໑໓. ສຸເມຘພຸທ຺ຘວໍສວຓ຺ຓນາ

ປທຸມຸຕ຺ຕເຣ ປນ ສມ຺ມາສມ຺ພຸທ຺ເຘ ປຣິນິພ຺ພຸເຕ ສາສເນປິສ຺ສ ອນ຺ຕຣຫິເຕ ສຕ຺ຕຕິກປ຺ປສຫສ຺ສານິ ພຸທ຺ຘາ ນຸປ຺ປຊ຺ຊິໍສຸ, ພຸທ຺ຘສຸຎ຺ຎານິ ອເຫສຸໍ. ອິໂຕ ປຏ຺ຐາຍ ຕິໍສກປ຺ປສຫສ຺ສານໍ ມຕ຺ຖເກ ເອກສ຺ມິໍ ກປ຺ເປ ສຸເມໂຘ ສຸຊາໂຕ ຈາຕິ ທ຺ເວ ສມ຺ມາສມ຺ພຸທ຺ຘາ ນິພ຺ພຕ຺ຕິໍສຸ. ຕຕ຺ຖ ອຘິຄຕເມໂຘ ສຸເມໂຘ ນາມ ໂພຘິສຕ຺ໂຕ ປາຣມິໂຍ ປູເຣຕ຺ວາ ຕຸສິຕປຸເຣ ນິພ຺ພຕ຺ຕິຕ຺ວາ ຕໂຕ ຈວິຕ຺ວາ ສຸທສ຺ສນນຄເຣ ສຸທຕ຺ຕສ຺ສ ນາມ ຣຎ຺ໂຎ ອຄ຺ຄມເຫສິຍາ ສຸທຕ຺ຕາຍ ນາມ ເທວິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ທສນ຺ນໍ ມາສານໍ ອຈ຺ຈເຍນ ສຸທສ຺ສນຸຍ຺ຍາເນ ຕຣຸຓທິວສກໂຣ ວິຍ ສລິລຘຣວິວຣຄໂຕ ມາຕຸກຸຈ຺ຉິໂຕ ນິກ຺ຂມິ. ໂສ ນວວສ຺ສສຫສ຺ສານິ ອຄາຣໍ ອຊ຺ຌາວສິ. ຕສ຺ສ ກິຣ ສຸຈນ຺ທນ-ກຎ຺ຈນ-ສິຣິວຑ຺ຒນນາມກາ ຕໂຍ ປາສາທາ ອເຫສຸໍ. ສຸມນມຫາເທວິປ຺ປມຸຂານິ ອຏ຺ຐຈຕ຺ຕາລີສອິຕ຺ຖິສຫສ຺ສານິ ປຈ຺ຈຸປຏ຺ຐິຕານິ ອເຫສຸໍ.

