ສນ຺ຕິເກນິທານກຖາ

ອຸທານໍ ອຸທາເນຕ຺ວາ ນິສິນ຺ນສ຺ສ ຠຄວໂຕ ເອຕທໂຫສິ – ‘‘ອຫໍ ກປ຺ປສຕສຫສ຺ສາຘິການິ ຈຕ຺ຕາຣິ ອສງ຺ຂ຺ເຍຍ຺ຍານິ ອິມສ຺ສ ປລ຺ລງ຺ກສ຺ສ ກາຣຓາ ສນ຺ຘາວິໍ, ອຍໍ ເມ ປລ຺ລງ຺ໂກ ວິຊຍປລ຺ລງ຺ໂກ ມງ຺ຄລປລ຺ລງ຺ໂກ, ເອຕ຺ຖ ເມ ນິສິນ຺ນສ຺ສ ຍາວ ສງ຺ກປ຺ໂປ ນ ປຣິປຸຓ຺ໂຓ, ນ ຕາວ ອິໂຕ ວຸຏ຺ຐຫິສ຺ສາມີ’’ຕິ ອເນກໂກຏິສຕສຫສ຺ສສງ຺ຂາ ສມາປຕ຺ຕິໂຍ ສມາປຊ຺ຊນ຺ໂຕ ສຕ຺ຕາຫໍ ຕຕ຺ເຖວ ນິສີທິ. ຍໍ ສນ຺ຘາຍ ວຸຕ຺ຕໍ – ‘‘ອຖ ໂຂ ຠຄວາ ສຕ຺ຕາຫໍ ເອກປລ຺ລງ຺ເກນ ນິສີທິ ວິມຸຕ຺ຕິສຸຂປຏິສໍເວທີ’’ຕິ (ມຫາວ. ໑).

ອເຖກຈ຺ຈານໍ ເທວຕານໍ – ‘‘ອຊ຺ຊາປິ ຕາວ ນູນ ສິທ຺ຘຕ຺ຖສ຺ສ ກຕ຺ຕພ຺ພກິຈ຺ຈໍ ອຕ຺ຖິ. ປລ຺ລງ຺ກສ຺ມິຎ຺ຫິ ອາລຍໍ ນ ວິຊຫຕີ’’ຕິ ປຣິວິຕກ຺ໂກ ອຸທປາທິ. ອຖ ສຕ຺ຖາ ເທວຕານໍ ວິຕກ຺ກໍ ຎຕ຺ວາ ຕາສໍ ວິຕກ຺ກູປສມນຕ຺ຖໍ ເວຫາສໍ ອພ຺ຠຸຄ຺ຄນ຺ຕ຺ວາ ຍມກປາຏິຫາຣິຍໍ ທສ຺ເສສິ. ເອວໍ ອິມິນາ ປາຏິຫາຣິເຍນ ເທວຕານໍ ວິຕກ຺ກໍ ວູປສເມຕ຺ວາ ປລ຺ລງ຺ກໂຕ ອີສກໍ ປາຈີນນິສ຺ສິເຕ ອຸຕ຺ຕຣທິສາຠາເຄ ຐຕ຺ວາ – ‘‘ອິມສ຺ມິໍ ວຕ ເມ ປລ຺ລງ຺ເກ ສພ຺ພຎ຺ຎຸຕຎ຺ຎາຓໍ ປຏິວິທ຺ຘ’’ນ຺ຕິ ຈຕ຺ຕາຣິ ອສງ຺ຂ຺ເຍຍ຺ຍານິ ກປ຺ປສຕສຫສ຺ສຎ຺ຈ ປູຣິຕານໍ ປາຣມີນໍ ຜລາຘິຄມນຏ຺ຐານໍ ປລ຺ລງ຺ກຎ຺ຈ ໂພຘິຣຸກ຺ຂຎ຺ຈ ອນິມິເສຫິ ອກ຺ຂີຫິ ໂອໂລກຍມາໂນ ສຕ຺ຕາຫໍ ວີຕິນາເມສິ, ຕໍ ຐານໍ ອນິມິສເຈຕິຍໍ ນາມ ຊາຕໍ.

ອຖ ປລ຺ລງ຺ກສ຺ສ ຈ ຐິຕຏ຺ຐານສ຺ສ ຈ ອນ຺ຕຣາ ຈງ຺ກມໍ ມາເປຕ຺ວາ ປຸຣຕ຺ຖິມປຈ຺ຉິມໂຕ ອາຍເຕ ຣຕນຈງ຺ກເມ ຈງ຺ກມນ຺ໂຕ ສຕ຺ຕາຫໍ ວີຕິນາເມສິ, ຕໍ ຐານໍ ຣຕນຈງ຺ກມເຈຕິຍໍ ນາມ ຊາຕໍ.

ຈຕຸຕ຺ເຖ ປນ ສຕ຺ຕາເຫ ໂພຘິໂຕ ປຈ຺ຉິມຸຕ຺ຕຣທິສາຠາເຄ ເທວຕາ ຣຕນຆຣໍ ມາປຍິໍສຸ. ຕຕ຺ຖ ປລ຺ລງ຺ເກນ ນິສີທິຕ຺ວາ ອຠິຘມ຺ມປິຏກໍ ວິຈິນນ຺ໂຕ ສຕ຺ຕາຫໍ ວີຕິນາເມສິ, ຕໍ ປນ ຐານໍ ຣຕນຆຣເຈຕິຍໍ ນາມ ຊາຕໍ.

