໑໖. ພນ຺ຘຸຊີວກວຄ຺ໂຄ

໑. ພນ຺ຘຸຊີວກຕ຺ເຖຣອປທານວຓ຺ຓນາ

ຈນ຺ທໍວ ວິມລໍ ສຸທ຺ຘນ຺ຕິອາທິກໍ ອາຍສ຺ມໂຕ ພນ຺ຘຸຊີວກຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ວສນ຺ໂຕ ສິຂິສ຺ສ ຠຄວໂຕ ຣູປກາຍສມ຺ປຕ຺ຕິໍ ທິສ຺ວາ ປສນ຺ນມານໂສ ພນ຺ຘຸຊີວກປຸປ຺ຜານິ ຄເຫຕ຺ວາ ຠຄວໂຕ ປາທມູເລ ປູເຊສິ. ຠຄວາ ຕສ຺ສ ຈິຕ຺ຕປ຺ປສາທວຑ຺ຒນຕ຺ຖາຍ ອນຸໂມທນມກາສິ. ໂສ ຍາວຕາຍຸຕໍ ຐຕ຺ວາ ເຕເນວ ປຸຎ຺ເຎນ ເທວໂລເກ ນິພ຺ພຕ຺ໂຕ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິອາທິສມ຺ປຕ຺ຕິໂຍ ອນຸຠວິຕ຺ວາ ອິມສ຺ສ ອມ຺ຫາກໍ ສມ຺ມາສມ຺ພຸທ຺ຘສ຺ສ ອຸປ຺ປນ຺ນກາເລ ຄຫປຕິກຸເລ ນິພ຺ພຕ຺ໂຕ ຣູປຄ຺ຄຍສຄ຺ຄປ຺ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ສທ຺ຘາຊາໂຕ ເຄຫໍ ປຫາຍ ປພ຺ພຊິໂຕ ອຣຫຕ຺ຕໍ ປາປຸຓິ.

໑. ໂສ ປຸພ຺ເພນິວາສຎາເຓນ ປຸພ຺ເພ ກຕກຸສລກມ຺ມໍ ອນຸສ຺ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຈນ຺ທໍວ ວິມລໍ ສຸທ຺ຘນ຺ຕິອາທິມາຫ. ຕຕ຺ຖ ຈນ຺ທໍວ ວິມລໍ ສຸທ຺ຘນ຺ຕິ ອພ຺ຠາ, ມຫິກາ, ຘຸໂມ, ຣໂຊ, ຣາຫູຕິ ອິເມຫິ ອຸປກ຺ກິເລສມເລຫິ ວິມຸຕ຺ຕໍ ຈນ຺ທໍ ອິວ ທິຍຑ຺ຒສຫສ຺ສຸປກ຺ກິເລສມລານໍ ປຫີນຕ຺ຕາ ວິມລໍ ນິກ຺ກິເລສຕ຺ຕາ ສຸທ຺ຘໍ ປສນ຺ນໍ ສິຂິໍ ສມ຺ພຸທ຺ຘນ຺ຕິ ສມ຺ພນ຺ໂຘ. ກິເລສກທ຺ທມານໍ ອຠາເວນ ອນາວິລໍ. ນນ຺ທີຠວສງ຺ຂາຕາຍ ພລວສ຺ເນຫາຍ ປຣິສມນ຺ຕໂຕ ຂີຓຕ຺ຕາ ນນ຺ທີຠວປຣິກ຺ຂີຓໍ. ຕິຓ຺ຓໍ ໂລເກຕິ ໂລກຕ຺ຕຍໂຕ ຕິຓ຺ຓໍ ອຸຕ຺ຕິຓ຺ຓໍ ອຕິກ຺ກນ຺ຕໍ. ວິສຕ຺ຕິກນ຺ຕິ ວິສຕ຺ຕິກໍ ວຸຈ຺ຈຕິ ຕຓ຺ຫາ, ນິຕ຺ຕຓ຺ຫນ຺ຕິ ອຕ຺ໂຖ.

