໒໓. ເວສ຺ສຠູພຸທ຺ຘວໍສວຓ຺ຓນາ

ສິຂິສ຺ສ ປນ ສມ຺ມາສມ຺ພຸທ຺ຘສ຺ສ ອປຣຠາເຄ ອນ຺ຕຣຫິເຕ ຕສ຺ສ ສາສເນ ສຕ຺ຕຕິວສ຺ສສຫສ຺ສາຍຸກາ ມນຸສ຺ສາ ອນຸກ຺ກເມນ ປຣິຫາຍິຕ຺ວາ ທສວສ຺ສາຍຸກາ ອເຫສຸໍ. ປຸນ ວຑ຺ຒິຕ຺ວາ ອປຣິມິຕາຍຸກາ ຫຸຕ຺ວາ ອນຸກ຺ກເມນ ປຣິຫາຍິຕ຺ວາ ສຏ຺ຐິວສ຺ສສຫສ຺ສາຍຸກາ ອເຫສຸໍ. ຕທາ ວິຊິຕມໂນຠູ ສພ຺ພໂລກາຠິຠູ ສຍມ຺ຠູ ເວສ຺ສຠູ ນາມ ສຕ຺ຖາ ໂລເກ ອຸທປາທິ. ໂສ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ອໂນມນຄເຣ ສຸປ຺ປຕີຕສ຺ສ ສຸປ຺ປຕີຕສ຺ສ ນາມ ຣຎ຺ໂຎ ອຄ຺ຄມເຫສິຍາ ສີລວຕິຍາ ຍສວຕິຍາ ນາມ ກຸຈ຺ຉິສ຺ມິໍ ປຏິສນ຺ຘິໍ ອຄ຺ຄເຫສິ. ໂສ ທສນ຺ນໍ ມາສານໍ ອຈ຺ຈເຍນ ອນຸປມຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ຊາຍມາໂນວ ຊນໍ ໂຕເສນ຺ໂຕ ວສຠນາທໍ ນທິ. ຕສ຺ມາ ວສຠນາທເຫຕຸຕ຺ຕາ ຕສ຺ສ ນາມຄ຺ຄຫຓທິວເສ ‘‘ເວສ຺ສຠູ’’ຕິ ນາມມກໍສຸ. ໂສ ຉພ຺ພສ຺ສສຫສ຺ສານິ ອຄາຣໍ ອຊ຺ຌາວສິ. ຣຸຈິ-ສຸຣຸຈິ-ຣຕິວຑ຺ຒນນາມກາ ຕໂຍ ປາສາທາ ຕສ຺ສ ອເຫສຸໍ. ສຸຈິຕ຺ຕາເທວິປ຺ປມຸຂານິ ຕິໍສ ອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ສຸຈິຕ຺ຕາຍ ນາມ ເທວິຍາ ສຸປ຺ປພຸທ຺ເຘ ນາມ ກຸມາເຣ ອຸປ຺ປນ຺ເນ ສຸວຓ຺ຓສິວິກາຍ ອຸຍ຺ຍານທສ຺ສນຕ຺ຖາຍ ຄນ຺ຕ຺ວາ ເທວທຕ຺ຕານິ ກາສາຍານິ ຄເຫຕ຺ວາ ປພ຺ພຊິ. ຕໍ ສຕ຺ຕຕ຺ຕິໍສສຫສ຺ສານິ ອນຸປພ຺ພຊິໍສຸ. ອຖ ໂສ ເຕຫິ ປຣິວຸໂຕ ຉ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ສຸຈິຕ຺ຕນິຄເມ ສນ຺ທິສ຺ສມານສຣີຣາຍ ສິຣິວຑ຺ຒນາຍ ນາມ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ສາລວເນ ທິວາວິຫາຣໍ ວີຕິນາເມຕ຺ວາ ສາຍນ຺ຫສມເຍ ນຣິນ຺ທນາຄຣາເຊນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ສາລໂພຘິໍ ປທກ຺ຂິຓໂຕ ອຸປາຄມິ. ຕສ຺ສາປິ ສາລສ຺ສ ຕເທວ ປາຏລິຍາ ປມາຓເມວ ປມາຓໍ ອໂຫສິ. ຕເຖວ ປຸປ຺ຜຜລສິຣິວິຠໂວ ເວທິຕພ຺ໂພ. ໂສ ສາລມູລມຸປຄນ຺ຕ຺ວາ ຈຕ຺ຕາລີສຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ວິຄຕນີວຣຓໍ ສພ຺ພກາມມທາວຣຓໍ ອນາວຣຓຎາຓໍ ປຏິລຠິຕ຺ວາ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ຕຕ຺ເຖວ ວີຕິນາເມຕ຺ວາ ອຕ຺ຕໂນ ກນິຏ຺ຐຠາຕິກສ຺ສ ໂສຓກຸມາຣສ຺ສ ອຸຕ຺ຕຣກຸມາຣສ຺ສ ຈ ອຸປນິສ຺ສຍສມ຺ປຕ຺ຕິໍ ທິສ຺ວາ ເທວປເຖນ ຄນ຺ຕ຺ວາ ອໂນມນຄຣສມີເປ ອຣຸຓຸຍ຺ຍາເນ ໂອຕຣິຕ຺ວາ ອຸຍ຺ຍານປາເລນ ກຸມາເຣ ປກ຺ໂກສາເປຕ຺ວາ ເຕສໍ ສປຣິວາຣານໍ ມຊ຺ເຌ ຘມ຺ມຈກ຺ກໍ ປວຕ຺ເຕສິ. ຕທາ ອສີຕິຍາ ໂກຏິສຫສ຺ສານໍ ປຐໂມ ອຠິສມໂຍ ອໂຫສິ.

