໒໒. ສິຂີພຸທ຺ຘວໍສວຓ຺ຓນາ

ວິປສ຺ສິສ຺ສ ອປຣຠາເຄ ອນ຺ຕຣຫິເຕ ຈ ຕສ຺ມິໍ ກປ຺ເປ ຕໂຕ ປຣໍ ເອກູນສຏ຺ຐິຍາ ກປ຺ເປສຸ ພຸທ຺ຘາ ໂລເກ ນ ອຸປ຺ປຊ຺ຊິໍສຸ. ອປຄຕພຸທ຺ຘາໂລໂກ ອໂຫສິ. ກິເລສເທວປຸຕ຺ຕມາຣານໍ ເອກຣຊ຺ຊໍ ອປຄຕກຓ຺ຏກໍ ອໂຫສິ. ອິໂຕ ປນ ເອກຕ຺ຕິໍສກປ຺ເປ ສິນິທ຺ຘສຸກ຺ຂສາຣທາຣຸປຈິໂຕ ປຫູຕສປ຺ປິສິຕ຺ໂຕ ນິຘູໂມ ສິຂີ ວິຍ ສິຂີ ຈ ເວສ຺ສຠູ ຈາຕິ ທ຺ເວ ສມ຺ມາສມ຺ພຸທ຺ຘາ ໂລເກ ອຸປ຺ປຊ຺ຊິໍສຸ. ຕຕ຺ຖ ສິຂີ ປນ ຠຄວາ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ກຸສລກຣຓວຕີ ອຣຸຓວຕີນຄເຣ ປຣມຄຸຓວໂຕ ອຣຸຓວໂຕ ນາມ ຣຎ຺ໂຎ ອຄ຺ຄມເຫສິຍາ ຣຕ຺ຕກນກປຏິພິມ຺ພຣຸຈິຣປ຺ປຠາຍ ປຠາວຕິຍາ ນາມ ເທວິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສ ມາເສ ວີຕິນາເມຕ຺ວາ ນິສຠຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ເນມິຕ຺ຕິກາ ປນສ຺ສ ນາມໍ ກໂຣນ຺ຕາ ອຸຓ຺ຫີສສ຺ສ ສິຂາ ວິຍ ອຸຄ຺ຄຕຕ຺ຕາ ‘‘ສິຂີ’’ຕິ ນາມມກໍສຸ. ໂສ ສຕ຺ຕວສ຺ສສຫສ຺ສານິ ອຄາຣໍ ອຊ຺ຌາວສິ. ສຸຈນ຺ທກສິຣີຄິຣິຍສນາຣິວສຠ ນາມກາ ຕໂຍ ປາສາທາ ອເຫສຸໍ. ສພ຺ພກາມາເທວິປ຺ປມຸຂານິ ຈຕຸວີສຕິ ອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ສພ຺ພກາມາເທວິຍາ ຄຸຓຄຓາຕຸເລ ອຕຸເລ ນາມ ປຸຕ຺ເຕ ອຸປ຺ປນ຺ເນ ຫຕ຺ຖິຍາເນນ ຫຕ຺ຖິກ຺ຂນ຺ຘວຣຄໂຕ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ຕໍ ສຕ຺ຕຕິປຸຣິສສຕສຫສ຺ສານິ ອນຸປພ຺ພຊິໍສຸ. ໂສ ເຕຫິ ປຣິວຸໂຕ ອຏ຺ຐມາສໍ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ຄຓສງ຺ຄຓິກໍ ປຫາຍ ສຸທສ຺ສນນິຄເມ ປິຍທສ຺ສີເສຏ຺ຐິໂນ ຘີຕຸຍາ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ຕຣຸຓຂທິຣວເນ ທິວາວິຫາຣໍ ວີຕິນາເມຕ຺ວາ ອໂນມທສ຺ສິນາ ນາມ ຕາປເສນ ທິນ຺ນາ ອຏ຺ຐ ກຸສຕິຓມຸຏ຺ຐິໂຍ ຄເຫຕ຺ວາ ປຸຓ຺ຑຣີກໂພຘິໍ ອຸປສງ຺ກມິ. ຕສ຺ສາ ກິຣ ປຸຓ຺ຑຣີກໂພຘິຍາປິ ປາຏລິຍາ ປມາຓເມວ ປມາຓໍ ອໂຫສິ. ຕໍທິວສເມວ ໂສ ປຓ຺ຓາສຣຕນກ຺ຂນ຺ໂຘ ຫຸຕ຺ວາ ອພ຺ຠຸຄ຺ຄໂຕ, ສາຂາປິສ຺ສ ປຓ຺ຓາສຣຕນມຕ຺ຕາວ. ໂສ ທິພ຺ເພຫິ ຄນ຺ເຘຫິ ປຸປ຺ເຜຫິ ສຎ຺ຉນ຺ໂນ ອໂຫສິ. ນ ເກວລໍ ປຸປ຺ເຜເຫວ, ຜເລຫິປິ ສຎ຺ຉນ຺ໂນ ອໂຫສິ. ຕສ຺ສ ເອກປສ຺ສໂຕ ຕຣຸຓານິ ຜລານິ ເອກໂຕ ມຊ຺ຌິມານິ ເອກໂຕ ນາຕິປກ຺ການິ ເອກໂຕ ປກ຺ຂິຕ຺ຕທິພ຺ໂພຊານິ ວິຍ ສຸຣສານິ ວຓ຺ຓຄນ຺ຘຣສສມ຺ປນ຺ນານິ ຕໂຕ ຕໂຕ ໂອລມ຺ພນ຺ຕິ. ຍຖາ ຈ ໂສ, ເອວໍ ທສສຫສ຺ສິຈກ຺ກວາເຬສຸ ປຸປ຺ຜູປຄາ ຣຸກ຺ຂາ ປຸປ຺ເຜຫິ ຜລູປຄາ ຣຸກ຺ຂາ ຜເລຫິ ປຏິມຓ຺ຑິຕາ ອເຫສຸໍ.

