໑໔. ສຸຊາຕພຸທ຺ຘວໍສວຓ຺ຓນາ

ຕໂຕ ຕສ຺ສາປຣຠາເຄ ຕສ຺ມິໍເຍວ ມຓ຺ຑກປ຺ເປ ອນຸປຸພ຺ເພນ ອປຣິມິຕາຍຸເກສຸ ສຕ຺ເຕສຸ ອນຸກ຺ກເມນ ປຣິຫາຍິຕ຺ວາ ນວຸຕິວສ຺ສສຫສ຺ສາຍຸເກສຸ ຊາເຕສຸ ສຸຊາຕຣູປກາໂຍ ປຣິສຸທ຺ຘຊາໂຕ ສຸຊາໂຕ ນາມ ສຕ຺ຖາ ໂລເກ ອຸທປາທິ. ໂສປິ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ສຸມງ຺ຄລນຄເຣ ອຸຄ຺ຄຕສ຺ສ ນາມ ຣຎ຺ໂຎ ກຸເລ ປຠາວຕິຍາ ນາມ ອຄ຺ຄມເຫສິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ມາຕຸກຸຈ຺ຉິໂຕ ນິກ຺ຂມິ. ນາມຄ຺ຄຫຓທິວເສ ຈສ຺ສ ນາມໍ ກໂຣນ຺ໂຕ ສກລຊມ຺ພຸທີເປ ສພ຺ພສຕ຺ຕານໍ ສຸຂໍ ຊນຍນ຺ໂຕ ຊາໂຕຕິ ‘‘ສຸຊາໂຕ’’ ຕ຺ເວວສ຺ສ ນາມມກໍສຸ. ໂສ ນວວສ຺ສສຫສ຺ສານິ ອຄາຣໍ ອຊ຺ຌາວສິ. ສິຣີ ອຸປສິຣີ ສິຣິນນ຺ໂທ ຈາຕິ ຕສ຺ສ ຕໂຍ ປາສາທາ ອເຫສຸໍ. ສິຣີນນ຺ທາເທວິປ຺ປມຸຂານິ ເຕວີສຕິ ອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ສິຣີນນ຺ທາເທວິຍາ ອຸປເສເນ ນາມ ປຸຕ຺ເຕ ອຸປ຺ປນ຺ເນ ຫໍສວຫໍ ນາມ ວຣຕຸຣງ຺ຄມາຣຸຍ຺ຫ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ຕໍ ປນ ປພ຺ພຊນ຺ຕໍ ມນຸສ຺ສານໍ ໂກຏິ ອນຸປພ຺ພຊິ. ອຖ ໂສ ເຕຫິ ປຣິວຸໂຕ ນວ ມາເສ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ສິຣີນນ຺ທນນຄເຣ ສິຣີນນ຺ທນເສຏ຺ຐິສ຺ສ ຘີຕາຍ ທິນ຺ນໍ ປຣມມຘຸຣໍ ມຘຸປາຍາສໍ ປຣິຠຸຎ຺ຊິຕ຺ວາ ສາລວເນ ທິວາວິຫາຣໍ ວີຕິນາເມຕ຺ວາ ສາຍນ຺ຫສມເຍ ສຸນນ຺ທາຊີວເກນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ເວຬຸໂພຘິໍ ອຸປສງ຺ກມິຕ຺ວາ ເຕຕ຺ຕິໍສຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ສູຣິເຍ ຘຣມາເນເຍວ ສມາຣໍ ມາຣພລໍ ວິຘມິຕ຺ວາ ສມ຺ມາສມ຺ໂພຘິໍ ປຏິວິຊ຺ຌິຕ຺ວາ ສພ຺ພພຸທ຺ຘານຸຈິຓ຺ຓໍ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ໂພຘິສມີເປເຍວ ວີຕິນາເມຕ຺ວາ ພ຺ຣຫ຺ມຸນາ ອາຍາຈິໂຕ ອຕ຺ຕໂນ ກນິຏ຺ຐຠາຕິກໍ ສຸທສ຺ສນກຸມາຣໍ ປຸໂຣຫິຕປຸຕ຺ຕໍ ເທວກຸມາຣຎ຺ຈ ຈຕຸສຈ຺ຈຘມ຺ມປຏິເວຘສມຕ຺ເຖ ທິສ຺ວາ ອາກາເສນ ຄນ຺ຕ຺ວາ ສຸມງ຺ຄລນຄຣສມີເປ ສຸມງ຺ຄລຸຍ຺ຍາເນ ໂອຕຣິຕ຺ວາ ອຸຍ຺ຍານປາເລນ ອຕ຺ຕໂນ ຠາຕິກໍ ສຸທສ຺ສນກຸມາຣໍ ປຸໂຣຫິຕປຸຕ຺ຕໍ ເທວກຸມາຣຎ຺ຈ ປກ຺ໂກສາເປຕ຺ວາ ເຕສໍ ສປຣິວາຣານໍ ມຊ຺ເຌ ນິສິນ຺ໂນ ຘມ຺ມຈກ຺ກໍ ປວຕ຺ເຕສິ. ຕຕ຺ຖ ອສີຕິຍາ ໂກຏີນໍ ຘມ຺ມາຠິສມໂຍ ອໂຫສິ. ອຍໍ ປຐມາຠິສມໂຍ ອໂຫສິ.

