໗. ເປສກາຣຘີຕາວຕ຺ຖຸ

ອນ຺ຘຠູໂຕຕິ ອິມໍ ຘມ຺ມເທສນໍ ສຕ຺ຖາ ອຄ຺ຄາຬເວ ເຈຕິເຍ ວິຫຣນ຺ໂຕ ເອກໍ ເປສກາຣຘີຕຣໍ ອາຣພ຺ຠ ກເຖສິ.

ເອກທິວສຎ຺ຫິ ອາຬວິວາສິໂນ ສຕ຺ຖຣິ ອາຬວິໍ ສມ຺ປຕ຺ເຕ ນິມນ຺ເຕຕ຺ວາ ທານໍ ອທໍສຸ. ສຕ຺ຖາ ຠຕ຺ຕກິຈ຺ຈາວສາເນ ອນຸໂມທນໍ ກໂຣນ຺ໂຕ ‘‘ອທ຺ຘຸວໍ ເມ ຊີວິຕໍ, ຘຸວໍ ເມ ມຣຓໍ, ອວສ຺ສໍ ມຍາ ມຣິຕພ຺ພເມວ, ມຣຓປຣິໂຍສານໍ ເມ ຊີວິຕໍ, ຊີວິຕເມວ ອນິຍຕໍ, ມຣຓໍ ນິຍຕນ຺ຕິ ເອວໍ ມຣຓສ຺ສຕິໍ ຠາເວຖ. ເຍສຎ຺ຫິ ມຣຓສ຺ສຕິ ອຠາວິຕາ, ເຕ ປຈ຺ຉິເມ ກາເລ ອາສີວິສໍ ທິສ຺ວາ ຠີຕອທຓ຺ຑປຸຣິໂສ ວິຍ ສນ຺ຕາສປ຺ປຕ຺ຕາ ເຠຣວຣວໍ ຣວນ຺ຕາ ກາລໍ ກໂຣນ຺ຕິ. ເຍສໍ ປນ ມຣຓສ຺ສຕິ ຠາວິຕາ, ເຕ ທູຣໂຕວ ອາສີວິສໍ ທິສ຺ວາ ທຓ຺ຑເກນ ຄເຫຕ຺ວາ ຉຑ຺ເຑຕ຺ວາ ຐິຕປຸຣິໂສ ວິຍ ປຈ຺ຉິເມ ກາເລ ນ ສນ຺ຕສນ຺ຕິ, ຕສ຺ມາ ມຣຓສ຺ສຕິ ຠາເວຕພ຺ພາ’’ຕິ ອາຫ. ຕໍ ຘມ຺ມເທສນໍ ສຸຕ຺ວາ ອວເສສຊນາ ສກິຈ຺ຈປ຺ປສຸຕາວ ອເຫສຸໍ. ເອກາ ປນ ໂສຬສວສ຺ສຸທ຺ເທສິກາ ເປສກາຣຘີຕາ ‘‘ອໂຫ ພຸທ຺ຘານໍ ກຖາ ນາມ ອຈ຺ຉຣິຍາ, ມຍາ ປນ ມຣຓສ຺ສຕິໍ ຠາເວຕຸໍ ວຏ຺ຏຕີ’’ຕິ ຣຕ຺ຕິນ຺ທິວໍ ມຣຓສ຺ສຕິເມວ ຠາເວສິ. ສຕ຺ຖາປິ ຕໂຕ ນິກ຺ຂມິຕ຺ວາ ເຊຕວນໍ ອຄມາສິ. ສາປິ ກຸມາຣິກາ ຕີຓິ ວສ຺ສານິ ມຣຓສ຺ສຕິໍ ຠາເວສິເຍວ.

