໗. ລສຸຓທາຍກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ລສຸຓທາຍກຕ຺ເຖຣສ຺ສ ອປທານໍ. ເອໂສປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຆຣາວາເສ ອາທີນວໍ ທິສ຺ວາ ເຄຫໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕໍ ນິສ຺ສາຍ ວເນ ວສນ຺ໂຕ ພຫູນິ ລສຸຓານິ ໂຣເປຕ຺ວາ ຕເທວ ວນມູລຜລຎ຺ຈ ຂາທນ຺ໂຕ ວິຫາສິ. ໂສ ພຫູນິ ລສຸຓານິ ກາເຊນາທາຍ ມນຸສ຺ສປຖໍ ອາຫຣິຕ຺ວາ ປສນ຺ໂນ ທານໍ ທຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ເຠສຊ຺ຊຕ຺ຖາຍ ທຕ຺ວາ ຄຈ຺ຉຕິ. ເອວໍ ໂສ ຍາວຊີວໍ ປຸຎ຺ຎານິ ກຕ຺ວາ ເຕເນວ ປຸຎ຺ຎພເລນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໍ ອນຸຠວິຕ຺ວາ ກເມນ ອິມສ຺ມິໍ ພຸທ຺ຘຸປ຺ປາເທ ອຸປ຺ປນ຺ໂນ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ໂຕ ປຸພ຺ພກມ຺ມວເສນ ລສຸຓທາຍກຕ຺ເຖໂຣຕິ ປາກໂຏ.

໘໙. ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕຕ຺ຖ ຫິມາລຍປພ຺ພຕສ຺ສ ປຣິໂຍສາເນ ມນຸສ຺ສານໍ ສຎ຺ຈຣຓຏ຺ຐາເນ ຍທາ ວິປສ຺ສີ ຠຄວາ ອຸທປາທິ, ຕທາ ອຫໍ ຕາປໂສ ອໂຫສິນ຺ຕິ ສມ຺ພນ຺ໂຘ. ລສຸຓໍ ອຸປຊີວາມີຕິ ຣຕ຺ຕລສຸຓໍ ໂຣເປຕ຺ວາ ຕເທວ ໂຄຈຣໍ ກຕ຺ວາ ຊີວິກໍ ກປ຺ເປມີຕິ ອຕ຺ໂຖ. ເຕນ ວຸຕ຺ຕໍ ‘‘ລສຸຓໍ ມຍ຺ຫໂຠຊນ’’ນ຺ຕິ.

໙໐. ຂາຣິໂຍ ປູຣຍິຕ຺ວານາຕິ ຕາປສຠາຊນານິ ລສຸເຓນ ປູຣຍິຕ຺ວາ ກາເຊນາທາຍ ສງ຺ຆາຣາມໍ ສງ຺ຆສ຺ສ ວສນຏ຺ຐານໍ ເຫມນ຺ຕາທີສຸ ຕີສຸ ກາເລສຸ ສງ຺ຆສ຺ສ ຈຕູຫິ ອິຣິຍາປເຖຫິ ວສນວິຫາຣໍ ອຄຈ຺ຉິໍ ອຄມາສິນ຺ຕິ ອຕ຺ໂຖ. ຫຏ຺ໂຐ ຫຏ຺ເຐນ ຈິຕ຺ເຕນາຕິ ອຫໍ ສນ຺ຕຸຏ຺ໂຐ ໂສມນສ຺ສຍຸຕ຺ຕຈິຕ຺ເຕນ ສງ຺ຆສ຺ສ ລສຸຓໍ ອທາສິນ຺ຕິ ອຕ຺ໂຖ.

໙໑. ວິປສ຺ສິສ຺ສ…ເປ… ນິຣຕສ຺ສຫນ຺ຕິ ນຣານໍ ອຄ຺ຄສ຺ສ ເສຏ຺ຐສ຺ສ ອສ຺ສ ວິປສ຺ສິສ຺ສ ຠຄວໂຕ ສາສເນ ນິຣໂຕ ນິສ຺ເສເສນ ຣໂຕ ອຫນ຺ຕິ ສມ຺ພນ຺ໂຘ. ສງ຺ຆສ຺ສ…ເປ… ໂມທຫນ຺ຕິ ອຫໍ ສງ຺ຆສ຺ສ ລສຸຓທານໍ ທຕ຺ວາ ສຄ຺ຄມ຺ຫິ ສຸຏ຺ຐຸ ອຄ຺ຄສ຺ມິໍ ເທວໂລເກ ອາຍຸກປ຺ປໍ ທິພ຺ພສມ຺ປຕ຺ຕິໍ ອນຸຠວມາໂນ ໂມທິໍ, ສນ຺ຕຸຏ຺ໂຐ ຠວາມີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ລສຸຓທາຍກຕ຺ເຖຣອປທານວຓ຺ຓນາ ສມຕ຺ຕາ.