໑໘. ສິທ຺ຘຕ຺ຖພຸທ຺ຘວໍສວຓ຺ຓນາ

ຘມ຺ມທສ຺ສິມ຺ຫິ ຠຄວຕິ ປຣິນິພ຺ພຸເຕ ອນ຺ຕຣຫິເຕ ຈສ຺ສ ສາສເນ ຕສ຺ມິໍ ກປ຺ເປ ອຕີເຕ ກປ຺ປສຫສ຺ເສ ຈ ສຕ຺ຕສຸ ກປ຺ປສເຕສຸ ຈ ຉສຸ ກປ຺ເປສຸ ຈ ອຕິກ຺ກນ຺ເຕສຸ ອິໂຕ ຈຕຸນວຸຕິກປ຺ປມຕ຺ຖເກ ເອກສ຺ມິໍ ກປ຺ເປ ເອໂກວ ໂລກຕ຺ຖຈໂຣ ອຘິຄຕປຣມຕ຺ໂຖ ສິທ຺ຘຕ຺ໂຖ ນາມ ສຕ຺ຖາ ໂລເກ ປາຕຸຣໂຫສິ. ເຕນ ວຸຕ຺ຕໍ –

໑. ‘‘ຘມ຺ມທສ຺ສິສ຺ສ ອປເຣນ, ສິທ຺ຘຕ຺ໂຖ ໂລກນາຍໂກ;

ນິຫນິຕ຺ວາ ຕມໍ ສພ຺ພໍ, ສູຣິໂຍ ອພ຺ຠຸຄ຺ຄໂຕ ຍຖາ’’ຕິ.

ສິທ຺ຘຕ຺ໂຖ ໂພຘິສຕ຺ໂຕປິ ປາຣມິໂຍ ປູເຣຕ຺ວາ ຕຸສິຕຠວເນ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ເວຠາຣນຄເຣ ອຸເທນສ຺ສ ນາມ ຣຎ຺ໂຎ ອຄ຺ຄມເຫສິຍາ ສຸຜສ຺ສາຍ ນາມ ເທວິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ວີຣິຍຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ຊາເຕ ປນ ມຫາປຸຣິເສ ສພ຺ເພສໍ ອາຣທ຺ຘກມ຺ມນ຺ຕາ ຈ ອິຈ຺ຉິຕາ ຈ ອຕ຺ຖາ ສິທ຺ຘິມຄມໍສຸ. ຕສ຺ມາ ປນສ຺ສ ຎາຕກາ ‘‘ສິທ຺ຘຕ຺ໂຖ’’ຕິ ນາມມກໍສຸ. ໂສ ທສວສ຺ສສຫສ຺ສານິ ອຄາຣມຊ຺ເຌ ວສິ. ຕສ຺ສ ໂກກາ-ສຸປ຺ປລ-ປທຸມນາມກາ ຕໂຍ ປາສາທາ ອເຫສຸໍ. ໂສມນສ຺ສາເທວິປ຺ປມຸຂານິ ອຏ຺ຐຈຕ຺ຕາລີສ ອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ໂສມນສ຺ສາເທວິຍາ ປຸຕ຺ເຕ ອນຸປມກຸມາເຣ ອຸປ຺ປນ຺ເນ ອາສາຬ຺ຫິປຸຓ຺ຓມິຍໍ ສຸວຓ຺ຓສິວິກາຍ ນິກ຺ຂມິຕ຺ວາ ວີຣິຍຸຍ຺ຍານໍ ຄນ຺ຕ຺ວາ ປພ຺ພຊິ. ຕໍ ໂກຏິສຕສຫສ຺ສມນຸສ຺ສາ ອນຸປພ຺ພຊິໍສຸ. ມຫາປຸຣິໂສ ກິຣ ເຕຫິ ສທ຺ຘິໍ ທສ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍໍ ອສທິສພ຺ຣາຫ຺ມຓຄາເມ ສຸເນຕ຺ຕາຍ ນາມ ພ຺ຣາຫ຺ມຓກຎ຺ຎາຍ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ພທຣວເນ ທິວາວິຫາຣໍ ວີຕິນາເມຕ຺ວາ ສາຍນ຺ຫສມເຍ ວຣຸເຓນ ນາມ ຍວປາເລນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ກຓິກາຣໂພຘິໍ ອຸປຄນ຺ຕ຺ວາ ຈຕ຺ຕາລີສຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ສພ຺ພຎ຺ຎຸຕໍ ປາປຸຓິຕ຺ວາ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ວີຕິນາເມຕ຺ວາ ອຕ຺ຕນາ ສຫ ປພ຺ພຊິຕານໍ ຠິກ຺ຂູນໍ ໂກຏິສຕສຫສ຺ສານໍ ຈຕຸສຈ຺ຈປຏິເວຘສມຕ຺ຖຕໍ ທິສ຺ວາ ອນິລປເຖນ ຄນ຺ຕ຺ວາ ຄຍາມິຄທາເຍ ໂອຕຣິຕ຺ວາ ເຕສໍ ຘມ຺ມຈກ຺ກໍ ປວຕ຺ເຕສິ, ຕທາ ໂກຏິສຕສຫສ຺ສານໍ ປຐໂມ ອຠິສມໂຍ ອໂຫສິ. ເຕນ ວຸຕ຺ຕໍ –