໒. ນິພ຺ພາປຍນ຺ຕໍ ຊນຕນ຺ຕິ ຘມ຺ມວສ຺ສໍ ວສ຺ສນ຺ໂຕ ຊນຕໍ ຊນສມູຫໍ ກິເລສປຣິຬາຫາຠາເວນ ນິພ຺ພາປຍນ຺ຕໍ ວູປສເມນ຺ຕໍ. ສຍໍ ສໍສາຣໂຕ ຕິຓ຺ຓໍ, ສພ຺ພສຕ຺ເຕ ສໍສາຣໂຕ ຕາຣຍນ຺ຕໍ ອຕິກ຺ກເມນ຺ຕໍ ຈຕຸນ຺ນໍ ສຈ຺ຈານໍ ມຸນນໂຕ ຊານນໂຕ ມຸນິໍ ສິຂິໍ ສມ຺ພຸທ຺ຘນ຺ຕິ ສມ຺ພນ຺ໂຘ. ວນສ຺ມິໍ ຌາຍມານນ຺ຕິ ອາຣມ຺ມຓູປນິຊ຺ຌານລກ຺ຂຓູປນິຊ຺ຌາເນຫິ ຌາຍນ຺ຕໍ ຈິນ຺ເຕນ຺ຕໍ ຈິຕ຺ເຕນ ຠາເວນ຺ຕໍ ວນມຊ຺ເຌຕິ ອຕ຺ໂຖ. ເອກຄ຺ຄໍ ເອກຄ຺ຄຈິຕ຺ຕໍ ສຸສມາຫິຕໍ ສຸຏ຺ຐຸ ອາຣມ຺ມເຓ ອາຫິຕໍ ຐປິຕຈິຕ຺ຕໍ ສິຂິໍ ມຸນິໍ ທິສ຺ວາຕິ ສມ຺ພນ຺ໂຘ.

໓. ພນ຺ຘຸຊີວກປຸປ຺ຜານີຕິ ພນ຺ຘູນໍ ຎາຕີນໍ ຊີວກໍ ຊີວິຕນິສ຺ສຍໍ ຫທຍມໍສໂລຫິຕໍ ພນ຺ຘຸຊີວກໍ ຫທຍມໍສໂລຫິຕສມານວຓ຺ຓໍ ປຸປ຺ຜໍ ພນ຺ຘຸຊີວກປຸປ຺ຜໍ ຄເຫຕ຺ວາ ສິຂິໂນ ໂລກພນ຺ຘຸໂນ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ພນ຺ຘຸຊີວກຕ຺ເຖຣອປທານວຓ຺ຓນາ ສມຕ຺ຕາ.

໒. ຕມ຺ພປຸປ຺ຜິຍຕ຺ເຖຣອປທານວຓ຺ຓນາ

ປຣກມ຺ມາຍເນ ຍຸຕ຺ໂຕຕິອາທິກໍ ອາຍສ຺ມໂຕ ຕມ຺ພປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ອາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປິຍທສ຺ສິສ຺ສ ຠຄວໂຕ ກາເລ ເກນຈິ ປຸເຣ ກເຕນ ອກຸສລກມ຺ເມນ ທຸຄ຺ຄຕກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ປເຣສໍ ກມ຺ມໍ ກຕ຺ວາ ຠຕິຍາ ຊີວິກໍ ກປ຺ເປສິ. ໂສ ເອວໍ ທຸກ຺ເຂນ ວສນ຺ໂຕ ປເຣສໍ ອປຣາຘໍ ກຕ຺ວາ ມຣຓຠເຍນ ປລາຍິຕ຺ວາ ວນໍ ປາວິສິ. ຕຕ຺ຖ ຄຕຏ຺ຐາເນ ປາຏລິໂພຘິໍ ທິສ຺ວາ ວນ຺ທິຕ຺ວາ ສມ຺ມຊ຺ຊິຕ຺ວາ ເອກສ຺ມິໍ ຣຸກ຺ເຂ ຕມ຺ພວຓ຺ຓໍ ປຸປ຺ຜໍ ທິສ຺ວາ ຕໍ ສພ຺ພໍ ກຓ຺ຓິເກ ໂອຈິນິຕ຺ວາ ໂພຘິປູຊໍ ອກາສິ. ຕຕ຺ຖ ຈິຕ຺ຕໍ ປສາເທຕ຺ວາ ວນ຺ທິຕ຺ວາ ປລ຺ລງ຺ກມາຠຸຊິຕ຺ວາ ນິສີທິ. ຕສ຺ມິໍ ຂເຓ ເຕ ມນຸສ຺ສາ ປທານຸປທິກໍ ອນຸພນ຺ຘິຕ຺ວາ ຕຕ຺ຖ ອຄມໍສຸ. ໂສ ເຕ ທິສ຺ວາ ໂພຘິໍ ອາວຊ຺ເຊນ຺ໂຕວ ປລາຍິຕ຺ວາ ຠຍານເກ ຄີຣິທຸຄ຺ຄປປາເຕ ປຕິຕ຺ວາ ມຣິ.

໗. ໂສ ໂພຘິປູຊາຍ ອນຸສ຺ສຣິຕຕ຺ຕາ ເຕເນວ ປີຕິໂສມນສ຺ເສນ ຕາວຕິໍສາທີສຸ ອຸປປນ຺ໂນ ຉ ກາມາວຈຣສມ຺ປຕ຺ຕິໍ ອນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິອາທິສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປຣກມ຺ມາຍເນ ຍຸຕ຺ໂຕຕິອາທິມາຫ. ຕຕ຺ຖ ປເຣສໍ ກມ຺ມານິ ປຣກມ຺ມານິ, ປຣກມ຺ມານໍ ອາຍເນ ກຣເຓ ວາຫເນ ຘາຣເຓ ຍຸຕ຺ໂຕ ໂຍຊິໂຕ ອໂຫສິນ຺ຕິ ອຕ຺ໂຖ. ເສສໍ ປາກຏເມວາຕິ.

ຕມ຺ພປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໓. ວີຖິສມ຺ມຊ຺ຊກຕ຺ເຖຣອປທານວຓ຺ຓນາ

ອຸເທນ຺ຕໍ ສຕຣໍສິໍ ວາຕິອາທິກໍ ອາຍສ຺ມໂຕ ວີຖິສມ຺ມຊ຺ຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຊາຕິສເຕສຸ ກຕປຸຎ຺ຎສຎ຺ຈໂຍ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ຆຣາວາສໍ ວສນ຺ໂຕ ນຄຣວາສີຫິ ສທ຺ຘິໍ ວີຖິໍ ສຊ຺ເຊຕ຺ວາ ນີຍມານໍ ຠຄວນ຺ຕໍ ທິສ຺ວາ ປສນ຺ນມານໂສ ວີຖິໍ ສມໍ ກຕ຺ວາ ຘຊໍ ຕຕ຺ຖ ອຸສ຺ສາເປສິ.

໑໕. ໂສ ເຕເນວ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ພຫຸມານຫທໂຍ ປພ຺ພຊິຕ຺ວາ ລທ຺ຘູປສມ຺ປໂທ ນຈິຣສ຺ເສວ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ອນຸສ຺ສຣນ຺ໂຕ ປຈ຺ຈກ຺ຂໂຕ ຊານິຕ຺ວາ ປຸພ຺ພຈຣິຕາປທານໍ ປກາເສນ຺ໂຕ ອຸເທນ຺ຕໍ ສຕຣໍສິໍ ວາຕິອາທິມາຫ. ຕຕ຺ຖ ອຸເທນ຺ຕໍ ອຸຄ຺ຄຈ຺ຉນ຺ຕໍ ສຕຣໍສິໍ ສຕປຠໍ. ສຕຣໍສີຕິ ເທສນາສີສມຕ຺ຕໍ, ອເນກສຕສຫສ຺ສປຠໍ ສູຣິຍໍ ອິວາຕິ ອຕ຺ໂຖ. ປີຕຣໍສິໍວ ຠາຓຸມນ຺ຕິ ປີຕຣໍສິໍ ສໍກຸຈິຕປຠໍ ຠາຓຸມໍ ປຠາວນ຺ຕໍ ຈນ຺ທມຓ຺ຑລໍ ອິວ ສມ຺ພຸທ຺ຘໍ ທິສ຺ວາຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ວີຖິສມ຺ມຊ຺ຊກຕ຺ເຖຣອປທານວຓ຺ຓນາ ສມຕ຺ຕາ.