ອເຖກທິວສໍ ສຕ຺ຖາ ປຈ຺ຈູສສມເຍ ໂລກໍ ໂອໂລເກນ຺ໂຕ ຕໍ ກຸມາຣິກໍ ອຕ຺ຕໂນ ຎາຓຊາລສ຺ສ ອນ຺ໂຕປວິຏ຺ຐໍ ທິສ຺ວາ ‘‘ກິໍ ນຸ ໂຂ ຠວິສ຺ສຕີ’’ຕິ ອຸປຘາເຣນ຺ໂຕ ‘‘ອິມາຍ ກຸມາຣິກາຍ ມມ ຘມ຺ມເທສນາຍ ສຸຕທິວສໂຕ ປຏ຺ຐາຍ ຕີຓິ ວສ຺ສານິ ມຣຓສ຺ສຕິ ຠາວິຕາ, ອິທານາຫໍ ຕຕ຺ຖ ຄນ຺ຕ຺ວາ ອິມໍ ກຸມາຣິກໍ ຈຕ຺ຕາໂຣ ປຎ຺ເຫ ປຸຈ຺ຉິຕ຺ວາ ຕາຍ ວິສ຺ສຊ຺ເຊນ຺ຕິຍາ ຈຕູສຸ ຐາເນສຸ ສາຘຸກາຣໍ ທຕ຺ວາ ອິມໍ ຄາຖໍ ຠາສິສ຺ສາມິ. ສາ ຄາຖາວສາເນ ໂສຕາປຕ຺ຕິຜເລ ປຕິຏ຺ຐຫິສ຺ສຕິ, ຕໍ ນິສ຺ສາຍ ມຫາຊນສ຺ສາປິ ສາຕ຺ຖິກາ ຘມ຺ມເທສນາ ຠວິສ຺ສຕີ’’ຕິ ຎຕ຺ວາ ປຎ຺ຈສຕຠິກ຺ຂຸປຣິວາໂຣ ເຊຕວນາ ນິກ຺ຂມິຕ຺ວາ ອນຸປຸພ຺ເພນ ອຄ຺ຄາຬວວິຫາຣໍ ອຄມາສິ. ອາຬວິວາສິໂນ ‘‘ສຕ຺ຖາ ອາຄໂຕ’’ຕິ ສຸຕ຺ວາ ຕໍ ວິຫາຣໍ ຄນ຺ຕ຺ວາ ນິມນ຺ຕຍິໍສຸ. ຕທາ ສາປິ ກຸມາຣິກາ ສຕ຺ຖຸ ອາຄມນໍ ສຸຕ຺ວາ ‘‘ອາຄໂຕ ກິຣ ມຍ຺ຫໍ ປິຕາ, ສາມິ, ອາຈຣິໂຍ ປຸຓ຺ຓຈນ຺ທມຸໂຂ ມຫາໂຄຕມພຸທ຺ໂຘ’’ຕິ ຕຸຏ຺ຐມານສາ ‘‘ອິໂຕ ເມ ຕິຓ຺ຓໍ ສໍວຈ຺ຉຣານໍ ມຕ຺ຖເກ ສຸວຓ຺ຓວຓ຺ໂຓ ສຕ຺ຖາ ທິຏ຺ຐປຸພ຺ໂພ, ອິທານິສ຺ສ ສຸວຓ຺ຓວຓ຺ຓໍ ສຣີຣໍ ທຏ຺ຐຸໍ ມຘຸໂຣຊຎ຺ຈ ວຣຘມ຺ມໍ ໂສຕຸໍ ລຠິສ຺ສາມີ’’ຕິ ຈິນ຺ເຕສິ. ປິຕາ ປນສ຺ສາ ສາລໍ ຄຈ຺ຉນ຺ໂຕ ອາຫ – ‘‘ອມ຺ມ, ປຣສນ຺ຕໂກ ເມ ສາຏໂກ ອາໂຣປິໂຕ, ຕສ຺ສ ວິທຕ຺ຖິມຕ຺ຕໍ ອນິຏ຺ຐິຕໍ, ຕໍ ອຊ຺ຊ ນິຏ຺ຐາເປສ຺ສາມິ, ສີຆໍ ເມ ຕສຣໍ ວຏ຺ເຏຕ຺ວາ ອາຫເຣຍ຺ຍາສີ’’ຕິ. ສາ ຈິນ຺ເຕສິ – ‘‘ອຫໍ ສຕ຺ຖຸ ຘມ຺ມໍ ໂສຕຸກາມາ, ປິຕາ ຈ ມໍ ເອວໍ ອາຫ. ກິໍ ນຸ ໂຂ ສຕ຺ຖຸ ຘມ຺ມໍ ສຸຓາມິ, ອຸທາຫຸ ປິຕຸ ຕສຣໍ ວຏ຺ເຏຕ຺ວາ ຫຣາມີ’’ຕິ? ອຖສ຺ສາ ເອຕທໂຫສິ ‘‘ປິຕາ ມໍ ຕສເຣ ອນາຫຣິຍມາເນ ໂປເຖຍ຺ຍປິ ປຫເຣຍ຺ຍປິ, ຕສ຺ມາ ຕສຣໍ ວຏ຺ເຏຕ຺ວາ ຕສ຺ສ ທຕ຺ວາ ປຈ຺ຉາ ຘມ຺ມໍ ໂສສ຺ສາມີ’’ຕິ ປີຐເກ ນິສີທິຕ຺ວາ ຕສຣໍ ວຏ຺ເຏສິ.

ອາຬວິວາສິໂນປິ ສຕ຺ຖາຣໍ ປຣິວິສິຕ຺ວາ ປຕ຺ຕໍ ຄເຫຕ຺ວາ ອນຸໂມທນຕ຺ຖາຍ ອຏ຺ຐໍສຸ. ສຕ຺ຖາ ‘‘ຍມຫໍ ກຸລຘີຕຣໍ ນິສ຺ສາຍ ຕິໍສໂຍຊນມຄ຺ຄໍ ອາຄໂຕ, ສາ ອຊ຺ຊາປິ ໂອກາສໍ ນ ລຠຕິ. ຕາຍ ໂອກາເສ ລທ຺ເຘ ອນຸໂມທນໍ ກຣິສ຺ສາມີ’’ຕິ ຕຸຓ຺ຫີຠູໂຕ ອໂຫສິ. ເອວໍ ຕຸຓ຺ຫີຠູຕມ຺ປິ ສຕ຺ຖາຣໍ ສເທວເກ ໂລເກ ໂກຈິ ກິຎ຺ຈິ ວຕ຺ຕຸໍ ນ ວິສຫຕິ. ສາປິ ໂຂ ກຸມາຣິກາ ຕສຣໍ ວຏ຺ເຏຕ຺ວາ ປຈ຺ຉິຍໍ ຐເປຕ຺ວາ ປິຕຸ ສນ຺ຕິກໍ ຄຈ຺ຉມານາ ປຣິສປຣິຍນ຺ເຕ ຐຕ຺ວາ ສຕ຺ຖາຣໍ ໂອໂລກຍມານາວ ອຏ຺ຐາສິ. ສຕ຺ຖາປິ ຄີວໍ ອຸກ຺ຂິປິຕ຺ວາ ຕໍ ໂອໂລເກສິ. ສາ ໂອໂລກິຕາກາເຣເນວ ອຎ຺ຎາສິ – ‘‘ສຕ຺ຖາ ເອວຣູປາຍ ປຣິສາຍ ມຊ຺ເຌ ນິສີທິຕ຺ວາວ ມໍ ໂອໂລເກນ຺ໂຕ ມມາຄມນໍ ປຈ຺ຈາສີສຕິ, ອຕ຺ຕໂນ ສນ຺ຕິກໍ ອາຄມນເມວ ປຈ຺ຈາສີສຕີ’’ຕິ. ສາ ຕສຣປຈ຺ຉິໍ ຐເປຕ຺ວາ ສຕ຺ຖຸ ສນ຺ຕິກໍ ອຄມາສິ. ກສ຺ມາ ປນ ນໍ ສຕ຺ຖາ ໂອໂລເກສີຕິ? ເອວໍ ກິຣສ຺ສ ອໂຫສິ ‘‘ເອສາ ເອຕ຺ໂຕວ ຄຈ຺ຉມານາ ປຸຖຸຊ຺ຊນກາລກິຣິຍໍ ກຕ຺ວາ ອນິຍຕຄຕິກາ ຠວິສ຺ສຕິ, ມມ ສນ຺ຕິກໍ ອາຄນ຺ຕ຺ວາ ຄຈ຺ຉມານາ ໂສຕາປຕ຺ຕິຜລໍ ປຕ຺ວາ ນິຍຕຄຕິກາ ຫຸຕ຺ວາ ຕຸສິຕວິມາເນ ນິພ຺ພຕ຺ຕິສ຺ສຕີ’’ຕິ. ຕສ຺ສາ ກິຣ ຕໍ ທິວສໍ ມຣຓໂຕ ມຸຕ຺ຕິ ນາມ ນຕ຺ຖິ. ສາ ໂອໂລກິຕສຎ຺ຎາເຓເນວ ສຕ຺ຖາຣໍ ອຸປສງ຺ກມິຕ຺ວາ ຉພ຺ພຓ຺ຓຣໍສີນໍ ອນ຺ຕຣໍ ປວິສິຕ຺ວາ ວນ຺ທິຕ຺ວາ ເອກມນ຺ຕໍ ອຏ຺ຐາສິ. ຕຖາຣູປາຍ ປຣິສາຍ ມຊ຺ເຌ ນິສີທິຕ຺ວາ ຕຸຓ຺ຫີຠູຕໍ ສຕ຺ຖາຣໍ ວນ຺ທິຕ຺ວາ ຐິຕກ຺ຂເຓເຍວ ຕໍ ອາຫ – ‘‘ກຸມາຣິເກ, ກຸໂຕ ອາຄຈ຺ຉສີ’’ຕິ? ‘‘ນ ຊານາມິ, ຠນ຺ເຕ’’ຕິ. ‘‘ກຕ຺ຖ ຄມິສ຺ສສີ’’ຕິ? ‘‘ນ ຊານາມິ, ຠນ຺ເຕ’’ຕິ. ‘‘ນ ຊານາສີ’’ຕິ? ‘‘ຊານາມິ, ຠນ຺ເຕ’’ຕິ. ‘‘ຊານາສີ’’ຕິ? ‘‘ນ ຊານາມິ, ຠນ຺ເຕ’’ຕິ. ອິຕິ ນໍ ສຕ຺ຖາ ຈຕ຺ຕາໂຣ ປຎ຺ເຫ ປຸຈ຺ຉິ. ມຫາຊໂນ ອຸຊ຺ຌາຍິ – ‘‘ອມ຺ໂຠ, ປສ຺ສຖ, ອຍໍ ເປສກາຣຘີຕາ ສມ຺ມາສມ຺ພຸທ຺ເຘນ ສທ຺ຘິໍ ອິຈ຺ຉິຕິຈ຺ຉິຕໍ ກເຖສິ, ນນຸ ນາມ ອິມາຍ ‘ກຸໂຕ ອາຄຈ຺ຉສີ’ຕິ ວຸຕ຺ເຕ ‘ເປສກາຣເຄຫໂຕ’ຕິ ວຕ຺ຕພ຺ພໍ. ‘ກຫໍ ຄຈ຺ຉສີ’ຕິ ວຸຕ຺ເຕ ‘ເປສກາຣສາລ’ນ຺ຕິ ວຕ຺ຕພ຺ພໍ ສິຍາ’’ຕິ.