໒. ‘‘ໂສປິ ປຕ຺ວານ ສມ຺ໂພຘິໍ, ສນ຺ຕາເຣນ຺ໂຕ ສເທວກໍ;

ອຠິວສ຺ສິ ຘມ຺ມເມເຆນ, ນິພ຺ພາເປນ຺ໂຕ ສເທວກໍ.

໓. ‘‘ຕສ຺ສາປິ ອຕຸລເຕຊສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫູ’’ຕິ.

ຕຕ຺ຖ ສເທວກນ຺ຕິ ສເທວກໍ ໂລກໍ. ຘມ຺ມເມເຆນາຕິ ຘມ຺ມກຖາເມຆວສ຺ເສນ. ປຸນ ຠີມຣຖນຄເຣ ຠີມຣເຖນ ນາມ ຣຎ຺ຎາ ນິມນ຺ຕິໂຕ ນຄຣມຊ຺ເຌ ກເຕ ສນ຺ຖາຄາເຣ ນິສິນ຺ໂນ ກຣວີກຣຸຕມຎ຺ຊຸນາ ສວນສຸເຂນ ປຣມມຘຸເຣນ ປຓ຺ຑິຕຊນຫທຍງ຺ຄເມນ ອມຕາຠິເສກສທິເສນ ພ຺ຣຫ຺ມສ຺ສເຣນ ທສ ທິສາ ປຣິປູເຣນ຺ໂຕ ຘມ຺ມາມຕທຸນ຺ທຸຠິມາຫນິ, ຕທາ ນວຸຕິໂກຏີນໍ ທຸຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໔. ‘‘ປຸນາປຣໍ ຠີມຣເຖ, ຍທາ ອາຫນິ ທຸນ຺ທຸຠິໍ;

ຕທາ ນວຸຕິໂກຏີນໍ, ທຸຕິຍາຠິສມໂຍ ອຫູ’’ຕິ.

ຍທາ ປນ ເວຠາຣນຄເຣ ຎາຕິສມາຄເມ ພຸທ຺ຘວໍສໍ ເທເສນ຺ໂຕ ນວຸຕິໂກຏີນໍ ຘມ຺ມຈກ຺ຂຸໍ ອຸປ຺ປາເທສິ, ໂສ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໕. ‘‘ຍທາ ພຸທ຺ໂຘ ຘມ຺ມໍ ເທເສສິ, ເວຠາເຣ ໂສ ປຸຣຸຕ຺ຕເມ;

ຕທາ ນວຸຕິໂກຏີນໍ, ຕຕິຍາຠິສມໂຍ ອຫູ’’ຕິ.