໔. ກກ຺ກາຣຸປຸປ຺ຜປູຊກຕ຺ເຖຣອປທານວຓ຺ຓນາ

ເທວປຸຕ຺ໂຕ ອຫໍ ສນ຺ໂຕຕິອາທິກໍ ອາຍສ຺ມໂຕ ກກ຺ກາຣຸປຸປ຺ຜປູຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ກຕປຸຎ຺ຎສຎ຺ຈໂຍ ສິຂິສ຺ສ ຠຄວໂຕ ກາເລ ຠຸມ຺ມຏ຺ຐກເທວປຸຕ຺ໂຕ ຫຸຕ຺ວາ ນິພ຺ພຕ຺ໂຕ ສິຂິໍ ສມ຺ມາສມ຺ພຸທ຺ຘໍ ທິສ຺ວາ ທິພ຺ພກກ຺ກາຣຸປຸປ຺ຜໍ ຄເຫຕ຺ວາ ປູເຊສິ.

໒໑. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ເອກຕິໍສກປ຺ປພ຺ຠນ຺ຕເຣ ອຸຠຍສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ປຈ຺ຈກ຺ຂໂຕ ຎຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ເທວປຸຕ຺ໂຕ ອຫໍ ສນ຺ໂຕຕິອາທິມາຫ. ຕຕ຺ຖ ທິພ຺ພນ຺ຕິ ກີຬນ຺ຕິ ປຎ຺ຈຫິ ທິພ຺ເພຫິ ກາມຄຸເຓຫີຕິ ເທວາ, ເທວານໍ ປຸຕ຺ໂຕ, ເທໂວ ເອວ ວາ ປຸຕ຺ໂຕ ເທວປຸຕ຺ໂຕ, ອຫໍ ເທວປຸຕ຺ໂຕ ສນ຺ໂຕ ວິຊ຺ຊມາໂນ ທິພ຺ພໍ ກກ຺ກາຣຸປຸປ຺ຜໍ ປຄ຺ຄຍ຺ຫ ປກາເຣນ, ຄເຫຕ຺ວາ ສິຂິສ຺ສ ຠຄວໂຕ ອຠິໂຣປຍິໍ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ກກ຺ກາຣຸປຸປ຺ຜປູຊກຕ຺ເຖຣອປທານວຓ຺ຓນາ ສມຕ຺ຕາ.

໕. ມນ຺ທາຣວປຸປ຺ຜປູຊກຕ຺ເຖຣອປທານວຓ຺ຓນາ

ເທວປຸຕ຺ໂຕ ອຫໍ ສນ຺ໂຕຕິອາທິກໍ ອາຍສ຺ມໂຕ ມນ຺ທາຣວປຸປ຺ຜປູຊກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ຠຸມ຺ມຏ຺ຐກເທວປຸຕ຺ໂຕ ຫຸຕ຺ວາ ນິພ຺ພຕ຺ໂຕ ສິຂິໍ ຠຄວນ຺ຕໍ ທິສ຺ວາ ປສນ຺ນມານໂສ ທິພ຺ພມນ຺ທາຣວປຸປ຺ເຜຫິ ປູເຊສິ.

໒໕. ໂສ ເຕນ ປຸຎ຺ເຎນາຕິອາທິກໍ ສພ຺ພໍ ອນນ຺ຕຣຕ຺ເຖຣສ຺ສ ອປທານວຓ຺ຓນາຍ ວຸຕ຺ຕນເຍເນວ ເວທິຕພ຺ພນ຺ຕິ.

ມນ຺ທາຣວປຸປ຺ຜປູຊກຕ຺ເຖຣອປທານວຓ຺ຓນາ ສມຕ຺ຕາ.

