໑໕. ປິຍທສ຺ສີພຸທ຺ຘວໍສວຓ຺ຓນາ

ສຸຊາຕສ຺ສ ປນ ອປຣຠາເຄ ອິໂຕ ອຏ຺ຐກປ຺ປສຕາຘິກສຫສ຺ສກປ຺ປມຕ຺ຖເກ ເອກສ຺ມິໍ ກປ຺ເປ ປິຍທສ຺ສີ, ອຕ຺ຖທສ຺ສີ, ຘມ຺ມທສ຺ສີຕິ ຕໂຍ ພຸທ຺ຘາ ນິພ຺ພຕ຺ຕິໍສຸ. ຕຕ຺ຖ ປິຍທສ຺ສີ ນາມ ຠຄວາ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ສຸຘຎ຺ຎວຕີນຄເຣ ສຸທຕ຺ຕສ຺ສ ນາມ ຣຎ຺ໂຎ ອຄ຺ຄມເຫສິຍາ ຈນ຺ທສທິສວທນາຍ ຈນ຺ທາເທວິຍາ ນາມ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ວຣຸຓຸຍ຺ຍາເນ ມາຕຸກຸຈ຺ຉິໂຕ ນິກ຺ຂມິ. ຕສ຺ສ ປນ ນາມຄ຺ຄຫຓທິວເສ ໂລກສ຺ສ ປິຍານໍ ປາຏິຫາຣິຍວິເສສານໍ ທສ຺ສິຕຕ຺ຕາ ‘‘ປິຍທສ຺ສີ’’ຕ຺ເວວ ນາມມກໍສຸ. ໂສ ນວວສ຺ສສຫສ຺ສານິ ອຄາຣໍ ອຊ຺ຌາວສິ. ຕສ຺ສ ກິຣ ສຸນິມ຺ມລວິມລຄິຣິພ຺ຣຫານາມກາ ຕໂຍ ປາສາທາ ອເຫສຸໍ. ວິມລາມຫາເທວິປ຺ປມຸຂານິ ເຕຕ຺ຕິໍສ ອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ວິມລາເທວິຍາ ກຎ຺ຈນເວເຬ ນາມ ປຸຕ຺ເຕ ອຸປ຺ປນ຺ເນ ອາຊຎ຺ຎຣເຖນ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ເອກາ ຈ ນໍ ປຸຣິສໂກຏິ ອນຸປພ຺ພຊິ. ໂສ ເຕຫິ ປຣິວຸໂຕ ມຫາປຸຣິໂສ ຉ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ວຣຸຓພ຺ຣາຫ຺ມຓຄາເມ ວສຠພ຺ຣາຫ຺ມຓສ຺ສ ຘີຕາຍ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ສາລວເນ ທິວາວິຫາຣໍ ວີຕິນາເມຕ຺ວາ ສຸຊາຕາຊີວເກນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ກກຸຘໂພຘິໍ ອຸປສງ຺ກມິຕ຺ວາ ເຕປຎ຺ຎາສຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ສພ຺ພຎ຺ຎຸຕຎ຺ຎາຓໍ ປຏິວິຊ຺ຌິຕ຺ວາ ‘‘ອເນກຊາຕິສໍສາຣ’’ນ຺ຕິ ອຸທານໍ ອຸທາເນຕ຺ວາ ຕຕ຺ເຖວ ສຕ຺ຕສຕ຺ຕາຫໍ ວີຕິນາເມຕ຺ວາ ອຕ຺ຕນາ ສຫ ປພ຺ພຊິຕານໍ ອຣິຍຘມ຺ມປຏິເວຘສມຕ຺ຖຕໍ ຎຕ຺ວາ ອາກາເສນ ຕຕ຺ຖ ຄນ຺ຕ຺ວາ ອຸສຠວຕີນຄຣສມີເປ ອຸສຠວຕຸຍ຺ຍາເນ ໂອຕຣິຕ຺ວາ ຠິກ຺ຂຸໂກຏິປຣິວຸໂຕ ຘມ຺ມຈກ຺ກໍ ປວຕ຺ເຕສິ. ຕທາ ໂກຏິສຕສຫສ຺ສານໍ ຘມ຺ມາຠິສມໂຍ ອໂຫສິ. ອຍໍ ປຐໂມ ອຠິສມໂຍ.

