໒໕. ໂກຓາຄມນພຸທ຺ຘວໍສວຓ຺ຓນາ

ກກຸສນ຺ຘສ຺ສ ປນ ຠຄວໂຕ ອປຣຠາເຄ ຕສ຺ສ ສາສເນ ຈ ອນ຺ຕຣຫິເຕ ສຕ຺ເຕສຸ ຕິໍສວສ຺ສສຫສ຺ສາຍຸເກສຸ ຊາເຕສຸ ປຣຫິຕໂກຓາຄມໂນ ໂກຓາຄມໂນ ນາມ ສຕ຺ຖາ ໂລເກ ອຸທປາທິ. ອຖ ວາ ກນກາຄມນໂຕ ໂກຓາຄມໂນ ນາມ ສຕ຺ຖາ ໂລເກ ອຸທປາທິ. ຕຕ຺ຖ ກ-ກາຣສ຺ສ ໂກອາເທສໍ ກຕ຺ວາ ນ-ກາຣສ຺ສ ຓາເທສໍ ກຕ຺ວາ ເອກສ຺ສ ກ-ກາຣສ຺ສ ໂລປໍ ກຕ຺ວາ ນິຣຸຕ຺ຕິນເຍນ ກນກສ຺ສ ກນກາທິອາຠຣຓສ຺ສ ອາຄມນໍ ປວສ຺ສນໍ ຍສ຺ສ ຠຄວໂຕ ອຸປ຺ປນ຺ນກາເລ ໂສ ໂກຓາຄມໂນ ນາມ. ເອຕ຺ຖ ປນ ອາຍຸ ອນຸປຸພ຺ເພນ ປຣິຫີນສທິສໍ ກຕໍ, ນ ເອວໍ ປຣິຫີນໍ, ປຸນ ວຑ຺ຒິຕ຺ວາ ປຣິຫີນນ຺ຕິ ເວທິຕພ຺ພໍ. ກຖໍ? ອິມສ຺ມິໍເຍວ ກປ຺ເປ ກກຸສນ຺ໂຘ ຠຄວາ ຈຕ຺ຕາລີສວສ຺ສສຫສ຺ສາຍຸກກາເລ ນິພ຺ພຕ຺ໂຕ, ຕໍ ປນ ອາຍຸ ປຣິຫາຍມານໍ ທສວສ຺ສກາລໍ ປຕ຺ວາ ປຸນ ອສງ຺ຂ຺ເຍຍ຺ຍໍ ປຕ຺ວາ ຕໂຕ ປຣິຫາຍມານໍ ຕິໍສວສ຺ສສຫສ຺ສາຍຸກກາເລ ຐິຕໍ, ຕທາ ໂກຓາຄມໂນ ຠຄວາ ໂລເກ ອຸປ຺ປນ຺ໂນຕິ ເວທິຕພ຺ໂພ.