ໂສ ຈຕ຺ຕາຣິ ນິມິຕ຺ຕານິ ທິສ຺ວາ ສຸມນເທວິຍາ ປຸນພ຺ພສຸມິຕ຺ເຕ ນາມ ປຸຕ຺ເຕ ຊາເຕ ຫຕ຺ຖິຍາເນນ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິ. ມນຸສ຺ສານຎ຺ຈ ໂກຏິສຕມນຸປພ຺ພຊິ. ໂສ ເຕຫິ ປຣິວຸໂຕ ອຑ຺ຒມາສໍ ປຘານຈຣິຍໍ ຈຣິຕ຺ວາ ວິສາຂປຸຓ຺ຓມາຍ ນກຸລນິຄເມ ນກຸລເສຏ຺ຐິຘີຕາຍ ທິນ຺ນໍ ມຘຸປາຍາສໍ ປຣິຠຸຎ຺ຊິຕ຺ວາ ສາລວເນ ທິວາວິຫາຣໍ ວີຕິນາເມຕ຺ວາ ສິຣິວຑ຺ຒາຊີວເກນ ທິນ຺ນາ ອຏ຺ຐ ຕິຓມຸຏ຺ຐິໂຍ ຄເຫຕ຺ວາ ນີປໂພຘິມູເລ ວີສຕິຫຕ຺ຖວິຕ຺ຖຕໍ ຕິຓສນ຺ຖຣໍ ສນ຺ຖຣິຕ຺ວາ ສມາຣໍ ມາຣພລໍ ວິຘມິຕ຺ວາ ອຠິສມ຺ໂພຘິໍ ປາປຸຓິຕ຺ວາ ‘‘ອເນກຊາຕິສໍສາຣໍ…ເປ… ຕຓ຺ຫານໍ ຂຍມຊ຺ຌຄາ’’ຕິ ອຸທານໍ ອຸທາເນຕ຺ວາ ສຕ຺ຕສຕ຺ຕາຫໍ ໂພຘິສມີເປເຍວ ວີຕິນາເມຕ຺ວາ ອຏ຺ຐເມ ສຕ຺ຕາເຫ ພ຺ຣຫ຺ມຸໂນ ຘມ຺ມເທສນາຍາຈນໍ ສມ຺ປຏິຈ຺ຉິຕ຺ວາ ຠພ຺ພປຸຄ຺ຄເລ ໂອໂລເກນ຺ໂຕ ອຕ຺ຕໂນ ກນິຏ຺ຐຠາຕິກໍ ສຣຓກຸມາຣຎ຺ຈ ສພ຺ພກາມິກຸມາຣຎ຺ຈ ອຕ຺ຕນາ ສທ຺ຘິໍ ປພ຺ພຊິຕານໍ ຠິກ຺ຂູນຎ຺ຈ ໂກຏິສຕໍ ຈຕຸສຈ຺ຈຘມ຺ມປຏິເວຘສມຕ຺ເຖ ທິສ຺ວາ ອາກາເສນ ຄນ຺ຕ຺ວາ ສຸທສ຺ສນນຄຣສມີເປ ສຸທສ຺ສນຸຍ຺ຍາເນ ໂອຕຣິຕ຺ວາ ອຸຍ຺ຍານປາເລນ ອຕ຺ຕໂນ ຠາຕິເກ ປກ຺ໂກສາເປຕ຺ວາ ເຕສໍ ປຣິວາຣານໍ ມຊ຺ເຌ ຘມ຺ມຈກ຺ກໍ ປວຕ຺ເຕສິ. ຕທາ ໂກຏິສຕສຫສ຺ສານໍ ຘມ຺ມາຠິສມໂຍ ອໂຫສິ, ອຍໍ ປຐໂມ ອຠິສມໂຍ. ເຕນ ວຸຕ຺ຕໍ –

໑. ‘‘ປທຸມຸຕ຺ຕຣສ຺ສ ອປເຣນ, ສຸເມໂຘ ນາມ ນາຍໂກ;

ທຸຣາສໂທ ອຸຄ຺ຄເຕໂຊ, ສພ຺ພໂລກຸຕ຺ຕໂມ ມຸນິ.

໒. ‘‘ປສນ຺ນເນຕ຺ໂຕ ສຸມຸໂຂ, ພ຺ຣຫາ ອຸຊຸ ປຕາປວາ;

ຫິເຕສີ ສພ຺ພສຕ຺ຕານໍ, ພຫູ ໂມເຈສິ ພນ຺ຘນາ.

໓. ‘‘ຍທາ ພຸທ຺ໂຘ ປາປຸຓິຕ຺ວາ, ເກວລໍ ໂພຘິມຸຕ຺ຕມໍ;

ສຸທສ຺ສນມ຺ຫິ ນຄເຣ, ຘມ຺ມຈກ຺ກໍ ປວຕ຺ຕຍິ.

໔. ‘‘ຕສ຺ສາຠິສມຍາ ຕີຓິ, ອເຫສຸໍ ຘມ຺ມເທສເນ;

ໂກຏິສຕສຫສ຺ສານໍ, ປຐມາຠິສມໂຍ ອຫູ’’ຕິ.

