໑໕. ຉຕ຺ຕວຄ຺ໂຄ

໑. ອຕິຉຕ຺ຕິຍຕ຺ເຖຣອປທານວຓ຺ຓນາ

ປຣິນິພ຺ພຸເຕ ຠຄວຕີຕິອາທິກໍ ອາຍສ຺ມໂຕ ອຕິຉຕ຺ຕິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ຘຣມານສ຺ສ ຠຄວໂຕ ອທິຏ຺ຐຕ຺ຕາ ປຣິນິພ຺ພຸຕກາເລ ‘‘ອໂຫ ມມ ປຣິຫານີ’’ຕິ ຈິນ຺ເຕຕ຺ວາ ‘‘ມມ ຊາຕິໍ ສຜລໍ ກຣິສ຺ສາມີ’’ຕິ ກຕສນ຺ນິຏ຺ຐາໂນ ຉຕ຺ຕາຘິຉຕ຺ຕໍ ກາເຣຕ຺ວາ ຕສ຺ສ ຠຄວໂຕ ສຣີຣຘາຕຸໍ ນິຫິຕຘາຕຸຄພ຺ຠໍ ປູເຊສິ. ອປຣຠາເຄ ປຸປ຺ຜຈ຺ຉຕ຺ຕໍ ກາເຣຕ຺ວາ ຕເມວ ຘາຕຸຄພ຺ຠໍ ປູເຊສິ. ໂສ ເຕເນວ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ຄຫປຕິກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສນ຺ໂນ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ວາຍມນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ.

໑. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປຣິນິພ຺ພຸເຕ ຠຄວຕີຕິອາທິມາຫ. ຕຕ຺ຖ ຉຕ຺ຕາຕິຉຕ຺ຕນ຺ຕິ ຉາທິຍຕິ ສໍວຣິຍຕິ ອາຕປາທິນ຺ຕິ ຉຕ຺ຕໍ, ຉຕ຺ຕສ຺ສ ອຕິຉຕ຺ຕໍ ຉຕ຺ຕສ຺ສ ອຸປຣິ ກຕຉຕ຺ຕໍ ຉຕ຺ຕາຕິຉຕ຺ຕໍ, ຉຕ຺ຕສ຺ສ ອຸປຣູປຣິ ຉຕ຺ຕນ຺ຕິ ອຕ຺ໂຖ. ຖູປມ຺ຫິ ອຠິໂຣປຍິນ຺ຕິ ຖູປິຍຕິ ຣາສິກຣີຍຕີຕິ ຖູໂປ, ອຖ ວາ ຖູປຕິ ຖິຣຠາເວນ ວຸທ຺ຘິໍ ວິຣູຬ຺ຫິໍ ເວປຸລ຺ລໍ ອາປຊ຺ຊມາໂນ ປຕິຏ຺ຐາຕີຕິ ຖູໂປ, ຕສ຺ມິໍ ຖູປມ຺ຫິ ມຍາ ກາຣິຕໍ ຉຕ຺ຕໍ ອຸປຣູປຣິ ຐປນວເສນ ອຠິ ວິເສເສນ ອາໂຣປຍິໍ ປູເຊສິນ຺ຕິ ອຕ຺ໂຖ.

໒. ປຸປ຺ຜຈ຺ຉທນໍ ກຕ຺ວານາຕິ ວິກສິເຕຫິ ສຸຄນ຺ເຘຫິ ອເນເກຫິ ຜຸປ຺ເຜຫິ ຉທນໍ ຉຕ຺ຕຸປຣິ ວິຕານໍ ກຕ຺ວາ ປູເຊສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ອຕິຉຕ຺ຕິຍຕ຺ເຖຣອປທານວຓ຺ຓນາ ສມຕ຺ຕາ.

