໑. ປຖວິກຖາປສຸຕປຎ຺ຈສຕຠິກ຺ຂຸວຕ຺ຖຸ

ໂກ ອິມໍ ປຖວິໍ ວິເຈສ຺ສຕີຕິ ອິມໍ ຘມ຺ມເທສນໍ ສຕ຺ຖາ ສາວຕ຺ຖິຍໍ ວິຫຣນ຺ໂຕ ປຖວິກຖາປສຸເຕ ປຎ຺ຈສເຕ ຠິກ຺ຂູ ອາຣພ຺ຠ ກເຖສິ.

ເຕ ກິຣ ຠຄວຕາ ສທ຺ຘິໍ ຊນປທຈາຣິກໍ ຈຣິຕ຺ວາ ເຊຕວນໍ ອາຄນ຺ຕ຺ວາ ສາຍນ຺ຫສມເຍ ອຸປຏ຺ຐານສາລາຍໍ ສນ຺ນິສິນ຺ນາ ອຕ຺ຕນາ ຄຕຄຕຏ຺ຐາເນສຸ ‘‘ອສຸກຄາມໂຕ ອສຸກຄາມຄມນຏ຺ຐາເນ ສມໍ ວິສມໍ ກທ຺ທມພຫຸລໍ ສກ຺ຂຣພຫຸລໍ ກາຬມຕ຺ຕິກໍ ຕມ຺ພມຕ຺ຕິກ’’ນ຺ຕິ ປຖວິກຖໍ ກເຖສຸໍ. ສຕ຺ຖາ ອາຄນ຺ຕ຺ວາ, ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ, ‘‘ຠນ຺ເຕ, ອມ຺ເຫຫິ ວິຈຣິຕຏ຺ຐາເນ ປຖວິກຖາຍາ’’ຕິ ວຸຕ຺ເຕ, ‘‘ຠິກ຺ຂເວ, ເອສາ ພາຫິຣປຖວີ ນາມ, ຕຸມ຺ເຫຫິ ອຊ຺ຌຸຕ຺ຕິກປຖວິຍໍ ປຣິກມ຺ມໍ ກາຕຸໍ ວຏ຺ຏຕີ’’ຕິ ວຕ຺ວາ ອິມາ ທ຺ເວ ຄາຖາ ອຠາສິ –

໔໔. ‘‘ໂກ ອິມໍ ປຖວິໍ ວິເຈສ຺ສຕິ,

ຍມໂລກຎ຺ຈ ອິມໍ ສເທວກໍ;

ໂກ ຘມ຺ມປທໍ ສຸເທສິຕໍ,

ກຸສໂລ ປຸປ຺ຜມິວ ປເຈສ຺ສຕິ.

໔໕. ‘‘ເສໂຂ ປຖວິໍ ວິເຈສ຺ສຕິ,

ຍມໂລກຎ຺ຈ ອິມໍ ສເທວກໍ;

ເສໂຂ ຘມ຺ມປທໍ ສຸເທສິຕໍ,

ກຸສໂລ ປຸປ຺ຜມິວ ປເຈສ຺ສຕີ’’ຕິ.