ຍທາ ປນ ຠຄວາ ສຸທສ຺ສນຸຍ຺ຍານທ຺ວາເຣ ມຫາສາລມູເລ ຍມກປາຏິຫາຣິຍໍ ກຕ຺ວາ ເທເວສຸ ຕາວຕິໍເສສຸ ວສ຺ສາວາສໍ ອຸປາຄມິ, ຕທາ ສຕ຺ຕຕ຺ຕິໍສສຕສຫສ຺ສານໍ ຘມ຺ມາຠິສມໂຍ ອໂຫສິ. ອຍໍ ທຸຕິໂຍ ອຠິສມໂຍ ອໂຫສິ. ຍທາ ປນ ສຸຊາໂຕ ທສພໂລ ປິຕຸສນ຺ຕິກໍ ອຄມາສິ, ຕທາ ສຏ຺ຐິສຕສຫສ຺ສານໍ ຘມ຺ມາຠິສມໂຍ ອໂຫສິ. ອຍໍ ຕຕິໂຍ ອຠິສມໂຍ ອໂຫສິ. ເຕນ ວຸຕ຺ຕໍ –

໑. ‘‘ຕຕ຺ເຖວ ມຓ຺ຑກປ຺ປມ຺ຫິ, ສຸຊາໂຕ ນາມ ນາຍໂກ;

ສີຫຫນຸສຠກ຺ຂນ຺ໂຘ, ອປ຺ປເມຍ຺ໂຍ ທຸຣາສໂທ.

໒. ‘‘ຈນ຺ໂທວ ວິມໂລ ພຸທ຺ໂຘ, ສຕຣໍສີວ ປຕາປວາ;

ເອວໍ ໂສຠຕິ ສມ຺ພຸທ຺ໂຘ, ຊລນ຺ໂຕ ສິຣິຍາ ສທາ.

໓. ‘‘ປາປຸຓິຕ຺ວານ ສມ຺ພຸທ຺ໂຘ, ເກວລໍ ໂພຘິມຸຕ຺ຕມໍ;

ສຸມງ຺ຄລມ຺ຫິ ນຄເຣ, ຘມ຺ມຈກ຺ກໍ ປວຕ຺ຕຍິ.

໔. ‘‘ເທເສນ຺ເຕ ປວຣໍ ຘມ຺ມໍ, ສຸຊາເຕ ໂລກນາຍເກ;

ອສີຕິໂກຏີ ອຠິສມິໍສຸ, ປຐເມ ຘມ຺ມເທສເນ.

