໑໐. ສຸມງ຺ຄລຕ຺ເຖຣອປທານວຓ຺ຓນາ

ອາຫຸຕິໍ ຍິຏ຺ຐຸກາໂມຕິອາທິກໍ ອາຍສ຺ມໂຕ ສຸມງ຺ຄລຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປິຍທສ຺ສິສ຺ສ ຠຄວໂຕ ກາເລ ຣຸກ຺ຂເທວຕາ ຫຸຕ຺ວາ ນິພ຺ພຕ຺ຕິ. ໂສ ເອກທິວສໍ ສຕ຺ຖາຣໍ ນ຺ຫຕ຺ວາ ເອກຈີວຣໍ ຐິຕໍ ທິສ຺ວາ ໂສມນສ຺ສປ຺ປຕ຺ໂຕ ອປ຺ໂຜເຏສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍາ ອວິທູເຣ ອຎ຺ຎຕຣສ຺ມິໍ ຄາມເກ ຕາທິເສນ ກມ຺ມນິສ຺ສນ຺ເທນ ທລິທ຺ທກຸເລ ນິພ຺ພຕ຺ຕິ, ຕສ຺ສ ສຸມງ຺ຄໂລຕິ ນາມໍ ອໂຫສິ. ໂສ ວຍປ຺ປຕ຺ໂຕ ຂຸຊ຺ຊກາສິຕນງ຺ຄລກຸທ຺ທາລປຣິກ຺ຂາໂຣ ຫຸຕ຺ວາ ກສິຍາ ຊີວິກໍ ກປ຺ເປສິ. ໂສ ເອກທິວສໍ ຣຎ຺ຎາ ປເສນທິນາ ໂກສເລນ ຠຄວໂຕ ຠິກ຺ຂຸສງ຺ຆສ຺ສ ຈ ມຫາທາເນ ປວຕ຺ຕິຍມາເນ ທານູປກຣຓານິ ຄເຫຕ຺ວາ ອາຄຈ຺ຉນ຺ເຕຫິ ມນຸສ຺ເສຫິ ສທ຺ຘິໍ ທຘິຆຏໍ ຄເຫຕ຺ວາ ອາຄໂຕ ຠິກ຺ຂູນໍ ສກ຺ກາຣສມ຺ມານໍ ທິສ຺ວາ ‘‘ອິເມ ສມຓາ ສກ຺ຍປຸຕ຺ຕິຍາ ສຸຂຸມວຕ຺ຖນິວຕ຺ຖາ ສຸໂຠຊນານິ ຠຸຎ຺ຊິຕ຺ວາ ນິວາເຕສຸ ເສນາສເນສຸ ວິຫຣນ຺ຕິ, ຍໍນູນາຫມ຺ປິ ປພ຺ພເຊຍ຺ຍ’’ນ຺ຕິ ຈິນ຺ເຕຕ຺ວາ ອຎ຺ຎຕຣໍ ມຫາເຖຣໍ ອຸປສງ຺ກມິຕ຺ວາ ອຕ຺ຕໂນ ປພ຺ພຊາຘິປ຺ປາຍໍ ນິເວເທສິ. ໂສ ຕໍ ກຣຸຓາຍນ຺ໂຕ ປພ຺ພາເຊຕ຺ວາ ກມ຺ມຏ຺ຐານໍ ອາຈິກ຺ຂິ. ໂສ ອຣຎ຺ເຎ ວິຫຣນ຺ໂຕ ເອກກວິຫາເຣ ນິພ຺ພິນ຺ໂນ ອຸກ຺ກຓ຺ຐິໂຕ ຫຸຕ຺ວາ ວິພ຺ຠມິຕຸກາໂມ ຎາຕິຄາມໍ ຄຈ຺ຉນ຺ໂຕ ອນ຺ຕຣາມຄ຺ເຄ ກຈ຺ຉໍ ພນ຺ຘິຕ຺ວາ ເຂຕ຺ຕໍ ກສນ຺ເຕ ກິລິຏ຺ຐວຕ຺ຖນິວຕ຺ເຖ ສມນ຺ຕໂຕ ຣໂຊກິຓ຺ຓສຣີເຣ ວາຕາຕເປນ ສຸສ຺ສນ຺ເຕ ເຂຕ຺ຕໍ ກສ຺ສເກ ມນຸສ຺ເສ ທິສ຺ວາ ‘‘ມຫນ຺ຕໍ ວຕິເມ ສຕ຺ຕາ ຊີວິກນິມິຕ຺ຕໍ ທຸກ຺ຂໍ ປຈ຺ຈນຸຠວນ຺ຕີ’’ຕິ ສໍເວຄໍ ປຏິລຠິ. ຎາຓສ຺ສ ປຣິປາກຄຕຕ຺ຕາ ຈສ຺ສ ຍຖາຄຫິຕໍ ກມ຺ມຏ຺ຐານໍ ອຸປຏ຺ຐາສິ. ໂສ ອຎ຺ຎຕຣໍ ຣຸກ຺ຂມູລໍ ອຸປຄນ຺ຕ຺ວາ ວິເວກໍ ລຠິຕ຺ວາ ໂຍນິໂສມນສິກໂຣນ຺ໂຕ ວິປສ຺ສນໍ ວຑ຺ເຒຕ຺ວາ ມຄ຺ຄປຏິປາຏິຍາ ອຣຫຕ຺ຕໍ ປາປຸຓິ.