ໂສ ຕຕ຺ຖ ຈຕຸວີສຕິຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ຈຕຸຣງ຺ຄວີຣິຍໍ ອຘິຏ຺ຐາຍ ນິສີທິ. ເອວໍ ນິສີທິຕ຺ວາ ຉຕ຺ຕິໍສ ໂຍຊນວິຕ຺ຖຕໍ ສມາຣໍ ມາຣພລໍ ວິຘມິຕ຺ວາ ສມ຺ໂພຘິໍ ປາປຸຓິຕ຺ວາ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ໂພຘິສມີເປເຍວ ສຕ຺ຕສຕ຺ຕາຫໍ ວີຕິນາເມຕ຺ວາ ພ຺ຣຫ຺ມາຍາຈນໍ ສມ຺ປຏິຈ຺ຉິຕ຺ວາ ອຕ຺ຕນາ ສຫ ປພ຺ພຊິຕານໍ ສຕ຺ຕຕິຍາ ຠິກ຺ຂຸສຕສຫສ຺ສານໍ ອຸປນິສ຺ສຍສມ຺ປຕ຺ຕິໍ ທິສ຺ວາ ສຸຣປເຖນ ຄນ຺ຕ຺ວາ ວິວິຘາວຣຓວຕິຍາ ອຣຸຓວຕິຍາ ຣາຊຘານິຍາ ສມີເປ ມິຄາຊິນຸຍ຺ຍາເນ ໂອຕຣິຕ຺ວາ ເຕຫິ ມຸນິຄເຓຫິ ປຣິວຸໂຕ ເຕສໍ ມຊ຺ເຌ ຘມ຺ມຈກ຺ກໍ ປວຕ຺ເຕສິ. ຕທາ ໂກຏິສຕສຫສ຺ສານໍ ປຐໂມ ອຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ວິປສ຺ສິສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ສິຂິວ຺ຫໂຍ ອາສິ ຊິໂນ, ອສໂມ ອປ຺ປຏິປຸຄ຺ຄໂລ.

໒. ‘‘ມາຣເສນໍ ປມທ຺ທິຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ;

ຘມ຺ມຈກ຺ກໍ ປວຕ຺ເຕສິ, ອນຸກມ຺ປາຍ ປາຓິນໍ.

໓. ‘‘ຘມ຺ມຈກ຺ກໍ ປວຕ຺ເຕນ຺ເຕ, ສິຂິມ຺ຫິ ຊິນປຸງ຺ຄເວ;

ໂກຏິສຕສຫສ຺ສານໍ, ປຐມາຠິສມໂຍ ອຫູ’’ຕິ.

