໑໙. ຕິສ຺ສພຸທ຺ຘວໍສວຓ຺ຓນາ

ຕສ຺ສ ປນ ສິທ຺ຘຕ຺ຖສ຺ສ ຠຄວໂຕ ອປຣຠາເຄ ເອໂກ ກປ຺ໂປ ພຸທ຺ຘສຸຎ຺ໂຎ ອໂຫສິ. ອິໂຕ ທ຺ວານວຸຕິກປ຺ປມຕ຺ຖເກ ຕິສ຺ໂສ, ຜຸສ຺ໂສຕິ ເອກສ຺ມິໍ ກປ຺ເປ ທ຺ເວ ພຸທ຺ຘາ ນິພ຺ພຕ຺ຕິໍສຸ. ຕຕ຺ຖ ຕິສ຺ໂສ ນາມ ມຫາປຸຣິໂສ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ເຂມກນຄເຣ ຊນສນ຺ຘສ຺ສ ນາມ ຣຎ຺ໂຎ ອຄ຺ຄມເຫສິຍາ ປທຸມທລສທິສນຍນາຍ ປທຸມານາມາຍ ເທວິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ອໂນມຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ສຕ຺ຕວສ຺ສສຫສ຺ສານິ ອຄາຣໍ ອຊ຺ຌາວສິ. ຕສ຺ສ ຄຸຫາເສລ-ນາຣິສຍ-ນິສຠນາມກາ ຕໂຍ ປາສາທາ ອເຫສຸໍ. ສຸຠທ຺ທາເທວິປ຺ປມຸຂານິ ເຕຕ຺ຕິໍສ ອິຕ຺ຖິສຫສ຺ສານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ສຸຠທ຺ທາເທວິຍາ ປຸຕ຺ເຕ ອານນ຺ທກຸມາເຣ ອຸປ຺ປນ຺ເນ ໂສນຸຕ຺ຕຣໍ ນາມ ອນຸຕ຺ຕຣໍ ຕຸຣງ຺ຄວຣມາຣຸຍ຺ຫ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ຕໍ ມນຸສ຺ສານໍ ໂກຏິ ອນຸປພ຺ພຊິ. ໂສ ເຕຫິ ປຣິວຸໂຕ ອຏ຺ຐ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ວີຣນິຄເມ ວີຣເສຏ຺ຐິສ຺ສ ຘີຕາຍ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ສລລວເນ ທິວາວິຫາຣໍ ວີຕິນາເມຕ຺ວາ ສາຍນ຺ຫສມເຍ ວິຊິຕສງ຺ຄາມເກນ ນາມ ຍວປາເລນ ອຸປນີຕາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ອສນໂພຘິໍ ອຸປສງ຺ກມິຕ຺ວາ ຈຕ຺ຕາລີສຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ຕຕ຺ຖ ປລ຺ລງ຺ກໍ ອາຠຸຊິຕ຺ວາ ສມາຣໍ ມາຣພລໍ ວິຘມິຕ຺ວາ ອຘິຄຕສພ຺ພຎ຺ຎຸຕຎ຺ຎາໂຓ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ໂພຘິສມີເປເຍວ ວີຕິນາເມຕ຺ວາ ຍສວຕີ ນຄເຣ ພ຺ຣຫ຺ມເທວໍ ອຸທຍຎ຺ຈ ທ຺ເວ ຣາຊປຸຕ຺ເຕ ສປຣິວາເຣ ອຸປນິສ຺ສຍສມ຺ປນ຺ເນ ອາກາເສນ ຄນ຺ຕ຺ວາ ຍສວຕີມິຄທາເຍ ໂອຕຣິຕ຺ວາ ອຸຍ຺ຍານປາເລນ ຣາຊປຸຕ຺ເຕ ປກ຺ໂກສາເປຕ຺ວາ ເຕສໍ ສປຣິວາຣານໍ ອວິສາຣິນາ ພ຺ຍາປິນາ ມຘຸເຣນ ພ຺ຣຫ຺ມສ຺ສເຣນ ທສສຫສ຺ສິໂລກຘາຕຸໍ ວິຎ຺ຎາເປນ຺ໂຕວ ຘມ຺ມຈກ຺ກໍ ປວຕ຺ເຕສິ, ຕທາ ໂກຏິສຕານໍ ປຐໂມ ຘມ຺ມາຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ສິທ຺ຘຕ຺ຖສ຺ສ ອປເຣນ, ອສໂມ ອປ຺ປຏິປຸຄ຺ຄໂລ;

ອນນ຺ຕເຕໂຊ ອມິຕຍໂສ, ຕິສ຺ໂສ ໂລກຄ຺ຄນາຍໂກ.

