໓. ສຸຠູຕິວຄ຺ໂຄ

໑. ສຸຠູຕິຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ສຸຠູຕິຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອິໂຕ ກປ຺ປສຕສຫສ຺ສມຕ຺ຖເກ ອນຸປ຺ປນ຺ເນເຍວ ປທຸມຸຕ຺ຕເຣ ຠຄວຕິ ໂລກນາເຖ ຫໍສວຕີນຄເຣ ອຎ຺ຎຕຣສ຺ສ ພ຺ຣາຫ຺ມຓມຫາສາລສ຺ສ ເອກປຸຕ຺ຕໂກ ຫຸຕ຺ວາ ນິພ຺ພຕ຺ຕິ, ຕສ຺ສ ນນ຺ທມາຓໂວຕິ ນາມໍ ອກໍສຸ. ໂສ ວຍປ຺ປຕ຺ໂຕ ຕໂຍ ເວເທ ອຸຄ຺ຄຓ຺ຫິຕ຺ວາ ຕຕ຺ຖ ສາຣໍ ອປສ຺ສນ຺ໂຕ ອຕ຺ຕໂນ ປຣິວາຣຠູເຕຫິ ຈຕຸຈຕ຺ຕາລີສາຍ ມາຓວສຫສ຺ເສຫິ ສທ຺ຘິໍ ປພ຺ພຕປາເທ ອິສິປພ຺ພຊ຺ຊໍ ປພ຺ພຊິຕ຺ວາ ອຏ຺ຐ ສມາປຕ຺ຕິໂຍ ປຎ຺ຈາຠິຎ຺ຎາໂຍ ຈ ນິພ຺ພຕ຺ເຕສິ. ອນ຺ເຕວາສິການມ຺ປິ ກມ຺ມຏ຺ຐານໍ ອາຈິກ຺ຂິ. ເຕປິ ນຈິຣສ຺ເສວ ຌານລາຠິໂນ ອເຫສຸໍ.

ເຕນ ຈ ສມເຍນ ປທຸມຸຕ຺ຕໂຣ ຠຄວາ ໂລເກ ອຸປ຺ປຊ຺ຊິຕ຺ວາ ຫໍສວຕີນຄຣໍ ອຸປນິສ຺ສາຍ ວິຫຣນ຺ໂຕ ເອກທິວສໍ ປຈ຺ຈູສສມເຍ ໂລກໍ ໂວໂລເກນ຺ໂຕ ນນ຺ທຕາປສສ຺ສ ອນ຺ເຕວາສິກຊຏິລານໍ ອຣຫຕ຺ຕູປນິສ຺ສຍໍ, ນນ຺ທຕາປສສ຺ສ ຈ ທ຺ວີຫງ຺ເຄຫິ ສມນ຺ນາຄຕສ຺ສ ສາວກຏ຺ຐານນ຺ຕຣສ຺ສ ປຕ຺ຖນໍ ທິສ຺ວາ ປາໂຕວ ສຣີຣປຏິຊຄ຺ຄນໍ ກຕ຺ວາ ປຸພ຺ພຓ຺ຫສມເຍ ປຕ຺ຕຈີວຣມາທາຍ ອຎ຺ຎໍ ກຎ຺ຈິ ອນາມນ຺ເຕຕ຺ວາ ສີໂຫ ວິຍ ເອກຈໂຣ ນນ຺ທຕາປສສ຺ສ ອນ຺ເຕວາສິເກສຸ ຜລາຜລຕ຺ຖາຍ ຄເຕສຸ ‘‘ພຸທ຺ຘຠາວໍ ເມ ຊານາຕູ’’ຕິ ປສ຺ສນ຺ຕສ຺ເສວ ນນ຺ທຕາປສສ຺ສ ອາກາສໂຕ ໂອຕຣິຕ຺ວາ ປຖວິຍໍ ປຕິຏ຺ຐາສິ. ນນ຺ທຕາປໂສ ພຸທ຺ຘານຸຠາວຎ຺ເຈວ ລກ຺ຂຓປາຣິປູຣິຎ຺ຈ ທິສ຺ວາ ລກ຺ຂຓມນ຺ເຕ ສມ຺ມສິຕ຺ວາ ‘‘ອິເມຫິ ລກ຺ຂເຓຫິ ສມນ຺ນາຄໂຕ ນາມ ອຄາຣໍ ອຊ຺ຌາວສນ຺ໂຕ ຣາຊາ ໂຫຕິ ຈກ຺ກວຕ຺ຕີ, ປພ຺ພຊນ຺ໂຕ ໂລເກ ວິວຏຈ຺ເຉໂທ ສພ຺ພຎ຺ຎູ ພຸທ຺ໂຘ ໂຫຕິ, ອຍໍ ປຸຣິສາຊານີໂຍ ນິສ຺ສໍສຍໍ ພຸທ຺ໂຘ’’ຕິ ຎຕ຺ວາ ປຈ຺ຈຸຄ຺ຄມນໍ ກຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ອາສນໍ ປຎ຺ຎາເປຕ຺ວາ ອທາສິ. ນິສີທິ ຠຄວາ ປຎ຺ຎຕ຺ເຕ ອາສເນ. ນນ຺ທຕາປໂສປິ ອຕ຺ຕໂນ ອນຸຈ຺ຉວິກໍ ອາສນໍ ຄເຫຕ຺ວາ ເອກມນ຺ຕໍ ນິສີທິ. ຕສ຺ມິໍ ສມເຍ ຈຕຸຈຕ຺ຕາລີສສຫສ຺ສຊຏິລາ ປຓີຕປຓີຕານິ ໂອຊວນ຺ຕານິ ຜລາຜລານິ ຄເຫຕ຺ວາ ອາຈຣິຍສ຺ສ ສນ຺ຕິກໍ ສມ຺ປຕ຺ຕາ ພຸທ຺ຘານຎ຺ເຈວ ອາຈຣິຍສ຺ສ ຈ ນິສິນ຺ນາກາຣໍ ໂອໂລເກຕ຺ວາ ອາຫໍສຸ – ‘‘ອາຈຣິຍ, ມຍໍ ‘ອິມສ຺ມິໍ ໂລເກ ຕຸມ຺ເຫຫິ ມຫນ຺ຕຕໂຣ ນຕ຺ຖີ’ຕິ ວິຈຣາມ, ອຍໍ ປນ ປຸຣິໂສ ຕຸມ຺ເຫຫິ ມຫນ຺ຕຕໂຣ ມຎ຺ເຎ’’ຕິ. ນນ຺ທຕາປໂສ – ‘‘ຕາຕາ, ກິໍ ວເທຖ, ຕຸມ຺ເຫ ສາສເປນ ສທ຺ຘິໍ ອຏ຺ຐສຏ຺ຐິໂຍຊນສຕສຫສ຺ສຸພ຺ເພຘໍ ສິເນຣຸໍ ອຸປເມຕຸໍ ອິຈ຺ຉຖ, ສພ຺ພຎ຺ຎຸພຸທ຺ເຘນ ສທ຺ຘິໍ ມາ ມໍ ອຸປມິຕ຺ຖາ’’ຕິ ອາຫ. ອຖ ເຕ ຕາປສາ – ‘‘ສເຈ ອຍໍ ໂອຣໂກ ອຠວິສ຺ສ, ນ ອມ຺ຫາກໍ ອາຈຣິໂຍ ເອວໍ ອຸປມໍ ອາຫເຣຍ຺ຍ. ຍາວ ມຫາວຕາຍໍ ປຸຣິສາຊານີໂຍ’’ຕິ ປາເທສຸ ນິປຕິຕ຺ວາ ສິຣສາ ວນ຺ທິໍສຸ. ອຖ ເຕ ອາຈຣິໂຍ ອາຫ – ‘‘ຕາຕາ, ອມ຺ຫາກໍ ພຸທ຺ຘານໍ ອນຸຈ຺ຉວິໂກ ເທຍ຺ຍຘມ຺ໂມ ນຕ຺ຖິ, ຠຄວາ ຈ ຠິກ຺ຂາຈາຣເວລາຍໍ ອິຘາຄໂຕ, ຕສ຺ມາ ມຍໍ ຍຖາພລໍ ເທຍ຺ຍຘມ຺ມໍ ທສ຺ສາມ, ຕຸມ຺ເຫຫິ ຍໍ ຍໍ ປຓີຕໍ ຜລາຜລໍ ອາຠຕໍ, ຕໍ ຕໍ ອາຫຣຖາ’’ຕິ ອາຫຣາເປຕ຺ວາ ສຫຕ຺ເຖເນວ ໂຘວິຕ຺ວາ ສຍໍ ຕຖາຄຕສ຺ສ ປຕ຺ເຕ ປຕິຏ຺ຐາເປສິ. ສຕ຺ຖາຣາ ຜລາຜເລ ປຏິຄ຺ຄຫິຕມຕ຺ເຕ ເທວຕາ ທິພ຺ໂພຊໍ ປກ຺ຂິປິໍສຸ. ຕາປໂສ ອຸທກມ຺ປິ ສຍເມວ ປຣິສ຺ສາເວຕ຺ວາ ອທາສິ. ຕໂຕ ໂຠຊນກິຈ຺ຈໍ ນິຏ຺ຐາເປຕ຺ວາ ນິສິນ຺ເນ ສຕ຺ຖຣິ ສພ຺ເພ ອນ຺ເຕວາສິເກ ປກ຺ໂກສິຕ຺ວາ ສຕ຺ຖຸ ສນ຺ຕິເກ ສາຣຓີຍໍ ກຖໍ ກເຖນ຺ໂຕ ນິສີທິ. ສຕ຺ຖາ ‘‘ຠິກ຺ຂຸສງ຺ໂຆ ອາຄຈ຺ຉຕູ’’ຕິ ຈິນ຺ເຕສິ. ສຕ຺ຖຸ ຈິຕ຺ຕໍ ຎຕ຺ວາ ສຕສຫສ຺ສມຕ຺ຕາ ຂີຓາສວາ ອາຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ອຏ຺ຐໍສຸ.