ໂສປິ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ໂສຠວຕີນຄເຣ ຍຎ຺ຎທຕ຺ຕສ຺ສ ພ຺ຣາຫ຺ມຓສ຺ສ ຠຣິຍາຍ ຣູປາທີຫິ ຄຸເຓຫິ ອນຸຕ຺ຕຣາຍ ອຸຕ຺ຕຣາຍ ນາມ ພ຺ຣາຫ຺ມຓິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ສຸຠວຕີອຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ຊາຍມາເນ ປນ ຕສ຺ມິໍ ສກລຊມ຺ພຸທີເປ ເທໂວ ກນກວສ຺ສໍ ວສ຺ສິ. ເຕນສ຺ສ ກນກາຄມນກາຣຓຕ຺ຕາ ‘‘ກນກາຄມໂນ’’ຕິ ນາມມກໍສຸ. ຕໍ ປນສ຺ສ ນາມໍ ອນຸກ຺ກເມນ ປຣິຓມມານໍ ໂກຓາຄມໂນ’’ຕິ ຊາຕໍ. ໂສ ປນ ຕີຓິ ວສ຺ສສຫສ຺ສານິ ອຄາຣໍ ອຊ຺ຌາວສິ. ຕຸສິຕ-ສນ຺ຕຸສິຕ-ສນ຺ຕຸຏ຺ຐນາມກາ ປນສ຺ສ ຕໂຍ ປາສາທາ ອເຫສຸໍ. ຣຸຈິຄຕ຺ຕາພ຺ຣາຫ຺ມຓີປມຸຂານິ ໂສຬສ ອິຕ຺ຖິສຫສ຺ສານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ຣຸຈິຄຕ຺ຕາຍ ພ຺ຣາຫ຺ມຓິຍາ ສຕ຺ຖວາເຫ ນາມ ປຸຕ຺ເຕ ອຸປ຺ປນ຺ເນ ຫຕ຺ຖິກ຺ຂນ຺ຘວຣຄໂຕ ຫຕ຺ຖິຍາເນນ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ຕໍ ຕິໍສປຸຣິສສຫສ຺ສານິ ອນຸປພ຺ພຊິໍສຸ. ໂສ ເຕຫິ ປຣິວຸໂຕ ຉ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍໍ ອຄ຺ຄິໂສນພ຺ຣາຫ຺ມຓສ຺ສ ຘີຕາຍ ອຄ຺ຄິໂສນພ຺ຣາຫ຺ມຓກຸມາຣິຍາ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ຂທິຣວເນ ທິວາວິຫາຣໍ ກຕ຺ວາ ສາຍນ຺ຫສມເຍ ຊຏາຕິນ຺ທຸເກນ ນາມ ຍວປາເລນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ອຸທຸມ຺ພຣໂພຘິໍ ປຸຓ຺ຑຣີເກ ວຸຕ຺ຕປ຺ປມາຓໍ ຜລວິຠູຕິສມ຺ປນ຺ນໍ ທກ຺ຂິຓໂຕ ອຸປຄນ຺ຕ຺ວາ ວີສຕິຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ມາຣພລໍ ວິທ຺ຘໍເສຕ຺ວາ ທສພລຎາຓານິ ປຏິລຠິຕ຺ວາ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ວີຕິນາເມຕ຺ວາ ອຕ຺ຕນາ ສຫ ປພ຺ພຊິຕານໍ ຕິໍສຠິກ຺ຂຸສຫສ຺ສານໍ ອຸປນິສ຺ສຍສມ຺ປຕ຺ຕິໍ ທິສ຺ວາ ຄຄນປເຖນ ຄນ຺ຕ຺ວາ ສຸທສ຺ສນນຄຣສມີເປ ອິສິປຕເນ ມິຄທາເຍ ໂອຕຣິຕ຺ວາ ເຕສໍ ມຊ຺ຌຄໂຕ ຘມ຺ມຈກ຺ກໍ ປວຕ຺ເຕສິ, ຕທາ ຕິໍສໂກຏິສຫສ຺ສານໍ ປຐມາຠິສມໂຍ ອໂຫສິ.

ປຸນ ສຸນ຺ທຣນຄຣທ຺ວາເຣ ມຫາສາລຣຸກ຺ຂມູເລ ຍມກປາຏິຫາຣິຍໍ ກຕ຺ວາ ວີສຕິໂກຏິສຫສ຺ສານໍ ຘມ຺ມາມຕໍ ປາເຍສິ, ໂສ ທຸຕິໂຍ ອຠິສມໂຍ ອໂຫສິ. ອຕ຺ຕໂນ ມາຕຣໍ ອຸຕ຺ຕຣໍ ປມຸຂໍ ກຕ຺ວາ ທສສຸ ຈກ຺ກວາຬສຫສ຺ເສສຸ ເທວຕານໍ ສມາຄຕານໍ ອຠິຘມ຺ມປິຏກໍ ເທເສນ຺ເຕ ຠຄວຕິ ທສນ຺ນໍ ໂກຏິສຫສ຺ສານໍ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ກກຸສນ຺ຘສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ໂກຓາຄມໂນ ນາມ ຊິໂນ, ໂລກເຊຏ຺ໂຐ ນຣາສໂຠ.