໒. ‘‘ຕມນ຺ຘກາຣໍ ວິຘມິຕ຺ວາ, ໂອຠາເສຕ຺ວາ ສເທວກໍ;

ອນຸກມ຺ປໂກ ມຫາວີໂຣ, ໂລເກ ອຸປ຺ປຊ຺ຊິ ຈກ຺ຂຸມາ.

໓. ‘‘ຕສ຺ສາປິ ອຕຸລາ ອິທ຺ຘິ, ອຕຸລໍ ສີລໍ ສມາຘິ ຈ;

ສພ຺ພຕ຺ຖ ປາຣມິໍ ຄນ຺ຕ຺ວາ, ຘມ຺ມຈກ຺ກໍ ປວຕ຺ຕຍິ.

໔. ‘‘ໂສ ພຸທ຺ໂຘ ທສສຫສ຺ສິມ຺ຫິ, ວິຎ຺ຎາເປສິ ຄິຣໍ ສຸຈິໍ;

ໂກຏິສຕານິ ອຠິສມິໍສຸ, ປຐເມ ຘມ຺ມເທສເນ’’ຕິ.

ຕຕ຺ຖ ສພ຺ພຕ຺ຖາຕິ ສພ຺ເພສຸ ຘມ຺ເມສຸ ປາຣໍ ຄນ຺ຕ຺ວາ. ທສສຫສ຺ສິມ຺ຫີຕິ ທສສຫສ຺ສິຍໍ ອຖາປເຣນ ສມເຍນ ຕິສ຺ເສນ ສຕ຺ຖາຣາ ສທ຺ຘິໍ ປພ຺ພຊິຕານໍ ຠິກ຺ຂູນໍ ໂກຏິ ມຫາປຸຣິສສ຺ສ ຄຓວາສໍ ປຫາຍ ໂພຘິມູລມຸປຄມນສມເຍ ອຎ຺ຎຕ຺ຣ ຄຕາ. ສາ ຕິສ຺ເສນ ສມ຺ມາສມ຺ພຸທ຺ເຘນ ຘມ຺ມຈກ຺ກໍ ປວຕ຺ຕິຕ’’ນ຺ຕິ ສຸຕ຺ວາ ຍສວຕີມິຄທາຍໍ ອາຄນ຺ຕ຺ວາ ທສພລມຠິວາເທຕ຺ວາ ຕໍ ປຣິວາເຣຕ຺ວາ ນິສີທິ. ເຕສໍ ຠຄວາ ຘມ຺ມໍ ເທເສສິ, ຕທາ ນວຸຕິຍາ ໂກຏີນໍ ທຸຕິຍາຠິສມໂຍ ອໂຫສິ. ປຸນ ມຫາມງ຺ຄລສມາຄເມ ມງ຺ຄລປຣິໂຍສາເນ ສຏ຺ຐິຍາ ໂກຏີນໍ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໕. ‘‘ທຸຕິໂຍ ນວຸຕິໂກຏີນໍ, ຕຕິໂຍ ສຏ຺ຐິໂກຏິໂຍ;

ພນ຺ຘນາໂຕ ປໂມເຈສິ, ສຕ຺ເຕ ນຣມຣູ ຕທາ’’ຕິ.