ປຸນປິ ອຣຸຓວຕິຍາ ຣາຊຘານິຍາ ສມີເປເຍວ ອຠິຠູຣາຊປຸຕ຺ຕສ຺ສ ຈ ສມ຺ຠວຣາຊປຸຕ຺ຕສ຺ສ ຈາຕິ ທ຺ວິນ຺ນໍ ສປຣິວາຣານໍ ຘມ຺ມໍ ເທເສຕ຺ວາ ນວຸຕິໂກຏິສຫສ຺ສານິ ຘມ຺ມາມຕໍ ປາເຍສິ. ໂສ ທຸຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໔. ‘‘ອປຣມ຺ປິ ຘມ຺ມໍ ເທເສນ຺ເຕ, ຄຓເສຏ຺ເຐ ນຣຸຕ຺ຕເມ;

ນວຸຕ຺ຕິໂກຏິສຫສ຺ສານໍ, ທຸຕິຍາຠິສມໂຍ ອຫູ’’ຕິ.

ຍທາ ປນ ສູຣິຍວຕີນຄຣທ຺ວາເຣ ຈມ຺ປກຣຸກ຺ຂມູເລ ຕິຕ຺ຖິຍມທມານຠຎ຺ຊນຕ຺ຖໍ ສພ຺ພຊນພນ຺ຘນໂມກ຺ຂຕ຺ຖຎ຺ຈ ຍມກປາຏິຫາຣິຍໍ ກໂຣນ຺ໂຕ ຠຄວາ ຘມ຺ມໍ ເທເສສິ, ຕທາ ອສີຕິໂກຏິສຫສ຺ສານໍ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໕. ‘‘ຍມກປາຏິຫາຣິຍຎ຺ຈ, ທສ຺ສຍນ຺ເຕ ສເທວເກ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫູ’’ຕິ.

ອຠິຠຸນາ ຈ ສມ຺ຠເວນ ຈ ຣາຊປຸຕ຺ເຕນ ສທ຺ຘິໍ ປພ຺ພຊິຕານໍ ອຣຫນ຺ຕານໍ ສຕສຫສ຺ສານໍ ມຊ຺ເຌ ນິສີທິຕ຺ວາ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ, ອຣຸຓວຕີນຄເຣ ຎາຕິສມາຄເມ ປພ຺ພຊິຕານໍ ອສີຕິຍາ ຠິກ຺ຂຸສຫສ຺ສານໍ ມຊ຺ເຌ ນິສີທິຕ຺ວາ ປາຕິໂມກ຺ຂໍ ອຸທ຺ທິສິ, ໂສ ທຸຕິໂຍ ສນ຺ນິປາໂຕ ອໂຫສິ. ຘນຎ຺ຊຍນຄເຣ ຘນປາລກນາຄວິນຍນສມເຍ ປພ຺ພຊິຕານໍ ສຕ຺ຕຕິຍາ ຠິກ຺ຂຸສຫສ຺ສານໍ ມຊ຺ເຌ ຠຄວາ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໖. ‘‘ສນ຺ນິປາຕາ ຕໂຍ ອາສຸໍ, ສິຂິສ຺ສາປິ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ‘‘ຠິກ຺ຂຸສຕສຫສ຺ສານໍ, ປຐໂມ ອາສິ ສມາຄໂມ;

ອສີຕິຠິກ຺ຂຸສຫສ຺ສານໍ, ທຸຕິໂຍ ອາສິ ສມາຄໂມ.

໘. ‘‘ສຕ຺ຕຕິຠິກ຺ຂຸສຫສ຺ສານໍ, ຕຕິໂຍ ອາສິ ສມາຄໂມ;

ອນຸປລິຕ຺ໂຕ ປທຸມໍວ, ໂຕຍມ຺ຫິ ສມ຺ປວຑ຺ຒິຕ’’ນ຺ຕິ.

ຕຕ຺ຖ ອນຸປລິຕ຺ໂຕ ປທຸມໍວາຕິ ໂຕເຍ ຊາຕໍ ໂຕເຍວ ວຑ຺ຒິຕໍ ປທຸມໍ ວິຍ ໂຕເຍນ ອນຸປລິຕ຺ຕໍ, ໂສປິ ຠິກ຺ຂຸສນ຺ນິປາໂຕ ໂລເກ ຊາໂຕປິ ໂລກຘມ຺ເມຫິ ອນຸປລິຕ຺ໂຕ ອໂຫສີຕິ ອຕ຺ໂຖ.

