໓. ຉນ຺ນຕ຺ເຖຣວຕ຺ຖຸ

ນ ຠເຊ ປາປເກ ມິຕ຺ເຕຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຉນ຺ນຕ຺ເຖຣໍ ອາຣພ຺ຠ ກເຖສິ.

ໂສ ກິຣ ອາຍສ຺ມາ ‘‘ອຫໍ ອມ຺ຫາກໍ ອຍ຺ຍປຸຕ຺ເຕນ ສທ຺ຘິໍ ມຫາຠິນິກ຺ຂມນໍ ນິກ຺ຂນ຺ໂຕ ຕທາ ອຎ຺ຎໍ ເອກມ຺ປິ ນ ປສ຺ສາມິ, ອິທານິ ປນ ‘ອຫໍ ສາຣິປຸຕ຺ໂຕ ນາມ, ອຫໍ ໂມຄ຺ຄລ຺ລາໂນ ນາມ, ມຍໍ ອຄ຺ຄສາວກມ຺ຫາ’ຕິ ວຕ຺ວາ ອິເມ ວິຈຣນ຺ຕີ’’ຕິ ທ຺ເວ ອຄ຺ຄສາວເກ ອກ຺ໂກສຕິ. ສຕ຺ຖາ ຠິກ຺ຂູນໍ ສນ຺ຕິກາ ຕໍ ປວຕ຺ຕິໍ ສຸຕ຺ວາ ຉນ຺ນຕ຺ເຖຣໍ ປກ຺ໂກສາເປຕ຺ວາ ໂອວທຕິ. ໂສ ຕງ຺ຂເຓເຍວ ຕຸຓ຺ຫີ ຫຸຕ຺ວາ ປຸນ ຄນ຺ຕ຺ວາ ເຖເຣ ອກ຺ໂກສຕິເຍວ. ເອວໍ ຍາວຕຕິຍໍ ອກ຺ໂກສນ຺ຕໍ ປກ຺ໂກສາເປຕ຺ວາ ສຕ຺ຖາ ໂອວທິຕ຺ວາ ‘‘ຉນ຺ນ, ທ຺ເວ ອຄ຺ຄສາວກາ ນາມ ຕຸຍ຺ຫໍ ກລ຺ຍາຓມິຕ຺ຕາ ອຸຕ຺ຕມປຸຣິສາ, ເອວຣູເປ ກລ຺ຍາຓມິຕ຺ເຕ ເສວສ຺ສຸ ຠຊສ຺ສູ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໗໘. ‘‘ນ ຠເຊ ປາປເກ ມິຕ຺ເຕ, ນ ຠເຊ ປຸຣິສາຘເມ;

ຠເຊຖ ມິຕ຺ເຕ ກລ຺ຍາເຓ, ຠເຊຖ ປຸຣິສຸຕ຺ຕເມ’’ຕິ.

ຕສ຺ສຕ຺ໂຖ – ກາຍທຸຈ຺ຈຣິຕາທິອກຸສລກມ຺ມາຠິຣຕາ ປາປມິຕ຺ຕາ ນາມ. ສນ຺ຘິຈ຺ເຉທນາທິເກ ວາ ເອກວີສຕິອເນສນາທິເຠເທ ວາ ອຏ຺ຐາເນ ນິໂຍຊກາ ປຸຣິສາຘມາ ນາມ. ອຸໂຠປິ ວາ ເອເຕ ປາປມິຕ຺ຕາ ເຈວ ປຸຣິສາຘມາ ຈ, ເຕ ນ ຠເຊຍ຺ຍ ນ ປຍິຣຸປາເສຍ຺ຍ, ວິປຣີຕາ ປນ ກລ຺ຍາຓມິຕ຺ຕາ ເຈວ ສປ຺ປຸຣິສາ ຈ, ເຕ ຠເຊຖ ປຍິຣຸປາເສຖາຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ຉນ຺ນຕ຺ເຖໂຣ ປນ ຕໍ ໂອວາທໍ ສຸຕ຺ວາປິ ປຸຣິມນເຍເນວ ຠິກ຺ຂູ ອກ຺ໂກສຕິ ປຣິຠາສຕິ. ປຸນປິ ສຕ຺ຖຸ ອາໂຣເຈສຸໍ. ສຕ຺ຖາ, ‘‘ຠິກ຺ຂເວ, ມຍິ ຘຣນ຺ເຕ ຉນ຺ນໍ ສິກ຺ຂາເປຕຸໍ ນ ສກ຺ຂິສ຺ສຖ, ມຍິ ປນ ປຣິນິພ຺ພຸເຕ ສກ຺ຂິສ຺ສຖາ’’ຕິ ວຕ຺ວາ ປຣິນິພ຺ພານກາເລ ອາຍສ຺ມຕາ ອານນ຺ເທນ, ‘‘ຠນ຺ເຕ, ກຖໍ ຉນ຺ນຕ຺ເຖເຣ ອມ຺ເຫຫິ ປຏິປຊ຺ຊິຕພ຺ພ’’ນ຺ຕິ ວຸຕ຺ເຕ, ‘‘ອານນ຺ທ, ຉນ຺ນສ຺ສ ຠິກ຺ຂຸໂນ ພ຺ຣຫ຺ມທຓ຺ໂຑ ທາຕພ຺ໂພ’’ຕິ ອາຓາເປສິ. ໂສ ສຕ຺ຖຣິ ປຣິນິພ຺ພຸເຕ ອານນ຺ທຕ຺ເຖເຣນ ອາໂຣຈິຕໍ ພ຺ຣຫ຺ມທຓ຺ຑໍ ສຸຕ຺ວາ ທຸກ຺ຂີ ທຸມ຺ມໂນ ຕິກ຺ຂຕ຺ຕຸໍ ມຸຈ຺ຉິໂຕ ປຕິຕ຺ວາ ‘‘ມາ ມໍ, ຠນ຺ເຕ, ນາສຍິຕ຺ຖາ’’ຕິ ຍາຈິຕ຺ວາ ສມ຺ມາ ວຕ຺ຕໍ ປູເຣນ຺ໂຕ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓີຕິ.

ຉນ຺ນຕ຺ເຖຣວຕ຺ຖຸ ຕຕິຍໍ.