ຕຕ຺ຖ ທຸຕິໂຍ ນວຸຕິໂກຏີນນ຺ຕິ ທຸຕິໂຍ ອຠິສມໂຍ ອໂຫສິ ນວຸຕິໂກຏິປາຓີນນ຺ຕິ ອຕ຺ໂຖ. ພນ຺ຘນາໂຕຕິ ພນ຺ຘນໂຕ, ທສຫິ ສໍໂຍຊເນຫິ ປຣິໂມເຈສີຕິ ອຕ຺ໂຖ. ອິທານິ ປຣິໂມຈິເຕ ສຕ຺ເຕ ສຣູປໂຕ ທສ຺ເສນ຺ໂຕ ‘‘ນຣມຣູ’’ຕິ ອາຫ. ນຣມຣູຕິ ນຣາມເຣ.

ຍສວຕີນຄເຣ ກິຣ ອນ຺ໂຕວສ຺ສໍ ປພ຺ພຊິຕານໍ ອຣຫນ຺ຕານໍ ສຕສຫສ຺ເສຫິ ປຣິວຸໂຕ ປວາເຣສິ, ໂສ ປຐໂມ ສນ຺ນິປາໂຕ ອໂຫສິ. ອຸຠໂຕ ສຸຊາຕສ຺ສ ສຸຊາຕສ຺ສ ນາມ ຣຎ຺ໂຎ ນາຣິວາຫນກຸມາໂຣ ນາຣິວາຫນນຄຣໍ ອນຸປ຺ປຕ຺ເຕ ຠຄວຕິ ໂລກນາເຖ ສປຣິວາໂຣ ປຈ຺ຈຸຄ຺ຄນ຺ຕ຺ວາ ທສພລໍ ສຠິກ຺ຂຸສງ຺ຆໍ ນິມນ຺ເຕຕ຺ວາ ສຕ຺ຕາຫໍ ອສທິສທານໍ ທຕ຺ວາ ອຕ຺ຕໂນ ຣຊ຺ຊໍ ປຸຕ຺ຕສ຺ສ ນິຍ຺ຍາເຕຕ຺ວາ ສປຣິວາໂຣ ສພ຺ພໂລກາຘິປຕິສ຺ສ ຕິສ຺ສສມ຺ມາສມ຺ພຸທ຺ຘສ຺ສ ສນ຺ຕິເກ ເອຫິຠິກ຺ຂຸປພ຺ພຊ຺ຊາຍ ປພ຺ພຊິ. ຕສ຺ສ ກິຣ ສາ ປພ຺ພຊ຺ຊາ ສພ຺ພທິສາສຸ ປາກຏາ ອໂຫສິ. ຕສ຺ມາ ຕໂຕ ຕໂຕ ອາຄນ຺ຕ຺ວາ ນາຣິວາຫນກຸມາຣໍ ມຫາຊໂນ ອນຸປພ຺ພຊິ. ຕທາ ຕຖາຄໂຕ ນວຸຕິຍາ ຠິກ຺ຂຸສຕສຫສ຺ສສ຺ສ ມຊ຺ຌຄໂຕ ປາຕິໂມກ຺ຂໍ ອຸທ຺ທິສິ, ໂສ ທຸຕິໂຍ ສນ຺ນິປາໂຕ ອໂຫສິ. ປຸນ ເຂມວຕີນຄເຣ ຎາຕິສມາຄເມ ພຸທ຺ຘວໍສຘມ຺ມກຖໍ ສຸຕ຺ວາ ອສີຕິສຕສຫສ຺ສານິ ຕສ຺ສ ສນ຺ຕິເກ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ, ເຕຫິ ປຣິວຸໂຕ ສຸຄໂຕ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໖. ‘‘ສນ຺ນິປາຕາ ຕໂຍ ອາສຸໍ, ຕິສ຺ເສ ໂລກຄ຺ຄນາຍເກ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ‘‘ຂີຓາສວສຕສຫສ຺ສານໍ, ປຐໂມ ອາສິ ສມາຄໂມ;

ນວຸຕິສຕສຫສ຺ສານໍ, ທຸຕິໂຍ ອາສິ ສມາຄໂມ.

໘. ‘‘ອສີຕິສຕສຫສ຺ສານໍ, ຕຕິໂຍ ອາສິ ສມາຄໂມ;

ຂີຓາສວານໍ ວິມລານໍ, ປຸປ຺ຜິຕານໍ ວິມຸຕ຺ຕິຍາ’’ຕິ.

