໓. ສພ຺ພຫຸລກຸມາຣກວຕ຺ຖຸ

ສຸຂກາມານິ ຠູຕານີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສມ຺ພຫຸເລ ກຸມາຣເກ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ສຕ຺ຖາ ສາວຕ຺ຖິຍໍ ປິຓ຺ຑາຍ ປວິສນ຺ໂຕ ອນ຺ຕຣາມຄ຺ເຄ ສມ຺ພຫຸເລ ກຸມາຣເກ ເອກໍ ຆຣສປ຺ປຊາຕິກໍ ອຫິໍ ທຓ຺ຑເກນ ປຫຣນ຺ເຕ ທິສ຺ວາ ‘‘ກຸມາຣກາ ກິໍ ກໂຣຖາ’’ຕິ ປຸຈ຺ຉິຕ຺ວາ ‘‘ອຫິໍ, ຠນ຺ເຕ, ທຓ຺ຑເກນ ປຫຣາມາ’’ຕິ ວຸຕ຺ເຕ ‘‘ກິໍ ກາຣຓາ’’ຕິ ປຸນ ປຸຈ຺ຉິຕ຺ວາ ‘‘ຑໍສນຠເຍນ, ຠນ຺ເຕ’’ຕິ ວຸຕ຺ເຕ ‘‘ຕຸມ຺ເຫ ‘ອຕ຺ຕໂນ ສຸຂໍ ກຣິສ຺ສາມາ’ຕິ ອິມໍ ປຫຣນ຺ຕາ ນິພ຺ພຕ຺ຕນິພ຺ພຕ຺ຕຏ຺ຐາເນ ສຸຂລາຠິໂນ ນ ຠວິສ຺ສຖ. ອຕ຺ຕໂນ ສຸຂໍ ປຕ຺ເຖນ຺ເຕນ ຫິ ປຣໍ ປຫຣິຕຸໍ ນ ວຏ຺ຏຕີ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໑໓໑. ‘‘ສຸຂກາມານິ ຠູຕານິ, ໂຍ ທຓ຺ເຑນ ວິຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ນ ລຠເຕ ສຸຂໍ.

໑໓໒. ‘‘ສຸຂກາມານິ ຠູຕານິ, ໂຍ ທຓ຺ເຑນ ນ ຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ລຠເຕ ສຸຂ’’ນ຺ຕິ.

ຕຕ຺ຖ ໂຍ ທຓ຺ເຑນາຕິ ໂຍ ປຸຄ຺ຄໂລ ທຓ຺ເຑນ ວາ ເລຑ຺ຑຸອາທີຫິ ວາ ວິເຫເຐຕິ. ເປຈ຺ຈ ໂສ ນ ລຠເຕ ສຸຂນ຺ຕິ ໂສ ປຸຄ຺ຄໂລ ປຣໂລເກ ມນຸສ຺ສສຸຂໍ ວາ ທິພ຺ພສຸຂໍ ວາ ປຣມຕ຺ຖຠູຕໍ ວາ ນິພ຺ພານສຸຂໍ ນ ລຠຕິ. ທຸຕິຍຄາຖາຍ ເປຈ຺ຈ ໂສ ລຠເຕຕິ ໂສ ປຸຄ຺ຄໂລ ປຣໂລເກ ວຸຕ຺ຕປ຺ປກາຣໍ ຕິວິຘມ຺ປິ ສຸຂໍ ລຠຕີຕິ ອຕ຺ໂຖ.

ເທສນາວສາເນ ປຎ຺ຈສຕາປິ ເຕ ກຸມາຣກາ ໂສຕາປຕ຺ຕິຜເລ ປຕິຏ຺ຐຫິໍສູຕິ.

ສມ຺ພຫຸລກຸມາຣກວຕ຺ຖຸ ຕຕິຍໍ.