໕. ‘‘ຍທາ ສຸຊາໂຕ ອມິຕຍໂສ, ເທເວ ວສ຺ສໍ ອຸປາຄມິ;

ສຕ຺ຕຕ຺ຕິໍສສຕສຫສ຺ສານໍ, ທຸຕິຍາຠິສມໂຍ ອຫຸ.

໖. ‘‘ຍທາ ສຸຊາໂຕ ອສມສໂມ, ອຸປຄຈ຺ຉິ ປິຕຸສນ຺ຕິກໍ;

ສຏ຺ຐິສຕສຫສ຺ສານໍ, ຕຕິຍາຠິສມໂຍ ອຫູ’’ຕິ.

ຕຕ຺ຖ ຕຕ຺ເຖວ ມຓ຺ຑກປ຺ປມ຺ຫີຕິ ຍສ຺ມິໍ ມຓ຺ຑກປ຺ເປ ສຸເມໂຘ ຠຄວາ ອຸປ຺ປນ຺ໂນ, ຕຕ຺ເຖວ ກປ຺ເປ ສຸຊາໂຕປິ ຠຄວາ ອຸປ຺ປນ຺ໂນຕິ ອຕ຺ໂຖ. ສີຫຫນູຕິ ສີຫສ຺ສ ວິຍ ຫນຸ ອສ຺ສາຕິ ສີຫຫນຸ. ສີຫສ຺ສ ປນ ເຫຏ຺ຐິມຫນຸເມວ ປຸຓ຺ຓໍ ໂຫຕິ, ນ ອຸປຣິມໍ. ອສ຺ສ ປນ ມຫາປຸຣິສສ຺ສ ສີຫສ຺ສ ເຫຏ຺ຐິມຫນຸ ວິຍ ທ຺ເວປິ ປຣິປຸຓ຺ຓານິ ທ຺ວາທສິຍໍ ປກ຺ຂສ຺ສ ຈນ຺ທສທິສານິ ໂຫນ຺ຕິ. ເຕນ ວຸຕ຺ຕໍ ‘‘ສີຫຫນູ’’ຕິ. ອຸສຠກ຺ຂນ຺ໂຘຕິ ອຸສຠສ຺ເສວ ສມປ຺ປວຏ຺ຏກ຺ຂນ຺ໂຘ, ສຸວຏ຺ຏິຕສຸວຓ຺ຓາລິງ຺ຄສທິສກ຺ຂນ຺ໂຘຕິ ອຕ຺ໂຖ. ສຕຣໍສີວາຕິ ທິວສກໂຣ ວິຍ. ສິຣິຍາຕິ ພຸທ຺ຘສິຣິຍາ. ໂພຘິມຸຕ຺ຕມນ຺ຕິ ອຸຕ຺ຕມໍ ສມ຺ໂພຘິໍ.

ສຸຘມ຺ມວຕີນຄເຣ ສຸຘມ຺ມຸຍ຺ຍາເນ ອາຄຕານໍ ມນຸສ຺ສານໍ ຘມ຺ມໍ ເທເສຕ຺ວາ ສຏ຺ຐິສຕສຫສ຺ສານິ ເອຫິຠິກ຺ຂຸຠາເວນ ປພ຺ພາເຊຕ຺ວາ ເຕສໍ ມຊ຺ເຌ ປາຕິໂມກ຺ຂໍ ອຸທ຺ທິສິ, ໂສ ປຐໂມ ສນ຺ນິປາໂຕ ອໂຫສິ. ຕໂຕ ປຣໍ ຕິທິໂວໂຣຫເຓ ຠຄວໂຕ ປຎ຺ຎາສສຕສຫສ຺ສານໍ ທຸຕິໂຍ ສນ຺ນິປາໂຕ ອໂຫສິ. ປຸນ ‘‘ສຸທສ຺ສນກຸມາໂຣ ຠຄວໂຕ ສນ຺ຕິເກ ປພ຺ພຊິຕ຺ວາ ອຣຫຕ຺ຕໍ ປຕ຺ໂຕ’’ຕິ ສຸຕ຺ວາ ‘‘ມຍມ຺ປິ ປພ຺ພຊິສ຺ສາມາ’’ຕິ ອາຄຕານິ ຈຕ຺ຕາຣິ ປຸຣິສສຕສຫສ຺ສານິ ຄເຫຕ຺ວາ ສຸທສ຺ສນຕ຺ເຖໂຣ ສຸຊາຕໍ ນຣາສຠໍ ອຸປສງ຺ກມິ. ເຕສໍ ຠຄວາ ຘມ຺ມໍ ເທເສຕ຺ວາ ເອຫິຠິກ຺ຂຸປພ຺ພຊ຺ຊາຍ ປພ຺ພາເຊຕ຺ວາ ຈຕຸຣງ຺ຄສມນ຺ນາຄເຕ ສນ຺ນິປາເຕ ປາຕິໂມກ຺ຂໍ ອຸທ຺ທິສິ, ໂສ ຕຕິໂຍ ສນ຺ນິປາໂຕ ອໂຫສິ. ເຕນ ວຸຕ຺ຕໍ –