ເອວໍ ຠຄວາ ໂພຘິສມີເປເຍວ ຈຕ຺ຕາຣິ ສຕ຺ຕາຫານິ ວີຕິນາເມຕ຺ວາ ປຎ຺ຈເມ ສຕ຺ຕາເຫ ໂພຘິຣຸກ຺ຂມູລາ ເຍນ ອຊປາລນິຄ຺ໂຣໂຘ ເຕນຸປສງ຺ກມິ. ຕຕ຺ຣາປິ ຘມ຺ມໍ ວິຈິນນ຺ໂຕ ວິມຸຕ຺ຕິສຸຂຎ຺ຈ ປຏິສໍເວເທນ຺ໂຕ ນິສີທິ.

ສຕ຺ຖາ ຕຕ຺ຖ ສຕ຺ຕາຫໍ ວີຕິນາເມຕ຺ວາ ມຸຈລິນ຺ທມູລໍ ອຄມາສິ. ຕຕ຺ຖ ສຕ຺ຕາຫວທ຺ທລິກາຍ ອຸປ຺ປນ຺ນາຍ ສີຕາທິປຏິພາຫນຕ຺ຖໍ ມຸຈລິນ຺ເທນ ນາຄຣາເຊນ ສຕ຺ຕກ຺ຂຕ຺ຕຸໍ ໂຠເຄຫິ ປຣິກ຺ຂິຕ຺ໂຕ ອສມ຺ພາຘາຍ ຄນ຺ຘກຸຏິຍາ ວິຫຣນ຺ໂຕ ວິຍ ວິມຸຕ຺ຕິສຸຂໍ ປຏິສໍເວທິຍມາໂນ ຕຕ຺ຖ ສຕ຺ຕາຫໍ ວີຕິນາເມຕ຺ວາ ຣາຊາຍຕນມູລໍ ອຸປສງ຺ກມິ. ຕຕ຺ຖປິ ວິມຸຕ຺ຕິສຸຂໍ ປຏິສໍເວທິຍມາໂນວ ສຕ຺ຕາຫໍ ນິສີທິ. ເອຕ຺ຕາວຕາ ສຕ຺ຕ ສຕ຺ຕາຫານິ ປຣິປຸຓ຺ຓານິ. ເອຕ຺ຖນ຺ຕເຣ ຠຄວໂຕ ເນວ ມຸຂໂຘວນໍ ນ ສຣີຣປຏິຊຄ຺ຄນໍ ນາຫາຣກິຈ຺ຈໍ ອໂຫສິ, ຜລສຸເຂເນວ ວີຕິວຕ຺ເຕສິ. ອຖ ສຕ຺ຕສຕ຺ຕາຫມຕ຺ຖເກ ເອກູນປຎ຺ຎາສຕິເມ ທິວເສ ສກ຺ເກນ ເທວານມິນ຺ເທນ ອຸປນີເຕນ ນາຄລຕາທນ຺ຕກຏ຺ເຐນ ຈ ອໂນຕຕ຺ຕທໂຫທເກນ ຈ ມຸຂໍ ໂຘວິຕ຺ວາ ຕຕ຺ເຖວ ຣາຊາຍຕນມູເລ ນິສີທິ.

ຕສ຺ມິໍ ສມເຍ ຕປຸສ຺ສຠລ຺ລິກາ ນາມ ທ຺ເວ ວາຓິຊາ ຎາຕິສາໂລຫິຕາຍ ເທວຕາຍ ສຕ຺ຖຸ ອາຫາຣທາເນ ອຸສ຺ສາຫິຕາ ມນ຺ຖຎ຺ຈ ມຘຸປິຓ຺ຑິກຎ຺ຈ ອາທາຍ – ‘‘ປຏິຄ຺ຄຓ຺ຫາຕຸ ຠຄວາ ອິມໍ ອາຫາຣໍ ອນຸກມ຺ປໍ ອຸປາທາຍາ’’ຕິ ສຕ຺ຖາຣໍ ອຸປສງ຺ກມິຕ຺ວາ ອຏ຺ຐໍສຸ. ຠຄວາ ປາຍາສປຏິຄ຺ຄຫຓທິວເສເຍວ ເທວທຕ຺ຕິຍສ຺ສ ປຕ຺ຕສ຺ສ ອນ຺ຕຣຫິຕຕ຺ຕາ – ‘‘ນ ໂຂ ຕຖາຄຕາ ຫຕ຺ເຖສຸ ອາຫາຣໍ ປຏິຄ຺ຄຓ຺ຫນ຺ຕິ, ກິມ຺ຫິ ນຸ ໂຂ ອຫໍ ອິມໍ ປຏິຄ຺ຄຓ຺ເຫຍ຺ຍ’’ນ຺ຕິ ຈິນ຺ເຕສິ. ອຖສ຺ສ ຠຄວໂຕ ອຊ຺ຌາສຍໍ ວິທິຕ຺ວາ ຈຕູຫິ ທິສາຫິ ຈຕ຺ຕາໂຣ ມຫາຣາຊາໂນ ອິນ຺ທນີລມຓິມເຍ ຈຕ຺ຕາໂຣ ປຕ຺ເຕ ອຸປນາເມສຸໍ. ຠຄວາ ເຕ ປຏິກ຺ຂິປິ. ປຸນ ມຸຄ຺ຄວຓ຺ເຓ ສິລາມເຍ ຈຕ຺ຕາໂຣ ປຕ຺ເຕ ອຸປນາເມສຸໍ. ຠຄວາ ເຕສໍ ຈຕຸນ຺ນມ຺ປິ ເທວປຸຕ຺ຕານໍ ອນຸກມ຺ປໍ ອຸປາທາຍ ປຏິຄ຺ຄເຫຕ຺ວາ ເອກີຠາວໍ ອຸປເນຕ຺ວາ ຕສ຺ມິໍ ປຈ຺ຈຄ຺ເຆ ເສລມເຍ ປຕ຺ເຕ ອາຫາຣໍ ປຏິຄ຺ຄເຫຕ຺ວາ ປຣິຠຸຎ຺ຊິຕ຺ວາ ອນຸໂມທນມກາສິ. ເຕ ທ຺ເວ ຠາຕໂຣ ວາຓິຊາ ພຸທ຺ຘຎ຺ຈ ຘມ຺ມຎ຺ຈ ສຣຓໍ ຄນ຺ຕ຺ວາ ທ຺ເວວາຈິກາ ອຸປາສກາ ອເຫສຸໍ.