໑໒໔. ເອວໍ ໂສ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ອາຫຸຕິໍ ຍິຏ຺ຐຸກາໂມຫນ຺ຕິອາທິມາຫ. ຕຕ຺ຖ ອາຫຸຕິນ຺ຕິ ອນ຺ນປານາທິອເນກວິຘໍ ປູຊາສກ຺ກາຣູປກຣຓໍ. ຍິຏ຺ຐຸກາໂມຕິ ຍຊິຕຸກາໂມ, ທານໍ ທາຕຸກາໂມ ອຫໍ. ປຏິຍາເທຕ຺ວານ ໂຠຊນນ຺ຕິ ອາຫາຣໍ ປຏິຍາເທຕ຺ວາ ນິປ຺ຜາເທຕ຺ວາ. ພ຺ຣາຫ຺ມເຓ ປຏິມາເນນ຺ໂຕຕິ ປຏິຄ຺ຄາຫເກ ສຸທ຺ຘປພ຺ພຊິເຕ ປຣິເຍສນ຺ໂຕ. ວິສາເລ ມາຬເກ ຐິໂຕຕິ ປຣິສຸທ຺ຘປຓ຺ຑຣປຸລິນຕລາຠິຣາເມ ວິປຸເລ ມາຬເກ ຐິໂຕ.

໑໒໕-໗. ອຖທ຺ທສາສິໍ ສມ຺ພຸທ຺ຘນ຺ຕິອາທີສຸ ມຫາຍສໍ ມຫາປຣິວາຣໍ ສພ຺ພໂລກໍ ສກລສຕ຺ຕໂລກໍ ວິເນຕານໍ ວິເສເສນ ເນຕາຣໍ ນິພ຺ພານສມ຺ປາປກໍ ສຍມ຺ຠຸໍ ສຍເມວ ຠູຕໍ ອນາຈຣິຍກໍ ອຄ຺ຄປຸຄ຺ຄລໍ ເສຏ຺ຐປຸຄ຺ຄລໍ ຠຄວນ຺ຕໍ ຠຄ຺ຍວນ຺ຕາທິຄຸຓຍຸຕ຺ຕໍ ຊຸຕິມນ຺ຕໍ ນີລປີຕາທິປຠາສມ຺ປນ຺ນໍ ສາວເກຫິ ປຸຣກ຺ຂຕໍ ປຣິວາຣິຕໍ ອາທິຈ຺ຈມິວ ສູຣິຍມິວ ໂຣຈນ຺ຕໍ ໂສຠມານໍ ຣຖິຍໍ ວີຖິຍໍ ປຏິປນ຺ນກໍ ຄຈ຺ຉນ຺ຕໍ ປິຍທສ຺ສິໍ ນາມ ສມ຺ພຸທ຺ຘໍ ອທ຺ທສິນ຺ຕິ ສມ຺ພນ຺ໂຘ. ອຎ຺ຊລິໍ ປຄ຺ຄເຫຕ຺ວານາຕິ ພນ຺ຘຎ຺ຊລິປຸຏໍ ສິຣສິ ກຕ຺ວາ ສກໍ ຈິຕ຺ຕໍ ອຕ຺ຕໂນ ຈິຕ຺ຕໍ ປສາທຍິໍ ອິຕ຺ຖມ຺ຠູຕສ຺ສ ຠຄວໂຕ ຄຸເຓ ປສາເທສິໍ ປສນ຺ນມກາສິນ຺ຕິ ອຕ຺ໂຖ. ມນສາວ ນິມນ຺ເຕສິນ຺ຕິ ຈິຕ຺ເຕນ ປວາເຣສິໍ. ອາຄຈ຺ຉຕຸ ມຫາມຸນີຕິ ມຫິໂຕ ປູຊາຣໂຫ ມຸນິ ຠຄວາ ມມ ນິເວສນໍ ອາຄຈ຺ຉຕຸ.