໒. ‘‘ທສ ຘມ຺ເມ ປູຣຍິຕ຺ວານ, ກນ຺ຕາຣໍ ສມຕິກ຺ກມິ;

ປວາຫິຍ ມລໍ ສພ຺ພໍ, ປຕ຺ໂຕ ສມ຺ໂພຘິມຸຕ຺ຕມໍ.

໓. ‘‘ຘມ຺ມຈກ຺ກໍ ປວຕ຺ເຕນ຺ເຕ, ໂກຓາຄມນນາຍເກ;

ຕິໍສໂກຏິສຫສ຺ສານໍ, ປຐມາຠິສມໂຍ ອຫຸ.

໔. ‘‘ປາຏິຫີຣໍ ກໂຣນ຺ເຕ ຈ, ປຣວາທປ຺ປມທ຺ທເນ;

ວີສຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ‘‘ຕໂຕ ວິກຸພ຺ພນໍ ກຕ຺ວາ, ຊິໂນ ເທວປຸຣໍ ຄໂຕ;

ວສເຕ ຕຕ຺ຖ ສມ຺ພຸທ຺ໂຘ, ສິລາຍ ປຓ຺ຑຸກມ຺ພເລ.

໖. ‘‘ປກຣເຓ ສຕ຺ຕ ເທເສນ຺ໂຕ, ວສ຺ສໍ ວສຕິ ໂສ ມຸນິ;

ທສໂກຏິສຫສ຺ສານໍ, ຕຕິຍາຠິສມໂຍ ອຫູ’’ຕິ.

ຕຕ຺ຖ ທສ ຘມ຺ເມ ປູຣຍິຕ຺ວານາຕິ ທສ ປາຣມິຘມ຺ເມ ປູຣຍິຕ຺ວາ. ກນ຺ຕາຣໍ ສມຕິກ຺ກມີຕິ ຊາຕິກນ຺ຕາຣໍ ສມຕິກ຺ກມິ. ປວາຫິຍາຕິ ປວາເຫຕ຺ວາ. ມລໍ ສພ຺ພນ຺ຕິ ຣາຄາທິມລຕ຺ຕຍໍ. ປາຏິຫີຣໍ ກໂຣນ຺ເຕ ຈ, ປຣວາທປ຺ປມທ຺ທເນຕິ ປຣວາທິວາທປ຺ປມທ຺ທເນ, ຠຄວຕິ ປາຏິຫາຣິຍໍ ກໂຣນ຺ເຕຕິ ອຕ຺ໂຖ. ວິກຸພ຺ພນນ຺ຕິ ວິກຸພ຺ພນິທ຺ຘິໍ, ສຸນ຺ທຣນຄຣທ຺ວາເຣ ຍມກປາຏິຫາຣິຍໍ ກຕ຺ວາ ເທວປຸຣໍ ຄໂຕ ຕຕ຺ຖ ປຓ຺ຑຸກມ຺ພລສິລາຍໍ ວສິ. ກຖໍ ວສີຕິ? ປກຣເຓ ສຕ຺ຕ ເທເສນ຺ໂຕຕິ ຕຕ຺ຖ ເທວານໍ ສຕ຺ຕປ຺ປກຣຓສງ຺ຂາຕໍ ອຠິຘມ຺ມປິຏກໍ ເທເສນ຺ໂຕ ວສິ. ເອວໍ ຕຕ຺ຖ ອຠິຘມ຺ມໍ ເທເສນ຺ເຕ ຠຄວຕິ ທສໂກຏິສຫສ຺ສານໍ ເທວານໍ ອຠິສມໂຍ ອໂຫສີຕິ ອຕ຺ໂຖ.