ຕທາ ກິຣ ອມ຺ຫາກໍ ໂພຘິສຕ຺ໂຕ ກຕ຺ຖຈິ ອສໍສຏ຺ໂຐ ປຣິຠຸຕ຺ຕນຄເຣ ອຣິນ຺ທໂມ ນາມ ຣາຊາ ຫຸຕ຺ວາ ສິຂິມ຺ຫິ ສຕ຺ຖຣິ ປຣິຠຸຕ຺ຕນຄຣມນຸປ຺ປຕ຺ເຕ ສປຣິວາໂຣ ຣາຊາ ຠຄວໂຕ ປຈ຺ຈຸຄ຺ຄນ຺ຕ຺ວາ ປສາທວຑ຺ຒິຕຫທຍນຍນໂສໂຕ ທສພລສ຺ສ ອມລຈຣຓກມລຍຸຄເຬສຸ ສປຣິວາໂຣ ສິຣສາ ອຠິວນ຺ທິຕ຺ວາ ທສພລໍ ນິມນ຺ເຕຕ຺ວາ ສຕ຺ຕາຫໍ ອິສ຺ສຣິຍກຸລວິຠວສທ຺ຘານຸຣູປໍ ມຫາທານໍ ທຕ຺ວາ ທຸສ຺ສຠຓ຺ຑາຄາຣທ຺ວາຣານິ ວິວຣາເປຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫຄ຺ຆານິ ວຕ຺ຖານິ ອທາສິ. ອຕ຺ຕໂນ ຈ ພລຣູປລກ຺ຂຓຊວສມ຺ປນ຺ນເຫມຊາລມາລາສມລງ຺ກຕໍ ນວກນກຣຸຈິຣທຓ຺ຑໂກສຈາມຣຍຸຄວິຣາຊິຕໍ ວິປຸລມຸທຸກຓ຺ຓໍ ຈນ຺ທຣາຊິວິຣາຊິຕວທນໂສຠໍ ເອຣາວຓວາຣຓມິວ ອຣິວາຣຓໍ ວຣວາຣຓໍ ທຕ຺ວາ ວາຣຓປ຺ປມາຓເມວ ກຕ຺ວາ ກປ຺ປິຍຠຓ຺ຑຎ຺ຈ ອທາສິ. ໂສປິ ນໍ ສຕ຺ຖາ – ‘‘ອິໂຕ ເອກຕ຺ຕິໍສກປ຺ເປ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໙. ‘‘ອຫໍ ເຕນ ສມເຍນ, ອຣິນ຺ທໂມ ນາມ ຂຕ຺ຕິໂຍ;

ສມ຺ພຸທ຺ຘປ຺ປມຸຂໍ ສງ຺ຆໍ, ອນ຺ນປາເນນ ຕປ຺ປຍິໍ.

໑໐. ‘‘ພຫຸໍ ທຸສ຺ສວຣໍ ທຕ຺ວາ, ທຸສ຺ສໂກຏິໍ ອນປ຺ປກໍ;

ອລງ຺ກຕໍ ຫຕ຺ຖິຍານໍ, ສມ຺ພຸທ຺ຘສ຺ສ ອທາສຫໍ.

໑໑. ‘‘ຫຕ຺ຖິຍານໍ ນິມ຺ມິນິຕ຺ວາ, ກປ຺ປິຍໍ ອຸປນາມຍິໍ;

ປູຣຍິໍ ມານສໍ ມຍ຺ຫໍ, ນິຈ຺ຈໍ ທຬ຺ຫມຸປຏ຺ຐິຕໍ.

໑໒. ‘‘ໂສປິ ມໍ ພຸທ຺ໂຘ ພ຺ຍາກາສິ, ສິຂີ ໂລກຄ຺ຄນາຍໂກ;

ເອກຕ຺ຕິໍເສ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ.