໒. ຖມ຺ຠາໂຣປກຕ຺ເຖຣອປທານວຓ຺ຓນາ

ນິພ຺ພຸເຕ ໂລກນາຖມ຺ຫີຕິອາທິກໍ ອາຍສ຺ມໂຕ ຖມ຺ຠາໂຣປກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຘມ຺ມທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ສທ຺ໂຘ ປສນ຺ໂນ ປຣິນິພ຺ພຸເຕ ຠຄວຕິ ຕສ຺ສ ຠຄວໂຕ ຘາຕຸຄພ຺ຠມາຬເກ ຖມ຺ຠໍ ນິຂນິຕ຺ວາ ຘຊໍ ອາໂຣເປສິ. ພຫູນິ ຊາຕິສຸມນປຸປ຺ຜານິ ຄນ຺ຖິຕ຺ວາ ນິສ຺ເສຓິຍາ ອາໂຣຫິຕ຺ວາ ປູເຊສິ.

໕. ໂສ ຍາວຕາຍຸກໍ ຐຕ຺ວາ ກາລໍ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ສພ຺ພຕ຺ຖ ປູຊິໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ທຫຣກາລໂຕ ປຠຸຕິ ປູຊນີໂຍ ສາສເນ ພທ຺ຘສທ຺ໂຘ ປພ຺ພຊິຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ໂຕ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ໂລກນາຖມ຺ຫີຕິອາທິມາຫ. ຕຕ຺ຖ ນິພ຺ພຸເຕ ໂລກນາຖມ຺ຫີຕິ ສກລໂລກສ຺ສ ນາເຖ ປຘານຠູເຕ ປຏິສຣເຓ ຈ ສຕ຺ຖຣິ ຂນ຺ຘປຣິນິພ຺ພາເນນ ນິພ຺ພຸເຕ ນິພ຺ພຸຕທີປສິຂາ ວິຍ ອທສ຺ສນໍ ຄເຕຕິ ອຕ຺ໂຖ. ຘມ຺ມທສ຺ສີນຣາສເຠຕິ ຈຕຸສຈ຺ຈຘມ຺ມໍ ປສ຺ສຕີຕິ ຘມ຺ມທສ຺ສີ, ອຖ ວາ ສຕິປຏ຺ຐານາທິເກ ສຕ຺ຕຕິໍສໂພຘິປກ຺ຂິຍຘມ຺ເມ ທສ຺ສນສີໂລ ປສ຺ສນສີໂລຕິ ຘມ຺ມທສ຺ສີ, ນຣານໍ ອາສໂຠ ປວໂຣ ອຸຕ຺ຕໂມຕິ ນຣາສໂຠ, ຘມ຺ມທສ຺ສີ ຈ ໂສ ນຣາສໂຠ ເຈຕິ ຘມ຺ມທສ຺ສີນຣາສໂຠ, ຕສ຺ມິໍ ຘມ຺ມທສ຺ສີນຣາສເຠ. ອາໂຣເປສິໍ ຘຊໍ ຖມ຺ຠນ຺ຕິ ເຈຕິຍມາຬເກ ຖມ຺ຠໍ ນິຂນິຕ຺ວາ ຕຕ຺ຖ ຘຊໍ ອາໂຣເປສິໍ ພນ຺ຘິຕ຺ວາ ຐເປສິນ຺ຕິ ອຕ຺ໂຖ.

໖. ນິສ຺ເສຓິໍ ມາປຍິຕ຺ວານາຕິ ນິສ຺ສາຍ ຕໍ ອິຓນ຺ຕິ ຄຈ຺ຉນ຺ຕິ ອາໂຣຫນ຺ຕິ ອຸປຣີຕິ ນິສ຺ເສຓິ, ຕໍ ນິສ຺ເສຓິໍ ມາປຍິຕ຺ວາ ກາເຣຕ຺ວາ ພນ຺ຘິຕ຺ວາ ຖູປເສຏ຺ຐໍ ສມາຣຸຫິນ຺ຕິ ສມ຺ພນ຺ໂຘ. ຊາຕິປຸປ຺ຜໍ ຄເຫຕ຺ວານາຕິ ຊາຍມານເມວ ຊນານໍ ສຸນ຺ທຣໍ ມນໍ ກໂຣຕີຕິ ຊາຕິສຸມນໍ, ຊາຕິສຸມນເມວ ປຸປ຺ຜໍ ‘‘ຊາຕິສຸມນປຸປ຺ຜ’’ນ຺ຕິ ວຕ຺ຕພ຺ເພ ຄາຖາພນ຺ຘສຸຂຕ຺ຖໍ ສຸມນສທ຺ທສ຺ສ ໂລປໍ ກຕ຺ວາ ‘‘ຊາຕິປຸປ຺ຜ’’ນ຺ຕິ ວຸຕ຺ຕໍ, ຕໍ ຊາຕິສຸມນປຸປ຺ຜໍ ຄເຫຕ຺ວາ ຄນ຺ຖິຕ຺ວາ ຖູປມ຺ຫິ ອາໂຣປຍິໍ, ອາໂຣເປຕ຺ວາ ປູເຊສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ຖມ຺ຠາໂຣປກຕ຺ເຖຣອປທານວຓ຺ຓນາ ສມຕ຺ຕາ.