໗. ‘‘ສນ຺ນິປາຕາ ຕໂຍ ອາສຸໍ, ສຸຊາຕສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ‘‘ອຠິຎ຺ຎາພລປ຺ປຕ຺ຕານໍ, ອປ຺ປຕ຺ຕານໍ ຠວາຠເວ;

ສຏ຺ຐິສຕສຫສ຺ສານິ, ປຐມໍ ສນ຺ນິປຕິໍສຸ ເຕ.

໙. ‘‘ປຸນາປຣໍ ສນ຺ນິປາເຕ, ຕິທິໂວໂຣຫເຓ ຊິເນ;

ປຎ຺ຎາສສຕສຫສ຺ສານໍ, ທຸຕິໂຍ ອາສິ ສມາຄໂມ.

໑໐. ‘‘ອຸປສງ຺ກມນ຺ໂຕ ນຣາສຠໍ, ສຸທສ຺ສໂນ ອຄ຺ຄສາວໂກ;

ຈຕູຫິ ສຕສຫສ຺ເສຫິ, ສມ຺ພຸທ຺ຘໍ ອຸປສງ຺ກມີ’’ຕິ.

ຕຕ຺ຖ ອປ຺ປຕ຺ຕານນ຺ຕິ ຠວາຠເວ ອສມ຺ປຕ຺ຕານນ຺ຕິ ອຕ຺ໂຖ. ‘‘ອປ຺ປວຕ຺ຕາ ຠວາຠເວ’’ຕິປິ ປາໂຐ, ໂສເຍວຕ຺ໂຖ. ຕິທິໂວໂຣຫເຓຕິ ສຄ຺ຄໂລກໂຕ ໂອຕຣນ຺ເຕ ກຕ຺ຕຸກາຣເກ ທຏ຺ຐພ຺ໂພ. ກາຣກວິປລ຺ລາເສນ ວຸຕ຺ຕໍ. ອຖ ວາ ຕິທິໂວໂຣຫເຓຕິ ຕິທິວໂຕ ໂອຕຣເຓ. ຊິເນຕິ ຊິນສ຺ສ, ສາມິອຕ຺ເຖ ຠຸມ຺ມໍ ທຏ຺ຐພ຺ພໍ.

