໖. ອຄ຺ຄິທຕ຺ຕພ຺ຣາຫ຺ມຓວຕ຺ຖຸ

ພຫຸໍ ເວ ສຣຓໍ ຍນ຺ຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ວາລິກຣາສິມ຺ຫິ ນິສິນ຺ນໍ ອຄ຺ຄິທຕ຺ຕໍ ນາມ ໂກສລຣຎ຺ໂຎ ປຸໂຣຫິຕໍ ອາຣພ຺ຠ ກເຖສິ.

ໂສ ກິຣ ມຫາໂກສລສ຺ສ ປຸໂຣຫິໂຕ ອໂຫສິ. ອຖ ນໍ ປິຕຣິ ກາລກເຕ ຣາຊາ ປເສນທິ ໂກສໂລ ‘‘ປິຕຸ ເມ ປຸໂຣຫິໂຕ’’ຕິ ຄາຣເວນ ຕສ຺ມິໍເຍວ ຐາເນ ຐເປຕ຺ວາ ຕສ຺ສ ອຕ຺ຕໂນ ອຸປຏ຺ຐານໍ ອາຄຕກາເລ ປຈ຺ຈຸຄ຺ຄມນໍ ກໂຣຕິ, ‘‘ອາຈຣິຍ, ອິຘ ນິສີທຖາ’’ຕິ ສມານາສນໍ ທາເປສິ. ໂສ ຈິນ຺ເຕສິ – ‘‘ອຍໍ ຣາຊາ ມຍິ ອຕິວິຍ ຄາຣວໍ ກໂຣຕິ, ນ ໂຂ ປນ ຣາຊູນໍ ນິຈ຺ຈກາລເມວ ສກ຺ກາ ຈິຕ຺ຕໍ ຄເຫຕຸໍ. ສມານວເຍເນວ ຫິ ສທ຺ຘິໍ ຣຊ຺ຊສຸຂໍ ນາມ ສຸຂໍ ໂຫຕິ, ອຫຎ຺ຈມ຺ຫິ ມຫລ຺ລໂກ, ປພ຺ພຊິຕຸໍ ເມ ຍຸຕ຺ຕ’’ນ຺ຕິ. ໂສ ຣາຊານໍ ປພ຺ພຊ຺ຊໍ ອນຸຊານາເປຕ຺ວາ ນຄເຣ ເຠຣິໍ ຈຣາເປຕ຺ວາ ສຕ຺ຕາເຫນ ສພ຺ພໍ ອຕ຺ຕໂນ ຘນໍ ທານມຸເຂ ວິສ຺ສຊ຺ເຊຕ຺ວາ ພາຫິຣກປພ຺ພຊ຺ຊໍ ປພ຺ພຊິ. ຕໍ ນິສ຺ສາຍ ທສ ປຸຣິສສຫສ຺ສານິ ອນຸປພ຺ພຊິໍສຸ. ໂສ ເຕຫິ ສທ຺ຘິໍ ອງ຺ຄມຄຘານຎ຺ຈ ກຸຣຸຣຏ຺ຐສ຺ສ ຈ ອນ຺ຕເຣ ວາສໍ ກປ຺ເປຕ຺ວາ ອິມໍ ໂອວາທໍ ເທຕິ, ‘‘ຕາຕາ, ຍສ຺ສ ກາມວິຕກ຺ກາທໂຍ ອຸປ຺ປຊ຺ຊນ຺ຕິ, ໂສ ນທິໂຕ ເອເກກໍ ວາລຸກປຸຏໍ ອຸທ຺ຘຣິຕ຺ວາ ອິມສ຺ມິໍ ໂອກິຣຕູ’’ຕິ. ເຕ ‘‘ສາຘູ’’ຕິ ປຏິສ຺ສຸຓິຕ຺ວາ ກາມວິຕກ຺ກາທີນໍ ອຸປ຺ປນ຺ນກາເລ ຕຖາ ກຣິໍສຸ. ອປເຣນ ສມເຍນ ມຫາວາລຸກຣາສິ ອໂຫສິ, ຕໍ ອຫິຉຕ຺ໂຕ ນາມ ນາຄຣາຊາ ປຏິຄ຺ຄເຫສິ. ອງ຺ຄມຄຘວາສິໂນ ເຈວ ກຸຣຸຣຏ຺ຐວາສິໂນ ຈ ມາເສ ມາເສ ເຕສໍ ມຫນ຺ຕໍ ສກ຺ກາຣໍ ອຠິຫຣິຕ຺ວາ ທານໍ ເທນ຺ຕິ. ອຖ ເນສໍ ອຄ຺ຄິທຕ຺ໂຕ ອິມໍ ໂອວາທໍ ອທາສິ – ‘‘ປພ຺ພຕໍ ສຣຓໍ ຍາຖ, ວນໍ ສຣຓໍ ຍາຖ, ອາຣາມໍ ສຣຓໍ ຍາຖ, ຣຸກ຺ຂໍ ສຣຓໍ ຍາຖ, ເອວໍ ສພ຺ພທຸກ຺ຂໂຕ ມຸຈ຺ຈິສ຺ສຖາ’’ຕິ. ອຕ຺ຕໂນ ອນ຺ເຕວາສິເກປິ ອິມິນາ ໂອວາເທນ ໂອວທິ.