ອຖ ນນ຺ທຕາປໂສ ອນ຺ເຕວາສິເກ ອາມນ຺ເຕສິ – ‘‘ຕາຕາ, ພຸທ຺ຘານໍ ນິສິນ຺ນາສນມ຺ປິ ນີຈໍ, ສມຓສຕສຫສ຺ສສ຺ສປິ ອາສນໍ ນຕ຺ຖິ. ຕຸມ຺ເຫຫິ ອຊ຺ຊ ອຸຬາຣໍ ຠຄວໂຕ ຠິກ຺ຂຸສງ຺ຆສ຺ສ ຈ ສກ຺ກາຣໍ ກາຕຸໍ ວຏ຺ຏຕິ, ປພ຺ພຕປາທໂຕ ວຓ຺ຓຄນ຺ຘສມ຺ປນ຺ນານິ ປຸປ຺ຜານິ ອາຫຣຖາ’’ຕິ ອາຫ. ອຈິນ຺ເຕຍ຺ຍຕ຺ຕາ ອິທ຺ຘິວິສຍສ຺ສ ເຕ ມຸຫຸຕ຺ເຕເນວ ວຓ຺ຓຄນ຺ຘຣສສມ຺ປນ຺ນານິ ປຸປ຺ຜານິ ອາຫຣິຕ຺ວາ ພຸທ຺ຘານໍ ໂຍຊນປ຺ປມາຓໍ ປຸປ຺ຜາສນໍ ປຎ຺ຎາເປສຸໍ. ອຄ຺ຄສາວການໍ ຕິຄາວຸຕໍ, ເສສຠິກ຺ຂູນໍ ອຑ຺ຒໂຍຊນາທິເຠທໍ, ສງ຺ຆນວກສ຺ສ ອຸສຠມຕ຺ຕໍ ປຎ຺ຎາເປສຸໍ. ເອວໍ ປຎ຺ຎຕ຺ເຕສຸ ອາສເນສຸ ນນ຺ທຕາປໂສ ຕຖາຄຕສ຺ສ ປຸຣໂຕ ອຎ຺ຊລິໍ ປຄ຺ຄຍ຺ຫ ຐິໂຕ, ‘‘ຠນ຺ເຕ, ອມ຺ຫາກໍ ທີຆຣຕ຺ຕໍ ຫິຕາຍ ສຸຂາຍ ອິມໍ ປຸປ຺ຜາສນໍ ອາຣຸຍ຺ຫ ນິສີທຖາ’’ຕິ ອາຫ. ນິສີທິ ຠຄວາ ປຸປ຺ຜາສເນ. ເອວໍ ນິສິນ຺ເນ ສຕ຺ຖຣິ ສຕ຺ຖຸ ອາກາຣໍ ຎຕ຺ວາ ຠິກ຺ຂູ ອຕ຺ຕໂນ ອຕ຺ຕໂນ ປຕ຺ຕາສເນ ນິສີທິໍສຸ. ນນ຺ທຕາປໂສ ມຫນ຺ຕໍ ປຸປ຺ຜຈ຺ຉຕ຺ຕໍ ຄເຫຕ຺ວາ ຕຖາຄຕສ຺ສ ມຕ຺ຖເກ ຘາເຣນ຺ໂຕ ອຏ຺ຐາສິ. ສຕ຺ຖາ ‘‘ຕາປສານໍ ອຍໍ ສກ຺ກາໂຣ ມຫປ຺ຜໂລ ໂຫຕູ’’ຕິ ນິໂຣຘສມາປຕ຺ຕິໍ ສມາປຊ຺ຊິ. ສຕ຺ຖຸ ສມາປນ຺ນຠາວໍ ຎຕ຺ວາ ຠິກ຺ຂູປິ ສມາປຕ຺ຕິໍ ສມາປຊ຺ຊິໍສຸ. ຕຖາຄເຕ ສຕ຺ຕາຫໍ ນິໂຣຘໍ ສມາປຊ຺ຊິຕ຺ວາ ນິສິນ຺ເນ ອນ຺ເຕວາສິກາ ຠິກ຺ຂາຈາຣກາເລ ສມ຺ປຕ຺ເຕ ວນມູລຜລາຜລໍ ປຣິຠຸຎ຺ຊິຕ຺ວາ ເສສກາເລ ພຸທ຺ຘານໍ ອຎ຺ຊລິໍ ປຄ຺ຄຍ຺ຫ ອຏ຺ຐໍສຸ. ນນ຺ທຕາປໂສ ປນ ຠິກ຺ຂາຈາຣມ຺ປິ ອຄນ຺ຕ຺ວາ ປຸປ຺ຜຈ຺ຉຕ຺ຕໍ ຘາເຣນ຺ໂຕເຍວ ສຕ຺ຕາຫໍ ປີຕິສຸເຂເນວ ວີຕິນາເມສິ.

ສຕ຺ຖາ ນິໂຣຘໂຕ ວຸຏ຺ຐາຍ ອຣຓວິຫາຣິອງ຺ເຄນ ທກ຺ຂິເຓຍ຺ຍງ຺ເຄນ ຈາຕິ ທ຺ວີຫິ ອງ຺ເຄຫິ ສມນ຺ນາຄຕໍ ເອກໍ ສາວກໍ ‘‘ອິສິຄຓສ຺ສ ປຸປ຺ຜາສນານຸໂມທນໍ ກໂຣຫີ’’ຕິ ອາຓາເປສິ. ໂສ ຈກ຺ກວຕ຺ຕິຣຎ຺ໂຎ ສນ຺ຕິກາ ປຏິລທ຺ຘມຫາລາໂຠ ມຫາໂຍໂຘ ວິຍ ຕຸຏ຺ຐມານໂສ ອຕ຺ຕໂນ ວິສເຍ ຐຕ຺ວາ ເຕປິຏກໍ ພຸທ຺ຘວຈນໍ ສມ຺ມສິຕ຺ວາ ອນຸໂມທນມກາສິ. ຕສ຺ສ ເທສນາວສາເນ ສຕ຺ຖາ ສຍໍ ຘມ຺ມໍ ເທເສສິ. ສຕ຺ຖຸ ເທສນາວສາເນ ສພ຺ເພປິ ຈຕຸຈຕ຺ຕາລີສສຫສ຺ສຕາປສາ ອຣຫຕ຺ຕໍ ປາປຸຓິໍສຸ. ສຕ຺ຖາ – ‘‘ເອຖ ຠິກ຺ຂໂວ’’ຕິ ຫຕ຺ຖໍ ປສາເຣສິ. ເຕສໍ ຕາວເທວ ເກສມສ຺ສູ ອນ຺ຕຣຘາຍິໍສຸ. ອຏ຺ຐ ປຣິກ຺ຂາຣາ ສຣີເຣ ປຏິມຸກ຺ກາວ ອເຫສຸໍ. ເຕ ສຏ຺ຐິວສ຺ສິກຕ຺ເຖຣາ ວິຍ ສຕ຺ຖາຣໍ ປຣິວາຣຍິໍສຸ. ນນ຺ທຕາປໂສ ປນ ວິກ຺ຂິຕ຺ຕຈິຕ຺ຕຕາຍ ວິເສສໍ ນາຘິຄຎ຺ຉິ. ຕສ຺ສ ກິຣ ອຣຓວິຫາຣິຕ຺ເຖຣສ຺ສ ຘມ຺ມໍ ໂສຕຸໍ ອາຣທ຺ຘກາລໂຕ ປຏ຺ຐາຍ – ‘‘ອໂຫ ວຕາຫມ຺ປິ ອນາຄເຕ ເອກສ຺ສ ພຸທ຺ຘສ຺ສ ສາສເນ ອິມິນາ ສາວເກນ ລທ຺ຘຄຸຓໍ ລເຠຍ຺ຍ’’ນ຺ຕິ ຈິຕ຺ຕໍ ອຸທປາທິ. ໂສ ເຕນ ວິຕກ຺ເກນ ມຄ຺ຄຜລປຏິເວຘໍ ກາຕຸໍ ນາສກ຺ຂິ. ຕຖາຄຕໍ ປນ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ສມ຺ມຸເຂ ຐິໂຕ ເອວມາຫ – ‘‘ຠນ຺ເຕ, ເຍນ ຠິກ຺ຂຸນາ ອິສິຄຓສ຺ສ ປຸປ຺ຜາສນານຸໂມທນາ ກຕາ, ໂກ ນາມາຍໍ ຕຸມ຺ຫາກໍ ສາສເນ’’ຕິ? ‘‘ອຣຓວິຫາຣິອງ຺ເຄນ ຈ ທກ຺ຂິເຓຍ຺ຍງ຺ເຄນ ຈ ເອຕທຄ຺ຄຏ຺ຐານໍ ປຕ຺ໂຕ ເອໂສ ຠິກ຺ຂູ’’ຕິ. ‘‘ຠນ຺ເຕ, ຍ຺ວາຍໍ ມຍາ ສຕ຺ຕາຫໍ ປຸປ຺ຜຈ຺ຉຕ຺ຕໍ ຘາເຣນ຺ເຕນ ສກ຺ກາໂຣ ກໂຕ, ເຕນ ອຘິກາເຣນ ອຎ຺ຎໍ ສມ຺ປຕ຺ຕິໍ ນ ປຕ຺ເຖມິ, ອນາຄເຕ ປນ ເອກສ຺ສ ພຸທ຺ຘສ຺ສ ສາສເນ ອຍໍ ເຖໂຣ ວິຍ ທ຺ວີຫງ຺ເຄຫິ ສມນ຺ນາຄໂຕ ສາວໂກ ຠເວຍ຺ຍ’’ນ຺ຕິ ປຕ຺ຖນໍ ອກາສິ.

ສຕ຺ຖາ ‘‘ສມິຊ຺ຌິສ຺ສຕິ ນຸ ໂຂ ອິມສ຺ສ ຕາປສສ຺ສ ປຕ຺ຖນາ’’ຕິ ອນາຄຕໍສຎາຓໍ ເປເສຕ຺ວາ ໂອໂລເກນ຺ໂຕ ກປ຺ປສຕສຫສ຺ສໍ ອຕິກ຺ກມິຕ຺ວາ ສມິຊ຺ຌນກຠາວໍ ທິສ຺ວາ, ‘‘ຕາປສ, ນ ເຕ ອຍໍ ປຕ຺ຖນາ ໂມຆໍ ຠວິສ຺ສຕິ, ອນາຄເຕ ກປ຺ປສຕສຫສ຺ສໍ ອຕິກ຺ກມິຕ຺ວາ ໂຄຕໂມ ນາມ ພຸທ຺ໂຘ ອຸປ຺ປຊ຺ຊິສ຺ສຕິ, ຕສ຺ສ ສນ຺ຕິເກ ສມິຊ຺ຌິສ຺ສຕີ’’ຕິ ຘມ຺ມກຖໍ ກເຖຕ຺ວາ ຠິກ຺ຂຸສງ຺ຆປຣິວຸໂຕ ອາກາສໍ ປກ຺ຂນ຺ທິ. ນນ຺ທຕາປໂສ ຍາວ ຈກ຺ຂຸປຖໍ ນ ສມຕິກ຺ກມຕິ, ຕາວ ສຕ຺ຖຸ ຠິກ຺ຂຸສງ຺ຆສ຺ສ ຈ ອຎ຺ຊລິໍ ປຄ຺ຄເຫຕ຺ວາ ອຏ຺ຐາສິ. ໂສ ອປຣຠາເຄ ກາເລນ ກາລໍ ສຕ຺ຖາຣໍ ອຸປສງ຺ກມິຕ຺ວາ ຘມ຺ມໍ ສຸຓິຕ຺ວາ ອປຣິຫີນຊ຺ຌາໂນວ ກາລໍ ກຕ຺ວາ ພ຺ຣຫ຺ມໂລເກ ນິພ຺ພຕ຺ໂຕ. ຕໂຕ ປນ ຈຸໂຕ ອປຣານິປິ ປຎ຺ຈ ຊາຕິສຕານິ ປພ຺ພຊິຕ຺ວາ ອາຣຎ຺ຎໂກວ ອໂຫສິ, ກສ຺ສປສມ຺ມາສມ຺ພຸທ຺ຘກາເລປິ ປພ຺ພຊິຕ຺ວາ ອາຣຎ຺ຎໂກ ຫຸຕ຺ວາ ຄຕປຈ຺ຈາຄຕວຕ຺ຕໍ ປູເຣສິ. ເອຕໍ ກິຣ ວຕ຺ຕໍ ອປຣິປູເຣຕ຺ວາ ມຫາສາວກຠາວໍ ປາປຸຓນ຺ຕາ ນາມ ນຕ຺ຖິ, ຄຕປຈ຺ຈາຄຕວຕ຺ຕໍ ປນ ອາຄມຏ຺ຐກຖາສຸ ວຸຕ຺ຕນເຍເນວ ເວທິຕພ຺ພໍ. ໂສ ວີສຕິວສ຺ສສຫສ຺ສານິ ຄຕປຈ຺ຈາຄຕວຕ຺ຕໍ ປູເຣຕ຺ວາ ກາລໍ ກຕ຺ວາ ຕາວຕິໍສເທວໂລເກ ນິພ຺ພຕ຺ຕິ.

ເອວໍ ໂສ ຕາວຕິໍສຠວເນ ອປຣາປຣໍ ອຸປ຺ປຊ຺ຊນວເສນ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈຸໂຕ ມນຸສ຺ສໂລເກ ອເນກສຕກ຺ຂຕ຺ຕຸໍ ຈກ຺ກວຕ຺ຕິຣາຊາ ປເທສຣາຊາ ຈ ຫຸຕ຺ວາ ອຸຬາຣໍ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອມ຺ຫາກໍ ຠຄວໂຕ ອຸປ຺ປນ຺ນກາເລ ສາວຕ຺ຖິຍໍ ສຸມນເສຏ຺ຐິສ຺ສ ເຄເຫ ອນາຖປິຓ຺ຑິກສ຺ສ ກນິຏ຺ໂຐ ຫຸຕ຺ວາ ນິພ຺ພຕ຺ຕິ. ສຸຠູຕີຕິສ຺ສ ນາມໍ ອໂຫສິ.

ເຕນ ຈ ສມເຍນ ອມ຺ຫາກໍ ຠຄວາ ໂລເກ ອຸປ຺ປຊ຺ຊິຕ຺ວາ ປວຕ຺ຕິຕວຣຘມ຺ມຈກ຺ໂກ ອນຸປຸພ຺ເພນ ຣາຊຄຫໍ ຄນ຺ຕ຺ວາ ຕຕ຺ຖ ເວຬຸວນປຏິຄ຺ຄຫຓາທິນາ ໂລການຸຄ຺ຄຫໍ ກໂຣນ຺ໂຕ ຣາຊຄຫໍ ອຸປນິສ຺ສາຍ ສີຕວເນ ວິຫາສິ. ຕທາ ອນາຖປິຓ຺ຑິໂກ ເສຏ຺ຐິ ສາວຕ຺ຖິຍໍ ອຸຏ຺ຐານກໍ ຠຓ຺ຑໍ ຄເຫຕ຺ວາ ອຕ຺ຕໂນ ສຫາຍສ຺ສ ຣາຊຄຫເສຏ຺ຐິໂນ ເຄຫໍ ຄນ຺ຕ຺ວາ ພຸທ຺ຘຸປ຺ປາທໍ ສຸຕ຺ວາ ສຕ຺ຖາຣໍ ສີຕວເນ ວິຫຣນ຺ຕໍ ອຸປສງ຺ກມິຕ຺ວາ ປຐມທສ຺ສເນເນວ ໂສຕາປຕ຺ຕິຜເລ ປຕິຏ຺ຐາຍ ສຕ຺ຖາຣໍ ສາວຕ຺ຖິໍ ອາຄມນຕ຺ຖາຍ ຍາຈິຕ຺ວາ ຕໂຕ ປຎ຺ຈຈຕ຺ຕາລີສໂຍຊເນ ມຄ຺ເຄ ໂຍຊເນ ໂຍຊເນ ສຕສຫສ຺ສປຣິຈ຺ຈາເຄນ ວິຫາເຣ ປຕິຏ຺ຐາເປຕ຺ວາ ສາວຕ຺ຖິຍໍ ອຏ຺ຐກຣີສປ຺ປມາຓໍ ເຊຕສ຺ສ ກຸມາຣສ຺ສ ອຸຍ຺ຍານຠູມິໍ ໂກຏິສນ຺ຖາເຣນ ກິຓິຕ຺ວາ ຕຕ຺ຖ ຠຄວໂຕ ວິຫາຣໍ ກາເຣຕ຺ວາ ອທາສິ. ວິຫາຣມຫທິວເສ ອຍໍ ສຸຠູຕິກຸຏຸມ຺ພິໂກ ອນາຖປິຓ຺ຑິກເສຏ຺ຐິນາ ສທ຺ຘິໍ ຄນ຺ຕ຺ວາ ຘມ຺ມໍ ສຸຓນ຺ໂຕ ສທ຺ຘໍ ປຏິລຠິຕ຺ວາ ປພ຺ພຊິ. ໂສ ອຸປສມ຺ປນ຺ໂນ ທ຺ເວ ມາຕິກາ ປຄຸຓາ ກຕ຺ວາ ກມ຺ມຏ຺ຐານໍ ກຖາເປຕ຺ວາ ອຣຎ຺ເຎ ສມຓຘມ຺ມໍ ກໂຣນ຺ໂຕ ເມຕ຺ຕາຌານໍ ນິພ຺ພຕ຺ເຕຕ຺ວາ ຕໍ ປາທກໍ ກຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ.

ໂສ ຘມ຺ມໍ ເທເສນ຺ໂຕ ຍສ຺ມາ ສຕ຺ຖາຣາ ເທສິຕນິຍາເມນ ອໂນທິສ຺ສກໍ ກຕ຺ວາ ເທເສຕິ, ຕສ຺ມາ ອຣຓວິຫາຣີນໍ ອຄ຺ໂຄ ນາມ ຊາໂຕ. ຍສ຺ມາ ຈ ປິຓ຺ຑາຍ ຈຣນ຺ໂຕ ຆເຣ ຆເຣ ເມຕ຺ຕາຌານໍ ສມາປຊ຺ຊິຕ຺ວາ ວຸຏ຺ຐາຍ ຠິກ຺ຂໍ ປຏິຄ຺ຄຓ຺ຫາຕິ ‘‘ເອວໍ ທາຍການໍ ມຫປ຺ຜລໍ ຠວິສ຺ສຕີ’’ຕິ, ຕສ຺ມາ ທກ຺ຂິເຓຍ຺ຍານໍ ອຄ຺ໂຄ ນາມ ຊາໂຕ. ເຕນ ນໍ ຠຄວາ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ອຣຓວິຫາຣີນໍ ທກ຺ຂິເຓຍ຺ຍານຎ຺ຈ ຍທິທໍ ສຸຠູຕີ’’ຕິ (ອ. ນິ. ໑.໑໙໘, ໒໐໑) ທ຺ວຍງ຺ຄສມນ຺ນາຄເຕ ອຄ຺ຄຏ຺ຐາເນ ຐເປສິ. ເອວມຍໍ ມຫາເຖໂຣ ອຕ຺ຕນາ ປູຣິຕປາຣມີນໍ ຜລສ຺ສ ມຕ຺ຖກໍ ອຣຫຕ຺ຕໍ ປຕ຺ວາ ໂລເກ ອຠິຎ຺ຎາໂຕ ອຠິລກ຺ຂິໂຕ ຫຸຕ຺ວາ ພຫຸຊນຫິຕາຍ ຊນປທຈາຣິກໍ ຈຣນ຺ໂຕ ອນຸປຸພ຺ເພນ ຣາຊຄຫໍ ອຄມາສິ.

ຣາຊາ ພິມ຺ພິສາໂຣ ເຖຣສ຺ສ ອາຄມນໍ ສຸຕ຺ວາ ອຸປສງ຺ກມິຕ຺ວາ ວນ຺ທິຕ຺ວາ ‘‘ອິເຘວ, ຠນ຺ເຕ, ວສຖ, ວສນຏ຺ຐານໍ ໂວ ກຣິສ຺ສາມີ’’ຕິ ວຕ຺ວາ ປກ຺ກນ຺ໂຕ ວິສ຺ສຣິ. ເຖໂຣ ເສນາສນໍ ອລຠນ຺ໂຕ ອພ຺ໂຠກາເສ ວີຕິນາເມສິ. ເຖຣສ຺ສານຸຠາເວນ ເທໂວ ນ ວສ຺ສຕິ. ມນຸສ຺ສາ ອວຸຏ຺ຐິຕາຍ ອຸປທ຺ທຸຕາ ຣຎ຺ໂຎ ນິເວສນທ຺ວາເຣ ອຸກ຺ກຸຏ຺ຐິໍ ອກໍສຸ. ຣາຊາ ‘‘ເກນ ນຸ ໂຂ ກາຣເຓນ ເທໂວ ນ ວສ຺ສຕີ’’ຕິ ວີມໍສນ຺ໂຕ ‘‘ເຖຣສ຺ສ ອພ຺ໂຠກາສວາເສນ ມຎ຺ເຎ ນ ວສ຺ສຕີ’’ຕິ ຈິນ຺ເຕຕ຺ວາ ຕສ຺ສ ປຓ຺ຓກຸຏິໍ ກາຣາເປຕ຺ວາ ‘‘ອິມິສ຺ສໍ, ຠນ຺ເຕ, ປຓ຺ຓກຸຏິຍໍ ວສຖາ’’ຕິ ວຕ຺ວາ ວນ຺ທິຕ຺ວາ ປກ຺ກາມິ. ເຖໂຣ ກຸຏິໍ ປວິສິຕ຺ວາ ຕິຓສນ຺ຖາຣເກ ປລ຺ລງ຺ເກນ ນິສີທິ. ຕທາ ເທໂວ ໂຖກໍ ໂຖກໍ ຜຸສາຍຕິ, ນ ສມ຺ມາຘາຣໍ ອນຸປເວຈ຺ຉຕິ. ອຖ ເຖໂຣ ໂລກສ຺ສ ອວຸຏ຺ຐິກຠຍໍ ວິຘມິຕຸກາໂມ ອຕ຺ຕໂນ ອຊ຺ຌຕ຺ຕິກພາຫິຣວຕ຺ຖຸກສ຺ສ ປຣິສ຺ສຍສ຺ສ ອຠາວໍ ປເວເທນ຺ໂຕ ‘‘ຉນ຺ນາ ເມ ກຸຏິກາ’’ຕິ (ເຖຣຄາ. ໑) ຄາຖມາຫ. ຕສ຺ສຕ຺ໂຖ ເຖຣຄາຖາຍໍ ວຸຕ຺ໂຕເຍວ.

