໑. ຉພ຺ພຄ຺ຄິຍຠິກ຺ຂຸວຕ຺ຖຸ

ສພ຺ເພ ຕສນ຺ຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ສຕ຺ຕຣສວຄ຺ຄິເຍຫິ ເສນາສເນ ປຏິຊຄ຺ຄິເຕ ຉພ຺ພຄ຺ຄິຍາ ຠິກ຺ຂູ ‘‘ນິກ຺ຂມຖ, ມຍໍ ມຫລ຺ລກຕຣາ, ອມ຺ຫາກໍ ເອຕໍ ປາປຸຓາຕີ’’ຕິ ວຕ຺ວາ ເຕຫິ ‘‘ນ ມຍໍ ທສ຺ສາມ, ອມ຺ເຫຫິ ປຐມໍ ປຏິຊຄ຺ຄິຕ’’ນ຺ຕິ ວຸຕ຺ເຕ ເຕ ຠິກ຺ຂູ ປຫຣິໍສຸ. ສຕ຺ຕຣສວຄ຺ຄິຍາ ມຣຓຠຍຕຊ຺ຊິຕາ ມຫາວິຣວໍ ວິຣວິໍສຸ. ສຕ຺ຖາ ເຕສໍ ສທ຺ທໍ ສຸຕ຺ວາ ‘‘ກິໍ ອິທ’’ນ຺ຕິ ປຸຈ຺ຉິຕ຺ວາ ‘‘ອິທໍ ນາມາ’’ຕິ ອາໂຣຈິເຕ ‘‘ນ, ຠິກ຺ຂເວ, ອິໂຕ ປຏ຺ຐາຍ ຠິກ຺ຂຸນາ ນາມ ເອວໍ ກຕ຺ຕພ຺ພໍ, ໂຍ ກໂຣຕິ, ໂສ ອິມໍ ນາມ ອາປຕ຺ຕິໍ ອາປຊ຺ຊຕີ’’ຕິ ປຫາຣທານສິກ຺ຂາປທໍ (ປາຈິ. ໔໔໙ ອາທໂຍ) ປຎ຺ຎາເປຕ຺ວາ, ‘‘ຠິກ຺ຂເວ, ຠິກ຺ຂຸນາ ນາມ ‘ຍຖາ ອຫໍ, ຕເຖວ ອຎ຺ເຎປິ ທຓ຺ຑສ຺ສ ຕສນ຺ຕິ, ມຈ຺ຈຸໂນ ຠາຍນ຺ຕີ’ຕິ ຎຕ຺ວາ ປໂຣ ນ ປຫຣິຕພ຺ໂພ, ນ ຆາເຕຕພ຺ໂພ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໙. ‘‘ສພ຺ເພ ຕສນ຺ຕິ ທຓ຺ຑສ຺ສ, ສພ຺ເພ ຠາຍນ຺ຕິ ມຈ຺ຈຸໂນ;

ອຕ຺ຕານໍ ອຸປມໍ ກຕ຺ວາ, ນ ຫເນຍ຺ຍ ນ ຆາຕເຍ’’ຕິ.

ຕຕ຺ຖ ສພ຺ເພ ຕສນ຺ຕີຕິ ສພ຺ເພປິ ສຕ຺ຕາ ອຕ຺ຕນິ ທຓ຺ເຑ ປຕນ຺ເຕ ຕສ຺ສ ທຓ຺ຑສ຺ສ ຕສນ຺ຕິ. ມຈ຺ຈຸໂນຕິ ມຣຓສ຺ສາປິ ຠາຍນ຺ຕິເຍວ. ອິມິສ຺ສາ ຈ ເທສນາຍ ພ຺ຍຎ຺ຊນໍ ນິຣວເສສໍ, ອຕ຺ໂຖ ປນ ສາວເສໂສ. ຍຖາ ຫິ ຣຎ຺ຎາ ‘‘ສພ຺ເພ ສນ຺ນິປຕນ຺ຕູ’’ຕິ ເຠຣິຍາ ຈຣາປິຕາຍປິ ຣາຊມຫາມຕ຺ເຕ ຐເປຕ຺ວາ ເສສາ ສນ຺ນິປຕນ຺ຕິ, ເອວມິຘ ‘‘ສພ຺ເພ ຕສນ຺ຕີ’’ຕິ ວຸຕ຺ເຕປິ ຫຕ຺ຖາຊາເນຍ຺ໂຍ ອສ຺ສາຊາເນຍ຺ໂຍ ອຸສຠາຊາເນຍ຺ໂຍ ຂີຓາສໂວຕິ ອິເມ ຈຕ຺ຕາໂຣ ຐເປຕ຺ວາ ອວເສສາວ ຕສນ຺ຕີຕິ ເວທິຕພ຺ພາ. ອິເມສຸ ຫິ ຂີຓາສໂວ ສກ຺ກາຍທິຏ຺ຐິຍາ ປຫີນຕ຺ຕາ ມຣຓກສຕ຺ຕໍ ອປສ຺ສນ຺ໂຕ ນ ຠາຍຕິ, ອິຕເຣ ຕໂຍ ສກ຺ກາຍທິຏ຺ຐິຍາ ພລວຕ຺ຕາ ອຕ຺ຕໂນ ປຏິປກ຺ຂຠູຕໍ ສຕ຺ຕໍ ອປສ຺ສນ຺ຕາ ນ ຠາຍນ຺ຕີຕິ. ນ ຫເນຍ຺ຍ ນ ຆາຕເຍຕິ ຍຖາ ອຫໍ, ເອວໍ ອຎ຺ເຎປິ ສຕ຺ຕາຕິ ເນວ ປຣໍ ປຫເຣຍ຺ຍ ນ ປຫຣາເປຍ຺ຍາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ຉພ຺ພຄ຺ຄິຍຠິກ຺ຂຸວຕ຺ຖຸ ປຐມໍ.