ປຸນ ອຸສຠວຕິຍາ ນາມ ນຄຣສ຺ສ ອວິທູເຣ ສຸທສ຺ສນປພ຺ພເຕ ສຸທສ຺ສໂນ ນາມ ເທວຣາຊາ ປຏິວສຕິ. ໂສ ມິຈ຺ຉາທິຏ຺ຐິໂກ ອໂຫສິ. ສກລຊມ຺ພຸທີເປ ປນ ມນຸສ຺ສາ ຕສ຺ສ ອນຸສໍວຈ຺ຉຣໍ ສຕສຫສ຺ສຄ຺ຆນິກໍ ພລິໍ ອຸປສໍຫຣນ຺ຕິ. ໂສ ສຸທສ຺ສໂນ ເທວຣາຊາ ນຣຣາເຊນ ສທ຺ຘິໍ ເອກາສເນ ນິສີທິຕ຺ວາ ພລິໍ ສມ຺ປຏິຈ຺ຉຕິ. ອຖ ປິຍທສ຺ສີ ຠຄວາ ‘‘ຕສ຺ສ ສຸທສ຺ສນສ຺ສ ເທວຣາຊສ຺ສ ຕໍ ທິຏ຺ຐິຄຕໍ ວິໂນເທສ຺ສາມີ’’ຕິ ຕສ຺ມິໍ ເທວຣາເຊ ຍກ຺ຂສມາຄມໍ ຄເຕ ຕສ຺ສ ຠວນໍ ປວິສິຕ຺ວາ ສິຣິສຍນໍ ອາຣຸຫິຕ຺ວາ ຉພ຺ພຓ຺ຓຣໍສິໂຍ ມຸຎ຺ຈນ຺ໂຕ ຍຸຄນ຺ຘຣປພ຺ພເຕ ສຣທສມເຍ ສູຣິໂຍ ວິຍ ນິສີທິ. ຕສ຺ສ ປຣິວາຣປຣິຈາຣິກາ ເທວຕາໂຍ ມາລາຄນ຺ຘວິເລປນາທີຫິ ທສພລໍ ປູເຊຕ຺ວາ ປຣິວາເຣຕ຺ວາ ອຏ຺ຐໍສຸ.

ສຸທສ຺ສໂນປິ ເທວຣາຊາ ຍກ຺ຂສມາຄມໂຕ ອາຄຈ຺ຉນ຺ໂຕ ອຕ຺ຕໂນ ຠວນໂຕ ຉພ຺ພຓ຺ຓຣສ຺ມິໂຍ ນິຈ຺ຉຣນ຺ເຕ ທິສ຺ວາ ຈິນ຺ເຕສິ – ‘‘ອຎ຺ເຎສຸ ປນ ທິວເສສຸ ມມ ຠວນສ຺ສ ເອທິສີ ອເນກຣໍສິຊາລສມຸຊ຺ຊລວິຠູຕິ ນ ທິຏ຺ຐປຸພ຺ພາ. ໂກ ນຸ ໂຂ ອິຘ ປວິຏ຺ໂຐ ເທໂວ ວາ ມນຸສ຺ໂສ ວາ’’ຕິ ໂອໂລເກນ຺ໂຕ ອຸທຍຄິຣິສິຂຣມຕ຺ຖເກ ສຣທສມຍທິວສກຣມິວ ຉພ຺ພຓ຺ຓຣໍສິຊາເລນ ອຠິຊ຺ຊລນ຺ຕໍ ນິສິນ຺ນໍ ຠຄວນ຺ຕໍ ທິສ຺ວາ ຈິນ຺ເຕສິ – ‘‘ອຍໍ ມຸຓ຺ຑກສມໂຓ ມມ ປຣິວາເຣນ ປຣິຊເນນ ປຣິວຸໂຕ ວຣສຍເນ ນິສິນ຺ໂນ’’ຕິ ໂກຘາຠິຠູຕມານໂສ – ‘‘ຫນ຺ທາຫໍ ອິມສ຺ສ ອຕ຺ຕໂນ ພລໍ ທສ຺ເສສ຺ສາມີ’’ຕິ ຈິນ຺ເຕຕ຺ວາ ສກລໍ ຕໍ ປພ຺ພຕໍ ເອກຊາລມກາສິ. ‘‘ອິມິນາ ອຄ຺ຄິຊາເລນ ຉາຣິກາຠູໂຕ ມຸຓ຺ຑກສມໂຓ’’ຕິ ໂອໂລເກນ຺ໂຕ ອເນກຣໍສິຊາລວິສຣວິປ຺ຜຸຣິຕວຣສຣີຣໍ ປສນ຺ນວທນວຓ຺ຓໂສຠໍ ວິປ຺ປສນ຺ນຈ຺ຉວິຣາຄໍ ທສພລມຠິຊ຺ຊລນ຺ຕໍ ທິສ຺ວາ ຈິນ຺ເຕສິ – ‘‘ອຍໍ ສມໂຓ ອຄ຺ຄິທາຫໍ ສຫຕິ, ຫນ຺ທາຫໍ ອິມໍ ສມຓໍ ອຸທໂກເຆນ ໂອສາເທຕ຺ວາ ມາເຣສ຺ສາມີ’’ຕິ ອຕິຄມ຺ຠີຣໍ ອຸທໂກຆໍ ວິມານາຠິມຸຂໍ ປວຕ຺ເຕສິ.