ຕຕ຺ຖ ໂກ ອິມນ຺ຕິ ໂກ ອິມໍ ອຕ຺ຕຠາວສງ຺ຂາຕໍ ປຖວິໍ. ວິເຈສ຺ສຕີຕິ ອຕ຺ຕໂນ ຎາເຓນ ວິຈິນິສ຺ສຕິ ວິຊານິສ຺ສຕິ, ປຏິວິຊ຺ຌິສ຺ສຕິ, ສຈ຺ຉິກຣິສ຺ສຕີຕິ ອຕ຺ໂຖ. ຍມໂລກຎ຺ຈາຕິ ຈຕຸພ຺ພິຘໍ ອປາຍໂລກຎ຺ຈ. ອິມໍ ສເທວກນ຺ຕິ ອິມໍ ມນຸສ຺ສໂລກຎ຺ຈ ເທວໂລເກນ ສທ຺ຘິໍ ໂກ ວິເຈສ຺ສຕິ ວິຈິນິສ຺ສຕິ ວິຊານິສ຺ສຕິ ປຏິວິຊ຺ຌິສ຺ສຕິ ສຈ຺ຉິກຣິສ຺ສຕີຕິ ປຸຈ຺ຉິ. ໂກຘມ຺ມປທໍ ສຸເທສິຕນ຺ຕິ ຍຖາສຠາວໂຕ ກຖິຕຕ຺ຕາ ສຸເທສິຕໍ ສຕ຺ຕຕິໍສໂພຘິປກ຺ຂິຍຘມ຺ມສງ຺ຂາຕໍ ຘມ຺ມປທໍ ກຸສໂລ ມາລາກາໂຣ ປຸປ຺ຜໍ ວິຈິນນ຺ໂຕ ວິຍ ໂກ ປເຈສ຺ສຕິ ວິຈິນິສ຺ສຕິ ວິຊານິສ຺ສຕິ ອຸປປຣິກ຺ຂິສ຺ສຕິ ປຏິວິຊ຺ຌິສ຺ສຕິ, ສຈ຺ຉິກຣິສ຺ສຕີຕິ ອຕ຺ໂຖ. ເສໂຂຕິ ອຘິສີລສິກ຺ຂາ, ອຘິຈິຕ຺ຕສິກ຺ຂາ, ອຘິປຎ຺ຎາສິກ຺ຂາຕິ ອິມາ ຕິສ຺ໂສ ສິກ຺ຂາ ສິກ຺ຂນໂຕ ໂສຕາປຕ຺ຕິມຄ຺ຄຏ຺ຐໍ ອາທິໍ ກຕ຺ວາ ຍາວ ອຣຫຕ຺ຕມຄ຺ຄຏ຺ຐາ ສຕ຺ຕວິໂຘ ເສໂຂ ອິມໍ ອຕ຺ຕຠາວສງ຺ຂາຕໍ ປຖວິໍ ອຣຫຕ຺ຕມຄ຺ເຄນ ຕໂຕ ຉນ຺ທຣາຄໍ ອປກຑ຺ຒນ຺ໂຕ ວິເຈສ຺ສຕິ ວິຈິນິສ຺ສຕິ ວິຊານິສ຺ສຕິ ປຏິວິຊ຺ຌິສ຺ສຕິ ສຈ຺ຉິກຣິສ຺ສຕິ. ຍມໂລກຎ຺ຈາຕິ ຕໍ ຍຖາວຸຕ຺ຕປກາຣໍ ຍມໂລກຎ຺ຈ ອິມໍ ມນຸສ຺ສໂລກຎ຺ຈ ສຫ ເທເວຫິ ສເທວກໍ ສ຺ເວວ ວິເຈສ຺ສຕິ ວິຈິນິສ຺ສຕິ ວິຊານິສ຺ສຕິ ປຏິວິຊ຺ຌິສ຺ສຕິ ສຈ຺ຉິກຣິສ຺ສຕິ. ເສໂຂຕິ ສ຺ເວວ ສຕ຺ຕວິໂຘ ເສໂຂ, ຍຖາ ນາມ ກຸສໂລ ມາລາກາໂຣ ປຸປ຺ຜາຣາມໍ ປວິສິຕ຺ວາ ຕຣຸຓມກຸຬານິ ຈ ປາຓກວິທ຺ຘານິ ຈ ມິລາຕານິ ຈ ຄຓ຺ຐິກຊາຕານິ ຈ ປຸປ຺ຜານິ ວຊ຺ເຊຕ຺ວາ ໂສຠນານິ ສຸຊາຕສຸຊາຕາເນວ ປຸປ຺ຜານິ ວິຈິນາຕິ, ເອວເມວ ອິມໍ ສຸກຖິຕໍ ສຸນິທ຺ທິຏ຺ຐໍ ໂພຘິປກ຺ຂິຍຘມ຺ມປທມ຺ປິ ປຎ຺ຎາຍ ປເຈສ຺ສຕິ ວິຈິນິສ຺ສຕິ ອຸປປຣິກ຺ຂິສ຺ສຕິ ປຏິວິຊ຺ຌິສ຺ສຕິ ສຈ຺ຉິກຣິສ຺ສຕີຕິ ສຕ຺ຖາ ສຍເມວ ປຎ຺ຫໍ ວິສ຺ສຊ຺ເຊສິ.

ເທສນາວສາເນ ປຎ຺ຈສຕາປິ ຠິກ຺ຂູ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິໍສຸ. ສມ຺ປຕ຺ຕປຣິສາຍປິ ສາຕ຺ຖິກາ ຘມ຺ມເທສນາ ອໂຫສີຕິ.

ປຖວິກຖາປສຸຕປຎ຺ຈສຕຠິກ຺ຂຸວຕ຺ຖຸ ປຐມໍ.