ປຣິສຸທ຺ຘປາຣມິປູຣຓາຄມນສ຺ສ ໂກຓາຄມນສ຺ສປິ ເອໂກ ສາວກສນ຺ນິປາໂຕ ອໂຫສິ. ສຸຣິນ຺ທວຕີນຄເຣ ສຸຣິນ຺ທວຕຸຍ຺ຍາເນ ວິຫຣນ຺ໂຕ ຠິຍ຺ຍສສ຺ສ ຣາຊປຸຕ຺ຕສ຺ສ ຈ ອຸຕ຺ຕຣສ຺ສ ຈ ຣາຊປຸຕ຺ຕສ຺ສ ທ຺ວິນ຺ນມ຺ປິ ຕິໍສສຫສ຺ສປຣິວາຣານໍ ຘມ຺ມໍ ເທເສຕ຺ວາ ສພ຺ເພວ ເຕ ເອຫິຠິກ຺ຂຸປພ຺ພຊ຺ຊາຍ ປພ຺ພາເຊຕ຺ວາ ເຕສໍ ມຊ຺ຌຄໂຕ ມາຆປຸຓ຺ຓມາຍໍ ປາຕິໂມກ຺ຂໍ ອຸທ຺ທິສິ. ເຕນ ວຸຕ຺ຕໍ –

໗. ‘‘ຕສ຺ສາປິ ເທວເທວສ຺ສ, ເອໂກ ອາສິ ສມາຄໂມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ‘‘ຕິໍສຠິກ຺ຂຸສຫສ຺ສານໍ, ຕທາ ອາສິ ສມາຄໂມ;

ໂອຆານມຕິກ຺ກນ຺ຕານໍ, ຠິຊ຺ຊິຕານຎ຺ຈ ມຈ຺ຈຸຍາ’’ຕິ.

ຕຕ຺ຖ ໂອຆານນ຺ຕິ ກາໂມຆາທີນໍ, ຈຕຸນ຺ນໂມຆານເມຕໍ ອຘິວຈນໍ. ຍສ຺ສ ປນ ເຕ ສໍວິຊ຺ຊນ຺ຕິ, ຕໍ ວຏ຺ຏສ຺ມິໍ ໂອຫນນ຺ຕິ ໂອສີທາເປນ຺ຕີຕິ ໂອຆາ, ເຕສໍ ໂອຆານໍ, ອຸປໂຍຄຕ຺ເຖ ສາມິວຈນໍ ທຏ຺ຐພ຺ພໍ. ຈຕຸພ຺ພິເຘ ໂອເຆ ອຕິກ຺ກນ຺ຕານນ຺ຕິ ອຕ຺ໂຖ. ຠິຊ຺ຊິຕານນ຺ຕິ ເອຕ຺ຖາປິ ເອເສວ ນໂຍ. ມຈ຺ຈຸຍາຕິ ມຈ຺ຈຸໂນ.