໓. ເວທິກາຣກຕ຺ເຖຣອປທານວຓ຺ຓນາ

ນິພ຺ພຸເຕ ໂລກນາຖມ຺ຫີຕິອາທິກໍ ອາຍສ຺ມໂຕ ເວທິກາຣກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປິຍທສ຺ສິສ຺ສ ຠຄວໂຕ ກາເລ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ຆຣາວາສໍ ສຓ຺ຐເປຕ຺ວາ ນິພ຺ພຸເຕ ສຕ຺ຖຣິ ປສນ຺ໂນ ຕສ຺ສ ເຈຕິເຍ ວລຍໍ ກາເຣສິ, ສຕ຺ຕຫິ ຣຕເນຫິ ປຣິປູເຣຕ຺ວາ ມຫາປູຊໍ ກາເຣສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອເນເກສຸ ຊາຕິສຕສຫສ຺ເສສຸ ປູຊນີໂຍ ມຫທ຺ຘໂນ ມຫາໂຠໂຄ ອຸຠຍສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຠວສມ຺ປນ຺ໂນ ປພ຺ພຊິຕ຺ວາ ວາຍມນ຺ໂຕ ນຈິຣສ຺ເສວ ອຣຫາ ອໂຫສິ.

໑໐. ໂສ ເອກທິວສໍ ອຕ຺ຕໂນ ປຸພ຺ເພ ກຕກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ໂລກນາຖມ຺ຫີຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ປິຍທສ຺ສີນຣຸຕ຺ຕເມຕິ ປິຍໍ ໂສມນສ຺ສາກາຣໍ ທສ຺ສນໍ ຍສ຺ສ ໂສ ປິຍທສ຺ສີ, ອາໂຣຫປຣິຓາຫທ຺ວຕ຺ຕິໍສມຫາປຸຣິສລກ຺ຂຓອສີຕານຸພ຺ຍຎ຺ຊນພ຺ຍາມປ຺ປຠາມຓ຺ຑເລຫິ ສາຘຸ ມຫາຊນປ຺ປສາທໍ ຊນຍນາກາຣທສ຺ສໂນຕິ ອຕ຺ໂຖ. ນຣານໍ ອຸຕ຺ຕໂມຕິ ນຣຸຕ຺ຕໂມ, ປິຍທສ຺ສີ ຈ ໂສ ນຣຸຕ຺ຕໂມ ເຈຕິ ປິຍທສ຺ສີນຣຸຕ຺ຕໂມ, ຕສ຺ມິໍ ປິຍທສ຺ສີນຣຸຕ຺ຕເມ ນິພ຺ພຸເຕ ຘາຕຸຄພ຺ຠມ຺ຫິ ມຸຕ຺ຕເວທິໍ ອຫໍ ອກາສິນ຺ຕິ ສມ຺ພນ຺ໂຘ. ປຸປ຺ຜາຘາຣຕ຺ຖາຍ ປຣິໂຍສາເນ ເວທິກາວລຍໍ ອກາສິນ຺ຕິ ອຕ຺ໂຖ.

໑໑. ມຓີຫິ ປຣິວາເຣຕ຺ວາຕິ ມຓຕິ ໂຊຕຕິ ປຠາສຕີຕິ ມຓິ, ອຖ ວາ ຊນານໍ ມນໍ ປູເຣນ຺ໂຕ ໂສມນສ຺ສໍ ກໂຣນ຺ໂຕ ອິໂຕ ຄໂຕ ປວຕ຺ໂຕຕິ ມຓິ, ຊາຕິຣງ຺ຄມຓິເວຬຸຣິຍມຓິອາທີຫິ ອເນເກຫິ ມຓີຫິ ກຕເວທິກາວລຍໍ ປຣິວາເຣຕ຺ວາ ອຸຕ຺ຕມໍ ມຫາປູຊໍ ອກາສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ເວທິກາຣກຕ຺ເຖຣອປທານວຓ຺ຓນາ ສມຕ຺ຕາ.

໔. ສປຣິວາຣິຍຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ສປຣິວາຣິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນກາສຸ ຊາຕີສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ມຫທ຺ຘໂນ ມຫາໂຠໂຄ ອໂຫສິ. ອຖ ປທຸມຸຕ຺ຕເຣ ຠຄວຕິ ປຣິນິພ຺ພຸເຕ ມຫາຊໂນ ຕສ຺ສ ຘາຕຸໍ ນິທຫິຕ຺ວາ ມຫນ຺ຕໍ ເຈຕິຍໍ ກາເຣຕ຺ວາ ປູເຊສິ. ຕສ຺ມິໍ ກາເລ ອຍໍ ອຸປາສໂກ ຕສ຺ສຸປຣິ ຈນ຺ທນສາເຣນ ເຈຕິຍຆຣໍ ກຣິຕ຺ວາ ມຫາປູຊໍ ອກາສິ. ໂສ ເຕເນວ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ກຸສລໍ ກຕ຺ວາ ສທ຺ຘາຍ ສາສເນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑໕-໘. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ນາມ ຊິໂນຕິອາທິມາຫ. ຕຕ຺ຖ ໂອມຕ຺ຕນ຺ຕິ ລາມກຠາວໍ ນີຈຠາວໍ ທຸກ຺ຂິຕຠາວໍ ວາ ນ ປສ຺ສາມິ ນ ຊານາມິ, ນ ທິຏ຺ຐປຸພ຺ໂພ ມຍາ ນີຈຠາໂວຕິ ອຕ຺ໂຖ. ເສສໍ ປາກຏເມວາຕິ.

ສປຣິວາຣິຍຕ຺ເຖຣອປທານວຓ຺ຓນາ ສມຕ຺ຕາ.

໕. ອຸມາປຸປ຺ຜິຍຕ຺ເຖຣອປທານວຓ຺ຓນາ

ນິພ຺ພຸເຕ ໂລກມຫິເຕຕິອາທິກໍ ອາຍສ຺ມໂຕ ອຸມາປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ສຓ຺ຐເປຕ຺ວາ ວສນ຺ໂຕ ນິພ຺ພຸຕສ຺ສ ຠຄວໂຕ ເຈຕິຍມເຫ ວຕ຺ຕມາເນ ອິນ຺ທນີລມຓິວຓ຺ຓໍ ອຸມາປຸປ຺ຜໍ ຄເຫຕ຺ວາ ປູເຊສິ. ໂສ ເຕນ ປຸຎ຺ເຎນ ສຸຄຕີສຸເຍວ ສໍສຣນ຺ໂຕ ທິພ຺ພມານຸສສມ຺ປຕ຺ຕິໂຍ ອນຸຠວິຕ຺ວາ ອຸປ຺ປນ຺ນຸປ຺ປນ຺ນຠເວ ພຫຸລໍ ນີລວຓ຺ໂຓ ຊາຕິສມ຺ປນ຺ໂນ ວິຠວສມ຺ປນ຺ໂນ ອໂຫສິ. ໂສ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສທ຺ຘາຊາໂຕ ປພ຺ພຊິໂຕ ນຈິຣສ຺ເສວ ອຣຫຕ຺ຕໍ ປາປຸຓິ.