ຕຕ຺ຖ ອຸຄ຺ຄເຕໂຊຕິ ອຸຄ຺ຄຕເຕໂຊ. ປສນ຺ນເນຕ຺ໂຕຕິ ສຸຏ຺ຐຸ ປສນ຺ນນຍໂນ, ໂຘວິຕ຺ວາ ມຊ຺ຊິຕ຺ວາ ຐປິຕມຓິຄຸຬິກາ ວິຍ ປສນ຺ນານິ ເນຕ຺ຕານິ ໂຫນ຺ຕິ. ຕສ຺ມາ ໂສ ‘‘ປສນ຺ນເນຕ຺ໂຕ’’ຕິ ວຸຕ຺ໂຕ. ມຸທຸສິນິທ຺ຘນີລວິມລສຸຂຸມປຂຸມາຈິຕສຸປ຺ປສນ຺ນນຍໂນຕິ ອຕ຺ໂຖ. ‘‘ສຸປ຺ປສນ຺ນປຎ຺ຈນຍໂນ’’ຕິປິ ວຕ຺ຕຸໍ ວຏ຺ຏຕິ. ສຸມຸໂຂຕິ ປຣິປຸຓ຺ຓສຣທສມຍຈນ຺ທສທິສວທໂນ. ພ຺ຣຫາຕິ ອຏ຺ຐາສີຕິຫຕ຺ຖປ຺ປມາຓສຣີຣຕ຺ຕາ ພ຺ຣຫາ ມຫນ຺ໂຕ, ອຎ຺ເຎຫິ ອສາຘາຣຓສຣີຣປ຺ປມາໂຓຕິ ອຕ຺ໂຖ. ອຸຊູຕິ ພ຺ຣຫ຺ມຸຊຸຄຕ຺ໂຕ ອຸຊຸເມວ ອຸຄ຺ຄຕສຣີໂຣ ເທວນຄເຣ ສມຸສ຺ສິຕສຸວຓ຺ຓໂຕຣຓສທິສວຣສຣີໂຣຕິ ອຕ຺ໂຖ. ປຕາປວາຕິ ວິຊ຺ໂຊຕມານສຣີໂຣ. ຫິເຕສີຕິ ຫິຕຄເວສີ. ອຠິສມຍາ ຕີຓີຕິ ອຠິສມຍາ ຕໂຍ, ລິງ຺ຄວິປລ຺ລາໂສ ກໂຕຕິ.