ຕທາ ອມ຺ຫາກໍ ໂພຘິສຕ຺ໂຕ ມິຖິລນຄເຣ ປພ຺ພໂຕ ນາມ ຣາຊາ ອໂຫສິ, ຕທາ ‘‘ສຣຓຄຕສພ຺ພປາຓາຄມນໍ ໂກຓາຄມນໍ ມິຖິລນຄຣມນຸປ຺ປຕ຺ຕ’’ນ຺ຕິ ສຸຕ຺ວາ ສປຣິວາໂຣ ຣາຊາ ປຈ຺ຈຸຄ຺ຄນ຺ຕ຺ວາ ວນ຺ທິຕ຺ວາ ທສພລໍ ນິມນ຺ເຕຕ຺ວາ ມຫາທານໍ ທຕ຺ວາ ຕຕ຺ຖ ຠຄວນ຺ຕໍ ວສ຺ສາວາສຕ຺ຖາຍ ຍາຈິຕ຺ວາ ເຕມາສໍ ສສາວກສງ຺ຆໍ ສຕ຺ຖາຣໍ ອຸປຏ຺ຐຫິຕ຺ວາ ປຕ຺ຕຸຓ຺ຓຈີນປຏ຺ຏກມ຺ພລໂກເສຍ຺ຍທຸກູລກປ຺ປາສິກາທີນິ ມຫຄ຺ຆານິ ເຈວ ສຸຂຸມວຕ຺ຖານິ ຈ ສຸວຓ຺ຓປາທຸກາ ເຈວ ອຎ຺ຎຎ຺ຈ ພຫຸປຣິກ຺ຂາຣມທາສິ. ໂສປິ ນໍ ຠຄວາ ພ຺ຍາກາສິ – ‘‘ອິມສ຺ມິໍເຍວ ຠທ຺ທກປ຺ເປ ອຍໍ ພຸທ຺ໂຘ ຠວິສ຺ສຕີ’’ຕິ. ອຖ ໂສ ມຫາປຸຣິໂສ ຕສ຺ສ ຠຄວໂຕ ພ຺ຍາກຣຓໍ ສຸຕ຺ວາ ມຫາຣຊ຺ຊໍ ປຣິຈ຺ຈຊິຕ຺ວາ ຕສ຺ເສວ ຠຄວໂຕ ສນ຺ຕິເກ ປພ຺ພຊິ. ເຕນ ວຸຕ຺ຕໍ –

໙. ‘‘ອຫໍ ເຕນ ສມເຍນ, ປພ຺ພໂຕ ນາມ ຂຕ຺ຕິໂຍ;

ມິຕ຺ຕາມຈ຺ເຈຫິ ສມ຺ປນ຺ໂນ, ອນນ຺ຕພລວາຫໂນ.

໑໐. ‘‘ສມ຺ພຸທ຺ຘທສ຺ສນໍ ຄນ຺ຕ຺ວາ, ສຸຕ຺ວາ ຘມ຺ມມນຸຕ຺ຕຣໍ;

ນິມນ຺ເຕຕ຺ວາ ສຊິນສງ຺ຆໍ, ທານໍ ທຕ຺ວາ ຍທິຈ຺ຉກໍ.

໑໑. ‘‘ປຕ຺ຕຸຓ຺ຓໍ ຈີນປຏ຺ຏຎ຺ຈ, ໂກເສຍ຺ຍໍ ກມ຺ພລມ຺ປິ ຈ;

ສຸວຓ຺ຓປາທຸກຎ຺ເຈວ, ອທາສິໍ ສຕ຺ຖຸສາວເກ.

໑໒. ‘‘ໂສປິ ມໍ ພຸທ຺ໂຘ ພ຺ຍາກາສິ, ສງ຺ຆມຊ຺ເຌ ນິສີທິຍ;

ອິມມ຺ຫິ ຠທ຺ທເກ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ.

໑໔. ‘‘ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ ທສປາຣມິປູຣິຍາ.

໑໕. ‘‘ສພ຺ພຎ຺ຎຸຕໍ ຄເວສນ຺ໂຕ, ທານໍ ທຕ຺ວາ ນຣຸຕ຺ຕເມ;

ໂອຫາຍາຫໍ ມຫາຣຊ຺ຊໍ, ປພ຺ພຊິໍ ຊິນສນ຺ຕິເກ’’ຕິ.