ໂພຘິສຕ຺ໂຕປິ ກຕາຠິນິກ຺ຂມໂນ ສມ຺ມາສມ຺ໂພຘິໍ ປຕ຺ວາ ຕສ຺ມິໍ ສມເຍ ສາວຕ຺ຖິໍ ນິສ຺ສາຍ ເຊຕວເນ ວິຫຣນ຺ໂຕ ປຈ຺ຈູສກາເລ ໂລກໍ ໂວໂລເກນ຺ໂຕ ອຄ຺ຄິທຕ຺ຕພ຺ຣາຫ຺ມຓໍ ສທ຺ຘິໍ ອນ຺ເຕວາສິເກຫິ ອຕ຺ຕໂນ ຎາຓຊາລສ຺ສ ອນ຺ໂຕ ປວິຏ຺ຐໍ ທິສ຺ວາ ‘‘ສພ຺ເພປິ ອິເມ ອຣຫຕ຺ຕສ຺ສ ອຸປນິສ຺ສຍສມ຺ປນ຺ນາ’’ຕິ ຎຕ຺ວາ ສາຍນ຺ຫສມເຍ ມຫາໂມຄ຺ຄລ຺ລານຕ຺ເຖຣໍ ອາຫ – ‘‘ໂມຄ຺ຄລ຺ລານ, ກິໍ ປສ຺ສສິ ອຄ຺ຄິທຕ຺ຕພ຺ຣາຫ຺ມຓໍ ມຫາຊນໍ ອຕິຕ຺ເຖ ປກ຺ຂນ຺ທາເປນ຺ຕໍ, ຄຈ຺ຉ ເຕສໍ ໂອວາທໍ ເທຫີ’’ຕິ. ຠນ຺ເຕ, ພຫູ ເອເຕ, ເອກກສ຺ສ ມຍ຺ຫໍ ອວິສຍ຺ຫາ. ສເຈ ຕຸມ຺ເຫປິ ອາຄມິສ຺ສຖ, ວິສຍ຺ຫາ ຠວິສ຺ສນ຺ຕີຕິ. ໂມຄ຺ຄລ຺ລານ, ອຫມ຺ປິ ອາຄມິສ຺ສາມິ, ຕ຺ວໍ ປຸຣໂຕ ຍາຫີຕິ. ເຖໂຣ ປຸຣໂຕ ຄຈ຺ຉນ຺ໂຕວ ຈິນ຺ເຕສິ – ‘‘ເອເຕ ພລວນ຺ໂຕ ເຈວ ພຫູ ຈ. ສເຈ ສພ຺ເພສໍ ສມາຄມຏ຺ຐາເນ ກິຎ຺ຈິ ກເຖສ຺ສາມິ, ສພ຺ເພປິ ວຄ຺ຄວຄ຺ເຄນ ອຸຏ຺ຐເຫຍ຺ຍຸ’’ນ຺ຕິ ອຕ຺ຕໂນ ອານຸຠາເວນ ຖູລຜຸສິຕກໍ ເທວໍ ວຸຏ຺ຐາເປສິ. ເຕ ຖູລຜຸສິຕເກສຸ ປຕນ຺ເຕສຸ ອຸຏ຺ຐາຍຸຏ຺ຐາຍ ອຕ຺ຕໂນ ອຕ຺ຕໂນ ປຓ຺ຓສາລໍ ປວິສິໍສຸ. ເຖໂຣ ອຄ຺ຄິທຕ຺ຕສ຺ສ ພ຺ຣາຫ຺ມຓສ຺ສ ປຓ຺ຓສາລທ຺ວາເຣ ຐຕ຺ວາ ‘‘ອຄ຺ຄິທຕ຺ຕາ’’ຕິ ອາຫ. ໂສ ເຖຣສ຺ສ ສທ຺ທໍ ສຸຕ຺ວາ ‘‘ມໍ ອິມສ຺ມິໍ ໂລເກ ນາເມນ ອາລປິຕຸໍ ສມຕ຺ໂຖ ນາມ ນຕ຺ຖິ, ໂກ ນຸ ໂຂ ມໍ ນາເມນ ອາລປຕີ’’ຕິ ມານຖທ຺ຘຕາຍ ‘‘ໂກ ເອໂສ’’ຕິ ອາຫ. ‘‘ອຫໍ, ພ຺ຣາຫ຺ມຓາ’’ຕິ. ‘‘ກິໍ ວເທສີ’’ຕິ? ‘‘ອຊ຺ຊ ເມ ເອກຣຕ຺ຕິໍ ອິຘ ວສນຏ຺ຐານໍ ຕ຺ວໍ ອາຈິກ຺ຂາຫີ’’ຕິ. ‘‘ອິຘ ວສນຏ຺ຐານໍ ນຕ຺ຖິ, ເອກສ຺ສ ເອກາວ ປຓ຺ຓສາລາ’’ຕິ. ‘‘ອຄ຺ຄິທຕ຺ຕ, ມນຸສ຺ສາ ນາມ ມນຸສ຺ສານໍ, ຄາໂວ ຄຸນ຺ນໍ, ປພ຺ພຊິຕາ ປພ຺ພຊິຕານໍ ສນ຺ຕິກໍ ຄຈ຺ຉນ຺ຕິ, ມາ ເອວໍ ກຣິ, ເທຫິ ເມ ວສນຏ຺ຐານ’’ນ຺ຕິ. ‘‘ກິໍ ປນ ຕ຺ວໍ ປພ຺ພຊິໂຕ’’ຕິ? ‘‘ອາມ, ປພ຺ພຊິໂຕມ຺ຫີ’’ຕິ. ‘‘ສເຈ ປພ຺ພຊິໂຕ, ກຫໍ ເຕ ຂາຣິຠຓ຺ຑໍ, ໂກ ປພ຺ພຊິຕປຣິກ຺ຂາໂຣ’’ຕິ. ‘‘ອຕ຺ຖິ ເມ ປຣິກ຺ຂາໂຣ, ວິສຸໍ ປນ ນໍ ຄເຫຕ຺ວາ ວິຈຣິຕຸໍ ທຸກ຺ຂນ຺ຕິ ອພ຺ຠນ຺ຕເຣເນວ ນໍ ຄເຫຕ຺ວາ ວິຈຣາມິ, ພ຺ຣາຫ຺ມຓາ’’ຕິ. ໂສ ‘‘ຕໍ ຄເຫຕ຺ວາ ວິຈຣິສ຺ສສີ’’ຕິ ເຖຣສ຺ສ ກຸຊ຺ຌິ. ອຖ ນໍ ໂສ ອາຫ – ‘‘ອມ຺ເຫ, ອຄ຺ຄິທຕ຺ຕ, ມາ ກຸຊ຺ຌິ, ວສນຏ຺ຐານໍ ເມ ອາຈິກ຺ຂາຫີ’’ຕິ. ນຕ຺ຖິ ເອຕ຺ຖ ວສນຏ຺ຐານນ຺ຕິ. ເອຕສ຺ມິໍ ປນ ວາລຸກຣາສິມ຺ຫິ ໂກ ວສຕີຕິ. ເອໂກ, ນາຄຣາຊາຕິ. ເອຕໍ ເມ ເທຫີຕິ. ນ ສກ຺ກາ ທາຕຸໍ, ຠາຣິຍໍ ເອຕສ຺ສ ກມ຺ມນ຺ຕິ. ໂຫຕຸ, ເທຫິ ເມຕິ. ເຕນ ຫິ ຕ຺ວໍ ເອວ ຊານາຫີຕິ.

