໖. ອຎ຺ຎຕຣພ຺ຣາຫ຺ມຓວຕ຺ຖຸ

ຕຓ຺ຫາຍ ຊາຍຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ພ຺ຣາຫ຺ມຓໍ ອາຣພ຺ຠ ກເຖສິ.

ໂສ ກິຣ ມິຈ຺ຉາທິຏ຺ຐິໂກ ເອກທິວສໍ ນທີຕີຣໍ ຄນ຺ຕ຺ວາ ເຂຕ຺ຕໍ ໂສເຘຕິ. ສຕ຺ຖາ ຕສ຺ສ ອຸປນິສ຺ສຍສມ຺ປຕ຺ຕິໍ ທິສ຺ວາ ຕສ຺ສ ສນ຺ຕິກໍ ອຄມາສິ. ໂສ ສຕ຺ຖາຣໍ ທິສ຺ວາປິ ສາມີຈິກມ຺ມໍ ອກຕ຺ວາ ຕຸຓ຺ຫີ ອໂຫສິ. ອຖ ນໍ ສຕ຺ຖາ ປຸເຣຕຣໍ ອາລປິຕ຺ວາ, ‘‘ພ຺ຣາຫ຺ມຓ, ກິໍ ກໂຣສີ’’ຕິ ອາຫ. ‘‘ເຂຕ຺ຕໍ, ໂຠ ໂຄຕມ, ໂສເຘມີ’’ຕິ. ສຕ຺ຖາ ເອຕ຺ຕກເມວ ວຕ຺ວາ ຄໂຕ. ປຸນທິວເສປິ ຕສ຺ສ ເຂຕ຺ຕໍ ກສິຕຸໍ ອາຄຕສ຺ສ ສນ຺ຕິກໍ ຄນ຺ຕ຺ວາ, ‘‘ພ຺ຣາຫ຺ມຓ, ກິໍ ກໂຣສີ’’ຕິ ປຸຈ຺ຉິຕ຺ວາ ‘‘ເຂຕ຺ຕໍ ກສາມິ, ໂຠ ໂຄຕມາ’’ຕິ ສຸຕ຺ວາ ປກ຺ກາມິ. ປຸນທິວສາທີສຸປິ ຕເຖວ ຄນ຺ຕ຺ວາ ປຸຈ຺ຉິຕ຺ວາ, ‘‘ໂຠ ໂຄຕມ, ເຂຕ຺ຕໍ ວປາມິ ນິທ຺ເທມິ ຣກ຺ຂາມີ’’ຕິ ສຸຕ຺ວາ ປກ຺ກາມິ. ອຖ ນໍ ເອກທິວສໍ ພ຺ຣາຫ຺ມໂຓ ອາຫ – ‘‘ໂຠ ໂຄຕມ, ຕ຺ວໍ ມມ ເຂຕ຺ຕໂສຘນທິວສໂຕ ປຏ຺ຐາຍ ອາຄໂຕ. ສເຈ ເມ ສສ຺ສໍ ສມ຺ປຊ຺ຊິສ຺ສຕິ, ຕຸຍ຺ຫມ຺ປິ ສໍວິຠາຄໍ ກຣິສ຺ສາມິ, ຕຸຍ຺ຫໍ ອທຕ຺ວາ ສຍໍ ນ ຂາທິສ຺ສາມິ, ອິໂຕ ທານິ ປຏ຺ຐາຍ ຕ຺ວໍ ມມ ສຫາໂຍ’’ຕິ.