ປຸນ ຊນປທຈາຣິກໍ ຈຣນ຺ໂຕ ຠຄວາ ຕຕ຺ຖ ຕຕ຺ຖ ຘມ຺ມໍ ເທເສນ຺ໂຕ ສຕ຺ຕຕິຍາ ໂກຏິສຫສ຺ສານໍ ຘມ຺ມາຠິສມໂຍ ອໂຫສິ, ໂສ ທຸຕິໂຍ ອຠິສມໂຍ ອໂຫສິ. ອໂນມນຄເຣເຍວ ທິຏ຺ຐິຊາລໍ ຠິນ຺ທນ຺ໂຕ ຕິຕ຺ຖິຍມານທ຺ຘຊໍ ປາເຕນ຺ໂຕ ມານມທໍ ວິທ຺ຘໍເສນ຺ໂຕ ຘມ຺ມທ຺ຘຊໍ ສມຸສ຺ສຍນ຺ໂຕ ນວຸຕິໂຍຊນວິຕ຺ຖຕາຍ ມນຸສ຺ສປຣິສາຍ ປຣິມາຓຣຫິຕາຍ ເທວປຣິສາຍ ຍມກປາຏິຫາຣິຍໍ ກຕ຺ວາ ເທວມນຸສ຺ເສ ປສາເທຕ຺ວາ ສຏ຺ຐິໂກຏິໂຍ ຘມ຺ມາມເຕນ ຕປ຺ເປສິ, ໂສ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ຕຕ຺ເຖວ ມຓ຺ຑກປ຺ປມ຺ຫິ, ອສໂມ ອປ຺ປຏິປຸຄ຺ຄໂລ;

ເວສ຺ສຠູ ນາມ ນາເມນ, ໂລເກ ອຸປ຺ປຊ຺ຊິ ນາຍໂກ.