ເຖໂຣ ວາລຸກຣາສິອຠິມຸໂຂ ປາຍາສິ. ນາຄຣາຊາ ຕໍ ອາຄຈ຺ຉນ຺ຕໍ ທິສ຺ວາ ‘‘ອຍໍ ສມໂຓ ອິໂຕ ອາຄຈ຺ຉຕິ, ນ ຊານາຕິ ມຎ຺ເຎ ມມ ອຕ຺ຖິຠາວໍ, ຘູມາຍິຕ຺ວາ ນໍ ມາເຣສ຺ສາມີ’’ຕິ ຘູມາຍິ. ເຖໂຣ ‘‘ອຍໍ ນາຄຣາຊາ ‘ອຫເມວ ຘູມາຍິຕຸໍ ສກ຺ໂກມິ, ອຎ຺ເຎ ນ ສກ຺ໂກນ຺ຕີ’ຕິ ມຎ຺ເຎ ສລ຺ລກ຺ເຂຕີ’’ຕິ ສຍມ຺ປິ ຘູມາຍິ. ທ຺ວິນ຺ນມ຺ປິ ສຣີຣໂຕ ອຸຄ຺ຄຕາ ຘູມາ ຍາວ ພ຺ຣຫ຺ມໂລກາ ອຸຏ຺ຐຫິໍສຸ. ອຸໂຠປິ ຘູມາ ເຖຣໍ ອພາເຘຕ຺ວາ ນາຄຣາຊານເມວ ພາເຘນ຺ຕິ. ນາຄຣາຊາ ຘູມເວຄໍ ສຫິຕຸໍ ອສກ຺ໂກນ຺ໂຕ ປຊ຺ຊລິ. ເຖໂຣປິ ເຕໂຊຘາຕຸໍ ສມາປຊ຺ຊິຕ຺ວາ ເຕນ ສທ຺ຘິໍເຍວ ປຊ຺ຊລິ. ອຄ຺ຄິຊາລາ ຍາວ ພ຺ຣຫ຺ມໂລກາ ອຸຏ຺ຐຫິໍສຸ. ອຸໂຠປິ ເຖຣໍ ອພາເຘຕ຺ວາ ນາຄຣາຊານເມວ ພາຘຍິໍສຸ. ອຖສ຺ສ ສກລສຣີຣໍ ອຸກ຺ກາຫິ ປທິຕ຺ຕໍ ວິຍ ອໂຫສິ. ອິສິຄໂຓ ໂອໂລເກຕ຺ວາ ຈິນ຺ເຕສິ – ‘‘ນາຄຣາຊາ, ສມຓໍ ຌາເປຕິ, ຠທ຺ທໂກ ວຕ ສມໂຓ ອມ຺ຫາກໍ ວຈນໍ ອສຸຕ຺ວາ ນຏ຺ໂຐ’’ຕິ. ເຖໂຣ ນາຄຣາຊານໍ ທເມຕ຺ວາ ນິພ຺ພິເສວນໍ ກຕ຺ວາ ວາລຸກຣາສິມ຺ຫິ ນິສີທິ. ນາຄຣາຊາ ວາລຸກຣາສິໍ ໂຠເຄຫິ ປຣິກ຺ຂິປິຕ຺ວາ ກູຏາຄາຣກຸຈ຺ຉິປມາຓໍ ຜຓໍ ມາເປຕ຺ວາ ເຖຣສ຺ສ ອຸປຣິ ຘາເຣສິ.

