໕. ມຫາກາລອຸປາສກວຕ຺ຖຸ

ອຕ຺ຕນາ ຫິ ກຕໍ ປາປນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກໍ ມຫາກາລໍ ນາມ ໂສຕາປນ຺ນອຸປາສກໍ ອາຣພ຺ຠ ກເຖສິ.

ໂສ ກິຣ ມາສສ຺ສ ອຏ຺ຐທິວເສສຸ ອຸໂປສຖິໂກ ຫຸຕ຺ວາ ວິຫາເຣ ສພ຺ພຣຕ຺ຕິໍ ຘມ຺ມກຖໍ ສຸຓາຕິ. ອຖ ຣຕ຺ຕິໍ ໂຈຣາ ເອກສ຺ມິໍ ເຄເຫ ສນ຺ຘິໍ ຉິນ຺ທິຕ຺ວາ ຠຓ຺ຑກໍ ຄເຫຕ຺ວາ ໂລຫຠາຊນສທ຺ເທນ ປພຸທ຺ເຘຫິ ສາມິເກຫິ ອນຸພທ຺ຘາ ຄຫິຕຠຓ຺ຑໍ ຉຑ຺ເຑຕ຺ວາ ປລາຍິໍສຸ. ສາມິກາປິ ເຕ ອນຸພນ຺ຘິໍສຸເຍວ, ເຕ ທິສາ ປກ຺ຂນ຺ທິໍສຸ. ເອໂກ ປນ ວິຫາຣມຄ຺ຄໍ ຄເຫຕ຺ວາ ມຫາກາລສ຺ສ ຣຕ຺ຕິໍ ຘມ຺ມກຖໍ ສຸຕ຺ວາ ປາໂຕວ ໂປກ຺ຂຣຓິຕີເຣ ມຸຂໍ ໂຘວນ຺ຕສ຺ສ ປຸຣໂຕ ຠຓ຺ຑິກໍ ຉຑ຺ເຑຕ຺ວາ ປລາຍິ. ໂຈເຣ ອນຸພນ຺ຘິຕ຺ວາ ອາຄຕມນຸສ຺ສາ ຠຓ຺ຑິກໍ ທິສ຺ວາ ‘‘ຕ຺ວໍ ໂນ ເຄຫສນ຺ຘິໍ ຉິນ຺ທິຕ຺ວາ ຠຓ຺ຑິກໍ ຫຣິຕ຺ວາ ຘມ຺ມໍ ສຸຓນ຺ໂຕ ວິຍ ວິຈຣສີ’’ຕິ ຕໍ ຄເຫຕ຺ວາ ໂປເຖຕ຺ວາ ມາເຣຕ຺ວາ ຉຑ຺ເຑຕ຺ວາ ອຄມິໍສຸ. ອຖ ນໍ ປາໂຕວ ປານີຍຆຏໍ ອາທາຍ ຄຕາ ທຫຣສາມເຓຣາ ທິສ຺ວາ ‘‘ວິຫາເຣ ຘມ຺ມກຖໍ ສຸຕ຺ວາ ສຍິຕອຸປາສໂກ ອຍຸຕ຺ຕໍ ມຣຓໍ ລຠຕີ’’ຕິ ວຕ຺ວາ ສຕ຺ຖຸ ອາໂຣເຈສຸໍ. ສຕ຺ຖາ ‘‘ອາມ, ຠິກ຺ຂເວ, ອິມສ຺ມິໍ ອຕ຺ຕຠາເວ ກາເລນ ອປ຺ປຕິຣູປໍ ມຣຓໍ ລທ຺ຘໍ, ປຸພ຺ເພ ກຕກມ຺ມສ຺ສ ປນ ເຕນ ຍຸຕ຺ຕເມວ ລທ຺ຘ’’ນ຺ຕິ ວຕ຺ວາ ເຕຫິ ຍາຈິໂຕ ຕສ຺ສ ປຸພ຺ພກມ຺ມໍ ກເຖສິ –