ກສ຺ມາ ປເນເຕ ມຫາເຖຣາ ອຕ຺ຕໂນ ຄຸເຓ ປກາເສນ຺ຕີຕິ? ອິມິນາ ທີເຆນ ອທ຺ຘຸນາ ອນຘິຄຕປຸພ຺ພໍ ປຣມຄມ຺ຠີຣໍ ອຕິວິຍ ສນ຺ຕໍ ປຓີຕໍ ອຕ຺ຕນາ ອຘິຄຕໂລກຸຕ຺ຕຣຘມ຺ມໍ ປຈ຺ຈເວກ຺ຂິຕ຺ວາ ປີຕິເວຄສມຸສ຺ສາຫິຕອຸທານທີປນຕ຺ຖໍ ສາສນສ຺ສ ນິຍ຺ຍານິກຠາວວິຠາວນຕ຺ຖຎ຺ຈ ປຣມປ຺ປິຈ຺ຉາ ອຣິຍາ ອຕ຺ຕໂນ ຄຸເຓ ປກາເສນ຺ຕິ. ຍຖາ ຕໍ ໂລກນາໂຖ ໂພຘເນຍ຺ຍານໍ ອຊ຺ຌາສຍວເສນ ‘‘ທສພລສມນ຺ນາຄໂຕ, ຠິກ຺ຂເວ, ຕຖາຄໂຕ ຈຕຸເວສາຣຊ຺ຊວິສາຣໂທ’’ຕິອາທິນາ (ອ. ນິ. ໑໐.໒໑; ມ. ນິ. ໑. ໑໔໘ ອຕ຺ຖໂຕ ສມານໍ) ອຕ຺ຕໂນ ຄຸເຓ ປກາເສຕິ. ເອວມຍໍ ເຖຣສ຺ສ ອຎ຺ຎາພ຺ຍາກຣຓຄາຖາປິ ອໂຫສີຕິ.

໑. ເອວໍ ໂສ ປຕ຺ຕອຣຫຕ຺ຕຜໂລ ປຕ຺ຕເອຕທຄ຺ຄຏ຺ຐາໂນ ຈ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕຕ຺ຖ ຫິມວນ຺ຕສ຺ສາຕິ ຫິມາລຍປພ຺ພຕສ຺ສ ອວິທູເຣ ອາສນ຺ເນ ສມີເປ ປພ຺ພຕປາເທ ມນຸສ຺ສານໍ ຄມນາຄມນສມ຺ປນ຺ເນ ສຎ຺ຈຣຓຏ຺ຐາເນຕິ ອຕ຺ໂຖ. ນິສໂຠ ນາມ ປພ຺ພໂຕຕິ ປພ຺ພຕານໍ ເຊຏ຺ຐຕ຺ຕາ ນາເມນ ນິສໂຠ ນາມ ເສລມຍປພ຺ພໂຕ ອໂຫສີຕິ ສມ຺ພນ຺ໂຘ. ອສ຺ສໂມ ສຸກໂຕ ມຍ຺ຫນ຺ຕິ ຕຕ຺ຖ ປພ຺ພເຕ ມຍ຺ຫໍ ວສນຕ຺ຖາຍ ອສ຺ສໂມ ອຣຎ຺ຎາວາໂສ ສຸຏ຺ຐຸ ກໂຕ. ກຸຏິຣຕ຺ຕິຏ຺ຐານທິວາຏ຺ຐານວຕິປຣິກ຺ເຂປາທິວເສນ ສຸນ຺ທຣາກາເຣນ ກໂຕຕິ ອຕ຺ໂຖ. ປຓ຺ຓສາລາ ສຸມາປິຕາຕິ ປຓ຺ເຓຫິ ຉາທິຕາ ສາລາ ມຍ຺ຫໍ ນິວາສນຕ຺ຖາຍ ສຸຏ຺ຐຸ ມາປິຕາ ນິຏ຺ຐາປິຕາຕິ ອຕ຺ໂຖ.

໒. ໂກສິໂຍ ນາມ ນາເມນາຕິ ມາຕາປິຕູຫິ ກຕນາມເຘຍ຺ເຍນ ໂກສິໂຍ ນາມ. ອຸຄ຺ຄຕາປໂນ ປາກຏຕໂປ ໂຆຣຕໂປ. ເອກາກິໂຍ ອຎ຺ເຎສໍ ອຠາວາ ອຫໍ ເອວ ເອໂກ. ອທຸຕິໂຍ ທຸຕິຍຕາປສຣຫິໂຕ ຊຏິໂລ ຊຏາຘາຣີ ຕາປໂສ ຕທາ ຕສ຺ມິໍ ກາເລ ນິສເຠ ປພ຺ພເຕ ວສາມິ ວິຫຣາມີຕິ ສມ຺ພນ຺ໂຘ.

໓. ຜລໍ ມູລຎ຺ຈ ປຓ຺ຓຎ຺ຈ, ນ ຠຸຎ຺ຊາມິ ອຫໍ ຕທາຕິ ຕທາ ຕສ຺ມິໍ ນິສຠປພ຺ພເຕ ວສນກາເລ ຕິຓ຺ຑຸກາທິຜລໍ ມຸຬາລາທິມູລໍ, ກາຣປຓ຺ຓາທິປຓ຺ຓຎ຺ຈ ຣຸກ຺ຂໂຕ ໂອຈິນິຕ຺ວາ ນ ຠຸຎ຺ຊາມີຕິ ອຕ຺ໂຖ. ເອວໍ ສຕິ ກຖໍ ຊີວຕີຕິ ຕໍ ທສ຺ເສນ຺ໂຕ ປວຕ຺ຕໍວ ສຸປາຕາຫນ຺ຕິ ອາຫ. ຕຕ຺ຖ ປວຕ຺ຕໍ ສຍເມວ ຊາຕໍ ສຸປາຕໍ ອຕ຺ຕໂນ ຘມ຺ມຕາຍ ປຕິຕໍ ປຓ຺ຓາທິກໍ ນິສ຺ສາຍ ອາຫາຣໍ ກຕ຺ວາ ອຫໍ ຕາວເທ ຕສ຺ມິໍ ກາເລ ຊີວາມິ ຊີວິກໍ ກປ຺ເປມີຕິ ສມ຺ພນ຺ໂຘ. ‘‘ປວຕ຺ຕປຓ຺ຑຸປຓ຺ຓານີ’’ຕິ ວາ ປາໂຐ, ຕສ຺ສ ສຍເມວ ປຕິຕານິ ປຓ຺ຑຸປຓ຺ຓານິ ຣຸກ຺ຂປຕ຺ຕານິ ອຸປນິສ຺ສາຍ ຊີວາມີຕິ ອຕ຺ໂຖ.

໔. ນາຫໍ ໂກເປມິ ອາຊີວນ຺ຕິ ອຫໍ ຊີວິຕໍ ຈຊມາໂນປິ ປຣິຈ຺ຈາຄໍ ກຸຣຸມາໂນປິ ຕຓ຺ຫາວເສນ ຜລມູລາທິອາຫາຣປຣິເຍສນາຍ ສມ຺ມາ ອາຊີວໍ ນ ໂກເປມິ ນ ນາເສມີຕິ ສມ຺ພນ຺ໂຘ. ອາຣາເຘມິ ສກໍ ຈິຕ຺ຕນ຺ຕິ ສກໍ ຈິຕ຺ຕໍ ອຕ຺ຕໂນ ມນໍ ອປ຺ປິຈ຺ຉຕາຍ ສນ຺ຕຸຏ຺ຐິຍາ ຈ ອາຣາເຘມິ ປສາເທມິ. ວິວຊ຺ເຊມິ ອເນສນນ຺ຕິ ເວຊ຺ຊກມ຺ມທູຕກມ຺ມາທິວເສນ ອເນສນໍ ອຍຸຕ຺ຕປຣິເຍສນໍ ວິວຊ຺ເຊມິ ທູຣໍ ກໂຣມິ.

໕. ຣາຄູປສໍຫິຕໍ ຈິຕ຺ຕນ຺ຕິ ຍທາ ຍສ຺ມິໍ ກາເລ ມມ ຣາເຄນ ສມ຺ປຍຸຕ຺ຕໍ ຈິຕ຺ຕໍ ອຸປ຺ປຊ຺ຊຕິ, ຕທາ ສຍເມວ ອຕ຺ຕນາເຍວ ປຈ຺ຈເວກ຺ຂາມິ ຎາເຓນ ປຏິເວກ຺ຂິຕ຺ວາ ວິໂນເທມິ. ເອກຄ຺ໂຄ ຕໍ ທເມມຫນ຺ຕິ ອຫໍ ເອກສ຺ມິໍ ກມ຺ມຏ຺ຐານາຣມ຺ມເຓ ອຄ຺ໂຄ ສມາຫິໂຕ ຕໍ ຣາຄຈິຕ຺ຕໍ ທເມມິ ທມນໍ ກໂຣມິ.

໖. ຣຊ຺ຊເສ ຣຊ຺ຊນີເຍ ຈາຕິ ຣຊ຺ຊນີເຍ ອລ຺ລີຍິຕພ຺ເພ ຣູປາຣມ຺ມຓາທິວຕ຺ຖຸສ຺ມິໍ ຣຊ຺ຊເສ ອລ຺ລີໂນ ອສິ ຠວສິ. ທຸສ຺ສນີເຍ ຈ ທຸສ຺ສເສຕິ ທູສິຕພ຺ເພ ໂທສກຣຓວຕ຺ຖຸສ຺ມິໍ ທູສໂກ ອສິ. ມຸຍ຺ຫເສ ໂມຫນີເຍ ຈາຕິ ໂມຫິຕພ຺ເພ ໂມຫກຣຓວຕ຺ຖຸສ຺ມິໍ ໂມຍ຺ຫສິ ມູຬ຺ໂຫ ອສິ ຠວສິ. ຕສ຺ມາ ຕຸວໍ ວນາ ວນໂຕ ອຣຎ຺ຎວາສໂຕ ນິກ຺ຂມສ຺ສຸ ອປຄຈ຺ຉາຫີຕິ ເອວໍ ອຕ຺ຕານໍ ທເມມີຕິ ສມ຺ພນ຺ໂຘ.

໒໔. ຕິມ຺ພຣູສກວຓ຺ຓາໂຠຕິ ສຸວຓ຺ຓຕິມ຺ພຣູສກວຓ຺ຓາໂຠ, ຊມ຺ໂພນທສຸວຓ຺ຓວຓ຺ໂຓຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສຸຠູຕິຕ຺ເຖຣອປທານວຓ຺ຓນາ ສມຕ຺ຕາ.