໒໑. ໂສ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ໂລກມຫິເຕຕິອາທິ ວຸຕ຺ຕໍ. ຕຕ຺ຖ ໂລກມຫິເຕຕິ ໂລເກຫິ ມຫິໂຕ ປູຊິໂຕຕິ ໂລກມຫິໂຕ, ຕສ຺ມິໍ ໂລກມຫິເຕ ສິທ຺ຘຕ຺ຖມ຺ຫິ ຠຄວຕິ ປຣິນິພ຺ພຸເຕຕິ ສມ຺ພນ຺ໂຘ. ອາຫຸຕີນໍປຏິຄ຺ຄເຫຕິ ອາຫຸຕິໂນ ວຸຈ຺ຈນ຺ຕິ ປູຊາສກ຺ກາຣາ, ເຕສໍ ອາຫຸຕີນໍ ປຏິຄ຺ຄເຫຕຸໍ ອຣຫຕີຕິ ອາຫຸຕີນໍປຏິຄ຺ຄໂຫ, ອລຸຕ຺ຕກິຕນ຺ຕສມາໂສ, ຕສ຺ມິໍ ອາຫຸຕີນໍປຏິຄ຺ຄເຫ ຠຄວຕິ ປຣິນິພ຺ພຸເຕຕິ ອຕ຺ໂຖ.

໒໒. ອຸມາປຸປ຺ຜນ຺ຕິ ອຸທ຺ຘມຸທ຺ຘໍ ນີລປຠໍ ມຸຎ຺ຈມານໍ ປຸປ຺ຜຕິ ວິກສຕີຕິ ອຸມາປຸປ຺ຜໍ, ຕໍ ອຸມາປຸປ຺ຜໍ ຄເຫຕ຺ວາ ເຈຕິເຍ ປູຊໍ ອກາສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ອຸມາປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໖. ອນຸເລປທາຍກຕ຺ເຖຣອປທານວຓ຺ຓນາ

ອໂນມທສ຺ສີມຸນິໂນຕິອາທິກໍ ອາຍສ຺ມໂຕ ອນຸເລປທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອໂນມທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ມຫທ຺ຘໂນ ມຫາໂຠໂຄ ຕສ຺ສ ຠຄວໂຕ ໂພຘິຣຸກ຺ຂສ຺ສ ເວທິກາວລຍໍ ກາເຣຕ຺ວາ ສຸຘາກມ຺ມຎ຺ຈ ກາເຣຕ຺ວາ ວາລຸກສນ຺ຖຣຓໍ ທທ຺ທຬ຺ຫມານໍ ຣຊຕວິມານມິວ ກາເຣສິ. ໂສ ເຕນ ປຸຎ຺ເຎນ ສຸຂປ຺ປຕ຺ໂຕ ອຸປ຺ປນ຺ນຸປ຺ປນ຺ນຠເວ ຣຊຕວິມານຣຊຕເຄຫຣຊຕປາສາເທສຸ ສຸຂມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຣິ ປສນ຺ໂນ ປພ຺ພຊິຕ຺ວາ ວິປສ຺ສນມນຸຍຸຕ຺ໂຕ ນຈິຣສ຺ເສວ ອຣຫາ ອໂຫສິ.

໒໖. ໂສ ອປຣຠາເຄ ‘‘ກິໍ ນຸ ໂຂ ກຸສລໍ ກຕ຺ວາ ມຍາ ອຍໍ ວິເສໂສ ອຘິຄໂຕ’’ຕິ ປຸພ຺ເພນິວາສານຸສ຺ສຕິຎາເຓນ ປຏິປາຏິຍາ ອນຸສ຺ສຣິຕ຺ວາ ປຸພ຺ເພ ກຕກຸສລໍ ຊານິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອໂນມທສ຺ສີມຸນິໂນຕິອາທິມາຫ. ຕຕ຺ຖ ອໂນມໍ ອລາມກໍ ທສ຺ສນໍ ທສ຺ສນີຍໍ ສຣີຣໍ ຍສ຺ສ ໂສ ອໂນມທສ຺ສີ, ທ຺ວຕ຺ຕິໍສມຫາປຸຣິສລກ຺ຂຓອສີຕານຸພ຺ຍຎ຺ຊນພ຺ຍາມປ຺ປຠາສມຸຊ຺ຊລວິຣາຊິຕສຣີຣຕ຺ຕາ ສຸນ຺ທຣທສ຺ສໂນຕິ ອຕ຺ໂຖ. ສຸຘາຍ ປິຓ຺ຑໍ ທຕ຺ວານາຕິ ໂພຘິຆເຣ ເວທິກາວລຍໍ ກາເຣຕ຺ວາ ສກເລ ໂພຘິຆເຣ ສຸຘາເລປນໍ ກຕ຺ວາຕິ ອຕ຺ໂຖ. ປາຓິກມ຺ມໍ ອກາສຫນ຺ຕິ ສາຣກຏ຺ເຐນ ຜລກປາຓິໂຍ ກຕ຺ວາ ຕາຫິ ປາຓີຫິ ມຏ຺ຐກມ຺ມໍ ອກາສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ອນຸເລປທາຍກຕ຺ເຖຣອປທານວຓ຺ຓນາ ສມຕ຺ຕາ.