໖. ກທມ຺ພປຸປ຺ຜິຍຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ກທມ຺ພປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສມ຺ມາສມ຺ພຸທ຺ຘສຸຎ຺ເຎ ໂລເກ ເອກສ຺ມິໍ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ວສນ຺ໂຕ ຕຕ຺ຖ ອາທີນວໍ ທິສ຺ວາ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕສມີເປ ກຸກ຺ກຸເຏ ນາມ ປພ຺ພເຕ ອສ຺ສມໍ ກຕ຺ວາ ວິຫາສິ. ໂສ ຕຕ຺ຖ ສຕ຺ຕ ປຈ຺ເຈກພຸທ຺ເຘ ທິສ຺ວາ ປສນ຺ນມານໂສ ປຸປ຺ຜິຕໍ ກທມ຺ພປຸປ຺ຜໍ ໂອຈິນິຕ຺ວາ ເຕ ປຈ຺ເຈກພຸທ຺ເຘ ປູເຊສິ. ເຕປິ ‘‘ອິຈ຺ຉິຕໍ ປຕ຺ຖິຕ’’ນ຺ຕິອາທິນາ ອນຸໂມທນໍ ອກໍສຸ.

໓໐. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕໍ ວຸຕ຺ຕຕ຺ຖເມວ. ກຸກ຺ກຸໂຏ ນາມ ປພ຺ພໂຕຕິ ຕສ຺ສ ອຸໂຠສຸ ປສ຺ເສສຸ ກຸກ຺ກຸຏຈູຬາກາເຣນ ປພ຺ພຕກູຏານໍ ວິຊ຺ຊມານຕ຺ຕາ ກຸກ຺ກຸໂຏຕິ ສງ຺ຂໍ ຄໂຕ. ປກາເຣນ ຕິໂຣ ຫຸຕ຺ວາ ປຕິຏ຺ຐຫຕີຕິ ປພ຺ພໂຕ. ຕມ຺ຫິ ປພ຺ພຕປາທມ຺ຫີຕິ ຕສ຺ມິໍ ປພ຺ພຕສມີເປ. ສຕ຺ຕ ພຸທ຺ຘາ ວສນ຺ຕີຕິ ສຕ຺ຕ ປຈ຺ເຈກພຸທ຺ຘາ ຕສ຺ມິໍ ກຸກ຺ກຸຏປພ຺ພຕປາເທ ປຓ຺ຓສາລາຍໍ ວສນ຺ຕີຕິ ອຕ຺ໂຖ.

໓໑. ທີປຣາຊໍວ ອຸຄ຺ຄຕນ຺ຕິ ທີປານໍ ຣາຊາ ທີປຣາຊາ, ສພ຺ເພສໍ ທີປານໍ ຊລມານານໍ ຕາຣການໍ ຣາຊາ ຈນ຺ໂທຕິ ອຕ຺ໂຖ. ອຖ ວາ ສພ຺ເພສຸ ຊມ຺ພຸທີປປຸພ຺ພວິເທຫອປຣໂຄຍານອຸຕ຺ຕຣກຸຣຸສງ຺ຂາເຕສຸ ຈຕູສຸ ທີເປສຸ ທ຺ວິສຫສ຺ສປຣິຕ຺ຕທີເປສຸ ຈ ຣາຊາ ອາໂລກຜຣຓໂຕ ຈນ຺ໂທ ທີປຣາຊາຕິ ວຸຈ຺ຈຕິ, ຕໍ ນເຠ ອຸຄ຺ຄຕໍ ຈນ຺ທໍ ອິວ ປຸປ຺ຜິຕໍ ຜຸລ຺ລິຕໍ ກທມ຺ພຣຸກ຺ຂໍ ທິສ຺ວາ ຕໂຕ ປຸປ຺ຜໍ ໂອຈິນິຕ຺ວາ ອຸໂຠຫິ ຫຕ຺ເຖຫິ ປຄ຺ຄຍ຺ຫ ປກາເຣນ ຄເຫຕ຺ວາ ສຕ຺ຕ ປຈ຺ເຈກພຸທ຺ເຘ ສໂມກິຣິໍ ສຸຏ຺ຐຸ ໂອກິຣິໍ, ອາທເຣນ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ກທມ຺ພປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໗. ຕິຓສູລກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ຕິຓສູລກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມຊິນວເຣສຸ ກຕປຸຎ຺ຎສມ຺ຠາໂຣ ອຸປ຺ປນ຺ນຸປ຺ປນ຺ນຠເວ ກຸສລານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖ ໂທສໍ ທິສ຺ວາ ຕໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ວສນ຺ໂຕ ຫິມວນ຺ຕສມີເປ ຠູຕຄເຓ ນາມ ປພ຺ພເຕ ວສນ຺ຕໍ ເອກຕໍ ວິເວກມນຸພ຺ຣູຫນ຺ຕໍ ສິຂິໍ ສມ຺ພຸທ຺ຘໍ ທິສ຺ວາ ປສນ຺ນມານໂສ ຕິຓສູລປຸປ຺ຜໍ ຄເຫຕ຺ວາ ປາທມູເລ ປູເຊສິ. ພຸທ຺ໂຘປິ ຕສ຺ສ ອນຸໂມທນໍ ອກາສິ.