ຕໂຕ ອຸທໂກເຆນ ປຸຓ຺ເຓ ຕສ຺ມິໍ ວິມາເນ ນິສິນ຺ນສ຺ສ ຕສ຺ສ ຠຄວໂຕ ຈີວເຣ ອໍສຸມຕ຺ຕໍ ວາ ສຣີເຣ ໂລມມຕ຺ຕໍ ວາ ນ ເຕມິຕ຺ຖ. ຕໂຕ ສຸທສ຺ສໂນ ເທວຣາຊາ – ‘‘ອິມິນາ ສມໂຓ ນິຣສ຺ສາໂສ ມໂຕ ຠວິສ຺ສຕີ’’ຕິ ມນ຺ຕ຺ວາ ອຸທກໍ ສງ຺ຂິປິຕ຺ວາ ໂອໂລເກນ຺ໂຕ ຠຄວນ຺ຕໍ ອສິຕຊລຘຣວິວຣຄຕໍ ສຣທສມຍຣຊນິກຣມິວ ວິວິຘຣໍສິຊາລວິສເຣນ ວິໂຣຈມານໍ ສກປຣິສປຣິວຸຕໍ ນິສິນ຺ນໍ ທິສ຺ວາ ອຕ຺ຕໂນ ມກ຺ຂໍ ອສຫມາໂນ – ‘‘ຫນ຺ທ ມາເຣສ຺ສາມິ ນ’’ນ຺ຕິ ໂກເຘນ ນວວິຘອາວຸຘວສ຺ສໍ ວສ຺ເສສິ. ອຖສ຺ສ ຠຄວໂຕ ອານຸຠາເວນ ສພ຺ພາວຸຘານິ ນານາວິຘປຣມຣຸຈິຣທສ຺ສນາ ສຸຣຠິກຸສຸມມາລາ ຫຸຕ຺ວາ ທສພລສ຺ສ ປາທມູເລ ນິປຕິໍສຸ.

ຕໂຕ ຕໍ ອຈ຺ຉຣິຍໍ ທິສ຺ວາ ສຸທສ຺ສໂນ ເທວຣາຊາ ປຣມກຸປິຕມານໂສ ຠຄວນ຺ຕໍ ອຸໂຠຫິ ຫຕ຺ເຖຫິ ປາເທສຸ ຄເຫຕ຺ວາ ອຕ຺ຕໂນ ຠວນໂຕ ນີຫຣິຕຸກາໂມ ອຸກ຺ຂິປິຕ຺ວາ ມຫາສມຸທ຺ທໍ ອຕິກ຺ກມິຕ຺ວາ ຈກ຺ກວາຬປພ຺ພຕໍ ຄນ຺ຕ຺ວາ – ‘‘ກິໍ ນຸ ໂຂ ສມໂຓ ຊີວຕິ ວາ ມໂຕ ວາ’’ຕິ ໂອໂລເກນ຺ໂຕ ຕສ຺ມິໍເຍວ ອາສເນ ນິສິນ຺ນໍ ທິສ຺ວາ – ‘‘ອໂຫ ມຫານຸຠາໂວ ອຍໍ ສມໂຓ, ນາຫໍ ອິມໍ ສມຓໍ ອິໂຕ ນິກ຺ກຑ຺ຒິຕຸໍ ສກ຺ໂກມິ. ຍທິ ຫິ ມໍ ໂກຈິ ຊານິສ຺ສຕິ, ອນປ຺ປໂກ ເມ ອຍໂສ ຠວິສ຺ສຕິ. ຍາວິມໍ ໂກຈິ ນ ປສ຺ສຕິ, ຕາວ ນໍ ວິສ຺ສຊ຺ເຊຕ຺ວາ ຄມິສ຺ສາມີ’’ຕິ ຈິນ຺ເຕສິ.

ອຖ ທສພໂລ ຕສ຺ສ ຈິຕ຺ຕາຈາຣໍ ຎຕ຺ວາ ຕຖາ ອຘິຏ຺ຐາສິ, ຍຖາ ນໍ ສພ຺ເພ ເທວມນຸສ຺ສາ ປສ຺ສນ຺ຕິ. ຕສ຺ມິຎ຺ຈ ທິວເສ ສກລຊມ຺ພຸທີເປ ເອກສຕຣາຊາໂນ ຕສ຺ເສວ ອຸປຫາຣທານຕ຺ຖາຍ ສນ຺ນິປຕິໍສຸ. ເຕ ຠຄວໂຕ ປາເທ ຄເຫຕ຺ວາ ນິສິນ຺ນໍ ສຸທສ຺ສນໍ ເທວຣາຊານໍ ນຣຣາຊາໂນ ທິສ຺ວາ – ‘‘ອມ຺ຫາກໍ ເທວຣາຊາ ມຸນິຣາຊສ຺ສ ປິຍທສ຺ສິສ຺ສ ສຕ຺ຖຸໂນ ປາທປຣິຈຣິຍໍ ກໂຣຕິ, ອໂຫ ພຸທ຺ຘາ ນາມ ອຈ຺ຉຣິຍາ, ອໂຫ ພຸທ຺ຘຄຸຓາ ວິສິຏ຺ຐາ’’ຕິ ຠຄວຕິ, ປສນ຺ນຈິຕ຺ຕາ ສພ຺ເພ ຠຄວນ຺ຕໍ ນມສ຺ສມານາ ສິຣສ຺ມິໍ ອຎ຺ຊລິໍ ກຕ຺ວາ ອຏ຺ຐໍສຸ. ຕຕ຺ຖ ປິຍທສ຺ສີ ຠຄວາ ຕໍ ສຸທສ຺ສນໍ ເທວຣາຊານໍ ປມຸຂໍ ກຕ຺ວາ ຘມ຺ມໍ ເທເສສິ. ຕທາ ເທວມນຸສ຺ສານໍ ນວຸຕິໂກຏິສຫສ຺ສານິ ອຣຫຕ຺ຕໍ ປາປຸຓິໍສຸ. ໂສ ທຸຕິໂຍ ອຠິສມໂຍ ອໂຫສິ.