ອິສິຄຓາ ປາໂຕວ ‘‘ສມຓສ຺ສ ມຕຠາວໍ ວາ ອມຕຠາວໍ ວາ ຊານິສ຺ສາມາ’’ຕິ ເຖຣສ຺ສ ສນ຺ຕິກໍ ຄນ຺ຕ຺ວາ ຕໍ ວາລຸກຣາສິມຕ຺ຖເກ ນິສິນ຺ນໍ ທິສ຺ວາ ອຎ຺ຊລິໍ ປຄ຺ຄຍ຺ຫ ອຠິຕ຺ຖວນ຺ຕາ ອາຫໍສຸ – ‘‘ສມຓ, ກຈ຺ຈິ ນາຄຣາເຊນ ນ ພາຘິໂຕ’’ຕິ. ‘‘ກິໍ ນ ປສ຺ສຖ ມມ ອຸປຣິຜຓໍ ຘາເຣຕ຺ວາ ຐິຕ’’ນ຺ຕິ? ເຕ ‘‘ອຈ຺ຉຣິຍໍ ວຕ ໂຠ, ສມຓສ຺ສ ເອວຣູໂປ ນາມ ນາຄຣາຊາ ທມິໂຕ’’ຕິ ເຖຣໍ ປຣິວາເຣຕ຺ວາ ອຏ຺ຐໍສຸ. ຕສ຺ມິໍ ຂເຓ ສຕ຺ຖາ ອາຄໂຕ. ເຖໂຣ ສຕ຺ຖາຣໍ ທິສ຺ວາ ອຸຏ຺ຐາຍ ວນ຺ທິ. ອຖ ນໍ ອິສໂຍ ອາຫໍສຸ – ‘‘ອຍມ຺ປິ ຕຍາ ມຫນ຺ຕຕໂຣ’’ຕິ. ເອໂສ ຠຄວາ ສຕ຺ຖາ, ອຫໍ ອິມສ຺ສ ສາວໂກຕິ. ສຕ຺ຖາ ວາລຸກຣາສິມຕ຺ຖເກ ນິສີທິ, ອິສິຄໂຓ ‘‘ອຍໍ ຕາວ ສາວກສ຺ສ ອານຸຠາໂວ, ອິມສ຺ສ ປນ ອານຸຠາໂວ ກີທິໂສ ຠວິສ຺ສຕີ’’ຕິ ອຎ຺ຊລິໍ ປຄ຺ຄຍ຺ຫ ສຕ຺ຖາຣໍ ອຠິຕ຺ຖວິ. ສຕ຺ຖາ ອຄ຺ຄິທຕ຺ຕໍ ອາມນ຺ເຕຕ຺ວາ ອາຫ – ‘‘ອຄ຺ຄິທຕ຺ຕ, ຕ຺ວໍ ຕວ ສາວການຎ຺ຈ ອຸປຏ຺ຐາການຎ຺ຈ ໂອວາທໍ ທທມາໂນ ກິນ຺ຕິ ວຕ຺ວາ ເທສີ’’ຕິ. ‘‘ເອຕໍ ປພ຺ພຕໍ ສຣຓໍ ຄຈ຺ຉຖ, ວນໍ ອາຣາມໍ ຣຸກ຺ຂໍ ສຣຓໍ ຄຈ຺ຉຖ. ເອຕານິ ຫິ ສຣຓໍ ຄໂຕ ສພ຺ພທຸກ຺ຂາ ປມຸຈ຺ຈຕີ’’ຕິ ເອວໍ ເຕສໍ ໂອວາທໍ ທມ຺ມີຕິ. ສຕ຺ຖາ ‘‘ນ ໂຂ, ອຄ຺ຄິທຕ຺ຕ, ເອຕານິ ສຣຓໍ ຄໂຕ ສພ຺ພທຸກ຺ຂາ ປມຸຈ຺ຈຕິ, ພຸທ຺ຘໍ ຘມ຺ມໍ ສງ຺ຆໍ ປນ ສຣຓໍ ຄນ຺ຕ຺ວາ ສກລວຏ຺ຏທຸກ຺ຂາ ປມຸຈ຺ຈຕີ’’ຕິ ວຕ຺ວາ ອິມາ ຄາຖາ ອຠາສິ –