ອຖ ສຕ຺ຖາ ປຸນ ອຊປາລນິຄ຺ໂຣຘເມວ ຄນ຺ຕ຺ວາ ນິຄ຺ໂຣຘມູເລ ນິສີທິ. ອຖສ຺ສ ຕຕ຺ຖ ນິສິນ຺ນມຕ຺ຕສ຺ເສວ ອຘິຄຕສ຺ສ ຘມ຺ມສ຺ສ ຄມ຺ຠີຣຕໍ ປຈ຺ຈເວກ຺ຂນ຺ຕສ຺ສ ສພ຺ພພຸທ຺ຘານໍ ອາຈິຓ຺ໂຓ – ‘‘ອຘິຄໂຕ ໂຂ ມ຺ຍາຍໍ ຘມ຺ໂມ’’ຕິອາທິນາ (ທີ. ນິ. ໒.໖໔; ມ. ນິ. ໑.໒໘໑; ໒.໓໓໗; ສໍ. ນິ. ໑.໑໗໒; ມຫາວ. ໗) ປເຣສໍ ຘມ຺ມໍ ອເທເສຕຸກາມຕາກາຣປ຺ປຕ຺ໂຕ ປຣິວິຕກ຺ໂກ ອຸທປາທິ. ອຖ ພ຺ຣຫ຺ມາ ສຫມ຺ປຕິ ‘‘ນສ຺ສຕິ ວຕ ໂຠ ໂລໂກ, ວິນສ຺ສຕິ ວຕ ໂຠ ໂລໂກ’’ຕິ (ທີ. ນິ. ໒.໖໖; ມ. ນິ. ໑.໒໘໒; ໒.໓໓໘; ສໍ. ນິ. ໑.໑໗໒; ມຫາວ. ໘) ທສສຸ ຈກ຺ກວາຬສຫສ຺ເສສຸ ສກ຺ກສຸຍາມສນ຺ຕຸສິຕນິມ຺ມານຣຕິປຣນິມ຺ມິຕວສວຕ຺ຕິມຫາພ຺ຣຫ຺ມາໂນ ຈ ຄເຫຕ຺ວາ ສຕ຺ຖຸ ສນ຺ຕິກໍ ອາຄນ຺ຕ຺ວາ – ‘‘ເທເສຕຸ, ຠນ຺ເຕ, ຠຄວາ ຘມ຺ມ’’ນ຺ຕິອາທິນາ (ທີ. ນິ. ໒.໖໖; ມ. ນິ. ໑.໒໘໒; ໒.໓໓໘; ສໍ. ນິ. ໑.໑໗໒; ມຫາວ. ໘) ນເຍນ ຘມ຺ມເທສນໍ ອາຍາຈິ.

ອຖ ສຕ຺ຖາ ຕສ຺ສ ປຏິຎ຺ຎໍ ທຕ຺ວາ – ‘‘ກສ຺ສ ນຸ ໂຂ ອຫໍ ປຐມໍ ຘມ຺ມໍ ເທເສຍ຺ຍ’’ນ຺ຕິ ຈິນ຺ເຕນ຺ໂຕ ອາຬາຣຸທການໍ ກາລງ຺ກຕຠາວໍ ຎຕ຺ວາ – ‘‘ພຫູປກາຣາ ໂຂ ເມ ປຎ຺ຈວຄ຺ຄິຍາ ຠິກ຺ຂູ’’ຕິ ປຎ຺ຈວຄ຺ຄິເຍ ອາຣພ຺ຠ ມນສິກາຣໍ ກຕ຺ວາ – ‘‘ກຫໍ ນຸ ໂຂ ເຕ ເອຕຣຫິ ວິຫຣນ຺ຕີ’’ຕິ ອາວຊ຺ເຊນ຺ໂຕ – ‘‘ພາຣາຓສິຍໍ ອິສິປຕເນ ມິຄທາເຍ’’ຕິ ຎຕ຺ວາ – ‘‘ຕຕ຺ຖ ຄນ຺ຕ຺ວາ ຘມ຺ມຈກ຺ກໍ ປວຕ຺ເຕສ຺ສາມີ’’ຕິ ກຕິປາຫໍ ໂພຘິມຓ຺ຑສາມນ຺ເຕເຍວ ປິຓ຺ຑາຍ ຈຣນ຺ໂຕ ວິຫຣິຕ຺ວາ ອາສາຬ຺ຫິປຸຓ຺ຓມິຍໍ ພາຣາຓສິໍ ຄມິສ຺ສາມີ’’ຕິ ປຕ຺ຕຈີວຣມາທາຍ ອຏ຺ຐາຣສໂຍຊນມຄ຺ຄໍ ປຏິປຊ຺ຊິ. ອນ຺ຕຣາມຄ຺ເຄ ຫຏ຺ຐຕຸປຄໍ ອຸປກໍ ນາມ ອາຊີວກໍ ທິສ຺ວາ ຕສ຺ສ ອຕ຺ຕໂນ ພຸທ຺ຘຠາວໍ ອາຈິກ຺ຂິຕ຺ວາ ຕໍທິວສໍເຍວ ສາຍນ຺ຫສມເຍ ອິສິປຕນໍ ອຄມາສິ.