ຕທາ ກິຣ ອມ຺ຫາກໍ ໂພຘິສຕ຺ໂຕ ຈກ຺ກວຕ຺ຕິຣາຊາ ຫຸຕ຺ວາ ‘‘ພຸທ຺ໂຘ ໂລເກ ອຸປ຺ປນ຺ໂນ’’ຕິ ສຸຕ຺ວາ ຠຄວນ຺ຕໍ ອຸປສງ຺ກມິຕ຺ວາ ຘມ຺ມກຖໍ ສຸຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ສຕ຺ຕຫິ ຣຕເນຫິ ສທ຺ຘິໍ ຈຕຸມຫາທີປຣຊ຺ຊໍ ທຕ຺ວາ ສຕ຺ຖຸ ສນ຺ຕິເກ ປພ຺ພຊິ. ສກລທີປວາສິໂນ ຊນາ ຣຏ຺ຐຸປ຺ປາທໍ ຄເຫຕ຺ວາ ອາຣາມິກກິຈ຺ຈໍ ສາເຘຕ຺ວາ ພຸທ຺ຘປ຺ປມຸຂສ຺ສ ສງ຺ຆສ຺ສ ນິຈ຺ຈໍ ມຫາທານມທໍສຸ. ໂສປິ ນໍ ສຕ຺ຖາ – ‘‘ອນາຄເຕ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໑໑. ‘‘ອຫໍ ເຕນ ສມເຍນ, ຈຕຸທີປມ຺ຫິ ອິສ຺ສໂຣ;

ອນ຺ຕລິກ຺ຂຈໂຣ ອາສິໍ, ຈກ຺ກວຕ຺ຕີ ມຫພ຺ພໂລ.

໑໓. ‘‘ຈຕຸທີເປ ມຫາຣຊ຺ຊໍ ຣຕເນ ສຕ຺ຕ ອຸຕ຺ຕເມ;

ພຸທ຺ເຘ ນິຍ຺ຍາຕຍິຕ຺ວານ, ປພ຺ພຊິໍ ຕສ຺ສ ສນ຺ຕິເກ.

໑໔. ‘‘ອາຣາມິກາ ຊນປເທ, ອຸຏ຺ຐານໍ ປຏິປິຓ຺ຑິຍ;

ອຸປເນນ຺ຕິ ຠິກ຺ຂຸສງ຺ຆສ຺ສ, ປຈ຺ຈຍໍ ສຍນາສນໍ.

໑໕. ‘‘ໂສປິ ມໍ ພຸທ຺ໂຘ ພ຺ຍາກາສິ, ທສສຫສ຺ສິມ຺ຫິ ອິສ຺ສໂຣ;

ຕິໍສກປ຺ປສຫສ຺ສມ຺ຫິ, ອຍໍ ພຸທ຺ໂຘ ຠວິສ຺ສຕິ.

໑໖. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ.

໑໗. ‘‘ຕສ຺ສາປິ ຈວນໍ ສຸຕ຺ວາ, ຠິຍ຺ໂຍ ຫາສໍ ຊເນສຫໍ;

ອຘິຏ຺ຐຫິໍ ວຕໍ ອຸຄ຺ຄໍ, ທສປາຣມິປູຣິຍາ.

໑໘. ‘‘ສຸຕ຺ຕນ຺ຕໍ ວິນຍຎ຺ຈາປິ, ນວງ຺ຄໍ ສຕ຺ຖຸສາສນໍ;

ສພ຺ພໍ ປຣິຍາປຸຓິຕ຺ວານ, ໂສຠຍິໍ ຊິນສາສນໍ.

໑໙. ‘‘ຕຕ຺ຖປ຺ປມຕ຺ໂຕ ວິຫຣນ຺ໂຕ, ພ຺ຣຫ຺ມໍ ຠາເວຕ຺ວ ຠາວນໍ;

ອຠິຎ຺ຎາປາຣມິໍ ຄນ຺ຕ຺ວາ, ພ຺ຣຫ຺ມໂລກມຄຎ຺ຉຫ’’ນ຺ຕິ.

