໑໖. ອຕ຺ຖທສ຺ສີພຸທ຺ຘວໍສວຓ຺ຓນາ

ປິຍທສ຺ສິມ຺ຫິ ສມ຺ມາສມ຺ພຸທ຺ເຘ ປຣິນິພ຺ພຸເຕ ຕສ຺ສ ສາສເນ ຈ ອນ຺ຕຣຫິເຕ ປຣິຫາຍິຕ຺ວາ ວຑ຺ຒິຕ຺ວາ ອປຣິມິຕາຍຸເກສຸ ມນຸສ຺ເສສຸ ອນຸກ຺ກເມນ ປຣິຫາຍິຕ຺ວາ ວສ຺ສສຕສຫສ຺ສາຍຸເກສຸ ຊາເຕສຸ ປຣມຕ຺ຖທສ຺ສີ ອຕ຺ຖທສ຺ສີ ນາມ ພຸທ຺ໂຘ ໂລເກ ອຸປ຺ປຊ຺ຊິ. ໂສ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ປຣມໂສຠເນ ໂສຠເນ ນາມ ນຄເຣ ສາຄຣສ຺ສ ນາມ ຣຎ຺ໂຎ ກຸເລ ອຄ຺ຄມເຫສິຍາ ສຸທສ຺ສນເທວິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສ ມາເສ ຄພ຺ເຠ ວສິຕ຺ວາ ສຸຈິນ຺ຘນຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ມາຕຸກຸຈ຺ຉິໂຕ ມຫາປຸຣິເສ ນິກ຺ຂນ຺ຕມຕ຺ເຕ ສຸຈິຣກາລນິຫິຕານິ ກຸລປຣມ຺ປຣາຄຕານິ ມຫານິຘານານິ ຘນສາມິກາ ປຏິລຠິໍສູຕິ ຕສ຺ສ ນາມຄ຺ຄຫຓທິວເສ ‘‘ອຕ຺ຖທສ຺ສີ’’ຕິ ນາມມກໍສຸ. ໂສ ທສວສ຺ສສຫສ຺ສານິ ອຄາຣໍ ອຊ຺ຌາວສິ. ອມຣຄິຣິ-ສຸຣຄິຣິ-ຄິຣິວາຫນນາມກາ ປຣມສຸຣຠິຊນກາ ຕໂຍ ຈສ຺ສ ປາສາທາ ອເຫສຸໍ. ວິສາຂາເທວິປ຺ປມຸຂານິ ເຕຕ຺ຕິໍສ ອິຕ຺ຖິສຫສ຺ສານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ວິສາຂາເທວິຍາ ເສລກຸມາເຣ ນາມ ປຸຕ຺ເຕ ອຸປ຺ປນ຺ເນ ສຸທສ຺ສນໍ ນາມ ອສ຺ສຣາຊໍ ອຠິຣຸຫິຕ຺ວາ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ຕໍ ນວ ມນຸສ຺ສໂກຏິໂຍ ອນຸປພ຺ພຊິໍສຸ. ເຕຫິ ປຣິວຸໂຕ ໂສ ມຫາປຸຣິໂສ ອຏ຺ຐ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ສຸຈິນ຺ຘຣນາຄິຍາ ອຸປຫາຣຕ຺ຖາຍ ອານີຕໍ ມຘຸປາຍາສໍ ມຫາຊເນນ ສນ຺ທິສ຺ສມານສພ຺ພສຣີຣາຍ ນາຄິຍາ ສຫ ສຸວຓ຺ຓປາຕິຍາ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ຕຣຸຓຕຣຸສຕສມລງ຺ກເຕ ຕຣຸຓສາລວເນ ທິວາວິຫາຣໍ ວີຕິນາເມຕ຺ວາ ສາຍນ຺ຫສມເຍ ຘມ຺ມຣຸຈິນາ ມຫາຣຸຈິນາ ນາມ ນາຄຣາເຊນ ທິນ຺ນາ ອຏ຺ຐ ກຸສຕິຓມຸຏ຺ຐິໂຍ ຄເຫຕ຺ວາ ຈມ຺ປກໂພຘິໍ ອຸປສງ຺ກມິຕ຺ວາ ເຕປຎ຺ຎາສຫຕ຺ຖາຍາມວິຕ຺ຖຕໍ ກຸສຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ສມ຺ໂພຘິໍ ປຕ຺ວາ ສພ຺ພພຸທ຺ຘາຈິຓ຺ຓໍ – ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ໂພຘິສມີເປເຍວ ວີຕິນາເມຕ຺ວາ ພ຺ຣຫ຺ມຸໂນ ຘມ຺ມເທສນາຍາຈນໍ ສມ຺ປຏິຈ຺ຉິຕ຺ວາ ອຕ຺ຕນາ ສຫ ປພ຺ພຊິຕນວຠິກ຺ຂຸໂກຏິໂຍ ອຣິຍຘມ຺ມປຏິເວຘສມຕ຺ເຖ ທິສ຺ວາ ອາກາເສນ ຄນ຺ຕ຺ວາ ອໂນມນຄຣສມີເປ ອໂນມຸຍ຺ຍາເນ ໂອຕຣິຕ຺ວາ ເຕຫິ ປຣິວຸໂຕ ຕຕ຺ຖ ຘມ຺ມຈກ຺ກໍ ປວຕ຺ເຕສິ. ຕທາ ໂກຏິສຕສຫສ຺ສານໍ ປຐໂມ ຘມ຺ມາຠິສມໂຍ ອໂຫສິ.