ປຎ຺ຈວຄ຺ຄິຍາ ປນ ຕຖາຄຕໍ ທູຣໂຕວ ອາຄຈ຺ຉນ຺ຕໍ ທິສ຺ວາ – ‘‘ອຍໍ, ອາວຸໂສ, ສມໂຓ ໂຄຕໂມ ປຈ຺ຈຍພາຫຸລ຺ລາຍ ອາວຕ຺ໂຕ ປຣິປຸຓ຺ຓກາໂຍ ປີຓິນ຺ທ຺ຣິໂຍ ສຸວຓ຺ຓວຓ຺ໂຓ ຫຸຕ຺ວາ ອາຄຈ຺ຉຕິ, ອິມສ຺ສ ອຠິວາທນາທີນິ ນ ກຣິສ຺ສາມ, ອາສນມຕ຺ຕໍ ປນ ປຎ຺ຎາເປຍ຺ຍາມາ’’ຕິ ກຕິກໍ ອກໍສຸ. ຠຄວາ ເຕສໍ ຈິຕ຺ຕາຈາຣໍ ຎຕ຺ວາ ສພ຺ພສຕ຺ເຕສຸ ອໂນຘິສ຺ສກວເສນ ຜຣຓສມຕ຺ຖໍ ເມຕ຺ຕຈິຕ຺ຕໍ ສໍຂິປິຕ຺ວາ ໂອຘິສ຺ສກວເສນ ເມຕ຺ຕຈິຕ຺ເຕນ ຜຣິ. ເຕ ຠຄວໂຕ ເມຕ຺ຕຈິຕ຺ເຕນ ຜຸຏ຺ຐາ ຕຖາຄເຕ ອຸປສງ຺ກມນ຺ເຕ ສກາຍ ກຕິກາຍ ສຓ຺ຐາຕຸໍ ອສກ຺ໂກນ຺ຕາ ອຠິວາທນາທີນິ ສພ຺ພກິຈ຺ຈານິ ອກໍສຸ. ວິຕ຺ຖາຣກຖາ ວິນຍມຫາວຄ຺ຄາທີສຸ ວຸຕ຺ຕນເຍເນວ ເວທິຕພ຺ພາ.

ອຖ ຠຄວາ ອຕ຺ຕໂນ ພຸທ຺ຘຠາວໍ ເຕ ຎາເປຕ຺ວາ ປຎ຺ຎຕ຺ຕວຣພຸທ຺ຘາສເນ ນິສີທິຕ຺ວາ ອຸຕ຺ຕຣາສາຬ຺ຫນກ຺ຂຕ຺ຕໂຍເຄ ວຕ຺ຕມາເນ ອຏ຺ຐາຣສຫິ ພ຺ຣຫ຺ມໂກຏີຫິ ປຣິວຸໂຕ ປຎ຺ຈວຄ຺ຄິເຍ ເຖເຣ ອາມນ຺ເຕຕ຺ວາ ຘມ຺ມຈກ຺ກປ຺ປວຕ຺ຕນສຸຕ຺ຕນ຺ຕໍ ເທເສສິ. ເຕສຸ ອຎ຺ຎາສິໂກຓ຺ຑຎ຺ໂຎ ເທສນານຸສາເຣນ ຎາຓໍ ເປເສນ຺ໂຕ ສຸຕ຺ຕປຣິໂຍສາເນ ອຏ຺ຐາຣສຫິ ພ຺ຣຫ຺ມໂກຏີຫິ ສທ຺ຘິໍ ໂສຕາປຕ຺ຕິຜເລ ປຕິຏ຺ຐາສິ. ເຕນ ວຸຕ຺ຕໍ –

໑. ‘‘ອຫເມຕຣຫິ ສມ຺ພຸທ຺ໂຘ, ໂຄຕໂມ ສກ຺ຍວຑ຺ຒໂນ;

ປຘານໍ ປທຫິຕ຺ວານ, ປຕ຺ໂຕ ສມ຺ໂພຘິມຸຕ຺ຕມໍ.

໒. ‘‘ພ຺ຣຫ຺ມຸນາ ຍາຈິໂຕ ສນ຺ໂຕ, ຘມ຺ມຈກ຺ກໍ ປວຕ຺ຕຍິໍ;

ອຏ຺ຐາຣສນ຺ນໍ ໂກຏີນໍ, ປຐມາຠິສມໂຍ ອຫູ’’ຕິ.