ຕຕ຺ຖ ຈຕຸທີປມ຺ຫີຕິ ສປຣິວາຣທີປານໍ ຈຕຸນ຺ນໍ ມຫາທີປານນ຺ຕິ ອຕ຺ໂຖ. ອນ຺ຕລິກ຺ຂຈໂຣຕິ ຈກ຺ກຣຕນໍ ປຸຣກ຺ຂຕ຺ວາ ອາກາສຈໂຣ. ຣຕເນ ສຕ຺ຕາຕິ ຫຕ຺ຖິຣຕນາທີນິ ສຕ຺ຕ ຣຕນານິ. ອຸຕ຺ຕເມຕິ ອຸຕ຺ຕມານິ. ອຖ ວາ ອຸຕ຺ຕເມ ພຸທ຺ເຘຕິ ອຕ຺ໂຖ ທຏ຺ຐພ຺ໂພ. ນິຍ຺ຍາຕຍິຕ຺ວານາຕິ ທຕ຺ວານ. ອຸຏ຺ຐານນ຺ຕິ ຣຏ຺ຐຸປ຺ປາທໍ, ອາຍນ຺ຕິ ອຕ຺ໂຖ. ປຏິປິຓ຺ຑິຍາຕິ ຣາສິໍ ກຕ຺ວາ ສໍກຑ຺ຒິຕ຺ວາ. ປຈ຺ຈຍນ຺ຕິ ຈີວຣາທິວິວິຘໍ ປຈ຺ຈຍໍ. ທສສຫສ຺ສິມ຺ຫິ ອິສ຺ສໂຣຕິ ທສສຫສ຺ສິໂລກຘາຕຸຍໍ ອິສ຺ສໂຣ, ຕເທຕໍ ຊາຕິກ຺ເຂຕ຺ຕໍ ສນ຺ຘາຍ ວຸຕ຺ຕນ຺ຕິ ເວທິຕພ຺ພໍ. ອນນ຺ຕານໍ ໂລກຘາຕູນໍ ອິສ຺ສໂຣ ຠຄວາ. ຕິໍສກປ຺ປສຫສ຺ສມ຺ຫີຕິ ອິໂຕ ປຏ຺ຐາຍ ຕິໍສກປ຺ປສຫສ຺ສານໍ ມຕ຺ຖເກຕິ ອຕ຺ໂຖ.

ຕສ຺ສ ປນ ສຸຊາຕສ຺ສ ຠຄວໂຕ ສຸມງ຺ຄລໍ ນາມ ນຄຣໍ ອໂຫສິ, ອຸຄ຺ຄໂຕ ນາມ ຣາຊາ ປິຕາ, ປຠາວຕີ ນາມ ມາຕາ, ສຸທສ຺ສໂນ ຈ ສຸເທໂວ ຈ ທ຺ເວ ອຄ຺ຄສາວກາ, ນາຣໂທ ນາມຸປຏ຺ຐາໂກ, ນາຄາ ຈ ນາຄສມາລາ ຈ ທ຺ເວ ອຄ຺ຄສາວິກາ, ມຫາເວຬຸຣຸກ຺ໂຂ ໂພຘິ, ໂສ ກິຣ ມນ຺ທຈ຺ຉິທ຺ໂທ ຆນກ຺ຂນ຺ໂຘ ປຣມຣມຓີໂຍ ເວຬຸຣິຍມຓິວຓ຺ເຓຫິ ວິມເລຫິ ປຕ຺ເຕຫິ ສຎ຺ຉນ຺ນວິປຸລສາໂຂ ມຍູຣປິຎ຺ຉກລາໂປ ວິຍ ວິໂຣຈິຕ຺ຖ. ຕສ຺ສ ປນ ຠຄວໂຕ ສຣີຣໍ ປຓ຺ຓາສຫຕ຺ຖຸພ຺ເພຘໍ ອໂຫສິ, ອາຍຸ ນວຸຕິວສ຺ສສຫສ຺ສານິ, ສິຣີນນ຺ທາ ນາມສ຺ສ ອຄ຺ຄມເຫສີ, ອຸປເສໂນ ນາມ ປຸຕ຺ໂຕ. ຕຸຣງ຺ຄວຣຍາເນນ ນິກ຺ຂມິ. ໂສ ປນ ຈນ຺ທວຕີນຄເຣ ສິລາຣາເມ ປຣິນິພ຺ພາຍິ. ເຕນ ວຸຕ຺ຕໍ –

໒໐. ‘‘ສຸມງ຺ຄລໍ ນາມ ນຄຣໍ, ອຸຄ຺ຄໂຕ ນາມ ຂຕ຺ຕິໂຍ;

ມາຕາ ປຠາວຕີ ນາມ, ສຸຊາຕສ຺ສ ມເຫສິໂນ.