ສຕ຺ຖາ ມຫາຊນໍ ນິສ຺ສທ຺ທໍ ກຕ຺ວາ, ‘‘ກຸມາຣິເກ, ຕ຺ວໍ ກຸໂຕ ອາຄຈ຺ຉສີ’’ຕິ ວຸຕ຺ເຕ ‘‘ກສ຺ມາ ນ ຊານາມີຕິ ວເທສີ’’ຕິ ປຸຈ຺ຉິ. ຠນ຺ເຕ, ຕຸມ຺ເຫ ມມ ເປສກາຣເຄຫໂຕ ອາຄຕຠາວໍ ຊານາຖ, ‘‘ກຸໂຕ ອາຄຕາສີ’’ຕິ ປຸຈ຺ຉນ຺ຕາ ປນ ‘‘ກຸໂຕ ອາຄນ຺ຕ຺ວາ ອິຘ ນິພ຺ພຕ຺ຕາສີ’’ຕິ ປຸຈ຺ຉຖ. ອຫໍ ປນ ນ ຊານາມິ ‘‘ກຸໂຕ ຈ ອາຄນ຺ຕ຺ວາ ອິຘ ນິພ຺ພຕ຺ຕາມ຺ຫີ’’ຕິ. ອຖສ຺ສາ ສຕ຺ຖາ ‘‘ສາຘຸ ສາຘຸ, ກຸມາຣິເກ, ມຍາ ປຸຈ຺ຉິຕປຎ຺ໂຫວ ຕຍາ ວິສ຺ສຊ຺ຊິໂຕ’’ຕິ ປຐມໍ ສາຘຸກາຣໍ ທຕ຺ວາ ອຸຕ຺ຕຣິມ຺ປິ ປຸຈ຺ຉິ – ‘‘ກຕ຺ຖ ຄມິສ຺ສສີຕິ ປຸນ ປຸຏ຺ຐາ ກສ຺ມາ ‘ນ ຊານາມີ’ຕິ ວເທສີ’’ຕິ? ຠນ຺ເຕ, ຕຸມ຺ເຫ ມໍ ຕສຣປຈ຺ຉິໍ ຄເຫຕ຺ວາ ເປສກາຣສາລໍ ຄຈ຺ຉນ຺ຕິໍ ຊານາຖ, ‘‘ອິໂຕ ຄນ຺ຕ຺ວາ ກຕ຺ຖ ນິພ຺ພຕ຺ຕິສ຺ສສີ’’ຕິ ປຸຈ຺ຉຖ. ອຫຎ຺ຈ ອິໂຕ ຈຸຕາ ນ ຊານາມິ ‘‘ກຕ຺ຖ ຄນ຺ຕ຺ວາ ນິພ຺ພຕ຺ຕິສ຺ສາມີ’’ຕິ. ອຖສ຺ສາ ສຕ຺ຖາ ‘‘ມຍາ ປຸຈ຺ຉິຕປຎ຺ໂຫເຍວ ຕຍາ ວິສ຺ສຊ຺ຊິໂຕ’’ຕິ ທຸຕິຍໍ ສາຘຸກາຣໍ ທຕ຺ວາ ອຸຕ຺ຕຣິມ຺ປິ ປຸຈ຺ຉິ – ‘‘ອຖ ກສ຺ມາ ‘ນ ຊານາສີ’ຕິ ປຸຏ຺ຐາ ‘ຊານາມີ’ຕິ ວເທສີ’’ຕິ? ‘‘ມຣຓຠາວໍ ຊານາມິ, ຠນ຺ເຕ, ຕສ຺ມາ ເອວໍ ວເທມີ’’ຕິ. ອຖສ຺ສາ ສຕ຺ຖາ ‘‘ມຍາ ປຸຈ຺ຉິຕປຎ຺ໂຫເຍວ ຕຍາ ວິສ຺ສຊ຺ຊິໂຕ’’ຕິ ຕຕິຍໍ ສາຘຸກາຣໍ ທຕ຺ວາ ອຸຕ຺ຕຣິມ຺ປິ ປຸຈ຺ຉິ – ‘‘ອຖ ກສ຺ມາ ‘ຊານາສີ’ຕິ ປຸຏ຺ຐາ ‘ນ ຊານາມີ’ຕິ ວເທສີ’’ຕິ. ມມ ມຣຓຠາວເມວ ອຫໍ ຊານາມິ, ຠນ຺ເຕ, ‘‘ຣຕ຺ຕິນ຺ທິວປຸພ຺ພຓ຺ຫາທີສຸ ປນ ອສຸກກາເລ ນາມ ມຣິສ຺ສາມີ’’ຕິ ນ ຊານາມິ, ຕສ຺ມາ ເອວໍ ວເທມີຕິ. ອຖສ຺ສາ ສຕ຺ຖາ ‘‘ມຍາ ປຸຈ຺ຉິຕປຎ຺ໂຫເຍວ ຕຍາ ວິສ຺ສຊ຺ຊິໂຕ’’ຕິ ຈຕຸຕ຺ຖໍ ສາຘຸກາຣໍ ທຕ຺ວາ ປຣິສໍ ອາມນ຺ເຕຕ຺ວາ ‘‘ເອຕ຺ຕກໍ ນາມ ຕຸມ຺ເຫ ອິມາຍ ກຖິຕໍ ນ ຊານາຖ, ເກວລໍ ອຸຊ຺ຌາຍເຖວ. ເຍສຎ຺ຫິ ປຎ຺ຎາຈກ຺ຂຸ ນຕ຺ຖິ, ເຕ ອນ຺ຘາ ເອວ. ເຍສໍ ປຎ຺ຎາຈກ຺ຂຸ ອຕ຺ຖິ, ເຕ ເອວ ຈກ຺ຂຸມນ຺ໂຕ’’ຕິ ວຕ຺ວາ ອິມໍ ຄາຖມາຫ –

໑໗໔. ‘‘ອນ຺ຘຠູໂຕ ອຍໍ ໂລໂກ, ຕນຸເກຕ຺ຖ ວິປສ຺ສຕິ;

ສກຸໂຓ ຊາລມຸຕ຺ໂຕວ, ອປ຺ໂປ ສຄ຺ຄາຍ ຄຈ຺ຉຕີ’’ຕິ.

ຕຕ຺ຖ ອນ຺ຘຠູໂຕ ອຍໍ ໂລໂກຕິ ອຍໍ ໂລກິຍມຫາຊໂນ ປຎ຺ຎາຈກ຺ຂຸໂນ ອຠາເວນ ອນ຺ຘຠູໂຕ. ຕນຸເກຕ຺ຖາຕິ ຕນຸໂກ ເອຕ຺ຖ, ນ ພຫຸ ຊໂນ ອນິຈ຺ຈາທິວເສນ ວິປສ຺ສຕິ. ຊາລມຸຕ຺ໂຕວາຕິ ຍຖາ ເຉເກນ ສາກຸຓິເກນ ຊາເລນ ໂອຕ຺ຖຣິຕ຺ວາ ຄຍ຺ຫມາເນສຸ ວຏ຺ຏເກສຸ ໂກຈິເທວ ຊາລໂຕ ມຸຈ຺ຈຕິ. ເສສາ ອນ຺ໂຕຊາລເມວ ປວິສນ຺ຕິ. ຕຖາ ມຣຓຊາເລນ ໂອຕ຺ຖເຏສຸ ສຕ຺ເຕສຸ ພຫູ ອປາຍຄາມິໂນ ໂຫນ຺ຕິ, ອປ຺ໂປ ໂກຈິເທວ ສຕ຺ໂຕ ສຄ຺ຄາຍ ຄຈ຺ຉຕິ, ສຸຄຕິໍ ວາ ນິພ຺ພານໍ ວາ ປາປຸຓາຕີຕິ ອຕ຺ໂຖ.