ປຸນ ຠຄວຕິ ໂລກນາຍເກ ເທວໂລກຈາຣິກໍ ຈຣິຕ຺ວາ ຕຕ຺ຖ ຘມ຺ມໍ ເທເສນ຺ເຕ ໂກຏິສຕສຫສ຺ສານໍ ທຸຕິໂຍ ອຠິສມໂຍ ອໂຫສິ. ຍທາ ປນ ຠຄວາ ອຕ຺ຖທສ຺ສີ ອມ຺ຫາກໍ ຠຄວາ ວິຍ ກປິລວຕ຺ຖຸປຸຣໍ ໂສຠນປຸຣໍ ປວິສິຕ຺ວາ ຘມ຺ມໍ ເທເສສິ, ຕທາ ໂກຏິສຕສຫສ຺ສານໍ ຕຕິໂຍ ຘມ຺ມາຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ຕຕ຺ເຖວ ມຓ຺ຑກປ຺ປມ຺ຫິ, ອຕ຺ຖທສ຺ສີ ມຫາຍໂສ;

ມຫາຕມໍ ນິຫນ຺ຕ຺ວານ, ປຕ຺ໂຕ ສມ຺ໂພຘິມຸຕ຺ຕມໍ.

໒. ‘‘ພ຺ຣຫ຺ມຸນາ ຍາຈິໂຕ ສນ຺ໂຕ, ຘມ຺ມຈກ຺ກໍ ປວຕ຺ຕຍິ;

ອມເຕນ ຕປ຺ປຍີ ໂລກໍ, ທສສຫສ຺ສີ ສເທວກໍ.

໓. ‘‘ຕສ຺ສາປິ ໂລກນາຖສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ‘‘ຍທາ ພຸທ຺ໂຘ ອຕ຺ຖທສ຺ສີ, ຈຣຕິ ເທວຈາຣິກໍ;

ໂກຏິສຕສຫສ຺ສານໍ, ທຸຕິຍາຠິສມໂຍ ອຫຸ.

໕. ‘‘ປຸນາປຣໍ ຍທາ ພຸທ຺ໂຘ, ເທເສສິ ປິຕຸສນ຺ຕິເກ;

ໂກຏິສຕສຫສ຺ສານໍ, ຕຕິຍາຠິສມໂຍ ອຫູ’’ຕິ.