໒. ອຸປວານຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ອຸປວານຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ທລິທ຺ທກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຠຄວຕິ ປຣິນິພ຺ພຸເຕ ຕສ຺ສ ຘາຕຸໍ ຄເຫຕ຺ວາ ມນຸສ຺ສເທວນາຄຄຣຸຬກຸມ຺ຠຓ຺ຑຍກ຺ຂຄນ຺ຘພ຺ເພຫິ ສຕ຺ຕຣຕນມເຍ ສຕ຺ຕໂຍຊນິເກ ຖູເປ ກເຕ ຕຕ຺ຖ ສຸໂຘຕໍ ອຕ຺ຕໂນ ອຸຕ຺ຕຣສາຏກໍ ເວຬຄ຺ເຄ ລຄ຺ເຄຕ຺ວາ ອາພນ຺ຘິຕ຺ວາ ຘຊໍ ກຕ຺ວາ ປູຊໍ ອກາສິ. ຕໍ ຄເຫຕ຺ວາ ອຠິສມ຺ມຕໂກ ນາມ ຍກ຺ຂເສນາປຕິ ເທເວຫິ ເຈຕິຍປູຊາຣກ຺ຂຓຕ຺ຖໍ ຐປິໂຕ ອທິສ຺ສມານກາໂຍ ຕໍ ອາກາເສ ຘາເຣນ຺ໂຕ ເຈຕິຍໍ ຕິກ຺ຂຕ຺ຕຸໍ ປທກ຺ຂິຓໍ ອກາສິ. ໂສ ຕໍ ທິສ຺ວາ ຠິຍ຺ໂຍໂສມຕ຺ຕາຍ ປສນ຺ນມານໂສ ຫຸຕ຺ວາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ອຸປວາໂນຕິ ລທ຺ຘນາໂມ ວຍປ຺ປຕ຺ໂຕ ເຊຕວນປຏິຄ຺ຄຫເຓ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ອຣຫຕ຺ຕໍ ປຕ຺ວາ ຉຬຠິຎ຺ໂຎ ອໂຫສິ. ຍທາ ຠຄວໂຕ ອຜາສຸ ອໂຫສິ, ຕທາ ເຖໂຣ ອຸຓ຺ໂຫທກໍ ຕຖາຣູປໍ ປານກຎ຺ຈ ເຠສຊ຺ຊໍ ຠຄວໂຕ ອຸປນາເມສິ. ເຕນສ຺ສ ສຕ຺ຖຸໂນ ໂຣໂຄ ວູປສມິ. ຕສ຺ສ ຠຄວາ ອນຸໂມທນໍ ອກາສິ.

໕໒. ເອວໍ ໂສ ປຕ຺ຕອຣຫຕ຺ຕຜໂລ ອຘິຄຕເອຕທຄ຺ຄຏ຺ຐາໂນ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ນາມ ຊິໂນຕິອາທິມາຫ. ຕຕ຺ຖ ສພ຺ເພສໍ ໂລກິຍໂລກຸຕ຺ຕຣຘມ຺ມານໍ ປາຣຄູ ປຣິໂຍສານໍ ນິພ຺ພານໍ ຄໂຕ ປຕ຺ໂຕ ປທຸມຸຕ຺ຕໂຣ ນາມ ຊິໂນ ຊິຕປຎ຺ຈມາໂຣ ຠຄວາ ອຄ຺ຄິກ຺ຂນ຺ໂຘ ອິວ ຉພ຺ພຓ຺ຓາ ພຸທ຺ຘຣໍສິໂຍ ຊລິຕ຺ວາ ສພ຺ພໂລກໍ ຘມ຺ມປຊ຺ໂຊເຕນ ໂອຠາເສຕ຺ວາ ສມ຺ພຸທ຺ໂຘ ສຸຏ຺ຐຸ ພຸທ຺ໂຘ ອວິຊ຺ຊານິທ຺ທູປຄຕາຍ ປຊາຍ ສວາສນາຍ ກິເລສນິທ຺ທາຍ ປຏິພຸທ຺ໂຘ ວິກສິຕເນຕ຺ຕປງ຺ກໂຊ ປຣິນິພ຺ພຸໂຕ ຂນ຺ຘປຣິນິພ຺ພາເນນ ນິພ຺ພຸໂຕ ອທສ຺ສນໍ ຄໂຕຕິ ສມ຺ພນ຺ໂຘ.

໕໗. ຊງ຺ຆາຕິ ເຈຕິຍກຣຓກາເລ ອຸປຈິນິຕພ຺ພານໍ ອິຏ຺ຐການໍ ຐປນຕ຺ຖາຍ, ນິພນ຺ຘິຍມານໂສປານປນ຺ຕິ.

໘໘. ສຸໂຘຕໍ ຣຊເກນາຫນ຺ຕິ ວຕ຺ຖໂຘວເກນ ປຸຣິເສນ ສຸຏ຺ຐຸ ໂຘວິຕໍ ສຸວິສຸທ຺ຘກຕໍ, ອຸຕ຺ຕເຣຍ຺ຍປຏໍ ມມ ອຸຕ຺ຕຣສາຏກໍ ອຫໍ ເວຬຄ຺ເຄ ລຄ຺ຄິຕ຺ວາ ຘຊໍ ກຕ຺ວາ ອຸກ຺ຂິປິໍ, ອມ຺ພເຣ ອາກາເສ ອຸສ຺ສາເປສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ອຸປວານຕ຺ເຖຣອປທານວຓ຺ຓນາ ສມຕ຺ຕາ.

໓. ຕິສຣຓຄມນິຍຕ຺ເຖຣອປທານວຓ຺ຓນາ

ນຄເຣ ພນ຺ຘຸມຕິຍາຕິອາທິກໍ ອາຍສ຺ມໂຕ ຕິສຣຓຄມນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ພນ຺ຘຸມຕີນຄເຣ ກຸລເຄເຫ ນິພ຺ພຕ຺ຕິຕ຺ວາ ອນ຺ຘມາຕາປິຕໂຣ ອຸປຏ຺ຐາສິ. ໂສ ເອກທິວສໍ ຈິນ຺ເຕສິ – ‘‘ອຫໍ ມາຕາປິຕໂຣ ອຸປຏ຺ຐຫນ຺ໂຕ ປພ຺ພຊິຕຸໍ ນ ລຠາມິ, ຍໍນູນາຫໍ ຕີຓິ ສຣຓານິ ຄຓ຺ຫິສ຺ສາມິ, ເອວໍ ທຸຄ຺ຄຕິໂຕ ໂມເຈສ຺ສາມີ’’ຕິ ນິສຠໍ ນາມ ວິປສ຺ສິສ຺ສ ຠຄວໂຕ ອຄ຺ຄສາວກໍ ອຸປສງ຺ກມິຕ຺ວາ ຕີຓິ ສຣຓານິ ຄຓ຺ຫິ. ໂສ ຕານິ ວສ຺ສສຕສຫສ຺ສານິ ຣກ຺ຂິຕ຺ວາ ເຕເນວ ກມ຺ເມນ ຕາວຕິໍສຠວເນ ນິພ຺ພຕ຺ໂຕ, ຕໂຕ ປຣໍ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິນຄເຣ ມຫາສາລກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຕວສ຺ສິໂກວ ທາຣເກຫິ ປຣິວຸໂຕ ເອກໍ ສງ຺ຆາຣາມໍ ອຄມາສິ. ຕຕ຺ຖ ເອໂກ ຂີຓາສວຕ຺ເຖໂຣ ຕສ຺ສ ຘມ຺ມໍ ເທເສຕ຺ວາ ສຣຓານິ ອທາສິ. ໂສ ຕານິ ຄເຫຕ຺ວາ ປຸພ຺ເພ ອຕ຺ຕໂນ ຣກ຺ຂິຕານິ ສຣຓານິ ສຣິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ຕໍ ອຣຫຕ຺ຕປ຺ປຕ຺ຕໍ ຠຄວາ ອຸປສມ຺ປາເທສິ.

໑໐໖. ໂສ ອຣຫຕ຺ຕປ຺ປຕ຺ໂຕ ອຸປສມ຺ປນ຺ໂນ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ນຄເຣ ພນ຺ຘຸມຕິຍາຕິອາທິມາຫ. ຕຕ຺ຖ ມາຕຸ ອຸປຏ຺ຐາໂກ ອຫຸນ຺ຕິ ອຫໍ ມາຕາປິຕູນໍ ອຸປຏ຺ຐາໂກ ຠຣໂກ ພນ຺ຘຸມຕີນຄເຣ ອໂຫສິນ຺ຕິ ສມ຺ພນ຺ໂຘ.

໑໐໘. ຕມນ຺ຘກາຣປິຫິຕາຕິ ໂມຫນ຺ຘກາເຣນ ປິຫິຕາ ຉາທິຕາ. ຕິວິຘຄ຺ຄີຫິ ຑຍ຺ຫເຣຕິ ຣາຄຄ຺ຄິໂທສຄ຺ຄິໂມຫຄ຺ຄິສງ຺ຂາເຕຫິ ຕີຫິ ອຄ຺ຄີຫິ ຑຍ຺ຫເຣ ຑຍ຺ຫນ຺ຕິ ສພ຺ເພ ສຕ຺ຕາຕິ ສມ຺ພນ຺ໂຘ.

໑໑໔. ອຏ຺ຐ ເຫຕູ ລຠາມຫນ຺ຕິ ອຏ຺ຐ ກາຣຓານິ ສຸຂສ຺ສ ປຈ຺ຈຍຠູຕານິ ກາຣຓານິ ລຠາມິ ອຫນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ຕິສຣຓຄມນິຍຕ຺ເຖຣອປທານວຓ຺ຓນາ ສມຕ຺ຕາ.

໔. ປຎ຺ຈສີລສມາທານິຍຕ຺ເຖຣອປທານວຓ຺ຓນາ

ນຄເຣ ຈນ຺ທວຕິຍາຕິອາທິກໍ ອາຍສ຺ມໂຕ ປຎ຺ຈສີລສມາທານິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອໂນມທສ຺ສິສ຺ສ ຠຄວໂຕ ກາເລ ເອກສ຺ມິໍ ກຸເລ ນິພ຺ພຕ຺ໂຕ ປຸຣິມຠເວ ກຕາກຸສລກມ຺ມານຸຣູເປນ ທລິທ຺ໂທ ຫຸຕ຺ວາ ອປ຺ປນ຺ນປານໂຠຊໂນ ປເຣສໍ ຠຕິໍ ກຕ຺ວາ ຊີວນ຺ໂຕ ສໍສາເຣ ອາທີນວໍ ຎຕ຺ວາ ປພ຺ພຊິຕຸກາໂມປິ ປພ຺ພຊ຺ຊໍ ອລຠມາໂນ ອໂນມທສ຺ສິສ຺ສ ຠຄວໂຕ ສາວກສ຺ສ ນິສຠຕ຺ເຖຣສ຺ສ ສນ຺ຕິເກ ປຎ຺ຈ ສິກ຺ຂາປທານິ ສມາທິຍິ. ທີຆາຍຸກກາເລ ອຸປ຺ປນ຺ນຕ຺ຕາ ວສ຺ສສຕສຫສ຺ສານິ ສີລໍ ປຣິປາເລສິ. ເຕນ ກມ຺ເມນ ໂສ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ມຫາໂຠຄກຸເລ ນິພ຺ພຕ຺ໂຕ. ມາຕາປິຕໂຣ ສີລໍ ສມາທິຍນ຺ເຕ ທິສ຺ວາ ອຕ຺ຕໂນ ສີລໍ ສຣິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ວາ ປພ຺ພຊິ.