ອມຣຣຸຈິຣທສ຺ສເນ ອມຣນຄເຣ ນາມ ສມ຺ພໂລ ຈ ສຸມິຕ຺ໂຕ ຈ ທ຺ເວ ຠາຕໂຣ ຣຊ຺ຊໍ ກາເຣສຸໍ. ອຖ ສິທ຺ຘຕ຺ໂຖ ສຕ຺ຖາ ເຕສໍ ຣາຊູນໍ ອຸປນິສ຺ສຍສມ຺ປຕ຺ຕິໍ ທິສ຺ວາ ຄຄນຕເລນ ຄນ຺ຕ຺ວາ ອມຣນຄຣມຊ຺ເຌ ໂອຕຣິຕ຺ວາ ຈກ຺ກາລງ຺ກຕຕເລຫິ ຈຣເຓຫິ ປຖວິຕລໍ ມທ຺ທນ຺ໂຕ ວິຍ ປທເຈຕິຍານິ ທສ຺ເສຕ຺ວາ ອມຣຸຍ຺ຍານໍ ຄນ຺ຕ຺ວາ ປຣມຣມຓີເຍ ອຕ຺ຕໂນ ກຣຸຓາສີຕເລ ສິລາຕເລ ນິສີທິ. ຕໂຕ ທ຺ເວປິ ຠາຕິກຣາຊາໂນ ທສພລສ຺ສ ປທເຈຕິຍານິ ທິສ຺ວາ ປທານິ ອນຸຄນ຺ຕ຺ວາ ສິທ຺ຘຕ຺ຖໍ ອຘິຄຕປຣມຕ຺ຖໍ ສຕ຺ຖາຣໍ ສພ຺ພໂລກເນຕາຣໍ ສປຣິວາຣໍ ອຸປສງ຺ກມິຕ຺ວາ ອຠິວາເທຕ຺ວາ ຠຄວນ຺ຕໍ ປຣິວາເຣຕ຺ວາ ນິສີທິໍສຸ. ເຕສໍ ຠຄວາ ອຊ຺ຌາສຍານຸຣູປໍ ຘມ຺ມໍ ເທເສສິ. ຕສ຺ສ ເຕ ຘມ຺ມກຖໍ ສຸຕ຺ວາ ສຎ຺ຊາຕສທ຺ຘາ ຫຸຕ຺ວາ ສພ຺ເພວ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ. ເຕສໍ ໂກຏິສຕານໍ ຂີຓາສວານໍ ມຊ຺ເຌ ຠຄວາ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ. ເວຠາຣນຄເຣ ຎາຕິສມາຄເມ ປພ຺ພຊິຕານໍ ນວຸຕິໂກຏີນໍ ມຊ຺ເຌ ປາຕິໂມກ຺ຂໍ ອຸທ຺ທິສິ, ໂສ ທຸຕິໂຍ ສນ຺ນິປາໂຕ ອໂຫສິ. ສຸທສ຺ສນວິຫາເຣ ສນ຺ນິປຕິຕານໍ ອສີຕິໂກຏີນໍ ມຊ຺ເຌ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໖. ‘‘ສນ຺ນິປາຕາ ຕໂຍ ອາສຸໍ, ຕສ຺ມິມ຺ປິ ທ຺ວິປທຸຕ຺ຕເມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ‘‘ໂກຏິສຕານໍ ນວຸຕີນໍ, ອສີຕິຍາປິ ຈ ໂກຏິນໍ;

ເອເຕ ອາສຸໍ ຕໂຍ ຐານາ, ວິມລານໍ ສມາຄເມ’’ຕິ.

ຕຕ຺ຖ ນວຸຕີນໍ, ອສີຕິຍາປິ ຈ ໂກຏິນນ຺ຕິ ນວຸຕີນໍ ໂກຏີນໍ ອສີຕິຍາປິ ຈ ໂກຏີນໍ ສນ຺ນິປາຕາ ອເຫສຸນ຺ຕິ ອຕ຺ໂຖ. ເອເຕ ອາສຸໍ ຕໂຍ ຐານາຕິ ເອຕານິ ຕີຓິ ສນ຺ນິປາຕຏ຺ຐານານິ ອເຫສຸນ຺ຕິ ອຕ຺ໂຖ. ‘‘ຐານາເນ ຕານິ ຕີຓິ ອເຫສຸ’’ນ຺ຕິປິ ປາໂຐ.

ຕທາ ອມ຺ຫາກໍ ໂພຘິສຕ຺ໂຕ ສຸຣເສນນຄເຣ ມງ຺ຄໂລ ນາມ ພ຺ຣາຫ຺ມໂຓ ຫຸຕ຺ວາ ເວທເວທງ຺ຄານໍ ປາຣໍ ຄນ຺ຕ຺ວາ ອເນກໂກຏິສງ຺ຂໍ ຘນສນ຺ນິຈຍໍ ທີນານາຖາທີນໍ ປຣິຈ຺ຈຊິຕ຺ວາ ວິເວກາຣາໂມ ຫຸຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ຌານາຠິຎ຺ຎາໂຍ ນິພ຺ພຕ຺ເຕຕ຺ວາ ວິຫຣນ຺ໂຕ – ‘‘ສິທ຺ຘຕ຺ໂຖ ນາມ ພຸທ຺ໂຘ ໂລເກ ອຸປ຺ປນ຺ໂນ’’ຕິ ສຸຕ຺ວາ ຕໍ ອຸປສງ຺ກມິຕ຺ວາ ວນ຺ທິຕ຺ວາ ຕສ຺ສ ຘມ຺ມກຖໍ ສຸຕ຺ວາ ຍາຍ ຊມ຺ພຸຍາ ອຍໍ ຊມ຺ພຸທີໂປ ປຎ຺ຎາຍຕິ, ອິທ຺ຘິຍາ ຕໍ ຊມ຺ພຸໍ ອຸປສງ຺ກມິຕ຺ວາ ຕໂຕ ຜລໍ ອາຫຣິຕ຺ວາ ນວຸຕິໂກຏິຠິກ຺ຂຸປຣິວາຣໍ ສິທ຺ຘຕ຺ຖໍ ສຕ຺ຖາຣໍ ສຸຣເສນວິຫາເຣ ນິສີທາເປຕ຺ວາ ຊມ຺ພຸຜເລຫິ ສນ຺ຕປ຺ເປສິ ສມ຺ປວາເຣສິ. ອຖ ສຕ຺ຖາ ຕໍ ຜລໍ ປຣິຠຸຎ຺ຊິຕ຺ວາ – ‘‘ອິໂຕ ຈຕຸນວຸຕິກປ຺ປມຕ຺ຖເກ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໘. ‘‘ອຫໍ ເຕນ ສມເຍນ, ມງ຺ຄໂລ ນາມ ຕາປໂສ;

ອຸຄ຺ຄເຕໂຊ ທຸປ຺ປສໂຫ, ອຠິຎ຺ຎາພລສມາຫິໂຕ.

໙. ‘‘ຊມ຺ພຸໂຕ ຜລມາເນຕ຺ວາ, ສິທ຺ຘຕ຺ຖສ຺ສ ອທາສຫໍ;

ປຏິຄ຺ຄເຫຕ຺ວາ ສມ຺ພຸທ຺ໂຘ, ອິທໍ ວຈນມພ຺ຣວິ.

໑໐. ‘‘ປສ຺ສຖ ອິມໍ ຕາປສໍ, ຊຏິລໍ ອຸຄ຺ຄຕາປນໍ;

ຈຕຸນວຸຕິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໑. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ.

໑໒. ‘‘ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ທຸປ຺ປສໂຫຕິ ທຸຣາສໂທ. ອຍເມວ ວາ ປາໂຐ. ຕສ຺ສ ປນ ຠຄວໂຕ ນຄຣໍ ເວຠາຣໍ ນາມ ອໂຫສິ. ອຸເທໂນ ນາມ ຣາຊາ ປິຕາ, ຊຍເສໂນຕິປິ ຕສ຺ເສວ ນາມໍ, ສຸຜສ຺ສາ ນາມ ມາຕາ, ສມ຺ພໂລ ຈ ສຸມິຕ຺ໂຕ ຈ ທ຺ເວ ອຄ຺ຄສາວກາ, ເຣວໂຕ ນາມຸປຏ຺ຐາໂກ, ສີວລາ ຈ ສຸຣາມາ ຈ ທ຺ເວ ອຄ຺ຄສາວິກາ, ກຓິກາຣຣຸກ຺ໂຂ ໂພຘິ, ສຣີຣໍ ສຏ຺ຐິຫຕ຺ຖຸພ຺ເພຘໍ ອໂຫສິ. ວສ຺ສສຕສຫສ຺ສໍ ອາຍຸ, ໂສມນສ຺ສາ ນາມ ອຄ຺ຄມເຫສີ ອໂຫສິ, ອນຸປໂມ ນາມ ປຸຕ຺ໂຕ, ສຸວຓ຺ຓສິວິກາຍ ນິກ຺ຂມິ. ເຕນ ວຸຕ຺ຕໍ –

໑໓. ‘‘ເວຠາຣໍ ນາມ ນຄຣໍ, ອຸເທໂນ ນາມ ຂຕ຺ຕິໂຍ;

ສຸຜສ຺ສາ ນາມ ຊນິກາ, ສິທ຺ຘິຕ຺ຖສ຺ສ ມເຫສິໂນ.