ຕຕ຺ຖ ຕຕ຺ເຖວາຕິ ຕສ຺ມິຎ຺ເຎວ ກປ຺ເປຕິ ອຕ຺ໂຖ. ເອຕ຺ຖ ປນ ວຣກປ຺ໂປ ‘‘ມຓ຺ຑກປ຺ໂປ’’ຕິ ອຘິປ຺ເປໂຕ. ‘‘ຍສ຺ມິໍ ກປ຺ເປ ຕໂຍ ພຸທ຺ຘາ ນິພ຺ພຕ຺ຕນ຺ຕິ, ໂສ ກປ຺ໂປ ວຣກປ຺ໂປ’’ຕິ ເຫຏ຺ຐາ ປທຸມຸຕ຺ຕຣພຸທ຺ຘວໍສວຓ຺ຓນາຍໍ ວຸຕ຺ໂຕ. ຕສ຺ມາ ວຣກປ຺ໂປ ອິຘ ‘‘ມຓ຺ຑກປ຺ໂປ’’ຕິ ວຸຕ຺ໂຕ. ນິຫນ຺ຕ຺ວານາຕິ ນິຫນິຕ຺ວາ. ອຍເມວ ວາ ປາໂຐ. ສນ຺ໂຕຕິ ສມາໂນ. ອມເຕນາຕິ ມຄ຺ຄຜລາຘິຄມາມຕປາເນນ. ຕປ຺ປຍີຕິ ອຕປ຺ປຍິ, ປີເຓສີຕິ ອຕ຺ໂຖ. ທສສຫສ຺ສີຕິ ທສສຫສ຺ສິໂລກຘາຕຸໍ. ເທວຈາຣິກນ຺ຕິ ເທວານໍ ວິນຍນຕ຺ຖໍ ເທວໂລກຈາຣິກນ຺ຕິ ອຕ຺ໂຖ.

ສຸຈນ຺ທກນຄເຣ ກິຣ ສນ຺ໂຕ ຈ ຣາຊປຸຕ຺ໂຕ ອຸປສນ຺ໂຕ ຈ ປຸໂຣຫິຕປຸຕ຺ໂຕ ຕີສຸ ເວເທສຸ ສພ຺ພສມຍນ຺ຕເຣສຸ ຈ ສາຣມທິສ຺ວາ ນຄຣສ຺ສ ຈຕູສຸ ທ຺ວາເຣສຸ ຈຕ຺ຕາໂຣ ປຓ຺ຑິເຕ ວິສາຣເທ ຈ ມນຸສ຺ເສ ຐເປສຸໍ – ‘‘ຍໍ ປນ ຕຸມ຺ເຫ ປຓ຺ຑິຕໍ ສມຓໍ ວາ ພ຺ຣາຫ຺ມຓໍ ວາ ປສ຺ສຖ ສຸຓາຖ ວາ, ຕໍ ອມ຺ຫາກໍ ອາຄນ຺ຕ຺ວາ ອາໂຣເຈຖາ’’ຕິ. ເຕນ ຈ ສມເຍນ ອຕ຺ຖທສ຺ສີ ໂລກນາໂຖ ສຸຈນ຺ທກນຄຣໍ ສມ຺ປາປຸຓິ. ອຖ ເຕຫິ ນິເວທິຕາ ປຸຣິສາ ຄນ຺ຕ຺ວາ ເຕສໍ ທສພລສ຺ສ ຕຕ຺ຖາຄມນໍ ປຏິເວເທສຸໍ. ຕໂຕ ເຕ ສນ຺ໂຕປສນ຺ຕາ ຕຖາຄຕາຄມນໍ ສຸຕ຺ວາ ປຫຏ຺ຐມານສາ ສຫສ຺ສປຣິວາຣາ ທສພລໍ ອສມໍ ປຈ຺ຈຸຄ຺ຄນ຺ຕ຺ວາ ອຠິວາເທຕ຺ວາ ນິມນ຺ເຕຕ຺ວາ ສຕ຺ຕາຫໍ ພຸທ຺ຘປ຺ປມຸຂສ຺ສ ສງ຺ຆສ຺ສ ອສທິສໍ ມຫາທານໍ ທຕ຺ວາ ສຕ຺ຕເມ ທິວເສ ສກລນຄຣວາສີຫິ ມນຸສ຺ເສຫິ ສທ຺ຘິໍ ຘມ຺ມກຖໍ ສຸຓິໍສຸ. ຕສ຺ມິໍ ກິຣ ທິວເສ ອຏ຺ຐນວຸຕິສຫສ຺ສານິ ເອຫິຠິກ຺ຂຸປພ຺ພຊ຺ຊາຍ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ. ຕາຍ ປຣິສາຍ ມຊ຺ເຌ ຠຄວາ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ.