໗. ມຄ຺ຄທາຍກຕ຺ເຖຣອປທານວຓ຺ຓນາ

ອຸຕ຺ຕຣິຕ຺ວານ ນທິກນ຺ຕິອາທິກໍ ອາຍສ຺ມໂຕ ມຄ຺ຄທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ອເນເກສຸ ຠເວສຸ ນິພ຺ພານາຘິຄມຕ຺ຖາຍ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ໂລກສມ຺ມເຕ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ວສນ຺ໂຕ ເອກທິວສໍ ຠຄວນ຺ຕໍ ເອກໍ ນທິໍ ອຸຕ຺ຕຣິຕ຺ວາ ວນນ຺ຕຣໍ ຄຈ຺ຉນ຺ຕໍ ທິສ຺ວາ ປສນ຺ນມານໂສ ‘‘ອິທານິ ມຍາ ຠຄວໂຕ ມຄ຺ຄໍ ສມໍ ກາຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ກຸທາລຎ຺ຈ ປິຏກຎ຺ຈ ອາທາຍ ຠຄວໂຕ ຄມນມຄ຺ຄໍ ສມໍ ກຕ຺ວາ ວາລຸກໍ ໂອກິຣິຕ຺ວາ ຠຄວໂຕ ປາເທ ວນ຺ທິຕ຺ວາ, ‘‘ຠນ຺ເຕ, ອິມິນາ ມຄ຺ຄາລງ຺ກາຣກຣເຓນ ນິພ຺ພຕ຺ຕນິພ຺ພຕ຺ຕຏ຺ຐາເນ ປູຊນີໂຍ ຠເວຍ຺ຍໍ, ນິພ຺ພານຎ຺ຈ ປາປຸເຓຍ຺ຍ’’ນ຺ຕິ ປຕ຺ຖນໍ ອກາສິ. ຠຄວາ ‘‘ຍຖາຘິປ຺ປາຍໍ ສມິຊ຺ຌຕູ’’ຕິ ອນຸໂມທນໍ ວຕ຺ວາ ປກ຺ກາມິ.

໓໒-໓. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ປູຊິໂຕ ອໂຫສິ. ອິມສ຺ມິໍ ປນ ພຸທ຺ຘຸປ຺ປາເທ ປາກເຏ ເອກສ຺ມິໍ ກຸເລ ນິພ຺ພຕ຺ໂຕ ສຕ຺ຖຣິ ປສນ຺ໂນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ປຈ຺ຈກ຺ຂໂຕ ຎຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຸຕ຺ຕຣິຕ຺ວານ ນທິກນ຺ຕິອາທິມາຫ. ຕຕ຺ຖ ນທຕິ ສທ຺ທໍ ກໂຣຕິ ຄຈ຺ຉຕີຕິ ນທີ, ນທີເຍວ ນທິກາ, ຕໍ ນທິກໍ ອຸຕ຺ຕຣິຕ຺ວາ ອຕິກ຺ກມິຕ຺ວາຕິ ອຕ຺ໂຖ. ກຸທາລປິຏກມາທາຍາຕິ ກຸ ວຸຈ຺ຈຕິ ປຖວີ, ຕໍ ວິທາລເນ ປທາລເນ ຉິນ຺ທເນ ອລນ຺ຕິ ກຸທາລໍ, ປິຏກໍ ວຸຈ຺ຈຕິ ປໍສຸວາລິກາທິວາຫກໍ, ຕາລປຓ຺ຓເວຕ຺ຕລຕາທີຫິ ກຕຠາຊນໍ, ກຸທາລຎ຺ຈ ປິຏກຎ຺ຈ ກຸທາລປິຏກໍ, ຕໍ ອາທາຍ ຄເຫຕ຺ວາຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ມຄ຺ຄທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ຜລກທາຍກຕ຺ເຖຣອປທານວຓ຺ຓນາ