ຕຕ຺ຖ ອນນ຺ຕພລວາຫໂນຕິ ພຫຸກໍ ອນນ຺ຕໍ ມຍ຺ຫໍ ພລໍ ອສ຺ສຫຕ຺ຖິອາທິກໍ ວາຫນຎ຺ຈາຕິ ອຕ຺ໂຖ. ສມ຺ພຸທ຺ຘທສ຺ສນນ຺ຕິ ສມ຺ພຸທ຺ຘທສ຺ສນຕ຺ຖາຍ. ຍທິຈ຺ຉກນ຺ຕິ ຍາວທິຈ຺ຉກໍ ພຸທ຺ຘປ຺ປມຸຂໍ ສງ຺ຆໍ ຈຕຸພ຺ພິເຘນ ອາຫາເຣນ ‘‘ອລມລ’’ນ຺ຕິ ປວາຣາເປຕ຺ວາ, ຫຕ຺ເຖນ ປິທຫາເປຕ຺ວາຕິ ອຕ຺ໂຖ. ສຕ຺ຖຸສາວເກຕິ ສຕ຺ຖຸໂນ ເຈວ ສາວການຎ຺ຈ ອທາສິໍ. ນຣຸຕ຺ຕເມຕິ ນຣຸຕ຺ຕມສ຺ສ. ໂອຫາຍາຕິ ປຫາຍ ປຣິຈ຺ຈຊິຕ຺ວາ.

ຕສ຺ສ ປນ ໂກຓາຄມນສ຺ສ ຠຄວໂຕ ໂສຠວຕີ ນາມ ນຄຣໍ ອໂຫສິ, ຍຎ຺ຎທຕ຺ໂຕ ນາມ ພ຺ຣາຫ຺ມໂຓ ປິຕາ, ອຸຕ຺ຕຣາ ນາມ ພ຺ຣາຫ຺ມຓີ ມາຕາ, ຠິຍ຺ຍໂສ ຈ ອຸຕ຺ຕໂຣ ຈາຕິ ທ຺ເວ ອຄ຺ຄສາວກາ, ໂສຕ຺ຖິໂຊ ນາມຸປຏ຺ຐາໂກ, ສມຸທ຺ທາ ຈ ອຸຕ຺ຕຣາ ຈ ທ຺ເວ ອຄ຺ຄສາວິກາ, ອຸທຸມ຺ພຣຣຸກ຺ໂຂ ໂພຘິ, ສຣີຣໍ ຕິໍສຫຕ຺ຖຸພ຺ເພຘໍ ອໂຫສິ, ຕິໍສວສ຺ສສຫສ຺ສານິ ອາຍຸ, ຠຣິຍາ ປນສ຺ສ ຣຸຈິຄຕ຺ຕາ ນາມ ພ຺ຣາຫ຺ມຓີ, ສຕ຺ຖວາໂຫ ນາມ ປຸຕ຺ໂຕ, ຫຕ຺ຖິຍາເນນ ນິກ຺ຂມິ. ເຕນ ວຸຕ຺ຕໍ –

໑໖. ‘‘ນຄຣໍ ໂສຠວຕີ ນາມ, ໂສໂຠ ນາມາສິ ຂຕ຺ຕິໂຍ;

ວສເຕ ຕຕ຺ຖ ນຄເຣ, ສມ຺ພຸທ຺ຘສ຺ສ ມຫາກຸລໍ.

໑໗. ‘‘ພ຺ຣາຫ຺ມໂຓ ຍຎ຺ຎທຕ຺ໂຕ ຈ, ອາສິ ພຸທ຺ຘສ຺ສ ໂສ ປິຕາ;

ອຸຕ຺ຕຣາ ນາມ ຊນິກາ, ໂກຓາຄມນສ຺ສ ສຕ຺ຖຸໂນ;

໒໒. ‘‘ຠິຍ຺ຍໂສ ອຸຕ຺ຕໂຣ ນາມ, ອເຫສຸໍ ອຄ຺ຄສາວກາ;

ໂສຕ຺ຖິໂຊ ນາມຸປຏ຺ຐາໂກ, ໂກຓາຄມນສ຺ສ ສຕ຺ຖຸໂນ.

໒໓. ‘‘ສມຸທ຺ທາ ອຸຕ຺ຕຣາ ເຈວ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອຸທຸມ຺ພໂຣຕິ ປວຸຈ຺ຈຕິ.