໑໓໔. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ອຸທານວເສນ ປຸພ຺ພຈຣິຕາປທານໍ ປກາເສນ຺ໂຕ ນຄເຣ ຈນ຺ທວຕິຍາຕິອາທິມາຫ. ຠຕໂກ ອາສຫໍ ຕທາຕິ ຕທາ ມມ ປຸຎ຺ຎກຣຓກາເລ ອຫໍ ຠຕໂກ ຠຕິຍາ ກມ຺ມກາຣໂກ ອາສິໍ ອໂຫສິໍ. ປຣກມ຺ມາຍເນ ຍຸຕ຺ໂຕຕິ ຠຕິຍາ ປເຣສໍ ກມ຺ມກຣເຓ ອາຍຸຕ຺ໂຕ ໂຍຊິໂຕ ໂອກາສາຠາເວນ ສໍສາຣໂຕ ມຸຈ຺ຈນຕ຺ຖາຍ ອຫໍ ປພ຺ພຊ຺ຊໍ ນ ລຠາມິ.

໑໓໕. ມຫນ຺ຘກາຣປິຫິຕາຕິ ມຫນ຺ເຕຫິ ກິເລສນ຺ຘກາເຣຫິ ປິຫິຕາ ສໍວຸຕາ ຖກິຕາ. ຕິວິຘຄ຺ຄີຫິ ຑຍ຺ຫເຣຕິ ນຣກຄ຺ຄິເປຕຄ຺ຄິສໍສາຣຄ຺ຄິສງ຺ຂາເຕຫິ ຕີຫິ ອຄ຺ຄີຫິ ຑຍ຺ຫນ຺ຕິ. ອຫໍ ປນ ເກນ ອຸປາເຍນ ເກນ ກາຣເຓນ ວິສໍຍຸຕ຺ໂຕ ຠເວຍ຺ຍນ຺ຕິ ອຕ຺ໂຖ.

໑໓໖. ເທຍ຺ຍຘມ຺ໂມ ອນ຺ນປານາທິທາຕພ຺ພຍຸຕ຺ຕກໍ ວຕ຺ຖຸ ມຍ຺ຫໍ ນຕ຺ຖິ, ຕສ຺ສາຠາເວນ ອຫໍ ວຣາໂກ ທຸກ຺ຂິໂຕ ຠຕໂກ ຠຕິຍາ ຊີວນໂກ ຍໍນູນາຫໍ ປຎ຺ຈສີລໍ ຣກ຺ເຂຍ຺ຍໍ ປຣິປູຣຍນ຺ຕິ ປຎ຺ຈສີລໍ ສມາທິຍິຕ຺ວາ ປຣິປູເຣນ຺ໂຕ ຍໍນູນ ຣກ຺ເຂຍ຺ຍໍ ສາຘຸກໍ ຠທ຺ທກໍ ສຸນ຺ທຣໍ ກຕ຺ວາ ປຣິປາເລຍ຺ຍນ຺ຕິ ອຕ຺ໂຖ.

໑໔໘. ສ຺ວາຫໍ ຍສມນຸຠວິນ຺ຕິ ໂສ ອຫໍ ເທວມນຸສ຺ເສສຸ ມຫນ຺ຕໍ ຍສໍ ອນຸຠວິໍ ເຕສໍ ສີລານໍ ວາຫສາ ອານຸຠາເວນາຕິ ອຕ຺ໂຖ. ກປ຺ປໂກຏິມ຺ປິ ເຕສໍ ສີລານໍ ຜລໍ ກິຕ຺ເຕນ຺ໂຕ ເອກໂກຏ຺ຐາສເມວ ກິຕ຺ຕເຍ ປາກຏໍ ກເຣຍ຺ຍນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ປຎ຺ຈສີລສມາທານິຍຕ຺ເຖຣອປທານວຓ຺ຓນາ ສມຕ຺ຕາ.

໕. ອນ຺ນສໍສາວກຕ຺ເຖຣອປທານວຓ຺ຓນາ

ສຸວຓ຺ຓວຓ຺ຓໍ ສມ຺ພຸທ຺ຘນ຺ຕິອາທິກໍ ອາຍສ຺ມໂຕ ອນ຺ນສໍສາວກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ປິຓ຺ຑາຍ ຈຣນ຺ຕໍ ທ຺ວຕ຺ຕິໍສມຫາປຸຣິສລກ຺ຂຓພ຺ຍາມປ຺ປຠາມຓ຺ຑໂລປໂສຠິຕໍ ຠຄວນ຺ຕໍ ທິສ຺ວາ ປສນ຺ນມານໂສ ຠຄວນ຺ຕໍ ນິມນ຺ເຕຕ຺ວາ ເຄຫໍ ເນຕ຺ວາ ວຣອນ຺ນປາເນນ ສນ຺ຕປ຺ເປຕ຺ວາ ສມ຺ປວາເຣຕ຺ວາ ໂຠເຊສິ. ໂສ ເຕເນວ ຈິຕ຺ຕປ຺ປສາເທນ ຕໂຕ ຈຸໂຕ ເທວໂລເກ ນິພ຺ພຕ຺ຕິຕ຺ວາ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈວິຕ຺ວາ ມນຸສ຺ສໂລເກ ນິພ຺ພຕ຺ຕິຕ຺ວາ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ຕໂຕ ອປຣາປຣໍ ເທວມນຸສ຺ສສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸເລ ນິພ຺ພຕ຺ໂຕ ສາສເນ ປສີທິຕ຺ວາ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ໂສ ປຸພ຺ເພ ກຕປຸຎ຺ຎນາມວເສນ ອນ຺ນສໍສາວກຕ຺ເຖໂຣຕິ ປາກຏນາໂມ ອໂຫສິ.

໑໕໕-໖. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ‘‘ເອວໍ ມຍາ ອິມິນາ ປຸຎ຺ຎສມ຺ຠາຣານຸຠາເວນ ປຕ຺ຕໍ ອຣຫຕ຺ຕ’’ນ຺ຕິ ອຕ຺ຕໂນ ປຸພ຺ພຈຣິຕາປທານໍ ອຸທານວເສນ ປກາເສນ຺ໂຕ ສຸວຓ຺ຓວຓ຺ຓນ຺ຕິອາທິມາຫ. ຕຕ຺ຖ ສຸວຓ຺ຓສ຺ສ ວຓ຺ໂຓ ວິຍ ວຓ຺ໂຓ ຍສ຺ສ ຠຄວໂຕ ໂສຍໍ ສຸວຓ຺ຓວຓ຺ໂຓ, ຕໍ ສຸວຓ຺ຓວຓ຺ຓໍ ສມ຺ພຸທ຺ຘໍ ສິທ຺ຘຕ຺ຖນ຺ຕິ ອຕ຺ໂຖ. ຄຈ຺ຉນ຺ຕໍ ອນ຺ຕຣາປເຓຕິ ເວສ຺ສານໍ ອາປຓປນ຺ຕີນໍ ອນ຺ຕຣວີຖິຍໍ ຄຈ຺ຉມານໍ. ກຎ຺ຈນຄ຺ຆິຍສໍກາສນ຺ຕິ ສຸວຓ຺ຓໂຕຣຓສທິສໍ ພາຕ຺ຕິໍສວຣລກ຺ຂຓໍ ທ຺ວຕ຺ຕິໍສວຣລກ຺ຂເຓຫິ ສມ຺ປນ຺ນໍ ໂລກປຊ຺ໂຊຕໍ ສກລໂລກທີປຠູຕໍ ອປ຺ປເມຍ຺ຍໍ ປມາຓວິຣຫິຕໍ ອໂນປມໍ ອຸປມາວິຣຫິຕໍ ຊຸຕິນ຺ຘຣໍ ປຠາຘາຣໍ ນີລປີຕາທິຉພ຺ພຓ຺ຓພຸທ຺ຘຣໍສິໂຍ ຘາຣກໍ ສິທ຺ຘຕ຺ຖໍ ທິສ຺ວາ ປຣມໍ ອຸຕ຺ຕມໍ ປີຕິໍ ອລຕ຺ຖໍ ອລຠິນ຺ຕິ ສມ຺ພນ຺ໂຘ. ເສສໍ ສຸວິຎ຺ເຎຍ຺ຍເມວາຕິ.

ອນ຺ນສໍສາວກຕ຺ເຖຣອປທານວຓ຺ຓນາ ສມຕ຺ຕາ.

໖. ຘູປທາຍກຕ຺ເຖຣອປທານວຓ຺ຓນາ

ສິທ຺ຘຕ຺ຖສ຺ສ ຠຄວໂຕຕິອາທິກໍ ອາຍສ຺ມໂຕ ຘູປທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ສິທ຺ຘຕ຺ເຖ ຠຄວຕິ ຈິຕ຺ຕໍ ປສາເທຕ຺ວາ ຕສ຺ສ ຠຄວໂຕ ຄນ຺ຘກຸຏິຍໍ ຈນ຺ທນາຄຣຸກາຬານຸສາຣິອາທິນາ ກເຕຫິ ອເນເກຫິ ຘູເປຫິ ຘູປປູຊໍ ອກາສິ. ໂສ ເຕນ ປຸຎ຺ເຎນ ເທເວສຸ ຈ ມນຸສ຺ເສສຸ ຈ ອຸຠຍສມ຺ປຕ຺ຕິໂຍ ອນຸຠວນ຺ໂຕ ນິພ຺ພຕ຺ຕນິພ຺ພຕ຺ຕຠເວ ປູຊນີໂຍ ຫຸຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ປຸຎ຺ຎສມ຺ຠາຣານຸຠາເວນ ສາສເນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ວາ ກຕຘູປປູຊາປຸຎ຺ຎຕ຺ຕາ ນາເມນ ຘູປທາຍກຕ຺ເຖໂຣຕິ ສພ຺ພຕ຺ຖ ປາກໂຏ. ໂສ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ທສ຺ເສນ຺ໂຕ ສິທ຺ຘຕ຺ຖສ຺ສ ຠຄວໂຕຕິອາທິມາຫ. ສິທ຺ໂຘ ປຣິປຸຓ຺ໂຓ ສພ຺ພຎ຺ຎຸຕຎ຺ຎາຓາທິຄຸຓສງ຺ຂາໂຕ ອຕ຺ໂຖ ປໂຍຊນໍ ຍສ຺ສ ຠຄວໂຕ ໂສຍໍ ສິທ຺ຘຕ຺ໂຖ, ຕສ຺ສ ສິທ຺ຘຕ຺ຖສ຺ສ ຠຄວໂຕ ຠຄ຺ຍາທິຄຸຓວນ຺ຕສ຺ສ ໂລກເຊຏ຺ຐສ຺ສ ສກລໂລກຸຕ຺ຕມສ຺ສ ຕາທິໂນ ອິຏ຺ຐານິຏ຺ເຐສຸ ຕາທິສສ຺ສ ອຈລສຠາວສ຺ສາຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຘູປທາຍກຕ຺ເຖຣອປທານວຓ຺ຓນາ ສມຕ຺ຕາ.