໑໘໘. ‘‘ພຫຸໍ ເວ ສຣຓໍ ຍນ຺ຕິ, ປພ຺ພຕານິ ວນານິ ຈ;

ອາຣາມຣຸກ຺ຂເຈຕ຺ຍານິ, ມນຸສ຺ສາ ຠຍຕຊ຺ຊິຕາ.

໑໘໙. ‘‘ເນຕໍ ໂຂ ສຣຓໍ ເຂມໍ, ເນຕໍ ສຣຓມຸຕ຺ຕມໍ;

ເນຕໍ ສຣຓມາຄມ຺ມ, ສພ຺ພທຸກ຺ຂາ ປມຸຈ຺ຈຕິ.

໑໙໐. ‘‘ໂຍ ຈ ພຸທ຺ຘຎ຺ຈ ຘມ຺ມຎ຺ຈ, ສງ຺ຆຎ຺ຈ ສຣຓໍ ຄໂຕ;

ຈຕ຺ຕາຣິ ອຣິຍສຈ຺ຈານິ, ສມ຺ມປ຺ປຎ຺ຎາຍ ປສ຺ສຕິ.

໑໙໑. ‘‘ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

໑໙໒. ‘‘ເອຕໍ ໂຂ ສຣຓໍ ເຂມໍ, ເອຕໍ ສຣຓມຸຕ຺ຕມໍ;

ເອຕໍ ສຣຓມາຄມ຺ມ, ສພ຺ພທຸກ຺ຂາ ປມຸຈ຺ຈຕີ’’ຕິ.

ຕຕ຺ຖ ພຫຸນ຺ຕິ ພຫຸ. ປພ຺ພຕານີຕິ ຕຕ຺ຖ ຕຕ຺ຖ ອິສິຄິລິເວປຸລ຺ລເວຠາຣາທິເກ ປພ຺ພເຕ ຈ ມຫາວນໂຄສິງ຺ຄສາລວນາທີນິ ວນານິ ຈ ເວຬຸວນຊີວກມ຺ພວນາທໂຍ ອາຣາເມ ຈ ອຸເທນເຈຕິຍໂຄຕມເຈຕິຍາທີນິ ຣຸກ຺ຂເຈຕ຺ຍານິ ຈ ເຕ ເຕ ມນຸສ຺ສາ ເຕນ ເຕນ ຠເຍນ ຕຊ຺ຊິຕາ ຠຍໂຕ ມຸຈ຺ຈິຕຸກາມາ ປຸຕ຺ຕລາຠາທີນິ ວາ ປຕ຺ຖຍມານາ ສຣຓໍ ຍນ຺ຕີຕິ ອຕ຺ໂຖ. ເນຕໍ ສຣຓນ຺ຕິ ເອຕໍ ສພ຺ພມ຺ປິ ສຣຓໍ ເນວ ເຂມໍ ນ ອຸຕ຺ຕມໍ, ນ ຈ ເອຕໍ ປຏິຈ຺ຈ ຊາຕິອາທິຘມ຺ເມສຸ ສຕ຺ເຕສຸ ເອໂກປິ ຊາຕິອາທິໂຕ ສພ຺ພທຸກ຺ຂາ ປມຸຈ຺ຈຕີຕິ ອຕ຺ໂຖ.

ໂຍ ຈາຕິ ອິທໍ ອເຂມໍ ອນຸຕ຺ຕມໍ ສຣຓໍ ທສ຺ເສຕ຺ວາ ເຂມໍ ອຸຕ຺ຕມໍ ສຣຓໍ ທສ຺ສນຕ຺ຖໍ ອາຣທ຺ຘໍ. ຕສ຺ສຕ຺ໂຖ – ໂຍ ຈ ຄຫຏ຺ໂຐ ວາ ປພ຺ພຊິໂຕ ວາ ‘‘ອິຕິປິ ໂສ ຠຄວາ ອຣຫໍ ສມ຺ມາສມ຺ພຸທ຺ໂຘ’’ຕິອາທິກໍ ພຸທ຺ຘຘມ຺ມສງ຺ຆານຸສ຺ສຕິກມ຺ມຏ຺ຐານໍ ນິສ຺ສາຍ ເສຏ຺ຐວເສນ ພຸທ຺ຘຎ຺ຈ ຘມ຺ມຎ຺ຈ ສງ຺ຆຎ຺ຈ ສຣຓໍ ຄໂຕ, ຕສ຺ສປິ ຕໍ ສຣຓຄມນໍ ອຎ຺ຎຕິຕ຺ຖິຍວນ຺ທນາທີຫິ ກຸປ຺ປຕິ ຈລຕິ. ຕສ຺ສ ປນ ອຈລຠາວໍ ທສ຺ເສຕຸໍ ມຄ຺ເຄນ ອາຄຕສຣຓເມວ ປກາສນ຺ໂຕ ຈຕ຺ຕາຣິ ອຣິຍສຈ຺ຈານິ ສມ຺ມປ຺ປຎ຺ຎາຍ ປສ຺ສຕີຕິ ອາຫ. ໂຍ ຫິ ເອເຕສໍ ສຈ຺ຈານໍ ທສ຺ສນວເສນ ເອຕານິ ສຣຓໍ ຄໂຕ, ເອຕສ຺ສ ເອຕໍ ສຣຓໍ ເຂມຎ຺ຈ ອຸຕ຺ຕມຎ຺ຈ, ໂສ ຈ ປຸຄ຺ຄໂລ ເອຕໍ ສຣຓໍ ປຏິຈ຺ຈ ສກລສ຺ມາປິ ວຏ຺ຏທຸກ຺ຂາ ປມຸຈ຺ຈຕິ, ຕສ຺ມາ ເອຕໍ ໂຂ ສຣຓໍ ເຂມນ຺ຕິອາທິ ວຸຕ຺ຕໍ.

