໔. ພາລນກ຺ຂຕ຺ຕສງ຺ຆຸຏ຺ຐວຕ຺ຖຸ

ປມາທມນຸຍຸຎ຺ຊນ຺ຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ພາລນກ຺ຂຕ຺ຕໍ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ສາວຕ຺ຖິຍໍ ພາລນກ຺ຂຕ຺ຕໍ ນາມ ສງ຺ຆຸຏ຺ຐໍ. ຕສ຺ມິໍ ນກ຺ຂຕ຺ເຕ ພາລາ ທຸມ຺ເມຘິໂນ ຊນາ ຉາຣິກາຍ ເຈວ ໂຄມເຍນ ຈ ສຣີຣໍ ມກ຺ເຂຕ຺ວາ ສຕ຺ຕາຫໍ ອສພ຺ຠໍ ຠຓນ຺ຕາ ວິຈຣນ຺ຕິ. ກິຎ຺ຈິ ຎາຕິ ສຸຫຊ຺ຊໍ ວາ ປພ຺ພຊິຕໍ ວາ ທິສ຺ວາ ລຊ຺ຊນ຺ຕາ ນາມ ນຕ຺ຖິ. ທ຺ວາເຣ ທ຺ວາເຣ ຐຕ຺ວາ ອສພ຺ຠໍ ຠຓນ຺ຕິ. ມນຸສ຺ສາ ເຕສໍ ອສພ຺ຠໍ ໂສຕຸໍ ອສກ຺ໂກນ຺ຕາ ຍຖາພລໍ ອຑ຺ຒໍ ວາ ປາທໍ ວາ ກຫາປຓໍ ວາ ເປເສນ຺ຕິ. ເຕ ເຕສໍ ທ຺ວາເຣ ລທ຺ຘໍ ລທ຺ຘໍ ຄເຫຕ຺ວາ ປກ຺ກມນ຺ຕິ. ຕທາ ປນ ສາວຕ຺ຖິຍໍ ປຎ຺ຈ ໂກຏິມຕ຺ຕາ ອຣິຍສາວກາ ວສນ຺ຕິ, ເຕ ສຕ຺ຖຸ ສນ຺ຕິກໍ ສາສນໍ ເປສຍິໍສຸ – ‘‘ຠຄວາ, ຠນ຺ເຕ, ສຕ຺ຕາຫໍ ຠິກ຺ຂຸສງ຺ເຆນ ສທ຺ຘິໍ ນຄຣໍ ອປ຺ປວິສິຕ຺ວາ ວິຫາເຣເຍວ ໂຫຕູ’’ຕິ. ຕຎ຺ຈ ປນ ສຕ຺ຕາຫໍ ຠິກ຺ຂຸສງ຺ຆສ຺ສ ວິຫາເຣເຍວ ຍາຄຸຠຕ຺ຕາທີນິ ສມ຺ປາເທຕ຺ວາ ປຫິຓິໍສຸ, ສຍມ຺ປິ ເຄຫາ ນ ນິກ຺ຂມິໍສຸ. ເຕ ນກ຺ຂຕ຺ເຕ ປນ ປຣິໂຍສິເຕ ອຏ຺ຐເມ ທິວເສ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ນິມນ຺ເຕຕ຺ວາ ນຄຣໍ ປເວເສຕ຺ວາ ມຫາທານໍ ທຕ຺ວາ ເອກມນ຺ຕໍ ນິສິນ຺ນາ, ‘‘ຠນ຺ເຕ, ອຕິທຸກ຺ເຂນ ໂນ ສຕ຺ຕ ທິວສານິ ອຕິກ຺ກນ຺ຕານິ, ພາລານໍ ອສພ຺ຠານິ ສຸຓນ຺ຕານໍ ກຓ຺ຓາ ຠິຊ຺ຊນາກາຣປ຺ປຕ຺ຕາ ໂຫນ຺ຕິ, ໂກຈິ ກສ຺ສຈິ ນ ລຊ຺ຊຕິ, ເຕນ ມຍໍ ຕຸມ຺ຫາກໍ ອນ຺ໂຕນຄຣໍ ປວິສິຕຸໍ ນາທມ຺ຫ, ມຍມ຺ປິ ເຄຫໂຕ ນ ນິກ຺ຂມິມ຺ຫາ’’ຕິ ອາຫໍສຸ. ສຕ຺ຖາ ເຕສໍ ກຖໍ ສຸຕ຺ວາ, ‘‘ພາລານໍ ທຸມ຺ເມຘານໍ ກິຣິຍາ ນາມ ເອວຣູປາ ໂຫຕິ, ເມຘາວິໂນ ປນ ຘນສາຣໍ ວິຍ ອປ຺ປມາທໍ ຣກ຺ຂິຕ຺ວາ ອມຕມຫານິພ຺ພານສມ຺ປຕ຺ຕິໍ ປາປຸຓນ຺ຕີ’’ຕິ ວຕ຺ວາ ອິມາ ຄາຖາ ອຠາສິ –

໒໖. ‘‘ປມາທມນຸຍຸຎ຺ຊນ຺ຕິ, ພາລາ ທຸມ຺ເມຘິໂນ ຊນາ;

ອປ຺ປມາທຎ຺ຈ ເມຘາວີ, ຘນໍ ເສຏ຺ຐໍວ ຣກ຺ຂຕິ.