ຍທາ ປນ ນວໂຍຊນປ຺ປມາເຓ ກຸມຸທນຄເຣ ພຸທ຺ຘປຈ຺ຈຕ຺ຖິໂກ ເທວທຕ຺ໂຕ ວິຍ ໂສຓຕ຺ເຖໂຣ ນາມ ມຫາປທຸມກຸມາເຣນ ສທ຺ຘິໍ ມນ຺ເຕຕ຺ວາ ຕສ຺ສ ປິຕຣໍ ຆາເຕຕ຺ວາ ປຸນ ປິຍທສ຺ສີພຸທ຺ຘສ຺ສ ວຘາຍ ນານປ຺ປກາຣໍ ປໂຍຄໍ ກຕ຺ວາປິ ຆາເຕຕຸໍ ອສກ຺ໂກນ຺ໂຕ ໂສ ໂທຓມຸຂນາຄຣາຊາໂຣຫໍ ປກ຺ໂກສາເປຕ຺ວາ ຕໍ ປໂລເຠຕ຺ວາ ຕມຕ຺ຖໍ ອາໂຣເຈສິ – ‘‘ຍທາ ປນາຍໍ ສມໂຓ ປິຍທສ຺ສີ ອິມໍ ນຄຣໍ ປິຓ຺ຑາຍ ປວິສຕິ, ຕທາ ໂທຓມຸຂໍ ນາມ ຄຊວຣໍ ວິສ຺ສຊ຺ເຊຕ຺ວາ ປິຍທສ຺ສີສມຓໍ ມາເຣຫີ’’ຕິ.

ອຖ ໂສ ອາໂຣໂຫ ຫິຕາຫິຕວິຈາຣຓຣຫິໂຕ ຣາຊວລ຺ລໂຠ – ‘‘ອຍໍ ສມໂຓ ຐານນ຺ຕຣາປິ ມໍ ຈາເວຍ຺ຍາ’’ຕິ ມນ຺ຕ຺ວາ ‘‘ສາຘູ’’ຕິ ສມ຺ປຏິຈ຺ຉິຕ຺ວາ ທຸຕິຍທິວເສ ທສພລສ຺ສ ນຄຣປ຺ປເວສນສມຍໍ ສລ຺ລກ຺ເຂຕ຺ວາ ສຸຊາຕມຕ຺ຖກປິຓ຺ຑກຸມ຺ຠນລາຏໍ ຘນຸສທິສທີຆສຸຓ຺ຑຕຏໍ ສຸວິປຸລມຸທຸກຓ຺ຓໍ ມຘຸປິງ຺ຄລນຍນໍ ສຸນ຺ທຣກ຺ຂນ຺ຘາສນໍ ອນຸວຏ຺ຏຆນຊຆນໍ ນິຈິຕຄູຬ຺ຫຊາຓຸອນ຺ຕຣໍ ອີສາສທິສຣຸຈິຣທນ຺ຕໍ ສຸວາລຘິໍ ອປຈິຕເມຈກໍ ສພ຺ພລກ຺ຂຓສມ຺ປນ຺ນໍ ອສິຕຊລຘຣສທິສຈາຣຸທສ຺ສນໍ ສີຫວິກ຺ກນ຺ຕລລິຕຄາມິນໍ ຊງ຺ຄມມິວ ຘຣາຘຣໍ ສຕ຺ຕປ຺ປຕິຏ຺ຐໍ ສຕ຺ຕຘາ ປຠິນ຺ນໍ ສພ຺ພໂສ ວິສ຺ສວນ຺ຕໍ ວິຄ຺ຄຫວນ຺ຕມິວ ອນ຺ຕກໍ ອຸປສງ຺ກມິຕ຺ວາ ປິຓ຺ຑກພຬຎ຺ຊນຘູປເລປາທິວິເສເສຫິ ຠິຍ຺ໂຍປິ ມຕ຺ຕປ຺ປມຕ຺ຕໍ ກຕ຺ວາ ອຣິວາຣຓວາຣຓໍ ເອຣາວຓວາຣຓມິວ ອຣິຊນວາຣຓໍ ມຸນິວາຣຓໍ ມາຣຓຕ຺ຖາຍ ເປເສສິ. ອຖ ໂສ ທ຺ວິຣທວໂຣ ມຸຕ຺ຕມຕ຺ໂຕວ ຄຊມຫິໍສຕຸຣງ຺ຄນຣນາຣິໂຍ ຫນ຺ຕ຺ວາ ຫຕຣຸຘິຣປຣິຣຎ຺ຊິຕສທນ຺ຕກຣສຣີໂຣ ອນ຺ຕຊາລປຣິໂຍນທ຺ຘນຍໂນ ສກຏກວາຏກູຏາຄາຣທ຺ວາຣໂຕຣຓາທີນິ ຠຎ຺ຊິຕ຺ວາ ກາກ-ກຸລລ-ຄິຊ຺ຌາທີຫິ ອນຸປຣິຍາຍມາໂນ ຫຕມຫິໍສນຣຕຸຣງ຺ຄທິຣທາທີນໍ ອງ຺ຄານິ ອາລຸມ຺ປິຕ຺ວາ ມນຸສ຺ສຠກ຺ໂຂ ຍກ຺ໂຂ ວິຍ ຠກ຺ຂຍນ຺ໂຕ ທູຣໂຕວ ທສພລໍ ສິສ຺ສຄຓປຣິວຸຕໍ ອາຄຈ຺ຉນ຺ຕໍ ທິສ຺ວາ ອນິລຄຣຸຬສທິສເວໂຄ ເວເຄນ ຠຄວນ຺ຕມຠິຄຎ຺ຉິ.