ຍານກາໂຣ ປຸເຣ ອາສິນ຺ຕິອາທິກໍ ອາຍສ຺ມໂຕ ຜລກທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ອຕ຺ຕຠາເວສຸ ກຕປຸຎ຺ຎສມ຺ຠາໂຣ ສິທ຺ຘຕ຺ຖສ຺ສ ຠຄວໂຕ ກາເລ ວຑ຺ຒກິກຸເລ ນິພ຺ພຕ຺ໂຕ ຣຕນຕ຺ຕເຍ ປສນ຺ໂນ ຈນ຺ທເນນ ອາລມ຺ພນຜລກໍ ກຕ຺ວາ ຠຄວໂຕ ອທາສິ. ຠຄວາ ຕສ຺ສານຸໂມທນໍ ອກາສິ.

໓໗. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ກາເລ ຈິຕ຺ຕສຸຂປີຓິໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ສຎ຺ຊາຕປ຺ປສາໂທ ປພ຺ພຊິຕ຺ວາ ວາຍມນ຺ໂຕ ນຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຍານກາໂຣ ປຸເຣ ອາສິນ຺ຕິອາທິມາຫ. ຕຕ຺ຖ ຍານກາໂຣຕິ ຍນ຺ຕິ ເອເຕນ ອິຈ຺ຉິຕິຈ຺ຉິຕຏ຺ຐານນ຺ຕິ ຍານໍ, ຕໍ ກໂຣຕີຕິ ຍານກາໂຣ, ປຸເຣ ພຸທ຺ຘທສ຺ສນສມເຍ ອຫໍ ຍານກາໂຣ ອາສິໍ ອໂຫສິນ຺ຕິ ອຕ຺ໂຖ. ຈນ຺ທນໍ ຜລກໍ ກຕ຺ວາຕິ ຈນ຺ທຕິ ປຣິຬາຫໍ ວູປສເມຕີຕິ ຈນ຺ທນໍ. ອຖ ວາ ຈນ຺ທນ຺ຕິ ສຸຄນ຺ຘວາສນຕ຺ຖໍ ສຣີຣໍ ວິລິມ຺ປນ຺ຕິ ເອເຕນາຕິ ຈນ຺ທນໍ, ຕໍ ອາລມ຺ພນຜລກໍ ກຕ຺ວາ. ໂລກພນ຺ຘຸໂນຕິ ສກລໂລກສ຺ສ ພນ຺ຘຸ ຎາຕິຠູໂຕຕິ ໂລກພນ຺ຘຸ, ຕສ຺ສ ໂລກພນ຺ຘຸໂນ ສຕ຺ຖຸສ຺ສ ອທາສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ຜລກທາຍກຕ຺ເຖຣອປທານວຓ຺ຓນາ ສມຕ຺ຕາ.

໙. ວຏໍສກິຍຕ຺ເຖຣອປທານວຓ຺ຓນາ

ສຸເມໂຘ ນາມ ນາເມນາຕິອາທິກໍ ອາຍສ຺ມໂຕ ວຏໍສກິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມມຸນິນ຺ເທສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖ ອາທີນວໍ ທິສ຺ວາ ເຄຫໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ມຫາວເນ ວິຫາສິ. ຕສ຺ມິໍ ສມເຍ ສຸເມໂຘ ຠຄວາ ວິເວກກາມຕາຍ ຕໍ ວນໍ ສມ຺ປາປຸຓິ. ອຖ ໂສ ຕາປໂສ ຠຄວນ຺ຕໍ ທິສ຺ວາ ປສນ຺ນມານໂສ ວິກສິຕໍ ສຬລປຸປ຺ຜໍ ຄເຫຕ຺ວາ ວຏໍສກາກາເຣນ ຄນ຺ເຖຕ຺ວາ ຠຄວໂຕ ປາທມູເລ ຐເປຕ຺ວາ ປູເຊສິ. ຠຄວາ ຕສ຺ສ ຈິຕ຺ຕປ຺ປສາທຕ຺ຖາຍ ອນຸໂມທນມກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ກຸເລ ຊາໂຕ ວຸທ຺ຘິມນ຺ວາຍ ສທ຺ໂຘ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໓. ໂສ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸເມໂຘ ນາມ ນາເມນາຕິອາທິ ວຸຕ຺ຕໍ. ວິເວກມນຸພ຺ຣູຫນ຺ໂຕຕິ ຊນາກິຓ຺ຓຕໍ ປຫາຍ ຊນວິເວກໍ ຈິຕ຺ຕວິເວກຎ຺ຈ ອນຸພ຺ຣູຫນ຺ໂຕ ວຑ຺ເຒນ຺ໂຕ ພຫຸລີກໂຣນ຺ໂຕ ມຫາວນໍ ອຊ຺ໂຌຄາຫິ ປາວິສີຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ວຏໍສກິຍຕ຺ເຖຣອປທານວຓ຺ຓນາ ສມຕ຺ຕາ.