ອຕີເຕ ກິຣ ພາຣາຓສິຣຎ຺ໂຎ ວິຊິເຕ ເອກສ຺ສ ປຈ຺ຈນ຺ຕຄາມສ຺ສ ອຏວິມຸເຂ ໂຈຣາ ປຫຣນ຺ຕິ. ຣາຊາ ອຏວິມຸເຂ ເອກໍ ຣາຊຠຏໍ ຐເປສິ, ໂສ ຠຕິໍ ຄເຫຕ຺ວາ ມນຸສ຺ເສ ໂອຣໂຕ ປາຣໍ ເນຕິ, ປາຣໂຕ ໂອຣໍ ອາເນຕິ. ອເຖໂກ ມນຸສ຺ໂສ ອຠິຣູປໍ ອຕ຺ຕໂນ ຠຣິຍໍ ຈູຬຍານກໍ ອາໂຣເປຕ຺ວາ ຕໍ ຐານໍ ອຄມາສິ. ຣາຊຠໂຏ ຕໍ ອິຕ຺ຖິໍ ທິສ຺ວາວ ສຎ຺ຊາຕສິເນໂຫ ເຕນ ‘‘ອຏວິໍ ໂນ, ສາມິ, ອຕິກ຺ກາເມຫີ’’ຕິ ວຸຕ຺ເຕປິ ‘‘ອິທານິ ວິກາໂລ, ປາໂຕວ ອຕິກ຺ກາເມສ຺ສາມີ’’ຕິ ອາຫ. ໂສ ສກາໂລ, ສາມິ, ອິທາເນວ ໂນ ເນຫີຕິ. ນິວຕ຺ຕ, ໂຠ, ອມ຺ຫາກໍເຍວ ເຄເຫ ອາຫາໂຣ ຈ ນິວາໂສ ຈ ຠວິສ຺ສຕີຕິ. ໂສ ເນວ ນິວຕ຺ຕິຕຸໍ ອິຈ຺ຉິ. ອິຕໂຣ ປຸຣິສານໍ ສຎ຺ຎໍ ທຕ຺ວາ ຍານກໍ ນິວຕ຺ຕາເປຕ຺ວາ ອນິຈ຺ຉນ຺ຕສ຺ເສວ ທ຺ວາຣໂກຏ຺ຐເກ ນິວາສໍ ທຕ຺ວາ ອາຫາຣໍ ປຏິຍາທາເປສິ. ຕສ຺ສ ປນ ເຄເຫ ເອກໍ ມຓິຣຕນໍ ອຕ຺ຖິ. ໂສ ຕໍ ຕສ຺ສ ຍານກນ຺ຕເຣ ປກ຺ຂິປາເປຕ຺ວາ ປຈ຺ຈູສກາເລ ໂຈຣານໍ ປວິຏ຺ຐສທ຺ທໍ ກາເຣສິ. ອຖສ຺ສ ປຸຣິສາ ‘‘ມຓິຣຕນໍ, ສາມິ, ໂຈເຣຫິ ຫຏ’’ນ຺ຕິ ອາໂຣເຈສຸໍ. ໂສ ຄາມທ຺ວາເຣສຸ ອາຣກ຺ຂໍ ຐເປຕ຺ວາ ‘‘ອນ຺ໂຕຄາມໂຕ ນິກ຺ຂມນ຺ເຕ ວິຈິນຖາ’’ຕິ ອາຫ. ອິຕໂຣປິ ປາໂຕວ ຍານກໍ ໂຍເຊຕ຺ວາ ປາຍາສິ. ອຖສ຺ສ ຍານກໍ ໂສເຘນ຺ຕາ ອຕ຺ຕນາ ຐປິຕໍ ມຓິຣຕນໍ ທິສ຺ວາ ສນ຺ຕຊ຺ເຊຕ຺ວາ ‘‘ຕ຺ວໍ ມຓິໍ ຄເຫຕ຺ວາ ປລາຍສີ’’ຕິ ໂປເຖຕ຺ວາ ‘‘ຄຫິໂຕ ໂນ, ສາມິ, ໂຈໂຣ’’ຕິ ຄາມໂຠຊກສ຺ສ ທສ຺ເສສຸໍ. ໂສ ‘‘ຠຕກສ຺ສ ວຕ ເມ ເຄເຫ ນິວາສໍ ທຕ຺ວາ ຠຕ຺ຕໍ ທິນ຺ນໍ, ມຓິໍ ຄເຫຕ຺ວາ ຄໂຕ, ຄຓ຺ຫຖ ນໍ ປາປປຸຣິສ’’ນ຺ຕິ ໂປຖາເປຕ຺ວາ ມາເຣຕ຺ວາ ຉຑ຺ຑາເປສິ. ອິທໍ ຕສ຺ສ ປຸພ຺ພກມ຺ມໍ. ໂສ ຕໂຕ ຈຸໂຕ ອວີຈິມ຺ຫິ ນິພ຺ພຕ຺ຕິຕ຺ວາ ຕຕ຺ຖ ທີຆຣຕ຺ຕໍ ປຈ຺ຈິຕ຺ວາ ວິປາກາວເສເສນ ອຕ຺ຕຠາວສເຕ ຕເຖວ ໂປຖິໂຕ ມຣຓໍ ປາປຸຓິ.