ຍທາ ປນ ຠຄວາ ອຕ຺ຕໂນ ປຸຕ຺ຕສ຺ສ ເສລຕ຺ເຖຣສ຺ສ ຘມ຺ມໍ ເທເສນ຺ໂຕ ອຏ຺ຐາສີຕິສຫສ຺ສານິ ປສາເທຕ຺ວາ ເອຫິຠິກ຺ຂຸຠາເວນ ປພ຺ພາເຊຕ຺ວາ ອຣຫຕ຺ຕໍ ປາເປຕ຺ວາ ປາຕິໂມກ຺ຂໍ ອຸທ຺ທິສິ, ໂສ ທຸຕິໂຍ ສນ຺ນິປາໂຕ ອໂຫສິ. ປຸນ ມຫາມງ຺ຄລສມາຄເມ ມາຆປຸຓ຺ຓມາຍໍ ເທວມນຸສ຺ສານໍ ຘມ຺ມໍ ເທເສນ຺ໂຕ ອຏ຺ຐສຕ຺ຕຕິສຫສ຺ສານິ ອຣຫຕ຺ຕໍ ປາເປຕ຺ວາ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໖. ‘‘ສນ຺ນິປາຕາ ຕໂຍ ອາສຸໍ, ຕສ຺ສາປິ ຈ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ‘‘ອຏ຺ຐນວຸຕິສຫສ຺ສານໍ, ປຐໂມ ອາສິ ສມາຄໂມ;

ອຏ຺ຐາສີຕິສຫສ຺ສານໍ, ທຸຕິໂຍ ອາສິ ສມາຄໂມ.

໘. ‘‘ອຏ຺ຐສຕ຺ຕຕິສຫສ຺ສານໍ, ຕຕິໂຍ ອາສິ ສມາຄໂມ;

ອນຸປາທາ ວິມຸຕ຺ຕານໍ, ວິມລານໍ ມເຫສິນ’’ນ຺ຕິ.

ຕທາ ກິຣ ອມ຺ຫາກໍ ໂພຘິສຕ຺ໂຕ ຈມ຺ປກນຄເຣ ສຸສີໂມ ນາມ ພ຺ຣາຫ຺ມຓມຫາສາໂລ ໂລກສມ຺ມໂຕ ອໂຫສິ. ໂສ ສພ຺ພວິຠວຊາຕໍ ທີນານາຖກປຓທ຺ຘິກາທີນໍ ວິສ຺ສຊ຺ເຊຕ຺ວາ ຫິມວນ຺ຕສມີປໍ ຄນ຺ຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ອຏ຺ຐ ສມາປຕ຺ຕິໂຍ ປຎ຺ຈ ອຠິຎ຺ຎາໂຍ ຈ ນິພ຺ພຕ຺ເຕຕ຺ວາ ມຫິທ຺ຘິໂກ ມຫານຸຠາໂວ ຫຸຕ຺ວາ ມຫາຊນສ຺ສ ກຸສລາກຸສລານໍ ຘມ຺ມານໍ ອນວຊ຺ຊສາວຊ຺ຊຠາວຎ຺ຈ ທສ຺ເສຕ຺ວາ ພຸທ຺ຘຸປ຺ປາທໍ ອາຄມຍມາໂນ ອຏ຺ຐາສິ.