ຕຕ຺ຖ ອຫນ຺ຕິ ອຕ຺ຕານໍ ນິທ຺ທິສຕິ. ເອຕຣຫີຕິ ອສ຺ມິໍ ກາເລ. ສກ຺ຍວຑ຺ຒໂນຕິ ສາກິຍກຸລວຑ຺ຒໂນ. ‘‘ສກ຺ຍປຸງ຺ຄໂວ’’ຕິປິ ປາໂຐ. ປຘານນ຺ຕິ ວີຣິຍໍ ວຸຈ຺ຈຕິ. ປທຫິຕ຺ວານາຕິ ຆເຏຕ຺ວາ ວາຍມິຕ຺ວາ, ທຸກ຺ກຣກາຣິກໍ ກຕ຺ວາຕິ ອຕ຺ໂຖ. ອຏ຺ຐາຣສນ຺ນໍ ໂກຏີນນ຺ຕິ ພາຣາຓສິຍໍ ອິສິປຕເນ ມິຄທາເຍ ຘມ຺ມຈກ຺ກປ຺ປວຕ຺ຕນສຸຕ຺ຕນ຺ຕກຖາຍ ອຎ຺ຎາສິໂກຓ຺ຑຎ຺ຎຕ຺ເຖຣປ຺ປມຸຂານໍ ອຏ຺ຐາຣສນ຺ນໍ ພ຺ຣຫ຺ມໂກຏີນໍ ປຐມາຠິສມໂຍ ອໂຫສີຕິ ອຕ຺ໂຖ.

ອິທານິ ຠຄວາ ອຕີຕໍ ກເຖຕ຺ວາ ອນາຄຕໍ ອຠິສມຍໍ ກເຖນ຺ໂຕ –

໓. ‘‘ຕໂຕ ປຣຎ຺ຈ ເທເສນ຺ເຕ, ນຣເທວສມາຄເມ;

ຄຓນາຍ ນ ວຕ຺ຕພ຺ໂພ, ທຸຕິຍາຠິສມໂຍ ອຫູ’’ຕິ. – ອາທິມາຫ;

ຕຕ຺ຖ ນຣເທວສມາຄເມຕິ ຕໂຕ ອປເຣນ ສມເຍນ ມຫາມງ຺ຄລສມາຄເມ ທສສຸ ຈກ຺ກວາຬສຫສ຺ເສສຸ ເທວມນຸສ຺ສານໍ ມຊ຺ເຌ ມງ຺ຄລສຸຕ຺ຕປຣິໂຍສາເນ (ຂຸ. ປາ. ໕.໑ ອາທໂຍ; ສຸ. ນິ. ໒໖໑ ອາທໂຍ) ຄຓນປຖໍ ວີຕິວຕ຺ຕານໍ ນຣເທວານໍ. ທຸຕິຍາຠິສມໂຍ ອຫູຕິ ເຫສ຺ສຕີຕິ ອຕ຺ໂຖ. ອນາຄຕວຈເນ ວຕ຺ຕພ຺ເພ ໂສຕປຕິຕຕ຺ຕາ ‘‘ອຫູ’’ຕິ ອຕີຕວຈນໍ ວຸຕ຺ຕໍ, ກາລວິປຣິຍາຍວເສນ ວາ. ເອສ ນໂຍ ອິໂຕ ປເຣສຸ ອີທິເສສຸ ວຈເນສຸ ຈ. ປຸນ ຣາຫຸໂລວາທສຸຕ຺ຕນ຺ຕເທສນາຍ (ມ. ນິ. ໓.໔໑໖ ອາທໂຍ) ຄຓນປຖວີຕິວຕ຺ເຕ ສຕ຺ເຕ ອຠິສມຍາມຕປານໍ ປາເຍສິ. ອຍໍ ຕຕິຍາຠິສມໂຍ. ເຕນ ວຸຕ຺ຕໍ –

໔. ‘‘ອິເຘວາຫໍ ເອຕຣຫິ, ໂອວທິໍ ມມ ອຕ຺ຣຊໍ;

ຄຓນາຍ ນ ວຕ຺ຕພ຺ໂພ, ຕຕິຍາຠິສມໂຍ ອຫູ’’ຕິ.

ຠຄວໂຕ ກິຣ ເອໂກວ ສາວກສນ຺ນິປາໂຕ ອໂຫສິ. ອຸຣຸເວລກສ຺ສປາທີນໍ ຊຏິລານໍ ສຫສ຺ສໍ, ທ຺ວິນ຺ນໍ ອຄ຺ຄສາວການໍ ອຑ຺ຒຕ຺ຕິຍສຕານີຕິ ອິເມສໍ ອຑ຺ຒເຕຬສສຕານໍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໕. ‘‘ເອໂກສິ ສນ຺ນິປາໂຕ ເມ, ສາວການໍ ມເຫສິນໍ;

ອຑ຺ຒເຕຬສສຕານໍ, ຠິກ຺ຂູນາສິ ສມາຄໂມ’’ຕິ.

ຕຕ຺ຖ ເອໂກສີຕິ ເອໂກວ ອາສິ. ອຑ຺ຒເຕຬສສຕານນ຺ຕິ ມມ ສາວການໍ ປຎ຺ຎາສາຘິການໍ ທ຺ວາທສສຕານໍ. ຠິກ຺ຂູນາສີຕິ ຠິກ຺ຂູນໍ ອາສິ. ເຕສໍ ປນ ມຊ຺ຌຄໂຕ ຠຄວາ ຈຕຸຣງ຺ຄສນ຺ນິປາເຕ ປາຕິໂມກ຺ຂໍ ອຸທ຺ທິສິ.

