໙. ອານນ຺ທຕ຺ເຖຣປຎ຺ຫາວຕ຺ຖຸ

ນ ປຸປ຺ຜຄນ຺ໂຘ ປຏິວາຕເມຕີຕິ ອິມໍ ຘມ຺ມເທສນໍ ສຕ຺ຖາ ສາວຕ຺ຖິຍໍ ວິຫຣນ຺ໂຕ ອານນ຺ທຕ຺ເຖຣສ຺ສ ປຎ຺ຫໍ ວິສ຺ສຊ຺ເຊນ຺ໂຕ ກເຖສິ.

ເຖໂຣ ກິຣ ສາຍນ຺ຫສມເຍ ປຏິສລ຺ລີໂນ ຈິນ຺ເຕສິ – ‘‘ຠຄວຕາ ມູລຄນ຺ໂຘ, ສາຣຄນ຺ໂຘ, ປຸປ຺ຜຄນ຺ໂຘຕິ ຕໂຍ ອຸຕ຺ຕມຄນ຺ຘາ ວຸຕ຺ຕາ, ເຕສໍ ອນຸວາຕເມວ ຄນ຺ໂຘ ຄຈ຺ຉຕິ, ໂນ ປຏິວາຕໍ. ອຕ຺ຖິ ນຸ ໂຂ ຕໍ ຄນ຺ຘຊາຕໍ, ຍສ຺ສ ປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ. ອຖສ຺ສ ເອຕທໂຫສິ – ‘‘ກິໍ ມຍ຺ຫໍ ອຕ຺ຕນາ ວິນິຈ຺ຉິເຕນ, ສຕ຺ຖາຣໍເຍວ ປຸຈ຺ຉິສ຺ສາມີ’’ຕິ. ໂສ ສຕ຺ຖາຣໍ ອຸປສງ຺ກມິຕ຺ວາ ປຸຈ຺ຉິ. ເຕນ ວຸຕ຺ຕໍ –

‘‘ອຖ ໂຂ ອາຍສ຺ມາ ອານນ຺ໂທ ສາຍນ຺ຫສມເຍ ປຏິສລ຺ລານາ ວຸຏ຺ຐິໂຕ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ, ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອານນ຺ໂທ ຠຄວນ຺ຕໍ ເອຕທໂວຈ –

‘‘ຕີຓິມານິ, ຠນ຺ເຕ, ຄນ຺ຘຊາຕານິ, ເຍສໍ ອນຸວາຕເມວ ຄນ຺ໂຘ ຄຈ຺ຉຕິ, ໂນ ປຏິວາຕໍ. ກຕມານິ ຕີຓິ? ມູລຄນ຺ໂຘ, ສາຣຄນ຺ໂຘ, ປຸປ຺ຜຄນ຺ໂຘ, ອິມານິ ໂຂ, ຠນ຺ເຕ, ຕີຓິ ຄນ຺ຘຊາຕານິ. ເຍສໍ ອນຸວາຕເມວ ຄນ຺ໂຘ ຄຈ຺ຉຕິ, ໂນ ປຏິວາຕໍ. ອຕ຺ຖິ ນຸ ໂຂ, ຠນ຺ເຕ, ກິຎ຺ຈິ ຄນ຺ຘຊາຕໍ ຍສ຺ສ ອນຸວາຕມ຺ປິ ຄນ຺ໂຘ ຄຈ຺ຉຕິ, ປຏິວາຕມ຺ປິ ຄນ຺ໂຘ ຄຈ຺ຉຕິ, ອນຸວາຕປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ? (ອ. ນິ. ໓.໘໐)

ອຖສ຺ສ ຠຄວາ ປຎ຺ຫໍ ວິສ຺ສຊ຺ເຊນ຺ໂຕ –

‘‘ອຕ຺ຖານນ຺ທ, ກິຎ຺ຈິ ຄນ຺ຘຊາຕໍ, ຍສ຺ສ ອນຸວາຕມ຺ປິ ຄນ຺ໂຘ ຄຈ຺ຉຕິ, ປຏິວາຕມ຺ປິ ຄນ຺ໂຘ ຄຈ຺ຉຕິ, ອນຸວາຕປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ. ‘‘ກຕມໍ ປນ ຕໍ, ຠນ຺ເຕ, ຄນ຺ຘຊາຕໍ’’? ‘‘ຍສ຺ສ ອນຸວາຕມ຺ປິ ຄນ຺ໂຘ ຄຈ຺ຉຕິ, ປຏິວາຕມ຺ປິ ຄນ຺ໂຘ ຄຈ຺ຉຕິ, ອນຸວາຕປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ?

‘‘ອິຘານນ຺ທ, ຍສ຺ມິໍ ຄາເມ ວາ ນິຄເມ ວາ ອິຕ຺ຖີ ວາ ປຸຣິໂສ ວາ ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ, ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ, ສີລວາ ໂຫຕິ ກລ຺ຍາຓຘມ຺ໂມ, ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ ມຸຕ຺ຕຈາໂຄ ປຍຕປາຓິ ໂວສ຺ສຄ຺ຄຣໂຕ ຍາຈໂຍໂຄ ທານສໍວິຠາຄຣໂຕ.

‘‘ຕສ຺ສ ທິສາສຸ ສມຓພ຺ຣາຫ຺ມຓາ ວຓ຺ຓໍ ຠາສນ຺ຕິ, ‘ອມຸກສ຺ມິໍ ນາມ ຄາເມ ວາ ນິຄເມ ວາ ອິຕ຺ຖີ ວາ ປຸຣິໂສ ວາ ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ…ເປ… ທານສໍວິຠາຄຣໂຕ’’’ຕິ.