໓໕. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສາສເນ ປສນ຺ໂນ ປພ຺ພຊິຕ຺ວາ ອຸປນິສ຺ສຍສມ຺ປນ຺ນຕ຺ຕາ ນຈິຣສ຺ເສວ ອຣຫຕ຺ຕໍ ປາປຸຓິຕ຺ວາ ປຸພ຺ພກມ຺ມໍ ສຣິຕ຺ວາ ໂສມນສ຺ສປ຺ປຕ຺ໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຠູຕຄໂຓ ນາມ ປພ຺ພໂຕຕິ ຠູຕຄຓານໍ ເທວຍກ຺ຂສມູຫານໍ ອາວາສຠູຕຕ຺ຕາ ຠວນສທິສຕ຺ຕາ ອວິຣູຬ຺ຫຠາເວນ ປວຕ຺ຕຕ຺ຕາ ຈ ຠູຕຄໂຓ ນາມ ປພ຺ພໂຕ, ຕສ຺ມິໍ ເອໂກ ອທຸຕິໂຍ ຊິໂນ ຊິຕມາໂຣ ພຸທ຺ໂຘ ວສເຕ ທິພ຺ພພ຺ຣຫ຺ມອຣິຍອິຣິຍາປຖວິຫາເຣຫິ ວິຫຣຕີຕິ ອຕ຺ໂຖ.

໓໖. ເອກູນສຕສຫສ຺ສໍ, ກປ຺ປໍ ນ ວິນິປາຕິໂກຕິ ເຕນ ຕິຓສູລປຸປ຺ຜປູຊາກຣຓຜເລນ ນິຣນ຺ຕຣໍ ເອກູນສຕສຫສ຺ສກປ຺ປານໍ ອວິນິປາຕໂກ ຈຕຸຣາປາຍວິນິມຸຕ຺ໂຕ ສຄ຺ຄສມ຺ປຕ຺ຕິຠວເມວ ອຸປປນ຺ໂນຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ຕິຓສູລກຕ຺ເຖຣອປທານວຓ຺ຓນາ ສມຕ຺ຕາ.