ອຖ ຠຄວາ ອຕ຺ຕໂນ ປວຕ຺ຕິໍ ທສ຺ເສນ຺ໂຕ –

໖. ‘‘ວິໂຣຈມາໂນ ວິມໂລ, ຠິກ຺ຂຸສງ຺ຆສ຺ສ ມຊ຺ຌໂຄ;

ທທາມິ ປຕ຺ຖິຕໍ ສພ຺ພໍ, ມຓີວ ສພ຺ພກາມໂທ’’ຕິ. – ອາທິມາຫ;

ຕຕ຺ຖ ວິໂຣຈມາໂນຕິ ອນນ຺ຕພຸທ຺ຘສິຣິຍາ ວິໂຣຈມາໂນ. ວິມໂລຕິ ວິຄຕຣາຄາທິກິເລສມໂລ. ມຓີວ ສພ຺ພກາມໂທຕິ ຈິນ຺ຕາມຓິ ວິຍ ສພ຺ພກາມທໂທ ອຫມ຺ປິ ອິຈ຺ຉິຕໍ ປຕ຺ຖິຕໍ ສພ຺ພໍ ໂລກິຍໂລກຸຕ຺ຕຣສຸຂວິເສສໍ ເທມີຕິ ອຕ຺ໂຖ.

ອິທານິ ປຕ຺ຖິຕປຕ຺ຖນໍ ທສ຺ເສນ຺ໂຕ –

໗. ‘‘ຜລມາກງ຺ຂມານານໍ, ຠວຈ຺ຉນ຺ທຊເຫສິນໍ;

ຈຕຸສຈ຺ຈໍ ປກາເສມິ, ອນຸກມ຺ປາຍ ປາຓິນ’’ນ຺ຕິ. – ອາທິມາຫ;

ຕຕ຺ຖ ຜລນ຺ຕິ ໂສຕາປຕ຺ຕິຜລາທິກໍ ຈຕຸພ຺ພິຘໍ ຜລໍ. ຠວຈ຺ຉນ຺ທຊເຫສິນນ຺ຕິ ຠວຕຓ຺ຫາປຫາຍິນໍ, ຠວຕຓ຺ຫໍ ປຊຫິຕຸກາມານໍ. ອນຸກມ຺ປາຍາຕິ ອນຸທ຺ທຍາຍ.

໘. ອິທານິ ຈຕຸສຈ຺ຈປ຺ປກາສເນ, ອຠິສມຍໍ ທສ຺ເສນ຺ໂຕ ‘‘ທສວີສສຫສ຺ສານ’’ນ຺ຕິ ອາທິມາຫ.

ຕຕ຺ຖ ທສວີສສຫສ຺ສານນ຺ຕິ ທສສຫສ຺ສານຎ຺ຈ ວີສຕິສຫສ຺ສານຎ຺ຈ. ເອກທ຺ວິນ຺ນນ຺ຕິອາທິນາ ນເຍນາຕິ ອຕ຺ໂຖ. ນວມທສມຄາຖາ ອຸຕ຺ຕານຕ຺ຖາວ.

໑໑-໑໒. ເອກາທສມທ຺ວາທສມຄາຖາສຸ ອິທາເນຕຣຫີຕິ ອຸໂຠປິ ເອກຕ຺ຖາ, ເວເນຍ຺ຍວເສນ ປຸຣິສປຸຄ຺ຄລາ ວິຍ ວຸຕ຺ຕາ. ອຖ ວາ ອິທານີຕິ ມຍິ ອຸປ຺ປນ຺ເນ. ເອຕຣຫີຕິ ມຍິ ຘມ຺ມໍ ເທເສນ຺ເຕ. ອປຕ຺ຕມານສາຕິ ອປ຺ປຕ຺ຕອຣຫຕ຺ຕຜລາ. ອຣິຍຎ຺ຊສນ຺ຕິ ອຣິຍໍ ອຏ຺ຐງ຺ຄິກໍ ມຄ຺ຄໍ. ໂຖມຍນ຺ຕາຕິ ປສໍສນ຺ຕາ. ພຸຊ຺ຌິສ຺ສນ຺ຕີຕິ ອນາຄເຕ ຈຕຸສຈ຺ຈຘມ຺ມໍ ປຏິວິຊ຺ຌິສ຺ສນ຺ຕີຕິ ອຕ຺ໂຖ. ສໍສາຣສຣິຕນ຺ຕິ ສໍສາຣສາຄຣໍ.

ອິທານິ ອຕ຺ຕໂນ ຊາຕນຄຣາທິໍ ທສ຺ເສນ຺ໂຕ –

໑໓. ‘‘ນຄຣໍ ກປິລວຕ຺ຖຸ ເມ, ຣາຊາ ສຸທ຺ໂຘທໂນ ປິຕາ;

ມຍ຺ຫໍ ຊເນຕ຺ຕິກາ ມາຕາ, ມາຍາເທວີຕິ ວຸຈ຺ຈຕິ.

໑໔. ‘‘ເອກູນຕິໍສວສ຺ສານິ, ອຄາຣໍ ອຊ຺ຌຫໍ ວສິໍ;

ຣມ຺ໂມ ສຸຣມ຺ໂມ ສຸຠໂກ, ຕໂຍ ປາສາທມຸຕ຺ຕມາ.

໑໕. ‘‘ຈຕ຺ຕາລີສສຫສ຺ສານິ, ນາຣິໂຍ ສມລງ຺ກຕາ;

ຠທ຺ທກຎ຺ຈນາ ນາມ ນາຣີ, ຣາຫຸໂລ ນາມ ອຕ຺ຣໂຊ.

໑໖. ‘‘ນິມິຕ຺ເຕ ຈຕຸໂຣ ທິສ຺ວາ, ອສ຺ສຍາເນນ ນິກ຺ຂມິໍ;

ຉພ຺ພສ຺ສໍ ປຘານຈາຣໍ, ອຈຣິໍ ທຸກ຺ກຣໍ ອຫໍ.

໑໗. ‘‘ພາຣາຓສິຍໍ ອິສິປຕເນ, ຈກ຺ກໍ ປວຕ຺ຕິຕໍ ມຍາ;

ອຫໍ ໂຄຕມສມ຺ພຸທ຺ໂຘ, ສຣຓໍ ສພ຺ພປາຓິນໍ.