໒. ‘‘ອາທິຕ຺ຕໍ ວຕ ຣາຄຄ຺ຄິ, ຕຓ຺ຫານໍ ວິຊິຕໍ ຕທາ;

ນາໂຄວ ພນ຺ຘນໍ ເຉຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

໓. ‘‘ຘມ຺ມຈກ຺ກໍ ປວຕ຺ເຕນ຺ເຕ, ເວສ຺ສຠູໂລກນາຍເກ;

ອສີຕິໂກຏິສຫສ຺ສານໍ, ປຐມາຠິສມໂຍ ອຫຸ.

໔. ‘‘ປກ຺ກນ຺ເຕ ຈາຣິກໍ ຣຏ຺ເຐ, ໂລກເຊຏ຺ເຐ ນຣາສເຠ;

ສຕ຺ຕຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ‘‘ມຫາທິຏ຺ຐິໍ ວິໂນເທນ຺ໂຕ, ປາຏິເຫຣໍ ກໂຣຕິ ໂສ;

ສມາຄຕາ ນຣມຣູ, ທສສຫສ຺ສີ ສເທວເກ.

໖. ‘‘ມຫາອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ເທວາ ເຈວ ມນຸສ຺ສາ ຈ, ພຸຊ຺ຌເຣ ສຏ຺ຐິໂກຏິໂຍ’’ຕິ.

ຕຕ຺ຖ ອາທິຕ຺ຕນ຺ຕິ ສກລມິທໍ ໂລກຕ຺ຕຍໍ ສມ຺ປທິຕ຺ຕໍ. ຣາຄຄ຺ຄີຕິ ຣາເຄນ. ຕຓ຺ຫານໍ ວິຊິຕນ຺ຕິ ຕຓ຺ຫານໍ ວິຊິຕໍ ຣຏ຺ຐໍ ວສວຕ຺ຕິຏ຺ຐານນ຺ຕິ ເອວໍ ຎຕ຺ວາຕິ ອຕ຺ໂຖ. ນາໂຄວ ພນ຺ຘນໍ ເຉຕ຺ວາຕິ ຫຕ຺ຖີ ວິຍ ປູຕິລຕາພນ຺ຘນໍ ຉິນ຺ທິຕ຺ວາ ສມ຺ໂພຘິໍ ປຕ຺ໂຕ ອຘິຄໂຕ. ທສສຫສ຺ສີຕິ ທສສຫສ຺ສິຍໍ. ສເທວເກຕິ ສເທວເກ ໂລເກ. ພຸຊ຺ຌເຣຕິ ພຸຊ຺ຌິໍສຸ.

ໂສຓຸຕ຺ຕຣານໍ ປນ ທ຺ວິນ຺ນໍ ອຄ຺ຄສາວການໍ ສມາຄເມ ປພ຺ພຊິຕານໍ ອສີຕິຍາ ອຣຫນ຺ຕສຫສ຺ສານໍ ມຊ຺ເຌ ມາຆປຸຓ຺ຓມາຍໍ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ. ຍທາ ປນ ເວສ຺ສຠຸນາ ສພ຺ພໂລກາຠິຠຸນາ ສຫ ປພ຺ພຊິຕາ ສຕ຺ຕຕ຺ຕິໍສສຫສ຺ສສງ຺ຂາ ຠິກ຺ຂູ ຄຓໂຕ ໂອຫີນສມເຍ ປກ຺ກນ຺ຕາ, ເຕ ເວສ຺ສຠຸສ຺ສ ສມ຺ມາສມ຺ພຸທ຺ຘສ຺ສ ຘມ຺ມຈກ຺ກປ຺ປວຕ຺ຕິໍ ສຸຕ຺ວາ ໂສເຣຍ຺ຍໍ ນາມ ນຄຣໍ ອາຄນ຺ຕ຺ວາ ຠຄວນ຺ຕໍ ອທ຺ທສໍສຸ. ເຕສໍ ຠຄວາ ຘມ຺ມໍ ເທເສຕ຺ວາ ສພ຺ເພວ ເຕ ເອຫິຠິກ຺ຂຸປພ຺ພຊ຺ຊາຍ ປພ຺ພາເຊຕ຺ວາ ຈຕຸຣງ຺ຄສມນ຺ນາຄຕາຍ ປຣິສາຍ ປາຕິໂມກ຺ຂໍ ອຸທ຺ທິສິ, ໂສ ທຸຕິໂຍ ສນ຺ນິປາໂຕ ອໂຫສິ.