ຕທາ ອມ຺ຫາກໍ ໂພຘິສຕ຺ໂຕ ຍສວຕີນຄເຣ ສຸຊາໂຕ ນາມ ຣາຊາ ຫຸຕ຺ວາ ອິທ຺ຘໍ ຜີຕໍ ຊນປທໍ ອເນກໂກຏິຘນສນ຺ນິຈຍໍ ອນຸຣາຄມຸປຄຕຫທຍຎ຺ຈ ປຣິຊນໍ ຕິຓນຬມິວ ປຣິຈ຺ຈຊິຕ຺ວາ ຊາຕິອາທີສຸ ສໍວິຄ຺ຄຫທໂຍ ນິກ຺ຂມິຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ມຫິທ຺ຘິໂກ ມຫານຸຠາໂວ ຫຸຕ຺ວາ ‘‘ພຸທ຺ໂຘ ໂລເກ ອຸປ຺ປນ຺ໂນ’’ຕິ ສຸຕ຺ວາ ປຎ຺ຈວຓ຺ຓາຍ ປີຕິຍາ ຜຸຏສຣີໂຣ ຫຸຕ຺ວາ ສປຕິສ຺ໂສ ຕິສ຺ສໍ ຠຄວນ຺ຕໍ ອຸປສງ຺ກມິຕ຺ວາ ວນ຺ທິຕ຺ວາ ຈິນ຺ເຕສິ – ‘‘ຫນ຺ທາຫໍ ມນ຺ທາຣວປາຣິຈ຺ຉຕ຺ຕກາທີຫິ ທິພ຺ພກຸສຸເມຫິ ຠຄວນ຺ຕໍ ປູເຊສ຺ສາມີ’’ຕິ. ອຖ ໂສ ເອວໍ ຈິນ຺ເຕຕ຺ວາ ອິທ຺ຘິຍາ ສຄ຺ຄໂລກໍ ຄນ຺ຕ຺ວາ ຈິຕ຺ຕລຕາວນໍ ປວິສິຕ຺ວາ ປທຸມປາຣິຈ຺ຉຕ຺ຕກມນ຺ທາຣວາທີຫິ ທິພ຺ພກຸສຸເມຫິ ຣຕນມຍໍ ຈງ຺ໂກຏກໍ ຄາວຸຕປ຺ປມາຓໍ ປູເຣຕ຺ວາ ຄເຫຕ຺ວາ ຄຄນຕເລນ ອາຄນ຺ຕ຺ວາ ທິພ຺ເພຫິ ສຸຣຠິກຸສຸເມຫິ ຠຄວນ຺ຕໍ ປູເຊສິ. ເອກຎ຺ຈ ມຓິທຓ຺ຑກໍ ສຸວຓ຺ຓມຍກຓ຺ຓິກໍ ປທຸມຣາຄມຓິມຍປຓ຺ຓໍ ສຸຄນ຺ຘເກສຣຈ຺ຉຕ຺ຕໍ ວິຍ ປທຸມຈ຺ຉຕ຺ຕໍ ຠຄວໂຕ ສິຣສິ ຘາຣຍນ຺ໂຕ ຈຕຸປຣິສມຊ຺ເຌ ອຏ຺ຐາສິ. ອຖ ຠຄວາ ນໍ – ‘‘ອິໂຕ ທ຺ເວນວຸເຕ ກປ຺ເປ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໙. ‘‘ອຫໍ ເຕນ ສມເຍນ, ສຸຊາໂຕ ນາມ ຂຕ຺ຕິໂຍ;

ມຫາໂຠຄໍ ຉຑ຺ຑຍິຕ຺ວາ, ປພ຺ພຊິໍ ອິສິປພ຺ພຊໍ.

໑໐. ‘‘ມຍິ ປພ຺ພຊິເຕ ສນ຺ເຕ, ອຸປ຺ປຊ຺ຊິ ໂລກນາຍໂກ;

ພຸທ຺ໂຘຕິ ສທ຺ທໍ ສຸຕ຺ວານ, ປີຕິ ເມ ອຸປປຊ຺ຊຖ.