໑໒໘. ມມ ສງ຺ກປ຺ປມຎ຺ຎາຍາຕິ ມຍ຺ຫໍ ຈິຕ຺ຕສງ຺ກປ຺ປໍ ຎຕ຺ວາ ໂລເກ ສຕ຺ຕໂລເກ ອນຸຕ຺ຕໂຣ ອຸຕ຺ຕຣວິຣຫິໂຕ ສຕ຺ຖາ ຂີຓາສວສຫສ຺ເສຫິ ອຣຫນ຺ຕສຫສ຺ເສຫິ ປຣິວຸໂຕ ມມ ທ຺ວາຣໍ ມຍ຺ຫໍ ເຄຫທ຺ວາຣໍ ອຸປາຄມິ ສມ຺ປາປຸຓິ.

໑໒໙. ຕສ຺ສ ສມ຺ປຕ຺ຕສ຺ສ ສຕ຺ຖຸໂນ ເອວໍ ນມກ຺ກາຣມກາສິໍ. ປຸຣິສາຊຎ຺ຎ ປຸຣິສານໍ ອາຊຎ຺ຎ, ເສຏ຺ຐ, ມມ ນມກ຺ກາໂຣ ເຕ ຕຸຍ຺ຫໍ ອຕ຺ຖຸ ຠວຕຸ. ປຸຣິສຸຕ຺ຕມ ປຸຣິສານໍ ອຸຕ຺ຕມ ອຘິກຄຸຓວິສິຏ຺ຐ ເຕ ຕຸຍ຺ຫໍ ມມ ນມກ຺ກາໂຣ ອຕ຺ຖຸ. ປາສາທໍ ປສາທຊນກໍ ມມ ນິເວສນໍ ອຠິຣຸຫິຕ຺ວາ ສີຫາສເນ ອຸຕ຺ຕມາສເນ ນິສີທຕນ຺ຕິ ອາຍາຈິນ຺ຕິ ອຕ຺ໂຖ.

໑໓໐. ທນ຺ໂຕ ທນ຺ຕປຣິວາໂຣຕິ ສຍໍ ທ຺ວາຣຕ຺ຕເຍນ ທນ຺ໂຕ ຕຖາ ທນ຺ຕາຫິ ຠິກ຺ຂຸຠິກ຺ຂຸນີອຸປາສກອຸປາສິກາສງ຺ຂາຕາຫິ ຈຕູຫິ ປຣິສາຫິ ປຣິວາຣິໂຕ. ຕິຓ຺ໂຓ ຕາຣຍຕໍ ວໂຣຕິ ສຍໍ ຕິຓ຺ໂຓ ສໍສາຣໂຕ ອຸຕ຺ຕິຓ຺ໂຓ ນິກ຺ຂນ຺ໂຕ ຕາຣຍຕໍ ຕາຣຍນ຺ຕານໍ ວິສິຏ຺ຐປຸຄ຺ຄລານໍ ວໂຣ ອຸຕ຺ຕໂມ ຠຄວາ ມມາຣາຘເນນ ປາສາທໍ ອຠິຣຸຫິຕ຺ວາ ປວຣາສເນ ອຸຕ຺ຕມາສເນ ນິສີທິ ນິສຊ຺ຊໍ ກປ຺ເປສິ.