໑໘. ‘‘ສມ຺ພໂລ ຈ ສຸມິຕ຺ໂຕ ຈ, ອເຫສຸໍ ອຄ຺ຄສາວກາ;

ເຣວໂຕ ນາມຸປຏ຺ຐາໂກ, ສິທ຺ຘຕ຺ຖສ຺ສ ມເຫສິໂນ.

໑໙. ‘‘ສີວລາ ຈ ສຸຣາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ກຓິກາໂຣຕິ ວຸຈ຺ຈຕິ.

໒໑. ‘‘ໂສ ພຸທ຺ໂຘ ສຏ຺ຐິຣຕນໍ, ອໂຫສິ ນຠມຸຄ຺ຄໂຕ;

ກຎ຺ຈນຄ຺ຆິຍສງ຺ກາໂສ, ທສສຫສ຺ສີ ວິໂຣຈຕິ.

໒໒. ‘‘ໂສປິ ພຸທ຺ໂຘ ອສມສໂມ, ອຕຸໂລ ອປ຺ປຏິປຸຄ຺ຄໂລ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໓. ‘‘ວິປຸລໍ ປຠໍ ທສ຺ສຍິຕ຺ວາ, ປຸປ຺ຜາເປຕ຺ວານ ສາວເກ;

ວິລາເສຕ຺ວາ ສມາປຕ຺ຍາ, ນິພ຺ພຸໂຕ ໂສ ສສາວໂກ’’ຕິ.

ຕຕ຺ຖ ສຏ຺ຐິຣຕນນ຺ຕິ ສຏ຺ຐິຣຕນປ຺ປມາຓໍ ນຠໍ ອຸຄ຺ຄໂຕຕິ ອຕ຺ໂຖ. ກຎ຺ຈນຄ຺ຆິຍສງ຺ກາໂສຕິ ນານາຣຕນວິຈິຕ຺ຕກນກມຍອຄ຺ຆິຍສທິສທສ຺ສໂນຕິ ອຕ຺ໂຖ. ທສສຫສ຺ສີ ວິໂຣຈຕີຕິ ທສສຫສ຺ສິຍໍ ວິໂຣຈຕິ. ວິປຸລນ຺ຕິ ອຸຬາຣໍ ໂອຠາສໍ. ປຸປ຺ຜາເປຕ຺ວານາຕິ ຌານາຠິຎ຺ຎາມຄ຺ຄຜລສມາປຕ຺ຕິປຸປ຺ເຜຫິ ປຸປ຺ຜິເຕ ປຣມໂສຠຄ຺ຄປ຺ປຕ຺ເຕ ກຕ຺ວາຕິ ອຕ຺ໂຖ. ວິລາເສຕ຺ວາຕິ ວິລາສຍິຕ຺ວາ ກີຬິຕ຺ວາ. ສມາປຕ຺ຍາຕິ ໂລກິຍໂລກຸຕ຺ຕຣາຫິ ສມາປຕ຺ຕີຫິ ອຠິຎ຺ຎາຫິ ຈ. ນິພ຺ພຸໂຕຕິ ອນຸປາທາປຣິນິພ຺ພາເນນ ນິພ຺ພຸໂຕ.

ສິທ຺ຘຕ຺ໂຖ ກິຣ ສຕ຺ຖາ ກຎ຺ຈນເວຬຸນຄເຣ ອໂນມຸຍ຺ຍາເນ ປຣິນິພ຺ພາຍິ. ຕຕ຺ເຖວສ຺ສ ຣຕນມຍໍ ຈຕຸໂຍຊນຸພ຺ເພຘໍ ເຈຕິຍມກໍສູຕິ. ເສສຄາຖາສຸ ສພ຺ພຕ຺ຖ ປາກຏເມວາຕິ.

ສິທ຺ຘຕ຺ຖພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ໂສຬສໂມ ພຸທ຺ຘວໍໂສ.