໑໑. ‘‘ທິພ຺ພໍ ມນ຺ທາຣວໍ ປຸປ຺ຜໍ, ປທຸມໍ ປາຣິຉຕ຺ຕກໍ;

ອຸໂຠ ຫຕ຺ເຖຫິ ປຄ຺ຄຍ຺ຫ, ຘຸນມາໂນ ອຸປາຄມິໍ.

໑໒. ‘‘ຈາຕຸວຓ຺ຓປຣິວຸຕໍ, ຕິສ຺ສໍ ໂລກຄ຺ຄນາຍກໍ;

ຕມຫໍ ປຸປ຺ຜໍ ຄເຫຕ຺ວາ, ມຕ຺ຖເກ ຘາຣຍິໍ ຊິນໍ.

໑໓. ‘‘ໂສປິ ມໍ ພຸທ຺ໂຘ ພ຺ຍາກາສິ, ຊນມຊ຺ເຌ ນິສີທິຍ;

ທ຺ເວນວຸເຕ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ.

໑໕. ‘‘ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ມຍິ ປພ຺ພຊິເຕຕິ ມຍິ ປພ຺ພຊິຕຠາວໍ ອຸປຄເຕ. ‘‘ມມ ປພ຺ພຊິຕໍ ສນ຺ຕ’’ນ຺ຕິ ໂປຕ຺ຖເກສຸ ລິຂນ຺ຕິ, ໂສ ປມາທເລໂຂຕິ ເວທິຕພ຺ໂພ. ອຸປປຊ຺ຊຖາຕິ ອຸປ຺ປຊ຺ຊິຕ຺ຖ. ອຸໂຠ ຫຕ຺ເຖຫີຕິ ອຸເຠຫິ ຫຕ຺ເຖຫິ. ປຄ຺ຄຍ຺ຫາຕິ ຄເຫຕ຺ວານ. ຘຸນມາໂນຕິ ວາກຈີຣານິ ວິຘຸນມາໂນວ. ຈາຕຸວຓ຺ຓປຣິວຸຕນ຺ຕິ ຈຕຸປຣິສປຣິວຸຕໍ, ຂຕ຺ຕິຍພ຺ຣາຫ຺ມຓຄຫປຕິສມຓປຣິວຸຕນ຺ຕິ ອຕ຺ໂຖ. ‘‘ຈຕຸວຓ຺ເຓຫິ ປຣິວຸຕ’’ນ຺ຕິ ປຐນ຺ຕິ ເກຈິ.

ຕສ຺ສ ປນ ຠຄວໂຕ ເຂມໍ ນາມ ນຄຣໍ ອໂຫສິ. ຊນສນ຺ໂຘ ນາມ ຂຕ຺ຕິໂຍ ປິຕາ, ປທຸມາ ນາມ ຊນິກາ, ພ຺ຣຫ຺ມເທໂວ ຈ ອຸທໂຍ ຈ ທ຺ເວ ອຄ຺ຄສາວກາ, ສມງ຺ໂຄ ນາມຸປຏ຺ຐາໂກ, ຜຸສ຺ສາ ຈ ສຸທຕ຺ຕາ ຈ ທ຺ເວ ອຄ຺ຄສາວິກາ, ອສນຣຸກ຺ໂຂ ໂພຘິ, ສຣີຣໍ ສຏ຺ຐິຫຕ຺ຖຸພ຺ເພຘໍ ອໂຫສິ, ວສ຺ສສຕສຫສ຺ສໍ ອາຍຸ, ສຸຠທ຺ທາ ນາມ ອຄ຺ຄມເຫສີ, ອານນ຺ໂທ ນາມ ປຸຕ຺ໂຕ, ຕຸຣງ຺ຄຍາເນນ ນິກ຺ຂມິ. ເຕນ ວຸຕ຺ຕໍ –

໑໖. ‘‘ເຂມກໍ ນາມ ນຄຣໍ, ຊນສນ຺ໂຘ ນາມ ຂຕ຺ຕິໂຍ;

ປທຸມາ ນາມ ຊນິກາ, ຕິສ຺ສສ຺ສ ຈ ມເຫສິໂນ.