໒໕. ‘‘ອຸຈ຺ຈຕ຺ຕເນນ ໂສ ພຸທ຺ໂຘ, ຕິໍສຫຕ຺ຖສມຸຄ຺ຄໂຕ;

ອຸກ຺ກາມຸເຂ ຍຖາ ກມ຺ພຸ, ເອວໍ ຣໍສີຫິ ມຓ຺ຑິໂຕ.

໒໖. ‘‘ຕິໍສວສ຺ສສຫສ຺ສານິ, ອາຍຸ ພຸທ຺ຘສ຺ສ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໗. ‘‘ຘມ຺ມເຈຕິໍ ສມຸສ຺ເສຕ຺ວາ, ຘມ຺ມທຸສ຺ສວິຠູສິຕໍ;

ຘມ຺ມປຸປ຺ຜຄຸຬໍ ກຕ຺ວາ, ນິພ຺ພຸໂຕ ໂສ ສສາວໂກ.

໒໘. ‘‘ມຫາວິລາໂສ ຕສ຺ສ ຊໂນ, ສິຣິຘມ຺ມປ຺ປກາສໂນ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ’’ຕິ.

ຕຕ຺ຖ ອຸກ຺ກາມຸເຂຕິ ກມ຺ມາຣຸທ຺ຘເນ. ຍຖາ ກມ຺ພູຕິ ສຸວຓ຺ຓນິກ຺ຂໍ ວິຍ. ເອວໍ ຣໍສີຫິ ມຓ຺ຑິໂຕຕິ ເອວໍ ຣສ຺ມີຫິ ປຏິມຓ຺ຑິໂຕ ສມລງ຺ກໂຕ. ຘມ຺ມເຈຕິໍ ສມຸສ຺ເສຕ຺ວາຕິ ສຕ຺ຕຕ຺ຕິໍສໂພຘິປກ຺ຂິຍຘມ຺ມມຍໍ ເຈຕິຍໍ ປຕິຏ຺ຐາເປຕ຺ວາ. ຘມ຺ມທຸສ຺ສວິຠູສິຕນ຺ຕິ ຈຕຸສຈ຺ຈຘມ຺ມປຏາກວິຠູສິຕໍ. ຘມ຺ມປຸປ຺ຜຄຸຬໍ ກຕ຺ວາຕິ ຘມ຺ມມຍປຸປ຺ຜມາລາຄຸຬໍ ກຕ຺ວາ. ມຫາຊນສ຺ສ ວິປສ຺ສນາເຈຕິຍງ຺ຄເຓ ຐິຕສ຺ສ ນມສ຺ສນຕ຺ຖາຍ ຘມ຺ມເຈຕິຍໍ ປຕິຏ຺ຐາເປຕ຺ວາ ສສາວກສງ຺ໂຆ ສຕ຺ຖາ ປຣິນິພ຺ພາຍີຕິ ອຕ຺ໂຖ. ມຫາວິລາໂສຕິ ມຫາອິທ຺ຘິວິລາສປ຺ປຕ຺ໂຕ. ຕສ຺ສາຕິ ຕສ຺ສ ຠຄວໂຕ. ຊໂນຕິ ສາວກຊໂນ. ສິຣິຘມ຺ມປ຺ປກາສໂນຕິ ໂລກຸຕ຺ຕຣຘມ຺ມປ຺ປກາສໂນ ໂສ ຠຄວາ ຈ ສພ຺ພໍ ຕມນ຺ຕຣຫິຕນ຺ຕິ ອຕ຺ໂຖ.

‘‘ສຸເຂນ ໂກຓາຄມໂນ ຄຕາສໂວ, ວິກາມປາຓາຄມໂນ ມເຫສີ;

ວເນ ວິເວເກ ສິຣິນາມເຘຍ຺ເຍ, ວິສຸທ຺ຘວໍສາຄມໂນ ວສິຕ຺ຖ’’.

ເສສຄາຖາສຸ ສພ຺ພຕ຺ຖ ປາກຏເມວາຕິ.

ໂກຓາຄມນພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ເຕວີສຕິໂມ ພຸທ຺ຘວໍໂສ.