໘. ນາຄປຸປ຺ຜິຍຕ຺ເຖຣອປທານວຓ຺ຓນາ

ສຸວຈ຺ໂຉ ນາມ ນາເມນາຕິອາທິກໍ ອາຍສ຺ມໂຕ ນາຄປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມຊິນນິສເຠສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ເວທຕ຺ຕຍາທີສຸ ສກສິປ຺ເປສຸ ນິປ຺ຜຕ຺ຕິໍ ປຕ຺ວາ ຕຕ຺ຖ ສາຣໍ ອທິສ຺ວາ ຫິມວນ຺ຕໍ ປວິສິຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ຌານສມາປຕ຺ຕິສຸເຂນ ວີຕິນາເມສິ. ຕສ຺ມິໍ ສມເຍ ປທຸມຸຕ຺ຕໂຣ ຠຄວາ ຕສ຺ສານຸກມ຺ປາຍ ຕຕ຺ຖ ອຄມາສິ. ໂສ ຕາປໂສ ຕໍ ຠຄວນ຺ຕໍ ທິສ຺ວາ ລກ຺ຂຓສຕ຺ເຖສຸ ເຉກຕ຺ຕາ ຠຄວໂຕ ລກ຺ຂຓຣູປສມ຺ປຕ຺ຕິຍາ ປສນ຺ໂນ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ອາກາສໂຕ ອໂນຕິຓ຺ຓຕ຺ຕາ ປູຊາສກ຺ກາເຣ ອກເຕເຍວ ອາກາເສເນວ ປກ຺ກາມິ. ອຖ ໂສ ຕາປໂສ ສສິສ຺ໂສ ນາຄປຸປ຺ຜໍ ໂອຈິນິຕ຺ວາ ເຕນ ປຸປ຺ເຜນ ຠຄວໂຕ ຄຕທິສາຠາຄມຄ຺ຄໍ ປູເຊສິ.

໓໙. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວນ຺ໂຕ ສພ຺ພຕ຺ຖ ປູຊິໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາສມ຺ປນ຺ໂນ ປພ຺ພຊິຕ຺ວາ ວຕ຺ຕປຏິປຕ຺ຕິຍາ ສາສນໍ ໂສຠຍມາໂນ ນຈິຣສ຺ເສວ ອຣຫາ ຫຸຕ຺ວາ ‘‘ເກນ ນຸ ໂຂ ກຸສລກມ຺ເມນ ມຍາ ອຍໍ ໂລກຸຕ຺ຕຣສມ຺ປຕ຺ຕິ ລທ຺ຘາ’’ຕິ ອຕີຕກມ຺ມໍ ສຣນ຺ໂຕ ປຸພ຺ພກມ຺ມໍ ປຈ຺ຈກ຺ຂໂຕ ຎຕ຺ວາ ສຎ຺ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ສຸວຈ຺ໂຉ ນາມ ນາເມນາຕິອາທິມາຫ. ຕຕ຺ຖ ວຈ຺ຉໂຄຕ຺ເຕ ຊາຕຕ຺ຕາ ວຈ຺ໂຉ, ສຸນ຺ທໂຣ ຈ ໂສ ວຈ຺ໂຉ ເຈຕິ ສຸວຈ຺ໂຉ. ນາເມນ ສຸວຈ຺ໂຉ ນາມ ພ຺ຣາຫ຺ມໂຓ ມນ຺ຕປາຣຄູ ເວທຕ຺ຕຍາທິສກລມນ຺ຕສຕ຺ເຖ ໂກຏິປ຺ປຕ຺ໂຕຕິ ອຕ຺ໂຖ. ເສສໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ນາຄປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໙. ປຸນ຺ນາຄປຸປ຺ຜິຍຕ຺ເຖຣອປທານວຓ຺ຓນາ

ການນໍ ວນໂມຄຍ຺ຫາຕິອາທິກໍ ອາຍສ຺ມໂຕ ປຸນ຺ນາຄປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຜຸສ຺ສສ຺ສ ຠຄວໂຕ ກາເລ ເນສາທກຸເລ ນິພ຺ພຕ຺ໂຕ ມຫາວນໍ ປວິຏ຺ໂຐ ຕຕ຺ຖ ສຸປຸປ຺ຜິຕປຸນ຺ນາຄປຸປ຺ຜໍ ທິສ຺ວາ ເຫຕຸສມ຺ປນ຺ນຕ຺ຕາ ພຸທ຺ຘາຣມ຺ມຓປີຕິວເສນ ຠຄວນ຺ຕໍ ສຣິຕ຺ວາ ຕໍ ປຸປ຺ຜໍ ສຫ ກຓ຺ຓິກາຫິ ໂອຈິນິຕ຺ວາ ວາລຸກາຫິ ເຈຕິຍໍ ກຕ຺ວາ ປູເຊສິ.