ອຖ ປຸຣວາສິໂນ ປນ ຊນາ ຠຍສນ຺ຕາປປຣິປູຣິຕມານສາ ປາສາທປາກາຣຈຍຕຣູປຄຕາ ຕຖາຄຕາຠິມຸຂມຠິຘາວນ຺ຕໍ ທິສ຺ວາ ຫາຫາກາຣສທ຺ທມກໍສຸ. ເກຈິ ປນ ອຸປາສກາ ຕໍ ນານປ຺ປກາເຣຫິ ນເຍຫິ ນິວາຣຍິຕຸມາຣຠິໍສຸ. ອຖ ໂສ ພຸທ຺ຘນາໂຄ ຫຕ຺ຖິນາຄມາຍນ຺ຕໂມໂລເກຕ຺ວາ ກຣຸຓາວິປ຺ຜາຣສີຕລຫທໂຍ ເມຕ຺ຕາຍ ຕໍ ຜຣິ. ຕໂຕ ໂສ ຫຕ຺ຖິນາໂຄ ເມຕ຺ຕາຜຣເຓນ ມຸທຸກຕຫທຍສນ຺ຕາໂນ ອຕ຺ຕໂນ ໂທສາປຣາຘໍ ຎຕ຺ວາ ລຊ຺ຊາຍ ຠຄວໂຕ ປຸຣໂຕ ຐາຕຸໍ ອສກ຺ໂກນ຺ໂຕ ປຖວິຍໍ ປວິສນ຺ໂຕ ວິຍ ສິຣສາ ຠຄວໂຕ ປາເທສຸ ນິປຕິ. ເອວໍ ນິປນ຺ໂນ ປນ ໂສ ຕິມິຣນິກຣສທິສສຣີໂຣ ສຎ຺ຉາປ຺ປຠານຸຣຎ຺ຊິຕວຣກນກຄິຣິສິຂຣສມີປມຸປຄໂຕ ອສິຕສລິລຘຣນິກໂຣ ວິຍ ວິໂຣຈິຕ຺ຖ.

ອເຖວໍ ມຸນິຣາຊປາທມູເລ ກຣິຣາຊານໍ ສິຣສາ ນິປຕນ຺ຕໍ ທິສ຺ວາ ນາຄຣຊນາ ປຣມປີຕິປູຣິຕຫທຍາ ສາຘຸກາຣສີຫນາທໍ ອຸກ຺ກຸຏ຺ຐິສທ຺ທໍ ປວຕ຺ຕຍິໍສຸ. ສຸຣຠິກຸສຸມມາລາຈນ຺ທນຄນ຺ຘຈຸຓ຺ຓາລງ຺ກາຣາທີຫິ ຕໍ ອເນກປ຺ປກາຣໍ ປູເຊສຸໍ. ສມນ຺ຕໂຕ ເຈລຸກ຺ເຂປາ ປວຕ຺ຕິໍສຸ. ຄຄນຕເລ ສຸຣທຸນ຺ທຸຠິໂຍ ອຠິນທິໍສຸ. ອຖ ຠຄວາ ຕມສິຕຄິຣິສິຂຣມິວ ປາທມູເລ ນິປນ຺ນໍ ທິຣທວຣໍ ໂອໂລເກຕ຺ວາ ອງ຺ກຸສຘຊຊາລສງ຺ຂຈກ຺ກາລງ຺ກເຕນ ກຣຕເລນ ຄຊວຣມຕ຺ຖກໍ ປຣາມສິຕ຺ວາ ຕສ຺ສ ຈິຕ຺ຕາຈາຣານຸກູລາຍ ຘມ຺ມເທສນາຍ ຕໍ ອນຸສາສິ –

‘‘ຄຊວຣ ວທໂຕ ສຸໂຓຫິ ວາຈໍ, ມມ ຫິຕມຕ຺ຖຍຸຕຎ຺ຈ ຕໍ ຠຊາຫິ;

ຕວ ວຘນິຣຕໍ ປທຸຏ຺ຐຠາວໍ, ອປນຍ ສນ຺ຕມຸເປຫິ ຈາຣຸທນ຺ຕິ.