‘‘ເທວຕາປິສ຺ສ ວຓ຺ຓໍ ຠາສນ຺ຕິ, ‘ອມຸກສ຺ມິໍ ນາມ ຄາເມ ວາ ນິຄເມ ວາ ອິຕ຺ຖີ ວາ ປຸຣິໂສ ວາ ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ…ເປ… ທານສໍວິຠາຄຣໂຕ’’’ຕິ. ‘‘ອິທໍ ໂຂ ຕໍ, ອານນ຺ທ, ຄນ຺ຘຊາຕໍ, ຍສ຺ສ ອນຸວາຕມ຺ປິ ຄນ຺ໂຘ ຄຈ຺ຉຕິ, ປຏິວາຕມ຺ປິ ຄນ຺ໂຘ ຄຈ຺ຉຕິ, ອນຸວາຕປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ (ອ. ນິ. ໓.໘໐) ວຕ຺ວາ ອິມາ ຄາຖາ ອຠາສິ –

໕໔. ‘‘ນ ປຸປ຺ຜຄນ຺ໂຘ ປຏິວາຕເມຕິ,

ນ ຈນ຺ທນໍ ຕຄຣມລ຺ລິກາ ວາ;

ສຕຎ຺ຈ ຄນ຺ໂຘ ປຏິວາຕເມຕິ,

ສພ຺ພາ ທິສາ ສປ຺ປຸຣິໂສ ປວາຍຕິ. (ອ. ນິ. ໓.໘໐);

໕໕. ‘‘ຈນ຺ທນໍ ຕຄຣໍ ວາປິ, ອຸປ຺ປລໍ ອຖ ວສ຺ສິກີ;

ເອເຕສໍ ຄນ຺ຘຊາຕານໍ, ສີລຄນ຺ໂຘ ອນຸຕ຺ຕໂຣ’’ຕິ.

ຕຕ຺ຖ ນ ປຸປ຺ຜຄນ຺ໂຘຕິ ຕາວຕິໍສຠວເນ ປຣິຈ຺ຉຕ຺ຕກຣຸກ຺ໂຂ ອາຍາມໂຕ ຈ ວິຕ຺ຖາຣໂຕ ຈ ໂຍຊນສຕິໂກ, ຕສ຺ສ ປຸປ຺ຜານໍ ອາຠາ ປຎ຺ຎາສ ໂຍຊນານິ ຄຈ຺ຉຕິ, ຄນ຺ໂຘ ໂຍຊນສຕໍ, ໂສປິ ອນຸວາຕເມວ ຄຈ຺ຉຕິ, ປຏິວາຕໍ ປນ ອຏ຺ຐງ຺ຄຸລມຕ຺ຕມ຺ປິ ຄນ຺ຕຸໍ ນ ສກ຺ໂກຕິ, ເອວຣູໂປປິ ນ ປຸປ຺ຜຄນ຺ໂຘ ປຏິວາຕເມຕິ. ຈນ຺ທນນ຺ຕິ ຈນ຺ທນຄນ຺ໂຘ. ຕຄຣມລ຺ລິກາ ວາຕິ ອິເມສມ຺ປິ ຄນ຺ໂຘ ເອວ ອຘິປ຺ເປໂຕ. ສາຣຄນ຺ຘານໍ ອຄ຺ຄສ຺ສ ຫິ ໂລຫິຕຈນ຺ທນສ຺ສາປິ ຕຄຣສ຺ສປິ ມລ຺ລິກາຍປິ ອນຸວາຕເມວ ວາຍຕິ, ໂນ ປຏິວາຕໍ. ສຕຎ຺ຈ ຄນ຺ໂຘຕິ ສປ຺ປຸຣິສານໍ ປນ ພຸທ຺ຘປຈ຺ເຈກພຸທ຺ຘສາວການໍ ສີລຄນ຺ໂຘ ປຏິວາຕເມຕິ. ກິໍ ກາຣຓາ? ສພ຺ພາ ທິສາ ສປ຺ປຸຣິໂສ ປວາຍຕິ ຍສ຺ມາ ປນ ສປ຺ປຸຣິໂສ ສີລຄນ຺ເຘນ ສພ຺ພາປິ ທິສາ ອຊ຺ໂຌຕ຺ຖຣິຕ຺ວາວ ຄຈ຺ຉຕິ, ຕສ຺ມາ ‘‘ຕສ຺ສ ຄນ຺ໂຘ ນ ປຏິວາຕເມຕີ’’ຕິ ນ ວຕ຺ຕພ຺ໂພ. ເຕນ ວຸຕ຺ຕໍ ‘‘ປຏິວາຕເມຕີ’’ຕິ. ວສ຺ສິກີຕິ ຊາຕິສຸມນາ. ເອເຕສນ຺ຕິ ອິເມສໍ ຈນ຺ທນາທີນໍ ຄນ຺ຘຊາຕານໍ ຄນ຺ຘໂຕ ສີລວນ຺ຕານໍ ສປ຺ປຸຣິສານໍ ສີລຄນ຺ໂຘວ ອນຸຕ຺ຕໂຣ ອສທິໂສ ອປຏິຠາໂຄຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປຕ຺ຕາ. ເທສນາ ມຫາຊນສ຺ສ ສາຕ຺ຖິກາ ຊາຕາຕິ.

ອານນ຺ທຕ຺ເຖຣປຎ຺ຫາວຕ຺ຖຸ ນວມໍ.