໑໔. ‘‘ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ນິມ຺ມິນິຕ຺ວາຕິ ຕສ຺ສ ຫຕ຺ຖິໂນ ປມາເຓນ ຕຸລຍິຕ຺ວາ. ກປ຺ປິຍນ຺ຕິ ກປ຺ປິຍຠຓ຺ຑໍ, ຠິກ຺ຂູນໍ ຍໍ ຠຓ຺ຑໍ ກປ຺ປຕິ ຄເຫຕຸໍ, ຕໍ ກປ຺ປິຍຠຓ຺ຑໍ ນາມ. ປູຣຍິໍ ມານສໍ ມຍ຺ຫນ຺ຕິ ມມ ຈິຕ຺ຕໍ ທານປີຕິຍາ ປູຣຍິໍ, ມຍ຺ຫໍ ຫາສຸປ຺ປາທນສມຕ຺ຖໍ ອກາສິນ຺ຕິ ອຕ຺ໂຖ. ນິຈ຺ຈໍ ທຬ຺ຫມຸປຏ຺ຐິຕນ຺ຕິ ນິຈ຺ຈກາລໍ ທານໍ ທສ຺ສາມີ’’ຕິ ທານວເສນ ທຬ຺ຫໍ ອຸປຏ຺ຐິຕໍ ຈິຕ຺ຕນ຺ຕິ ອຕ຺ໂຖ.

ຕສ຺ສ ປນ ຠຄວໂຕ ນຄຣໍ ອຣຸຓວຕີ ນາມ ອໂຫສິ. ອຣຸຓວາ ນາມ ຣາຊາ ປິຕາ, ປຠາວຕີ ນາມ ມາຕາ, ອຠິຠູ ຈ ສມ຺ຠໂວ ຈ ທ຺ເວ ອຄ຺ຄສາວກາ, ເຂມງ຺ກໂຣ ນາມຸປຏ຺ຐາໂກ, ສຂິລາ ຈ ມທຸມາ ຈ ທ຺ເວ ອຄ຺ຄສາວິກາ, ປຸຓ຺ຑຣີກຣຸກ຺ໂຂ ໂພຘິ, ສຣີຣຎ຺ຈສ຺ສ ສຕ຺ຕຕິຫຕ຺ຖຸພ຺ເພຘໍ ອໂຫສິ. ສຣີຣປ຺ປຠາ ນິຈ຺ຈກາລໍ ໂຍຊນຕ຺ຕຍໍ ຜຣິຕ຺ວາ ອຏ຺ຐາສິ. ສຕ຺ຕຕິວສ຺ສສຫສ຺ສານິ ອາຍຸ, ສພ຺ພກາມາ ນາມສ຺ສ ອຄ຺ຄມເຫສີ, ອຕຸໂລ ນາມສ຺ສ ປຸຕ຺ໂຕ, ຫຕ຺ຖິຍາເນນ ນິກ຺ຂມິ. ເຕນ ວຸຕ຺ຕໍ –

໑໕. ‘‘ນຄຣໍ ອຣຸຓວຕີ ນາມ, ອຣຸໂຓ ນາມ ຂຕ຺ຕິໂຍ;

ປຠາວຕີ ນາມ ຊນິກາ, ສິຂິສ຺ສາປິ ມເຫສິໂນ.

໒໐. ‘‘ອຠິຠູ ສມ຺ຠໂວ ເຈວ, ອເຫສຸໍ ອຄ຺ຄສາວກາ;

ເຂມງ຺ກໂຣ ນາມຸປຏ຺ຐາໂກ, ສິຂິສ຺ສາປິ ມເຫສິໂນ.

໒໑. ‘‘ສຂິລາ ຈ ປທຸມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ປຸຓ຺ຑຣີໂກຕິ ວຸຈ຺ຈຕິ.

໒໒. ‘‘ສິຣິວຑ຺ໂຒ ຈ ນນ຺ໂທ ຈ, ອເຫສຸໍ ອຄ຺ຄຸປຏ຺ຐກາ;

ຈິຕ຺ຕາ ເຈວ ສຸຄຸຕ຺ຕາ ຈ, ອເຫສຸໍ ອຄ຺ຄຸປຏ຺ຐິກາ.

໒໓. ‘‘ອຸຈ຺ຈຕ຺ຕເນນ ໂສ ພຸທ຺ໂຘ, ສຕ຺ຕຕິຫຕ຺ຖມຸຄ຺ຄໂຕ;

ກຎ຺ຈນຄ຺ຆິຍສງ຺ກາໂສ, ທ຺ວຕ຺ຕິໍສວຣລກ຺ຂໂຓ.