‘‘ໂລເຠນ ໂທເສນ ຈ ໂມຫໂຕ ວາ, ໂຍ ປາຓິໂນ ຫິໍສຕິ ວາຣຓິນ຺ທ;

ໂສ ປາຓຆາຕີ ສຸຈິຣມ຺ປິ ກາລໍ, ທຸກ຺ຂໍ ສຸໂຆຣໍ ນຣເກນຸໂຠຕິ.

‘‘ມາກາສິ ມາຕງ຺ຄ ປຸເນວຣູປໍ, ກມ຺ມໍ ປມາເທນ ມເທນ ວາປິ;

ອວີຈິຍໍ ທຸກ຺ຂມສຍ຺ຫ ກປ຺ປໍ, ປປ຺ໂປຕິ ປາຓໍ ອຕິປາຕຍນ຺ໂຕ.

‘‘ທຸກ຺ຂໍ ສຸໂຆຣໍ ນຣເກນຸໂຠຕ຺ວາ, ມນຸສ຺ສໂລກໍ ຍທິ ຍາຕິ ຠິຍ຺ໂຍ;

ອປ຺ປາຍຸໂກ ໂຫຕິ ວິຣູປຣູໂປ, ວິຫິໍສໂກ ທຸກ຺ຂວິເສສຠາຄີ.

‘‘ຍຖາ ຈ ປາຓາ ປຣມໍ ປິຍາ ເຕ, ມຫາຊເນ ກຸຎ຺ຊຣ ມນ຺ທນາຄ;

ຕຖາ ປຣສ຺ສາປິ ປິຍາຕິ ຎຕ຺ວາ, ປາຓາຕິປາໂຕ ປຣິວຊ຺ຊນີໂຍ.

‘‘ໂທເສ ຈ ຫິໍສານິຣເຕ ວິທິຕ຺ວາ, ປາຓາຕິປາຕາ ວິຣເຕ ຄຸເຓ ຈ;

ປາຓາຕິປາຕໍ ປຣິວຊ຺ຊຍ ຕ຺ວໍ, ສຄ຺ເຄ ສຸຂໍ ອິຈ຺ຉສິ ເຈ ປຣຕ຺ຖ.

‘‘ປາຓາຕິປາຕາ ວິຣໂຕ ສຸທນ຺ໂຕ, ປິໂຍ ມນາໂປ ຠວຕີຘ ໂລເກ;

ກາຍສ຺ສ ເຠທາ ຈ ປຣໍ ປນສ຺ສ, ສຄ຺ຄາຘິວາສໍ ກຖຍນ຺ຕິ ພຸທ຺ຘາ.

‘‘ທຸກ຺ຂາຄມໍ ນິຈ຺ຉຕິ ໂກຈິ ໂລເກ, ສພ຺ໂພປິ ຊາໂຕ ສຸຂເມສເຕວ;

ຕສ຺ມາ ມຫານາຄ ວິຫາຍ ຫິໍສໍ, ຠາເວຫິ ເມຕ຺ຕໍ ກຣຸຓຎ຺ຈ ກາເລ’’ຕິ.

ອເຖວໍ ທສພເລນານຸສາສິຍມາໂນ ທນ຺ຕິວໂຣ ສຎ຺ຎໍ ປຏິລຠິຕ຺ວາ ປຣມວິນີໂຕ ວິນຍາຈາຣສມ຺ປນ຺ໂນ ສິສ຺ໂສ ວິຍ ອໂຫສິ. ເອວໍ ໂສ ປິຍທສ຺ສີ ຠຄວາ ອມ຺ຫາກໍ ສຕ຺ຖາ ວິຍ ຘນປາລໍ ໂທຓມຸຂໍ ກຣິວຣໍ ທມິຕ຺ວາ ຕຕ຺ຖ ມຫາຊນສມາຄເມ ຘມ຺ມໍ ເທເສສິ. ຕທາ ອສີຕິໂກຏິສຫສ຺ສານໍ ຘມ຺ມາຠິສມໂຍ ອໂຫສິ. ອຍໍ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ສຸຊາຕສ຺ສ ອປເຣນ, ສຍມ຺ຠູ ໂລກນາຍໂກ;

ທຸຣາສໂທ ອສມສໂມ, ປິຍທສ຺ສີ ມຫາຍໂສ.

໒. ‘‘ໂສປິ ພຸທ຺ໂຘ ອມິຕຍໂສ, ອາທິຈ຺ໂຈວ ວິໂຣຈຕິ;

ສພ຺ພໍ ຕມໍ ນິຫນ຺ຕ຺ວານ, ຘມ຺ມຈກ຺ກໍ ປວຕ຺ຕຍິ.

໓. ‘‘ຕສ຺ສາປິ ອຕຸລເຕຊສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ‘‘ສຸທສ຺ສໂນ ເທວຣາຊາ, ມິຈ຺ຉາທິຏ຺ຐິມໂຣຈຍິ;

ຕສ຺ສ ທິຏ຺ຐິໍ ວິໂນເທນ຺ໂຕ, ສຕ຺ຖາ ຘມ຺ມມເທສຍິ.