ອຖາປເຣນ ສມເຍນ ອຕ຺ຖທສ຺ສິມ຺ຫິ ໂລກນາຍເກ ໂລເກ ອຸປ຺ປຊ຺ຊິຕ຺ວາ ສຸທສ຺ສນມຫານຄເຣ ອຏ຺ຐນ຺ນໍ ປຣິສານໍ ມຊ຺ເຌ ຘມ຺ມາມຕວສ຺ສໍ ວສ຺ເສນ຺ເຕ ຕສ຺ສ ຘມ຺ມໍ ສຸຕ຺ວາ ສຄ຺ຄໂລກໍ ຄນ຺ຕ຺ວາ ທິພ຺ພານິ ມນ຺ທາຣວປທຸມປາຣິຈ຺ຉຕ຺ຕກາທີນິ ປຸປ຺ຜານິ ເທວໂລກໂຕ ອາຫຣິຕ຺ວາ ອຕ຺ຕໂນ ອານຸຠາວໍ ທສ຺ເສນ຺ໂຕ ທິສ຺ສມານສຣີໂຣ ຈຕູສຸ ທິສາສຸ ຈຕຸທ຺ທີປິກມຫາເມໂຆ ວິຍ ປຸປ຺ຜວສ຺ສໍ ວສ຺ເສຕ຺ວາ ສມນ຺ຕໂຕ ປຸປ຺ຜມຓ຺ຑປໍ ປຸປ຺ຜມຍຄ຺ຆິໂຕຣຓເຫມຊາລາທີນິ ປຸປ຺ຜມຍານິ ກຕ຺ວາ ມນ຺ທາຣວປຸປ຺ຜຈ຺ຉຕ຺ເຕນ ທສພລໍ ປູເຊສິ. ໂສປິ ນໍ ຠຄວາ – ‘‘ອນາຄເຕ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໙. ‘‘ອຫໍ ເຕນ ສມເຍນ, ຊຏິໂລ ອຸຄ຺ຄຕາປໂນ;

ສຸສີໂມ ນາມ ນາເມນ, ມຫິຍາ ເສຏ຺ຐສມ຺ມໂຕ.

໑໐. ‘‘ທິພ຺ພໍ ມນ຺ທາຣວໍ ປຸປ຺ຜໍ, ປທຸມໍ ປາຣິຈ຺ຉຕ຺ຕກໍ;

ເທວໂລກາ ຫຣິຕ຺ວານ, ສມ຺ພຸທ຺ຘມຠິປູຊຍິໍ.

໑໑. ‘‘ໂສປິ ມໍ ພຸທ຺ໂຘ ພ຺ຍາກາສິ, ອຕ຺ຖທສ຺ສີ ມຫາມຸນິ;

ອຏ຺ຐາຣເສ ກປ຺ປສເຕ, ອຍໍ ພຸທ຺ໂຘ ຠວິສ຺ສຕິ.

໑໒. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ.

໑໓. ‘‘ຕສ຺ສາປິ ວຈນໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ຊຏິໂລຕິ ຊຏາ ອສ຺ສ ອຕ຺ຖີຕິ ຊຏິໂລ. ມຫິຍາ ເສຏ຺ຐສມ຺ມໂຕຕິ ສກເລນປິ ໂລເກນ ເສຏ຺ໂຐ ອຸຕ຺ຕໂມ ປວໂຣຕິ ເອວໍ ສມ຺ມໂຕ ສມ຺ຠາວິໂຕຕິ ອຕ຺ໂຖ.

ຕສ຺ສ ປນ ຠຄວໂຕ ໂສຠນໍ ນາມ ນຄຣໍ ອໂຫສິ. ສາຄໂຣ ນາມ ຣາຊາ ປິຕາ, ສຸທສ຺ສນາ ນາມ ມາຕາ, ສນ຺ໂຕ ອຸປສນ຺ໂຕ ຈ ທ຺ເວ ອຄ຺ຄສາວກາ, ອຠໂຍ ນາມຸປຏ຺ຐາໂກ, ຘມ຺ມາ ຈ ສຸຘມ຺ມາ ຈ ທ຺ເວ ອຄ຺ຄສາວິກາ, ຈມ຺ປກຣຸກ຺ໂຂ ໂພຘິ, ສຣີຣໍ ອສີຕິຫຕ຺ຖຸພ຺ເພຘໍ ອໂຫສິ. ສຣີຣປ຺ປຠາ ສມນ຺ຕໂຕ ສພ຺ພກາລໍ ໂຍຊນມຕ຺ຕໍ ຜຣິຕ຺ວາ ອຏ຺ຐາສິ, ອາຍຸ ວສ຺ສສຕສຫສ຺ສໍ, ວິສາຂາ ນາມສ຺ສ ອຄ຺ຄມເຫສີ, ເສໂລ ນາມ ປຸຕ຺ໂຕ, ອສ຺ສຍາເນນ ນິກ຺ຂມິ. ເຕນ ວຸຕ຺ຕໍ –

໑໔. ‘‘ໂສຠນໍ ນາມ ນຄຣໍ, ສາຄໂຣ ນາມ ຂຕ຺ຕິໂຍ;

ສຸທສ຺ສນາ ນາມ ຊນິກາ, ອຕ຺ຖທສ຺ສິສ຺ສ ສຕ຺ຖຸໂນ.