໗. ປຸລິນປູຊກຕ຺ເຖຣອປທານວຓ຺ຓນາ

ວິປສ຺ສິສ຺ສ ຠຄວໂຕຕິອາທິກໍ ອາຍສ຺ມໂຕ ປຸລິນປູຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸເລ ນິພ຺ພຕ຺ໂຕ ສາສເນ ປສນ຺ນຈິຕ຺ໂຕ ເຈຕິຍງ຺ຄຓໂພຘິຍງ຺ຄເຓສຸ ປຸຣາຓວາລຸກໍ ອປເນຕ຺ວາ ນວໍ ມຸຕ຺ຕາທລສທິສປຓ຺ຑຣປຸລິນໍ ໂອກິຣິຕ຺ວາ ມາຬກໍ ອລງ຺ກຣິ. ເຕນ ກມ຺ເມນ ໂສ ເທວໂລເກ ນິພ຺ພຕ຺ໂຕ ຕຕ຺ຖ ທິພ຺ເພຫິ ຣຕເນຫິ ວິຊ຺ໂຊຕມາເນ ອເນກໂຍຊເນ ກນກວິມາເນ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈຸໂຕ ມນຸສ຺ສໂລເກ ສຕ຺ຕຣຕນສມ຺ປນ຺ໂນ ຈກ຺ກວຕ຺ຕີ ຣາຊາ ຫຸຕ຺ວາ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອປຣາປຣໍ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ສາສເນ ປສນ຺ໂນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ໂສ ອຕ຺ຕໂນ ກຕປຸຎ຺ຎນາມສທິເສນ ນາເມນ ປຸລິນປູຊກຕ຺ເຖໂຣຕິ ປາກໂຏ.

໑໖໕. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ທສ຺ເສນ຺ໂຕ ວິປສ຺ສິສ຺ສ ຠຄວໂຕຕິອາທິມາຫ. ຕຕ຺ຖ ວິວິຘໍ ປສ຺ສຕີຕິ ວິປສ຺ສີ, ວິວິຈ຺ຈ ປສ຺ສຕີຕິ ວາ ວິປສ຺ສີ, ວິວິເຘ ອຕ຺ຕຕ຺ຖປຣຕ຺ຖາທິເຠເທ ອຕ຺ເຖ ປສ຺ສຕີຕິ ວາ ວິປສ຺ສີ, ວິວິເຘ ໂວຫາຣປຣມຕ຺ຖາທິເຠເທ ປສ຺ສຕີຕິ ວາ ວິປສ຺ສີ, ຕສ຺ສ ວິປສ຺ສິສ຺ສ ໂພຘິຍາ ປາທປຸຕ຺ຕເມ ອຸຕ຺ຕເມ ໂພຘິຣຸກ຺ຂມຓ຺ຑລມາຬເກ ປຸຣາຓປຸລິນໍ ວາລຸກໍ ຉຑ຺ເຑຕ຺ວາ ສຸທ຺ຘໍ ປຓ຺ຑຣໍ ປຸລິນໍ ອາກິຣິໍ ສນ຺ຖຣິໍ. ເສສໍ ສຸວິຎ຺ເຎຍ຺ຍເມວາຕິ.

ປຸລິນປູຊກຕ຺ເຖຣອປທານວຓ຺ຓນາ ສມຕ຺ຕາ.

໘. ອຸຕ຺ຕິຍຕ຺ເຖຣອປທານວຓ຺ຓນາ

ຈນ຺ທຠາຄານທີຕີເຣຕິອາທິກໍ ອາຍສ຺ມໂຕ ອຸຕ຺ຕິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ຈນ຺ທຠາຄານທິຍໍ ສຸສຸມາໂຣ ຫຸຕ຺ວາ ນິພ຺ພຕ຺ໂຕ ນທີຕີຣໍ ອຸປຄຕໍ ຠຄວນ຺ຕໍ ທິສ຺ວາ ປສນ຺ນຈິຕ຺ໂຕ ປາຣໍ ເນຕຸກາໂມ ຕີຣສມີເປເຍວ ນິປຊ຺ຊິ. ຠຄວາ ຕສ຺ສ ອນຸກມ຺ປາຍ ປິຏ຺ຐິຍໍ ປາເທ ຐເປສິ. ໂສ ຕຸຏ຺ໂຐ ອຸທຄ຺ໂຄ ປີຕິເວເຄນ ມຫຸສ຺ສາໂຫ ຫຸຕ຺ວາ ໂສຕໍ ຉິນ຺ທນ຺ໂຕ ສີເຆນ ຊເວນ ຠຄວນ຺ຕໍ ປຣຕີຣໍ ເນສິ. ຠຄວາ ຕສ຺ສ ຈິຕ຺ຕປ຺ປສາທໍ ຎຕ຺ວາ ‘‘ອຍໍ ອິໂຕ ຈຸໂຕ ເທວໂລເກ ນິພ຺ພຕ຺ຕິສ຺ສຕິ, ຕໂຕ ປຏ຺ຐາຍ ສຸຄຕີສຸເຍວ ສໍສຣນ຺ໂຕ ອິໂຕ ຈຕຸນ຺ນວຸຕິກປ຺ເປ ອມຕໍ ປາປຸຓິສ຺ສຕີ’’ຕິ ພ຺ຍາກຣິຕ຺ວາ ປກ຺ກາມິ.

ໂສ ຕຖາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ອຎ຺ຎຕຣສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ອຸຕ຺ຕິໂຍຕິສ຺ສ ນາມໍ ອກໍສຸ. ໂສ ວຍປ຺ປຕ຺ໂຕ ‘‘ອມຕໍ ປຣິເຍສິສ຺ສາມີ’’ຕິ ປຣິພ຺ພາຊໂກ ຫຸຕ຺ວາ ເອກທິວສໍ ຠຄວນ຺ຕໍ ທິສ຺ວາ ອຸປສງ຺ກມິຕ຺ວາ ວນ຺ທິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ຫຸຕ຺ວາ ສາສເນ ປພ຺ພຊິຕ຺ວາ ສີລທິຏ຺ຐີນໍ ອວິໂສຘິຕຕ຺ຕາ ວິເສສໍ ນິພ຺ພຕ຺ເຕຕຸໍ ອສກ຺ໂກນ຺ໂຕ ອຎ຺ຎໍ ຠິກ຺ຂຸໍ ວິເສສໍ ນິພ຺ພຕ຺ເຕຕ຺ວາ ອຎ຺ຎໍ ພ຺ຍາກໂຣນ຺ຕໍ ທິສ຺ວາ ສຕ຺ຖາຣໍ ອຸປສງ຺ກມິຕ຺ວາ ສງ຺ເຂເປນ ໂອວາທໍ ຍາຈິ. ສຕ຺ຖາປິ ຕສ຺ສ, ‘‘ຕສ຺ມາຕິຫ ຕ຺ວໍ, ອຸຕ຺ຕິຍ, ອາທິເມວ ວິໂສເຘຫີ’’ຕິອາທິນາ (ສໍ. ນິ. ໕.໓໘໒) ສງ຺ເຂເປເນວ ໂອວາທໍ ອທາສິ. ໂສ ສຕ຺ຖຸ ໂອວາເທ ຐຕ຺ວາ ວິປສ຺ສນໍ ອາຣຠິ. ຕສ຺ສ ອາຣທ຺ຘວິປສ຺ສກສ຺ສ ອາພາໂຘ ອຸປ຺ປຊ຺ຊິ. ອຸປ຺ປນ຺ເນ ອາພາເຘ ຊາຕສໍເວໂຄ ວີຣິຍາຣມ຺ຠວຕ຺ຖຸໍ ຎຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ.

໑໖໙. ເອວໍ ໂສ ກຕສມ຺ຠາຣານຸຣູເປນ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຈນ຺ທຠາຄານທີຕີເຣຕິອາທິມາຫ. ຕຕ຺ຖ ຈນ຺ທຠາຄານທີຕີເຣຕິ ປຣິສຸທ຺ຘປຓ຺ຑຣປຸລິນຕເລຫິ ຈ ປຠາສມ຺ປນ຺ນປສນ຺ນມຘຸໂຣທກປຣິປຸຓ຺ຓຕາຍ ຈ ຈນ຺ທປ຺ປຠາກິຣຓສສ຺ສິຣີກາຠາ ນທມານາ ສທ຺ທໍ ກຸຣຸມານາ ຄຈ຺ຉຕີຕິ ຈນ຺ທຠາຄານທີ, ຕສ຺ສາ ຈນ຺ທຠາຄານທິຍາ ຕີເຣ ສຸສຸມາໂຣ ອໂຫສິນ຺ຕິ ສມ຺ພນ຺ໂຘ. ຕຕ຺ຖ ສຸສຸມາໂຣຕິ ຂຸທ຺ທກມຈ຺ຉຄຸມ຺ເພ ຂຓ຺ຑາຂຓ຺ຑິກໍ ກໂຣນ຺ໂຕ ມາເຣຕີຕິ ສຸສຸມາໂຣ, ຈຓ຺ຑມຈ຺ໂຉ ກຸມ຺ຠີໂລຕິ ອຕ຺ໂຖ. ສໂຠຊນປສຸໂຕຫນ຺ຕິ ອຫໍ ສໂຠຊເນ ສກໂຄຈເຣ ປສຸໂຕ ພ຺ຍາວໂຏ. ນທີຕິຕ຺ຖໍ ອຄຈ຺ຉຫນ຺ຕິ ຠຄວໂຕ ອາຄມນກາເລ ອຫໍ ນທີຕິຕ຺ຖໍ ອຄຈ຺ຉິໍ ປຕ຺ໂຕມ຺ຫິ.

