໙. ວຏໍສກິຍຕ຺ເຖຣອປທານວຓ຺ຓນາ

ສຸເມໂຘ ນາມ ນາເມນາຕິອາທິກໍ ອາຍສ຺ມໂຕ ວຏໍສກິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມມຸນິນ຺ເທສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖ ອາທີນວໍ ທິສ຺ວາ ເຄຫໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ມຫາວເນ ວິຫາສິ. ຕສ຺ມິໍ ສມເຍ ສຸເມໂຘ ຠຄວາ ວິເວກກາມຕາຍ ຕໍ ວນໍ ສມ຺ປາປຸຓິ. ອຖ ໂສ ຕາປໂສ ຠຄວນ຺ຕໍ ທິສ຺ວາ ປສນ຺ນມານໂສ ວິກສິຕໍ ສຬລປຸປ຺ຜໍ ຄເຫຕ຺ວາ ວຏໍສກາກາເຣນ ຄນ຺ເຖຕ຺ວາ ຠຄວໂຕ ປາທມູເລ ຐເປຕ຺ວາ ປູເຊສິ. ຠຄວາ ຕສ຺ສ ຈິຕ຺ຕປ຺ປສາທຕ຺ຖາຍ ອນຸໂມທນມກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ກຸເລ ຊາໂຕ ວຸທ຺ຘິມນ຺ວາຍ ສທ຺ໂຘ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໓. ໂສ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸເມໂຘ ນາມ ນາເມນາຕິອາທິ ວຸຕ຺ຕໍ. ວິເວກມນຸພ຺ຣູຫນ຺ໂຕຕິ ຊນາກິຓ຺ຓຕໍ ປຫາຍ ຊນວິເວກໍ ຈິຕ຺ຕວິເວກຎ຺ຈ ອນຸພ຺ຣູຫນ຺ໂຕ ວຑ຺ເຒນ຺ໂຕ ພຫຸລີກໂຣນ຺ໂຕ ມຫາວນໍ ອຊ຺ໂຌຄາຫິ ປາວິສີຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ວຏໍສກິຍຕ຺ເຖຣອປທານວຓ຺ຓນາ ສມຕ຺ຕາ.