໑໔. ພຫຸປຸຕ຺ຕິກຕ຺ເຖຣີວຕ຺ຖຸ

ໂຍ ຈ ວສ຺ສສຕໍ ຊີເວຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ພຫຸປຸຕ຺ຕິກໍ ເຖຣິໍ ອາຣພ຺ຠ ກເຖສິ.

ສາວຕ຺ຖິຍໍ ກິເຣກສ຺ມິໍ ກຸເລ ສຕ຺ຕ ປຸຕ຺ຕາ ສຕ຺ຕ ຈ ຘີຕໂຣ ອເຫສຸໍ. ເຕ ສພ຺ເພປິ ວຍປ຺ປຕ຺ຕາ ເຄເຫ ປຕິຏ຺ຐຫິຕ຺ວາ ອຕ຺ຕໂນ ຘມ຺ມຕາຍ ສຸຂປ຺ປຕ຺ຕາ ອເຫສຸໍ. ເຕສໍ ອປເຣນ ສມເຍນ ປິຕາ ກາລມກາສິ. ມຫາອຸປາສິກາ ສາມິເກ ນຏ຺ເຐປິ ນ ຕາວ ກຸຏຸມ຺ພໍ ວິຠຊຕິ. ອຖ ນໍ ປຸຕ຺ຕາ ອາຫໍສຸ – ‘‘ອມ຺ມ, ອມ຺ຫາກໍ ປິຕຣິ ນຏ຺ເຐ ຕຸຍ຺ຫໍ ໂກ ອຕ຺ໂຖ ກຸຏຸມ຺ເພນ, ກິໍ ມຍໍ ຕໍ ອຸປຏ຺ຐາຕຸໍ ນ ສກ຺ໂກມາ’’ຕິ. ສາ ເຕສໍ ກຖໍ ສຸຕ຺ວາ ຕຸຓ຺ຫີ ຫຸຕ຺ວາ ປຸນປ຺ປຸນໍ ເຕຫິ ວຸຈ຺ຈມານາ ‘‘ປຸຕ຺ຕາ ມໍ ປຏິຊຄ຺ຄິສ຺ສນ຺ຕິ, ກິໍ ເມ ວິສຸໍ ກຸຏຸມ຺ເພນາ’’ຕິ ສພ຺ພໍ ສາປເຕຍ຺ຍໍ ມຊ຺ເຌ ຠິນ຺ທິຕ຺ວາ ອທາສິ. ອຖ ນໍ ກຕິປາຫຈ຺ຈເຍນ ເຊຏ຺ຐປຸຕ຺ຕສ຺ສ ຠຣິຍາ ‘‘ອໂຫ ອມ຺ຫາກໍ, ອຍ຺ຍາ, ‘ເຊຏ຺ຐປຸຕ຺ໂຕ ເມ’ຕິ ທ຺ເວ ໂກຏ຺ຐາເສ ທຕ຺ວາ ວິຍ ອິມເມວ ເຄຫໍ ອາຄຈ຺ຉຕີ’’ຕິ ອາຫ. ເສສປຸຕ຺ຕານໍ ຠຣິຍາປິ ເອວເມວ ວທິໍສຸ. ເຊຏ຺ຐຘີຕຣໍ ອາທິໍ ກຕ຺ວາ ຕາສໍ ເຄຫໍ ຄຕກາເລປິ ນໍ ເອວເມວ ວທິໍສຸ. ສາ ອວມານປ຺ປຕ຺ຕາ ຫຸຕ຺ວາ ‘‘ກິໍ ອິເມສໍ ສນ຺ຕິເກ ວຸຏ຺ເຐນ, ຠິກ຺ຂຸນີ ຫຸຕ຺ວາ ຊີວິສ຺ສາມີ’’ຕິ ຠິກ຺ຂຸນີອຸປສ຺ສຍໍ ຄນ຺ຕ຺ວາ ປພ຺ພຊ຺ຊໍ ຍາຈິ. ຕາ ນໍ ປພ຺ພາເຊສຸໍ. ສາ ລທ຺ຘູປສມ຺ປທາ ຫຸຕ຺ວາ ພຫຸປຸຕ຺ຕິກຕ຺ເຖຣີຕິ ປຎ຺ຎາຍິ. ສາ ‘‘ອຫໍ ມຫລ຺ລກກາເລ ປພ຺ພຊິຕາ, ອປ຺ປມຕ຺ຕາຍ ເມ ຠວິຕພ຺ພ’’ນ຺ຕິ ຠິກ຺ຂຸນີນໍ ວຕ຺ຕປຏິວຕ຺ຕໍ ກໂຣນ຺ຕີ ‘‘ສພ຺ພຣຕ຺ຕິໍ ສມຓຘມ຺ມໍ ກຣິສ຺ສາມີ’’ຕິ ເຫຏ຺ຐາປາສາເທ ເອກໍ ຖມ຺ຠໍ ຫຕ຺ເຖນ ຄເຫຕ຺ວາ ຕໍ ອາວິຎ຺ຉມານາວ ສມຓຘມ຺ມໍ ກໂຣຕິ, ຈງ຺ກມມານາປິ ‘‘ອນ຺ຘກາຣຏ຺ຐາເນ ເມ ຣຸກ຺ເຂ ວາ ກຕ຺ຖຈິ ວາ ສີສໍ ປຏິຫຎ຺ເຎຍ຺ຍາ’’ຕິ ຕໍ ຣຸກ຺ຂໍ ຫຕ຺ເຖນ ຄເຫຕ຺ວາ ຕໍ ອາວິຎ຺ຉມານາວ ສມຓຘມ຺ມໍ ກໂຣຕິ, ‘‘ສຕ຺ຖາຣາ ເທສິຕຘມ຺ມເມວ ກຣິສ຺ສາມີ’’ຕິ ຘມ຺ມໍ ອາວຊ຺ເຊຕ຺ວາ ຘມ຺ມໍ ອນຸສ຺ສຣມານາວ ສມຓຘມ຺ມໍ ກໂຣຕິ. ອຖ ສຕ຺ຖາ ຄນ຺ຘກຸຏິຍໍ ນິສິນ຺ໂນວ ໂອຠາສໍ ຜຣິຕ຺ວາ ສມ຺ມຸເຂ ນິສິນ຺ໂນ ວິຍ ຕາຍ ສທ຺ຘິໍ ກເຖນ຺ໂຕ ‘‘ພຫຸປຸຕ຺ຕິເກ ມຍາ ເທສິຕໍ ຘມ຺ມໍ ອນາວຊ຺ເຊນ຺ຕສ຺ສ ອປສ຺ສນ຺ຕສ຺ສ ວສ຺ສສຕໍ ຊີວນໂຕ ມຍາ ເທສິຕໍ ຘມ຺ມໍ ປສ຺ສນ຺ຕສ຺ສ ມຸຫຸຕ຺ຕມ຺ປິ ຊີວິຕໍ ເສຍ຺ໂຍ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໑໕. ‘‘ໂຍ ຈ ວສ຺ສສຕໍ ຊີເວ, ອປສ຺ສໍ ຘມ຺ມມຸຕ຺ຕມໍ;