໒໕. ‘‘ສຸທສ຺ສໂນ ສຸເທໂວ ຈ, ອເຫສຸໍ ອຄ຺ຄສາວກາ;

ນາຣໂທ ນາມຸປຏ຺ຐາໂກ, ສຸຊາຕສ຺ສ ມເຫສິໂນ.

໒໖. ‘‘ນາໂຄ ຈ ນາຄສມາລາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫາເວຬູຕິ ວຸຈ຺ຈຕິ.

໒໗. ‘‘ໂສ ຈ ຣຸກ຺ໂຂ ຆນກ຺ຂນ຺ໂຘ, ອຈ຺ຉິທ຺ໂທ ໂຫຕິ ປຕ຺ຕິໂກ;

ອຸຊຸ ວໍໂສ ພ຺ຣຫາ ໂຫຕິ, ທສ຺ສນີໂຍ ມໂນຣໂມ.

໒໘. ‘‘ເອກກ຺ຂນ຺ໂຘ ປວຑ຺ຒິຕ຺ວາ, ຕໂຕ ສາຂາ ປຠິຊ຺ຊຕິ;

ຍຖາ ສຸພທ຺ໂຘ ໂມຣຫຕ຺ໂຖ, ເອວໍ ໂສຠຕິ ໂສ ທຸໂມ.

໒໙. ‘‘ນ ຕສ຺ສ ກຓ຺ຏກາ ໂຫນ຺ຕິ, ນາປິ ຉິທ຺ທໍ ມຫາ ອຫຸ;

ວິຕ຺ຖິຓ຺ຓສາໂຂ ອວິຣໂລ, ສນ຺ທຈ຺ຉາໂຍ ມໂນຣໂມ.

໓໑. ‘‘ປຎ຺ຎາສຣຕໂນ ອາສິ, ອຸຈ຺ຈຕ຺ຕເນນ ໂສ ຊິໂນ;

ສພ຺ພາກາຣວຣູເປໂຕ, ສພ຺ພຄຸຓມຸປາຄໂຕ.

໓໒. ‘‘ຕສ຺ສ ປຠາ ອສມສມາ, ນິທ຺ຘາວຕິ ສມນ຺ຕໂຕ;

ອປ຺ປມາໂຓ ອຕຸລິໂຍ, ໂອປມ຺ເມຫິ ອນູປໂມ.

໓໓. ‘‘ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໔. ‘‘ຍຖາປິ ສາຄເຣ ອູມີ, ຄຄເນ ຕາຣກາ ຍຖາ;

ເອວໍ ຕທາ ປາວຈນໍ, ອຣຫນ຺ເຕຫິ ຈິຕ຺ຕິຕໍ.

໓໕. ‘‘ໂສ ຈ ພຸທ຺ໂຘ ອສມສໂມ, ຄຸຓານິ ຈ ຕານິ ອຕຸລິຍານິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ’’ຕິ.