ຍທາ ປນ ນາຣິວາຫນນຄເຣ ອຸປສນ຺ໂຕ ນາມ ຣາຊປຸຕ຺ໂຕ ຣຊ຺ຊໍ ກາເຣສິ, ຕສ຺ສານຸກມ຺ປາຍ ຠຄວາ ຕຕ຺ຖ ອຄມາສິ, ໂສປິ ຠຄວໂຕ ອາຄມນໍ ສຸຕ຺ວາ ສປຣິວາໂຣ ຠຄວໂຕ ປຈ຺ຈຸຄ຺ຄມນໍ ກຕ຺ວາ ນິມນ຺ເຕຕ຺ວາ ມຫາທານໍ ທຕ຺ວາ ຕສ຺ສ ຘມ຺ມໍ ສຸຕ຺ວາ ປສນ຺ນຫທໂຍ ປພ຺ພຊິ. ຕໍ ສຏ຺ຐິສຫສ຺ສສງ຺ຂາ ປຸຣິສາ ອນຸປພ຺ພຊິໍສຸ. ເຕ ເຕນ ສທ຺ຘິໍ ອຣຫຕ຺ຕໍ ປາປຸຓິໍສຸ. ໂສ ເຕຫິ ປຣິວຸໂຕ ເວສ຺ສຠູ ຠຄວາ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໗. ‘‘ສນ຺ນິປາຕາ ຕໂຍ ອາສຸໍ, ເວສ຺ສຠຸສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ‘‘ອສີຕິຠິກ຺ຂຸສຫສ຺ສານໍ, ປຐໂມ ອາສິ ສມາຄໂມ;

ສຕ຺ຕຕິຠິກ຺ຂຸສຫສ຺ສານໍ, ທຸຕິໂຍ ອາສິ ສມາຄໂມ.

໙. ‘‘ສຏ຺ຐິຠິກ຺ຂຸສຫສ຺ສານໍ, ຕຕິໂຍ ອາສິ ສມາຄໂມ;

ຊຣາທິຠຍຕີຕານໍ, ໂອຣສານໍ ມເຫສິໂນ’’ຕິ.

ຕທາ ອມ຺ຫາກໍ ໂພຘິສຕ຺ໂຕ ສຣຠວຕີນຄເຣ ປຣມປິຍທສ຺ສໂນ ສຸທສ຺ສໂນ ນາມ ຣາຊາ ຫຸຕ຺ວາ ເວສ຺ສຠຸມ຺ຫິ ໂລກນາຍເກ ສຣຠນຄຣມຸປຄເຕ ຕສ຺ສ ຘມ຺ມໍ ສຸຕ຺ວາ ປສນ຺ນຫທໂຍ ທສນຂສໂມຘານສມຸຊ຺ຊລໍ ຊລຊາມລາວິກລກມລມກຸລສທິສມຎ຺ຊລິໍ ສິຣສິ ກຕ຺ວາ ພຸທ຺ຘປ຺ປມຸຂສ຺ສ ສງ຺ຆສ຺ສ ສຈີວຣໍ ມຫາທານໍ ທຕ຺ວາ ຕຕ຺ເຖວ ຠຄວໂຕ ນິວາສຕ຺ຖາຍ ຄນ຺ຘກຸຏິໍ ກຕ຺ວາ ຕໍ ປຣິກ຺ຂິປິຕ຺ວາ ວິຫາຣສຫສ຺ສໍ ກາເຣຕ຺ວາ ສພ຺ພຎ຺ຈ ວິຠວຊາຕໍ ຠຄວໂຕ ສາສເນ ປຣິຈ຺ຈຊິຕ຺ວາ ຕສ຺ສ ສນ຺ຕິເກ ປພ຺ພຊິຕ຺ວາ ອາຈາຣຄຸຓສມ຺ປນ຺ໂນ ເຕຣສຘຸຕຄຸເຓສຸ ນິຣໂຕ ໂພຘິສມ຺ຠາຣປຣິເຍສນາຍ ຣໂຕ ພຸທ຺ຘສາສນາຠິຣໂຕ ວິຫາສິ. ໂສປິ ຕໍ ຠຄວາ ພ຺ຍາກາສິ – ‘‘ອນາຄເຕ ອິໂຕ ເອກຕ຺ຕິໍສກປ຺ເປ ອຍໍ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ. ເຕນ ວຸຕ຺ຕໍ –