໑໘. ‘‘ໂກລິໂຕ ອຸປຕິສ຺ໂສ ຈ, ທ຺ເວ ຠິກ຺ຂູ ອຄ຺ຄສາວກາ;

ອານນ຺ໂທ ນາມຸປຏ຺ຐາໂກ, ສນ຺ຕິກາວຈໂຣ ມມ;

ເຂມາ ອຸປ຺ປລວຓ຺ຓາ ຈ, ຠິກ຺ຂຸນີ ອຄ຺ຄສາວິກາ.

໑໙. ‘‘ຈິຕ຺ໂຕ ຫຕ຺ຖາຬວໂກ ຈ, ອຄ຺ຄຸປຏ຺ຐາກຸປາສກາ;

ນນ຺ທມາຕາ ຈ ອຸຕ຺ຕຣາ, ອຄ຺ຄຸປຏ຺ຐາກຸປາສິກາ.

໒໐. ‘‘ອຫໍ ອສ຺ສຕ຺ຖມູລມ຺ຫິ, ປຕ຺ໂຕ ສມ຺ໂພຘິມຸຕ຺ຕມໍ;

ພ຺ຍາມປ຺ປຠາ ສທາ ມຍ຺ຫໍ, ໂສຬສຫຕ຺ຖມຸຄ຺ຄຕາ.

໒໑. ‘‘ອປ຺ປໍ ວສ຺ສສຕໍ ອາຍຸ, ອິທາເນຕຣຫິ ວິຊ຺ຊຕິ;

ຕາວຕາ ຕິຏ຺ຐມາໂນຫໍ, ຕາເຣມິ ຊນຕໍ ພຫຸໍ.

໒໒. ‘‘ຐປຍິຕ຺ວານ ຘມ຺ມຸກ຺ກໍ, ປຈ຺ຉິມໍ ຊນໂພຘນໍ;

ອຫມ຺ປິ ນ ຈິຣສ຺ເສວ, ສທ຺ຘິໍ ສາວກສງ຺ຆໂຕ;

ອິເຘວ ປຣິນິພ຺ພິສ຺ສໍ, ອຄ຺ຄີວາຫາຣສງ຺ຂຍາ’’ຕິ. – ອາທິມາຫ;

ມມ ປນ ຣມ຺ມສຸຣມ຺ມສຸຠນາມກາ ຕໂຍ ປາສາທາ ນວຠູມິກສຕ຺ຕຠູມິກປຎ຺ຈຠູມິກາ, ຈຕ຺ຕາລີສສຫສ຺ສາ ນາຏກິຕ຺ຖິໂຍ, ຍໂສຘຣາ ນາມ ມມ ອຄ຺ຄມເຫສີ, ໂສຫໍ ຈຕ຺ຕາໂຣ ນິມິຕ຺ເຕ ທິສ຺ວາ ອສ຺ສຍາເນນ ມຫາຠິນິກ຺ຂມນໍ ນິກ຺ຂມິໍ. ຕໂຕ ຉພ຺ພສ຺ສານິ ປຘານໍ ປທຫິຕ຺ວາ ວິສາຂປຸຓ຺ຓມາຍ ອຸຣຸເວລາຍໍ ເສນານິຄເມ ເສນາກຸຏຸມ຺ພິກສ຺ສ ຘີຕາຍ ສມ຺ປສາທຊາຕາຍ ສຸຊາຕາຍ ນາມ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ສາລວເນ ທິວາວິຫາຣໍ ກຕ຺ວາ ສາຍນ຺ຫສມເຍ ໂສຕ຺ຖິເຍນ ນາມ ຕິຓຫາຣເກນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ອສ຺ສຕ຺ຖໂພຘິຣຸກ຺ຂມູລໍ ອຸປຄນ຺ຕ຺ວາ ຕຕ຺ຖ ມາຣພລໍ ວິທ຺ຘໍເສຕ຺ວາ ສມ຺ໂພຘິໍ ປຕ຺ໂຕສ຺ມີຕິ ສພ຺ພໍ ພ຺ຍາກາສິ.

ຕຕ຺ຖ ສທ຺ຘິໍ ສາວກສງ຺ຆໂຕຕິ ສທ຺ຘິໍ ສາວກສງ຺ເຆນ. ປຣິນິພ຺ພິສ຺ສນ຺ຕິ ປຣິນິພ຺ພາຍິສ຺ສາມິ. ອຄ຺ຄີວາຫາຣສງ຺ຂຍາຕິ ອຄ຺ຄິ ວິຍ ອິນ຺ຘນກ຺ຂເຍນ ຍຖາ ອຄ຺ຄິ ນິຣຸປາທາໂນ ນິພ຺ພາຍຕິ, ເອວໍ ອຫມ຺ປິ ນິຣຸປາທາໂນ ປຣິນິພ຺ພາຍິສ຺ສາມີຕິ ອຕ຺ໂຖ.