໒໔. ‘‘ຕສ຺ສາປິ ພ຺ຍາມປ຺ປຠາ ກາຍາ, ທິວາຣຕ຺ຕິໍ ນິຣນ຺ຕຣໍ;

ທິໂສທິສໍ ນິຈ຺ຉຣນ຺ຕິ, ຕີຓິ ໂຍຊນໂສ ປຠາ.

໒໕. ‘‘ສຕ຺ຕຕິວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໖. ‘‘ຘມ຺ມເມຆໍ ປວສ຺ເສຕ຺ວາ, ເຕມຍິຕ຺ວາ ສເທວເກ;

ເຂມນ຺ຕໍ ປາປຍິຕ຺ວານ, ນິພ຺ພຸໂຕ ໂສ ສສາວໂກ.

໒໗. ‘‘ອນຸພ຺ຍຎ຺ຊນສມ຺ປນ຺ນໍ, ທ຺ວຕ຺ຕິໍສວຣລກ຺ຂຓໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ’’ຕິ.

ຕຕ຺ຖ ປຸຓ຺ຑຣີໂກຕິ ເສຕມ຺ພຣຸກ຺ໂຂ. ຕີຓິ ໂຍຊນໂສ ປຠາຕິ ຕີຓິ ໂຍຊນານິ ປຠາ ນິຈ຺ຉຣນ຺ຕີຕິ ອຕ຺ໂຖ. ຘມ຺ມເມຆນ຺ຕິ ຘມ຺ມວສ຺ສໍ, ຘມ຺ມວສ຺ສນໂກ ພຸທ຺ຘເມໂຆ. ເຕມຍິຕ຺ວາຕິ ຘມ຺ມກຖາສລິເລນ ເຕເມຕ຺ວາ, ສິຎ຺ຈິຕ຺ວາຕິ ອຕ຺ໂຖ. ສເທວເກຕິ ສເທວເກ ສຕ຺ເຕ. ເຂມນ຺ຕນ຺ຕິ ເຂມນ຺ຕໍ ນິພ຺ພານໍ. ອນຸພ຺ຍຎ຺ຊນສມ຺ປນ຺ນນ຺ຕິ ຕມ຺ພນຂຕຸງ຺ຄນາສວຏ຺ຏງ຺ຄຸລິຕາທີຫິ ອສີຕິຍາ ອນຸພ຺ຍຎ຺ຊເນຫິ ສມ຺ປນ຺ນໍ, ທ຺ວຕ຺ຕິໍສມຫາປຸຣິສລກ຺ຂຓປຏິມຓ຺ຑິຕໍ ຠຄວໂຕ ສຣີຣນ຺ຕິ ອຕ຺ໂຖ. ສິຂີ ກິຣ ສມ຺ມາສມ຺ພຸທ຺ໂຘ ສີລວຕີນຄເຣ ອສ຺ສາຣາເມ ປຣິນິພ຺ພາຍິ.

‘‘ສິຂີວ ໂລເກ ຕປສາ ຊລິຕ຺ວາ, ສິຂີວ ເມຆາຄມເນ ນທິຕ຺ວາ;

ສິຂີ ມເຫສິນ຺ຘນວິປ຺ປຫີໂນ, ສິຂີວ ສນ຺ຕິໍ ສຸຄໂຕ ຄໂຕ ໂສ’’.

ສິຂິສ຺ສ ກິຣ ຠຄວໂຕ ຘາຕຸໂຍ ເອກຄ຺ຆນາວ ຫຸຕ຺ວາ ອຏ຺ຐໍສຸ ນ ວິປ຺ປກິຣິໍສຸ. ສກລຊມ຺ພຸທີປວາສິໂນ ປນ ມນຸສ຺ສາ ຕິໂຍຊນຸພ຺ເພຘໍ ສຕ຺ຕຣຕນມຍໍ ຫິມຄິຣິສທິສໂສຠໍ ຖູປມກໍສຸ. ເສສເມຕ຺ຖ ຄາຖາສຸ ປາກຏເມວາຕິ.

ສິຂີພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ວີສຕິໂມ ພຸທ຺ຘວໍໂສ.