໒໗. ‘‘ມາ ປມາທມນຸຍຸຎ຺ເຊຖ, ມາ ກາມຣຕິສນ຺ຖວໍ;

ອປ຺ປມຕ຺ໂຕ ຫິ ຌາຍນ຺ໂຕ, ປປ຺ໂປຕິ ວິປຸລໍ ສຸຂ’’ນ຺ຕິ.

ຕຕ຺ຖ ພາລາຕິ ພາລ຺ເຍນ ສມນ຺ນາຄຕາ ອິຘໂລກປຣໂລກຕ຺ຖໍ ອຊານນ຺ຕາ. ທຸມ຺ເມຘິໂນຕິ ນິປ຺ປຎ຺ຎາ. ເຕ ປມາເທ ອາທີນວໍ ອປສ຺ສນ຺ຕາ ປມາທໍ ອນຸຍຸຎ຺ຊນ຺ຕິ ປວຕ຺ເຕນ຺ຕິ, ປມາເທນ ກາລໍ ວີຕິນາເມນ຺ຕິ. ເມຘາວີຕິ ຘມ຺ໂມຊປຎ຺ຎາຍ ສມນ຺ນາຄໂຕ ປນ ປຓ຺ຑິໂຕ ກຸລວໍສາຄຕໍ ເສຏ຺ຐໍ ອຸຕ຺ຕມໍ ສຕ຺ຕຣຕນຘນໍ ວິຍ ອປ຺ປມາທໍ ຣກ຺ຂຕິ. ຍຖາ ຫິ ອຸຕ຺ຕມໍ ຘນໍ ນິສ຺ສາຍ ‘‘ກາມຄຸຓສມ຺ປຕ຺ຕິໍ ປາປຸຓິສ຺ສາມ, ປຸຕ຺ຕທາຣໍ ໂປເສສ຺ສາມ, ປຣໂລກຄມນມຄ຺ຄໍ ໂສເຘສ຺ສາມາ’’ຕິ ຘເນ ອານິສໍສໍ ປສ຺ສນ຺ຕາ ຕໍ ຣກ຺ຂນ຺ຕິ, ເອວໍ ປຓ຺ຑິໂຕປິ ອປ຺ປມຕ຺ໂຕ ‘‘ປຐມຊ຺ຌານາທີນິ ປຏິລຠິສ຺ສາມິ, ມຄ຺ຄຜລາທີນິ ປາປຸຓິສ຺ສາມິ, ຕິສ຺ໂສ ວິຊ຺ຊາ, ຉ ອຠິຎ຺ຎາ ສມ຺ປາເທສ຺ສາມີ’’ຕິ ອປ຺ປມາເທ ອານິສໍສໍ ປສ຺ສນ຺ໂຕ ຘນໍ ເສຏ຺ຐໍວ ອປ຺ປມາທໍ ຣກ຺ຂຕີຕິ ອຕ຺ໂຖ. ມາ ປມາທນ຺ຕິ ຕສ຺ມາ ຕຸມ຺ເຫ ມາ ປມາທມນຸຍຸຎ຺ເຊຖ ມາ ປມາເທນ ກາລໍ ວີຕິນາມຍິຕ຺ຖ. ມາ ກາມຣຕິສນ຺ຖວນ຺ຕິ ວຕ຺ຖຸກາມກິເລສກາເມສຸ ຣຕິສງ຺ຂາຕໍ ຕຓ຺ຫາສນ຺ຖວມ຺ປິ ມາ ອນຸຍຸຎ຺ເຊຖ ມາ ຈິນ຺ຕຍິຕ຺ຖ ມາ ປຏິລຠິຕ຺ຖ. ອປ຺ປມຕ຺ໂຕ ຫີຕິ ອຸປຏ຺ຐິຕສ຺ສຕິຕາຍ ຫິ ອປ຺ປມຕ຺ໂຕ ຌາຍນ຺ໂຕ ປຸຄ຺ຄໂລ ວິປຸລໍ ອຸຬາຣໍ ນິພ຺ພານສຸຂໍ ປາປຸຓາຕີຕິ.

ຄາຖາປຣິໂຍສາເນ ພຫູ ໂສຕາປນ຺ນາທໂຍ ອເຫສຸໍ. ມຫາຊນສ຺ສ ສາຕ຺ຖິກາ ຘມ຺ມເທສນາ ຊາຕາຕິ.

ພາລນກ຺ຂຕ຺ຕສງ຺ຆຸຏ຺ຐວຕ຺ຖຸ ຈຕຸຕ຺ຖໍ.