຕໍ, ຕຸຓ຺ຫີຠູຕມ຺ປິ ພຫຸກຖມ຺ປິ ມນ຺ທກຖມ຺ປິ ຄຣຫນ຺ຕິເຍວ. ເອກນ຺ຕໍ ຄຣຫິຕພ຺ໂພເຍວ ວາ ຫິ ປສໍສິຕພ຺ໂພເຍວ ວາ ນຕ຺ຖິ. ຣາຊາໂນປິ ເອກຈ຺ເຈ ນິນ຺ທນ຺ຕິ, ເອກຈ຺ເຈ ປສໍສນ຺ຕິ. ມຫາປຖວິມ຺ປິ ຈນ຺ທິມສູຣິເຍປິ ອາກາສາທໂຍປິ ຈຕຸປຣິສມຊ຺ເຌ ນິສີທິຕ຺ວາ ຘມ຺ມໍ ກເຖນ຺ຕມ຺ປິ ສມ຺ມາສມ຺ພຸທ຺ຘໍ ເອກຈ຺ເຈ ຄຣຫນ຺ຕິ, ເອກຈ຺ເຈ ປສໍສນ຺ຕິ. ອນ຺ຘພາລານຎ຺ຫິ ນິນ຺ທາ ວາ ປສໍສາ ວາ ອປ຺ປມາຓາ, ປຓ຺ຑິເຕນ ປນ ເມຘາວິນາ ນິນ຺ທິໂຕ ນິນ຺ທິໂຕ ນາມ, ປສໍສິໂຕ ຈ ປສໍສິໂຕ ນາມ ໂຫຕີ’’ຕິ ວຕ຺ວາ ອິມາ ຄາຖາ ອຠາສິ –

໒໒໗. ‘‘ໂປຣາຓເມຕໍ ອຕຸລ, ເນຕໍ ອຊ຺ຊຕນາມິວ;

ນິນ຺ທນ຺ຕິ ຕຸຓ຺ຫິມາສີນໍ, ນິນ຺ທນ຺ຕິ ພຫຸຠາຓິນໍ;

ມິຕຠາຓິມ຺ປິ ນິນ຺ທນ຺ຕິ, ນຕ຺ຖິ ໂລເກ ອນິນ຺ທິໂຕ.

໒໒໘. ‘‘ນ ຈາຫຸ ນ ຈ ຠວິສ຺ສຕິ, ນ ເຈຕຣຫິ ວິຊ຺ຊຕິ;

ເອກນ຺ຕໍ ນິນ຺ທິໂຕ ໂປໂສ, ເອກນ຺ຕໍ ວາ ປສໍສິໂຕ.

໒໒໙. ‘‘ຍໍ ເຈ ວິຎ຺ຎູ ປສໍສນ຺ຕິ, ອນຸວິຈ຺ຈ ສຸເວ ສຸເວ;

ອຈ຺ຉິທ຺ທວຸຕ຺ຕິໍ ເມຘາວິໍ, ປຎ຺ຎາສີລສມາຫິຕໍ.

໒໓໐. ‘‘ນິກ຺ຂໍ ຊມ຺ໂພນທສ຺ເສວ, ໂກ ຕໍ ນິນ຺ທິຕຸມຣຫຕິ;

ເທວາປິ ນໍ ປສໍສນ຺ຕິ, ພ຺ຣຫ຺ມຸນາປິ ປສໍສິໂຕ’’ຕິ.