໑໙. ‘‘ສນ຺ໂຕ ຈ ອຸປສນ຺ໂຕ ຈ, ອເຫສຸໍ ອຄ຺ຄສາວກາ;

ອຠໂຍ ນາມຸປຏ຺ຐາໂກ, ອຕ຺ຖທສ຺ສິສ຺ສ ສຕ຺ຖຸໂນ.

໒໐. ‘‘ຘມ຺ມາ ເຈວ ສຸຘມ຺ມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ຈມ຺ປໂກຕິ ປວຸຈ຺ຈຕິ.

໒໒. ‘‘ໂສປິ ພຸທ຺ໂຘ ອສມສໂມ, ອສີຕິຫຕ຺ຖມຸຄ຺ຄໂຕ;

ໂສຠເຕ ສາລຣາຊາວ, ອຸຬຸຣາຊາວ ປູຣິໂຕ.

໒໓. ‘‘ຕສ຺ສ ປາກຕິກາ ຣໍສີ, ອເນກສຕໂກຏິໂຍ;

ອຸທ຺ຘໍ ອໂຘ ທສ ທິສາ, ຜຣນ຺ຕິ ໂຍຊນໍ ສທາ.

໒໔. ‘‘ໂສປິ ພຸທ຺ໂຘ ນຣາສໂຠ, ສພ຺ພສຕ຺ຕຸຕ຺ຕໂມ ມຸນິ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໕. ‘‘ອຕຸລໍ ທສ຺ເສຕ຺ວາ ໂອຠາສໍ, ວິໂຣເຈຕ຺ວາ ສເທວເກ;

ໂສປິ ອນິຈ຺ຈຕໍ ປຕ຺ໂຕ, ຍຖຄ຺ຄຸປາທານສງ຺ຂຍາ’’ຕິ.

ຕຕ຺ຖ ອຸຬຸຣາຊາວ ປູຣິໂຕຕິ ສຣທສມຍປຣິປຸຓ຺ຓວິມລສກລມຓ຺ຑໂລ ຕາຣກຣາຊາ ວິຍາຕິ ອຕ຺ໂຖ. ປາກຕິກາຕິ ປກຕິວເສນ ອຸປ຺ປຊ຺ຊມານາ, ນ ອຘິຏ຺ຐານວເສນ. ຍທາ ອິຈ຺ຉຕິ ຠຄວາ, ຕທາ ອເນກໂກຏິສຕສຫສ຺ເສປິ ຈກ຺ກວາເຬ ອາຠາຍ ຜເຣຍ຺ຍ. ຣໍສີຕິ ຣສ຺ມິໂຍ. ອຸປາທານສງ຺ຂຍາຕິ ອຸປາທານກ຺ຂຍາ ອິນ຺ຘນກ຺ຂຍາ ອຄ຺ຄິ ວິຍ. ໂສປິ ຠຄວາ ຈຕຸນ຺ນໍ ອຸປາທານານໍ ຂເຍນ ອນຸປາທິເສສາຍ ນິພ຺ພານຘາຕຸຍາ ອນຸປມນຄເຣ ອໂນມາຣາເມ ປຣິນິພ຺ພາຍິ. ຘາຕຸໂຍ ປນສ຺ສ ອຘິຏ຺ຐາເນນ ວິກິຣິໍສຸ. ເສສເມຕ຺ຖ ຄາຖາສຸ ອຸຕ຺ຕານເມວາຕິ.

ອຕ຺ຖທສ຺ສີພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ຈຸທ຺ທສໂມ ພຸທ຺ຘວໍໂສ.