ເອກາຫໍ ຊີວິຕໍ ເສຍ຺ໂຍ, ປສ຺ສໂຕ ຘມ຺ມມຸຕ຺ຕມ’’ນ຺ຕິ.

ຕຕ຺ຖ ຘມ຺ມມຸຕ຺ຕມນ຺ຕິ ນວວິຘໍ ໂລກຸຕ຺ຕຣຘມ຺ມໍ. ໂສ ຫິ ອຸຕ຺ຕໂມ ຘມ຺ໂມ ນາມ. ໂຍ ຫິ ຕໍ ນ ປສ຺ສຕິ, ຕສ຺ສ ວສ຺ສສຕມ຺ປິ ຊີວນໂຕ ຕໍ ຘມ຺ມໍ ປສ຺ສນ຺ຕສ຺ສ ປຏິວິຊ຺ຌນ຺ຕສ຺ສ ເອກາຫມ຺ປິ ເອກກ຺ຂຓມ຺ປິ ຊີວິຕໍ ເສຍ຺ໂຍຕິ.

ຄາຖາປຣິໂຍສາເນ ພຫຸປຸຕ຺ຕິກຕ຺ເຖຣີ ສຫ ປຏິສມ຺ຠິທາຫິ ອຣຫຕ຺ເຕ ປຕິຏ຺ຐຫີຕິ.

ພຫຸປຸຕ຺ຕິກຕ຺ເຖຣີວຕ຺ຖຸ ຈຸທ຺ທສມໍ.

ສຫສ຺ສວຄ຺ຄວຓ຺ຓນາ ນິຏ຺ຐິຕາ.

ອຏ຺ຐໂມ ວຄ຺ໂຄ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຂຸທ຺ທກນິກາເຍ