໑໐. ປລ຺ລງ຺ກທາຍກຕ຺ເຖຣອປທານວຓ຺ຓນາ

ສຸເມຘສ຺ສ ຠຄວໂຕຕິອາທິກໍ ອາຍສ຺ມໂຕ ປລ຺ລງ຺ກທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ນິພ຺ພານາຘິຄມຕ຺ຖາຍ ກຕປຸຎ຺ຎູປຈໂຍ ສຸເມຘສ຺ສ ຠຄວໂຕ ກາເລ ຄຫປຕິກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ມຫາໂຠຄສມ຺ປນ຺ໂນ ສຕ຺ຖຣິ ປສີທິຕ຺ວາ ຘມ຺ມໍ ສຸຕ຺ວາ ຕສ຺ສ ສຕ຺ຖຸໂນ ສຕ຺ຕຣຕນມຍໍ ປລ຺ລງ຺ກໍ ກາເຣຕ຺ວາ ມຫນ຺ຕໍ ປູຊໍ ອກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ປູຊິໂຕ ອໂຫສິ. ໂສ ອນຸກ຺ກເມນ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ວາ ປຸພ຺ເພ ກຕປຸຎ຺ຎນາເມນ ປລ຺ລງ຺ກທາຍກຕ຺ເຖໂຣຕິ ປາກໂຏ ອໂຫສິ. ເຫຏ຺ຐາ ວິຍ ອຸປຣິປິ ປຸພ຺ເພ ກຕປຸຎ຺ຎນາເມນ ເຖຣານໍ ນາມານິ ເອວເມວ ເວທິຕພ຺ພານິ.

໔໗. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸເມຘສ຺ສ ຠຄວໂຕຕິອາທິມາຫ. ປລ຺ລງ຺ໂກ ຫິ ມຍາ ທິນ຺ໂນຕິ ປລ຺ລງ຺ກໍ ອູຣຸພທ຺ຘາສນໍ ກຕ຺ວາ ຍຕ຺ຖ ອຸປວີສນ຺ຕິ ນິສີທນ຺ຕິ, ໂສ ປລ຺ລງ຺ໂກຕິ ວຸຈ຺ຈຕິ, ໂສ ປລ຺ລງ຺ໂກ ສຕ຺ຕຣຕນມໂຍ ມຍາ ທິນ຺ໂນ ປູຊິໂຕຕິ ອຕ຺ໂຖ. ສອຸຕ຺ຕຣສປຈ຺ຉໂທຕິ ສຫ ອຸຕ຺ຕຣຈ຺ຉເທນ ສຫ ປຈ຺ຉເທນ ສອຸຕ຺ຕຣສປຈ຺ຉໂທ, ອຸປຣິວິຕານໍ ພນ຺ຘິຕ຺ວາ ອາສນໍ ອຸຕ຺ຕມວຕ຺ເຖຫິ ອຈ຺ຉາເທຕ຺ວາຕິ ອຕ຺ໂຖ. ເສສໍ ປາກຏເມວາຕິ.

ປລ຺ລງ຺ກທາຍກຕ຺ເຖຣອປທານວຓ຺ຓນາ ສມຕ຺ຕາ.

ປນ຺ນຣສມວຄ຺ຄວຓ຺ຓນາ ສມຕ຺ຕາ.