໒໓-໔. ຕານິ ຈ ອຕຸລເຕຊານີຕິ ອຄ຺ຄສາວກຍຸຄາທີນິ ຕານິ ອສທິສເຕຊານິ. ອິມານິ ຈ ທສພລານີຕິ ເອຕານິ ຈ ສາຣີຣທສພລານິ ຄຸຓຘາຣໂຓ ເທໂຫຕິ ຉອສາຘາຣຓຎາຓາທິຄຸຓຘໂຣ ອຍໍ ເທໂຫ ຈ. ຕມນ຺ຕຣຫິສ຺ສນ຺ຕີຕິ ສພ຺ພານິ ເອຕານິ ວຸຕ຺ຕປ຺ປກາຣານິ ອນ຺ຕຣຘາຍິສ຺ສນ຺ຕິ ວິນສ຺ສິສ຺ສນ຺ຕິ. ນນຸ ຣິຕ຺ຕາ ສພ຺ພສງ຺ຂາຣາຕິ ເອຕ຺ຖ ນນູຕິ ອຍໍ ອນຸມຕິອຕ຺ເຖ ນິປາໂຕ. ຣິຕ຺ຕາຕິ ນິຈ຺ຈສາຣຘຸວສາຣຣຫິຕຕ຺ຕາ ຕຸຈ຺ຉາ, ສພ຺ພເມວ ປນ ສງ຺ຂຕໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມໍ ຫຸຕ຺ວາ ອຠາວໂຕ ອນິຈ຺ຈໍ, ອຸປ຺ປາທາທິປຏິປີຬິຕຕ຺ຕາ ທຸກ຺ຂໍ, ອວສວຕ຺ຕນໂຕ ອນຕ຺ຕາ. ຕສ຺ມາ ສງ຺ຂາເຣສຸ ລກ຺ຂຓຕ຺ຕຍໍ ອາໂຣເປຕ຺ວາ ວິປສ຺ສນໍ ວຑ຺ເຒຕ຺ວາ ອມຕມສງ຺ຂຕໍ ອຈ຺ຈຸຕໍ ນິພ຺ພານໍ ອຘິຄຈ຺ຉຖ. ອຍໍ ໂວ ອມ຺ຫາກໍ ອນຸສາສນີ ອິທໍ ອມ຺ຫາກໍ ສາສນໍ ອປ຺ປມາເທນ ສມ຺ປາເທຖາຕິ. ເທສນາປຣິໂຍສາເນ ກິຣ ເທວຕານໍ ໂກຏິສຕສຫສ຺ສສ຺ສ ອນຸປາທາຍ ອາສເວຫິ ຈິຕ຺ຕານິ ວິມຸຈ຺ຈິໍສຸ. ເສສມຄ຺ຄຜເລສຸ ປຕິຏ຺ຐິຕາ ປນ ຄຓນປຖໍ ວີຕິວຕ຺ຕາ ອເຫສຸໍ.

ເອວໍ ຠຄວາ ກປ຺ປນາມຊາຕິອາທິວວຕ຺ຖິຕໍ ສກລມ຺ປິ ພຸທ຺ຘວໍສໍ ອາກາເສ ຣຕນຈງ຺ກເມ ຈງ຺ກມນ຺ໂຕວ ກເຖຕ຺ວາ ຎາຕິຊນໍ ວນ຺ທາເປຕ຺ວາ ອາກາສໂຕ ໂອຕຣິຕ຺ວາ ປຎ຺ຎຕ຺ຕວຣພຸທ຺ຘາສເນ ນິສີທິ. ເອວໍ ນິສິນ຺ເນ ປນ ຠຄວຕິ ໂລກນາເຖ ສິຂາປ຺ປຕ຺ໂຕ ຎາຕິສມາຄໂມ ອໂຫສິ. ສພ຺ເພ ເອກຄ຺ຄຈິຕ຺ຕາ ນິສີທິໍສຸ. ຕໂຕ ມຫາເມໂຆ ໂປກ຺ຂຣວສ຺ສໍ ວສ຺ສິ. ຕງ຺ຂເຓ ອຸທກໍ ເຫຏ຺ຐາ ວິຣວນ຺ຕໍ ຄຈ຺ຉຕິ. ເຕເມຕຸກາໂມວ ເຕເມຕິ, ອເຕມິຕຸກາມສ຺ສ ສຣີເຣ ເອກພິນ຺ທຸມຕ຺ຕມ຺ປິ ນ ປຕຕິ. ຕໍ ທິສ຺ວາ ສພ຺ເພ ອຈ຺ຉຣິຍພ຺ຠຸຕຈິຕ຺ຕຊາຕາ ຫຸຕ຺ວາ – ‘‘ອໂຫ ອຈ຺ຉຣິຍໍ, ອໂຫ ອພ຺ຠຸຕ’’ນ຺ຕິ ກຖໍ ສມຸຏ຺ຐາເປສຸໍ. ຕໍ ສຸຕ຺ວາ ສຕ຺ຖາ – ‘‘ນ ອິທາເນວ ມຍ຺ຫໍ ຎາຕິສມາຄເມ ໂປກ຺ຂຣວສ຺ສໍ ວສ຺ສິ, ອຕີເຕປິ ວສ຺ສີ’’ຕິ ອິມິສ຺ສາ ອຏ຺ຐຸປ຺ປຕ຺ຕິຍາ ເວສ຺ສນ຺ຕຣຊາຕກໍ (ຊາ. ໒.໒໒.໑໖໕໕ ອາທໂຍ) ກເຖສິ. ສາ ຘມ຺ມເທສນາ ສາຕ຺ຖິກາ ຊາຕາ. ຕໂຕ ຠຄວາ ອຸຏ຺ຐາຍາສນາ ວິຫາຣໍ ປາວິສິ.

ອິຕິ ມຘຸຣຕ຺ຖວິລາສິນິຍາ ພຸທ຺ຘວໍສຏ຺ຐກຖາຍ

ໂຄຕມພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ປຎ຺ຈວີສຕິໂມ ພຸທ຺ຘວໍໂສ.