໕. ‘‘ຊນສນ຺ນິປາໂຕ ອຕຸໂລ, ມຫາສນ຺ນິປຕີ ຕທາ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໖. ‘‘ຍທາ ໂທຓມຸຂໍ ຫຕ຺ຖິໍ, ວິເນສິ ນຣສາຣຖິ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫູ’’ຕິ.

ສຸມງ຺ຄລນຄເຣ ປາລິໂຕ ນາມ ຣາຊປຸຕ຺ໂຕ ຈ ປຸໂຣຫິຕປຸຕ຺ໂຕ ສພ຺ພທສ຺ສິກຸມາໂຣ ຈາຕິ ທ຺ເວ ສຫາຍກາ ອເຫສຸໍ. ເຕ ປິຍທສ຺ສິມ຺ຫິ ສມ຺ມາສມ຺ພຸທ຺ເຘ ຈາຣິກໍ ຈຣນ຺ເຕ ‘‘ອຕ຺ຕໂນ ນຄຣໍ ສມ຺ປຕ຺ໂຕ’’ຕິ ສຸຕ຺ວາ ໂກຏິສຕສຫສ຺ສປຣິວາຣາ ປຈ຺ຈຸຄ຺ຄມນໍ ກຕ຺ວາ ຕສ຺ສ ຘມ຺ມໍ ສຸຕ຺ວາ ສຕ຺ຕາຫໍ ມຫາທານໍ ທຕ຺ວາ ສຕ຺ຕເມ ທິວເສ ຠຄວໂຕ ຠຕ຺ຕານຸໂມທນາວສາເນ ໂກຏິສຕສຫສ຺ເສຫິ ສທ຺ຘິໍ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ. ເຕສໍ ປນ ມຊ຺ເຌ ຠຄວາ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ. ອຖາປເຣນ ສມເຍນ ສຸທສ຺ສນເທວຣາຊສ຺ສ ສມາຄເມ ນວຸຕິໂກຏິໂຍ ອຣຫຕ຺ຕໍ ປາປຸຓິໍສຸ. ເຕຫິ ປຣິວຸໂຕ ສຕ຺ຖາ ປາຕິໂມກ຺ຂໍ ອຸທ຺ທິສິ, ອຍໍ ທຸຕິໂຍ ສນ຺ນິປາໂຕ ອໂຫສິ. ປຸນ ໂທຓມຸຂວິນຍເນ ອສີຕິໂກຏິໂຍ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ. ເຕສໍ ມຊ຺ເຌ ຠຄວາ ປາຕິໂມກ຺ຂໍ ອຸທ຺ທິສິ, ອຍໍ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໗. ‘‘ສນ຺ນິປາຕາ ຕໂຍ ອາສຸໍ, ຕສ຺ສາປິ ປິຍທສ຺ສິໂນ;

ໂກຏິສຕສຫສ຺ສານໍ, ປຐໂມ ອາສິ ສມາຄໂມ.

໘. ‘‘ຕໂຕ ປຣໍ ນວຸຕິໂກຏີ, ສມິໍສຸ ເອກໂຕ ມຸນີ;

ຕຕິເຍ ສນ຺ນິປາຕມ຺ຫິ, ອສີຕິໂກຏິໂຍ ອຫູ’’ຕິ.

ຕທາ ອມ຺ຫາກໍ ໂພຘິສຕ຺ໂຕ ກສ຺ສໂປ ນາມ ພ຺ຣາຫ຺ມຓມາຓໂວ ອິຕິຫາສປຎ຺ຈມານໍ ຕິຓ຺ຓໍ ເວທານໍ ປາຣຄູ ຫຸຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ໂກຏິສຕສຫສ຺ສປຣິຈ຺ຈາເຄນ ປຣມາຣາມໍ ສງ຺ຆາຣາມໍ ກາເຣຕ຺ວາ ສຣເຓສຸ ຈ ປຎ຺ຈສີເລສຸ ຈ ປຕິຏ຺ຐາສິ. ອຖ ນໍ ສຕ຺ຖາ – ‘‘ອິໂຕ ອຏ຺ຐາຣສກປ຺ປສຕຈ຺ຈເຍນ ໂຄຕໂມ ນາມ ພຸທ຺ໂຘ ໂລເກ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໙. ‘‘ອຫໍ ເຕນ ສມເຍນ, ກສ຺ສໂປ ນາມ ພ຺ຣາຫ຺ມໂຓ;

ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ.

໑໐. ‘‘ຕສ຺ສ ຘມ຺ມໍ ສຸຓິຕ຺ວານ, ປສາທໍ ຊນຍິໍ ອຫໍ;

ໂກຏິສຕສຫສ຺ເສຫິ, ສງ຺ຆາຣາມໍ ອມາປຍິໍ.

໑໑. ‘‘ຕສ຺ສ ທຕ຺ວານ ອາຣາມໍ, ຫຏ຺ໂຐ ສໍວິຄ຺ຄມານໂສ;

ສຣເຓ ປຎ຺ຈສີເລ ຈ, ທຬຫໍ ກຕ຺ວາ ສມາທິຍິໍ.