໑໓໑. ຍໍ ເມ ອຕ຺ຖິ ສເກ ເຄເຫຕິ ອຕ຺ຕໂນ ເຄເຫ ຍໍ ອາມິສໍ ປຈ຺ຈຸປຏ຺ຐິຕໍ ສມ຺ປາທິຕໍ ຣາສິກຕໍ ອຕ຺ຖິ. ຕາຫໍ ພຸທ຺ຘສ຺ສ ປາທາສິນ຺ຕິ ພຸທ຺ຘສ຺ສ ພຸທ຺ຘປ຺ປມຸຂສ຺ສ ສງ຺ຆສ຺ສ ຕໍ ອາມິສໍ ປາທາສິໍ ປ-ກາເຣນ ອາທເຣນ ວາ ອທາສິນ຺ຕິ ອຕ຺ໂຖ. ປສນ຺ໂນ ເສຫິ ປາຓິຠີຕິ ອຕ຺ຕໂນ ທ຺ວີຫິ ຫຕ຺ເຖຫິ ປສ຺ສນ຺ນຈິຕ຺ໂຕ ຄເຫຕ຺ວາ ປາທາສິນ຺ຕິ ອຕ຺ໂຖ.

໑໓໒. ປສນ຺ນຈິຕ຺ໂຕ ປສາທິຕມນສງ຺ກປ຺ໂປ ສຸມໂນ ສຸນ຺ທຣມໂນ. ເວທຊາໂຕ ຊາຕເວໂທ ອຸປ຺ປນ຺ນໂສມນສ຺ໂສ ກຕຎ຺ຊລີ ສິຣສິ ຐປິຕອຎ຺ຊລິປຸໂຏ ພຸທ຺ຘເສຏ຺ຐໍ ນມສ຺ສາມິ ເສຏ຺ຐສ຺ສ ພຸທ຺ຘສ຺ສ ປຓາມໍ ກໂຣມີຕິ ອຕ຺ໂຖ. ອໂຫ ພຸທ຺ຘສ຺ສຸຬາຣຕາຕິ ປຏິວິທ຺ຘຈຕຸສຈ຺ຈສ຺ສ ສຕ຺ຖຸໂນ ອຸຬາຣຕາ ມຫນ຺ຕຠາໂວ ອໂຫ ອຈ຺ຉຣິຍນ຺ຕິ ອຕ຺ໂຖ.

໑໓໓. ອຏ຺ຐນ຺ນໍ ປຍິຣູປາສຕນ຺ຕິ ປຍິຣຸປາສນ຺ຕານໍ ຠຸຎ຺ຊໍ ຠຸຎ຺ຊນ຺ຕານໍ ອຏ຺ຐນ຺ນໍ ອຣິຍປຸຄ຺ຄລານໍ ອນ຺ຕເຣ ຂີຓາສວາ ອຣຫນ຺ໂຕວ ພຫູຕິ ອຕ຺ໂຖ. ຕຸຍ຺ເຫເວໂສ ອານຸຠາໂວຕິ ເອໂສ ອາກາສຈຣຓອຸມ຺ມຸຊ຺ຊນນິມຸຊ຺ຊນາທິອານຸຠາໂວ ຕຸຍ຺ເຫວ ຕຸຍ຺ຫໍ ເອວ ອານຸຠາໂວ, ນາຎ຺ເຎສໍ. ສຣຓໍ ຕໍ ອຸເປມຫນ຺ຕິ ຕໍ ອິຕ຺ຖມ຺ຠູຕໍ ຕຸວໍ ສຣຓໍ ຕາຓໍ ເລຓໍ ປຣາຍນນ຺ຕິ ອຸເປມິ ຄຈ຺ຉາມິ ຊານາມິ ວາຕິ ອຕ຺ໂຖ.

໑໓໔. ໂລກເຊຏ຺ໂຐ ນຣາສໂຠ ປິຍທສ຺ສີ ຠຄວາ ຠິກ຺ຂຸສງ຺ຆມຊ຺ເຌ ນິສີທິຕ຺ວາ ອິມາ ພ຺ຍາກຣຓຄາຖາ ອຠາສຖ ກເຖສີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສຸມງ຺ຄລຕ຺ເຖຣອປທານວຓ຺ຓນາ ສມຕ຺ຕາ.

ທຸຕິຍສ຺ສ ສີຫາສນວຄ຺ຄສ຺ສ ວຓ຺ຓນາ ສມຕ຺ຕາ.