໑໐. ‘‘ອຫໍ ເຕນ ສມເຍນ, ສຸທສ຺ສໂນ ນາມ ຂຕ຺ຕິໂຍ;

ນິມນ຺ເຕຕ຺ວາ ມຫາວີຣໍ, ທານໍ ທຕ຺ວາ ມຫາຣຫໍ;

ອນ຺ນປາເນນ ວຕ຺ເຖນ, ສສງ຺ຆໍ ຊິນປູຊຍິໍ.

໑໑. ‘‘ຕສ຺ສ ພຸທ຺ຘສ຺ສ ອສມສ຺ສ, ຈກ຺ກໍ ວຕ຺ຕິຕມຸຕ຺ຕມໍ;

ສຸຕ຺ວານ ປຓິຕໍ ຘມ຺ມໍ, ປພ຺ພຊ຺ຊມຠິໂຣຈຍິໍ.

໑໒. ‘‘ມຫາທານໍ ປວຕ຺ເຕຕ຺ວາ, ຣຕ຺ຕິນ຺ທິວມຕນ຺ທິໂຕ;

ປພ຺ພຊ຺ຊໍ ຄຸຓສມ຺ປນ຺ນໍ, ປພ຺ພຊິໍ ຊິນສນ຺ຕິເກ.

໑໓. ‘‘ອາຈາຣຄຸຓສມ຺ປນ຺ໂນ, ວຕ຺ຕສີລສມາຫິໂຕ;

ສພ຺ພຎ຺ຎຸຕໍ ຄເວສນ຺ໂຕ, ຣມາມິ ຊິນສາສເນ.

໑໔. ‘‘ສທ຺ຘາປີຕິໍ ອຸປຄນ຺ຕ຺ວາ, ພຸທ຺ຘໍ ວນ຺ທາມິ ສຕ຺ຖຣໍ;

ປີຕິ ອຸປ຺ປຊ຺ຊຕິ ມຍ຺ຫໍ, ໂພຘິຍາເຍວ ກາຣຓາ.

໑໕. ‘‘ອນິວຕ຺ຕມານສໍ ຎຕ຺ວາ, ສມ຺ພຸທ຺ໂຘ ເອຕທພ຺ຣວິ;

ເອກຕ຺ຕິໍເສ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໖. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂໍ ອິມໍ.