໑໒. ‘‘ໂສປິ ມໍ ພຸທ຺ໂຘ ພ຺ຍາກາສິ, ສງ຺ຆມຊ຺ເຌ ນິສີທິຍ;

ອຏ຺ຐາຣເສ ກປ຺ປສເຕ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ.

໑໔. ‘‘ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ’’ຕິ.

ຕຕ຺ຖ ສຣເຓ ປຎ຺ຈສີເລ ຈາຕິ ຕີຓິ ສຣຓານິ ປຎ຺ຈ ສີລານິ ຈາຕິ ອຕ຺ໂຖ. ອຏ຺ຐາຣເສ ກປ຺ປສເຕຕິ ອິໂຕ ອຏ຺ຐສຕາຘິກສ຺ສ ກປ຺ປສຫສ຺ສສ຺ສ ອຈ຺ຈເຍນາຕິ ອຕ຺ໂຖ.

ຕສ຺ສ ປນ ຠຄວໂຕ ສຸຘຎ຺ຎໍ ນາມ ນຄຣໍ ອໂຫສິ. ປິຕາ ສຸທຕ຺ໂຕ ນາມ ຣາຊາ, ມາຕາ ສຸຈນ຺ທາ ນາມ ເທວີ, ປາລິໂຕ ຈ ສພ຺ພທສ຺ສີ ຈ ທ຺ເວ ອຄ຺ຄສາວກາ, ໂສຠິໂຕ ນາມຸປຏ຺ຐາໂກ, ສຸຊາຕາ ຈ ຘມ຺ມທິນ຺ນາ ຈ ທ຺ເວ ອຄ຺ຄສາວິກາ, ກກຸຘຣຸກ຺ໂຂ ໂພຘິ, ສຣີຣໍ ອສີຕິຫຕ຺ຖຸພ຺ເພຘໍ ອໂຫສິ, ນວຸຕິວສ຺ສສຫສ຺ສານິ ອາຍຸ, ວິມລາ ນາມສ຺ສ ອຄ຺ຄມເຫສີ ອໂຫສິ, ກຎ຺ຈນາເວໂຬ ນາມ ປຸຕ຺ໂຕ, ໂສ ອາຊຎ຺ຎຣເຖນ ນິກ຺ຂມີຕິ. ເຕນ ວຸຕ຺ຕໍ –

໑໕. ‘‘ສຸຘຎ຺ຎໍ ນາມ ນຄຣໍ, ສຸທຕ຺ໂຕ ນາມ ຂຕ຺ຕິໂຍ;

ຈນ຺ທາ ນາມາສິ ຊນິກາ, ປິຍທສ຺ສິສ຺ສ ສຕ຺ຖຸໂນ.

໒໐. ‘‘ປາລິໂຕ ສພ຺ພທສ຺ສີ ຈ, ອເຫສຸໍ ອຄ຺ຄສາວກາ;

ໂສຠິໂຕ ນາມຸປຏ຺ຐາໂກ, ປິຍທສ຺ສິສ຺ສ ສຕ຺ຖຸໂນ.

໒໑. ‘‘ສຸຊາຕາ ຘມ຺ມທິນ຺ນາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ກກຸໂຘຕິ ປວຸຈ຺ຈຕິ.

໒໓. ‘‘ໂສປິ ພຸທ຺ໂຘ ອມິຕຍໂສ, ທ຺ວຕ຺ຕິໍສວຣລກ຺ຂໂຓ;

ອສີຕິຫຕ຺ຖມຸພ຺ເພໂຘ, ສາລຣາຊາວ ທິສ຺ສຕິ.

໒໔. ‘‘ອຄ຺ຄິຈນ຺ທສູຣິຍານໍ, ນຕ຺ຖິ ຕາທິສິກາ ປຠາ;

ຍຖາ ອຫຸ ປຠາ ຕສ຺ສ, ອສມສ຺ສ ມເຫສິໂນ.

໒໕. ‘‘ຕສ຺ສາປິ ເທວເທວສ຺ສ, ອາຍຸ ຕາວຕກໍ ອຫຸ;

ນວຸຕິວສ຺ສສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໖. ‘‘ໂສປິ ພຸທ຺ໂຘ ອສມສໂມ, ຍຸຄານິປິ ຕານິ ອຕຸລິຍານິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ’’ຕິ.

ຕຕ຺ຖ ສາລຣາຊາ ວາຕິ ສພ຺ພຜາລິຜຸລ຺ໂລ ປຣມຣມຓີຍທສ຺ສໂນ ສມວຏ຺ຏກ຺ຂນ຺ໂຘ ສາລຣາຊາ ວິຍ ທິສ຺ສຕິ. ຍຸຄານິປິ ຕານີຕິ ອຄ຺ຄສາວກຍຸຄາທີນິ ຍຸຄຬານິ. ເສສຄາຖາສຸ ສພ຺ພຕ຺ຖ ອຸຕ຺ຕານເມວາຕິ.

ປິຍທສ຺ສີພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ເຕຣສໂມ ພຸທ຺ຘວໍໂສ.