ຍທາ ປນ ຠຄວາ ກຸມ຺ຠກຓ຺ຓສທິສານຸຠາວໍ ກຸມ຺ຠກຓ຺ຓໍ ນາມ ມນຸສ຺ສຠກ຺ຂໍ ຍກ຺ຂໍ ມຫາອຏວິມຸເຂ ສນ຺ທິສ຺ສມານໂຆຣສຣີຣໍ ວຕ຺ຕນິອຏວິສຎ຺ຈາຣໍ ປຈ຺ຉິນ຺ທິຕ຺ວາ ປວຕ຺ຕມານໍ ປຈ຺ຈູສສມເຍ ມຫາກຣຸຓາສມາປຕ຺ຕິໍ ສມາປຊ຺ຊິຕ຺ວາ ຕໂຕ ວຸຏ຺ຐາຍ ໂລກໍ ໂອໂລເກນ຺ໂຕ ທິສ຺ວາ ເອກໂກວ ອສຫາໂຍ ຕສ຺ສ ຍກ຺ຂສ຺ສ ຠວນໍ ຄນ຺ຕ຺ວາ ອນ຺ໂຕ ປວິສິຕ຺ວາ ປຎ຺ຎຕ຺ເຕ ສິຣິສຍເນ ນິສີທິ. ອຖ ໂຂ ໂສ ຍກ຺ໂຂ ມກ຺ຂໍ ອສຫມາໂນ ທຓ຺ຑາຫໂຕ ໂຆຣວິໂສ ອາສິວິໂສ ວິຍ ສໍກຸທ຺ໂຘ ທສພລໍ ຠິໍສາເປຕຸກາໂມ ອຕ຺ຕໂນ ອຕ຺ຕຠາວໍ ໂຆຣຕຣໍ ກຕ຺ວາ ປພ຺ພຕສທິສໍ ສີສໍ ກຕ຺ວາ ສູຣິຍມຓ຺ຑລສທິສານິ ອກ຺ຂີນິ ນິມ຺ມິນິຕ຺ວາ ນງ຺ຄລສີສສທິສາຕິທີຆວິປຸລຕິຂິຓທາຐາໂຍ ກຕ຺ວາ ໂອລມ຺ພນີລວິປຸລວິສໂມທໂຣ ຕາລກ຺ຂນ຺ຘສທິສພາຫຸຈິປິຏກວິຣູປວງ຺ກນາໂສ ປພ຺ພຕພິລສທິສວິປຸລຣຕ຺ຕມຸໂຂ ຖູລປິງ຺ຄລຂຣຜຣຸສເກໂສ ອຕິຠຍານກທສ຺ສໂນ ຫຸຕ຺ວາ ອາຄນ຺ຕ຺ວາ ສຸເມຘສ຺ສ ຠຄວໂຕ ປຸຣໂຕ ຐຕ຺ວາ ປຘູປາຍນ຺ໂຕ ປຊ຺ຊລນ຺ໂຕ ປາສາຓປພ຺ພຕຄ຺ຄິຊາລ-ສລິລ-ກທ຺ທມ-ຉາຣິກາຍຸຘງ຺ຄາຣ-ວາລຸກປ຺ປກາຣາ ນວວິຘາ ວສ຺ສວຸຏ຺ຐິໂຍ ວສ຺ເສຕ຺ວາປິ ຠຄວໂຕ ໂລມຄ຺ຄມຕ຺ຕມ຺ປິ ຈາເລຕຸໍ ອສກ຺ໂກນ຺ໂຕ ‘‘ຠຄວນ຺ຕໍ ປຎ຺ຫໍ ປຸຈ຺ຉິຕ຺ວາ ມາເຣສ຺ສາມີ’’ຕິ ອາຬວໂກ ວິຍ ປຎ຺ຫໍ ປຸຈ຺ຉິ. ອຍໍ ຠຄວາ ປຎ຺ຫາພ຺ຍາກຣເຓນ ຕໍ ຍກ຺ຂໍ ວິນຍມຸປເນສິ. ຕໂຕ ທຸຕິຍທິວເສ ກິຣສ຺ສ ຣຏ຺ຐວາສິໂນ ມນຸສ຺ສາ ສກຏຠຣິເຕນ ຠຕ຺ເຕນ ສຫ ຣາຊກຸມາຣໍ ອາຫຣິຕ຺ວາ ຍກ຺ຂສ຺ສ ອທໍສຸ. ອຖ ຍກ຺ໂຂ ຣາຊກຸມາຣໍ ພຸທ຺ຘສ຺ສ ອທາສິ. ອຏວິທ຺ວາເຣ ຐິຕມນຸສ຺ສາ ຠຄວນ຺ຕໍ ອຸປສງ຺ກມິໍສຸ. ຕທາ ຕສ຺ມິໍ ສມາຄເມ ທສພໂລ ຍກ຺ຂສ຺ສ ມໂນນຸກູລໍ ຘມ຺ມໍ ເທເສນ຺ໂຕ. ນວຸຕິໂກຏິສຫສ຺ສານໍ ປາຓີນໍ ຘມ຺ມຈກ຺ຂຸໍ ອຸປ຺ປາເທສິ, ໂສ ທຸຕິໂຍ ຘມ຺ມາຠິສມໂຍ ອໂຫສິ. ເຕນ ວຸຕ຺ຕໍ –

໕. ‘‘ປຸນາປຣໍ ກຸມ຺ຠກຓ຺ຓໍ, ຍກ຺ຂໍ ໂສ ທມຍີ ຊິໂນ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫູ’’ຕິ.

ຍທາ ປນ ອຸປກາຣິນຄເຣ ສິຣິນນ຺ທນຸຍ຺ຍາເນ ຈຕ຺ຕາຣິ ສຈ຺ຈານິ ປກາສຍິ, ຕທາ ອສີຕິໂກຏິສຕສຫສ຺ສານໍ ຕຕິໂຍ ຘມ຺ມາຠິສມໂຍ ອໂຫສິ. ເຕນ ວຸຕ຺ຕໍ –

໖. ‘‘ປຸນາປຣໍ ອມິຕຍໂສ, ຈຕຸສຈ຺ຈໍ ປກາສຍິ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫູ’’ຕິ.

ສຸເມຘສ຺ສາປິ ຠຄວໂຕ ຕໂຍ ສາວກສນ຺ນິປາຕາ ອເຫສຸໍ. ປຐມສນ຺ນິປາເຕ ສຸທສ຺ສນນຄເຣ ໂກຏິສຕຂີຓາສວາ ອເຫສຸໍ. ປຸນ ເທວກູເຏ ປພ຺ພເຕ ກຖິນຕ຺ຖເຕ ທຸຕິເຍ ນວຸຕິໂກຏິໂຍ. ປຸນ ຕຕິເຍ ຠຄວຕິ ຈາຣິກໍ ຈຣມາເນ ອສີຕິໂກຏິໂຍ ອເຫສຸໍ. ເຕນ ວຸຕ຺ຕໍ –

໗. ‘‘ສນ຺ນິປາຕາ ຕໂຍ ອາສຸໍ, ສຸເມຘສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ‘‘ສຸທສ຺ສນໍ ນາມ ນຄຣໍ, ອຸປຄຎ຺ຉິ ຊິໂນ ຍທາ;

ຕທາ ຂີຓາສວາ ຠິກ຺ຂູ, ສມິໍສຸ ສຕໂກຏິໂຍ.