໑໗໐. ສິທ຺ຘຕ຺ໂຖ ຕມ຺ຫິ ສມເຍຕິ ຕສ຺ມິໍ ມມ ຕິຕ຺ຖຄມນກາເລ ສິທ຺ຘຕ຺ໂຖ ຠຄວາ ອຄ຺ຄປຸຄ຺ຄໂລ ສພ຺ພສຕ຺ເຕສຸ ເຊຏ຺ໂຐ ເສຏ຺ໂຐ ສຍມ຺ຠູ ສຍເມວ ຠູໂຕ ຊາໂຕ ພຸທ຺ຘຠູໂຕ ໂສ ຠຄວາ ນທິໍ ຕຣິຕຸກາໂມ ນທີຕີຣໍ ອຸປາຄມິ.

໑໗໒. ເປຕ຺ຕິກໍ ວິສຍໍ ມຍ຺ຫນ຺ຕິ ມຍ຺ຫໍ ປິຕຸປິຕາມຫາທີຫິ ປຣມ຺ປຣານີຕໍ, ຍທິທໍ ສມ຺ປຕ຺ຕສມ຺ປຕ຺ຕມຫານຸຠາວານໍ ຕຣຓນ຺ຕິ ອຕ຺ໂຖ.

໑໗໓. ມມ ອຸຄ຺ຄຊ຺ຊນໍ ສຸຕ຺ວາຕິ ມຍ຺ຫໍ ອຸຄ຺ຄຊ຺ຊນໍ ອາຣາຘນໍ ສຸຕ຺ວາ ມຫາມຸນິ ຠຄວາ ອຠິຣຸຫີຕິ ສມ຺ພນ຺ໂຘ. ເສສໍ ອຸຕ຺ຕານຕ຺ຖເມວາຕິ.

ອຸຕ຺ຕິຍຕ຺ເຖຣອປທານວຓ຺ຓນາ ສມຕ຺ຕາ.

໙. ເອກຎ຺ຊລິກຕ຺ເຖຣອປທານວຓ຺ຓນາ

ສຸວຓ຺ຓວຓ຺ຓນ຺ຕິອາທິກໍ ອາຍສ຺ມໂຕ ເອກຎ຺ຊລິກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ໂນ ປິຓ຺ຑາຍ ຈຣນ຺ຕໍ ວິປສ຺ສິໍ ຠຄວນ຺ຕໍ ທິສ຺ວາ ປສນ຺ນມານໂສ ອຎ຺ຊລິໍ ປຄ຺ຄເຫຕ຺ວາ ອຏ຺ຐາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ປູຊນີໂຍ ຫຸຕ຺ວາ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ກຸເລ ນິພ຺ພຕ຺ຕິຕ຺ວາ ສາສເນ ປສີທິຕ຺ວາ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ເຕ ປຕິຏ຺ຐາສິ. ປຸພ຺ເພ ກຕປຸຎ຺ຎວເສນ ເອກຎ຺ຊລິກຕ຺ເຖໂຣຕິ ປາກໂຏ.

໑໘໐. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ຕໍ ຫຕ຺ຖຕເລ ອາມລກໍ ວິຍ ທິສ຺ວາ ອຸທານວເສນ ປຸພ຺ພຈຣິຕາປທານໍ ປກາເສນ຺ໂຕ ສຸວຓ຺ຓວຓ຺ຓນ຺ຕິອາທິມາຫ. ວິປສ຺ສິໍ ສຕ຺ຖວາຫຄ຺ຄນ຺ຕິ ວາຓິເຊ ກນ຺ຕາຣາ ວຫຕິ ຕາເຣຕີຕິ ສຕ຺ຖວາໂຫ. ວາຬກນ຺ຕາຣາ ໂຈຬກນ຺ຕາຣາ ທຸພ຺ຠິກ຺ຂກນ຺ຕາຣາ ນິຣຸທກກນ຺ຕາຣາ ຍກ຺ຂກນ຺ຕາຣາ ອປ຺ປຠກ຺ຂກນ຺ຕາຣາ ຈ ຕາເຣຕິ ອຸຕ຺ຕາເຣຕິ ປຕາເຣຕິ ນິຕ຺ຕາເຣຕິ ເຂມນ຺ຕຠູມິໍ ປາເປຕີຕິ ອຕ຺ໂຖ. ໂກ ໂສ? ວາຓິຊເຊຏ຺ຐໂກ. ສຕ຺ຖວາຫສທິສຕ຺ຕາ ອຍມ຺ປິ ຠຄວາ ສຕ຺ຖວາໂຫ. ຕຖາ ຫິ ໂສ ຕິວິຘໍ ໂພຘິໍ ປຕ຺ຖຍນ຺ເຕ ກຕປຸຎ຺ຎສມ຺ຠາເຣ ສຕ຺ເຕ ຊາຕິກນ຺ຕາຣາ ຊຣາກນ຺ຕາຣາ ພ຺ຍາຘິກນ຺ຕາຣາ ມຣຓກນ຺ຕາຣາ ໂສກປຣິເທວທຸກ຺ຂໂທມນສ຺ສຸປາຍາສກນ຺ຕາຣາ ຈ ສພ຺ພສ຺ມາ ສໍສາຣກນ຺ຕາຣາ ຈ ຕາເຣຕິ ອຸຕ຺ຕາເຣຕິ ປຕາເຣຕິ ນິຕ຺ຕາເຣຕິ ນິພ຺ພານຖລໍ ປາເປຕີຕິ ອຕ຺ໂຖ. ສຕ຺ຖວາໂຫ ຈ ໂສ ອຄ຺ໂຄ ເສຏ຺ໂຐ ປຘາໂນ ຈາຕິ ສຕ຺ຖວາຫຄ຺ໂຄ, ຕໍ ສຕ຺ຖວາຫຄ຺ຄໍ ວິປສ຺ສິໍ ສມ຺ພຸທ຺ຘນ຺ຕິ ສມ຺ພນ຺ໂຘ. ນຣວຣໍ ວິນາຍກນ຺ຕິ ນຣານໍ ອນ຺ຕເຣ ອສິຖິລປຣກ຺ກໂມຕິ ນຣວີໂຣ, ຕໍ. ວິເສເສນ ກຕປຸຎ຺ຎສມ຺ຠາເຣ ສຕ຺ເຕ ເນຕິ ນິພ຺ພານປຸຣໍ ປາເປຕີຕິ ວິນາຍໂກ, ຕໍ.

໑໘໑. ອທນ຺ຕທມນໍ ຕາທິນ຺ຕິ ຣາຄໂທສໂມຫາທິກິເລສສມ຺ປຍຸຕ຺ຕຕ຺ຕາ ກາຍວຈີມໂນທ຺ວາເຣຫິ ອທນ຺ເຕ ສຕ຺ເຕ ທເມຕີຕິ ອທນ຺ຕທມໂນ, ຕໍ. ອິຏ຺ຐານິຏ຺ເຐສຸ ອກມ຺ປິຍຕາທິຄຸຓຍຸຕ຺ໂຕຕິ ຕາທີ, ຕໍ. ມຫາວາທິໍ ມຫາມຕິນ຺ຕິ ສກສມຍປຣສມຍວາທີນໍ ອນ຺ຕເຣ ອຕ຺ຕນາ ສມຘິກປຸຄ຺ຄລວິຣຫິຕຕ຺ຕາ ມຫາວາທີ, ມຫຕີ ປຖວິສມານາ ເມຣຸສມານາ ຈ ມຕິ ຍສ຺ສ ໂສ ມຫາມຕິ, ຕໍ ມຫາວາທິໍ ມຫາມຕິໍ ສມ຺ພຸທ຺ຘນ຺ຕິ ອິມິນາ ຕຸລ຺ຍາຘິກຣຓໍ. ເສສໍ ສຸວິຎ຺ເຎຍ຺ຍເມວາຕິ.

ເອກຎ຺ຊລິກຕ຺ເຖຣອປທານວຓ຺ຓນາ ສມຕ຺ຕາ.

໑໐. ໂຂມທາຍກຕ຺ເຖຣອປທານວຓ຺ຓນາ

ນຄເຣ ພນ຺ຘຸມຕິຍາຕິອາທິກໍ ອາຍສ຺ມໂຕ ໂຂມທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຍປ຺ປຕ຺ໂຕ ສາສເນ ອຠິປ຺ປສນ຺ໂນ ຣຕນຕ຺ຕຍມາມໂກ ວິປສ຺ສິສ຺ສ ຠຄວໂຕ ສນ຺ຕິເກ ຘມ຺ມໍ ສຸຕ຺ວາ ປສນ຺ນມານໂສ ໂຂມທຸສ຺ເສນ ປູຊໍ ອກາສິ. ໂສ ຕເທວ ມູລໍ ກຕ຺ວາ ຍາວຊີວໍ ປຸຎ຺ຎານິ ກຕ຺ວາ ຕໂຕ ເທວໂລເກ ນິພ຺ພຕ຺ໂຕ. ຉສຸ ເທເວສຸ ອປຣາປຣໍ ທິພ຺ພສຸຂໍ ອນຸຠວິຕ຺ວາ ຕໂຕ ຈວິຕ຺ວາ ມນຸສ຺ສໂລເກ ຈກ຺ກວຕ຺ຕິອາທິອເນກວິຘມນຸສ຺ສສມ຺ປຕ຺ຕິໍ ອນຸຠວິຕ຺ວາ ປຣິປາກຄເຕ ປຸຎ຺ຎສມ຺ຠາເຣ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຍປ຺ປຕ຺ໂຕ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ກຕປຸຎ຺ຎນາເມນ ໂຂມທາຍກຕ຺ເຖໂຣຕິ ປາກໂຏ.

໑໘໔. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ທສ຺ເສນ຺ໂຕ ນຄເຣ ພນ຺ຘຸມຕິຍາຕິອາທິມາຫ. ຕຕ຺ຖ ພນ຺ຘຸ ວຸຈ຺ຈຕິ ຎາຕໂກ, ເຕ ພນ຺ຘູ ຍສ຺ມິໍ ນຄເຣ ອຎ຺ຎມຎ຺ຎໍ ສງ຺ຆຏິຕາ ວສນ຺ຕິ, ຕໍ ນຄຣໍ ‘‘ພນ຺ຘຸມຕີ’’ຕິ ວຸຈ຺ຈຕິ. ໂຣເປມິ ພີຊສມ຺ປທນ຺ຕິ ທານສີລາທິປຸຎ຺ຎພີຊສມ຺ປຕ຺ຕິໍ ໂຣເປມິ ປຏ຺ຐເປມີຕິ ອຕ຺ໂຖ.

ໂຂມທາຍກຕ຺ເຖຣອປທານວຓ຺ຓນາ ສມຕ຺ຕາ.

ຕຕິຍສ຺ສ ສຸຠູຕິວຄ຺ຄສ຺ສ ວຓ຺ຓນາ ສມຕ຺ຕາ.

ຈຕຸຠາຓວາຣວຓ຺ຓນາ ນິຏ຺ຐິຕາ.