ເອວໍ ສຕ຺ຖາ ມຫາກາລສ຺ສ ປຸພ຺ພກມ຺ມໍ ທສ຺ເສຕ຺ວາ, ‘‘ຠິກ຺ຂເວ, ເອວໍ ອິເມ ສຕ຺ເຕ ອຕ຺ຕນາ ກຕປາປກມ຺ມເມວ ຈຕູສຸ ອປາເຍສຸ ອຠິມຕ຺ຖຕີ’’ຕິ ວຕ຺ວາ ອິມໍ ຄາຖມາຫ –

໑໖໑. ‘‘ອຕ຺ຕນາ ຫິ ກຕໍ ປາປໍ, ອຕ຺ຕຊໍ ອຕ຺ຕສມ຺ຠວໍ;

ອຠິມຕ຺ຖຕິ ທຸມ຺ເມຘໍ, ວຊິຣໍວສ຺ມມຍໍ ມຓິ’’ນ຺ຕິ.

ຕຕ຺ຖ ວຊິຣໍວສ຺ມມຍໍ ມຓິນ຺ຕິ ວຊິຣໍວ ອສ຺ມມຍໍ ມຓິໍ. ອິທໍ ວຸຕ຺ຕໍ ໂຫຕິ – ຍຖາ ປາສາຓມຍໍ ປາສາຓສມ຺ຠວໍ ວຊິຣໍ ຕເມວ ອສ຺ມມຍໍ ມຓິໍ ອຕ຺ຕໂນ ອຸຏ຺ຐານຏ຺ຐານສງ຺ຂາຕໍ ປາສາຓມຓິໍ ຂາທິຕ຺ວາ ຉິທ຺ທໍ ຉິທ຺ທໍ ຂຓ຺ຑໍ ຂຓ຺ຑໍ ກຕ຺ວາ ອປຣິໂຠຄໍ ກໂຣຕິ, ເອວເມວ ອຕ຺ຕນາ ກຕໍ ອຕ຺ຕນິ ຊາຕໍ ອຕ຺ຕສມ຺ຠວໍ ປາປໍ ທຸມ຺ເມຘໍ ນິປ຺ປຎ຺ຎໍ ປຸຄ຺ຄລໍ ຈຕູສຸ ອປາເຍສຸ ອຠິມຕ຺ຖຕິ ກນ຺ຕຕິ ວິທ຺ຘໍເສຕີຕິ.

ເທສນາວສາເນ ສມ຺ປຕ຺ຕຠິກ຺ຂູ ໂສຕາປຕ຺ຕິຜລາທີນິ ປາປຸຓິໍສູຕິ.

ມຫາກາລອຸປາສກວຕ຺ຖຸ ປຎ຺ຈມໍ.