໙. ‘‘ປຸນາປຣໍ ເທວກູເຏ, ຠິກ຺ຂູນໍ ກຖິນຕ຺ຖເຕ;

ຕທາ ນວຸຕິໂກຏີນໍ, ທຸຕິໂຍ ອາສິ ສມາຄໂມ.

໑໐. ‘‘ປຸນາປຣໍ ທສພໂລ, ຍທາ ຈຣຕິ ຈາຣິກໍ;

ຕທາ ອສີຕິໂກຏີນໍ, ຕຕິໂຍ ອາສິ ສມາຄໂມ’’ຕິ.

ຕທາ ອມ຺ຫາກໍ ໂພຘິສຕ຺ໂຕ ອຸຕ຺ຕໂຣ ນາມ ສພ຺ພຊນຸຕ຺ຕໂຣ ມາຓໂວ ຫຸຕ຺ວາ ນິທຫິຕ຺ວາ ຐປິຕໍເຍວ ອສີຕິໂກຏິຘນໍ ວິສ຺ສຊ຺ເຊຕ຺ວາ ພຸທ຺ຘປ຺ປມຸຂສ຺ສ ສງ຺ຆສ຺ສ ມຫາທານໍ ທຕ຺ວາ ຕທາ ທສພລສ຺ສ ຘມ຺ມໍ ສຸຕ຺ວາ ສຣເຓສຸ ປຕິຏ຺ຐາຍ ນິກ຺ຂມິຕ຺ວາ ປພ຺ພຊິ. ໂສປິ ນໍ ສຕ຺ຖາ ໂຠຊນານຸໂມທນໍ ກໂຣນ຺ໂຕ – ‘‘ອນາຄເຕ ໂຄຕໂມ ນາມ ພຸທ຺ໂຘ ຠວິສ຺ສຕີ’’ຕິ ພ຺ຍາກາສິ. ເຕນ ວຸຕ຺ຕໍ –

໑໑. ‘‘ອຫໍ ເຕນ ສມເຍນ, ອຸຕ຺ຕໂຣ ນາມ ມາຓໂວ;

ອສີຕິໂກຏິໂຍ ມຍ຺ຫໍ, ຆເຣ ສນ຺ນິຈິຕໍ ຘນໍ.

໑໒. ‘‘ເກວລໍ ສພ຺ພໍ ທຕ຺ວານ, ສສງ຺ເຆ ໂລກນາຍເກ;

ສຣຓໍ ຕສ຺ສູປຄຎ຺ຉິໍ, ປພ຺ພຊ຺ຊຎ຺ຈາຠິໂຣຈຍິໍ.

໑໓. ‘‘ໂສປິ ມໍ ພຸທ຺ໂຘ ພ຺ຍາກາສິ, ກໂຣນ຺ໂຕ ອນຸໂມທນໍ;

ຕິໍສກປ຺ປສຫສ຺ສມ຺ຫິ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

ພ຺ຍາກຣຓຄາຖາ ວິຕ຺ຖາເຣຕພ຺ພາ.

໑໕. ‘‘ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໖. ‘‘ສຸຕ຺ຕນ຺ຕໍ ວິນຍໍ ຈາປິ, ນວງ຺ຄໍ ສຕ຺ຖຸສາສນໍ;

ສພ຺ພໍ ປຣິຍາປຸຓິຕ຺ວານ, ໂສຠຍິໍ ຊິນສາສນໍ.

໑໗. ‘‘ຕຕ຺ຖປ຺ປມຕ຺ໂຕ ວິຫຣນ຺ໂຕ, ນິສຊ຺ຊຏ຺ຐານຈງ຺ກເມ;

ອຠິຎ຺ຎາປາຣມິໍ ຄນ຺ຕ຺ວາ, ພ຺ຣຫ຺ມໂລກມຄຎ຺ຉຫ’’ນ຺ຕິ.