ເທສນາວສາເນ ກຸມາຣິກາ ໂສຕາປຕ຺ຕິຜເລ ປຕິຏ຺ຐຫິ, ມຫາຊນສ຺ສາປິ ສາຕ຺ຖິກາ ຘມ຺ມເທສນາ ອໂຫສີຕິ.

ສາປິ ຕສຣປຈ຺ຉິໍ ຄເຫຕ຺ວາ ປິຕຸ ສນ຺ຕິກໍ ອຄມາສິ, ໂສປິ ນິສິນ຺ນໂກວ ນິທ຺ທາຍິ. ຕສ຺ສາ ອສລ຺ລກ຺ເຂຕ຺ວາວ ຕສຣປຈ຺ຉິໍ ອຸປນາເມນ຺ຕິຍາ ຕສຣປຈ຺ຉິ ເວມໂກຏິຍໍ ປຏິຫຎ຺ຎິຕ຺ວາ ສທ຺ທໍ ກຸຣຸມານາ ປຕິ. ໂສ ປພຸຊ຺ຌິຕ຺ວາ ຄຫິຕນິມິຕ຺ເຕເນວ ເວມໂກຏິໍ ອາກຑ຺ຒິ. ເວມໂກຏິ ຄນ຺ຕ຺ວາ ຕໍ ກຸມາຣິກໍ ອຸເຣ ປຫຣິ, ສາ ຕຕ຺ເຖວ ກາລໍ ກຕ຺ວາ ຕຸສິຕຠວເນ ນິພ຺ພຕ຺ຕິ. ອຖສ຺ສາ ປິຕາ ຕໍ ໂອໂລເກນ຺ໂຕ ສກລສຣີເຣນ ໂລຫິຕມກ຺ຂິເຕນ ປຕິຕ຺ວາ ມຕໍ ອທ຺ທສ. ອຖສ຺ສ ມຫາໂສໂກ ອຸປ຺ປຊ຺ຊິ. ໂສ ‘‘ນ ມມ ໂສກໍ ອຎ຺ໂຎ ນິພ຺ພາເປຕຸໍ ສກ຺ຂິສ຺ສຕີ’’ຕິ ໂຣທນ຺ໂຕ ສຕ຺ຖຸ ສນ຺ຕິກໍ ຄນ຺ຕ຺ວາ ຕມຕ຺ຖໍ ອາໂຣເຈຕ຺ວາ, ‘‘ຠນ຺ເຕ, ໂສກໍ ເມ ນິພ຺ພາເປຖາ’’ຕິ ອາຫ. ສຕ຺ຖາ ຕໍ ສມສ຺ສາເສຕ຺ວາ ‘‘ມາ ໂສຈິ, ອຸປາສກ. ອນມຕຄ຺ຄສ຺ມິຎ຺ຫິ ສໍສາເຣ ຕວ ເອວເມວ ຘີຕຸ ມຣຓກາເລ ປຄ຺ຆຣິຕອສ຺ສຸ ຈຕຸນ຺ນໍ ມຫາສມຸທ຺ທານໍ ອຸທກໂຕ ອຕິເຣກຕຣ’’ນ຺ຕິ ວຕ຺ວາ ອນມຕຄ຺ຄກຖໍ ກເຖສິ. ໂສ ຕນຸຠູຕໂສໂກ ສຕ຺ຖາຣໍ ປພ຺ພຊ຺ຊໍ ຍາຈິຕ຺ວາ ລທ຺ຘູປສມ຺ປໂທ ນ ຈິຣສ຺ເສວ ອຣຫຕ຺ຕໍ ປາປຸຓີຕິ.

ເປສກາຣຘີຕາວຕ຺ຖຸ ສຕ຺ຕມໍ.