໔໖. ໂສ ເຕນ ປຸຎ຺ເຎນ ທ຺ເວນວຸຕິກປ຺ເປ ນິຣນ຺ຕຣໍ ເທວມນຸສ຺ສສມ຺ປຕ຺ຕິໂຍເຍວ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ປຸພ຺ພວາສນາພເລນ ສາສເນ ປສນ຺ໂນ ປພ຺ພຊິຕ຺ວາ ວາຍມນ຺ໂຕ ນຈິຣສ຺ເສວ ອຣຫາ ຫຸຕ຺ວາ ປຸພ຺ເພ ກຕກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ການນໍ ວນໂມຄຍ຺ຫາຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕຕ຺ຕາ ອຸຕ຺ຕານຕ຺ຖເມວາຕິ.

ປຸນ຺ນາຄປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໑໐. ກຸມຸທທາຍກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ກຸມຸທທາຍກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຫິມວນ຺ຕສ຺ສ ອາສນ຺ເນ ມຫນ຺ເຕ ຊາຕສ຺ສເຣ ກຸກຸຕ຺ໂຖ ນາມ ປກ຺ຂີ ຫຸຕ຺ວາ ນິພ຺ພຕ຺ໂຕ ເກນຈິ ອກຸສເລນ ປກ຺ຂີ ສມາໂນປິ ປຸພ຺ເພ ກຕສມ຺ຠາເຣນ ພຸທ຺ຘິສມ຺ປນ຺ໂນ ປຸຎ຺ຎາປຸຎ຺ເຎສຸ ເຉໂກ ສີລວາ ປາຓໂຄຈຣໂຕ ປຏິວິຣໂຕ ອໂຫສິ. ຕສ຺ມິໍ ສມເຍ ປທຸມຸຕ຺ຕໂຣ ຠຄວາ ອາກາເສນາຄນ຺ຕ຺ວາ ຕສ຺ສ ສມີເປ ຈງ຺ກມຕິ. ອຖ ໂສ ສກຸໂຓ ຠຄວນ຺ຕໍ ທິສ຺ວາ ປສນ຺ນຈິຕ຺ໂຕ ກຸມຸທປຸປ຺ຜໍ ຑໍສິຕ຺ວາ ຠຄວໂຕ ປາທມູເລ ປູເຊສິ. ຠຄວາ ຕສ຺ສ ໂສມນສ຺ສຸປ຺ປາທນຕ຺ຖໍ ປຏິຄ຺ຄເຫຕ຺ວາ ອນຸໂມທນມກາສິ.

໕໑. ໂສ ເຕນ ປຸຎ຺ເຎນ ເທວມນຸສ຺ເສສຸ ອຸຠຍສມ຺ປຕ຺ຕິສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ອຎ຺ຎຕຣສ຺ມິໍ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ມຫທ຺ຘໂນ ມຫາໂຠໂຄ ຣຕນຕ຺ຕເຍ ປສນ຺ໂນ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ປຈ຺ຈກ຺ຂໂຕ ຎຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ປທຸມຸປ຺ປລສຎ຺ຉນ຺ໂນຕິ ເອຕ຺ຖ ສຕປຕ຺ເຕຫິ ສມ຺ປຸຓ຺ໂຓ ເສຕປທຸໂມ ຈ ຕີຓິ ນີລຣຕ຺ຕເສຕຸປ຺ປລານິ ຈ ປທຸມຸປ຺ປລານິ ເຕຫິ ສຎ຺ຉນ຺ໂນ ຄຫນີຠູໂຕ ສມ຺ປຸຓ຺ໂຓ ມຫາຊາຕສ຺ສໂຣ ອຫູຕິ ສມ຺ພນ຺ໂຘ. ປຸຓ຺ຑຣີກສໂມຕ຺ຖໂຏຕິ ປຸຓ຺ຑຣີເກຫິ ຣຕ຺ຕປທຸເມຫິ ໂອຕ຺ຖໂຏ ສມ຺ປຸຓ຺ໂຓຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ກຸມຸທທາຍກຕ຺ເຖຣອປທານວຓ຺ຓນາ ສມຕ຺ຕາ.

ໂສຬສມວຄ຺ຄວຓ຺ຓນາ ສມຕ຺ຕາ.