ຕຕ຺ຖ ສນ຺ນິຈິຕນ຺ຕິ ນິທຫິຕໍ ນິຘານວເສນ. ເກວລນ຺ຕິ ສກລນ຺ຕິ ອຕ຺ໂຖ. ສພ຺ພນ຺ຕິ ອເສສໂຕ ທຕ຺ວາ. ສສງ຺ເຆຕິ ສສງ຺ຆສ຺ສ. ຕສ຺ສູປຄຎ຺ຉິນ຺ຕິ ຕໍ ອຸປຄຎ຺ຉິໍ, ອຸປໂຍຄຕ຺ເຖ ສາມິວຈນໍ. ອຠິໂຣຈຍິນ຺ຕິ ປພ຺ພຊິໍ. ຕິໍສກປ຺ປສຫສ຺ສມ຺ຫີຕິ ຕິໍສກປ຺ປສຫສ຺ເສສຸ ອຕິກ຺ກນ຺ເຕສູຕິ ອຕ຺ໂຖ.

ຕສ຺ສ ປນ ສຸເມຘສ຺ສ ຠຄວໂຕ ສຸທສ຺ສນໍ ນາມ ນຄຣໍ ອໂຫສິ, ສຸທຕ຺ໂຕ ນາມ ຣາຊາ ປິຕາ, ມາຕາ ສຸທຕ຺ຕາ ນາມ, ສຣໂຓ ຈ ສພ຺ພກາໂມ ຈ ທ຺ເວ ອຄ຺ຄສາວກາ, ສາຄໂຣ ນາມຸປຏ຺ຐາໂກ, ຣາມາ ຈ ສຸຣາມາ ຈ ທ຺ເວ ອຄ຺ຄສາວິກາ, ມຫານີປຣຸກ຺ໂຂ ໂພຘິ, ສຣີຣໍ ອຏ຺ຐາສີຕິຫຕ຺ຖຸພ຺ເພຘໍ ອໂຫສິ, ອາຍຸ ນວຸຕິວສ຺ສສຫສ຺ສານິ, ນວວສ຺ສສຫສ຺ສານິ ອຄາຣໍ ອຊ຺ຌາວສິ, ສຸມນາ ນາມສ຺ສ ອຄ຺ຄມເຫສີ, ປຸນພ຺ພສຸມິຕ຺ໂຕ ນາມ ປຸຕ຺ໂຕ, ຫຕ຺ຖິຍາເນນ ນິກ຺ຂມິ. ເສສໍ ຄາຖາສຸ ທິສ຺ສຕິ. ເຕນ ວຸຕ຺ຕໍ –

໑໘. ‘‘ສຸທສ຺ສນໍ ນາມ ນຄຣໍ, ສຸທຕ຺ໂຕ ນາມ ຂຕ຺ຕິໂຍ;

ສຸທຕ຺ຕາ ນາມ ຊນິກາ, ສຸເມຘສ຺ສ ມເຫສິໂນ.

໒໓. ‘‘ສຣໂຓ ສພ຺ພກາໂມ ຈ, ອເຫສຸໍ ອຄ຺ຄສາວກາ;

ສາຄໂຣ ນາມຸປຏ຺ຐາໂກ, ສຸເມຘສ຺ສ ມເຫສິໂນ.

໒໔. ‘‘ຣາມາ ເຈວ ສຸຣາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫານີໂປຕິ ວຸຈ຺ຈຕິ.

໒໖. ‘‘ອຏ຺ຐາສີຕິຣຕນານິ, ອຈ຺ຈຸຄ຺ຄໂຕ ມຫາມຸນິ;

ໂອຠາເສຕິ ທິສາ ສພ຺ພາ, ຈນ຺ໂທ ຕາຣຄເຓ ຍຖາ.

໒໗. ‘‘ຈກ຺ກວຕ຺ຕິມຓີ ນາມ, ຍຖາ ຕປຕິ ໂຍຊນໍ;

ຕເຖວ ຕສ຺ສ ຣຕນໍ, ສມນ຺ຕາ ຜຣຕິ ໂຍຊນໍ.