໑໗. ‘‘ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ຈກ຺ກໍ ວຕ຺ຕິຕນ຺ຕິ ຘມ຺ມຈກ຺ກໍ ປວຕ຺ຕິຕໍ. ປຓີຕໍ ຘມ຺ມນ຺ຕິ ອຸຕ຺ຕຣິມນຸສ຺ສຘມ຺ມໍ. ປພ຺ພຊ຺ຊໍ ຄຸຓສມ຺ປນ຺ນນ຺ຕິ ຎຕ຺ວາ ປພ຺ພຊິນ຺ຕິ ອຕ຺ໂຖ. ວຕ຺ຕສີລສມາຫິໂຕຕິ ວຕ຺ເຕສຸ ຈ ສີເລສຸ ຈ ສມາຫິໂຕ. ເຕສໍ ເຕສໍ ປູຣເຓ ສມາຫິໂຕຕິ ອຕ຺ໂຖ. ຣມາມີຕິ ອຠິຣມິໍ. ສທ຺ຘາປີຕິນ຺ຕິ ສທ຺ຘຎ຺ຈ ປີຕິຎ຺ຈ ອຸປຄນ຺ຕ຺ວາ. ວນ຺ທາມີຕິ ອຠິວນ຺ທິໍ, ອຕີຕຕ຺ເຖ ວຕ຺ຕມານວຈນໍ ທຏ຺ຐພ຺ພໍ. ສຕ຺ຖຣນ຺ຕິ ສຕ຺ຖາຣໍ. ອນິວຕ຺ຕມານສນ຺ຕິ ອໂນສກ຺ກິຍມານມານສໍ.

ຕສ຺ສ ປນ ຠຄວໂຕ ອໂນມໍ ນາມ ນຄຣໍ ອໂຫສິ. ສຸປ຺ປຕີໂຕ ນາມສ຺ສ ປິຕາ ຂຕ຺ຕິໂຍ, ຍສວຕີ ນາມ ມາຕາ, ໂສໂຓ ຈ ອຸຕ຺ຕໂຣ ຈ ທ຺ເວ ອຄ຺ຄສາວກາ, ອຸປສນ຺ໂຕ ນາມຸປຏ຺ຐາໂກ, ຣາມາ ຈ ສມາລາ ຈ ທ຺ເວ ອຄ຺ຄສາວິກາ, ສາລຣຸກ຺ໂຂ ໂພຘິ, ສຣີຣໍ ສຏ຺ຐິຫຕ຺ຖຸພ຺ເພຘໍ ອໂຫສິ. ສຏ຺ຐິວສ຺ສສຫສ຺ສານິ ອາຍຸ, ສຸຈິຕ຺ຕາ ນາມສ຺ສ ຠຣິຍາ, ສຸປ຺ປພຸທ຺ໂຘ ນາມສ຺ສ ປຸຕ຺ໂຕ, ສຸວຓ຺ຓສິວິກາຍ ນິກ຺ຂມິ. ເຕນ ວຸຕ຺ຕໍ –

໑໘. ‘‘ອໂນມໍ ນາມ ນຄຣໍ, ສຸປ຺ປຕີໂຕ ນາມ ຂຕ຺ຕິໂຍ;

ມາຕາ ຍສວຕີ ນາມ, ເວສ຺ສຠຸສ຺ສ ມເຫສິໂນ.

໒໓. ‘‘ໂສໂຓ ຈ ອຸຕ຺ຕໂຣ ເຈວ, ອເຫສຸໍ ອຄ຺ຄສາວກາ;

ອຸປສນ຺ໂຕ ນາມຸປຏ຺ຐາໂກ, ເວສ຺ສຠຸສ຺ສ ມເຫສິໂນ.

໒໔. ‘‘ຣາມາ ເຈວ ສມາລາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫາສາໂລຕິ ວຸຈ຺ຈຕິ.

໒໕. ‘‘ໂສຕ຺ຖິໂກ ເຈວ ຣມ຺ໂມ ຈ, ອເຫສຸໍ ອຄ຺ຄຸປຏ຺ຐກາ;

ໂຄຕມີ ສິຣິມາ ເຈວ, ອເຫສຸໍ ອຄ຺ຄຸປຏ຺ຐິກາ.

໒໖. ‘‘ສຏ຺ຐິຣຕນມຸພ຺ເພໂຘ, ເຫມຍູປສມູປໂມ;

ກາຍາ ນິຈ຺ຉຣຕີ ຣສ຺ມິ, ຣຕ຺ຕິໍວ ປພ຺ພເຕ ສິຂີ.