ຕຕ຺ຖ ອຈ຺ຉິທ຺ໂທຕິ ອປ຺ປຈ຺ຉິທ຺ໂທ. ‘‘ອນຸທຣາ ກຎ຺ຎາ’’ຕິອາທີສຸ ວິຍ ທຏ຺ຐພ຺ພໍ. ເກຈິ ‘‘ຉິທ຺ທໍ ໂຫຕິ ປຣິຕ຺ຕກ’’ນ຺ຕິ ປຐນ຺ຕິ. ປຕ຺ຕິໂກຕິ ພຫຸປຕ຺ໂຕ, ກາຈມຓິວຓ຺ເຓຫິ ປຕ຺ເຕຫິ ສຎ຺ຉນ຺ໂນຕິ ອຕ຺ໂຖ. ອຸຊູຕິ ອວງ຺ໂກ ອກຸຏິໂລ. ວໍໂສຕິ ເວຬຸ. ພ຺ຣຫາຕິ ສມນ຺ຕໂຕ ມຫາ. ເອກກ຺ຂນ຺ໂຘຕິ ອວນິຣຸໂຫ ເອໂກ ອທຸຕິໂຍ ຈາຕິ ອຕ຺ໂຖ. ປວຑ຺ຒິຕ຺ວາຕິ ວຑ຺ຒິຕ຺ວາ. ຕໂຕ ສາຂາ ປຠິຊ຺ຊຕີຕິ ຕໂຕ ວໍສຄ຺ຄໂຕ ປຎ຺ຈວິຘາ ສາຂາ ນິກ຺ຂມິຕ຺ວາ ປຠິຊ຺ຊິຕ຺ຖ. ‘‘ຕໂຕ ສາຂາ ປຠິຊ຺ຊຖາ’’ຕິປິ ປາໂຐ. ສຸພທ຺ໂຘຕິ ສຸຏ຺ຐຸ ປຎ຺ຈພນ຺ຘນາກາເຣນ ພທ຺ໂຘ. ໂມຣຫຕ຺ໂຖຕິ ອາຕປສນ຺ນິວາຣຓຕ຺ຖໍ ກໂຕ ພທ຺ໂຘ ໂມຣປິຎ຺ຉກລາໂປ ວຸຈ຺ຈຕິ.

ນ ຕສ຺ສ ກຓ຺ຏກາ ໂຫນ຺ຕີຕິ ຕສ຺ສ ວໍສສ຺ສ ກຓ຺ຏກິໂນປິ ຣຸກ຺ຂສ຺ສ ກຓ຺ຏກາ ນາເຫສຸໍ. ອວິຣໂລຕິ ອວິຣລສາຂາສຎ຺ຉນ຺ໂນ. ສນ຺ທຈ຺ຉາໂຍຕິ ຆນຈ຺ຉາໂຍ, ອວິຣລຕ຺ຕາວ ສນ຺ທຈ຺ຉາໂຍຕິ ວຸຕ຺ໂຕ. ປຎ຺ຎາສຣຕໂນ ອາສີຕິ ປຎ຺ຎາສຫຕ຺ໂຖ ອໂຫສິ. ສພ຺ພາກາຣວຣູເປໂຕຕິ ສພ຺ເພນ ອາກາເຣນ ວເຣຫິເຍວ ອຸເປໂຕ ສພ຺ພາກາຣວຣູເປໂຕ ນາມ. ສພ຺ພຄຸຓມຸປາຄໂຕຕິ ອນນ຺ຕຣປທສ຺ເສວ ເວວຈນມຕ຺ຕໍ.

ອປ຺ປມາໂຓຕິ ປມາຓຣຫິໂຕ, ປມາຓໍ ຄເຫຕຸໍ ອສກ຺ກຸເຓຍ຺ຍຕ຺ຕາ ວາ ອປ຺ປມາໂຓ. ອຕຸລິໂຍຕິ ອຕຸໂລ, ເກນຈິ ອສທິໂສຕິ ອຕ຺ໂຖ. ໂອປມ຺ເມຫີຕິ ອຸປມິຕພ຺ເພຫິ. ອນູປໂມຕິ ອຸປມາຣຫິໂຕ, ‘‘ອິມິນາ ຈ ອິມິນາ ຈ ສທິໂສ’’ຕິ ວຕ຺ຕຸໍ ອສກ຺ກຸເຓຍ຺ຍຠາວໂຕ ອນູປໂມຕິ ອຕ຺ໂຖ. ຄຸຓານິ ຈ ຕານີຕິ ຄຸຓາ ຈ ເຕ, ສພ຺ພຎ຺ຎຸຕຎ຺ຎາຓາທໂຍ ຄຸຓາຕິ ອຕ຺ໂຖ. ລິງ຺ຄວິປລ຺ລາເສນ ວຸຕ຺ຕໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສຸຊາຕພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ທ຺ວາທສໂມ ພຸທ຺ຘວໍໂສ.