໒໘. ‘‘ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໙. ‘‘ເຕວິຊ຺ຊຉຬຠິຎ຺ເຎຫິ, ພລປ຺ປຕ຺ເຕຫິ ຕາທິຫິ;

ສມາກຸລມິທໍ ອາສິ, ອຣຫນ຺ເຕຫິ ສາຘຸຫິ.

໓໐. ‘‘ເຕປິ ສພ຺ເພ ອມິຕຍສາ, ວິປ຺ປມຸຕ຺ຕາ ນິຣູປຘີ;

ຎາຓາໂລກໍ ທສ຺ສຍິຕ຺ວາ, ນິພ຺ພຸຕາ ເຕ ມຫາຍສາ’’ຕິ.

ຕຕ຺ຖ ຈນ຺ໂທ ຕາຣຄເຓ ຍຖາຕິ ຍຖາ ນາມ ຄຄເນ ປຣິປຸຓ຺ຓຈນ຺ໂທ ຕາຣາຄເຓ ໂອຠາເສຕິ ປກາເສຕິ, ເອວເມວ ສພ຺ພາປິ ທິສາ ໂອຠາເສຕີຕິ ອຕ຺ໂຖ. ເກຈິ ‘‘ຈນ຺ໂທ ປນ຺ນຣໂສ ຍຖາ’’ຕິ ປຐນ຺ຕິ, ໂສ ອຸຕ຺ຕານຕ຺ໂຖວ.

ຈກ຺ກວຕ຺ຕິມຓີ ນາມາຕິ ຍຖາ ນາມ ຈກ຺ກວຕ຺ຕິຣຎ຺ໂຎ ມຓິຣຕນໍ ຈຕຸຫຕ຺ຖາຍາມໍ ສກຏນາຠິສມປຣິຓາຫໍ ຈຕຸຣາສີຕິມຓິສຫສ຺ສປຣິວາຣໍ ຕາຣາຄຓປຣິວຸຕສ຺ສ ສຣທສມຍປຣິປຸຓ຺ຓຣຊນິກຣສ຺ສ ສິຣິສມຸທຍໂສຠໍ ອວ຺ຫຍນ຺ຕມິວ ເວປຸລ຺ລປພ຺ພຕໂຕ ປຣມຣມຓີຍທສ຺ສນໍ ມຓິຣຕນມາຄຈ຺ຉຕິ, ຕສ຺ເສວໍ ອາຄຈ຺ຉນ຺ຕສ຺ສ ສມນ຺ຕໂຕ ໂຍຊນປ຺ປມາຓໍ ໂອກາສໍ ອາຠາ ຜຣຕິ, ເອວເມວ ຕສ຺ສ ສຸເມຘສ຺ສາປິ ຠຄວໂຕ ສຣີຣໂຕ ອາຠາຣຕນໍ ສມນ຺ຕໂຕ ໂຍຊນໍ ຜຣຕີຕິ ອຕ຺ໂຖ.

ເຕວິຊ຺ຊຉຬຠິຎ຺ເຎຫີຕິ ເຕວິຊ຺ເຊຫິ ຉຬຠິຎ຺ເຎຫິ ຈາຕິ ອຕ຺ໂຖ. ພລປ຺ປຕ຺ເຕຫີຕິ ອິທ຺ຘິພລປ຺ປຕ຺ເຕຫິ. ຕາທິຫີຕິ ຕາທິຠາວປ຺ປຕ຺ເຕຫິ. ສມາກຸລນ຺ຕິ ສງ຺ກິຓ຺ຓໍ ເອກກາສາວປຊ຺ໂຊຕໍ. ອິທນ຺ຕິ ສາສນໍ ສນ຺ຘາຍາຫ, ມຫີຕລໍ ວາ. ອມິຕຍສາຕິ ອມິຕປຣິວາຣາ, ອຕຸລກິຕ຺ຕິໂຆໂສ ວາ. ນິຣູປຘີຕິ ຈຕຸຣູປຘິວິຣຫິຕາ. ເສສເມຕ຺ຖ ຄາຖາສຸ ສພ຺ພຕ຺ຖ ປາກຏເມວາຕິ.

ສຸເມຘພຸທ຺ຘວໍສວຓ຺ຓນາ ນິຏ຺ຐິຕາ.

ນິຏ຺ຐິໂຕ ເອກາທສໂມ ພຸທ຺ຘວໍໂສ.