໒໑. ‘‘ພ຺ຣຫ຺ມເທໂວ ຈ ອຸທໂຍ ຈ, ອເຫສຸໍ ອຄ຺ຄສາວກາ;

ສມງ຺ໂຄ ນາມຸປຏ຺ຐາໂກ, ຕິສ຺ສສ຺ສ ຈ ມເຫສິໂນ.

໒໒. ‘‘ຜຸສ຺ສາ ເຈວ ສຸທຕ຺ຕາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອສໂນຕິ ປວຸຈ຺ຈຕິ.

໒໔. ‘‘ໂສ ພຸທ຺ໂຘ ສຏ຺ຐິຣຕໂນ, ອຫຸ ອຸຈ຺ຈຕ຺ຕເນ ຊິໂນ;

ອນູປໂມ ອສທິໂສ, ຫິມວາ ວິຍ ທິສ຺ສຕິ.

໒໕. ‘‘ຕສ຺ສາປິ ອຕຸລເຕຊສ຺ສ, ອາຍຸ ອາສິ ອນຸຕ຺ຕໂຣ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໖. ‘‘ອຸຕ຺ຕມໍ ປວຣໍ ເສຏ຺ຐໍ, ອນຸໂຠຕ຺ວາ ມຫາຍສໍ;

ຊລິຕ຺ວາ ອຄ຺ຄິກ຺ຂນ຺ໂຘວ, ນິພ຺ພຸໂຕ ໂສ ສສາວໂກ.

໒໗. ‘‘ວລາຫໂກວ ອນິເລນ, ສູຣິເຍນ ວິຍ ອຸສ຺ສໂວ;

ອນ຺ຘກາໂຣວ ປທີເປນ, ນິພ຺ພຸໂຕ ໂສ ສສາວໂກ’’ຕິ.

ຕຕ຺ຖ ອຸຈ຺ຈຕ຺ຕເນຕິ ອຸຈ຺ຈຠາເວນ. ຫິມວາ ວິຍ ທິສ຺ສຕີຕິ ຫິມວາວ ປທິສ຺ສຕິ. ອຍເມວ ວາ ປາໂຐ. ຍຖາ ໂຍຊນານໍ ສຕານຸຈ຺ໂຈ ຫິມວາ ປຎ຺ຈປພ຺ພໂຕ ສຸທູເຣ ຐິຕານມ຺ປິ ອຸຈ຺ຈຠາເວນ ຈ ໂສມ຺ມຠາເວນ ຈ ອຕິຣມຓີໂຍ ຫຸຕ຺ວາ ທິສ຺ສຕິ, ເອວໍ ຠຄວາປິ ທິສ຺ສຕີຕິ ອຕ຺ໂຖ. ອນຸຕ຺ຕໂຣຕິ ນາຕິທີໂຆ ນາຕິຣສ຺ໂສ. ອາຍຸ ວສ຺ສສຕສຫສ຺ສນ຺ຕິ ອຕ຺ໂຖ. ອຸຕ຺ຕມໍ ປວຣໍ ເສຏ຺ຐນ຺ຕິ ອຎ຺ຎມຎ຺ຎເວວຈນານິ. ອຸສ຺ສໂວຕິ ຫິມພິນ຺ທຸ ວລາຫກອຸສ຺ສວອນ຺ຘກາຣາ ວິຍ ອນິລສູຣິຍທີເປຫິ ອນິຈ຺ຈຕານິລສູຣິຍທີເປຫິ ອຸປທ຺ທຸໂຕ ປຣິນິພ຺ພຸໂຕ ສສາວໂກ ຠຄວາຕິ ອຕ຺ໂຖ.

ຕິສ຺ໂສ ກິຣ ຠຄວາ ສຸນນ຺ທວຕີນຄເຣ ສຸນນ຺ທາຣາເມ ປຣິນິພ຺ພາຍິ. ເສສເມຕ຺ຖ ຄາຖາສຸ ປາກຏເມວາຕິ.

ຕິສ຺ສພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ສຕ຺ຕຣສໂມ ພຸທ຺ຘວໍໂສ.