ເທສນາວສາເນ ສພ຺ເພປິ ເຕ ອິສໂຍ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ສຕ຺ຖາຣໍ ວນ຺ທິຕ຺ວາ ປພ຺ພຊ຺ຊໍ ຍາຈິໍສຸ. ສຕ຺ຖາປິ ຈີວຣຄພ຺ຠໂຕ ຫຕ຺ຖໍ ປສາເຣຕ຺ວາ ‘‘ເອຖ ຠິກ຺ຂໂວ, ຈຣຖ ພ຺ຣຫ຺ມຈຣິຍ’’ນ຺ຕິ ອາຫ. ເຕ ຕງ຺ຂເຓເຍວ ອຏ຺ຐປຣິກ຺ຂາຣຘຣາ ວສ຺ສສຏ຺ຐິກເຖຣາ ວິຍ ອເຫສຸໍ. ໂສ ຈ ສພ຺ເພສມ຺ປິ ອງ຺ຄມຄຘກຸຣຸຣຏ຺ຐວາສີນໍ ສກ຺ກາຣໍ ອາທາຍ ອາຄມນທິວໂສ ອໂຫສິ. ເຕ ສກ຺ກາຣໍ ອາທາຍ ອາຄຕາ ສພ຺ເພປິ ເຕ ອິສໂຍ ປພ຺ພຊິເຕ ທິສ຺ວາ ‘‘ກິໍ ນຸ ໂຂ ອມ຺ຫາກໍ ອຄ຺ຄິທຕ຺ຕພ຺ຣາຫ຺ມໂຓ ມຫາ, ອຸທາຫຸ ສມໂຓ ໂຄຕໂມ’’ຕິ ຈິນ຺ເຕຕ຺ວາ ສມຓສ຺ສ ໂຄຕມສ຺ສ ອາຄຕຕ຺ຕາ ‘‘ອຄ຺ຄິທຕ຺ໂຕວ ມຫາ’’ຕິ ມຎ຺ຎິໍສຸ. ສຕ຺ຖາ ເຕສໍ ອຊ຺ຌາສຍໍ ໂອໂລເກຕ຺ວາ, ‘‘ອຄ຺ຄິທຕ຺ຕ, ປຣິສາຍ ກງ຺ຂໍ ຉິນ຺ທາ’’ຕິ ອາຫ. ໂສ ‘‘ອຫມ຺ປິ ເອຕ຺ຕກເມວ ປຈ຺ຈາສີສາມີ’’ຕິ ອິທ຺ຘິພເລນ ສຕ຺ຕກ຺ຂຕ຺ຕຸໍ ເວຫາສໍ ອພ຺ຠຸຄ຺ຄນ຺ຕ຺ວາ ປຸນປ຺ປຸນໍ ໂອຣຸຍ຺ຫ ສຕ຺ຖາຣໍ ວນ຺ທິຕ຺ວາ ‘‘ສຕ຺ຖາ ເມ, ຠນ຺ເຕ, ຠຄວາ, ສາວໂກຫມສ຺ມີ’’ຕິ ວຕ຺ວາ ສາວກຕ຺ຕໍ ປກາເສສີຕິ.

ອຄ຺ຄິທຕ຺ຕພ຺ຣາຫ຺ມຓວຕ຺ຖຸ ຉຏ຺ຐໍ.