ອຖສ຺ສ ອປເຣນ ສມເຍນ ສສ຺ສໍ ສມ຺ປຊ຺ຊິ, ຕສ຺ສ ‘‘ສມ຺ປນ຺ນໍ ເມ ສສ຺ສໍ, ສ຺ເວ ທານິ ລາຍາເປສ຺ສາມີ’’ຕິ ລາຍນຕ຺ຖໍ ກຕ຺ຕພ຺ພກິຈ຺ຈສ຺ສ ຣຕ຺ຕິໍ ມຫາເມໂຆ ວສ຺ສິຕ຺ວາ ສພ຺ພໍ ສສ຺ສໍ ຫຣິ, ເຂຕ຺ຕໍ ຕຈ຺ເຉຕ຺ວາ ຐປິຕສທິສໍ ອໂຫສິ. ສຕ຺ຖາ ປນ ປຐມທິວສໍເຍວ ‘‘ຕໍ ສສ຺ສໍ ນ ສມ຺ປຊ຺ຊິສ຺ສຕີ’’ຕິ ອຎ຺ຎາສິ. ພ຺ຣາຫ຺ມໂຓ ປາໂຕວ ‘‘ເຂຕ຺ຕໍ ໂອໂລເກສ຺ສາມີ’’ຕິ ຄໂຕ ຕຸຈ຺ຉໍ ເຂຕ຺ຕໍ ທິສ຺ວາ ອຸປ຺ປນ຺ນພລວໂສໂກ ຈິນ຺ເຕສິ – ‘‘ສມໂຓ ໂຄຕໂມ ມມ ເຂຕ຺ຕໂສຘນກາລໂຕ ປຏ຺ຐາຍ ອາຄໂຕ, ອຫມ຺ປິ ນໍ ‘ອິມສ຺ມິໍ ສສ຺ເສ ນິປ຺ຜນ຺ເນ ຕຸຍ຺ຫມ຺ປິ ສໍວິຠາຄໍ ກຣິສ຺ສາມິ, ຕຸຍ຺ຫໍ ອທຕ຺ວາ ສຍໍ ນ ຂາທິສ຺ສາມິ, ອິໂຕ ປຏ຺ຐາຍ ທານິ ຕ຺ວໍ ມມ ສຫາໂຍ’ຕິ ອວຈໍ. ໂສປິ ເມ ມໂນຣໂຖ ມຕ຺ຖກໍ ນ ປາປຸຓີ’’ຕິ ອາຫາຣູປຈ຺ເຉທໍ ກຕ຺ວາ ມຎ຺ຈເກ ນິປຊ຺ຊິ. ອຖສ຺ສ ສຕ຺ຖາ ເຄຫທ຺ວາຣໍ ອຄມາສິ. ໂສ ສຕ຺ຖຸ ອາຄມນໍ ສຸຕ຺ວາ ‘‘ສຫາຍໍ ເມ ອາເນຕ຺ວາ ອິຘ ນິສີທາເປຖາ’’ຕິ ອາຫ. ປຣິຊໂນ ຕຖາ ອກາສິ. ສຕ຺ຖາ ນິສີທິຕ຺ວາ ‘‘ກຫໍ ພ຺ຣາຫ຺ມໂຓ’’ຕິ ປຸຈ຺ຉິຕ຺ວາ ‘‘ຄພ຺ເຠ ນິປນ຺ໂນ’’ຕິ ວຸຕ຺ເຕ ‘‘ປກ຺ໂກສຖ ນ’’ນ຺ຕິ ປກ຺ໂກສາເປຕ຺ວາ ອາຄນ຺ຕ຺ວາ ເອກມນ຺ຕໍ ນິສິນ຺ນໍ ອາຫ ‘‘ກິໍ, ພ຺ຣາຫ຺ມຓາ’’ຕິ? ໂຠ ໂຄຕມ, ຕຸມ຺ເຫ ມມ ເຂຕ຺ຕໂສຘນທິວສໂຕ ປຏ຺ຐາຍ ອາຄຕາ, ອຫມ຺ປິ ‘‘ສສ຺ເສ ນິປ຺ຜນ຺ເນ ຕຸມ຺ຫາກໍ ສໍວິຠາຄໍ ກຣິສ຺ສາມີ’’ຕິ ອວຈໍ. ໂສ ເມ ມໂນຣໂຖ ອນິປ຺ຜນ຺ໂນ, ເຕນ ເມ ໂສໂກ ອຸປ຺ປນ຺ໂນ, ຠຕ຺ຕມ຺ປິ ເມ ນຈ຺ຉາເທຕີຕິ. ອຖ ນໍ ສຕ຺ຖາ ‘‘ຊານາສິ ປນ, ພ຺ຣາຫ຺ມຓ, ກິໍ ເຕ ນິສ຺ສາຍ ໂສໂກ ອຸປ຺ປນ຺ໂນ’’ຕິ ປຸຈ຺ຉິຕ຺ວາ ‘‘ນ ຊານາມິ, ໂຠ ໂຄຕມ, ຕ຺ວໍ ປນ ຊານາສີ’’ຕິ ວຸຕ຺ເຕ, ‘‘ອາມ, ພ຺ຣາຫ຺ມຓ, ອຸປ຺ປຊ຺ຊມາໂນ ໂສໂກ ວາ ຠຍໍ ວາ ຕຓ຺ຫໍ ນິສ຺ສາຍ ອຸປ຺ປຊ຺ຊຕີ’’ຕິ ວຕ຺ວາ ອິມໍ ຄາຖມາຫ –

໒໑໖. ‘‘ຕຓ຺ຫາຍ ຊາຍຕີ ໂສໂກ, ຕຓ຺ຫາຍ ຊາຍຕີ ຠຍໍ;

ຕຓ຺ຫາຍ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍ’’ນ຺ຕິ.

ຕຕ຺ຖ ຕຓ຺ຫາຍາຕິ ຉທ຺ວາຣິກາຍ ຕຓ຺ຫາຍ, ເອຕໍ ຕຓ຺ຫໍ ນິສ຺ສາຍ ອຸປ຺ປຊ຺ຊຕີຕິ ອຕ຺ໂຖ.

ເທສນາວສາເນ ພ຺ຣາຫ຺ມໂຓ ໂສຕາປຕ຺ຕິຜເລ ປຕິຏ຺ຐຫີຕິ.

ອຎ຺ຎຕຣພ຺ຣາຫ຺ມຓວຕ຺ຖຸ ຉຏ຺ຐໍ.