ຕຕ຺ຖ ໂປຣາຓເມຕນ຺ຕິ ປຸຣາຓກໍ ເອຕໍ. ອຕຸລາຕິ ຕໍ ອຸປາສກໍ ນາເມນ ອາລປຕິ. ເນຕໍ ອຊ຺ຊຕນາມິວາຕິ ອິທໍ ນິນ຺ທນໍ ວາ ປສໍສນໍ ວາ ອຊ຺ຊຕນໍ ອຘຸນາ ອຸປ຺ປນ຺ນໍ ວິຍ ນ ໂຫຕິ. ຕຸຓ຺ຫິມາສີນນ຺ຕິ ກິໍ ເອໂສ ມູໂຄ ວິຍ ພຘິໂຣ ວິຍ ກິຎ຺ຈິ ອຊານນ຺ໂຕ ວິຍ ຕຸຓ຺ຫີ ຫຸຕ຺ວາ ນິສິນ຺ໂນຕິ ນິນ຺ທນ຺ຕິ. ພຫຸຠາຓິນນ຺ຕິ ກິໍ ເອສ ວາຕາຫຕຕາລປຓ຺ຓໍ ວິຍ ຕຏຕຏາຍຕິ, ອິມສ຺ສ ກຖາປຣິຍນ຺ໂຕເຍວ ນຕ຺ຖີຕິ ນິນ຺ທນ຺ຕິ. ມິຕຠາຓິມ຺ປີຕິ ກິໍ ເອສ ສຸວຓ຺ຓຫິຣຎ຺ຎໍ ວິຍ ອຕ຺ຕໂນ ວຈນໍ ມຎ຺ຎມາໂນ ເອກໍ ວາ ທ຺ເວ ວາ ວຕ຺ວາ ຕຸຓ຺ຫີ ອໂຫສີຕິ ນິນ຺ທນ຺ຕິ. ເອວໍ ສພ຺ພຖາປິ ອິມສ຺ມິໍ ໂລເກ ອນິນ຺ທິໂຕ ນາມ ນຕ຺ຖີຕິ ອຕ຺ໂຖ. ນ ຈາຫູຕິ ອຕີເຕປິ ນາໂຫສິ, ອນາຄເຕປິ ນ ຠວິສ຺ສຕິ.

ຍໍ ເຈ ວິຎ຺ຎູຕິ ພາລານໍ ນິນ຺ທາ ວາ ປສໍສາ ວາ ອປ຺ປມາຓາ, ຍໍ ປນ ປຓ຺ຑິຕາ ທິວເສ ທິວເສ ອນຸວິຈ຺ຈ ນິນ຺ທກາຣຓໍ ວາ ປສໍສກາຣຓໍ ວາ ຊານິຕ຺ວາ ປສໍສນ຺ຕິ, ອຈ຺ຉິທ຺ທາຍ ວາ ສິກ຺ຂາຍ ອຈ຺ຉິທ຺ທາຍ ວາ ຊີວິຕວຸຕ຺ຕິຍາ ສມນ຺ນາຄຕຕ຺ຕາ ອຈ຺ຉິທ຺ທວຸຕ຺ຕິໍ ຘມ຺ໂມຊປຎ຺ຎາຍ ສມນ຺ນາຄຕຕ຺ຕາ ເມຘາວິໍ ໂລກິຍໂລກຸຕ຺ຕຣປຎ຺ຎາຍ ເຈວ ຈຕຸປາຣິສຸທ຺ຘິສີເລນ ຈ ສມນ຺ນາຄຕຕ຺ຕາ ປຎ຺ຎາສີລສມາຫິຕໍ ປສໍສນ຺ຕິ, ຕໍ ສຸວຓ຺ຓໂທສວິຣຫິຕໍ ຆຏ຺ຏນມຊ຺ຊນກ຺ຂມໍ ຊມ຺ໂພນທນິກ຺ຂໍ ວິຍ ໂກ ນິນ຺ທິຕຸມຣຫຕີຕິ ອຕ຺ໂຖ. ເທວາປີຕິ ເທວຕາປິ ປຓ຺ຑິຕມນຸສ຺ສາປິ ຕໍ ຠິກ຺ຂຸໍ ອຸປຏ຺ຐາຍ ໂຖເມນ຺ຕິ ປສໍສນ຺ຕິ. ພ຺ຣຫ຺ມຸນາປີຕິ ນ ເກວລໍ ເທວມນຸສ຺ເສຫິ, ທສສຫສ຺ສຈກ຺ກວາເຬ ມຫາພ຺ຣຫ຺ມຸນາປິ ເອສ ປສໍສິໂຕເຍວາຕິ ອຕ຺ໂຖ.

ເທສນາວສາເນ ປຎ຺ຈສຕາປິ ອຸປາສກາ ໂສຕາປຕ຺ຕິຜເລ ປຕິຏ຺ຐຫິໍສູຕິ.

ອຕຸລອຸປາສກວຕ຺ຖຸ ສຕ຺ຕມໍ.