໒໗. ‘‘ສຏ຺ຐິວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ, ຊນຕໍ ພຫຸໍ.

໒໘. ‘‘ຘມ຺ມໍ ວິຕ຺ຖາຣິກໍ ກຕ຺ວາ, ວິຠຊິຕ຺ວາ ມຫາຊນໍ;

ຘມ຺ມນາວໍ ຐເປຕ຺ວານ, ນິພ຺ພຸໂຕ ໂສ ສສາວໂກ.

໒໙. ‘‘ທສ຺ສເນຍ຺ຍໍ ສພ຺ພຊນໍ, ວິຫາຣໍ ອິຣິຍາປຖໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ’’ຕິ.

ຕຕ຺ຖ ເຫມຍູປສມູປໂມຕິ ສຸວຓ຺ຓຕ຺ຖມ຺ຠສທິໂສຕິ ອຕ຺ໂຖ. ນິຈ຺ຉຣຕີຕິ ອິໂຕ ຈິໂຕ ຈ ສນ຺ຘາວຕິ. ຣສ຺ມີຕິ ປຠາຣສ຺ມິ. ຣຕ຺ຕິໍວ ປພ຺ພເຕ ສິຂີຕິ ຣຕ຺ຕິຍໍ ປພ຺ພຕມຕ຺ຖເກ ອຄ຺ຄິ ວິຍ. ຣໍສິວິຊ຺ໂຊຕາ ຕສ຺ສ ກາເຍຕິ ອຕ຺ໂຖ. ວິຠຊິຕ຺ວາຕິ ວິຠາຄໍ ກຕ຺ວາ, ອຸຄ຺ຆຏິຕາທິວເສນ ໂສຕາປນ຺ນາທິວເສນ ຈາຕິ ອຕ຺ໂຖ. ຘມ຺ມນາວນ຺ຕິ ອຏ຺ຐງ຺ຄມຄ຺ຄສງ຺ຂາຕໍ ຘມ຺ມນາວໍ, ຈຕຸໂຣຆນິຕ຺ຖຣຓຕ຺ຖາຍ ຐເປຕ຺ວາຕິ ອຕ຺ໂຖ. ທສ຺ສເນຍ຺ຍນ຺ຕິ ທສ຺ສນີໂຍ. ສພ຺ພຊນນ຺ຕິ ສພ຺ໂພ ຊໂນ, ສສາວກສງ຺ໂຆ ສມ຺ມາສມ຺ພຸທ຺ໂຘຕິ ອຕ຺ໂຖ. ວິຫາຣນ຺ຕິ ວິຫາໂຣ, ສພ຺ພຕ຺ຖ ປຈ຺ຈຕ຺ເຕ ອຸປໂຍຄວຈນໍ ທຏ຺ຐພ຺ພໍ.

ເວສ຺ສຠູ ກິຣ ຠຄວາ ອຸສຠວຕີນຄເຣ ເຂເມ ມິຄທາເຍ ປຣິນິພ຺ພາຍິ. ຘາຕຸໂຍ ປນສ຺ສ ວິປ຺ປກິຣິໍສຸ.

‘‘ອຸສຠວຕິປຸເຣ ປຸຣຸຕ຺ຕເມ, ຊິນວສໂຠ ຠຄວາ ຫິ ເວສ຺ສຠູ;

ອຸປວນວິຫເຣ ມໂນຣເມ, ນິຣຸປຘິເສສມຸປາຄໂຕ ກິຣາ’’ຕິ.

ເສສໍ ສພ຺ພຕ຺ຖ ຄາຖາສຸ ປາກຏເມວາຕິ.

ເວສ຺ສຠູພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ເອກວີສຕິໂມ ພຸທ຺ຘວໍໂສ.