໙. ຘມ຺ມິກຕ຺ເຖຣວຕ຺ຖຸ

ນ ອຕ຺ຕເຫຕູຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຘມ຺ມິກຕ຺ເຖຣໍ ອາຣພ຺ຠ ກເຖສິ.

ສາວຕ຺ຖິຍໍ ກິເຣໂກ ອຸປາສໂກ ຘມ຺ເມນ ສເມນ ອຄາຣໍ ອຊ຺ຌາວສຕິ. ໂສ ປພ຺ພຊິຕຸກາໂມ ຫຸຕ຺ວາ ເອກທິວສໍ ຠຣິຍາຍ ສທ຺ຘິໍ ນິສີທິຕ຺ວາ ສຸຂກຖໍ ກເຖນ຺ໂຕ ອາຫ – ‘‘ຠທ຺ເທ, ອິຈ຺ຉາມຫໍ ປພ຺ພຊິຕຸ’’ນ຺ຕິ. ‘‘ເຕນ ຫິ, ສາມິ, ອາຄເມຫິ ຕາວ, ຍາວາຫໍ ກຸຈ຺ຉິຄຕໍ ທາຣກໍ ວິຊາຍາມີ’’ຕິ. ໂສ ອາຄເມຕ຺ວາ ທາຣກສ຺ສ ປທສາ ຄມນກາເລ ປຸນ ຕໍ ອາປຸຈ຺ຉິຕ຺ວາ ‘‘ອາຄເມຫິ ຕາວ, ສາມິ, ຍາວາຍໍ ວຍປ຺ປຕ຺ໂຕ ໂຫຕີ’’ຕິ ວຸຕ຺ເຕ ‘‘ກິໍ ເມ ອິມາຍ ອປໂລກິຕາຍ ວາ ອນປໂລກິຕາຍ ວາ, ອຕ຺ຕໂນ ທຸກ຺ຂນິສ຺ສຣຓໍ ກຣິສ຺ສາມີ’’ຕິ ນິກ຺ຂມິຕ຺ວາ ປພ຺ພຊິ. ໂສ ກມ຺ມຏ຺ຐານໍ ຄເຫຕ຺ວາ ຆເຏນ຺ໂຕ ວາຍມນ຺ໂຕ ອຕ຺ຕໂນ ປພ຺ພຊິຕກິຈ຺ຈໍ ນິຏ຺ຐເປຕ຺ວາ ເຕສໍ ທສ຺ສນຕ຺ຖາຍ ປຸນ ສາວຕ຺ຖິໍ ຄນ຺ຕ຺ວາ ປຸຕ຺ຕສ຺ສ ຘມ຺ມກຖໍ ກເຖສິ. ໂສປິ ນິກ຺ຂມິຕ຺ວາ ປພ຺ພຊິ, ປພ຺ພຊິຕ຺ວາ ຈ ປນ ນ ຈິຣສ຺ເສວ ອຣຫຕ຺ຕໍ ປາປຸຓິ. ປຸຣາຓທຸຕິຍິກາປິສ຺ສ ‘‘ເຍສໍ ອຕ຺ຖາຍ ອຫໍ ຆຣາວາເສ ວເສຍ຺ຍໍ, ເຕ ອຸໂຠປິ ປພ຺ພຊິຕາ, ອິທານິ ເມ ກິໍ ຆຣາວາເສນ, ປພ຺ພຊິສ຺ສາມີ’’ຕິ ນິກ຺ຂມິຕ຺ວາ ປພ຺ພຊິ, ປພ຺ພຊິຕ຺ວາ ຈ ປນ ນ ຈິຣສ຺ເສວ ອຣຫຕ຺ຕໍ ປາປຸຓິ. ອເຖກທິວສໍ ຘມ຺ມສຠາຍໍ ກຖໍ ສມຸຏ຺ຐາເປສຸໍ – ‘‘ອາວຸໂສ, ຘມ຺ມິກອຸປາສໂກ ອຕ຺ຕໂນ ຘມ຺ເມ ປຕິຏ຺ຐິຕຕ຺ຕາ ນິກ຺ຂມິຕ຺ວາ ປພ຺ພຊິຕ຺ວາ ອຣຫຕ຺ຕໍ ປຕ຺ໂຕ ປຸຕ຺ຕທາຣສ຺ສາປິ ປຕິຏ຺ຐາ ຊາໂຕ’’ຕິ. ສຕ຺ຖາ ອາຄນ຺ຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ ‘ອິມາຍ ນາມາ’’’ຕິ ວຸຕ຺ເຕ, ‘‘ຠິກ຺ຂເວ, ປຓ຺ຑິເຕນ ນາມ ເນວ ອຕ຺ຕເຫຕຸ, ນ ປຣເຫຕຸ ສມິທ຺ຘິ ອິຈ຺ຉິຕພ຺ພາ, ຘມ຺ມິເກເນວ ປນ ຘມ຺ມປຏິສຣເຓນ ຠວິຕພ຺ພ’’ນ຺ຕິ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໘໔. ‘‘ນ ອຕ຺ຕເຫຕຸ ນ ປຣສ຺ສ ເຫຕຸ,

ນ ປຸຕ຺ຕມິຈ຺ເຉ ນ ຘນໍ ນ ຣຏ຺ຐໍ;

ນ ອິຈ຺ເຉຍ຺ຍ ອຘມ຺ເມນ ສມິທ຺ຘິມຕ຺ຕໂນ,

ສ ສີລວາ ປຎ຺ຎວາ ຘມ຺ມິໂກ ສິຍາ’’ຕິ.

ຕຕ຺ຖ ນ ອຕ຺ຕເຫຕູຕິ ປຓ຺ຑິໂຕ ນາມ ອຕ຺ຕເຫຕຸ ວາ ປຣເຫຕຸ ວາ ປາປໍ ນ ກໂຣຕິ. ນ ປຸຕ຺ຕມິຈ຺ເຉຕິ ປຸຕ຺ຕໍ ວາ ຘນໍ ວາ ຣຏ຺ຐໍ ວາ ປາປກມ຺ເມນ ນ ອິຈ຺ເຉຍ຺ຍ, ເອຕານິປິ ອິຈ຺ຉໂຕ ປາປກມ຺ມໍ ນ ກໂຣຕິເຍວາຕິ ອຕ຺ໂຖ. ສມິທ຺ຘິມຕ຺ຕໂນຕິ ຍາ ອຕ຺ຕໂນ ສມິທ຺ຘິ, ຕມ຺ປິ ອຘມ຺ເມນ ນ ອິຈ຺ເຉຍ຺ຍ,ສມິທ຺ຘິກາຣຓາປິ ປາປໍ ນ ກໂຣຕີຕິ ອຕ຺ໂຖ. ສ ສີລວາຕິ ໂຍ ເອວຣູໂປ ປຸຄ຺ຄໂລ, ໂສ ເອວ ສີລວາ ຈ ປຎ຺ຎວາ ຈ ຘມ຺ມິໂກຈ ສິຍາ, ນ ອຎ຺ໂຎຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ຘມ຺ມິກຕ຺ເຖຣວຕ຺ຖຸ ນວມໍ.